前文 再續 啊 書 接 上 一回 啊 。
話説 韋小寶 向 住 嗰位 綠衫 女郎 行近 幾步 ，只 覺得 全身 發軟 ，手 揗 腳 震 。
忽然間 ，只係 想 向 佢 跪低 ，𠼮佢 ，噉啊 再 行 一步 ，喺 喉嚨 低低 噉 叫咗 一 聲 ，哎呀 ，好似 受傷 嘅 野獸 噉啊 。
突然間 ，又 想 不如 捻死佢 算喇 噉 。
嗰個 女郎 聽到 怪聲 ，即刻 擘翻開 雙眼 ，見到 佢 眼神 咁 古怪 嘅 ，就 尖聲 叫起嚟 。
韋小寶 窒咗 一窒 ，退後 幾步 喪咗 噉𢴈 喺 地 ，佢 諗 ：
喺 皇宮 裏頭 ，我 叫 方姑娘 同 小郡主 做 我 大 老婆 小 老婆 ，嗰 陣 時候 嘻嘻哈哈 ，幾 咁 輕鬆自在 啊 。
想攬佢就攬佢 ，想錫佢就錫佢 ，一啲都唔怕嘅 。
呢 個 女仔 明明 畀 老和尚 點中 咗 穴道 ， 唔 逳 得 㗎 嘞 ， 點解 我連 摸 佢 一 摸 隻 手 都 唔 敢 呢 ？
睇住 佢 隻 手 喺 僧袍 下 便 露出嚟 ，真係 想 去 揸一揸 ，就係 冇 勇氣 。
忍唔住 鬧 一聲 ：真 冇 鬼用 嘞 ！
嗰個 女郎 唔知 佢 講 邊個 噃 就 睇實 佢 。
韋小寶 塊面 一紅 ， 佢 就 話 ： 我 鬧 自己 膽小 唔 中用 咋 唔 係 鬧 你 啊 。
嗰個 女郎 話 ：你 咁 無法無天 仲 話 膽小 添 ，你 如果 膽小 啊 ，真係 要 謝天謝地 喇 。
一聽 呢句 説話 ，韋小寶 突然間 膽壯 起嚟 ，佢 企 起身 話 ：
好 ，我 要 無法無天 嘞 ，我 要 剝光 你 嘅 衫 。
嘩 嗰個 女郎 驚到 不得了 ，爭啲 又 試暈 咁滯 。
韋小寶 行到 佢 面前 ，見到 佢 眼光 裏 便 呢 充滿 咗 憤恨 ，個 心 話 ：
算喇算喇算喇 ，我 韋小寶 係 烏龜 王八蛋 ，向 你 投降喇 我 唔 敢 逳手喇 。
就好聲好氣噉話 ：我 一生出嚟 呢 就 怕 老婆 ，我 放 你 走 罷喇 。
嗰個 女郎 啊 啱啱 冇 咁 驚唧 ，聽 佢 噉樣 講 又 嬲 喇 佢 話 ：
你 ， 你 喺 嗰 個 市鎮 ， 同 嗰 啲 ， 同 嗰 啲 壞 女人 亂講 啲 咩 嘢 啊 ？
話 我 師姐 同埋 我 ，係 ，係 ，係 你 嘅 咩 嘢 吖 ，又 話 要 捉 你 返 去 啊 噉 ，你 ，你 呢個 衰人 ！
韋小寶 哈哈大笑話 ：哈哈哈哈哈哈哈哈哈 ，哈哈 ，啊 ，唉嗰啲 壞 女人 識得 咩嘢 吖 ？
將來 我 娶 你 做 老婆 之後 ，天下 一千間 妓院 裏 便 嘅 十萬個 老舉 ，排住 隊 企 喺 我 面前 啊 ，我 韋小寶 眼尾 都 唔 睄 佢哋 一眼 。
從早到晚 ，從晚到早 ，一日 十二個時辰 ，我 只係 睇住 我個好老婆 唧 。
