前文 再續 啊 書 接 上 一回 。
話說 韋小寶 叫 班侍衞 去 捉 馮錫范 ，自己 呢 ，同 多隆 喺 間 廳 處 飲酒 等候 。
韋小寶 手下 嘅 親兵 ，不停 探聽 到 消息 嚟到 報告 ：
話 班 侍 衞 已經 到 咗 忠誠 伯府 喇 ， 話 係 前鋒 營 嘅 ， 噉 馮錫范 啊 出 嚟 迎接 ， 要 請 啲 人入 去 飲茶 ；
又話 張康年 話 係 奉咗 泰都統 嘅 命令 ，有 台灣 嘅 緊急 軍情 ，請 佢 即刻 去 會商 ；
又話 馮錫范 上咗 轎 ，眾 侍衛 擁住 佢 一直 去到 西城 ；
又話 眾侍衛 將 馮錫范 呢 ，上咗 手銬 ，將 佢 嘅 從人 亦都 捉起嚟 喇 ；
又 話 一行 人去 咗 北城 ， 九門提督 嘅 巡夜 查問 ， 趙齊賢 大聲 回答 係 前鋒 營 嘅 ， 噉 馮錫 范 喺 轎 裏 便 呢 一定 聽到 好 清楚 嘅 ；
噉又話 眾人 已經 返緊嚟 喇 噉 。
過咗 冇 幾耐 ，眾 侍衛 押住 馮錫范 入嚟 。
張康年 大聲話 ：啟稟 泰都統 ，犯官 馮錫范 帶到 。
韋小寶 右手 揸緊 拳頭 ，作 個 搏命 打 嘅 姿勢 。
眾侍衛 就 叫嘞 ：犯官 馮錫范 勾結 叛逆 ，圖謀 不軌 。
泰 都 統 有 令 重重 拷打 。
即時 拳打腳踢 ，搏命 咁 打 馮錫范 。
各位 ，馮錫范 嘅 武功 極高 ，為人 又 十分 機靈 。
當班侍衛 冒充 前鋒營 官兵 嚟到 請佢去 嘅 時候 ，佢 就 睇出 唔對路 嘞 。
如果 要 逃走 呢 ，眾 侍衛 人數 雖然 係 多 啊 ，亦 捉 佢 唔住 嘅 。
但係 佢 投降 之後 封 為 伯爵 ，佢 諗住 對方 縱使 係 有意 陷害 ，不過 皇帝 英明 總 可以 分辯 啦 。
如果 自己 甩身 走 咗 ， 不免 坐實 咗 畏罪潛逃 嘅 罪名 ， 從此 尊榮 爵祿 啊 盡付 流水 嘞 噃， 所以 一直 完全 冇 抗拒 。
唉 ，只因 貪圖 富貴 啊 ，以致 身為 當世 武功 高手 ，竟然 畀 班 侍衞 打到 佢 死去活來 。
眼見 馮錫范 鼻哥 流血 ，外傷 好重 ，韋小寶 噉 就 痛快 喇 ，殺 師父 嘅 大仇 ，總算 報 咗 一 小半 。
睇住 再 打落去 呢 ，怕 會 打死 佢 ，就 耍手 叫 唔好 打 喇 ，然後 叫 親兵 剝光 佢 衣服 ，用 一 張 氈 包住 佢 。
呢個 時候 馮錫范 已經 係 奄奄一息 ，人事 不知 嘞 。
多隆 笑住 話 ：而家 ，就 送 佢 去 老泰 嘅 八奶 屋企 啦 。
趙齊賢 就 笑住 話 ：最好 呢 ，將 老泰 嘅 八奶 都 剝光埋 ，將 兩個人 綁埋一齊 就 過癮 喇 。
班侍衛 就 歡喜 到 乜嘢 噉 猛 話 好啊好啊 。
多隆 因為 要 睇下 泰都統 嘅 八奶 畀 人哋 剝光 衣服 嘅 模樣 ，就 笑住 話 ：嘿嘿 ，呢次 我 嚟 帶隊 啦 。
