前文 再續 啊 書 接 上 一回 啊 。
話説 多隆 對 韋小寶 話 ：
韋兄弟 ，皇上 吩咐 你 唔好 四圍 行 ，噉 你 係 想 去 你 以前 住 嗰間 屋 唞下 呢 ，定係 去 侍衞 班房 ，大家 陪 你 玩 翻 幾手 啊 ？
佢 知道 同 韋小寶 擲骰仔 、推牌九 ，最 投其所好 㗎 喇 。
韋小寶 ，突然間 想起 件嘢 佢 就 話 ：
太后 吩咐 我 有 一件 緊要 嘅 事情 ，需要 立即 辦妥 嘅 ，唔該 多大哥 一齊 去 啦 。
多隆 為難 嘞 佢 話 ：
太后 交 落嚟 嘅 事情 ，當然 即刻 要 做 啦 。
不過 ，誒 不過 皇上 嘅 命令 ，要 韋 兄弟 千祈 唔好 離開 皇宮 。
呢啲事 喺 宮內 辦 嘅 啫 ，多大哥 不必 擔心 。
哦 ，噉 就 得啦 ，只要 唔 出 宮門 ，噉 就 百無禁忌 啊 。
韋小寶 吩咐 侍衞 ，將 慎太妃 頂轎 ，即刻 抬去 神武門 西便 嘅 火燒場 ，佢 話 ：
有邊個 打開 轎簾 ，太后 吩咐 即刻 殺咗佢 。
刺客 襲擊 太妃 頂轎 嘅 事 啊 ，多隆 同埋 眾 侍衛 都 已經 知道 嘞 。
雖然 唔知道 真相 ，不過 都 知道 係 太后 嘅 一件 極其 秘密 嘅 私事 ，一直 都 惴惴不安 。
聽 韋小寶 講話 要 抬 去 火燒 場 焚化 喎 ， 噉 即 係 去 咗 一個 天大 嘅 禍胎 啫 ， 噉 個個 心 呢 都 放低 一 嚿 大石 。
於是 多隆 跟住 韋小寶 ，押咗 太妃 頂轎 去 火燒場 。
一路上呀 ，轎裏 便 仲 滴出血嚟 。
噉至於 轎裏 便 死嘅 人 係 邊個 呢 ，當然 冇 人 敢 問 嘞 。
去到 火燒場 ，蘇拉 雜役 啊 冧起 柴枝 ，圍住 頂轎 四圍 就 燒起 上嚟 嘞 。
韋小寶 啊 執咗 一條 木條 ，攞 啲 炭 畫咗 隻 雀仔 ，噉 啊 雙手 拱住 木條 ，對住 頂轎 吟吟沉沉 噉 禱告 話 ：
瘦頭陀 、老舉乸 ，你哋 喺 世上 做唔成 夫妻 呢 ，就 去 陰間 做 千年萬年 嘅 夫妻 啦 。
殺死 你哋 嘅 歸家 三位 ，而家 佢哋 亦 死咗 嘞 ，你哋 前腳 走 ，佢哋 後腳 就 到 。
你哋 喺 奈何橋 上 ，望鄉台 邊 啊 碰到 ，大家 做個 好朋友 啦 。
多隆佢哋 見到 佢 嘴唇 嗡嗡下 ，估計 係 禱告 死者 陰魂 早得 超生 嘞 。
又見佢 搬起 幾 嚿 石 ，堆成 一個 堆仔 ，將 木條 插入 去 ，就 好似 一 炷 香 噉 。
嘿 ，點估得到 佢 係 同 陶紅英 通傳 消息 嘅 記號 呢 ？
好嘞 ，眼見 頂轎 同 屍體 都 燒成 焦炭 嘞 ，韋小寶 就 返去 自己 以前 嘅 住地 。
噉 奉承 佢 嘅 太監 ，早就 嚟 打掃 乾淨 ，仲 送 上 酒菜 點心 添 。
韋小寶 畀咗 打賞 ，同 多隆 以及 侍衞 食咗 一啲 ，佢 話 ：
