PITONG ANGHEL (SEVEN ANGELS) | CHILDREN'S BOOK IN TAGALOG WITH ENGLISH/TAGALOG SUBTITLES

Pitong Anghel

Kuwento ni Genaro Gojo Cruz

Guhit ni Ivan Reverente

(MUSIC)

Di pa dumarating ang bago kong anghel, kaya isinama muna ako ni Mama sa kaniyang opisina.

Wala pa raw akong makakasama sa aming bahay.

Wala pang anghel na magbabantay at mag-aalaga sa akin.

Gano'n pala kahirap ang buhay ni Mama sa opisina.

Puro tunog lang ng stapler,

stamp pad,

telepono,

at keyboard ng kompiyuter ang maririnig.

Ang mga tao, parang mga robot kung kumilos, at wala man lang ngumingiti.

Parang mga boses-ipis din sila kung mag-usap.

Binigyan ako ng papel at lapis ni Mama.

Pinagdrowing niya ako ng kung anu-ano

—puno, aso, mangga, bulaklak, araw, pati matataas na bilding at tulay

na dinaanan namin kanina, nadrowing ko na.

Nadrowing ko na ang lahat na kaya kong idrowing, pero di pa rin tapos si Mama,

talagang matagal ang trabaho niya.

Di nauubos ang mga ginagawa.

Sabi ni Mama, kapag dumating na ang aking anghel, maiiwan na raw ako sa bahay.

Di raw para sa mga bata ang opisina.

Nang dumating ang una kong anghel, sobrang saya ko!

Si Angel Perla ang una kong anghel.

Sabi ni Mama, "Angel ang itawag ko kay Ate Perla, dahil ang mga anghel daw ay laging nagbabantay sa mababait na bata.

"O, Angel Perla, 'kaw na ang bahala kay Lara, patulugin mo sa tanghali," bilin ni Mama.

Mabait si Angel Perla pero pinatutulog lang niya ako sa

buong mag-hapon kahit ayaw ko nang matulog, pilit pa rin niya akong pinatutulog.

"Tulog na Lara, para lumaki ka agad," lagi niyang sinasabi.

Pero isang araw nagpaalam na si Angel Perla, kailangan na raw siya ng kaniyang mga anak sa probinsiya.

Pangalawa kong anghel ay si Angel Sally.

Sabi ni Mama, "Angel ang itawag ko kay Ate Sally dahil ang mga anghel daw ay nag-aalaga sa mga masunuring bata.

"Angel Sally, 'kaw na ang bahala kay Lara, pakainin mong palagi," bilin ni Mama.

Mabait si Angel Sally pero lagi niya akong pinakakain kahit busog na busog na ako.

Minsan napakarami niyang pinakakain sa akin, minsan naman sobrang kaunti.

"Kain pa Lara, para lumaki ka agad," lagi niyang sinasabi.

Pero isang araw, nagpaalam na kay Mama si Angel Sally, kailangan raw siya ng kaniyang maysakit na ama.

Pangatlo kong anghel ay si Angel Rowena.

Sabi ni Mama, "Angel" ang itawag ko kay Ate Rowena dahil ang mga anghel daw ay tumutulong sa magagalang na bata.

"O, Angel Rowena, 'kaw na ang bahala kay Lara, 'wag mong hayaang pawisan ang likod," bilin ni Mama.

"Halika Lara, palitan natin ang bimpo sa likod mo, para di ka magkasakit," lagi niyang sinasabi.

Mabait si Angel Rowena pero lagi siyang palit nang palit

ng bimpo sa likod ko at kapag pinulbusan niya ako, para na akong espasol.

Isang umaga pagkatapos ng aming almusal, nagpaalam na si Angel Rowena,

kailangan daw siyang umuwi ng probinsiya upang tumulong sa anihan ng palay.

Pang-apat kong anghel ay si Angel Charito.

Sabi ni Mama, "Angel" ang itawag ko kay Ate Charito dahil ang mga anghel raw ay anak ng Diyos. "

"Angel Charito, Ikaw na ang bahala kay Lara, libangin mo," bilin ni Mama.

