前文 再續 啊 書 接 上 一回 。
話說 韋小寶 要 鄭克塽 還錢 ，噉 啊 舉起 匕首 ，要刺 佢 塊 面 。
鄭克 塽 話 ： 哎呀 唔 好 啊 ， 唔 好 啊 ， 誒 ， 你 如果 唔 信 ， 噉 ， 噉 我 請 阿 珂 擔保 我 。
韋小寶 話 ：擔保 都 冇用 啫 ，佢 啊 夠 擔保 過 你 咯 ，收尾 又 唔係 賴賬 。
唉 ，我 有 嘢 抵押 噃 。
好 ，將 你 嘅 狗頭 割落嚟 抵押 啦 。
你 還 翻 一百萬 兩 銀 畀 我 ，我就 將 你 嘅 狗頭 還翻 畀 你 。
我 將 阿珂 ，抵押 畀 你 啦 。
霎時之間 ，韋小寶 只 覺得 天旋地轉 ，手 一鬆 ，匕首 跌落 地 ，嚓 一聲 ，插落 泥處 ，同 鄭克塽 個 頭殼 啊 ，距離 唔到 幾寸 。
嚇到 鄭克塽 大叫 一聲 連忙 縮頭 啊 ，佢 話 ：
誒 ， 誒 ， 誒 ， 我將 阿 珂 押 畀 你 ， 你 總信 我 嘞 啩？
我 送咗 一百萬 兩 銀 嚟 ，你 再 將 阿珂 還翻 畀 我 啦 。
噉 仲 可以 商量 。
阿珂 叫住 話 ：唔得啊唔得㗎 ，我 又 唔係 你 嘅 ，你 點 能夠 押 我 唧 ？
講講下 就 喊嘞 。
鄭克塽話 ：唉 我 而家 大禍臨頭 ，阿珂 你 一啲 都 唔 關心 我 嘅 ，呢個 女子 啊 無情無義 ，我 唔要 喇 。
韋香主 如果 肯 要 佢 ，我 就 一萬兩銀 就 賣斷 咗 畀 你 啦 。
我哋 兩 無 拖欠 ，你 又 唔使 割 我 一萬刀 嘞 。
唓 ，佢 個 心 成日 向住 你 嘅 ，你 賣 斷 咗 畀 我 都 冇 用 㗎 。
佢 個 肚 裏 便 呀 ，早 就 有 咗 你 嘅 細路 喇 ，仲 點 會 向住 我 唧 ？
咩 ， 咩 ， 咩 話 ？ 你 ， 你講 咩 話 ？
嗰日 喺 揚州 麗春院 ，你 同 佢 同床 ，佢 有 咗 你 嘅 細路 。
阿珂 吖噉 大聲 驚叫 ，跳起身 ，揞住 塊面 向住 大海 飛奔 。
雙兒 幾步 追上 佢 ，挽住 佢 隻手 拉 佢 返嚟 。
阿珂 喊住 話 ：
你 ， 你 應承 唔 講 嘅 ， 點解 ， 點解 又講 咗 出 嚟 呢 ？ 你講 說話 就 好似 放 ， 放 。
雖然 佢 又 醜 又 嬲 啊 ，不過 覺得 呢個 屁字 不雅 ，仲係 冇 講 出口 。
鄭克塽 見到 韋小寶 啲 神情 變幻不定 ，怕 佢 又 會 變卦 嘞 連忙 話 ：
韋香主 ，呢個 細路 的的確確 係 你 㗎 。
我同 阿 珂 啊 清清白白 ， 佢 話 要 同 我 拜堂 成親 之後 ， 先至 做 夫妻 嘅 ， 你 ， 你千祈 唔 好 多疑 啊 。
噉 呢個 便宜 老豆 你 點解 又 唔 做 啊 ？
佢 自從 肚裏 便 有咗 你 嘅 細路 之後 ，時時 都 掛住 你 。
同我 講嘢 ，從朝到黑 總係 提到 你 嘅 ，我 聽起上嚟 好 冇味道 ，噉 我 仲要 佢 嚟 做 乜嘢 唧 ？
