前 文 再續 啊 書 接上 一回 啊 。
話説 第二日 一早 ，韋小寶 啊 率領 天地會 群雄 ，同埋 一隊 驍騎營 官兵 ，帶齊 各種 嘢 嚟到 半山 。
就 命令 官兵 駐扎 待命 ，自己 呢 ，同 徐天川 等 以及 親兵 上山 嘞 。
行咗 里 幾 路 ，只見 十幾 名 王屋 派 弟子 手執 兵器 ，攔住 條 路 。
徐天川 一個人 行 上前 ，雙手 呈上 一張 帖 。
帖上面 寫住 ：晚生 韋小寶 ，率同 李力世 、祁彪清 、玄貞道人 、風際中 、樊綱 、錢老本 、高彥超 等 ，謹來 司徒 老英雄 靈前 致祭噉 。
王屋 派 弟子 見 佢哋 冇 咩嘢 敵意 啊 ，後便 又 有人 抬住 一副 棺材 ，又 有 香燭 、溪錢 等等 ，不禁 大為 奇怪 啦 就 話 ：
請各位 等陣 ，在下 上去 稟報 啦 。
噉就 有 個人 飛奔 上 山 ，其他 嘅 人 仍然 嚴密 守住 山路 。
韋小寶 佢哋 退開 幾十步 遠 ，坐 喺 啲 石 上面 休息 。
過咗冇幾耐 ，山上 有 幾十人 行落嚟 嘞 ，當先 一個人 ，就係 往日 會過 嘅 司徒鶴 。
佢 係 司徒伯雷 嘅 仔 ，噉 山上 首領 逝世 啊 ，王屋派 就 由 佢 當家作主 嘞 。
韋小寶 一雙眼 睩嚟睩去 ，只係 睇住 佢 後便 ，只見 一個 姑娘 身材 苗條 ，頭戴 白花 ，乃係 曾柔 啊 嘩 好 歡喜 啊 佢 。
司徒鶴 高聲 話 ：各位 嚟到 敝處 有 咩 用意 啊 ？
講完 ，用 手 撳住 腰間 劍柄 。
錢 老本 上前 抱拳 行禮 話 ：
敝上韋君 ，知道 司徒 老英雄 不幸 畀 奸人 所害 非常 痛悼 ，率領 在下等人 ，前來 老英雄 靈前 致祭 啊 。
司徒鶴 遠遠 向 韋小寶 睇咗 一眼 佢 話 ：
佢 係 朝廷 嘅 官員 ，率領 官兵 圍 山 ，一定 係 不懷好意 嘅 。
你哋 想 使 奸計 啊 ，我哋 唔 上 你 嘅 當 。
錢老本 話 ：請問 殺害 司徒 老英雄 嘅 兇手 係 邊個 呢 ？
係 吳三桂 嘅 衛士 巴朗星 ，仲有 佢 手下 一批 惡賊 。
司徒少俠 唔信 敝上 嘅 好意 噉 亦 難怪 嘅 。
我哋 將 祭品 呈上 先 。
錢老本 捩轉頭 話 ：帶上嚟 ！
噉 兩名 親兵 ，推住 一個人 慢慢 行上嚟 。
呢個人 手腳 上 便 都 用 鐵鏈 鎖住 ，頭殼 用 一塊 黑布 罩住 。
王屋 派 眾 弟子 都 好奇怪 嘞 ，唔知 對方 搞 咩 嘢 鬼 。
嗰個人 行到 錢老本 身後 便 ，親兵 就 拉住 鐵鏈 唔畀佢 再行 嘞 。
錢老本 話 ：司徒少俠 請 睇 。
一伸手 ，拉開 嗰個 人 頭殼 上 便 罩住 嘅 黑布 ，只見 嗰個 人 橫眉怒目 ，乃係 巴朗星 啊 。
王屋 派 眾 弟子 一見 ，紛紛 怒喝 ：係 呢個 奸賊 喇 ，快啲 殺咗佢 ！