噉 一 行人 抬住 馮錫范 正 話 要 出發 ，忽然 兩 名 親兵 快步 行 入嚟 ，向 韋小寶 稟報 話 ：
啟稟大人 ，甜水井胡同 泰都統 嘅 外宅 ，而家 係 嘈 到 天翻地覆 ，正在 打 大交 啊 。
大家 都 吃咗 一驚 ，都 諗 ：點解 洩漏 咗 風聲 咩 ？
泰 都 統 有 咗 防備 ，呢 件 事 就 弊 㗎 嘞 噃 。
韋小寶 問嘞 ：咩人 打 大交 啊 ？
一名親兵 話 ：小人等 總共 係 八個人 ，奉咗 大人 將令 ，喺 甜水井胡同 前後 探聽 消息 ，忽然間 見到 有 一隊 娘子軍 ，總共 係 三四十人 嘅 。
韋小寶 皺住 眉頭 話 ：咩嘢 娘子軍 啊 ？
嗰個 親兵 話 ：回 大人 ，呢隊 人 啊 都 係 大腳 女人 ，有啲 係 揸住 擀面棍 ，有啲 係 揸住 洗衣棍 ，仲有啲 揸住 門戌 擔挑 ，衝入 泰都統 嘅 外宅 ，乒乒乓乓 噉 亂 咁 打 ；
將 一個 好靚 嘅 小娘子 拉咗 出嚟 ，用 皮鞭 呀 搏命 咁 鞭 喇 。
哈噉就 奇怪喇 ，再探 ！
兩名 親兵 應咗 就 去 嘞 。
跟住 ，第二 路 探子 嚟 報告 話 ：
回大人 ，泰 都 統 騎住 快馬 ，已經 趕到 甜水井胡同 嘞 ，佢 衣服 都 冇着 好 ，左腳 有 靴 ，右腳 啊 打 大 赤腳 。
原來 率領 娘子軍 攻打 甜水井胡同 嘅 ，就係 泰都統 夫人 喇 。
眾人 一聽 ，哄堂大笑 啊 ，先至 知道 係 泰都統 夫人 呷醋 ，去 佢 嘅 外宅 踢竇 。
嗰個 親兵 講到 呢處 亦 忍唔住 笑 喇 佢 話 ：
嗰位 太太 揦住 泰都統 ，兜口兜面 摑咗 佢 兩巴 ，跟住 呢 又 踢 一腳 ，嘿 真係 厲害 喇 。
泰都統啊打躬作揖 ，一味話 ：誒太太唔好嬲 ，誒 ，誒 ，太太唔好嬲啊 。
多隆得意到手舞足蹈 ，佢話 ：哎呀 ，呢一下 老泰 呀 有得捱喇 。
韋小寶 笑住 話 ：大哥 ，你 快啲 帶領 人馬 趕去 勸交 啦 。
呢一下 ，老泰 畀 你 捉住咗 痛腳 ，擔保 佢 前鋒 營 從今而後 ，再唔 敢 同 我哋 御前侍衞 作對 嘞 。
多隆 畀 佢 一言 提醒 ，歡喜 到 佢 癲 喇 。
鑿咗 自己 額頭 一下 笑住 話 ：嘿 ，我 真係 糊塗 喇 ！捉到 鹿 都 唔會 脱角 喎 ，兄弟們 ，大家 去 睇 熱鬧 喇 。
噉啊 率領 眾侍衞 ，向 甜水井胡同 急奔 而去 嘞 。
韋小寶 望住 癱 喺 地下 嘅 馮錫范 佢 諗 ：呢個 傢伙 點樣 處置 先至 好 呢 ？
放咗佢之後 ，佢 必定 會 去 稟告 皇上 嘅 ，噉 就算 捉唔到 我 把柄 啊 ，皇上 亦 必定 估到 係 我 搞 嘅 。
佢 背負 雙手 ，喺 廳 上 踱嚟踱去 ，又 諗 ：