你 再 叫 我 一 聲 老 ，老 ，我 永遠 唔 同 你 講 嘢 喇 。
好 ， 好好 好 ， 我 唔 叫 ， 我 唔 叫 ， 噉 我 喺 個 心裏 便 叫 得 喇 啩？
心裏 便 亦 唔 准 叫 啫 。
噉 我 喺 個 心裏 便 偷偷 噉 叫 你 又 聽唔到 嘅 ，你 唔會 知 㗎 。
哼 ，我 點 會 唔知 啊 ？
睇 你 啲 神情 古古怪怪 ，你嘅 心裏 便 就 喺度 叫 喇 。
媽媽 生 我 落嚟 ，我啲 神情 就係 噉 古古怪怪 㗎喇 。
實係因為 我 一 出 娘胎 ，就 知道 將來 呢 要 娶 你 做 老婆 定喇 。
嗰個 女郎 眯埋 眼 ，唔再 理 佢 嘞 。
韋小寶 話 ：喂 ，我 又 冇 叫 你 做 老婆 你 點解 唔理 我 唧 ？
仲話冇講 ，車大炮 。
你 話 娶 我 做 ，做咩 啊 ，噉咪 就係 囉 。
好 ，噉 都 唔 講 ，我 只係 講 將來 呢 做咗 你 老公 。
嗰 個 女郎 嬲 到極 嘞 ， 出力 眯住 雙眼 ， 噉 任憑 韋小寶 點樣 東拉西扯 嘍 佢 傾 偈 ， 佢 硬 係 唔 睬 佢 。
韋小寶 冇 計 嘞 ， 佢 想 話 ：嗱， 你 仲 唔 睬 我 ， 我要 錫 你 嘅 面 珠 㗎 喇 。
不過 呢句 説話 到 咗 口唇 邊 ，即刻 就 縮翻 ，噉 覺得 噉樣 威脅 呢位 天仙 一樣 嘅 美女 ，實在 係 猥褻 咗 佢 ，就 話 ：
我 只係 求 你 一件事 唧 ，你 講咗 個 名 我 聽 ，我 就 放翻 你 扯 。
你 呃 人 嘅 。
天下間 我 人人 都 呃 ，就係 唔 呃 你 。
呢啲 叫做 大丈夫 一言既出 死馬 難追 ，小妻子 一言不發 就 活馬 好追 喇 。
咩嘢 死馬 難追 ，活馬 好 追唧 ？
呢啲 係 我哋 少林派 嘅 説話 ，唉 總而言之 我 唔 呃 你 就係 啦 。
你 諗下 ，我 一心一意 等 你 個 孫 叫 我 做 爺爺 嘅 ，今日 如果 呃咗 你 ，你 個 仔 都 唔 肯 叫 我 做 阿爹 啊 ，仲 講 咩 嘢 孫 喎 。
嗰個 女郎 先不先 就 唔 懂 佢 講 咩 阿孫 啊 阿爺 啊噉樣 ，一諗 ，就 明白 佢 兜 個 圈 ，又 喺度 講 嗰件事 喇 ，就 話 ：
我 亦 唔 要 你 放 ，我 受咗 你 噉 嘅 侮辱 ，早 就 唔 想 做人 嘞 。
你 快啲 一刀 殺咗 我 罷啦 。
韋小寶 見到 佢 條頸處 有 條 刀痕 ，個心 好 內疚 啊 ，即刻 跪低 轟轟轟轟 ，對住 佢 叩咗 四個 響頭 ，噉 佢 話 ：
係 我 對 姑娘 唔住 咯 。
左右開弓 ，喺 自己 塊面 處 連氣 打咗 十幾下 ，兩邊 面珠 啊 當堂 紅腫咗 ，佢 話 ：
姑娘 唔好 難過 咯 ，韋小寶 呢個 混賬 傢伙 真係 抵打 嘅 。
