FILIPINO BOOK: WAAAH! NAKAGAT AKO NG ASO (BITTEN BY MY PUPPY) WITH ENGLISH/TAGALOG SUBTITLES (2)

"A, ganun ba?" tanong ni Dra. Espie.

"O sige, uunahin ko munang bigyan ng bakuna sina Zimatar at Bronson.

Puwera muna si Bruna kasi kailangan muna natin siyang obserbahan sa loob ng sampung araw.

Kung walang masamang mangyayari kay Bruna, ibalik ninyo siya rito para bakunahan ko."

Ilang saglit pa at iniiniksyunan na ng bakunang kontra-rabis sina Bronson at Zimatar.

Puro igik at ungol ang maririnig sa paligid.

Nang matapos ito ay kinalabit ni Janella si Mommy Grace.

"Ligtas na po bang kalaro ang mga tuta?"

"Oo, anak.

Pero ikukulong at oobserbahan muna natin si Bruna.

Ipagdasal na lang natin na walang masamang mangyayari sa kanya."

Sunud-sunod na tango ang naging sagot ni Janella.

"Opo, ipagdarasal ko po si Bruna.

At saka Mommy, sorry po kasi puro si Bruna ang inatupag ko.

Nakagat tuloy ako.

Promise po, pagbubutihin ko na ang pag-aaral ko."

Mula noon, araw-araw nilang tinitingnan kung may pagbabago kay Bruna.

Pagkagising sa umaga, agad nilang pinupuntahan ito sa kanyang kulungan.

Inoobserbahan ang bawat galaw nito, kung may gana itong kumain, kung masigla ito o malungkot.

Sa eskuwelahan naman, napansin ng titser hi Janella na matataas na ang mga grado nito sa mga exam.

Matuling lumipas ang sampung araw.

Tumakbo kay Mommy Grace si Janella.

"Mommy, sampung araw na mula nang makagat ako ni Bruna.

Buhay pa po si Bruna!

Saka masigla pa rin po siya.

Ibig sabihin, ligtas na po siya?"

"Oo, anak, at ligtas ka na rin sa rabies!

Salamat sa Diyos!"

Nakahinga nang maluwag si Mommy Grace.

Napatili sa saya si Janella.

Nagmamadaling inilabas niya si Bruna at kinarga papalabas ng kanilang gate.

"O, anak, saan ka pupunta?" tanong ni Mommy Grace.

"Kay Dra. Espie po, Mommy!

Di ba't sabi n'ya, kapag walang masamang nangyari kay Bruna, ibabalik natin ito sa kanya para pabakunahan?"

O, mga bata, ngayon, mas maalam na tayo sa tamang pangangalaga ng ating mga alagang aso.

Alam na rin natin ang dapat nating gawin kapag nakagat tayo ng aso.

Mas mabuti talaga kung sasabihin agad ito sa ating mga magulang.

Para sa mga magulang naman, heto ang mga dapat gawin kapag may nakagat ng aso:

• Paduguin ang sugat.

Hugasang maigi ng sabon at tubig.

Alamin kung may bakuna ang asong kumagat.

Kumunsulta agad sa doktor o nurse.

HUWAG papatayin ang aso (kahit na galit kayo dito!).

Itali o ikulong agad ito at obserbahan sa loob ng 10-14 na araw. Tingnan kung magiging mabangis ang aso o kung magiging matamlay ito.

Kung mananatiling buhay ang aso sa loob ng dalawang linggo, walang taglay na rabies ang aso.