前文 再續 啊 書 接 上 一回 。
話説 韋小寶 出咗 上書房 ，不由得 唉聲歎氣 啊 。
佢 諗 ：唉 ，皇上 將 我 七個 老婆 三個 仔女 都 扣起嚟 ，就算 我 有 膽 逃走 啊 ，我 都 唔 捨得 㗎 嘛 ，唉 。
佢 行到 長廊 ，多隆 迎 上嚟 嘞 ，多隆 笑住 話 ：
韋兄弟 ，太后 召見 你 嘅 夫人 、公子 、小姐 ，賞賜 呀 一定 好多 㗎 喇 ，恭喜 你 啊 。
韋小寶 拱手 話 ：託福 託福 。
多隆微笑話 ：你 呢次 帶兵 出征 之前 ，吩咐 我 同 你 追債 ，追到 而家 ，都 有 七八成 喇 。
二百六十幾 萬 兩 銀 嘅 銀票 ，等陣 我 送到 你 府上 吓 。
大哥 真係 叻 嘞 ，居然 榨到 咁多 喎 。
鄭克塽 呢個 衰仔 害死 我 師父 ，直到 今日 ，仲係 搞到 我 頭 赤 啊 。
佢 阿爺 吖 ，嗰個 神經佬 今日 喺 街上 鬧人 ，又 唔係 鄭克塽 種 落 嘅 禍根 。
唔得 ，大哥 ，唔該 你 多 帶 人手 ，我哋 而家 就 去 追債 。
多隆 聽到 又要 去 鄭府 追債 ，嘿 最 過癮 㗎 啦 。
今日 有 撫遠大將軍 、一等 鹿鼎公 韋公爺 帶隊 ，追起 債 嚟 就 更加 肆無忌憚 嘞 ，就連 聲 答應 。
吩咐 御前 侍衞 副總管 喺 宮內 值班 ，自己 帶住 一百 名 侍衞 ，簇擁住 韋小寶 向 鄭府 而 去 。
眾侍衛 去 鄭克塽 屋企 追債 ，三頭兩日 ，嚟慣 㗎 嘞 ，都 唔使 門公 通報 啊 ，直情 撞入去 。
韋小寶 喺 大廳 上面 坐落 ，多隆 坐 喺 旁邊 。
鄭克塽 聽見 撫遠 大將軍 韋小寶 嚟到 唄 ，不由得 慌到 手揗腳震 ，又 唔敢 唔見 喇 。
只有 換翻 套 禮服 ，戰戰兢兢 噉 出嚟 迎接 ，噉 上前 拱手 見禮 ，叫咗 聲 ：韋大人 。
韋小寶 亦 唔 企起身 ，大喇喇 噉 坐 喺 處 ，擔 高頭 向住 天 ，哼咗 一 聲 ，向 多隆 話 ：
多大哥 ，鄭克塽 呢個 嘢 呢 真係 冇 禮 噃 。
我哋 嚟咗 咁 耐 喇 ，佢 唔啾唔睬 ，噉 唔係 睇唔起 人 ？
多隆話 ：係啊 ，殺人 填命 欠債 還錢 。
做 一世 縮頭烏龜 ，總歸 係 唔 匿得 咁耐 嘅 。
鄭克塽 嬲 到 不得了 。
只係 在 人 屋檐下 哪得 不低頭 吖 ，眼前 而家 兩個人 ，一個 係 手握兵權 嘅 大將軍 ，一個呢 ，係 御前侍衞總管 。
自己 又 無權無勢 又 有 嫌疑 添 ， 雖然 話 爵位 尊榮 啊 ， 其實 處境 呀 仲差過 一個 平常 百姓 啊 。
噉 只有 強忍 怒氣 ，輕輕 咳嗽 一聲 佢 話 ：韋大人 、多總管 ，你 兩位 好 。
韋小寶 慢慢 耷翻 低 個 頭 ，只見 眼前 企住 一 個 駝背 彎腰 嘅 伯爺公 ，頭髮 花白 ，個樣 啊 憔悴 不堪 。