哐哐啷啷 ，各人 舉起 兵器 ，就要 將 巴朗星 亂刀 分屍 嘞 。
司徒鶴 雙手 一攔 ，阻住 各人 ，佢 話 ：咪住 ！
佢 抱拳 問 錢 老本 話 ：閣下 捉到 奸人 唔知 要 點樣 處置 呢 ？
錢老本 話 ：敝上 對 司徒 老英雄 素來 敬仰 ，嗰日 同 司徒 少俠 又 有 一面之緣 ；
今日 捉到 呢個 行兇奸人 ，連埋 佢 帶領 嘅 一班 惡賊 ，冚𠾴唥 要 喺 司徒 老英雄 靈前 千刀萬剮 ，以慰 老英雄 在天之靈 啊 。
司徒鶴 打個 特 嘞 ， 佢 諗 ： 天下 邊度 有 噉 樣 嘅 好事 啊 ？
佢 望住 巴朗星 ，個 心 啊 將 信 將疑 ，佢 諗 ：官兵 咁 狡猾 ，一定 有 奸計 嘅 。
巴朗星 突然間 破口大罵 司徒鶴 ：叉叉叉 ，你 睇住 老子 又 點 啊 ？你嗰個 老嘢 啊 都 畀 老子 殺咗 咯 。
錢老本 右手 一掌 打正 佢 後心 ，左腳 飛起 ，踢 佢 𦣇柚 。
巴朗星 係 手腳 被 綁住 㗎 ，冇法子 躲避 ，成個人 向前 𢴈 出去 ，𢴈正 司徒 鶴 身邊 ，點 都 躝唔翻起身 。
錢老本話 ：呢件 係 敝上 嘅 一件 小小 禮物 ，呢個 奸人 任由 閣下 處置 啦 。
捩轉頭 叫話 ：都 帶上嚟 ！
一隊 親兵 押住 百幾名 上咗 鐐銬 嘅 犯人 過嚟 ，每個 人 頭上 都 罩住 黑布 嘅 。
黑布 揭開 ，露出 面目 嘞 ，原來 冚𠾴唥 都係 巴朗星 嘅 部屬 。
錢老本 話 ：請 司徒 少俠 一齊 帶走 啦 。
到咗 呢個 地步 ，司徒鶴 啊 一啲 懷疑 都 冇 喇 ，佢 對住 韋小寶 遠遠 作 咗 個 揖 ，佢 話 ：
尊駕 盛情 ，敝派 感激不盡 啊 。
佢 諗 ：佢 畀咗 一個 咁 大 交情 過 我哋 ，唔知 想要 我哋 做 乜嘢 呢 ？
唔通 要 我哋 投降 清廷 ？噉 就 點 都 唔得 。
韋小寶 快步 上前 還禮 佢 話 ：
嗰日 同 司徒兄 、曾姑娘 賭 咗 一手 骰仔 ，我 一直 都 記住 ，我 諗 ，幾時 再 嚟 玩 一手 就 好嘞 。
指住佢身後嗰副棺材話 ：司徒老英雄嘅遺體 ，就喺呢副棺材裏便 ，請你哋抬上山 ，聯埋喺身體上便安葬啦 。
司徒伯雷 身首異處 ，首級 畀 巴朗星 帶咗 落山 ，王屋 派 眾 弟子 啊 個個 都 悲憤 到 極 。
司徒鶴仲 係 怕 係 假 㗎 噃 ，就 行近 棺材 ，見到 棺材 仲 未 抌釘 ，掀開 一 睇 ，果然 係 父親 嘅 首級 喺 裏 便 。
不由得 悲哀 起上嚟 ，跪 喺 地下 放聲 痛哭 。
其餘嘅 弟子 見到 噉樣 ，就 一齊 跪低 喊嘞 。
司徒鶴 企起身 ，叫 四名 師弟 嚟 抬 咗 棺材 上山 ，佢 對 韋小寶 話 ：
請 尊駕 去 先父 靈前 ，上一炷香 啦 。