多大哥 ，你哋 各位 請 隨便 坐吓 ，兄弟 尋晚 成晚 同 皇上 辦事 實在 好攰 啊 。
多隆話 ：兄弟 唔使 客氣 喇 ，快啲 去 瞓 啦 ，阿哥 同 你 保駕 。
真係 一千個 一萬個 唔敢當 。
多大哥 ，你 想 皇上 賞賜 你 啲 咩嘢 吖 ？
你 同 我講 ， 兄弟 記 喺 心 處 ， 見到 皇上 高興 嘅 時候 呢 ， 幫 你 求下 ， 唔 敢 話 實得 ， 八成 都 得 嘅 。
多隆 好 歡喜 啊 佢 話 ：韋兄弟 肯 幫 我 求 皇上 ，噉 仲 有 話 唔得 嘅 咩 ？
多大哥 個 事 ，就係 兄弟 自己 嘅 事啫 嘛 邊度 會 話 唔 出力 㗎 ？
嗱 ，阿哥 喺 北京 當差 啊 ，都 有 啲 膩 喇 ，就係 想 去 外省 調劑 下 唧 。
冇錯喇 ，大哥 講得 真係 啱啊 。
喺 北京城 裏 便 ，高過 我哋 嘅 王公大官 都 唔知 幾多 ，實在 顯唔出 威風 。
呢 ，只要 一出 北京 呀 ，噉 就 自由自在 好多 咯 。
你話 要 幾 兩 銀 使下 ，只要 輕輕 咳 一 聲 ，人哋 呀 ，即刻 就 乖乖噉 雙手 捧住 嚟 畀 你 㗎 嘞噃 ，係咪 ？哈哈哈哈哈哈哈哈 。
兩個人 係 相對 大笑 咯 。
韋小寶 返到 房間 ，打斜 挨 喺 鋪床 處 個 心 諗 ：
多大哥 得咗 皇上 旨意 看到 我 實一實 ，我 要 離開 皇宮 出去 同 師父 報信 噉 就 實唔得 㗎 嘞 。
等陣 陶阿姨 嚟到 ，就 可以 請 佢 去 傳信 ，就係 怕 佢 嚟得 遲過 頭唧 。
如果 佢 三更半夜 先至 到 ，嗰便 大炮 已經 揈 出去 咯 ，噉 點算好 呢 ？
諗諗諗 ，諗咗 一陣 ，哎 佢 有計 嘞 ：一於 派 啲 侍衞 去 打草驚蛇 。
噉佢 合埋 眼 瞓咗 一個 幾時辰 ，醒翻 嘅 時候 呢 見到 日影 稍為 偏西 ，已經 過咗 未時 嘞 ，即係 午後 一點 到 三點 。
佢 行出 房 問 多隆 話 ：
多大哥 ，你 知唔知道 嗰批 要 殺 我 嘅 反賊 係 咩 人 啊 ？
多隆話 ：噉就唔知噃 。
一批 係 天地會 嘅 ，一批 係 沐王府 嘅 。
嘩 ，呢 兩批 反賊 都 好 厲害 㗎 噃 ，唔怪得 皇上 咁 擔心 啦 。
我 諗住 喺 皇宮 裏 便 匿 得 一日 ，匿唔到 一世 。
今日 ，雖然 有 多大哥 保護啫 ，但係 反賊 唔 剷除 總係 後患 無窮 嘅 。
皇上 聽日 召見 ，必定 有 好法子 㗎喇 ，韋兄弟 你 亦 不必 擔心 咁多 。
係 。
不過 唔怕 同 大哥 講 吖 ，兄弟 屋企 呢 ，有 幾個 女仔 ，真係 如花似玉 靚到 糝聲 嘅 ，兄弟 好 鐘意 佢哋 。
睇 嚟 今晚 反賊 會 去 我 屋企 行刺 ， 噉 佢 哋 殺 唔 到 兄弟 ， 多數 會將 呢 幾個 女仔 殺 咗 嘅 噉 ， 噉 咪 好 可惜 嚱？
多隆 笑住 岌一岌頭 ，想起 嗰日 韋小寶 要 自己 裝模作樣 同 鄭克塽 為難 ，噉 就係 為咗 個 靚女 。