阿珂 不停 噉 𨂽 腳 ，塊 面 啊 一陣 紅 一陣 白 ，佢 話 ：
你 就 乜嘢 ，乜嘢都 講晒出嚟 。
噉樣講 ，就 等於 承認 鄭克塽 嘅 説話 係 真 㗎 喇 。
韋小寶 好 歡喜 啦 佢 話 ：好 ，你 躝屍 趷路 啦 。
鄭克塽 亦 係 歡喜 到 極 啊 ，連忙 話 ：
多謝 ， 多謝 ！ 祝 你 兩位 百年好合 。
誒 呢 份 賀禮 ， 誒 ， 兄弟 日後 補送 啦 。
講完 慢慢 爬起身 。
韋小寶 呸噉 喺 地下 𦧲咗 㞘 口水 ，鬧 佢 話 ：
我 呢一生一世 呀 ，再唔見 你 呢個 臭賊 啊 ！
佢 諗 ：我 應承過 師父 今日 放生 佢 ，第日 啊 卻 係 不妨 派 人 去 殺咗 佢 同 師父 報仇 㗎 。
只要 派 嘅 人 唔係 天地會 嘅 ，人哋 就 唔怪得 師父 㗎 嘞 。
三名 鄭府 衛士 一直 縮埋 喺 一便 ，見到 韋小寶 放過 主人 嘞 ，先至 過嚟 扶住 鄭克塽 ，又 將 癱 喺 地下 嘅 馮錫范 扶起 。
鄭克塽 望住 大海 佢 好 躊躇 啊 。
施瑯 坐 嘅 戰船 ，已經 去咗 好 遠 嘞 ；
而家 岸邊 ，仲 泊住 兩隻 船 ，自己 坐嚟 嗰隻 船 呢 ，畀 清兵 大炮 打到 桅杆 都 斷咗 ，帆 又 爛咗 已經 唔 用得 㗎 嘞 ；
另外 嗰隻 船 呢 就係 完好 嘅 ，不過 韋小寶 佢哋 仲要 坐 㗎 ，決唔會 讓 畀 自己 㗎 。
佢 低聲 問 馮錫范 話 ：馮師父 ，我哋 冇 船 噃 點算 啊 ？
馮錫范話 ：上咗 小艇 再 講 啦 。
噉佢哋 一行人 慢慢 行 去 海邊 。
突然間 後便 有 個人 大聲 喝佢 話 ：
咪住 ！韋香 主 放生 你哋 ，不過 我 冇 噃 。
鄭克塽 吃咗 一驚 ，只見 一個人 手執 鋼刀 跑過嚟 ，乃係 天地會 好手 風際中 啊 。
鄭克塽話 ：嗯 ，你 ，你係 天地會 嘅 兄弟 ，天地會 一向 受 台灣 延平王府 節制 嘅 ，你你你 。
我 點啊 ？同 我 企 喺 處 。
哦 。
風際中行翻去韋小寶身前 ，佢 話 ：
韋香主 ，呢個 人 害死 總舵主 ，係 我 天地會 幾萬 兄弟 不共戴天 嘅 大仇人 ，點都 唔能夠 放生 佢 。
總舵主 受過 國姓爺 大恩 ，唔肯 殺 佢 嘅 子孫 。
韋香主 又 奉咗 總舵主 嘅 遺命 ，唔能夠 落手 。
不過 屬下 從來 冇 見過 國姓爺 ，總舵主 嘅 遺命 亦 唔係 對 我 講 嘅 。
屬下 今日 要 親手 殺咗 呢個 惡賊 ，為 總舵主 報仇 。
韋小寶 用 右手 手掌 放喺 耳仔 後便 ，打側 個頭 作 聽嘢 狀 ，佢 話 ：
你講 咩 嘢 話 ？ 唉 我 耳 仔 啊 ， 忽然間 聾 咗 啊 ， 咩 嘢 説 話 都 聽 唔 到 。
風大哥 ，你 想 做 乜嘢事 ，即管 做 就得喇 ，唔使 聽 我 號令 㗎喇 。
