上次 講到 劉璋 任命 張松 做 使者 ，派 佢 去 許都 見 曹操 。
張松 呢 ，佢 就 暗中 畫好咗 西川 嘅 地理圖 啊 ，收埋 喺 身邊 ，帶住 幾個 隨從 人員 就 起程 去 許都 嘞 。
呢件事啊 ，就 有 偵探 報告 咗 去 荊州 。
孔明 呢 跟住 派 人 去 許都 探聽 進一步 嘅 消息 。
噉張松 到咗 許都 ，喺 賓館 住落 之後 就 每日 都 去 相府 等候 ，求見 曹操 嘞 。
原來 曹操 佢 自從 擊敗 咗 馬超 班師 返嚟 之後 啊 ，躊躇 志滿 ，得意 非常 ，日日 都 舉行 盛大 嘅 宴會 ，飲酒 作樂 ，冇事 就 好少 出門 嘅 。
至於 國家 大事 呢 ，冚𠾴唥 都 喺 相府 商量 就 掂晒 嘞 ，根本 就 唔使 入朝 嘅 。
張松 連氣 等咗 三日 ，先至 有機會 報 個 姓名 入去 啊 。
噉 個人 要入 去 又點 呢 ， 得 ， 磅 水 啦 。
相府 嗰班 近身 侍從 人員 呀 ，要 送 咗 錢 過去 先至 肯 帶 張松 入去 啊 。
入到去大堂 ，曹操 當中 坐 響處 。
張 松 恭恭敬敬 叩 過 頭 ，行 過 禮 。
曹操 就 問 ：你 主人 劉璋 ，年年 都 唔嚟 進貢 ，點解 啊 ？
稟告丞相 ，事關 路途 艱難 ，賊寇 猖獗 ，所以 唔能夠 嚟 咋 。
嗯 ，我 早就 平定 中原 喇 ，仲有 乜嘢 盜賊 啊 ？
南 有 孫權 ，北 有 張魯 ，西 有 劉備 ，佢哋 至少 嘅 亦 有 十幾萬 人馬 ，點 能夠 話得 係 天下 太平 啊 ？
嗯 ！曹操 一見 張松 就 覺得 佢 呢個 人 啊 噏噏滯滯 ，已經 有 五成 唔鍾意 嘞 ，而家 見到 佢 仲 言語 衝撞 添 ，更 唔高興 啦 。
將 衫袖 一 拂 就 行咗 入 後堂 。
旁邊 嗰啲 侍從 人員 就 話 張松 嘞 喎 ：
你 係 個 使者 ，點解 一啲 都 唔識 禮節 㗎 一味 咁 衝撞 丞相 嘅 。
好彩 丞相 睇在 你 喺 咁遠 嚟 冇 責怪 你 咋 ，你 快啲 返 扯 啦 。
呵呵 ，哈哈哈哈哈哈 。
我哋 西川 ，冇人 識 阿諛奉承 拍馬屁 㗎 。
張松噉樣一講 ，喺 大堂 台階 下 便 有 個人 大聲 噉 話嘞 ：
你哋 西川 啲 人 唔會 拍馬屁 ，唔通 我哋 中原 有人 拍馬屁 咩 ？
張松 睇下 講說話 呢個 人 ，只見 佢 生得 丹眉 細眼 面白 神清 ，噉啊 請問 佢 姓名 啦 。
原來 佢 係 太尉 楊彪 個 仔 楊修 ，字 德祖 ，現時 呢 ，係 喺 相府 裏頭 做 掌庫 主簿 。
呢個人呀 ，博學多才 知識過人 ，好會 講說話 嘅 。
張松 知道 楊修 啊 擅長 於 辯論 嘞 ，就 有心 想 剝 佢 棚牙 。
而 楊修 呢 ，恃住 自己 才高學廣 ，冇 個人 佢 睇得起 嘅 。
當時 佢 見到 張松 啲 說話 有 刺 ，就 請 佢 出去 大堂 外 便 嘅 書院 裏頭 ，分 賓主 坐落 。
楊修 話嘞 ：蜀道 崎嶇 ，張公 咁 遠 嚟到 ，辛苦晒喇 。