企起身 ，開咗 房門 佢 話 ：喂 ，老師 侄 啊 ，我 要 解開 呢位 姑娘 嘅 穴道 ，應該 用 咩 法子 啊 ？
澄觀 一直 企喺 禪房 門口 等候 。
佢 耐力 深厚 ，韋小寶 同 嗰個 女郎 嘅 對答 ，雖然 好 細聲 啊 ，但係 都 聽到 晒 㗎 。
只 覺得 呢 位師叔 勸 説 女 施主 嘅 説 話 ， 認真 高深莫測 ， 咩 老公 啊 、 老婆 啊 、 孫啊 、 爺爺 啊 ， 似乎 都 同 武功 無關 。
小師叔 嘅 機鋒 妙語 太過 深奧 嘞 ，自己 佛法 修為 唔夠 ，唔能夠 領會 。
噉 收尾 聽到 小師叔 跪低 叩頭 ，自己 打 自己 塊 面 ，不由得 更加 佩服 。
禪宗 傳法 ，弟子 如果 唔明白 師尊 所傳 嘅 微言妙義 ，師父 啊 往往 一棍 打過去 ，大喝 一聲 。
用棍打人嚟傳法 ，係 唐朝 德山 禪師 開始 嘅 ；
用 大 喝 嚟 促使 人 醒悟 嘅 呢 ，係 唐代 道一 禪師 開始 嘅 。
當頭棒喝嘅成語就係噉嚟嘅 。
澄觀 個 心 諗 ：當年 高僧 用 棍 打 人 嚟到 點化 ，小師叔 呢 ，用 打 自己 嚟到 點化 呢位 女 施主 ，捨己為人 ，慈悲心腸 啊 更 勝過 前人 喇 。
正喺度感佩讚歎 ，聽佢問起 解穴嘅方法 ，連忙話 ：
呢位 女施主 被 封 嘅 係 大包穴 ，乃 係 屬 足 太陰 脾經 ，師叔 同 佢 喺 隻 腳 上 便 箕門 、血海 兩 處 穴道 推 血 過 宮 ，就 可以 解開 㗎 喇 。
韋小寶 話 ：箕門 、血海 兩個 穴道 喺 邊處 㗎 ？
澄觀啊捋起衣服 ，指畀佢睇 喺 膝蓋 內側 穴道 嘅 地方 ，等佢 試下 點過 冇錯 嘞 ，又 教 佢 推血 過 宮 嘅 方法 ，佢 話 ：
師叔 未 連過 內功 ，解穴 係 比較 慢 嘅 ，但係 推拿 得 有 細 半個 時辰 ，就 必定 可以 解開 嘅 。
韋小寶 岌一岌頭 ，閂翻埋 道 房門 ，行到 張 床前 便 。
嗰個 女郎 聽到 晒 兩個人 嘅 對答 ，佢 就 話 ：我 唔要 你 解穴 ，唔准 你 掂 我 個 身 啊 。
韋小寶 諗 ：喺 佢 腳坳 內側 推拿 半個 時辰 嘅 話 的確 唔係 點 妥當 嘅 。
雖然 ，我 誠心誠意 幫佢 解穴 ，但係 佢 一定 話 我 有意 輕薄 嘅 。
係 老公 輕薄 老婆 天公地道 ，何妨 良機 勿失 ，失機者 斬 。
不過 佢 脾氣 咁 剛烈 ，我 一 解開 佢 穴道 ，至 怕 佢 即刻 就 撞頭 埋 墻 撞死 咗 ，噉 韋小寶 就 絕子絕孫 㗎 嘞 噃 。
佢 捩 轉頭 大聲 噉 問 ：
男女授受不親 ， 我 哋 出家人 更加 要 講究 嘞 ， 誒 如果 唔 用 推拿 仲有 咩 法子 啊 ？
澄觀話 ：係 ，師叔 持戒 精嚴 ，師侄 佩服 之至 。