韋小寶 話 ：好 ，應該 向 老英雄 靈前 叩頭 嘅 。
就 命令 眾 親兵 喺 山口 等候 ，只係 帶住 雙兒 ，同 天地會 兄弟 ，跟住 司徒鶴 上山 。
韋小寶 行到 曾柔 身邊 ，低聲 話 ：曾姑娘 ，你好嘛 ？
曾柔塊面啊淚痕未乾 ，一雙眼 喊到紅一紅 ，更加顯得 楚楚可憐 。
佢 擔 高頭 抽抽噎噎 噉 話 ：你 ，你係 哇啦哇啦 將軍 啊 ？
韋小寶 歡喜 到 乜嘢 噉 ，佢 話 ：吖 你 記得 我 個 名 啊 ？
曾柔 耷低 個 頭 ，嗯噉 應咗 一 聲 ，塊 面 啊 微微 一 紅 。
佢 塊 面 噉樣 一 紅 ，韋小寶 個 心 啊 當堂 暈浪 喇 。
佢 為咩 見到 我 要 面紅 呢 ？
男人 笑眯眯 ，心裏 想 詭計 ；女人 面紅紅 ，心裏 想 老公 。
唔通 佢 想 我 做 佢 老公 ？
啊唔知 我 畀 佢 嘅 骰仔 仲 喺唔喺 處 呢嚱 ？
於是就低聲噉話 ：曾姑娘啊 ，上次 我 畀 你 嘅 嘢 仲 喺唔喺 處 啊 ？
曾柔塊面 又 試 紅 嘞 。
乜嘢啊 ？我 唔記得 嘞 。
韋小寶 好 失望 啦 ，唉噉 歎 一口氣 。
曾柔 捩過 頭嚟 ，輕輕 笑咗 一 笑 低聲 話 ：密十 。
韋小寶 歡喜 到 癲喇 ，個 心 啊 好似 有 啲 嘢 喺度 撓下撓下 噉 ，佢 低聲 話 ：我 係 密十 ，你 係 至尊 。
曾柔 唔理 佢 喇 ，快步 向前 ，行到 司徒鶴 身邊 。
嗰座 王屋山 啊 ，四面 好似 畀 刀削過 噉樣 嘅 ，形狀 啊 好似 帝王 嘅 車蓋 ，所以 啊 得 呢個 名 。
最高嗰處 稱之為 天壇 ，東便 有 日精峰 ，西 有 月華峰 。
噉 一行人 跟住 司徒鶴 嚟到 天壇 以北 嘅 王母洞 。
一路上 蒼松翠柏 ，山景 清幽 。
王屋山 喺 道書 裏 便 叫做 清虛 小有洞天 啊 ，天下 三十六 洞天 之中 呢 就 名列 第一 ，相傳 係 黃帝 會 王母 嘅 地方 。
王屋 派 班 人 呢 就 居住 喺 王母洞 同埋 附近 各個 山洞 裏 便 ，冬暖 夏涼 就 好過 住屋 啊 。
司徒伯雷 嘅 靈位 ，設 喺 王母洞 裏 便 。
弟子 將 首級 同 身體 聯翻 好 之後 呢 就 入殮 嘞 。
韋小寶 率領 天地會 眾 兄弟 喺 靈前 上香 致祭 ，跪低 叩頭 。
佢 諗 ：要 討好 曾 姑娘 ，就 要 喊 得 越 悲哀 越 好 㗎 噃 。
整色整水 假喊 係 佢 拿手好戲 啦 。
諗 起 喺 皇宮 好 幾次 畀 老舉 乸 毆打 嘅 慘酷 ， 畀 洪 教主 捉 到 之後 嘅 驚險 ， 一而再 再而三 噉 畀 方怡 欺騙 嗰 種 衰 法 ， 阿珂 呢 只 愛 鄭克 塽 嗰 啲 無可奈何 ， 唉 不由得 悲從中來 就 放聲大哭 啊 。
