前文 再續 啊 書 接 上 一回 啊 。
話說 康熙 傳 咗 兵部 車駕 司郎中 嚟 ，問 佢哋 啲 馬匹 準備 嘅 情形 。
車駕司郎中 啊 報告咗 ，康熙 好 歡喜 ，嘉獎 咗 佢哋 幾句 。
噉 四 名 郎中 啊 叩頭 謝恩 嘞 。
忽然間 ，韋小寶 話 ：
皇上 ， 聽講 四川 、 雲南 嘅 馬匹 同口外 西域 嘅 馬 唔 同 嘅 ， 佢 哋 雖然 細 隻 啲 啊 不過 好 有 長 力 ， 擅長 行 山路 ， 唔 知 係 咪 真 嘅 呢 ？
康熙 問 四 名 郎中 話 ：真唔真 啊 ？
嗰個 漢族 郎中 話 ：回 皇上 ，川馬 滇馬 耐勞 負重 ，極 有 長力 ，行走 山路 確係 好嘅 。
但係 喺 平地 上 衝鋒陷陣 ，遠遠 唔及 口外 同 西域 馬 ，因此 軍隊 係 唔 用 川馬 滇馬 嘅 。
康熙 向 韋小寶 望咗 一眼 ，問 嗰個 郎中 話 ：我哋 有 幾多 川馬 滇馬 啊 ？
回皇上 ，喺 四川 同 雲南 駐防 軍隊 裏 便 ，川馬 滇馬 好多 ，其他 地方 就 好 少 喇 。
湖南 駐防 軍隊 裏 便 有 五百 幾 匹 。
康熙 岌一岌 頭 佢 話 ：出去 啦 。
佢 唔 想 向 臣下 洩漏 佈置 進攻 雲南 嘅 用意 。
等 四名 郎中 退出 之後 ，就 同 韋小寶 話 ：好彩 你 提醒 。
聽日 就要 下旨 ，要 四川 總督 急速 採辦 川馬 。
呢件事 ，要 做得 十分 隱秘 先至 好啊 。
韋小寶 啊 忽然 笑起上嚟 ，神情 非常 得意 。
康熙 問 佢 笑乜嘢 啦 。
韋小寶 話 ：吳 額駙 有 批 滇馬 ，啱啱 喺 雲南 運嚟 嘅 ，佢 誇口 話 呢啲 馬 長力 極之 好 。
奴才 就 唔 信 ，約好 同 佢 比賽 一下 。
滇馬 係咪 真係 有 長力 呢 等陣 比賽 過 就 知道 嘞 。
噉 你 又 要 同 佢 好好 比賽 下 咯 ，點樣 比賽法 啊 ？
我哋 講好喇 ，總共 比賽 十場 ，贏咗 六場 就算 贏喇 。
只 係 賽 十場 啊 ， 未必 真 係 能夠 知道 滇 馬 嘅 好處 嘅 噃。
你 知道 佢 有 幾多 匹 滇馬 運 咗嚟 啊 ？
我 睇 佢 嘅 馬廄 裏頭 呢 ，總 有 五六十 匹 嘅 ，都 係 新 運到 嘅 。
噉 你 同 佢 賽 五六十場 啦 ，要 鬥 長路 ，最好 係 去 西山 ，跑 山路 。
康熙 見到 韋小寶 面色 有啲 古怪 嘞 就 話 ：
你 阿爺 吖 咁 冇用 嘅 ，嗱 ，如果 輸 咗 ，彩金 我 同 你 出 就 係 喇 。
韋小寶 不便 直白 講畀 皇帝 聽 ，已經 喺 吳應熊 嘅 馬廄 裏 便 做咗 手腳 ，呢場 比賽 呢 ，自己 已經 贏咗 九成九 嘞 。
但係 一比賽完 ，皇帝 睇見 噉嘅 結果 ，就 以為 滇馬 唔中用 ，將來 行軍 打仗 就 怕 誤咗 大事 嘞 。