奉咗 主公 之 命 ，就算 係 赴湯蹈火 ，亦 在所不辭 啊 。
西蜀 個 地方 點 呀 ？
蜀 乃 係 西郡 ，古 時候 叫做 益州 ，地方 險要 雄偉 ，迴旋 二百八程 ，縱橫 三萬 幾里 。
人丁 興旺 市井 繁榮 ，田地 肥沃 ，又冇 水旱 嘅 災害 ，物產 極其 豐富 ，確實 係 國 富 民 豐 ，天下 冇 一笪 地方 及得上 啊 。
噉 西蜀 嘅 人才 又 如何 呢 ？
多咯 ，好似 文學 有 司馬相如 ，武將 有 伏波將軍 ；醫學 有 張仲景 ，占卜 有 嚴君平 。
佢哋 都 係 其中 之 佼佼者 啊 。
總之 九流 三教 出類拔萃 嘅 ，數 都 數唔掂 咁多 咯 。
而家 劉季玉 嘅 手下 ，好似 張公 你 噉樣 嘅 ，仲有 幾多 人 呢 ？
呵呵 ，文武全才 、智勇兼備 、忠義慷慨之士 ，論 百嚟計 。
學似 我 張松 呢啲 才疏學淺 嘅 人 ，真係 用 車 裝 唔晒 ，用 斗 量 唔盡 咁多 啦 。
張公 你 而家 做 乜嘢 職務 啊 ？
濫竽充數 ，做 個別 駕 ，極 不 稱職 咯 。
誒 ，請問 楊公 喺 朝廷 做 乜嘢 官 啊 ？
而家 係 丞相府 主簿 。
哦？ 一向 聽聞 楊公 你 屋企 世世代代 都 係 做 大官 嘅 。
點解 楊公 你 唔 喺 朝廷 輔助 天子 ， 反而 喺 相府 門下 做個 小小 官員 呢 ？
楊修 畀 張松 噉樣 一 將軍 呀 ，當堂 面 都 紅晒 。
不過 佢 把 口 仲 係 叻 ，死雞 撐 飯蓋 啊 ，佢 勉強 笑 一 笑 噉 話 ：
我 雖然 做個 小官 ，但係 丞相 將軍 政 錢糧 嘅 重任 都 委託 咗 畀 我 。
而且 經常 得到 丞相 嘅 教導 ，對 我 極 有 啟發 。
所以 我 亦 非常 樂於 做 呢個 職務 。
呵呵 ，呵呵呵呵 。
我 聽講 曹丞相 ， 喺 文 便 唔 明白 孔孟 嘅 道理 ， 武便 呢 ， 對 孫吳 兵法 亦 唔 係 學得 深透 ， 佢 只 係 靠 強 霸 先 至 獲得 咁 高 嘅 地位 。
照噉睇 ，佢 又 有 咩嘢 咁 高明 嘅 教導 嚟到 啟發 楊公 你 呢 ？
張公 呀 ，你 住 喺 咁 邊遠 嘅 地區 ，點 知道 丞相 嘅 大才 吖 。
等 我 畀 啲 嘢 你 睇下 啦 ，楊修 叫 人 喺 書櫃 裏頭 ，攞 咗 一 卷 書 出嚟 畀 張松 睇 。
呢 卷 書 嘅 題目 叫做 孟德新 書 。
張松攞起嚟 ，從頭到尾 睇咗 一次 總共 一十三篇 ，都係 講 行軍 打仗 用兵 嘅 要領 。
張松 睇完 之後 ，就 問 楊修 嘞 ：
楊公 ，你 認為 呢卷 書 點啊 ？
呢卷書 ，乃係 丞相 研究過 古今 嘅 兵法 ，仿效 孫子 十三篇 而 寫成 嘅 。
張公 ，你 仲 欺負 丞相 冇才 ？
你 話 喇 ，呢 卷 書 足以 流傳 後世 喇啩 ？
呵呵 ， 呵呵 ， 呵呵 呵呵 呵呵 呵呵 。
呢本書呀 ？我哋 西蜀 嘅 三尺小童 亦都 背得出 咯 ，仲 話 咩嘢 新書 添 。