呢個 小兄弟 風流 好色 ，年紀 啊 雖然 係 細小 ，不過 屋企 呢 ，實 搵咗 唔少 美貌 姬妾 㗎 嘞 ，就 話 ：
呢層 就 容易 啦 ，我 派 人 去 兄弟 府上 保護 就係 喇 。
韋小寶 歡喜 到 乜嘢 噉 ，拱手 多謝 佢 話 ：
兄弟 屋企 裏 便 嘅 女 仔 呢 ， 我 最 寵愛 嘅 有 三個 人 ， 一個 叫做 雙兒 ， 一個 叫做 曾柔 ， 仲有 一個 叫做 ， 誒 叫做 劍屏 。
佢 個 心 諗 ：如果 講咗 係 沐劍屏 呢 個 沐 字 出嚟 呢 ，就 怕 會 引起 疑心 。
噉佢哋 相貌 呢 都 好唔錯 嘅 ，兄弟 實在 放心 唔落 。
噉唔該大哥而家就派人去保護 ，講畀佢哋聽 ，今晚呀 ，有天地會同沐家刺客要嚟 ，要佢哋快啲匿埋 。
最好 大哥 呢 派 多啲 人 去 ，喺 兄弟 屋企 守住 ，刺客 嚟到 咯 ，就 冚𠾴 唥 將 佢哋 捉起嚟 。
邊 一位 兄弟 出咗 力 嘅 ，一定 重重 酬謝 。
多隆 拍下 心口 笑住 話 ：呢件事 容易 做 啦 係 韋伯爵 府上 嘅 事 ，邊個 唔 搏命 向前 㗎 ？
噉啊即係 吩咐 侍衛 領班 ，命令 佢 出去 派 人 。
班 侍衛 都 知道 韋小寶 出手 豪闊 ， 平時 冇 事 呢 往往 一千八百 咁 打 賞 嘅 ， 呢 一次 係 去 保護 佢 嘅 寵姬 愛妾 ， 噉 梗 係 厚厚 嘅 賞賜 咯 ， 於是 個個 都 欣然 奉命 啊 。
輪唔到嘅呢 ，就 不免 唉聲歎氣 ，喺度 怨 自己 唔好運 係啦 。
韋小寶 個 心 噉 就 稍為 安慰 嘞 ，佢 諗 ：
雙兒 佢哋 聽咗 班 侍衞 講 ，話 係 宮 裏 便 派 人 嚟 保護 ，等候 捉拿 天地會 同 沐王府 個 刺客 ，實 會 通知 我 師父 佢哋 躲避 嘅 。
但係 如果 我 師父 佢哋 避開咗 ，而 雙兒 、曾姑娘 、小郡主 三個 就 畀 大炮 揈死 噉咪 弊傢伙 ？
啊唔怕 ，有 大隊 御前侍衞 喺 我 屋企 裏 便 ，外便 嘅 炮手 一定 唔會 亂咁 揈 嘅 。
哎呀 ，唔得唔得 ，如果 炮手 奉咗 皇帝 嘅 聖旨 ，唔理 三七廿一 到時 非 開炮 不可 ，噉 又 點 呢 ？
小郡主 同 曾柔 啊 都 仲 話 唧 ，雙兒 對 自己 情深義重 ，佢 係 自己 心裏 便 最 緊要 嘅 人 嘞 ，決唔能夠 由得 佢 死 嘅 。
不過 事 在 兩難 ，如果 侍衛 將 雙兒 佢哋 先 接咗 出嚟 ，就 冇人 留低 同 師父 與及 眾 兄弟 報信 。
只係 救 雙兒 唔 救 師父 ，噉 啊 重色輕友 ，噉 又 係 烏龜 王八蛋 嘞 噃 。
唉 一時 撓頭撓髻 ，諗極 都 諗唔到 條 好計 。
過咗 大半個 時辰 ，帶隊 去 忠勇伯府 嘅 侍衞 領班 返嚟 稟報 話 ，佢哋 仲 未曾 行近 伯爵府 ，就 畀 前鋒營 嘅 官兵 擋住 嘞 。
