24.3 Pagbabasa - Ang Bughaw na Dagat
Anibersaryo ng kasal namin. Nagreserba ako ng malaking kuwarto sa Oceanview Resort, isa sa pinakamalaking resort sa isla. Mahal ang resort at hindi kami mayaman, pero ang sabi ng (mga) anak ko: “Mommy, anibersaryo ninyo ng Daddy. Espesyal na araw ito”.
Tanghaling tapat nang tumawag ako sa resort. “Gusto ko hong magreserba ng kuwarto,” sabi ko.
Mabait ang kausap kong hotel clerk. Sinabi ko sa kanya na anibersaryo namin ng asawa ko. “Ibibigay ko po sa inyo ang pinakamaganda naming cottage”.
“Cottage” ang tawag niya sa “bahay kubo” na nasa ibabaw ng tubig. Ganito ang mga bahay ng mga taong Badjao na nakatira sa Sulu sa katimugan ng Pilipinas. Inilalarawan ang mga bahay na ito na “mga bahay na nakatayo sa poste” o “houses on stilts”.
Apat na araw, tatlong gabi. Apat na raang dolyar bawat gabi pero kasama na ang almusal, tanghalian, at hapunan. Ang mahal, naisip ko. Siyam na dolyar lang ang suweldo ng isang manggagawa sa Pilipinas. Misyonarya ako, kaya palagi kong naiisip ang mga mahihirap.
Alas-nuwebe nang umaga nang dumating kami ng asawa ko sa resort. Bughaw na bughaw ang dagat, bughaw na bughaw ang langit. May bote ng alak at may mga bulaklak sa kuwarto; regalo ito ng resort sa amin. Mayroon ding coffeemaker, kape, tsaa at minibar sa kuwarto.
Gumawa ng tsaa ang asawa ko. Kinuha ko mula sa bag ko ang chocolate chip cookies na ginawa ng anak ko. Umupo kami ng asawa ko sa balkonahe, umiinom ng tsaa at kumakain ng cookies, tinitingnan ang dagat. Magkahawak kamay kami, tinitingnan ang dagat, iniisip ang payapa naming buhay na magasawa.
Ito ang hindi namin naisip. Noong gabing iyon, dadating ang mga lalaking may baril, isasakay nila kami sa bangka, dadalhin sa malayong isla, at gagawing bihag. At sa biyahe sa gabing iyon, habang may blindfold ang mga mata namin, at takot na takot kami, hindi namin makikita ang dagat na bughaw.
- Tanong -
1) Sa anong hotel siya nagreserba ng kuwarto?
2) Ano ang pinareserba niya?
3) Ilang gabi sila titigil sa hotel?
4) Ano ang ininom nila ng asawa niya?
5) Ano ang kinain nila?
6) Saan sila uminom at kumain?
7) Bakit sila takot na takot?