就 微笑 話 ：噉 又 唔係 為咗 彩金 嘅 。
康熙 忽然間 覺得 奇怪 起上嚟 ，佢 話 ：
滇馬 有 長力 ，吳 應 熊 呢個 嘢 運 一 大 批 滇馬 嚟 北京 做 咩 嘢 呢 ？
佢 實係 想 出風頭 唧 ，誇佢 雲南 嘅 馬 好 咯 。
唔係啊 ，呢個 嘢 ，呢個 嘢 想 逃跑 啊 ！
韋小寶 仲 未 明白 噃 ，好奇怪 噉 問 ：逃跑 ？
係 。
嚟人喇 ！
康熙 吩咐 太監 話 ：立即 傳旨 ，緊閉 九門 ，邊個 都 唔准 出城 ，再 傳 額駙 吳 應熊 入 宮 嚟 見 朕 。
幾名 太監 應咗 就 出去 傳 旨 嘞 。
韋小寶 話 ：皇上 ，你 話 吳應熊 咁 大膽 ，竟然 要 逃跑 啊 ？
但願 我嘅 估計 唔準確 啦 ，否則 ，即刻 就要 對 吳三桂 用兵 ，不過 呢個 時候 我哋 仲未曾 佈置好 啊 。
我哋 未 佈置 好 啫 ，吳三桂 亦 未必 佈置 好 啊 。
唔係啊 ，吳三桂 仲未到 雲南 就 已經 招兵買馬 ，立心 造反 嘞 。
佢 已經 搞咗 十幾年 ，我 呢 ，卻 係 喺 呢一兩年 先至 着手 大舉 部署 嘅 啫 。
不過 皇上 英明 智慧 ，部署 一年 ，就 頂得 吳三桂 部署 二十年 喇 。
康熙 遞 起 隻 腳 向 佢 虛 踢 一 腳 笑住 話 ：我 踢 你 一 腳 ，頂得 吳 三桂 嗰個 老 嘢 踢 你 二十 腳 啊 。
小桂子 ，你 唔好 睇輕 吳三桂 ，呢個 老嘢 好 會 用兵 打仗 ，李自成 咁 厲害 嘞 ，都 畀 佢 打垮 。
朝廷 裏 便 冇 一個 將軍 係 佢 對手 。
噉 我哋 以 多 為 勝 ，皇上 派 十 個 將軍 出去 ，十 個 打 鬼 佢 一 個 咯 。
噉 亦 要 有 個 能幹 嘅 大元帥 至 得 㗎 嘛 。
我 手下 如果 有 個 徐達 、常遇春 或者 係 沐英 噉 我 就 唔使 擔心 嘞 。
皇上 御駕 親征 啦 ，就 叻過 徐達 、常遇春 、沐英 嘞 。
當年 明太祖 打 陳友諒 啊 ，佢 亦係 御駕親征 嘅 。
你 托 大腳 就 容易 咯 ，講咩 腰腎 魚湯 英明 智慧 。
真嘅 英明 ，第一 ，就要 有 自知之明 。
行軍 打仗 非 同 小可 。
我 從來 都 冇 打過 仗 ，點 能夠 係 吳三桂 嘅 對手 呢 ？
幾十萬 兵馬 ，一下 指揮 失當 就 不免 一敗塗地 。
前明土木堡之變 ，皇帝 信咗 太監 王振 嘅 説話 ，御駕 親征 。
搞到 幾十萬 大軍 ，都 畀 嗰個 太監 糊里糊塗 噉 搞到 全軍 覆沒 ，連 皇帝 都 畀 敵人 捉咗 去 。
哎呀 皇上 啊 ，奴才 呢個 太監 係 假 㗎 咋 。
哈哈哈哈 ，你 唔使 咁 怕 ，就算 你 呢個 太監 係 真嘅 ，我 又 唔係 前明英宗 噉 嘅 昏君 ，會 畀 你 亂咁嚟 咩 ？