呢卷書 ，係 戰國 時候 無名氏 嘅 作品 啊 ，曹丞相 偷咗 過嚟 話 係 自己 作 嘅 咋嘛 ，就係 呃得到 楊公 你 咋 。
啊？ 唔係嘅 ，呢啲 係 丞相 秘藏 嘅 書籍 ，從來 都 冇 公開 發表過 。
你話 西蜀 嘅 細佬 哥 都 能夠 背得出 ？嘿嘿 ，你 使 乜 呃 我 呢 ？
你 唔信 ，我 背畀 你 聽下 啦 。
張 松 真係 將 孟德 新書 ，從頭到尾 朗誦 咗 一次 ，哈 ，一個 字 都 冇 錯 嘅 。
哎呀 嚇到 楊修服 晒 啊 。
張公 你 過目不忘 ，真係 天下 奇才 啊 ！
呢 ，有 詩 為 證 喎 ：
古怪 形容 異 ，清高 體貌 疏 。語 傾 三峽 水 ，目視 十行 書 。膽量 魁 西蜀 ，文章 貫 太虛 。百家 並 諸子 ，一覽 更 無 餘 。
噉啊 當時 張松 呢 覺得 曹操 睇 佢 唔 上眼 ，就 想 告辭 返 扯 。
楊修 就 話 ：請 你 喺 賓館 住 多 幾 日 添 ，等 我 再 去 稟告 丞相 ，安排 你 朝見 皇上 啦 。
張 松 多謝 過 楊修 ，就 返去 賓館 等 消息 嘞 。
楊修 跟住 入去 見 曹操 話 ：啱先 丞相 點解 咁 怠慢 張松 啊 ？
佢 出言不遜 ，所以 我 故意 怠慢 佢 。
丞相 你 連 禰衡 都 容得 落 ，點解 唔 要 張松 呢 ？
誒 ，禰衡 嘅 文章 喺 當今 卓有聲譽 ，廣為流傳 ，所以 ，我 唔 忍心 殺咗 佢 。
張松 ，佢 有 咩嘢 本事 啊 ？
佢 善於 辯論 口若懸河 ，呢啲 唔在講 。
啱先 ，我 將 丞相 所著 嘅 孟德新書 攞 畀 佢 睇 ，佢 睇咗 一次 咋 ，即刻 就 背得出嚟 。
好似 佢 噉 嘅 博文 強記 真係 世所 罕有 㗎 。
誒丞相 ，張松 話 呢 卷 書 乃係 戰國 時候 無名氏 嘅 作品 ，連 西蜀 嘅 細佬哥 都 背到 爛熟 噉 話 喎 。
哦？ 莫非 古人 ，同 我 係 暗中 相合 嘅 ？
誒 ，你 同 我 將 卷書 燒 咗 佢 吖 。
啊 曹操 就 真係 叻 啊吓 。
佢 作為 一個 文學家 ，認真 有 獨創性 。
呢嗱 ，佢 覺得 自己 寫出嚟 嘅 書 ，原來 啲 意思 古人 已經 講過 㗎 嘞 ，再 講 就 變咗 翻炒牛肉 ，唔 要 咯 ，乾脆 燒咗 佢 。
誒 ，寫嘢 係 要 噉 先至 有 新鮮嘢 出 㗎 嘛 。
好喇 ，閒話 休提 言歸正傳 。
噉楊修就勸曹操話 ：此人 可以 畀佢 朝見 皇上 ，等佢 見識下 天朝 嘅 威嚴氣象 。
好啦 ，聽日 ，我 喺 西教場 檢閱 軍隊 ，你 去 帶 佢 嚟 ，等 佢 睇下 我 嘅 軍隊 係 幾咁 強大 。
叫佢返去講 ，我 好快 就 去 平定 江南 ，跟住 就嚟 收拾 西川 。
遵命 。
到咗 第日 ，楊修 就 帶 張松 去 西教場 。
曹操 當時 點起 虎衛軍 五萬 雄兵 ，排列 喺 教場 上 便 。
啊果然係盔甲鮮明 ，衣袍燦爛 ；金鼓震天 就戈矛耀日 。
四方 八面 各 分隊伍 ，旗幟 招展 人 強 馬 壯 。
面對住 一支 咁 威武 嘅 軍隊 ，你 估 張 松 點 吖嗱 ？