仔細 再 睇 下 ， 呢 個人 嘅 年紀 呢 老 就 唔 係 點老 ， 只 係 愁眉 苦面 ， 眼角 都 係 皺紋 ， 下 爬 留 咗 短鬚 ， 已經 花白 喇 。
再定神一睇 ，嘿 ，唔係 鄭克塽 係 邊個 呢 ？
幾年冇見 ，竟然 老咗 二三十歲 噉 。
韋小寶 開始 好奇怪 啊 ，跟住 就 明白 嘞 。
鄭克塽 呢 幾 年 嚟 呀 受盡 折磨 ，以致 突然間 衰老 ，噉 不禁 可憐 起 佢 嚟 。
但係 諗到 當年 佢 喺 通食島 上 ，殺死 陳近南 嘅 狠毒 ，怒氣 當堂 湧上嚟 ，就 冷笑話 ：你 係 邊個 啊 ？
鄭克 塽 話 ： 在 下 鄭克 塽 ， 韋大人 點解 唔 認得 我 喇 ？
鄭克塽 ？乜 你 唔係 喺 台灣 做 延平王 咩 ？點解 會 嚟到 北京 啊 ？嘿 ，你 係 冒牌 嘅 。
在下 歸順 大清 ，蒙 皇上 恩典 賞咗 爵祿 啊 。
哦 原來如此 。
你 當年 喺 台 灣 大 吹牛皮 ， 話 要 打 到 北京 捉住 皇上 ， 要點 樣 點樣 長 要點 樣 點樣 短 ， 呢 啲 説 話 仲 算 唔 算數 㗎 ？
哇 嚇到 鄭克塽 當堂 冷汗 掂流 ，個心 諗 ：
佢 要 加 我 嘅 罪名 ，立 亂 噉 捏造 啲 説話 ，皇上 總係 聽 佢 嘅 ，決 唔會 聽 我 嘅 。
自從 多隆 率領 御前 侍 衞 同 驍騎 營 軍士 ， 不斷 咁 嚟 到 滋擾 ， 鄭克 塽 真 係 度日如年 啊 。
喺 台灣 帶嚟 嘅 大筆 家產 ，十之八九 ，已經 畀 佢哋 勒索 咗 去 嘞 。
為咗 湊夠 二百幾萬 兩銀 嘅 巨款 ，早就 將 珠寶首飾 變賣 晒 嘞 。
佢 都 唔知 幾千幾百 次 咁 後悔 啊 ，當日 唔應該 投降 。
施瑯 攻嚟 嘅 時候 ，如果 帶兵 奮力 死戰 未必 就 輸 嘅 。
就算唔贏啊 ，喺 戰陣上 拼命而死 ，亦 對得住 祖父 同 父親 嘅 在天之靈 ，不至於 投降之後 ，受 呢啲 無窮無盡 嘅 困苦 羞辱 。
而家 聽咗 韋小寶 呢 幾句 説話 ，更加 係 悔恨 到 死 咁 滯 啊 。
韋小寶 話 ：多大哥 ，呢位 鄭王爺 ，當年 呀 好 威風 㗎 。
兄弟 最近 聽 人哋 講 ，話 有人 要 迎接 鄭王爺 返去 台灣 重登 王位 。
鄭王爺 ，嚟 同 你 接頭 嘅 人 唔知 點樣 講 呢 ？
兄弟 想 查明白 佢 ，返去 向 皇上 回報 啊 。
鄭克塽聲 都 震晒 話 ：誒 韋大人 ，請 你 高抬貴手 ，你講嘅事 ，完 ，完全 係冇㗎 。
咦 ？噉 又 奇嘞 。
多大哥 ，尋日 我哋 唔係 捉到 一個 叛徒 咩 ？
佢 破口大罵 皇上 ，又 痛罵 兄弟 。
呢個人 話 係 鄭王爺 嘅 舊時 部下 ，話 鄭王爺 喺 北京 畀 人 蝦 ，要 為 佢 報仇 ，要 殺盡 滿洲人 啊噉啊 。
鄭克塽 聽到 呢處 點 都 支持 唔住 喇 ，雙膝 一攣 跪咗 喺 地 ，佢 話 :
韋大人 饒命 ，饒命啊 。
小人 過去 罪該 萬死 ，得罪 你 老人家 。