天一光 ，就要 去 殺 茅大哥 嘞 ，有 咩 法子 救得 佢 條 命 呢 ？
梁山泊 劫 法場 係 唔 得 嘅 ， 法場 ， 法場 ， 突然 之間 ， 諗 起 一齣戲 嘞 ： 法場 換子 ！
冇錯喇 ，薛 剛 闖咗 禍 滿門 抄斬 ，有 個 徐 咩 嘅 白鬍鬚佬 將 自己 嘅 親生仔 ，喺 法場 換 咗 個 薛 咩 嘅 細路 出嚟 嘅 。
佢 睇過 個 大戲 呢 確實 唔少 ，劇中人 叫做 咩 名 呢 就 唔係 點 講得出 喇 ，不過 故事 呢 ，就 記得 清清楚楚 嘅 。
一諗到 法場 換子 ，跟住 呢 又 諗起 另外 一齣戲 ：搜孤救孤 。
呢個 故事 亦 差唔多 嘅 ，有 一個 叫做 程嬰 嘅 黑鬍鬚佬 ，將 自己 個仔 去 換 咗 主子 嘅 仔 ，等 自己 嘅 仔 去 殺頭 就 救 咗 小主人 性命 。
哎呀呀呀 好彩 茅大哥 個 年紀 同 我 個仔 差得遠唧 ，否則 呀 ，要 我 將 虎頭 、銅錘 送去 法場 殺頭 ，換翻 茅大哥 出嚟 ；
雖然 話 朋友 義氣 為重啫 ，呢種 事情 呀 ，我 唔 做得 㗎 嘛 。
嗯 ，好極好極喇 。
韋小寶 向 癱 喺 地下 嘅 馮錫范 出力 噉 踢咗 一 腳 ，就 話 ：
算你夠運啦 ，韋大人 就 收咗 你 做 契仔 。
韋大人 嘅 親生仔 就 唔 捨得 換 ，契仔 就 馬馬虎虎 啦 。
就叫咗親兵隊長入嚟 ，秘密囑咐一番 ，賞咗佢一千兩銀 。
另外 ，又 有 一千兩銀 ，叫 攞去 分畀 辦事 嘅 其餘 親兵 。
嗰個 隊長 躬身 多謝 話 ：大人 放心 啦 ，一切 都會 辦得 妥妥當當 ，決不 有 誤 。
韋小寶 安排完畢 ，就 返到 去 內堂 。
七個 夫人 同埋 仔女 都 畀 太后 召 咗 入 皇宮 嘞 ，屋 裏 便 冷冷清清 。
佢 和 衣 喺 床 上 牽 咗 一陣 ，冇 幾 耐 就 天光 嘞 。
到咗 辰牌 時分 ，即係 上午 七點 到 九點 ，宮 裏 便 傳出 聖旨 話 ：江洋大盜 茅十八 大逆不道 ，辱罵 大臣 ，着 即 斬首 ，命 撫遠 大將軍 、一等 鹿鼎公 韋小寶 監斬 。
韋小寶 接咗 聖旨 ，喺 府門外 便 點齊咗 親兵 ，只見 多隆 率領 幾十名 御前侍衞 ，押住 茅十八 嚟到 嘞 。
茅十八 眼 青 鼻 腫 滿面 係 血 ，顯然 係 受 咗 苦刑 。
佢 一見 韋小寶 就 破口大罵 ：
韋小寶 ，你 呢個 小 漢奸 ，唔 要 面 ！今日 你 做 老子 嘅 監斬官 ，老子 死得 一啲 都 唔 冤枉 。
邊個 叫 我 當日 盲咗 雙眼 ，喺 揚州 老舉寨 ，將 你 呢嗰 小漢奸 帶 到 嚟 北京 吖 。
眾親兵 大聲 噉 喝佢 ，茅十八 呢 ，就 越 鬧 越 犀利 啊 。
韋小寶 唔理佢 ，問 多隆 話 ：老泰 點啊佢 ？