誒唔掂 對方 身體 去 解穴 係 有 法子 嘅 。
嗱 ，用 衫袖 輕輕 掃一掃 ，或者 用 一指禪 功夫 臨空 一指 。
哎呀呀 ，唔得啊唔得啊 ，小師叔 未 學過 內功 ，呢啲 法子 都 唔能夠 用 㗎 ，等 師侄 再 諗下 先 。
其實 只要 佢 自己 行入 房 ， 用 佢 先頭 講 嘅 法子 ， 都 可以 即時 解開 嗰 個 女郎 嘅 穴道 嘅 ， 但 係 師叔 既然 問起 咯 ， 噉 梗 係 要 設法 子 回答 㗎 。
但係 身 無 內功 個人 啊 ，唔 用 手指 推拿 而 要 解 穴 ，噉 就 話 乜 都 冇 咁 難 喇 。
就算 佢 再 諗 一年半載 ，亦 未必 諗得出 咩 法子 。
韋小寶 聽 佢 好耐 都 冇 回答 啊 ，咪 將 房門 推開 條 罅 裝下 。
只見佢 昂起 個 頭 定定噉 出神 ，哈 ，怕 就 噉 三個 時辰 唔 出聲 唔 出氣 亦 唔 出奇 啊 。
於是 又 閂 翻埋 道門 ，擰轉 身 ，噉啊 想起 當日 喺 皇宮 裏 便 ，同 沐劍屏 解穴 ，從 第一流 個 法子 用到 第九流 嘅 ，喺 佢 個 身 又 渣 又 捻 又 打 又 督 毫無 顧忌 。
佢 雖然 貴為 郡主 啊 ，不過 自己 呢一啲 都 冇 放在 眼內 。
但 對 面前 呢 位 女郎 呢 ， 點解 咁 戰戰兢兢 敬若天神 呢 唉 真 係 難解 嘞 。
望下 嗰個 女郎 ，只見 佢 皺埋 同 眼眉 神情 愁苦 ，不禁 可憐 起嚟 。
噉啊攞起 個 木魚錘 行到 佢 身邊 話 ：
唉 韋小寶 前世 欠落 你 嘅 債 ，今世 係 天 不怕 地 不怕 ，就係 怕 你 姑娘仔 一個人 唧 。
嗱 而 家 我 向 你 投降 喇 ， 我同 你 解穴 ， 唔 係 有心 佔 你 便宜 啊 。
講完 揭開 僧袍 ，將 木魚 錘 喺 佢 左腳 腳坳 內側 ，輕輕 噉 督咗 幾下 。
嗰個 女郎 矋 咗 佢 一 眼 ，眯埋 個 嘴 。
韋小寶 又 督咗 幾下 問佢 ：覺得 點啊 ？
嗰個 女郎 話 ：你 ，你就會 講埋 啲 下流話 ，除此之外 就 乜嘢 都 唔會 喇 。
澄觀 內力 深厚 ，佢 輕輕 一指 ，勁 透 穴道 。
韋小寶 木魚錘 督落去 嘅 地方 雖然 部位 好準 啊 ，但係 力度 唔夠 ，解唔開 被 封 嘅 穴道 。
佢 聽 嗰個 女郎 諷刺 佢 ，嬲起上嚟 ，用 木魚錘 出力 咁 督 咗 幾下 。
嗰個 女郎 吖 一 聲 ，韋小寶 吃咗 一 驚嘞 ：痛啊 ？
嗰個 女郎 話 ：我 ，我 。
韋小寶 又 去 督 佢 右腳 腳坳 ，呢次 落手 就 輕啲 ，督咗 幾下 ，嗰個 女郎 身體 微微 一震 。
韋小寶 好 歡喜 噉 話 ：
得喇 ，少林派 本來 只有 七十二 門 絕技 ，從 今日 起 啊 ，總共有 七十三 門 嘞 。