你 大人 大量 ，放 我 一條 生路 啦 ，天公 保佑 你 公侯 萬代 啊 。
韋小寶 冷笑話 ：當日 你 殺 我 師父 嘅 時候 ，冇 諗到 有 今日 啩 ？
突然間 ，喺 後堂 有 個人 快步 行 出嚟 ，呢個 人 身材 溜溜 高高 ，神情 剽悍 ，乃係 一 劍 無血 馮錫范 。
佢 行到 鄭克塽 身邊 ，一手 就 拉起 佢 ，擰轉頭 對 韋小寶 話 ：
當年 殺 陳近南 ，完全 係 我 嘅 主意 ，同 鄭公爺 冇 關 。
你 要 為 你 師父 報仇 ，即管 搵 我 啦 。
韋小寶 對 馮錫范 向來 十分 忌憚 嘅 ，見到 佢 惡屎騰騰 噉樣 ，不由得 全身 喺 張 椅 處 一縮 ，佢 話 ：你 ，你 ，你 想 打人 啊 ？
多隆 跳起身 ，大叫話 ：嚟人啊 ！
即刻 就 有 十多個 侍衞 一齊 湧上嚟 沊沊𡃈噉 圍住 。
韋小寶 見 自己 呢 便 人 多勢眾 ，噉 就 放心 喇 ，佢 大聲 話 ：
呢個人 喺 京師 地方 ，膽敢 行兇 ，捉住 佢 ！
噉啊 四個 侍衞 同時 逳手 ，捉住 馮錫范 嘅 手臂 。
馮錫范 亦 唔 抗拒 噃 ，佢 高聲 話 ：
我 哋 歸降 朝廷 ， 皇上 封 鄭公爺 做 海澄公 ， 封 我 做 忠誠 伯 。
皇上 金口 話 ，過去 嘅 事 一筆勾銷 ，決不 計較 嘅 。
韋大人 ， 你 想 假公濟私 ， 冤枉 好人 啊 ， 我 哋 只有 去 皇上 面前 ， 分辯 明白 啦 。
韋小寶 冷笑話 ：你 係 好人 ，呵呵 ，原來 一劍無血 馮大人 係 大大 嘅 好人 ，倒是 係 今日 第一次 聽見 唧 。
馮錫范話 ：我哋 嚟到 北京 之後 ，安分守己 ，從來 唔見 外人 ，更加 唔敢 觸犯 半條 王法 。
呢啲侍衞大人 ，不斷 噉嚟到 伸手 要錢 ，我哋 傾家蕩產 噉應付 ，呢啲 都 冇乜嘢 嘞 。
韋大人 ，你 要 亂加 我哋 嘅 罪名 ，皇上 明見 萬里 ，至怕 唔由得 你 噃 。
呢個人 有膽 有識 ，呢番説話 侃侃而談 ，韋小寶 一時 都 幾 難 辯駁 。
個心諗 ：佢 兩個人 雖然 係 台灣 投降 過嚟 嘅 人 ，不過 已經 得到 朝廷 封爵 。
蝦佢 固然 唔 難 啊 ，但係 真係 要 推冧 佢哋 ，皇上 只要 問 幾句 即時 就 會 露出 原形 。
皇上 估到 自己 呢 ，係 為 師父 報仇 ，非 怪罪 不可 嘅 。
佢 個 心 呢 已經 軟咗 喇 ，但係 把 嘴 仲係 好 硬 ，佢 話 ：
我哋 尋日 捉到 個 叛逆 ，佢 親口 供認 要 迎接 鄭王爺 返去 台灣 ，吖 ，唔通 噉 係 假 㗎 嘞噃 ？
馮錫范話 ：呢種人 隨口 亂咁 講 ，點算得數㗎 ？
請 韋大人 提 呢個 人 嚟 ，我哋 上 刑部 對質 。
韋小寶 話 ：吖 ，你 要 對質 咩 ？好極嘞 ，妙極喇 爽極喇 。
韋小寶 又問 鄭克 塽 ： 鄭王爺 ， 你 欠 我 個 錢 到底 幾時 還清 啊 ？