我 雙耳仔 啊 有病 啊 ，唉 ，實係 畀 施瑯 嗰啲 大炮 震 聾 咗 囉 。
呢番 説話 真係 講到明 喇 ，風際中 要 殺 鄭克塽 ，咪 即管 逳手 啦 ，佢 決 唔會 阻止 嘅 。
噉眼見 風際中 仲 有啲 遲疑 啊 ，韋小寶 又 話 ：
師父 臨死 嘅 時候 ， 只 係 叫 我 唔 好 殺 鄭克 塽 ， 不過 又 冇 吩咐 我 保護 佢 一生一世 啊 。
只要 我 唔 親自 逳手 就 得㗎啦 嘛 。
天下 幾萬萬 人 ，個個 都 可以 殺 佢 又 有 邊個 管得了 啊 ？
風際中 拉 一拉 韋小寶 堂衫 袖 佢 話 ：
韋香主 ，唔該 借 歪 一步 ，我 有 說話 講 。
噉 兩個人 行開 十幾丈 ，風際中 停住 腳步 佢 話 ：
韋香主 ，皇上 一向 好 喜歡 你 嘅 係 唔係 啊 ？
韋小寶 好奇怪 就 話 ：係吖 ，噉 又 點 啊 ？
皇上 要 你 殺 總舵主 ，你唔肯 ，自己 逃跑咗 出嚟 ，可見 你 義氣 深重 。
江湖上 嘅 英雄 好漢 人人 都 十分 佩服 嘅 。
唉 ，不過 師父 終歸 仲 係 死咗 啦 。
總舵主 係 畀 鄭克塽 呢個 嘢 害死 嘅 ，不過 皇上 交畀 韋香主 嘅 差事 ，噉 亦 算係 辦到 嘞 。
韋小寶 更奇 喇 ： 你 ， 你 點解 講 啲 噉 ， 噉 嘅 説 話 ？
皇上 嘅 心 ，對 三個人 最 忌憚 ，呢 三個人 唔死 ，皇上 嘅 龍庭 總係 坐得 唔穩陣 嘅 。
第一個 係 吳三桂 ，噉 就 唔使 講 嘞 。
第二個 就係 總舵主 ，天地會 嘅 兄弟 遍佈 天下 ，反清復明 嘅 志向 從不 鬆懈 ，皇上 啊 十分 頭赤 。
而家 總舵主 死咗咯 ，皇上 ，就 冇咗 件 大心事 嘞 。
韋小寶 聽到 呢處 ，頭腦 裏 便 突然間 靈光 一閃 ：
係 你 ， 係 你 ？ 原來 係 你 ！
韋小寶 喺 天地會 嘅 所作所為 啊 ，康熙 冇 一件 唔 知道 ，連 天地會 裏 便 嘅 暗語 切口 都 能夠 背誦 如流 。
但係 韋小寶 偷盜 四十二章經 ，喺 神龍教 擔任 白龍使 等等 嘅 情形 ，康熙 就 冚𠾴 唥唔 知道 。
韋小寶仔細一諗 ，實係 天地會 裏 便 出咗 奸細 ，而且 呢個人啊 必定 係 自己 十分 親密 嘅 人 添 。
但係 青木堂 呢啲 朋友 個個 赤膽忠心 ，義氣 深重 ，決唔會 去 做 奸細 出賣 朋友 㗎 。
因此佢個心 ，雖然 一直 都有 個 疑問 ，不過 一啲 蛛絲馬跡 都 搵唔到 ，只係 覺得 呢件事 十分 古怪 ，好 難 解釋 而已 唧 。
而家 風際 中 噉樣 一 講 ，韋小寶 突然間 醒悟 嘞 ，佢 諗 ：
我 真係 抵死 喇 ，點解 唔 會 諗到 佢 呢 ？
嗰日 小皇帝 要 我 炮轟 伯爵府 ，天地會 咁 多人 之中 ，就 只有 佢 一個 人 唔 喺 府內 。
呢件事 早就 明白 㗎啦 ，喺 伯爵府 裏 便 嘅 決唔會 係 奸細 ，否則 大炮 打過嚟 嘞 ，有 邊個 走得甩 嘅 呢 ？