Mabait si Angel Charito, pero sa buong maghapon, wala kaming ginagawa kundi ang manood ng TV.

Lahat ng palabas mula umaga hanggang hapon, pinapanood namin.

"Halika Lara, magsisimula na ang palabas," lagi niyang aya sa akin.

Isang hapon, pagdating ni Mama, nagpaalam na si Angel Charito,

kailangan daw siyang umuwi dahil mag-aaral na siya.

Pang-lima kong anghel, si Angel Bebeng.

Bilin ni Mama, "Angel" ang itawag ko kay Ate Bebeng dahil si Angel Bebeng raw ang aking mama habang nasa opisina siya.

"O, Angel Bebeng, 'kaw na ang bahala kay Lara, 'wag mong hayaang lumabas," bilin ni Mama.

Mabait si Angel Bebeng, pero ayaw niya akong palabasin ng bahay kahit sa aming magandang hardin.

Sandali lang akong mawala, agad niya akong hinahanap.

"Lara, nasa'n ka na? 'Wag kang lalabas baka kunin ka ng mamang may balbas," lagi niyang takot sa akin.

Pero isang gabi, habang nagpapahinga si Mama,

nagpaalam na si Angel Bebeng, kinukuha na raw siya ng Tiya niyang may karinderya.

Pumalit naman ang pang-anim kong anghel, si Angel Ningning.

Bilin uli ni Mama, na "Angel pa rin ang itawag ko kay Angel Ningning tulad ng mga naging anghel ko.

"O, Angel Ningning, 'kaw na ang bahala kay Lara, paliguan mo," bilin ni Mama.

Tulad ng mga dati kong anghel, mabait din si Angel Ningning pero paligo siya nang paligo sa akin.

Kahit konting dumi lang, pinaliliguan agad niya ako.

Ayaw na ayaw niyang makikita na madumi ang damit ko.

Minsan sobrang init ng tubig na ipinangliligo niya sa akin, minsan naman sobrang lamig!

"Halika na Lara, paliliguan na kita, maligamgam itong tubig," lagi niyang pang-akit sa akin.

Tulad nung mga dati kong anghel, isang hapunan, nagpaalam na rin si Angel Ningning,

magpapakasal na raw siya sa kaniyang matagal nang nobyo.

Bawat anghel na dumarating sa aming bahay, alam kong masayang-masaya si Mama

dahil di na niya problema kung sino ang magbabantay at mag-aalaga sa akin.

Pero alam kong doble rin ang lungkot ni Mama kapag umaalis na ang aking anghel.

Maghihintay na naman kami ng bagong anghel na darating sa aming bahay.

Totoo nga bang may anghel tulad ng sinasabi ni Mama?

May anghel nga bang nagbabantay, nag-aalaga, at tumutulong sa mga bata?

Anak nga ba sila ng Diyos na puwede kong maging pangalawang mama?

Bakit lahat sila ay umalis sa aming bahay?

Isang umaga, binati ako ng halik ni Mama.

Isang masarap na almusal ang nakahanda.

"Mula ngayon Lara, ako na ang iyong magiging anghel," sabi ni Mama.

Hindi ako makapaniwala sa sinabi ni Mama.

Sa buong maghapon, kami na ang magkasama.

Laking gulat ko dahil kahit di ko pa nakakasama nang matagal si Mama,

alam na alam niya kung kailan ako dapat patulugin at pakakainin,

kung kailan dapat pulbusan at palitan nang bimpo sa likod ko,

at kung kailan ako dapat maglaro o paliguan.

Alam na alam din niya ang dami ng pagkain na mauubos ko

at ang tamang init ng tubig na gustong-gusto ko sa paliligo.

Parang nagsamang lahat ang anim na anghel na aking nakasama sa iisang anghel.

At sigurado ako, si Mama nga ang pangpito at panghuli kong anghel,

anghel na magbabantay, mag-aalaga, at tutulong sa akin.

Anghel na hinding-hindi magpapaalam, at anghel na hinding-hindi ako iiwan.