帶隊嘅前鋒 參領話 ，佢哋 奉旨 保護 伯爵府 ，唔使 各位 侍衞大人 費心 喇 。
噉啊眾侍衛 要 入府 保護 內眷 ，前鋒營 係 點 講 都 唔 畀 過去 ，話 皇上 一切 已經 有 安排 嘞 。
噉 收尾 ，連 前鋒營 嘅 阿統領 亦 親自 過嚟 攔阻 ，噉 班 侍衛 拗 佢 唔 過 ，只有 返嚟 啦 噉 。
韋小寶 一 聽 個 心 猛 咁 喺度 叫苦 。
多隆 笑住 話 ：嘿 兄弟 ，皇上 待 你 真係 周到 喇 ，竟然 派咗 前鋒營 去 保護 你 嗰班 靚女 ，噉 你 仲 使 乜 擔心 喎 ？哈哈哈哈哈 。
韋小寶啊 只有 跟住 乾笑 幾聲 ，佢 諗 ：小皇帝 乜乜乜乜 之中 乜乜 千里之外 ，呢一次 呀 ，唉 ，我 師父 佢哋 真係 大禍臨頭 嘞 。
前鋒營 一定 係 奉咗 嚴厲 嘅 聖旨 ，喺 我 伯爵府 四圍 把守 ，見到 平常 百姓 就 放 佢 入 府 ，夜晚 呢 ，就 一齊 揈死 佢哋 。
如果 係 文武 官員 就 攔住 唔准 入去 定 啦 。
噉佢又諗 ：我 突然 發出 含沙射影 暗器 ，要 殺死 多大哥 就 唔 難 啊 ，不過 呢度 咁多 侍衞 ，又 點 能夠 一個二個 冚𠾴 唥 殺清光 呢 ？
唉 ，可惜 我 身邊 嘅 蒙汗藥 ，喺 莊家 一下 都 用完 晒 嘞 。
眼見 日頭 越嚟越低 ，就好似 熱鑊 上 嘅 螞蟻 一樣 全身 發滾 ，屙完 一㞘 尿 又 試 一㞘 ，不過 呢 就 想唔出 一啲 主意 。
過咗 個 幾時辰 ，天色 漸漸 黑嘞 。
韋小寶 推開 個 窗 望下 出便 ，只見 七八名 侍衞 喺 窗外 踱嚟踱去 ，守衞 嚴密 到 極 。
佢 東張西望 ，陶紅英 啊 連 影 都 冇 ，唉 ，佢 長歎 一 聲 ，喪晒 噉 瞓 喺 鋪床 處 。
諗而家 都 怕 有 唔少 朋友 入咗 伯爵府 嘞 ，過多一陣 ，眾 兄弟 就 向 陰間 條 路 行 近 咗 一步 嘞噃 。
一擸眼 ，見到 間房 嘅 角落頭 嗰個 大水缸 ，係 海大富 留低 嘅 。
當日 自己 全靠 呢 個 水缸 先至 殺 咗 瑞棟 ， 佢 諗 ：
我 不如 將 多大哥 呃 入嚟 房 ，發暗器 殺咗 佢 ，再 喺 房裏 便 放起火 ，喺 混亂 之中 就 可以 逃走 啦 。
多大哥 對 我 非常之 好 嘅 ，無𪐀𪐀 殺咗 佢 實在 對 佢 唔住 。
不過 義氣 有 大 有 細 ，我 師父 佢哋 幾十 條 命 ，總 比 佢 一 條 命 緊要 啲 吖 。
諗咗 一陣 ，揸定 主意 嘞 ，攞 火刀 火石 打着 火 ，點着 支 蠟燭 ，佢 諗 ：
蚊帳 啊 着火 最快 嘅 ，一 殺咗 多 大哥 就 燒 蚊帳 。
正喺呢個時候 ，聽見 多隆 喺 外 便間房 叫 佢 話 ：
韋兄弟 ， 酒飯 送 嚟 嘞 噃， 出 嚟 飲酒 啦 。
韋小寶 話 ：喂 ，我哋 兩個 喺 房 裏 便 食 啦 。
好啊 。