呢 項 新 絕技 係 高僧 晦明 禪師 首創 ， 叫做 ， 叫做 木魚 錘 解穴 神功 嘿 。
正喺度得意嘅時候 ，突然 條腰 處 一痛 ，佢 窒咗一窒 。
嗰個 女郎 翻身 坐起嚟 ，搶咗 佢 把 匕首 ，一劍 直插 落 佢 心口 。
韋小寶 大叫 一聲 ：哎呀 ，謀殺 親夫 啊 ！成個 扽 低 。
嗰個 女郎 執起 放喺 一便 嘅 柳葉刀 ，拉開 房門 ，飛快 跑 出去 外便 。
澄觀啊伸手攔佢 ：女施主 ，你 ，你殺咗我師叔 ，噉 ，誒噉 。
嗰個 女郎 舉起 柳葉刀 ，嚓嚓嚓 連 劈 三刀 。
澄觀袍袖一拂 ，嗰個 女郎 雙腳 麻痺 ，𢴈咗 喺 地 嘞 。
澄觀 衝到 韋小寶 身邊 ，右手 中指 連點 幾下 ，封住 佢 傷口 四周圍 嘅 穴道 佢 話 ：阿彌陀佛 ，我佛 慈悲 。
噉揸住 匕首柄 輕輕 拔出嚟 ，傷口 裏 便 鮮血 就 跟住 滲出嚟 嘞 。
澄觀 見到 出血 唔多 ，連忙 解開 佢 衣服 睇下 ，見到 傷口 大概 有 半寸 深 啦 ，又 念咗 幾聲 阿彌陀佛 。
韋小寶 身穿 護身寶衣 ，如果 唔係 匕首 鋒利 無比 ，本來 一啲 都 刺 佢 唔傷 嘅 。
匕首 雖然 刺穿 衣服 ，不過 呢 已經 冇 乜 力 喇 ，入肉 好 淺 。
但係 韋小寶 見到 心口 流血 ，個 傷口 又 好 痛 ，以為 呢次 冇命 喇 就 自言自語 噉 話 ：
謀殺 親夫 ， 謀殺 親 ， 親夫 。
嗰 個 女郎 𢴈 喺 地下 喊住 話 ： 係 我 殺 咗 佢 ， 老和尚 ， 你 快 啲 殺 咗 我 啦 ， 同 佢 ， 同 佢 填 命 就 係 喇 。
澄觀話 ：唉 ，我 師叔 點化 你 ，女施主 執迷不悟 噉 就算啦 ，你噉樣 行兇 ，行兇殺人 ，未免 太過 咯 。
韋小寶 話 ：哎呀 ，我 ，我要死喇 ，謀殺 親 。
澄觀 飛奔 出 房 ，攞咗 金瘡藥 嚟 ，敷住 佢 傷口 話 ：
師叔 ，你 大慈大悲 ，點化 兇頑 ，你 福報 未 盡 唔會 就噉 圓寂 嘅 。
而且 你 傷勢 唔重 ，唔緊要嘅 。
韋小寶 聽 佢 講話 傷勢 唔重 ，即刻 就 精神 翻 喇 ，覺得 傷口 其實 亦 唔係 點 痛唧 ，佢 話 ：
哄隻耳埋嚟 ，哎呀 ，我 要死 喇 ，我 要死 喇 。
澄觀 啊 彎 低 條 腰 ，將 耳仔 哄 埋 佢 嘴邊 。
韋小寶 低聲 話 ：你 解開 佢 嘅 穴道 ，不過 就 唔好 畀 佢 出 房 ，等 佢 全身 武藝 都 施展 完 喇 ，噉 至 ，誒 噉 先至 。
噉先至咩啊 ？
到嗰個時候 ，誒 到嗰個時候至 。
個 心 諗 ：就算 到咗 嗰陣時 亦 唔 能夠 放佢 。
就 話 ： 就 ， 就照 我 吩咐 做 啦 ， 快 啲 ， 快 啲 啦 。