初初 喊 嘅 時候 呢 ，仲有 啲 勉強 嘅 ，不過 喊開咗 頭 就 順理成章 嘞 ，越 喊 越 悲切 ，佢 大聲 噉 話 ：
啊哈啊啊 ，哈 ，啊 ，司徒 老英雄 ，晚輩 久聞 你 係 一位 忠臣 義士 ，英雄 好漢 。
當年 見到 你 公子 嘅 劍法 ，又 知道 你 武功 使得 ，希望 能夠 拜 喺 你 嘅 門下 ，做個 徒子徒孫 ，學 幾招 武功 ，亦 可以 喺 江湖 上 揚眉吐氣 啦 。
唉 點知 你 老人家 ， 畀 奸人 所害 ， 啊啊啊 ， 真 係 令人 傷心 到極 啊 ， 啊 ， 啊 。
司徒鶴 、曾柔 等人 啊 本來 已經 傷心欲絕 ，聽到 噉樣 一喊 ，當堂 成個 王母洞 啊 哭聲 震天 哀嚎 動地 啊 。
徐天川 、錢老本 等人 呢 本來 就 唔想 喊 嘅 ，亦 不禁 畀 啲 人 嘅 悲戚 感動 ，灑咗 幾 滴 眼淚 嘞 。
韋小寶 捶胸頓足 ，喊到 冇停 ，反而 王屋 派 弟子 啊 猛 咁 勸佢 安慰佢 ，噉 先至 收聲 唔 喊 。
佢 將 巴朗星 拉過嚟 ，攞咗 把 鋼刀 ，交畀 司徒鶴 佢 話 ：
司徒少俠 ，你 殺咗 呢個 奸賊 啦 ，為 令尊 報仇 啊 。
司徒鶴 一刀 割咗 巴朗星 嘅 首級 ，放 喺 供桌 上 便 。
王屋 派 弟子 一齊 向 韋小寶 拜謝 大恩 。
噉樣 一嚟 ，王屋 派 各人 啊 自不然 對 佢 感恩戴德 嘞 。
何況 當日 韋小寶 將 司徒鶴 班 人 捉住 之後 ，又 送 銀 過 佢哋 放翻 晒 啲 人 ，送咗 一個 極大 嘅 交情 。
但佢係 清廷 貴官 啊 ，點解 會 噉樣 呢 ？眾人 係 始終 唔明白 。
錢老本 將 司徒鶴 拉埋 一邊 ，講明 自己 一班人 係 天地會 青木堂 兄弟 。
不過 對於 韋小寶 喺 朝廷 做官 ，佢 嘅 身份 就 唔能夠 公開 嘅 ，至 怕 一 洩漏 出去 啊 ，就 壞咗 大事 嘞 。
噉 只有 含糊其辭 ，話 佢 為人 極之 有義氣 ，身在 曹營 心在 漢 ，眾 兄弟 呢 當 佢 係 好 朋友 噉 。
司徒鶴 聽咗 之後 就 恍然大悟 ，噉 更加 連聲 多謝 啦 。
跟住 又 講起 王屋派 今後 嘅 出處 ，司徒鶴 話 佢哋 嘅 首領 被害 ，又 撞啱 官兵 圍山 ，都 冇 想過 呢件事 啊噉 。
錢 老本 就 透露 招攬 嘅 意思 嘞 。
天地會 喺 江湖 上 威名 極盛 ， 直情 係 世上 反清復明 嘅 領袖 ， 王屋派 向來 都 非常 敬慕 嘅 ， 噉 又 係 志同道合 。
司徒鶴 一聽 就 好 歡喜 ，就 同 王屋 派 嘅 叔父 ，與 及 各 師兄弟 啊 商議 ，結果 係 人人 讚同 噃 。
佢 即刻 就 向 錢老本 請求 加盟 啦 。
錢老本 呢個 時候 先至 對佢 講明 ，韋小寶 啊 ，係 青木堂 嘅 香主 噉 。