噉多隆 就 吩咐 送酒飯 嘅 太監 ，攞 飯盒 入去 咯 喎 。
嗰個 太監 係 個 十六七歲 嘅 少年 ，入 房 之後 向 韋小寶 請 咗 安 ，噉 啊 打開 飯盒 攞出 酒飯 。
韋小寶 頭腦 裏 便 靈光 一閃 ，諗到 個計 佢 話 ：
你 喺 呢處 侍候 我哋 飲酒 啦 。
嗰個 小太監 十分 歡喜 。
佢 知道 韋伯爵 以前 係 御膳房 嘅 頭頭 ，對 下人 啊 十分 寬厚 。
侍候 佢 飲酒 必定 有 好處 嘅 ，就 歡歡喜喜 噉 開 枱 嘞 噃 。
多隆 跟住 行 入嚟 ，笑住 話 ：兄弟 ，你 早就 唔 喺 宮 裏 便當 差 嘞 ，不過 皇上 呢 就 冇 撤 咗 你 呢 間 屋 。
就算係親王貝勒 ，皇上 亦唔會 咁優待㗎 。
韋小寶 話 ： 噉 倒 唔 係 皇上 優待 ， 皇上 管 幾多 天下大事 吖 ， 邊度 咁 得閒 理埋 呢 啲 噉 嘅 小事 唧 ？
老實 講 吖 ，兄弟 再 喺 呢處 住 呢 就 好 唔 啱 規矩 嘅 。
人哋 唔啱 規矩 啫 ，兄弟 你 就 唔緊要 嘅 。
多隆 知道 宮裏 便 嘅 總管 太監 要 巴結 韋小寶 ，唔會 另行 派 人 嚟 住 呢 間 屋 嘅 。
宮裏頭 嘅 房屋 大把 ，海大富 呢間 住屋 呢 ，又 唔係 咩嘢 好地方 ，接管 御膳房 嘅 太監 自不然 另外 有 地方 住 。
韋小寶 笑住 話 ：大哥 唔提起 呢 ，兄弟 真係 唔記得咗 添 ，聽日 應該 通知 總管 太監 ，將 呢間 屋 啊 繳翻 。
我哋 做 外臣 嘅 再 住 喺 宮 裏 便 ，你 話 畀 外便 御史 大人 知道 呀 ，哈 ，參 你 一本 噉 就 冇 癮 喇 。
多隆話 ：皇上 喜歡 你 啊 ，邊個 管得着 唧 ？
請坐啦大哥 。
呢間屋 呢 其實 亦 冇 咩嘢 好 嘅 ，不過 兄弟 住慣咗 ，反而 覺得 外便 嘅 伯爵府 呢 冇 呢處 咁 舒服 。
佢 一便 講 ，一便 慢慢 行到 去 後便 ，拔咗 匕首 揸住 喺 手嚟 ，笑住 話 ：
呢 八碟 餸 ，都 係 兄弟 鐘意 食 嘅 ，御膳房 都 仲 記得 ，大哥 試下 呢味 蟹粉 獅子頭 吖嗱 。
兄弟 你 鐘意 食 嘅 餸 ，實係 最好 嘅 哎 。
多隆 一句 説話 冇 講完 ，突然 覺得 左便 後心 一涼 就 伏 喺 枱 上面 逳 都 唔 逳 嘞 。
原來 韋小寶 已經 對準 佢 後心 ，一匕首 㓤咗 入去 。
呢一刀 無聲無息 ，嗰個 小太監 一啲 都 唔 知道 ，仲 喺度 斟酒 。
韋小寶 行到 佢 後 便 ，又 係 輕輕 一 匕首 將 佢 㓤死 。
佢 立即 轉身 ，喺 門 後 上咗 門戌 ，快手快腳 除咗 衣帽鞋襪 ，只係 剩翻 內衣褲 同埋 護身背心 。
噉 將 小太監 嘅 衣帽 除咗 落嚟 自己 着咗 ，將 自己 嘅 衣帽 ，都 着晒 喺 嗰個 小太監 身上 。
兩個人 嘅 高矮 差 唔多 ，衣服 都 幾 合身 。
