早晨 天氣 節目 (11月 17日 上午 8時 )–科學 主任 江偉

Transcript 各位 早晨 ！ 歡迎 收睇 星期六 早上 嘅 天氣報告 ，我 係 江偉 。 今個 週末 香港 天氣 比較 多雲 ，而且 有 啲 雨 喎 ，首先 同 大家 睇 吓 大 範圍 嘅 衛星 雲圖 。 大家 見到 啊 今日 喺 華南 地區 係 比 低 雲 啊 所 覆蓋 住 㗎 ，所以 預計 香港 呢 邊 都 唔 例外 喇 ，今個 週末 呢 天氣 會 係 多雲 為主 。 噉 現時 由 維港 望 出去 都 係 見到 個 天色 方面 係 雲量 比較 多 㗎 。 噉 除此之外 呢 今朝 早 亦 都 有 啲 雨 㗎 ，由 午夜 去 到 現時 為止 ，喺 沙田 啦 同埋 喺 九龍 西 呀 都 錄 到 超過 五 毫米 嘅 雨量 。

至於 氣溫 喇 ，去 到 今朝 早 七點半 而家 香港 各區 嘅 氣溫 係 介乎 二十二 至到 二十四 度 ，至於 今日 嘅 詳細 天氣 預測 呢 會 係 多雲 啦 同埋 有 幾 陣 雨 ，初時 嘅 能見度 較 低 ，日間 嘅 最高 氣溫 會 上升 去 到 二十五 度 ，風 方面 係 吹 和緩 至 清勁 嘅 東 至到 東北 風 。 稍後 離岸 間 中 呢 會 吹 強風 㗎 。

去 到 展望 喇 ，我 哋 預計 之後 兩三日 香港 天氣 啊 都 係 仍然 係 多雲 為主 㗎 ，噉 另外 呀 繼續 會 有 一兩 陣 雨 。 另外 要 注意 呢 去 到 下個 禮拜 初 ，預計 有 一股 季侯風 嘅 補充 會 抵達 沿岸地區 ，星期一 開始 呢 香港 天氣 呢 會 變得 稍 涼 㗎 ，噉 如果 之前 係 未 做 好 轉季 嘅 準備 呢 都 可能 要 趁 呢 個 機會 換 返 張 厚 啲 嘅 被 喇 。

好 喇 ，呢 節 嘅 天氣報告 講到 呢 度 ，祝 大家 愉快 嘅 週末 ，拜拜 。