17.6 Pagbabasa - Isang Araw sa Buhay ni Cora

Gumigising nang alas-singko ng umaga si Cora. Naliligo siya, nagsusuklay ng buhok at nagbibihis. Pagkatapos, pumupunta siya sa cafeteria ng dormitoryo para magtrabaho.

Alas-diyes ng umaga. Naglalakad si Cora mula sa dormitoryo hanggang sa kanyang klase. Linguistics ang major niya at nag-aaral siya ng siyensiya ng mga wika. Pagkatapos ng klase, nag-aaral siya sa aklatan.

Sa gabi, nasa cafeteria na naman si Cora at nagtatrabaho. Natatapos siya ng alas-diyes ng gabi. Nag-aaral siya sa kuwarto niya hanggang alas-onse. Pagkatapos, nagsisipilyo siya, naghihilamos, at natutulog.

Tuwing Sabado, dumadalo siya sa pulong at ensayo ng Alay Sining. May mga estudyante na kumakanta, may mga sumasayaw, may mga gumagawa ng dula, at may mga nagpipinta.