TAK og tilraunalímið

Tak og tilraunalímið. Eftir Hjalta Bjarnason.

Tak og tilraunalímið.

Stigbreyting lýsingarorða. Latur, latari, Hjaltastur. Vitlaus, vitlausari, Takastur.

Freyjukettir, Norræn menning. Önnur útgáfa 2010. ISBN númer. Flestar TAK-sagnanna voru í Stundinni okkar. Límið var sent út 8. desember 1985. Hjalti samdi Tak-sögurnar og teiknaði myndirnar á árunum 1975 til '79, þá fimm til tíu ára.

Tak er á efnarannsóknarstofunni sinni.

(Leikhljóð: blásið í drykkjarrör í vatnsglasi, alveg uppi við hljóðnemann)

Tak er að reyna að búa til nýja tegund af lími.

Tak hrærir saman efnum og les formúlur.

Þetta verður alveg fyrirtak og fyrir-Tak. Það er best að þessi hluti blöndunnar heiti F.

Tak setur á sig einangrandi logsuðuhanska. Svo vefur Tak stóran og öflugan rafsegul. Rafseguláhrifin eru til þess að límið grípi.

Þá skrifar hann R á töfluna. R fyrir rafáhrifin á límið.

(Leikhljóð: blásið í rör í vatnsglasi)

Þá er það hin blandan sem á að fara saman við. Það er best að hún heiti A-blanda.

Tak hrærir A-blöndunni saman við. Tak bætir A á töfluna. FRA-límið. Ágætis nafn. Ágætis nafn. Þetta verður stórkostleg tilraun.

Tak treður límblöndu í rjómasprautupoka og sprautar á tvo trékubba, sem hann ætlar að prófa límið á.

Heilmikið sullast á teppið.

Svo setur Tak rafsegulinn í samband og flytur hann nær trékubbunum.

Hann notar þessa sérstöku glófa á hendurnar sem einangra alveg - bæði rafmagn og hita. Trékubbarnir smella saman.

Tak er ofsákátur. Þetta er svo gott lím að logsuðuhanskarnir límast líka fastir.

Ég verð að hringja strax á blaðamann.

Geimurinn verður að fá að vita af þessu afreki á sviði límfræðinnar.

Tak hleypur í símann en gólfteppið hefur límst fast við fæturna á honum og dröslast á eftir honum.

-Halló! Þetta er Stressi blaðamaður á Bla-bla-blaðinu hér.

Ha? Hefur stórkostlegasta lím í geimi verið fundið upp? Kem í hvelli.

-Ég verð að ná mynd af þessu, segir Stressi blaðamaður og hleypur heim til Taks.

Fyrirsögnin verður: Stórkostlegasta lím í geimi hefur verið fundið upp!

Tak hefur límst við heyrnartólið og skífan af símanum er föst á puttanum.

Nú sér Tak að farið er að rjúka úr kubbunum.

Og líst ekki á blikuna.

Rétt í þessu kemur Stressi blaðamaður æðandi inn með myndavélina.

Stressi sér ekkert fyrir reyknum og flækist í rafmagnsleiðslunni svo rafsegullinn dettur úr sambandi.

Allt dettur í sundur.

Blaðageimveran og Tak verða vonsviknir.

Fundið upp eða fyndið upp? Raunalegt raunalím er ekki til.

En svo varð Tak reiður og bætti stóru T-i á töfluna.

Þetta raunalím var frat.

Þrjátíu Tak-sögur. Barn semur handa börnum.