冇錯喇 ，皇上 神機妙算 ，非同小可 ，呢 大戲 裏頭 係 有得 講 㗎 叫做 ，哈 叫做 乜乜 之中 ，乜乜 千里之外 噉 嘅 。
呵呵呵 ，呢句嘢 太過 難學 嘞 ，唔 教 你 嘞 。
噉 傾咗 輪偈 ，太監 嚟 報告 話 ，九門 提督 已經 奉旨 關閉 城門 嘞 。
康熙 正話 稍為 放心啲 啦 ，另外 一名 太監 跟住 嚟 稟奏 話 ：
額駙 出城 打獵 未 返嚟 ，城門 已經 關閉 ，唔能夠 出城 宣召 啊 。
康熙 一拍 張 枱 企 起身 話 ：果然 走咗 ，建寧 公主 呢 ？
嗰個 太監 話 ：回 皇上 ，公主 殿下 仲 喺 宮 裏 便 。
呢個 吳應熊 吖 ，一啲 夫妻 情分 都 冇 。
韋小寶 話 ：皇上 ，奴才 而家 就 去 追 嗰個 嘢 返嚟 。
佢 講 好 今日 要 同 奴才 賽馬 嘅 ，忽然間 出 城 打獵 ，的確 唔 對路 啊 。
康熙 問 嗰個 太監 話 ：額駙 幾時 出城 㗎 ？
回皇上 ，奴才 去 額駙府 宣旨 ，額駙 府 嘅 總管 話 ，今朝 一早 ，額駙 就 出城 去 打獵 喇 。
哼 ，嗰個 嘢 一定 係 今朝早 得到 尚可喜 、耿精忠 奉旨 撤藩 嘅 消息 ，估計 佢 老豆 即時 要 造反 ，就 趕快 鬆人 。
康熙 擰轉頭 對 韋小寶 話 ：佢 已經 走咗 幾個 時辰 追唔到 佢 喇 。
佢 喺 雲南 運 咗 幾十 匹 滇馬 嚟 ，就係 要 一路 換 馬 趯 返去 昆明 啊 。
韋小寶 諗 ：皇上 真係 料事如神 啊 ，一聽到 佢 運 咗 大批 滇馬 嚟 ，就 估到 佢 要 逃走 嘞 。
眼見 康熙 面色 唔好 ，唔敢 亂 托 大腳 。
佢 忽然間 想起 一件事 就 話 ：皇上 望安 ，奴才 或者 有 法子 捉 嗰個 嘢 返嚟 嘅 。
你 有 咩 法子 啊 ？亂 咁 噏 。
如果 滇馬 真係 有 長力 ，佢 離開 北京 一 遠 ，喬裝 改扮 ，就 點 都 追唔翻 㗎 嘞 。
韋小寶 啊 唔知 馬夫 頭頭 係咪 已經 畀咗 巴豆 過 吳應熊 嗰 批 滇馬 食 ，所以 呢 ，就 唔敢 喺 皇帝 面前 誇 下海口 。
佢 就 話 ：食 君 之 祿 忠 君 之 事 吖嘛 ，奴才 而家 去 追 下 ，真係 追唔上 咯 都 冇 法子 啦 。
好！
康熙 攞起 筆 好快 就 寫咗 一道 上諭 ，扱 咗 玉璽 ，命令 九門 提督 開 城門 ，放 韋小寶 出去 。
佢 話 ：你 帶 多啲 驍騎營 軍士 去 ，吳應熊 如果 敢 拒捕 ，就 逳手 同 佢 打過 啦 。
講完 ，將 調兵 嘅 金符 交咗 畀 佢 。
韋小寶 話 ：得令 ！
接咗上諭 ，就 向 宮外 飛奔 出去 嘞 。
公主 正在 喺 皇宮 門口 等 佢 ，見到 佢 快步 跑出嚟 就 叫 佢 話 ：小桂子 ，你 做咩嘢 啊 ？