當日下午 ，天地會 青木堂 喺 王母洞 大開 香堂 ，接納 王屋派 各人 入會 嘞 。
噉 各人 拜過 香主 之後 ，都係 韋小寶 個 部屬 咯噃 。
韋小寶 開心 喇 ，飲過 結盟 酒 之後 就 想 開 賭 ，同 新 舊 兄弟 大 賭 一場 。
李力世 、錢老本 等 啊 連忙 勸 佢 唔好 ，話 噉樣 興高采烈 賭錢 ，未免 對 啱啱 逝世 嘅 司徒伯雷 不敬 啊 噉 。
韋小寶 賭唔成 錢 有啲 掃興 ，佢 問起 王屋派 嘅 善後 事宜 。
李力世 話 ：王屋山 喺 山西 、河南 兩 省 交界 ，唔 屬 我哋 青木堂 管轄 嘅 。
按照 本會 規矩 ，越界 收 兄弟 入會 係 可以 嘅 ，但係 各 堂 兄弟 就 唔 能夠 越界 辦事 ，最好 呢 ，請 司徒 兄弟 各位 搬去 直隸省 居住 就 好喇 。
錢老本 話 ： 清廷 皇帝 派 韋香主 嚟 攻打 王屋山 ， 司徒 兄弟 同埋 各位 以後 如果 唔 喺 王屋山 呢 ， 韋香主 就 易於 上報 啦 。
司徒鶴話 ：冇錯 ，小弟 謹遵 各位 大哥 吩咐 。
韋小寶話 ：司徒大哥 ，而家 我哋 要 去 揚州 ，同 史閣部 起 一座 忠烈祠 。
呢個 祠堂 起好 啊 ，大家 就 去 打 吳三桂 喇 。
司徒鶴 企起身 嚟 大聲 話 ：韋香主 去 打 吳三桂 ，屬下 願 為 前鋒 ，率 同 師兄弟姊妹 ，同 吳三桂 呢個 惡賊 拼 個 死活 ，為 先父 報仇 雪恨 啊 。
韋小寶 話 ：噉 就 最好 啦 。
嗱 ，各位 而家 呢 就 跟我 去 揚州 ，不過 啊 要 扮作 官兵 ，委屈 一啲 唧 。
司徒鶴話 ：為咗 打 吳三桂 ，再 大嘅 委屈 都係 甘心 嘅 。
韋香主 做 得 清廷 嘅 官 咯 ， 我 哋 當然 亦 做 得 官兵 啦 。
何況 李大哥 、徐大哥 各位 ，都係 扮作 官兵 嘞 。
當晚 眾人 同 司徒伯雷 安葬 之後 ，執埋 嘢 就 落山 。
會武功嘅 男子 跟住 韋小寶 去 揚州 。
老弱婦孺 呢 就 去 保定府 擇地 安居 ，噉 嗰度 有 天地會 青木堂 嘅 分舵 ，自不然 有人 照應 妥當 㗎 嘞 。
韋小寶 對 張勇佢哋 話 ，王屋山 匪徒 呢 眼見 畀 大軍 圍住 ，知道 難以 逃跑 ，噉 經過 一番 開導 ，大家 一齊 歸降 。
佢 又 已經 招安 咗 佢哋 收編 為 官兵 嘞 噉 。
張勇 等 一齊 向 佢 慶賀 啦 ，話 都 統兵 不 血刃 ，平定 咗 王屋山 嘅 悍匪 ，立下 大功 嘞 。
韋小寶話 ：呢啲 係 四位 將軍 嘅 功勞 啫 ，如果 唔係 你哋 沊沊𡃈噉 圍住 啊 ，使到 匪徒 插翅難飛 ，佢哋 亦 決 唔肯 投降 嘅 。
等 兄弟 申報 朝廷 ，各 有 升賞 。