多隆 笑住 話 ：尋晚 我 趕到去 嘅 時候 呀 ，老泰 已經 畀 佢 夫人 搲 到 滿面 都 係 血痕 。
佢 一見到 我 ，嘿 ，嗰個 狼狽樣 啊 真係 唔睇 就 嘥 喇 。
我 做好 做醜 勸 住咗 佢 夫人 ，又 將 佢 八奶 接咗 去 我 屋企 ，叫 我 兩個 小妾 陪 佢 。
老泰 係 千恩萬謝 ，感激到 不得了 啊 ，哈哈哈哈哈哈 。
韋小寶 笑住 問 ：呢位 八奶 嘅 相貌 點 㗎 ？
多隆 豎起 手指 公話 ：嘿 ，正嘢 啊 ！
韋小寶 笑住 話 ：喂 ，你 唔能夠 見色起心 ，趁火打劫 個 喎 。
多隆哈哈大笑話 ：兄弟 你 放心 啦 ，你 大哥 邊度 會 咁 衰 㗎 ？
老泰 雖然 係 我 對頭 ，呢種 事情 呀 ，你 大哥 係 點 都 唔 做 嘅 。
話說 韋小寶 同 多隆 押住 茅十八 ，一路 去 菜市口 法場 。
多隆 騎馬 ，韋小寶 呢 ，就 坐 一架 大馬車 。
茅十八 就 坐 喺 架 冇篷 嘅 牛車 上 便 ，雙手 反綁 ，頸上 插住 一塊 木牌 ，寫住 ：立斬 欽犯 茅十八 一名 。
牛車 喺 騾馬市 大街 向 西 行 ，噉 好多 百姓 啊 紛紛 嚟 睇 嘢 嘞 噃 。
茅十八 沿途 又 叫 又 唱 ， 大 嗌 話 ：
老子 十八年 之後 ，又係 一條 好漢 ，所以 我 個 名 叫做 茅十八 ，因為 早就 知道 要 殺頭 㗎喇 。
街邊 百姓 大聲 喝彩 ，讚佢話 ：有種 ，係 條 硬漢 啊 ！
行啊行啊 ，就嚟到 騾馬市 大街 同 宣武門 大街 交叉 十字路口 嘅 菜市口 法場 嘞 。
韋小寶 嘅 親兵 ，早就 漏夜 搭 好咗 席棚 ，棚前 棚後 守衛 極之 嚴密 。
多隆 奉咗 康熙 嘅 囑咐 ，怕 天地會 要嚟 劫 法場 啊 ，就 已經 知會 咗 九門 提督 ，派咗 二千 名 官兵 喺 法場 四圍 把守 。
茅十八 威風凜凜 企 喺 法場 中心 ，大叫 ：
我哋 都係 大漢 百姓 ，大好 江山 被 清兵 霸佔 咗 ，總有 一日 ，要 將 清兵 殺到 乾乾淨淨 ！
韋小寶 落車 入到去 席棚 ，噉 馬車 呢 ，就 停 喺 棚邊 。
韋小寶 升座 ，請 多隆 坐 喺 自己 旁邊 。
多隆皺住眉頭話 ：呢個 犯人 一味 講埋 啲 大逆不道 嘅 説話 ，喺度 煽動 人心 ，我哋 盡快 將 佢 斬咗 算咯 。
韋小寶 話 ：係 ，帶 犯人 ！
四名 親兵 將 茅十八 推入 嚟 席棚 ， 要 撳 佢 跪 低 ， 茅十八 就點 都 唔 肯 跪 。
韋小寶 話 ：唔使 跪 喇 。
轉頭 向 多隆 話 ：大哥 ，驗明正身 ，冇 錯 吖 嘛 ？
多隆話 ：冇錯 。
韋小寶 話 ：驗明正身 ，立 斬 欽犯 茅十八 一名 。
攞起 朱筆 ，喺 木牌 上面 畫咗 個 大圈 ，掉咗 出去 。