韋小寶 話 ：不得了啊 不得了啊 ，你 老公 趯咗 更 啊 。
一步 都 冇 停 ，反而 跑得 更快 嘞 。
公主 又 鬧 佢 話 ：死太監 你 嘩 冇 釐規矩 ，快啲 企 喺 處 。
我 同 公主 捉 老公 啊 ，赴湯蹈火 ，在所不辭 ，披星戴月 ，馬不停蹄 啊 。
胡言亂語 早就 去到 遠遠 嘞 。
韋小寶 出到 皇宮 之外 ，上咗 馬 ，飛馳 回府 。
只見 趙良棟 陪住 張勇 等 三個人 喺 花廳 飲酒 ，立即 轉身 ，召咗 幾十名 親兵 嚟 ，捉咗 張勇 佢哋 三個人 。
張勇話 ： 請問 都統 大人 ， 小將 等 犯 咗 咩 嘢 罪 啊 ？
韋小寶 話 ：有 上諭 喺度 ，唔得閒 同 你 講 咁多 啊 。
講完 ，將 揸住 喺 手 嘅 上諭 揚咗 一揚 ，跟住 就 一連串 噉 下令 嘞 。
調驍騎營 軍士 一千 人 、御前侍衞 五十 人 ，立即 嚟 府前 聽令 ，預備 馬匹 。
噉親兵 接咗 令 呢 就 去嘞 。
韋小寶 對 趙良棟 話 ： 趙總兵 ， 吳應熊 嗰 個 嘢 趯 咗 更 啊 ， 吳三桂 要 起兵 造反 ， 我 哋 快 啲 出城 去 追 啦 。
趙良棟 話 ：嗰個 嘢 真係 大膽 嘞 ，卑職 聽 由 差遣 。
張勇 、王進寶 、孫思克 三個人 大吃一驚 ，你 望 我 我 望 你 。
韋小寶 對 親兵 話 ：看實 呢 三個 人 。
趙總兵 ，我哋 走 。
張勇話 喇 ： 韋都統 ， 我 哋 係 西涼 人 ， 做 嘅 係 大清 嘅 官 ， 從來 都 唔 係 平西王 嘅 嫡系 。
我哋 三個人 以前 喺 甘肅 做 武官 ，收尾 先至 調到 雲南 當差 ，一直 受 吳三桂 排擠 。
佢 調 卑職 三個 人 離開 雲南 ， 就 係 明知 我 哋 三個 人 唔 肯 附逆 ， 怕 扠 𢰸 佢 嘅 大事 啊 。
韋小寶 話 ：我 點知 你 講 嘅 説話 係 真 定係 假 㗎 。
孫思克 話 ：吳三桂 舊年 要 殺 我 ，全靠 張提督 力保 ，卑職 先至 保住 個人頭 。
個 心 啊 真係 嬲 到 嗰個 老嘢 入 骨 啊 。
張勇話 ： 卑職 三個 人 ， 如果 同 吳應熊 係 同謀 ， 點解 又 唔 一齊 逃走 呢 ？
韋小寶 諗 呢句 説話 亦 講得 幾啱 ，佢 沉吟 話 ：
好 ，你哋 係唔係 同 吳三桂 一路 ，等陣 再 詳細 審問 啦 。
趙總兵 ，追人 緊要 啊 我哋 走罷啦 。
張勇話 ：都統大人 ，王副將 善於 觀察 馬跡 ，滇馬 嘅 蹄形 佢 一 睇 就 知 。
韋小寶 岌頭 話 ：呢種 本事 好 有用 。
不過 帶埋 你哋 去 ，喺 半路 如果 你 搞起鬼 上嚟 ，老子 唔係 上咗 你 大當 ？