哈 ，佢 只係 用 眼尾 睄 咗 一 睄唧 ，誒 。
過 咗 好 耐 ， 曹操 叫 張松 過去 ， 指指點點 噉 問張 松話 ：
你 喺 西川 ，見過 噉 嘅 英雄人物 冇 啊 ？
張松 話 喇 ：我哋 西蜀 從來 冇 見過 呢啲 噉嘅 軍隊 ，我哋 只係 以 仁義 嚟 治理 一切 嘅 啫 。
曹操 當堂 黑起 塊面 ，碌 大 雙眼 望實 佢 ，張松 呀 驚 都 唔 驚 下 。
楊修 一味噉 同 張松 打眼色 ，張松 當 冇 睇見 。
曹操 同 張松 話 ：我 睇 天下 嘅 鼠輩 ，仲 賤過 條 草 。
大軍 所到 ，戰 無 不勝 ，攻 無 不取 ！順 我 者 生 ，逆 我 者 死 ！
你 ，知唔知 啊 ？
丞相 驅兵 所到 之處 ，戰 必勝 攻 必取 ，我 張松 一向 都 知道 咯 。
就好似往日 ，濮陽 攻 呂布 之 時 ，宛城 戰 張繡 之 日 ；
赤壁 遇 周郎 ，華容 逢 關羽 ；
割鬚棄袍 於 潼關 ，奪船 避箭 於 渭水 。
嚱呢啲 ，都係 無敵於 天下 啊 丞相 。
啊 ，呸 ！你個 壞鬼 書生 ，竟然 揭 我 短處 咁 大膽 ！人 嚟 ！
有 ！
推出去斬 ！
係 ！
楊修 話 喇 ：且慢 ！丞相 啊 ，張松 此人 雖然 該 斬 ，不過 佢 由 西蜀 咁 遠 嚟到 進貢 ，如果 斬咗 佢 ，恐怕 就 會 失咗 西蜀 嘅 一番 好意 喇 。
曹操 初時 仲 係 好 大 火氣 ， 收尾 荀彧 亦 都 勸 佢 ， 噉 曹操 先至免 張松 一死 ， 喝 啲 人 將 佢 亂 棍 打 出去 。
噉張松 返到 賓館 ，即刻 就 執拾好 行李 出城 返 西川 。
佢 諗 ： 我 本來 想將 西川 嘅 州郡 獻 畀 曹操 你 ， 點 知道 你 咁 睇 唔 起 人 ， 哼 ！
嗯 ，我 嚟 嘅 時候 ，喺 劉璋 面前 誇過 海口 ，今日 白行 一趟 ，頭 耷耷 噉 返去 啊 實 畀 啲 人 笑 嘅 。
啊 ，我 聽聞 荊州 劉玄德 素來 以 仁義 待人 ，不如 我 直情 去 荊州 ，睇下 此人 究竟 係 點 嘅 都 好 噃 。
好 ，一於 噉話 ！
於是 張松 騎住 馬 ，帶住 隨從 人員 一直 行去 荊州 。
呢一日 ，佢 嚟到 郢州 地界 啊 。
呢笪地方 呢 就 喺 湖北省 嚟 ，即係 今日 嘅 武昌市 。
只見 前面 有 一隊 人馬 ，大約 有 五百幾 人 啦 。
為首 一員 大將 只係 着住 便服 ，斯斯文文 ，跑住 馬 嚟到 張松 面前 問 ：
請問 先生 係唔係 張別駕 ？
張松 話 ：係啊 。
嗰位 將軍 連忙 落馬 行個禮 話 ：我 叫做 趙雲 ，喺 處 等候 先生 好耐 嘞 。
張松 亦都 落馬 答禮 話 ：哦 ，將軍 就係 常山 趙子龍 係嘛 ？
冇 錯 喇 。
素仰 ，素仰 ！
我 主公 劉玄德 ，因為 知道 大夫 長途跋涉 ，鞍馬 勞頓 ，特意 命令 我 喺處 準備咗 一啲 酒食 ，等候 大夫 啊 。
講完 ，趙雲 吩咐 軍士 捧 酒菜 過嚟 ，恭恭敬敬 跪 喺 處 獻畀 張松 。