皆因 係 佢 事前 已經 知道 喇 ，所以 就 避開 咗 先 。
唉 ，我 真係 大 傻瓜 一個 啊 。
佢 而家 如果 唔 講 ，我 仲 烏瀡瀡 呢 。
風際中 平日 沉默寡言 ，個樣 啊 老實 到 極 ，武功 雖然 好高 啊 ，舉止 同 一個 木頭木腦 嘅 鄉下佬 一樣 嘅 。
韋小寶 偶然 估 下 呢個 奸細 係 邊個 呢 ？噉 只係 想到 口齒 靈活 、市儈 一樣 嘅 錢 老本 ；
舉止 輕捷 、精明 乖巧 嘅 徐天川 ；
辦事 周到 、能幹 練達 嘅 高彥超 ；
脾氣暴躁 、好酒 貪杯 嘅 玄貞道人 ；
連 對 見多識廣 、豪爽 慷慨 嘅 樊綱 ，以及 近年 嚟 衰老 體弱 嘅 李力世 ，講説話 尖酸刻薄 嘅 祁彪清 ，佢 都 猜疑過 嘞 ；
就係 對 呢個 一啲 都 唔似 奸細 嘅 風際中 ，從來 未曾 有過 啲 多疑心 。
突然間 又 諗 ：嗰個 時候 雙兒 亦 唔 喺 伯爵府 噃 ，唔通 佢 ，佢 都 係 奸細 ，亦 對 我 唔住 咩 ？
吖 ，唔係唔係 ，雙兒 係 風際中 特登 帶 出去 嘅 。
佢 知道 呢個 丫鬟 係 我 條命根 ，如果 打死埋 佢 ，以後 事情 拆穿 咗 ，我 實會 嬲 佢 一世 嘅 。
佢 不過 係 皇上 派 嚟 嘅 一個 奸細 ，暗中 通報 啲 消息 而已 啫 ，天地會 一滅 ，皇上 就 用 佢 唔着 㗎 嘞 。
我 如果 喺 皇上 面前 同 佢 為難 ，佢 係 頂唔住 ，所以 又 唔敢 真係 得罪 我 。
呢啲 推想 講起 上嚟 就 好 長 啊 ，但係 喺 當時 韋小寶 個 心裏 便 ，只係 靈機一閃 之間 ，就 明白晒 㗎 喇 。
佢 話 ：風大哥 ，多謝 你 將 雙兒 喺 伯爵府 帶 出嚟 ，免致 畀 大炮 打死 佢 啊 。
風際中吖噉一聲 ，當堂 面色 都 變晒 ，退後 兩步 ，手撳刀柄 佢 話 ：你 ，你 。
你我 心照不宣 ，皇上 早就 乜嘢 都 同我 講咗 咯 。
噉 你 為咩 唔 遵從 聖旨 呢 ？
風際中 呢句 説話 一問 ，噉 即係 一切 都 認晒 嘞 。
風 大哥 ， 噉 你 又 何必 明知故問 呢 ？ 呢 啲 叫做 忠義 不能 雙全 吖 嘛 。
皇上 待 我 真 係 冇 得講 㗎 喇 ， 確實 係 皇恩浩蕩 ， 不過 師父 待 我 亦 唔 錯 吖 。
而家 師父 已經 死咗 咯 ，我 仲有 咩 顧慮 嘅 呢 ？
就係唔知道 皇上 肯唔肯 赦 我 個 死罪 唧 。
唔緊要嘅 ，而家 就 有 一個 將功贖罪 嘅 好 機會 。
先頭 我 講 ，皇上 決心 要 剷除 三個 眼中釘 ，除咗 吳三桂 、陳近南 之外 ，第三 個 就係 盤踞 台灣 嘅 鄭經 嘞 。
我哋 捉咗 鄭經 嘅 仔 解 去 北京 ，講唔埋 ，可以 迫使 鄭經 歸降 。