馮錫范 聽見 韋小寶 顧 左右 而言 他 ，鑒貌辨色 ，估計 佢 係 怕 畀 皇帝 知道 。
諗住 呢件事 已經 搞到 噉嘅 地步 咯 ，索性 放大膽 ，嘈到 皇帝 面前 。
皇帝 年紀 雖然 係 輕 啊 ，卻係 十分 英明 ，是非 曲直 ，一定 能夠 分辨 嘅 。
如果 唔 乘機 作個了斷 ，今後 受累 無窮 啊 。
實在 係 畀 韋小寶 逼到 讓 無可讓 嘞 ，狗急跳牆 ，搏 就 搏啦 。
佢 揸 定 主意 喇 ， 佢 就 話 ： 韋大人 、 多 總管 ， 我 哋 去 告御狀 。
韋小寶 嚇咗 一跳 啊 ，諗住 如果 告到 皇帝 嗰處 ，自己 係 實死 㗎 ，不過 此時此刻 ，決 唔能夠 示弱 ，就 話 ：
好啊 ，將 鄭克塽 一齊 帶走 。
將 佢 兩個 韞 喺 天牢 先 ，等 佢哋 好好地 享 下 福 ，過得 一年半載 ，我哋 慢慢 噉 再 奏 明皇上 。
多隆 就 躊躇 嘞 ，鄭克塽 係 敕封 嘅 公爵 ，同 佢 追債 攞錢 ，噉 就 唔 緊要 啊 ，真係 要 捉人 ，就 非 奉 到 上諭 不可 嘅 。
噉佢 細細聲 話 ：韋大人 ，我哋 先 去 奏知 皇上 ，再嚟 捉人 啦 。
鄭克塽 聽到 喇 ，連忙 話 ：係啊係啊 ，我 又 冇 犯罪 ，點 能夠 捉 我 呢 ？
見風駛里 ，本來 係 韋小寶 嘅 拿手好戲 ，佢 即刻 就 話 ：係唔係 犯罪 而家 仲 唔 知道 。
你 欠 我 個 錢 未 還清 噃 ，噉 點算 先 ？
你 係 還錢 呢 ，定係 跟我 走 啊 ？
鄭克塽 聽見 可以 唔使 逮捕 ，噉 啊 一疊 連聲 噉 話 ：我 還錢 ，我 還錢 。
連忙 行入 內堂 ，捧咗 一沓 銀票 出嚟 ，兩名 家丁 啊 捧住 托盤 ，裝住 金銀 首飾 。
鄭克塽話 ：韋大人 ，卑職 翻箱倒籠 ，搵來搵去 搵到 三四萬 兩 銀 ，實在 再攞唔出 喇 。
韋小寶 話 ：再攞唔出囉 ？我 唔信 ，兄弟 陪 你 入去 搵下 。
鄭克塽話 ：噉 ，噉 ，噉唔係 點 方便 嘅 。
馮錫范 大聲話 ：我哋 又 冇 犯 王法 ，韋大人 要 抄 我哋 嘅 家 ，係 奉 咗 聖旨 呢 ，定係 有 刑部 大堂 嘅 文書 啊 ？
韋小寶 笑住 話 ：呢個 唔係 抄家 噃 。
鄭 王爺 話 佢 再 攞唔出 銀 嚟 ，我 睇 佢 仲 攞得出 嚟 嘅 。
至怕佢 金銀珠寶 ，仲有 大批 刀槍武器 ，咩 龍椅 龍袍 啊 收埋 喺 地窖 密室 裏 便 ，一時 搵唔到 啫 ，噉 大家 咪 就 幫忙 搵 下 啫 嘛 。
鄭克塽 連忙 話 ：誒 刀槍 武器 、龍椅 龍袍 啊咩 ，我 ，我 點敢 私自 收藏 呢 ？
再講 ， 卑職 只 係 ， 只 係 公爵 ， 王爺 嘅 稱呼 係 萬萬 唔 敢當 啊 。
韋小寶 對 多隆 話 ：多 大哥 ，請 你 點 一 點 ，總共 係 幾多 錢 ？
多隆 同 兩名 侍衞 ，數過 啲 銀票 ，佢 就 話 ：銀票 總係 三萬四千三百 兩 銀 。