張松 諗嘞 ：人人 都 話 劉玄德 ，寬厚仁愛 十分 好客 ，今日 睇嚟 果然 冇錯 喎 。
於是就 歡歡喜喜 同 趙雲 飲咗 幾杯 ，然後 上馬 一齊 行 。
噉佢哋嚟到 荊州 地界 嘅 時候 呢 天色 已經 好 晏 ，就 去 賓館 休息 。
去到喇 ，嘩嗨 ，只見 賓館 門外 有 百幾人 企 喺 處 ，打響 鑼鼓 嚟 歡迎 啊 。
有位 將軍 ，行到 張松 嘅 馬 前 行個 禮 話 ：
奉 兄長 將 令 ，為咗 大夫 遠 涉 風塵 ，特 令 我 關 某 ，將 賓館 打掃 乾淨 ，請 大夫 喺 處 休息 。
張松 落咗 馬 ，同 關雲長 、趙雲 一齊 行 入 賓館 。
喺 大廳 處 彼此 再 行過 禮 ，閒談咗 一陣 ，就 擺開 酒席 。
關雲長 、趙雲 ，兩個 對 張松 真係 招呼 周到 態度 非常之 殷勤 。
佢哋 一直 飲 到 夜深 先至 散席 ，噉 張松 呢 就 喺 賓館 住咗 一 晚 。
第朝早 食完 早飯 嘞 ，關雲長 同 趙雲 就 請 張松 上馬 去 荊州城 。
行咗 唔到 三幾里 路 ，只見 一簇 人馬 迎面 嚟到 嘞 。
原來 係 劉備 同埋 孔明 、龐統 親自 嚟 迎接 啊 。
佢哋 遠遠 見到 張松 ，就 落定 馬 企 喺 處 等候 。
張松 當然 喇喇聲 落馬 ，快步 行前去 見面 啦 。
劉備 就 話嘞 ：久聞 大夫 高名 ，如雷貫耳 。皆因為 雲山 遠隔 ，唔能夠 聽到 你 嘅 教導 。
而家 聽聞 大夫 要 返去 西川 ，所以 專誠 嚟 迎接 。
如果 大夫 唔 嫌棄 荊州 荒涼 ，肯 喺 處 休息 幾日 ，滿足 一下 我哋 渴望 之情 就 真係 萬幸 喇 。
張松 歡喜 到 極 喇 ，就 上馬 同 劉備 一拍 噉 行入 荊州 城 。
嚟到 州衙門 大堂 ，劉備 啊 大排筵席 招待 張松 。
喺 飲酒 嘅 時候 ，劉備 就 淨係 傾下 閒偈 唧 ，西川 啲 事 一句 都 唔 提 。
到底係 張松 忍唔住 啊 ，佢 用 說話 嚟 引 劉備 講 喇 ，佢 話 ：
而家 皇叔 守 荊州 ，仲有 幾多 地方 添 啊 ？
孔明話 ：荊州 係 暫時 同 東吳 借 嘅 啫 ，東吳 時時 都 派 人 嚟 要 攞返 㗎 喇 。
而家 因為 我 主公 做咗 東吳 女婿 ，故此 暫時 喺度 安身 唧 。
龐統 又 話 喇 ：我 主公 係 漢朝 皇叔 ，反而 唔 能夠 佔據 州郡 。
而 其他 嗰啲 漢朝 嘅 奸賊 ，個個 都 恃住 自己 惡 ，就 侵佔 土地 。
有識之士 ， 人人 個心 都 好 為 皇叔 抱不平 啊 。
劉備 話 ：哎 兩位 唔好 噉 講 喇 ，我 劉備 有 何德何能 ，膽敢 奢望 咁多 吖 。
張松 話 喇 ：噉 又 唔係 喇 ，明公 乃係 漢室 宗親 ，大仁大義 四海 皆 知 。
咪 講話 佔據 州郡 啦 ，就算 係 取代 正統 ，坐 正 皇帝位 亦都 唔過分 嘅 。
哎 ， 大夫 言之太過 ， 我點 敢當 我點 敢當 啊 。
喺 酒席 上 ，賓主 都 非常 高興 。