然後 將 小太監 嘅 屍體 抱 去 椅 處 坐低 ，攞起 匕首 ，喺 小太監 塊 面 處 啊 亂咁 斫 ，將 五官 啊 斫到 融融爛爛 。
個心 就 話喇 ：多大哥 ，你 係 滿洲人 ，我 天地會 啊 靠 殺 滿洲人 食飯 嘅 ，唔 殺 你 就 唔得 。
今日 攞咗 你 條命 ，真係 對唔住 之至 嘞 。
好在 你 總 免不了 要 死 嘅 ，點解 呢 ？
嗱 ，我 今晚 逃走咗 ，皇上 聽日 啊 實 要 斬 你 嘅 頭 嘅 ，你 亦 不過 係 早 死咗 半日 啫 ，唔算 好 蝕底 吖 。
何況 我 殺 咗 你 ， 你 係 因公殉職 。
但係 如果 皇上 殺 你 嘅 頭 呢 ，你 勢必 要 抄家 嘞噃 ，老婆 仔女 都 會 受 連累 嘅 。
噉 不如 早死 半日 ，好 去 換得 屋企 嘅 撫恤 贈蔭 吖 。
噉 打起 算盤 嚟 計 一計 ，你 實在 係 佔咗 好 大 便宜 㗎 喇 多 大哥 。
但係 多隆平日 對 自己 實在 係 唔錯 ，而家 迫不得已 要 殺咗 佢 ，個心啊 終歸 十分 難受 嘅 ，忍唔住 流出 眼淚 。
佢 抹乾 眼淚 ，轉身 睇 下 個 小太監 佢 諗 ：
唉 你 呢 位 小兄弟 ， 着 住 黃馬褂 幾 咁 威風 啊 。
你 本來 呀 就算 投 十世 胎 ，想 掂 一下 黃馬褂 都 掂唔到 嘅 。
你 戴住 呢 頂 伯爵 大人 嘅 頂戴 ，淨係 嗰粒 紅寶石 咋 ，就 夠 你 使 七八世 㗎 啦 ，嘿嘿 ，你 升官 發財 行 咗 大運 喇 。
我 韋小寶 當年 冒充 小桂子 ，從此 就 飛黃騰達 做咗 大官 。
你 今日 冒充 韋小寶 ，以後 係唔係 能夠 飛黃騰達 呢噉 就 要 睇 你 有冇 本事 嘞 。
我 以前 冒充 小太監 ，今日 等 一 個 小太監 冒充 翻 我 ，哎 兩 無 拖欠 乾乾淨淨 。
小玄子 啊 小玄子 ， 我 冇 對 唔 住 你 啊 。
佢 整理 下 自己 嘅 衣帽 ，見到 冇 破綻 喇 就 大聲 話 ：
細路 ，你 走啦 ，呢處 唔使 你 侍候 喇 。
呢度 五 兩 銀 ，畀 你 買 糖 食 啦 。
跟住 就 含含糊糊 噉 講咗 聲 ：多謝 伯爵 大人 。
又提高把聲話 ：我 同 多總管 喺度 飲酒 傾偈 ，邊個 都 唔准 入嚟 騷擾 啊 。
太監 喺 宮 裏 便 本來 只係 服侍 皇帝 、皇后 、妃嬪 、皇子 同 公主 ，但係 有 職司 嘅 大太監 要 小太監 服侍 ，亦都 係 向來 如此 嘅 。
韋小寶 雖然 已經 唔 做 太監 ，不過 佢 以前 係 宮中 聲威赫赫 、大紅大紫 嘅 太監 ，噉 要 一 名 小 太監 侍候 再 去 打賞 啲 銀 畀 佢 ，實在 係 平常 到 極 啦 。
噉 門外 便 班 侍衞 聽咗 ，邊個 都 冇 理 佢 。
只見 房門 打開 ，嗰個 小太監 啊 挽住 飯盒 出嚟 ，耷低 個 頭 ，轉身 啊 閂翻埋 道門 。
