Þjóðhátíð

Í Herjólfsdal í Vestmannaeyjum er alltaf haldin „þjóðhátíð“ fyrstu helgina í ágúst. Þessi hátíð á sér skemmtilega sögu. Hún er arfur frá þjóðhátíðinni árið 1874 þegar Íslendingar héldu upp á það að 1000 ár voru liðin frá landnámi Íslands. Kristján konungur IX. heimsótti þá Ísland og var það í fyrsta sinn sem konungurinn kom til landsins. Hann fagnaði með þjóðinni á Þingvöllum 2. ágúst. Eyjamenn komust ekki upp á fastalandið vegna veðurs þegar átti að fagna þúsund ára afmæli þjóðarinnar á Þingvöllum. Þess vegna héldu Eyjamenn sína eigin þjóðhátíð og það gera þeir enn!