就噉樣 一眨眼 就 過咗 三日 ，日日 都 舉行 宴會 ，但係 呢 ，都 唔 提起 西川 嘅 事 。
到咗 第四日 ，張松 要 告辭 返 扯 。
劉備 喺 荊州 城 外 十里 長亭 啊 ，設宴 為 佢 送行 。
劉備 舉起 杯酒 敬畀 張松 話 ：承蒙 大夫 唔見外 ，留 喺 處 歡聚 咗 三日 。
今日 要 分別 咯 ，又 唔 知道 咩嘢 時候 ，先至 再 有 機會 聽 你 嘅 教誨 咯 。
講完 ，劉備 忍唔住 流起 眼淚 嚟 。
張松 個 心 諗 喇 ：玄德 係 咁 寬厚 仁慈 ，係 咁 愛惜 人才 ，我 點 能夠 就 噉 離開 佢 呢 ？
不如 講掂佢 ，叫佢 去攞 西川 至得 。
於是 張松 索性 開 明車 馬 講 喇 ，佢 話 ：
我 亦都 好 希望 時常 能夠 喺 皇叔 你 嘅 身邊 為 你 盡力 ，只係 冇 機會 吖 。
誒 ，我 認為 荊州 呢 笪 地方 ，東 有 孫權 ，北 有 曹操 。
佢 哋 對 荊州 都 係 虎視眈眈 ， 所以 荊州 並非 係 可以 長久 住落 去 嘅 地方 。
劉備話 ：呢層 ，早就知道㗎喇 ，但係 搵唔到 其他 可以 安身 嘅 好地方 呢 。
皇叔 ，益州 地方 險要 ，土地 肥沃 ，民 殷 國 富 。
當地 有 見識 嘅 人士 早就 仰慕 皇叔 嘅 品德 。
如果 皇叔 率領 荊襄 大軍 長驅 西指 ，噉 就 霸業 可 成 ，漢室 可 興 咯 。
我 點得啊 ，劉季玉 亦 係 漢室 宗親 ，佢 喺 西蜀 咁 耐 咯 ，其他人 又 點 能夠 動搖 得到 佢 呢 ？
皇叔 ， 我 唔 係 賣主求榮 。
今日 ，我 遇着 明公 你 ，我 不能不 對 你 披肝瀝膽 講句 真心話 。
劉季玉 雖然 擁有 益州 之地 ，但係 佢 稟性 懦弱 ，又 唔識得 使用 人才 ；加之 以 張魯 喺 北方 時常 都 想 嚟 侵犯 。
所以 ，人心 離散 ，都 喺度 盼望 有 一位 英明 嘅 主公 。
我 呢次 出嚟 ，本來 係 想 將 西川 獻畀 曹操 。
點知道 呢個 逆賊 ，驕橫傲慢 不識好人 ，故此 ，就 特意 嚟 見 明公 你 。
哦 。
明公 你 首先 取得 西川 作為 基礎 ，然後 北 圖 漢中 ，再 收取 中原 ，挽救 朝廷 名垂青史 ，功績 就 大咯 。
明公 如果 有意 奪取 西川 ，我 願 效 犬馬之勞 做 你 嘅 內應 ，唔知 皇叔 尊意 如何 呢 ？
大夫 嘅 厚意 我 非常 感激 ，無奈 劉季玉 同 我 乃 係 同宗 。
如果 我 去 攻打 佢 ，怕 會 畀 天下人 唾罵 噃 。
皇叔 ，大丈夫 處世 ，應當 盡力 去 建功立業 ，着着 爭先 。
今日 唔 去 奪取 西川 ，噉 日後 畀 人哋 奪取 咗 ，就 悔 之 晚 矣 咯 。
誒 ，我 聽講 蜀道 崎嶇 ，千山萬水 ，行軍 會 係 好 艱難 。
如果 要 去 奪取 西川 ，有 咩嘢 好 嘅 辦法 呢 ？
張松 聽見 劉備 講到 呢 一句 ， 就 喺 衫袖 籠 裏頭 攞 出 一張 地圖 遞 咗 畀 劉備 ， 佢 話 ：