孫思克 高聲 話 ：都統大人 ，你 將 小將 綁 喺 呢處 ，帶埋 張 提督 同 王 副將 去 追 。
佢 兩個人 如果 有 咩 咿逳 ，你 返嚟 一刀 將 小將 殺咗 就係 嘞 。
好 ，你 夠 義氣 ，呢件事 呢 我 都 揸唔定 主意 嘅 。
嚟嚟嚟 ，張 提督 ，我 同 你 擲 三手 骰仔 ，如果 你 贏 ，就 聽晒 你 嘅 ，如果 我 贏 呢 ，就 唯有 借 三 位 人頭 嚟 使 下 嘞 。
佢 都 唔 等 張勇 出聲 啊 ，即刻 就 話 ：嚟人 啊 ，攞 骰仔 嚟 。
王進寶 話 ：小將 身邊 有 骰仔 ，你 放開 我 ，小將 同 你 賭 就係 嘞 。
韋小寶 好奇怪噃 ，噉啊 吩咐 親兵 同 佢 鬆綁 。
王進寶 喺 袋 攞 咗 三粒 骰仔 出嚟 ，嚓 一下 擲 喺 台 上 便 ，手法 非常 熟練 。
韋小寶 又 問嘞 ：乜 你 身邊 ，點 會 帶埋 骰仔 嘅 ？
小將 生平 啊 最 鐘意 賭 ，骰仔 係 隨身 帶 嘅 。
如果 冇人 同 我 賭 咯 ，自己 左手 同 右手 賭 咯 。
自己 左手 同 右手 賭 啊 ， 噉 輸贏 點計 啊 ？
左手 輸咗 ，右手 啊 打 左手 一拳 ；右手 輸咗 呢 ，就 左手 打 右手 一拳 咯 。
哈哈哈哈哈 ，哎呀 過癮啊 過癮啊 ，老兄 同 我 真係 志同道合 喇 ，一定 係 好人 。
嚟 ，將 嗰 兩位 將軍 都 放咗 佢 。
王副將 ，我 同 你 擲 三手骰仔 ，無論 係 輸 定 贏 ，你哋 都 跟埋 我 去 追 吳應熊 啦 。
如果 係 我 贏 喇 ，先頭 得罪 咗 三位 呢件事 ，噉 就 算數 啦 。
如果 係 你 贏 呢 ，我 就 同 三位 叩頭 賠罪 。
張勇 等 三人 哈哈大笑 都 話 ： 噉 就 唔 敢當 ， 噉 就 唔 敢當 。
韋小寶 攞起 骰仔 ，正話 要 擲 ，親兵 入嚟 稟報 話 ，驍騎營 軍士 ，同 御前 侍衞 都 已經 聚集 好喇 ，喺 府外 聽候 命令 。
韋小寶 收起 骰仔 ，佢 話 ：事 不宜 遲 ，我哋 追 人 緊要 啊 。
四位 將軍 ，一齊 去啦 。
帶 埋 張勇 、 趙良棟 等 四人 ， 點齊 驍騎 營 軍士 同御前 侍 衞 ， 向南 出城 就 追 吳應熊 嘞 。
王進寶 喺 前便 帶路 ，追咗 幾里 ，噉啊 落馬 睇下 路上 嘅 馬蹄印 ，佢 話 ：
都統大人 ，好奇怪啊 ，呢行人 ，屈咗 向東 便 走嘞噃 。
噉就 奇怪嘞 ，佢 趯翻 去 雲南 應該 向 南 行至 係㗎 。
好 ，大家 向 東面 追 。
趙良棟 個 心思 疑嘞 佢 諗 ：向 東 逃跑 ？太過 冇 道理 吖 。
唔通 王進寶 故意 引 我哋 行錯路 ，等 吳應熊 逃走 ？
佢 就 話 ：都統大人 ，好唔好 由 小將 另外 帶 一路人馬 向 南面 追 啊 ？