仲有 啲 唔值錢 嘅 首飾 ，唔知 點樣 作價 喇 。
韋小寶 用 手 喺 首飾 堆 裏 便 摷 咗 幾 下 ，攞起 一支 金鳳釵 ，吃 咗 一驚 話 ：哎呀 多大哥 ，呢啲 係 違禁 嘅 物件 嚟 噃 。
皇上 係 龍 ， 正 宮娘娘 係 鳳 ， 點解 ， 點解 鄭王爺 嘅 王妃 亦 戴起 金鳳釵 嚟 㗎 ？
馮錫范 更加 嬲 喇 ，佢 大聲 話 ：韋大人 ，你 要 喺 雞蛋 裏 便 搵 骨頭 ，我 馮某人 今日 同 你 搏過 。
普天下 嘅 金銀 首飾 鋪 ，邊 一 間 冇 金鳳釵 啊 ？
北京城 裏 便 官宦 之家 嘅 女眷 ，邊 一個 唔 戴 金鳳釵 呢 ？
韋小寶話 ：哦哦哦哦 ，原來 馮大人 睇 勻晒 北京城 裏 便 官宦之家 嘅 女眷 啊 ？
喂 ，你 話 邊 一家 嘅 太太 小姐 最 靚 吖嗱 ？
哎呀呀呀 ，真係 使得 喇 ，睇咗 咁多 家 嘅 女眷 ，眼福 唔淺 噃 。
康親王 個 王妃 ，兵部 尚書 明珠 大人 嘅 小姐 ，你 都 見過 啦 嘛 ？
馮錫范 激到 説話 都 講唔出 ，不過 個 心裏 便 啊 ，亦 真係 有啲 害怕 。
佢 知道 韋小寶 同 當朝 權貴 個個 都係 好朋友 ，如果 將 呢番 説話 加油添醬 噉 宣揚 出去 ，自己 係 非 撞大板 不可 。
鄭克塽 又 猛咁 打躬作揖 話 ：韋大人 ，一切 請 你 擔帶 啦 ，卑職 向 你 求 個 情 喇 ，求 個 情 喇 。
韋小寶 見 幾句 説話 將 馮錫范 嚇到 唔敢 出聲 ，順風旗 已經 扯 足 嘞 就 哈哈 一 笑話 ：
多大哥 ，兄弟 嘅 面 比起 你 嚟 呢 就 真係 爭得遠 喇 。
多大哥 嚟 追債 ，追到 二百幾萬 兩銀 ，兄弟 親自 出馬 ，不過 得 一啲啲 唧 。
鄭克塽話 ：實在係 卑職 屋企 冇 錢 喇 ，決唔敢 ，誒 ，決唔敢 賴債唔還 嘅 。
韋小寶 話 ：好 ，我哋 走 ！
再過得 十日八日 ，等 鄭王爺 喺 台灣 運到 金銀 嚟 ，再嚟 追債 就係 喇 。
韋小寶 講完 企 起身 行 出 大廳 。
馮錫范 聽到 韋小寶 説話 句句 都 誣陷 鄭克塽 圖謀 不軌 ，仍然 喺度 同 台灣 嘅 舊部 勾結 ，呢個 啊 係 滅族 嘅 大罪 。
如果 唔辯明 ，一世 都 受 佢 脅制 ，就 難以 做人 喇 ，就 大聲 話 ：
我哋 奉公守法 ，半步 都 唔敢 行差踏錯 嘅 。
今日 韋大人 、多總管 喺 呢度 講 嘅 説話 ，我哋 一定 要 一五一十 噉 奏明 皇上 。
否則 ，天地 雖然 係 大 啊 ，不過 我哋 就 冇 立足之地 喇 。
韋小寶 笑住 話 ：要 立足之地 啫嘛 ，有有 。
鄭王爺 、馮將軍 返去 台灣 ，唔係 有 一塊 大大 嘅 立足之地 咩 ？
好喇 ，你哋 兩位 要 商議 立足 嘅 大事 ，我哋 唔 打擾 喇 。
講完 ，拖住 多隆 隻 手 揚長而去 。