噉啊 四將 好高興啊 ，知道 兵部 尚書 明珠 呢 對 佢 係 竭力 奉承 嘅 ，只要 係 韋 都統 奏報 嘅 功勞 ，兵部 一定 係 從優 敘議 嘅 。
韋小寶 初時 啊 擔心 曾柔 跟 埋 王屋派 嘅 婦孺 ， 去 保定 府 安居 ， 但 如果 指定 要 佢 一齊 去 揚州 又 有 啲 講唔 出口 啊 。
及至 見到 佢 換上 男裝 ，同 司徒鶴 等 一齊 行 ，個心 啊 真係 歡喜 到 極 啊 。
一路上 ，佢 總係 想 搵 個 機會 同 佢 親熱 一番 嘅 。
不過 曾柔 同 眾位 師兄 寸步不離 ，見到 佢 呢 ，只係 腼腼腆腆 噉 微微笑 唔出聲 。
韋小寶 想 同佢 講句 親熱 説話 ，始終 不得其便 ，搞到 佢 啊 ，唉 心痕痕 ，冇法子 嘞 。
如果 佢 只係 清軍 主帥 ，早就 假公濟私 ，調 呢個 小親兵 入 營 侍候 嘞 。
但係 身為 天地會 香主 ，調戲 會中 婦女 乃係 極 嚴厲 嘅 禁令 ，而且 眾 兄弟 面子 亦 唔好 睇吖 ，只有 猛咁 吞口水 ，等候 機會 係 嘞 。
話說 韋小寶 一行 去 揚州 ，沿途 官員 迎送 ，賄賂 極之 豐富 。
韋小寶 梗係 來者不拒 定啦 ，一路 南下 ，行李 啊 一日 重過 一日 。
佢 同 天地會 啲 兄弟 講 ，我哋 噉樣 啊 係 敗壞 清廷 嘅 名聲 ，賄賂 收得 越 多 呢 ，百姓 就 越 憤怒 。
各地 官員 嘅 名聲 唔好 嘞 ，噉 將來 起兵 造反 ，就 越 容易 成功 嘞 。
噉 徐天川 等 人 都 覺得 好啱 噃 。
呢一日 嚟到 揚州 嘞 。
兩江 總督 麻勒吉 、江寧 巡撫 馬佑 以下 ，布政使 、按察使 、學政 、淮陽道 、糧道 、河工道 、揚州府 知府 、江都 縣 知縣 ，以及 各級 武官 ，噉啊 早就 得到 消息 ，出城 幾里 之外 嚟到 迎接 。
欽差 行轅 啊 設 喺 淮陽 道 道 台 衙門 ， 韋小寶 啊 覺得 太過 拘促 咯 ， 只 係 住 得 一晚 ， 就 對 道 台話 要 另外 搬個 地方 。
佢 諗 ：行轅 最好 呢 就 設 喺 麗春院 喇 ，欽賜 衣錦榮歸 ，梗係 返去 故居 最 威風 啦 。
但係 欽差大臣 將 行轅 設 喺 妓院 ，到底 講唔過去 㗎 。
諗 諗 諗 ， 諗 當日 喺 揚州 嘅 時候 ， 所 懷抱 嘅 雄心 大志 啊 ， 除 咗 開 幾間 大 妓院 之外 呢 ， 就 係 將禪 智寺 前面 ， 芍藥 圃 裏頭 嘅 芍藥花 冚𠾴唥 連根拔起 嘞 。
噉點解 會 噉 呢 ？
揚州 芍藥 就 名 揚天下 ，禪智寺 前面 嘅 芍藥圃 尤其 是 係 宏偉 ，名種 千百 花 大 如 碗 。
韋小寶 喺 十歲 嗰 一年 啊 ，就 曾經 同 一班 頑童 去 玩 嘅 ，見 啲 芍藥 開得 咁 靚 ，就 拗咗 兩 朵 搦嚟 玩 咯 噃 。