哎呀 我要 死喇 ，死到 唔能夠 再 死喇 。
澄觀 聽 佢 催 得 咁 緊 ，雖然 唔明白 佢 個 意思 啊 ，仲係 擰 翻轉頭 用 手指 一 彈 ，解開 嗰個 女郎 被 封 嘅 穴道 。
嗰個 女郎 睇住 韋小寶 對 澄觀 講 嘢 嘅 時候 鬼鬼祟祟 ，個 心 諗 ：
呢個 衰鬼 和尚仔 詭計多端 ，臨死 嘅 時候 ，實係 安排咗 毒計 嚟 治 我 定 喇 ，如果 唔係 點解 反而 放 我 呢 ？
一諗到 呢處 即刻 跳起身 ，但係 佢 穴道 啱啱 解開 ，啲 血脈 未 暢順 ，雙腳 仲係 麻痹 嘅 又 跌翻低 。
澄觀 傻咗 噉 睇住 佢 ，不停 咁 念佛 。
嗰個 女郎 更 驚 喇 佢 話 ：快啲 一掌 打死 我 啦 ，折磨 人 嘅 唔係 英雄 好漢 。
澄觀話 ：小師叔 話 而家 唔能夠 放 你 ，當然 亦 唔能夠 害死 你 。
嗰個 女郎 大吃一驚 ，塊面 一紅 佢 諗 ：
呢 個 衰鬼 和尚 仔講過 ， 佢 點 都 要 娶 我 做 老婆 ， 否則 死不瞑目 ， 唔 通 佢 ， 唔 通 佢 喺 斷氣 之前 ， 要 ， 要 娶 我 做 ， 做 咩 老婆 ？
即刻 執起 地下 嘅 柳葉刀 ，猛力 斬落 自己 額頭 。
澄觀 一 拂堂 衫袖 捲住 刀鋒 ，左手 衫袖 ，向 佢 塊 面 拂過去 。
嗰個 女郎 只 覺得 勁風 颳 面 ，噉啊 只有 鬆開 把 刀 ，向 後 跳開 嘞 。
澄觀 衫袖 一揮 ，柳葉刀 飛咗 上天 ，噗 一聲 ，掟 入 屋頂 條 樑 上 便 。
嗰個 女郎 見 佢 擔 高頭 望住 把 刀 ，左腳 一 點 ，就 喺 佢 左便 跳過去 。
澄觀 伸手 攔住 佢 。
嗰個 女郎 右手 五指 搲 佢 隻 眼 ，澄觀 翻手 捉 佢 手踭 佢 話 ：
雲煙 過眼 ，係 江南 蔣家 嘅 武功 。
嗰個 女郎 飛腳 踢 佢 小腹 。
澄觀 就 微微 彎腰 ，呢一 腳 就 踢空咗 喇 佢 話 ：呢招 空谷足音 ，出自 山西 晉陽 ，係 沙陀 人 嘅 武功 。
不過 沙陀 人 呢 一定 有 另外 有 名稱 嘅 ， 老衲 孤陋寡聞 ， 查極 都 查 唔 到 ， 女 施主 知 唔 知道 呢 一招 嘅 原名 啊 ？
嗰個 女郎 邊度 係 理 佢 吖 ，拳 打 腳 踢 ，招數 層出不窮 。
噉啊澄觀逐招辨認 ，不過 佢 出招 好快 ，已經 嚟唔切 畀口講嘞 ，只有 隨手 拆解 ，仲 招 噉 記 喺 心裏 便 。
嗰個 女郎 連 出 幾十 招 ，都 畀 佢 毫不費力 噉 破解 咗 。
睇見 難以 走甩 嘞 ，個 心 一 急 ，條 氣 一 頂 ，岌咗 幾 岌 ，就 暈咗 𢴈 喺 地 。
澄觀話 ：唉 女施主 貪多務得 ，學咗 各門各派 嘅 精妙 招數 ，但係 冇 練過 內功 ，打得耐啲 咯 ，當然 支持唔住 啦 。