皇上 一 歡喜 嘞 ，韋都統 ，你 就 有 天大 嘅 死罪 啊 ，皇上 都 赦免 你 啦 嘛 。
風際中 而家 唔使 對 韋小寶 隱瞞 嘞 ，所以 連 稱呼 都 改埋 ，唔 叫 佢 做 韋香主 ，又 叫 佢 做 韋都統 ，對 總舵主 ，亦 講 佢 個 名 嘞 。
韋小寶 個 心 啊 嬲 到 不得了 ：你 呢個 奸賊 ，居然 叫 我 師父 個 名 。
但係 諗住 能夠 同 康熙 言 歸於好 ，佢 真係 開心 ，做唔做官 都 唔緊要 啊 ，能夠 時時 同 小皇帝 談談笑笑 ，確實 有 無窮 樂趣 嘅 。
風際中 又 話 ：韋都統 ，我哋 返到 北京 ，仍然 唔好 揭穿 呢件事 。
天地會 嗰啲 人 知道 陳近南 死咗 ，多數 會 推舉 你 做 總舵主 嘅 。
你 義氣 深重 ，甘心 拋棄 榮華富貴 ，伯爵 唔 做 ，都統 唔 做 ，就係 為咗 要 救 天地會 班 朋友 條 命 。
而家 呢啲 事 啊 ，早就 傳遍 天下 喇 。
近來 ，江湖上 㷫㷫冚冚 ，講 嘅 都係 呢件事 ，邊個 唔 佩服 韋都統 嘅 英雄豪氣 啊 ？
韋小寶 好得戚啊 ，佢 問 ：大家 真係 噉 講 咩 ？你 唔係 呃 我 係 嘛 ？
唔 係 唔 係 ， 卑職 決 唔 敢 呃 都統 大人 嘅 。
你立 咗 呢場 大功 ， 皇上 一定 升 你 嘅 官 㗎 ， 而家 做 緊 咩 官 啊 ？
皇上 恩典 ，賞咗 卑職 做 都司 啊 。
韋小寶 諗 ：嘿 ，原來 係 個 芝麻綠豆 嘅 小武官 ，同 老子 啊 ，直情 爭 咗 十七八級 。
清朝 嘅 官制 ，伯爵 係 超品 大官 ，驍騎營 都統 係 從 一品 。
漢人 綠營 武官 最高 嘅 提督 ，係 從一品 ，總兵 係 正二品 ，以下 係 副將 、參將 、游擊 ，然後 先至 輪到 都司 。
但係 睇下 風際中 個 樣 ，雖然 ，塊面 仲係 一副 老實到極 嘅 神氣 ，眼光 之中 ，已經 忍唔住 露出 得意 嘅 表情 嘞 ，就 拱手 笑住 話 ：
恭喜恭喜 。
呢啲 係 皇上 親手 提拔 嘅 ，同 人哋 唔同 。
風際中 請咗 個 安 ，佢 話 ：以後 仲 靠 大人 多多 栽培 啊 。
韋小寶 笑住 話 ：我哋 係 自己人 ，有 乜 所謂 唧 ？
不過 同 皇上 辦事 呢 ，你 本事 就 大過 我 喇 。
卑職 邊度 及 得 大人 嘅 萬分之一 呢 ？
回 大人 ， 皇上 吩咐 卑職 ， 如果 見到 大人 ， 無論如何 要 大人 返去 北京 ， 唔 好 違抗命令 。
卑職 聽 皇上 嘅 口氣 ，對 大人 呀 實在 係 極之 看重 ，可以 講得 係 十分 想念 添 。
呢次 立咗 大功 ，將 台灣 鄭逆 嘅 仔 捉咗 去 北京 ，皇上 一 歡喜 啊 ，實係 又 會 升 大人 嘅 官 咯 。
嗯 ，噉 你 又 應該 升 游擊 咯 。
卑職 但求 為 皇上 出力 ，皇上 見到 大人 個 心 歡喜 喇 ，我哋 做 奴才 嘅 ，都 會 好 歡喜 㗎 喇 ，升唔升官 係 皇上 嘅 恩典 啫 。