畀 廟 裏頭 嘅 和尚 見到 就 搶翻 兩 朵 花 ，仲 摑 咗 佢 兩 巴 。
韋小寶 又 踢 又 咬 ，同 嗰個 和尚 打鬧 起 上嚟 ，畀 嗰個 肥大 和尚 推 咗 喺 地下 踢 咗 幾 腳 。
噉嗰 班 頑童 㗾 噉 湧 上去 ，亂 咁 掹 啲 芍藥 咯噃 。
噉嗰個和尚咪叫人囉 ，寺裏 便 一群和尚 同埋 火工 湧出嚟 ，手執 棍棒 ，將 嗰班 頑童 趕走 。
韋小寶 係 禍首 啊 ，梗係 捱咗 唔少 棍棒 定㗎 啦 ，頭殼 啊 仲 腫起 一個 高樓 。
返到 麗春院 ，又 畀 母親 啊 罰 一餐 冇 飯食 。
雖然 ，佢 終於 去 廚房 啊 偷咗 個 包食 ，但 對於 禪智寺 採花 受辱 呢件事 啊 ，卻 係 引為 奇恥大辱 嘅 。
第日 佢 嚟到 禪智寺 前便 ，隔遠遠 噉 破口大罵 ，由 如來佛 嘅 老母 啊 一定 鬧到 和尚 個 女 ，佢 宣稱 ：
終須有日 ，老子 要 掹 清光 廟 前面 嘅 芍藥 ，將 你 呢 間 臭 廟 啊 踏 為 平地 ，掘 為 屎氹 。
一直 鬧 到 廟 裏頭 嘅 和尚 追 出嚟 佢 拔足 飛奔 為止 。
過得 幾年 ，呢件事 早就 唔記得 嘞 。
今日 返到 揚州 ，要 搵 地方 做 行轅 ，噉 佢 先至 諗起 禪智寺 嚟 ，就 同 淮陽道道台 講咗 ，有心 去 作踐 一番 。
嗰個 道台 諗 ：禪智寺 係 佛門 聖地 ，千年 古剎 。
欽差 住咗 入去 ，只怕 搞到 一塌糊塗 噃 。
就話 ：回 大人 ，嗰間 禪智寺 風景 當然 係 極之 好 嘞 ，大人 高見 ，卑職 欽佩 之至 。
不過 喺 廟 裏頭 飲飲食食 ，恐怕 唔係 點 方便 噃 。
韋小寶 話 ：有 咩 唔方便 啊 ？將 廟 裏頭 嘅 菩薩 搬 出去 咪 就 得 囉 。
嗰個 道台 聽講話 要 搬 菩薩 唄 更加 嚇一跳 啦 ，佢 諗 ：
噉就 實會 搞出 禍嚟 嘅 噃 ，揚州 城 啲 百姓 如果 動咗 公憤 啊 就 難以 處理 嘞 。
於是 賠笑 請咗 個 安 ，低聲 話 ：
回 大人 ，揚州 煙花 係 天下 有名 嘅 ，大人 一路 上 勞苦 功高 ，嚟到 敝處 ，卑職 應當 盡心 服侍 。
已經 挑選咗 好多 善於 彈琴 唱曲 嘅 美貌 女仔 ，供 大人 賞鑒 。
和尚 廟 裏 便 硬床 硬轎凳 ，好 煞風景 嘅 。
吖噉又係噃 ，噉計 你話 ，行轅 設 喺 邊處 好 呢 ？
揚州 有 個 姓 何 嘅 鹽商 ，佢 屋企 叫做 何園 ，稱為 揚州 名園 第一 嘅 。
佢 係 有心 巴結 欽差 大人 ，早就 預備得 妥妥當當 ，盼望 大人 光臨 㗎嘞 。
不過 佢 功名 太過 細 ，唔敢 出口 唧 。
大人 如果 唔 嫌棄 咯喎 ，不妨 移駕 過去 睇下 啦 。
嗱 各位 ，欲知 後事 如何 ，且 聽 下回 分解 。