一名 親兵 啊 執起 木牌 ，將 茅十八 拉出去 嘞 。
韋小寶 話 ：多大哥 ，我 畀 樣 好玩 嘅 嘢 你 睇下 吖嗱 。
講完 ，喺 衫袖 籠 攞咗 一沓 手巾仔 出嚟 ，遞到 多隆 面前 。
手巾仔 上便 呢 ，繡 嘅 係 一幅 春宮圖 ，圖 裏 便 男女 面目 俊美 ，姿態 生動 。
多隆 一睇 ，當堂 畀 佢 吸引住 喇 。
噉啊掀過 一條 手巾仔 ，下面 嗰條 手巾仔 呢 ，繡嘅 又係 另外 一幅 春宮 。
多隆 睇完 一幅 又 一幅 ，都 唔知 幾 有癮 ，就 笑住 話 ：
喂 ，兄弟 ，呢啲 嘢 喺 邊處 嚟 㗎 ？你 幫 阿哥 買 一 套 啦 。
韋小寶 笑住 話 ：呢啲 係 我 孝敬 畀 大哥 嘅 。
多隆如獲至寶 ，眉開眼笑 一味話多謝 ，噉 將 嗰 沓 手巾仔 呢 珍而重之 噉 收起佢 。
就喺呢個時候 ，外便 轟轟轟 連放 三炮 ，親兵隊長 入嚟 稟告 話 ：時辰 已 到 ，請 大人 監斬 。
韋小寶 話 ：好 ！企起身 ，拉住 多隆 隻 手 一齊 行 出去 席棚 外 便 。
只見 茅十八 垂頭喪氣 噉 跪 喺 法場 中間 ，就 好似 昏迷 咗 噉 。
氹氹氹氹氹氹氹氹 ，鼓手 擂起 大鼓 。
鼓聲 一停 ，披紅掛彩 嘅 劊子手 舉起 鬼頭刀 ，向 下一落 ，就 斬咗 犯人 嘅 人頭 嘞 。
多隆話 ：差事 辦成喇 ，我 要 去 見 皇帝 覆旨 。
韋小寶 哽噎住 話 ：多大哥 ，呢個 人 ，同 我 個 交情 好 深 ，實在 係 皇上 嘅 嚴旨 ，救佢唔到 ，唉 。
講完 ，用 衫袖 抹 下 啲 眼淚 ，就 抽抽噎噎 噉 喊起 上嚟 喇 。
多隆話 ：唉 ，兄弟 都 好 夠 義氣 喇 。
你好好地 收斂咗 佢 ，同 佢 安葬 ，噉 亦係 好 對得住 死者 㗎喇 。
韋小寶 應咗 一聲 ，仲 喺度 猛咁 喊 。
韋小寶 用 衫袖 抹 眼淚 ，其實 呢 係 將 收埋 喺 衫袖 裏 便 嘅 生薑 嚟 捽 雙眼 ，整到 雙眼 紅晒 ，猛咁 流 眼淚 。
聽 多隆噉樣 講 個 心 都 暗暗 偷笑 ，慶幸 計策 成功 啊 。
多隆 就 安慰咗 幾句 就 送佢 上咗 車 ，噉 先至 上馬 走咗 。
眾親兵 簇擁住 馬車 直 返 公爵府 。
另外 有 幾名 親兵 ，用 草席 卷起 犯人 屍首 ，放落 早就 準備好 嘅 棺材 ，冚好 棺材蓋 釘實 。
睇斬頭嘅 百姓 啊 紛紛 議論 ，都 話 茅十八 臨死 之前 呢 仲 敢 破口大罵 真係 英雄好漢 喇 。
噉 亦 有 怕事 嘅 呢 就 鬧 佢哋 話 ：欽犯 啊 大逆不道 ，唔應該 讚 佢 ，以免 惹 禍 上身 啊 。
韋小寶 嚟到 公爵府 門口 落車 ，噉 嗰架 馬車 呢 ，就 繼續 向南 行 ，出咗 北京城 一直 向南 ，直去 揚州 啊 。