計我話 ，仲係 從頭 再練 內功 先至 係 正途 嘅 。
而家 打到 脱晒力 ，如果 救醒咗 你 ，梗係 要 再 打噉 就 不免 要 受 內傷 。
噉 仲 係 瞓 喺 處 休息 多 一陣 ，女施主 以為 如何 呢 ？
不過 千祈 唔好 誤會 ，以為 老衲 袖手旁觀 任你 暈低 都 置諸不理 噃 。
哎呀呀呀呀呀呀 ，誒 ，老衲 老糊塗 咯 ，你 早就 暈咗 嘞 梗係 聽唔到 我 講 㗎 啦 ，誒之 我 仲 不停 咁 講 喎 ，哈哈哈哈哈哈哈哈 。
澄觀 又 行到 床邊 ， 把 下 韋小寶 嘅 脈搏 ， 覺得 平穩 厚實 啊 絕無 危險 嘅 跡象 ， 佢 話 ：
師叔 唔使 擔心 ，你 呢啲 傷 一啲 都 唔緊要 嘅 。
韋小寶 笑住 問 ：呢個 姑娘仔 所使 嘅 招數 你 都 記得 啦 嘛 ？
記就記得 ，不過 要 用 簡單易練 嘅 手法 對付 ，就 認真 唔 容易 啊 。
只要 記住 佢 嘅 招數 就 得嘞 ，至於 點樣 對付 ，慢慢 再 諗 都 唔 遲 吖 。
係 ，師叔 指點 得啱 。
等佢 拳腳 功夫 使完 之後 ，仲 等佢 使刀 ，記住 佢 嘅 招數 。
係啊 ，兵器 上 嘅 招數 ，都 要 記住 嘅 。
不過 有 一件事 好 為難 ，佢 嘅 柳葉刀 已經 釘 喺 樑 上 便 咯 ，我 怕 佢 跳 唔到 咁 高 攞 唔到 啊 。
你呢 ，你 唔能夠 跳上去 攞翻落嚟 咩 ？
澄觀 打個 特 ， 哈哈大笑 話 ： 哈哈哈 ， 哎呀 ， 哎呀 哎呀 你 睇 我 你 睇 我 ， 唉 師侄 真 係 糊塗 到 極咯 哈哈哈 哈哈哈 。
佢 噉 一笑 ，嗰個 女郎 醒嘞 ，佢 雙手 一撐 跳起身 ，向住 門口 衝出去 。
澄觀 左便 衫袖 打斜 一拂 ，向 嗰個 女郎 旁邊 推過去 。
個 女郎 一個 踉蹌 ，撞咗 埋 埲牆 。
澄觀 右便 衫袖 跟住 拂 出去 ，喺 埲牆 前面 擋住 佢 ，將 佢個身 輕輕 一托 ，個女郎 當堂 企翻穩 。
佢 知道 自己 武功 同 呢個 老和尚 相差 實在 太 遠 喇 ，繼續 打落去 ，咪 盞 畀 佢 玩 嘅 啫 。
即時 退後 兩步 坐 喺 張 椅 處 。
澄觀 好奇怪 喇 ：咦 ？你 唔 打 喇 ？
打 你 唔過 仲 打 咩嘢 啊 ？
你唔出手 ，我 點知 你 會 咩嘢 招式 呢 ？
又點能夠 想法子 嚟 破 你 嘅 武功 啊 ？你 快啲 逳手 啦 。
嗰個 女郎 諗 ：好啊 你 ，原來 你 氹 我 逳手 ，係 想 明白 我 武功 嘅 家數 ，我 偏偏 唔 畀 你 知道 。
突然間 跳起身 ，雙拳 直上直下 ，狂揮亂打 ，雙腳 又 亂咁 踢 ，完全 不成章法 。
嗱 各位 ，欲知 後事 如何 ，且 聽 下回 分解 。