皇叔 ，請 你 睇下 呢張 圖 ，西蜀 嘅 道路 你 就 清楚 㗎喇 。
劉備 打開 張 地圖 稍為 睇下 。
嘩只見上便呀 ，將 地理 行程 ，遠近 闊窄 ，山川 險要 ，府庫 錢糧 ，逐一逐二 ，冚𠾴唥 都 記載 得 清清楚楚 明明白白 。
張松 話 喇 ：皇叔 ，你 應該 盡快 去 攞 西川 。
我 有 兩個 心腹 好友 ，一個 叫做 法正 ，一個 叫做 孟達 。
佢 兩個人 必定 能夠 幫助 你 。
若果 佢哋 兩個 嚟到 荊州 嘅 時候 ，皇叔 你 乜嘢 事 都 可以 同 佢哋 商量 嘅 。
劉備 對住 張松 深深 作個 揖話 ：青山 不老 ，綠水 長存 。第日 成功 之後 ，必定 重重噉 報答 你 ！
我 遇着 英明 嘅 主公 ，所以 不得不 將 真心 說話 盡情 相告 唧 ，我 唔係 希望 你 報答 我 㗎 。
好喇 ！告辭喇 ！
張松 同 劉備 告別 起程 。
孔明 就 叫 關雲長 佢哋 護送 張松 ，一直 送咗 幾十里 先至 分手 。
而家 講 下 張 松 佢 返到 益州 嘞 ，首先 就 去 搵 佢 個 好 朋友 法正 。
法 正 個別 字 叫做 孝直 ，法孝直 。
張松 同 法正 話 ：曹操 非常 傲慢 睇唔起 人 。
佢 呢啲 噉嘅 人 ，只能夠 共患難 不能 同 安樂 㗎 。
我 已經 應承咗 將 益州 送畀 劉 皇叔 嘞 。
所以 今日 我 一 返嚟 ，即刻 搵 老兄 你 一齊 商量 下 先 。
法正話 ：我 睇 白 劉璋 冇 啲 能力 ，已經 有心 好耐 想 見 劉皇叔 㗎喇 。
我哋 嘅 心思 都 係 一樣 嘅 ，都 唔 使 有 任何 猶疑 㗎 啦 。
冇 幾耐 ，孟達 到嘞 。
孟達 別字 子慶 ，孟子 慶 。
佢 同 法正 係 鄉里 嚟 。
孟達入 到 嚟 ， 睇 見 法正 同張 松 喺 度 密 斟 緊 ， 孟達 就 話 喇 ：
我 知道 兩位 嘅 意思 喇 ，係 唔係 想 獻 益州 呢 ？
張松 話 ：冇錯 係 想 噉 做咯 。
老兄 你 估下 吖嗱 ，應該 獻畀 邊個 啱 呢 ？
孟達 話 ：噉 啊 非 劉玄德 不可 喇 ，啊 ？
嗯？
呵！
呵呵哈哈哈哈哈哈哈 。
三個人 不禁 拍手 放聲 大笑 起嚟 。
法正 就 問 張松 話 喇 ：老兄 聽日 見 劉璋 ，你 點 講 呢 ？
張松話 ：我要 推薦 你哋 兩位 做 使者 ，派 去 荊州 ，如此如此 。
好啊 ，係噉做啦 。
噉啊 兩個 應承咗 。
第日 ，張松 去 見 劉璋 。
劉璋 問 佢 話 喇 ：啲 事情 辦成 點 啊 ？
張松話 ：曹操 係 個 漢賊 ，佢 想 篡位 做 皇帝 ，同 佢 冇 得 好 講 。
佢呀 ，早就 有 奪取 西川 嘅 野心 嘅喇 。
乜噉呀 ，噉點算好呢 ？
主公 ，我 有 一條 計策 ，可以 使到 張魯 、曹操 都 唔敢 貿貿然 嚟 侵犯 西川 嘅 。
乜嘢 計策 啊 ？
要知道 張松 講出 一條 咩嘢 計策 ，就 且 聽下 回 分解 。