噉韋小寶啊 挽住 食盒 ，耷低頭 行去 門口 咯喎 。
見到 班 侍衛 正 喺度 擺 餸 斟 酒 ，邊個 都 冇 留意 ，韋小寶 個 心 啊 暗暗 歡喜 啦 佢 諗 ：
班侍衞 至少 要 一個 時辰 之後 ，先至 會 發現 房 裏頭 嗰 兩個 人 已經 死咗 。
以為 韋伯爵 同 多總管 都 畀 刺客 殺死 ，哼 ，呢一下 ，嚇到 佢哋 屁滾尿流 都 得 咯 。
啱啱 𨂾出 大門 ，忽然 見到 幾名 太監 宮女 挽住 燈籠 喺 前 便 照 路 ，後 便 有 頂 轎 嚟到 嘞 。
呢頂轎 用 雉雞尾 做 裝飾 ，稱為 翟轎 。
行頭 嗰個 太監 話 ：公主 駕到 。
韋小寶 大吃一驚 啊 佢 諗 ：哎呀 公主 遲唔到 早唔到 ，喺 呢個 時候 嚟到 。
佢 一 入屋 ，即刻 呢 就 見到 我 韋小寶 畀 人 殺死咗 。
宮中 啊 仲 唔 嘈 到 天翻地覆 咩 ？要 出去 就 千難萬難 喇 。
一時 手足無措 ，噉啊 只見 頂轎 停低 ，建寧公主 喺 轎 裏 便 𨂾出嚟 ，佢 話 ：小桂子 喺 裏 便嘛 ？
韋小寶 硬住 頭皮 行 上前 低聲 話 ：
公主 ，韋爵爺 飲醉咗喇 ，奴才 帶 公主 入去 啦 。
燈籠 光 啊 唔係 點 明亮 ，公主 認唔出 佢 。
眼見 眾侍衛 一齊 喺 屋裏 便 出嚟 迎接 ，佢 諗 ：
點解 咁 多人 嘅 啫 ？
噉啊皺起眉頭 ，左手一擺 就話 ：大家 喺外 便 侍候 。
就行入屋嘞噃 。
韋小寶 跟住 佢 入去 。
佢 一 入屋 ，反手 就 閂 翻埋 道門 。
公主 話 ：你 都 出去 。
韋小寶 話 ：係 ，韋爵爺 喺 內房 。
公主 就 快 步 行過去 ，噉 推開 房門 ，只見 嗰個 韋小寶 呢 ，同 多隆 兩個 伏 喺 枱 處 ，顯然 係 飲到 大醉 嘞 。
佢 見 韋小寶 仲 企 響 處 就 話 ：仲唔快啲 出去 ？
韋小寶 低聲 笑住 話 ：我 如果 出去 啊 ，就 燒唔到 藤甲兵 㗎 喇 。
公主 吃咗 一驚 喇 ，捩轉頭 一 睇 ，燭光 之下 ，赫然 見到 韋小寶 企 喺 後便 嚟 。
不由得 又 驚 又 喜 ，吖噉 叫咗 一聲 ：你 ，你 做乜嘢 啊 ？
唔好 出聲 啊 。
公主 睇 下 佢 ，又 睇 下 伏 喺 枱 上面 嗰個 韋小寶 ，噉 啊 低聲 問 佢 話 ：
你 搞 咩鬼 唧 ？
韋小寶 拉 佢 入 房 ，又 閂 翻埋 道 房門 ，低聲 話 ：弊傢伙 喇 ，皇上 要 殺 我 啊 。
公主 話 ：皇帝 哥哥 已經 殺咗 額駙 啦 ，點解 連 你 都 要 殺埋 啊 ？
佢 ，佢 ，佢 如果 殺咗 你 啊 ，我 同 佢 搏命 。
韋小寶 一下 抱住 佢 ，喺 佢 面珠 吻咗 一吻 就 話 ：
我哋 快啲 逃出 皇宮 啦 。
皇上 知道咗 我 同 你 嘅 事 要 斬 我 個 頭 啊 。
嗱 各位 ，欲知 後事 如何 ，且 聽 下回 分解 。