話說 韋小寶 入宮 覆旨 ，噉 啊 康熙 即刻 召見 佢 。
康熙 已經 得到 多隆 報告 ，知道 佢 監 斬 茅 十八 嘅 時候 呢 ，曾經 喊得 好 淒涼 。
而家 見 佢 雙眼 紅腫 ，個心 有啲 過意唔去 ，諗住 佢 忠心 為 主 就 非常 難得 ，就 安慰咗 佢 幾句 。
然後 佢 話 ：小桂子 ，你 捉嚟 嗰啲 羅剎兵 ，大多數 都 懇求 我 釋放 佢哋 回國 ，我 都 放咗 佢哋 喇 。
不過 而家 有 二百幾 名 願意 留 喺 中國 啊 。
韋小寶話 ：北京 啊 比 莫斯科 熱鬧 好玩 ，跟隨 皇上 辦事 ，又 比 跟隨 嗰 兩個 唔中用 嘅 羅剎 小沙皇 啊 風光 得多 啦 。
康熙 微笑 話 ：我 將 呢 批 羅剎 兵 編 為 兩個 俄羅斯 佐領 。
呢 兩 隊 兵 ，就 撥 歸 你 統帶 啦 。
你 係 要 好好 管束 佢哋 ，唔准 佢哋 喺 北京 鬧事 。
韋小寶 好 歡喜 就 跪低 謝恩 。
出咗 皇宮 ，兩隊 羅剎兵 已經 喺 太和門 外 便 金水橋 邊 侍候 嘞 。
羅剎兵 啊 着住 清兵 服飾 ，光鮮 合身 ，都 好 神氣 啊 。
韋小寶 吩咐 每人 賞 銀 二十 兩 ，放假 三日 。
嘿 ，羅剎兵 啊 大叫 烏啦 啊 。
韋小寶 返到 公爵府 ，噉 啊 七位 夫人 同 三名 子女 ，都 已經 喺 皇宮 出嚟 喇 ，噉 人人 都 得到 太后 唔少 賞賜 。
噉 此後 十幾日 當中 ，王公大臣 一個個 設宴 同 韋小寶 慶功祝賀 ，睇戲 賭錢 ，真係 晚晚 都 唔得閒 啊 。
呢一日 ，多隆 嚟到 坐 ，講起 馮錫范 失蹤 咗 十幾日 ，佢 屋企人 已經 告 到 去 順天府 喇 。
多隆 細細聲 話 ：兄弟 ，嗰晚 我哋 痛打 咗 佢 一餐 ，收尾 點樣 啊 ？
韋小寶 話 ：噉 收尾 咪 送 佢 返 屋企 囉 ，呢個 嘢 去咗 邊處 呢 ？
唔係 你 殺咗 佢 吖嘛 ？
如果係我叫人殺咗佢 ，你 都 一定 喺 旁邊 睇住 㗎 ，多大哥 ，你 有冇 睇見 吖 ？
冇冇冇 ，我哋 只係 搏命 噉 打咗佢 一餐 ，邊度 殺佢 唧 ？
係 啊 ， 兄弟 自從 奉旨 帶兵 之後 ， 雖然 ， 已經 交卸 咗 副 總管 嘅 職務 ， 但 係 只要 御前 侍 衞 做 嘅 嘢 ， 無論 有 咩 嘢 關係 都 好 ， 我 仍然 同 大哥 一齊 擔當 嘅 。
事就冇事嘅 ，馮家 咬實 嗰晚 係 前鋒營 老泰 派 人 嚟 接佢 去 嘅 ，噉 收尾 就 冇 返 屋企 。
順天府 啊 親自 去 拜訪 老泰 ，問起 嗰晚 嘅 事 。
老泰 梗係 好尷尬 啦 ，支支吾吾 都 唔願 多講 。
噉 收尾 老 羞 成 怒 ，大發脾氣 ，順天府 亦 唔 敢 查 嘞 。
講完 ，多隆 企 起身 ，拍下 韋小寶 嘅 膊頭 笑住 話 ：