話說 韋小寶 返到 屋企 ，噉 馬上 大排 筵席 ，請 眾 侍衛 飲酒 。
多隆 啊 命令 手下 侍 衞 攞 咗 四個 箱 嚟 ， 打開 佢 ， 都 係 金銀珠寶 ， 以及 一沓 沓 嘅 銀票 。
佢 笑住 話 ：追 咗 幾個月 債 ，鄭克塽 呢個 衰仔 嘅 家產 呀 一 大半 都 喺 呢度 嚟 喇 。
韋兄弟 ，你 點 收 啦 。
韋小寶 攞咗 一沓 銀票 ，大約 有 十幾萬 兩 銀 ，佢 話 ：
呢個 狗賊 害死咗 我 師父 ，偏偏 皇上 啊 封咗 佢 爵位 ，呢個 大仇 係 唔 報得到 㗎 嘞 。
多謝 大哥 同 各位 兄弟 ，治到 佢 咁 慘 ，為 兄弟 出咗 呢啖 氣 。
我 師父 啊 冇 家眷 ，兄弟 攞 呢筆 錢 ，叫 人 去 台灣 起 一座 大大 嘅 祠堂 ，供奉 我 師父 。
噉 其餘 嘅 ，就 請 大哥 同 各位 兄弟 分咗 佢 啦 。
多隆 一味 耍 手話 ：唔得 唔得 。
呢啲 係 鄭克塽 欠 你 嘅 錢 ，你 只要 派 幾 名 親兵 ，每 日 上門 追債 亦 唔 怕 佢 唔 還 。
我哋 幫 你 辦 一 件 小小 嘅 事 啫 嘛 ，大家 係 自己人 ，點 能夠 要 你嘅 錢 呢 ？
韋小寶 笑住 話 ：唔怕 同 大哥 講 吖 ，我 嘅 家產 呢 多 到 使唔晒 ，好朋友 有錢 大家 使 吖 嘛 又 分 咩 彼此 唧 ？
噉多隆點講都唔肯收 ，兩個人 爭到 面紅耳赤 。
最後 ，班 侍衛 終於 收咗 一百萬 兩 銀 嘅 追債費 ，另外 三十萬 兩 呢 ，就 交畀 驍騎營 嘅 兄弟們 分派 。
剩落嘅 ，多隆 親自 捧住 ，送入 韋府 內堂 。
班侍衞 連埋 喺 宮內 值班 嘅 ，大家 一分 ，每人 有 幾千 兩 銀 ，噉 人人 都 興高采烈 。
酒醉 飯飽 之餘 ，就 喺 公爵府 花廳 裏 便 就 推 牌九 擲 骰仔 大賭 起嚟 嘞 。
既然 係 至好兄弟 啊 ，韋小寶 擲骰仔 呢 亦 唔 作弊 嘞 。
賭到 二更時分 ，韋小寶 對 多隆 話 ：多大哥 ，兄弟 仲要 勞煩 你 做 一件事 噃 。
多隆 手氣 正係 旺 ，心情 好到 極 ，就 笑住 話 ：
好 ，唔理 咩嘢事 ，只要 你 吩咐 ，啊哈哈哈哈 ，就係 一件事 唔得 。
嗰個 鬧人 嘅 神經佬 ，皇上 吩咐咗 要 我 嚴加 看管 ，聽朝 一早 由 你 監斬 嘅 。
如果 我 徇私 釋放 ，皇上 呀 就 要 斬 我 個 頭 喇 。
韋小寶 想 託 佢 做 嘅 呢 就係 呢件事 ，誰知 佢 講咗 先 ，封死 咗 後門 。
佢 諗 ：皇上 神機妙算 啊 乜嘢 都 估到 晒 ，連 一百萬 兩 銀 都 買唔到 茅大哥 一條 命 。
佢 個 心 嬲 到 極 啊 ，又 想 去 搵 鄭克塽 追 債 。
但 一 想到 鄭克塽 嗰 副 衰頹樣 ，噉 覺得 一味 去 蝦 呢個 可憐 蟲 亦 唔算 得 咩 英雄 吖 ，一 轉念 佢 就 話 喇 ：