韋小寶 諗 ：我 一直 當 你 係 個 老實人 ，原來 咁 會 打官腔 嘅 。
風際中 又 話 ：大人 做咗 天地會 總舵主 之後 ，可以 將 十八省 各堂 香主 、各處 重要 頭目 通通 叫晒嚟 ，話係 為 陳近南 開喪 。
到其時 ，就 一網打盡 ，等 呢啲 圖謀不軌 、大逆不道 嘅 反賊 ，一個二個 都 走唔甩 。
呢場 大功勞 ，就 比 當日 炮轟 伯爵府 啊 大過 十倍 都 唔止 啊 。
大人 你 諗下 ，當日 你 如果 遵旨 殺咗 陳近南 、李力世 呢班 人 ，噉 天地會 嘅 反賊 各省 都有 ，殺咗 個 總舵主 ，又 會 立 一個 總舵主 ，總係 殺唔清 嘅 。
只有 大人 自己 做咗 總舵主 咯 ，噉 先至 能夠 斬草除根 ，永遠 清除 皇上 嘅 心腹 大患 啊 。
風際中 呢番 説話 ，聽到 韋小寶 啊 周身 飈 冷汗 ，佢 諗 ：
呢條 毒計 果然 係 厲害 到 極 ，估計 風際中 你 自己 亦 未必 諗得出 ，九成 係 小皇帝 嘅 計策 嚟 嘅 。
我 返去 北京 ，小皇帝 多數 會 赦免 我 個 大罪 ，不過 就係 實要 我 去 撲滅 天地會 。
呢一次 ，佢 一定 有 對付 我 嘅 妙法 㗎 ，點 都 走唔甩 佢 手掌心 㗎 嘞 。
小皇帝 要 我 投降 ，要 打 我 囉柚 ，噉 都 唔 緊要 ，但係 逼 我 去 做 天地會 總舵主 ，將 所有 嘅 兄弟 冚𠾴 唥 殺晒 ，呢件事 就 點 都 唔 做得 嘅 。
呢件事 一做 ，普天下 嘅 好漢 個個 都 會 鬧 我 個 十八代祖宗 ，死咗 之後 亦 冇 面 見 師父 吖 。
韋小寶 嘅 良心 雖然 唔多啫 ，但 總係 有翻啲啲 㗎 。
韋小寶 睇咗 風際中 一眼 ，個口 就 哦哦哦噉 應住佢 ，個心 就 諗 ：
我 如果 唔 應承 ，佢 即刻 就 同 我 反面 。
打起上嚟 ，我哋 呢度 咁 多人 打佢 一個 未必 就 會 輸畀佢 。
不過 呢個 嘢 武功 極高 ，我 呢啲 大姑娘 小姑娘 ，如果 畀 佢 殺咗 一兩個 噉 就 不得了 。
嗯 ，我哋 不妨 再 嚟 玩下 含沙射影 啦 。
就話 ：去 見 皇上 ，我 高興 係 好高興 啊 ，只不過 ，唉 只不過 要 殺咗 天地會 咁多 兄弟 ，未免 太過 唔講義氣 唔夠 朋友 嘞 ，真係 要 好好地 商量 下 至 得 。
大人 講得 啱 。
不過 開講 有話 ：量 小 非 君子 ，無毒 不 丈夫 噃 。
冇錯 ，冇錯 ，無毒不丈夫 。
哎呀 ，點解 鄭克塽 嗰個 衰仔 逃走咗 啊 。
風際中 吃咗 一驚 ，擰轉頭 去 睇 。
韋小寶 用 胸口 對準 佢 ，正 話 想 伸手 去 撳 毒針 嘅 機關 ，啱啱 呢個 時候 ，雙兒 衝上嚟 話 ：相公 ，咩嘢 事 啊 ？
原來 雙兒 見 佢 兩個人 猛咁 講 ，一直 都 注意住 嘅 ，早就 慢慢 行過去 。