韋小寶 睇咗 王進寶 一 眼 ，見 佢 唔 高興 就 話 ：
唔使喇 ，大家 由 王副將 帶路 啦 。
滇馬 係 佢 養 嘅 ，佢 唔會 認錯 嘅 。
佢 吩咐 親兵 ，攞 兵器 嚟 ，畀 張勇 佢哋 三個 人 挑選 。
張勇 攞咗 一把 大刀 ，佢 話 ：
都統大人 年紀 雖然 係 輕 啊 ，但係 胸懷 真係 了不起 。
我 哋 係 喺 雲南 嚟 嘅 軍官 ， 而家 吳三桂 造反 ， 都統 大人 居然 對 我 哋 推心置腹 ， 一 啲 都 唔 疑心 啊 。
韋小寶 笑住 話 ：你 又 唔使 誇獎 我 。
我 而家 呢 係 落注 賭錢 ，所有 銀兩 買晒 一 飯 。
贏就大贏 ，既 捉到 吳應熊 又 交咗 你哋 三位 好朋友 。
輸就輸清光 ，至多 唔係 畀 你 一刀 斬咗 。
張勇 歡喜 到 乜嘢 噉 佢 話 ：
我哋 西涼 嘅 好漢 ，最 鐘意 結交 英雄 好漢 㗎 嘞 。
承蒙 韋都統 睇得起 ，我 張勇 呢一世人 ，為 你 賣命 。
講完 ，掟咗 把刀 喺 地 ，向 韋小寶 跪低 就 拜 。
王進寶 同 孫思克 跟住 跪低 叩頭 。
韋小寶 跳落馬 ，喺 大路 上 跪低 還禮 。
噉 四個人 拜完 喇 ，企 起身 ，相對 哈哈大笑 啊 。
韋小寶 話 ：趙總兵 ，你 都 請過嚟 大家 拜一拜 啦 。
今後 就 好似 結成咗 兄弟 噉 ，有福 同享 有難 同當 。
趙良棟 話 ：我 信唔過 呢個 王副將 ，等 佢 捉到 吳應熊 嘞 ，我 再 嚟 同 佢 結拜 啦 。
王進寶 嬲嘞 ：我 官階 雖然 係 低 ，不過 亦 係 條 好漢 ，好 稀罕 同 你 結拜 啊 ？
講完 跳翻 上馬 ，飛跑 向前 就 追蹤 而去 嘞 。
話説 一行人 向 東面 跑咗 十幾里 ，王進寶 啊 跳落 馬 ，仔細 睇下 路上 嘅 蹄印 同埋 馬屎 。
佢 皺住 眉頭 話 ：奇怪 ，奇怪嘞 。
張勇 連忙 問 佢 ：點啊 ，吓 ？
王進寶話 ：啲 馬屎 又 稀 又 爛 ，唔知 咩 緣故 呢 ？唔似 係 我哋 滇馬 嘅 馬屎 啊 。
韋小寶 一 聽 就 歡喜 嘞 ，哈哈 大笑 佢 話 ：
噉就啱喇 ，貨真價實 童叟無欺 ，呢啲啊 ，的的確確 係 吳應熊 嘅 馬隊 。
王進寶 沉吟 話 ：馬蹄印 係 冇錯 㗎 ，就係 馬屎 太過 奇怪 唧 。
唔奇怪 ，一啲 都 唔奇怪 。
滇馬 嚟到 北京 呢 水土 不服 ，一定要 屙 爛屎 ，總係 要 屙到 七八日 先至 好嘅 。
只要 馬屎 係 又 稀 又 爛 ，噉 一定 係 滇馬 喇 。
王進寶 睇咗 佢 一眼 ，見 佢 神情 神神秘秘 ，似 笑 非 笑 ，不由得 將信將疑 ，就 繼續 向前 追蹤 。
又 跑咗 一陣 ，見 馬蹄印 呢 屈 向 東南 。
張勇話 ：都統大人 ，吳應熊 要 逃跑 去 天津衛 ，由 塘沽 出海 啊 。
