حياة عيلتنا: سفر البنات - YouTube
يا ساتر شو في؟
سند شوف مين عالباب
ماما باركو لي
فزت بالمركز الأول بالشطرنج
على مستوى المملكة
ألف مبروك حبيبتي برافو برافو عليكي
يا حبيبتي يا سالي ألف مبروك يا تيتا
وأحلا إشي إني رح أشترك ببطولة العالم
رح أسافر!
تسافري! وين؟
آه تخيلي ماما رح أشارك ببطولة العالم في أوروبا
ييييي شو هالحكي؟
في عنا بنات بتسافر لحالها؟
أنا أول مرة طلعت برا البلد
كانت بشهر العسل ومع جدكم وخواته الخمسة
ههههه لا يختي إحنا رحنا لحالنا
طب يلا عاد
مش فاهمة، عن شو عم بيحكوا؟
ماما حبيبتي خلينا نحكي بالموضوع أكثر بس يجي البابا
لازم بالأول نعرف التفاصيل
آه إنتو دايماً هيك بتعملوا
بتقعدوا تسألوا تحكوا وتستشيروا وبعدين بتحكو لي لأ
سالي إحنا ما قلنا لأ أدخلي غيري أواعيكي وخاليني أجهز لك الأكل حبيبتي
وأنا لازم أطلع
خليكي ليش مستعجلة؟ شوي وأبو سند بيكون هون
ألو يما إنت كمان موافق بنتك تسافر لحالها؟
ومهلك يما، شو؟ مين رح يسافر؟
سالي سالي بدهم يسفروها على أوروبا لحالها
بقول لك لحالها هيني بقول لك من هسا
أنا وأم دينا مش موافقين على هذا القرار بالمرة
طيب يما أنا باجتماع بس أخلص بحكي معاكي
هاي سالي الله يخليها، أديش عمرها؟
رح تصير خمسة عشر سنة
أنا بنتي عمرها خمسة وعشرين سنة
طلعلها فرصة تدرس ماجستير برا وبعثة وما قبلت أسفرها هو ناقصنا هم
بس يا أبو عمر إنت درست عمر برا البلد
ما إنت عارف الولاد غير بيدبر حاله منخافش عليه
أنا برأي ما إلو علاقة ولد أو بنت
بيعتمد عشخصيتهم
شو أبو سند هتسفرها؟
يا جماعة أنا لسا ما بعرف شو الموضوع
سالي إحنا كثير فخورين فيكي يابا الشطرنج لعبة صعبة كثير
وإنتي بدعتي فيها
شكراً بابا. يعني رح أسافر؟
بالأول لازم نعرف تفاصيل الرحلة حتى نقدر نقرر
بابا رح نروح مع المدرسة لأسبوع كامل عأوروبا
رح أتنافس مع ناس بعمري من كل أنحاء العالم تخيلو
هاي فرصة كثير حلوة
بس إحنا مسؤولين لندير بالنا عليكم
عشان هيك البابا بيقول لك بدنا تفاصيل أكثر
شو رأيكم أنا أروح معها وأدير بالي عليها
لا تفكر سيد سند لو إنت محلها كان رح نسأل نفس الأسئلة
شو بدكم تعرفوا أكثر من اللي قلته
أنا وأبوكي بدنا نعرف التالي
مين المنظمين للرحلة؟
مين من الطلاب مسافر معك؟
شو المدن اللي رح تكونوا فيها؟
مين المعلمات اللي رايحين؟
و وين رح تناموا؟
هل منقدر نتواصل معك ومع المعلمات كل الوقت؟
هل المعلمات رح يكونوا معكم كل الوقت؟
كيف رح تتنقلوا من محل لمحل؟
شو البرنامج اليومي بالساعة؟
شو تدبيرات السلامة اللي ماخدينها؟
شو تكلفة الرحلة بالاخر؟
شو قوانين الرحلة؟
شو رأيكم تحكوا مع إدارة المدرسة وتسألوا كل الأسئلة اللي بدكم تعرفوها؟
عنجد ممكن تبعتيها؟ أنا صراحة كثير بخاف
ولا يمكن أبعت رنا يييي
ما هو-
بلكي ضاعت بالمطار لسا بنتك صغيرة
ولا لا تقوم تضيع جوازها ولا حدا يسرقه منها
لا لا همة حكولي إنو-
ولا لا تقوم تمرض ولا تسخن، مين اللي بدو يدير باله عليها؟
لا لا لا مخاطرة مخاطرة
يييي بتتذكروا بنت أم نزار اللي ساكنة بآخر الشارع
مش أول دخلة تاني دخلة على الشمال قدام السوبرماركت
مرة سافرت مع زوجها عأوروبا طلعت عالطيارة الغلط
و وصلت عأمريكا
هههه كيف يعني أنا مش فاهمة ما هو بيشايكو التذاكر عالباب قبل ما تطلع الطيارة
أي شو بيعرفني هيك خبروني
طيب يا جماعة بالإذن أبو سند عم بيرن علي شكلو وصل
ما قلتي لنا طيب شو قررتي؟
صراحة أنا خايفة كثير ومحتارة
وبعدين شو رح يحكوا عنا الناس؟
من إيمتى منهتم بحكي الناس؟ مش حكيتي مع المدرسة؟
وأخذنا كل التفاصيل وقابلنا المعلمات اللي رح يسافروا معها
وتأكدنا من احتياطات السلامة
وحكينا مع سالي وأعطيناها تعليمات واضحة
ممم معك حق
وسجلت كل أرقام تيلفونات الرايحين عالرحلة ما خليت ولا واحد
أنا شايف إنها ناضجة كفاية وجاهزة إنها تتحمل هاي المسؤولية
وهاي فرصة كبيرة إلها
ويمكن تتعلم منها كثير وتفتح لها بواب للمستقبل
بعدين أنا قدمت على فيسا وجوازي جاهز
إذا احتاجتني برمشة عين بكون عندها
ههههه صدق ما إنت قليل يا أبو سند
خلص خلينتا نتكل على الله
حمد الله عالسلامة ماما وألف ألف ألف مبروك
المركز الرابع على مدارس العالم مش قليل
اشتقت لكم كثير
صح ما طلعت الأوائل بس بصراحة كانت أحلى تجربة بحياتي
تعلمت كيف أعتمد على حالي
أدير بالي على أغراضي وأرتب مصاريفي
تعلمت أشياء كثير عن المدن اللي زرتها شكراً كثير إنكم قبلتوا لي إنو أسافر
وإحنا فخورين فيكي كثير كثير كثير
بابا منتخب القدم مسافرين بالصيف، بقدر أسافر معهم؟
هههههههه
عنا خبرية حلوة لما توصلونا لمليون
رح يكون عنا مفاجأة لكم كثير حلوة
فتذكروا تعملوا لنا سبسكرايب وإحكوا لصحابكم وقرايبكم كمان