兄弟 ， 你 係 福將 啊 ， 福將 啊 ！
點估得到事情會有咁巧嘅呢 ？老泰 嘅 夫人 遲不遲早不早 ，偏偏 會 喺 嗰 晚 心血來潮 ，率領 娘子軍 去 攻打 甜水井 胡同 。
嘿嘿 ，噉一嚟 ，就 咩嘢 事情 ，老泰 都 孭起晒 喇 ，哈哈哈哈哈哈哈 。
多隆 估計 馮錫范 一定 係 畀 韋小寶 暗中 殺咗 ，呢件事 ，自己 雖然 亦 有啲 關係 啊 ，但係 嫁禍於 前鋒 營 泰都統 就 啱晒 自己 心水 。
佢 邊處 知道 ，泰 都 統 夫人 啊 不遲不早 喺 呢個 時候 出師 ，並 唔係 湊巧 啊 ，而係 韋小寶 計準 時刻 ，派 人 向 佢 通風報信 嘅 。
有件事佢更加唔會知道 ，韋小寶 派咗 親兵 ，喺 監斬 嘅 席棚 裏 便 搭咗 暗格 ，將 馮錫范 啊 收埋 喺 裏 便 。
等到 驗明 茅 十八 正身 ，拉佢 出去 席棚 外 便 嘅 時候 ，韋小寶 呢 ，攞出 春宮 嘅 手巾仔 出嚟 ，引開 多隆 嘅 目光 。
手下 親兵 ，即刻 就 將 茅十八 同 馮錫范 兩個人 換轉咗 。
當其時 馮錫范 啊 昏迷不醒 ，滿面 係 血 ，衣着打扮 同 茅十八 一模一樣 嘅 ，喺 法場 上面 就 耷低 頭 跪 喺 處 ，立即 斬首 。
馮茅 兩個人 面貌 身材 雖然 係 唔同 啊 ，但係 邊個 都 冇 發覺 。
劊子手 所 殺 嘅 其實 係 馮錫范 嘅 人頭 。
噉親兵 就 將 茅十八 抱咗 入去 緊靠 席棚 嘅 韋小寶 坐架 車 處 ，塞住 佢 個嘴 ，就 馬不停蹄 噉 送 佢 去 揚州 。
過咗 黃河 先 同 佢 講明 真相 ，又 送咗 三千 兩 銀 畀 佢 。
茅十八 係 死裏逃生 ，挫折 晒 鋭氣 ；
又覺得 韋小寶 拼住 性命 嚟到 救佢 ，都唔係 唔講義氣 嘅 人 啦 ，噉 當然 呢 ，亦 唔會 再 聲張 嘞 。
韋小寶 連日 應酬 ，亦 有啲 膩嘞 ，佢 掛住 天地會 嘅 兄弟 。
佢 諗 皇帝 嘅 手段 就 越嚟越 厲害 ，自己 喺 公爵府 享福 ，青木堂 嘅 眾 兄弟 ，千祈 唔好 畀 皇帝 一網打盡 ，要 商量 個 好 法子 至得 。
於是就 扮成 個 富家公子 噉樣 ，要 雙兒 啊 扮 個 親隨 。
呢一日 ，兩個人 嚟到 天橋 ，噉 喺 人叢 裏 便 混咗 半個時辰 ，就 見到 徐天川 孭住 藥箱 ，喺 一間 小茶館 裏 便 飲茶 。
韋小寶啊 即刻 行入去 茶館 ，喺 徐天川 張 枱 坐低 ，噉 細細聲 叫話 ：徐大哥 。
徐天川 就 啪聲 企 起身 怒容滿面 ，大踏步 行咗 出去 。
韋小寶 愕然 嘞 就 跟住 出去 啦 。
見到 徐天川 一味 行去 啲 僻靜 嘅 地方 ，就 同 雙兒 遠遠 噉 跟住 喺 後 便 。
嗱 各位 ，欲知 後事 如何 ，且 聽 下回 分解 。