嗰個 神經佬 係 皇上 親自 吩咐咗 嘅 ，我 就算 有 水缸 咁大 嘅 膽 都 唔敢 去 放 佢 吖 。
今日 我哋 去 追債 ，嗰個 鄭克塽 呢 由 自可 ，佢 手下 嗰個 馮錫范 ，佢 阿爺 吖 真係 犀利 喇 ，我哋 都 畀 佢 蝦 翻轉頭 啊 。
兄弟 想起 上嚟 啊 呢啖 氣 真係 吞唔落 。
有 幾個 侍衞 喺 側 跟 聽 咗 ，都 隨聲 附和 。
佢哋 話 ：係啊 ，我哋 今日 都 睇見 㗎 ，人人 都 唔知 幾 激氣 啊 。
韋大人 你 唔使 嬲 嘅 ，我哋 而家 就 去 搵 上門 。
佢 一個打 咗 敗仗 投降 過 嚟 嘅 人 ， 竟然 膽敢 喺 北京城 認叻 ， 噉 樣 無法無天 ， 噉 我 哋 仲使 撈 嘅 ？
眾侍衛 越 講 越嬲 ，都 話 即刻 去 拆咗 馮錫范 嘅 伯爵府 噉 。
韋小寶話 ：我哋 去 打 嗰個 龜蛋 呢 就 唔好 擺明 嚟 ，你 話 畀 御史 知道 咗 奏 上 一本 ，噉 御前侍衞 嘅 名聲 亦 唔係 點 好聽 㗎 。
多隆 連忙 話 ：冇錯喇 ，兄弟 你 顧慮 得 好啱 。
韋小寶 話 ：多大哥 呢 你 亦 唔 使 親自 出馬 嘅 ，就 請 張大哥 同 趙大哥 兩位 帶住 人 去 啦 。
又 對 張康年 同 趙齊賢 話 ：你哋 冒充 係 前鋒營 泰都統 嘅 手下 ，話 有 緊急 公事 ，請 馮錫范 個 龜蛋 去 商量 。
噉佢就算有懷疑啊 ，不過 亦唔敢唔嚟嘅 。
行到半路 ，就 同佢 戴上 腳鐐手銬 ，綁住 佢 雙眼 ，個嘴呢 塞住 爛布 ，喺 東城 西城 亂咁 兜 ，最後 呢 先至 兜到嚟 呢處 。
大家 搏命 砌佢 一餐 ，剝光 佢 衣服 ，然後 將 佢 送去 泰都統 妾侍 張 床 處 你哋 話 好唔好 ？
眾侍衛 哄堂 大笑 都 話 妙計 啊 。
御前侍衞 同 前鋒營 嘅 官兵 向來 不和 ，噉 撞到 嘞 經常 打交 。
前鋒營 嘅 統領 ，本來 係 阿赤濟 ，嗰日 畀 韋小寶 用計 韞 咗 入 天牢 ，噉 收尾 呢 雖然 係 放翻出嚟 啊 ，康熙 怪 佢 冇 用 ，辦事 不力 ，已經 革 咗 職 嘞 。
現時 嘅 都統 姓 泰 。
多隆 同 泰 都 統 啊 明 爭 暗鬥 已經 搞咗 好耐 㗎 喇 ，不過 邊個 都 奈何 唔到 邊個 。
多隆 更加 係 心花怒放 啦 佢 話 ：
老泰 呢個 傢伙 怕 老婆 ，娶咗 妾侍 啊 唔 敢 接翻 屋企 。
佢 嘅 八奶 住 喺 甜水井胡同 ，老泰 夜晚 呢 唔 敢 去 過 夜 嘅 。
我哋 將 馮錫范 剝 到 赤條條 ，放 喺 佢 嘅 新 妾侍 張 床 處 ，老泰 呀 ，嘿呀 ，非嬲 到 半死 不可 。
佢 就算 疑心 係 我哋 搞鬼 ，大家 只要 唔洩漏 風聲 ，佢 亦 無可奈何 嘅 。
噉班侍衞 除咗 身上 嘅 侍衞標記 ，嘻嘻哈哈 噉 啊 出門 而去 喇 。
嗱 各位 ，欲知 後事 如何 ，且 聽 下回 分解 。