佢 喺 海邊 一定 預備咗 船隻 ，由 海路 去 廣西 ，再 轉 去 雲南 ，以免 喺 路上 畀 官兵 攔截 啊 。
冇錯 ，由 北京 去 昆明 十萬八千里 咁 遠 ，隨時隨刻 都 會 畀 官兵 攔住 ，仲 係 由 海路 去 平安 得多 嘞 。
我哋 要 快啲 追至 得 。
點解 呢 ？
由 京城 到 海邊 ，不過 係 幾百里 路 ，佢 不必 體恤 馬力 ，大可以 搏命 快跑 嘅 。
啱 ， 張大哥 料事如神 ， 果然 係 大將 之才 啊 。
張勇 聽 佢 改口 稱呼 自己 做 大哥 ，個心 啊 更加 歡喜 嘞 。
韋小寶 即時 傳令 ，命令 一隊 驍騎營 加急 奔馳 ，去 塘沽口 水師 傳令 封鎖 海口 ，所有 船隻 唔准 出海 。
一名 佐領 接咗 將令 就 帶兵 去咗 嘞 。
過咗冇幾耐 ，只見 路邊 有 隻 馬 死咗 ，係 滇馬 。
張勇 好高興噉 話 ：都統大人 ，王副將 追 呢條路 果然 冇錯 啊 。
王進寶 卻 係 愁眉苦面 ，神情 非常之 煩惱 。
韋小寶 話 ：王三哥 ，你 為咩事 唔開心 啊 ？
王進寶 個心 諗 ： 我 又 唔 係 排 第三 嘅 ， 點解 叫 我 做 三哥 呢 ？
就話 ：小將 養 呢啲 滇馬 ，每一匹 都係 千中選一 嘅 良駒 ，點解 又 屙 爛 屎 ，又 喺 路上 倒斃 呢 ？
就算 吳應熊 搏命 咁 催趕 啊 ，啲 馬匹 亦 唔 會 咁 論盡 㗎 。
哎呀 ，真係 可惜 ，真係 可惜 。
韋小寶 知道 佢 愛 馬 ，當然 就 唔敢 提 偷偷 喂 巴豆 嘅 事 嘞 ，佢 話 ：
吳應熊 呢個 嘢 啊 ，只係 顧住 逃命 ，跑死咗 咁多 好馬 ，嘥晒 王三哥 一片 心血 ，嘿 豈有此理 ，呢個 嘢 啊 ，都 唔係 人生 嘅 。
王進寶 話 ：都統大人 點解 叫 小將 做 王三哥 啊 ？真係 唔敢當 。
哦 ，噉嘅 ，張大哥 、趙二哥 、王三哥 、孫四哥 ，我 啊 睇 邊位 嘅 鬍鬚 白啲 呢 ，就算 佢 年紀 大啲 啦 。
原來 係 噉嘅 。
吳三桂 一家人 啊 冇 一個 係 好種 ，當兵 嘅 唔 愛 馬 ，總係 冇 好 下場 嘅 ，唉 。
行咗 幾里 路 ，又 見 三匹 馬 倒斃 喺 路邊 ，越 行 死 馬 就 越 多 。
張勇 忽然間 話 ：都統大人 ，吳應熊 嘅 馬 食 錯咗 嘢 ，跑唔逳 嘞 。
不過 要 提防 佢 落咗 馬趯 入 鄉村 躲避 噃 。
張大哥 睇 乜嘢 事 都 早一步 嘅 ，兄弟 佩服 之至 啊 。
韋小寶 即時 傳令 驍騎營 ，分開 包抄 上去 。
果然 再 追咗 幾里 路 ，北便 一 隊 驍騎 營 大聲 歡呼 話 ：
捉住咗 吳應熊 喇 ，捉住咗 吳應熊 喇 ！
嗱 各位 ，欲知 後事 如何 ，且 聽 下回 分解 。