忽然間 聽見 韋小寶 哎吖 一 聲 ，即刻 就 衝過去 啦 。
韋小寶 呢陣時 啊 如果 將 含沙射影 射出去 ，風際中 啊 固然 打中 啊 ，不過 必定 波及 雙兒 㗎 ，所以 佢 嘅 手指 雖然 已經 碰到 機關 ，就係 唔敢 撳落去 。
風際中 一擰轉頭 ，見到 鄭克塽 同 馮錫范 仲企 喺 岸邊 ，毫無 動靜 。
嗯 ，即刻 知道 唔妥喇 ，個 身 一矮 ，反手 揦住 雙兒 ，將 佢 擋住 喺 自己 前便 。
以 雙兒 嘅 武功 啊 ，風際中 未必 一下 就 揦住 佢 嘅 ，只係 突然間 出手 ，雙兒 一啲 都 冇 提防 ，於是 就 畀 佢 揦住 手腕 嘅 脈門 ，上身 麻痹 ，完全 唔 逳得 。
風際中話 ：韋大哥 ，唔該 你 舉起 手 。
偷襲嘅良機 既然 冇咗 ，雙兒 又 畀 佢 制住 ，韋小寶 當堂 落於 下風 ，就 笑嘻嘻噉 話 ：
嘿嘿風大哥 ，你 開 咩 玩笑 啊 ？
風際中話 ：韋大人 呢門 無影無蹤 嘅 暗器 太過 犀利 ，卑職 好怕 ，唔該 你 舉起 雙手 ，否則 ，卑職 只有 得罪 嘞 。
講完 ，推 雙兒 向前 ，自己 就 匿埋 喺 佢 後便 ，使到 韋小寶 唔敢 使 暗器 。
蘇荃 、方怡 、阿珂 、曾柔 等 見 呢便 突然間 發生 變故 ，咪 即刻 走過嚟 啦 。
風際中諗 ：呢個 衰仔 鐘意 呢個 丫鬟 唔敢 逳手 ，嗰啲 女人 就 唔會 愛惜 佢 條命 嘅 。
佢哋 只係 愛惜 嗰個 衰仔 條命 嘅 啫 。
風際中 左手 喺 腰間 拔出 鋼刀 ，用 刀尖 指住 韋小寶 嘅 喉嚨 ，佢 大聲 話 ：大家 唔准 過嚟 ！
蘇荃 佢哋 見 韋小寶 咁 危險 ，唯有 企定 唔逳 啦 ，人人 都係 又 焦急 又 奇怪 。
呢個 風際中 明明 係 韋小寶 嘅 朋友 ，先頭 仲 並肩 抗敵 嘅 ，點解 一轉眼 ，一言不合 就 打起上嚟 呢 ？
諗住 實係 韋小寶 啊 要 放 鄭克塽 ，而 風際中 就 要 殺咗 佢 為 陳近南 報仇 嘞 。
因為 刀尖 頂住 喉嚨 ，韋小寶 個 頭 微微 向 後 昂 。
風際中刀尖 跟住 向前 一推 佢 話 ：韋大人 ，唔該 你 唔好 逳 。
把 刀 冇 眼 㗎 ，得罪 就 唔好意思 嘞 ，仲係 請 你 舉起 手 啦 。
韋小寶 無可奈何 ，噉啊 雙手 慢慢 舉起 ，佢 笑住 話 ：
風大哥 ，你 想 升 大官 發 大財 啫 嘛 ，仲係 對 我 客氣 一啲 好 。
風際中 話 ： 升官發財 固然 係 緊要 啊 ， 但 係 首先 仲 係 要 保住 條命 啊 。
突然 個身 一側 ，閃到 去 韋小寶 身後 ，一手 喺 佢 靴筒 裏 便 拔出 匕首 ，指住 佢 後心 ，佢 話 ：
韋大人 ，你 呢 把 匕首 好 鋒利 ，卑職 見過 你 使過 幾次 㗎 嘞 。
各位 ，欲知 後事 如何 ，且 聽 下回 分解 。
