演唱會
「 阿哥 ⋯⋯ 幫 下 手 啦 ⋯⋯ 」
「 唔得 呀 , 你 揾 其他 人 幫手 啦 。 」 阿妹 入 咗 嚟 我 間 房 , 求 我 幫手 買 演唱會 飛 。
「 阿哥 啊 ~ 唔係 噉 都 托 我 手㬹 下話 ?」 佢 大半年 前 開始 迷上 T welve 呢 隊 男 歌手 組合 ( 香港 依家 最 紅 嗰 隊 ) , 然後 日日 喺 我 面前 講 嗰 十二 個 人 唱歌 有 幾 好聽 , 跳舞 有 幾 好睇 , 同埋 有 幾 靚仔 。
「 都 話 我 聽朝 約咗 人 咯 。 」 阿妹 想 我 聽朝 十 點 開 齊 晒 電腦 、 手機 , 幫 佢 上網 搶 T welve 嘅 演唱會 飛 。 其實 我 明 佢 諗 咩 嘅 , 話 晒 T welve 真係 好 紅 : 佢哋 前排 開 咗 個 小型 演唱會 , 啲 黃牛飛 都 炒 到 成 四 五千 蚊 一 張 ; 今次 佢哋 去 到 紅館 連 開 四 日 演唱會 喎 , 聽朝 賣 飛 一定 全 香港 爭崩頭 。
「 你 都 係 約 班 friend 去 動漫節 睇 日本妹 咋 嘛 !」
「 都 話 人哋 係 叫 『 東京 46 』 , 係 當今 日本 最 紅 嘅 女子 組合 —— 」 今年 動漫節 竟然 請 到 佢哋 十 個 成員 嚟 表演 , 我 等 咗 佢哋 嚟 香港 好 耐 喇 !
「 我 二十 歲 , 班 女仔 仲 細 過 我 !」
「 喂 𡃁妹 , 我 廿七 歲 添 啦 , 我 幾時 嗌 過 你 隊 T welve 做 『 𡃁仔 』 啊 ?」
「 唓 ! 你 捧 你 隊 46 , 咪 同 我 捧 我 隊 Twelve 一樣 !」
「 至少 我 冇 日日 對 住 你 讚 佢哋 有 幾 靚女 囉 !」
「 但係 你 日日 沖涼 都 唱 佢哋 啲 歌 呢 , 勁 難聽 囉 !」
「 哎 吖 , 畀 返 啲 面 嚟 好 喎 ! 話晒 都 係 你 大佬 …… 」
「 吓 ? 我 先 唔 得閒 睬 你 囉 !」
「 唔得閒 就 出 返去 喇 , 唔好 企 喺度 —— 」
「 一係 你 借 錢 畀 我 買 黃牛 嘞 !」
「 你 黐咗 線 呀 ? 黃牛 閒閒哋 都 炒 到 五千 蚊 啊 ! 你 幫 人 補習 賺 好 多 錢 咩 ?」
「 所以 咪 問 你 借 囉 !」
「 你 都 傻 嘅 ! 我 做 侍應 咋 , 你 估 我 人工 好 高 呀 ?」
「 噉 你 又 買 部 咁 貴 嘅 電腦 ?」 阿妹 一手 指 住 我 部 新 電腦 。
「 喂 , 我 用 自己 錢 買 有 咩 問題 ?」
「 冇 ~ 但係 你 用 咗 我 個 學生 優惠 呢 —— 」
阿妹 隨即 又 一手 指 住 我 牆上 嘅 東京 46 海報 : 「 仲有 呢啲 海報 , 唔 知 之前 係 邊個 問 我 點樣 喺 日本 網站 訂貨 嘅 呢 嗬 ?」 阿妹 讀書 叻 過 我 好多 , 仲要 喺 大學 主修 緊 日文 , 我 每 次 有 日文 睇 唔 明 都 係 揾 佢 求救 ……
「 我 記得 , 係 我 吖 嘛 , 得 未 ?」
「 得 ~ 噉 即係 聽朝 你 幫 唔 幫手 啫 ~ ?」 阿妹 嘅 語氣 真係 話 變 就 變 。
「 得 喇 得 喇 , 十點 吖 嘛 ? 我 同 班 friend 講 我 遲到 。 」 明明 我 內心 仲 想 駁 佢 , 有 我 幫手 都 唔 一定 搶 到 飛 ——
「 好嘢 ~ 幾時 都 話 我 大佬 係 全 世界 最 好 嘅 大佬 !」 但係 對 住 呢個 牙尖嘴利 嘅 阿妹 , 我 真係 冇 晒 乎 ……