前 文 再續 啊 書 接上 一回 啊 。
話說 韋小寶 見 啲 王公大臣 ，都 主張 唔 撤藩 ，好心急 。
正喺 呢個 時候 ，康熙 話 ：
韋小寶 ，你 去過 雲南 ，你 講嚟 聽下 ，呢件事 應該 點 做好 呢 ？
皇帝 問到 就 唔怕 講 喇 ，佢 話 ：
皇上 明鑒 ，奴才 對 國家 大事 係 唔 識 嘅 。
只不過 吳三桂 對 奴才 講過 一句 説 話 ， 佢 話 ， 韋都統 ， 以後 有 咩 變故 呢 你 唔 使 擔心 ， 你 嘅 都統 職位 ， 只有 上升 唔 會 下降 嘅 。
奴才 就 唔明 喇 我 問 佢 ，以後 有 咩 變故 啊 噉 。
吳三桂 笑住 話 ：時候 到喇 ，你 自然 就 知道 㗎喇 。
皇上 ，吳三桂 係 想 造反 啊 。
呢件事 係 千真萬確 ，呢陣時 啊 ，怕 佢 龍袍 都 做好喇 。
仲有啊 ，佢 將 自己 比作 係 猛虎 ，將 皇上 比作 係 黃鶯 。
康熙 問 ： 咩 嘢 猛虎 啊 黃鶯 啊 ， 係 咩 意思 啊 ？
韋小寶 叩咗 幾個 頭 佢 話 ：
吳三桂 呢個 嘢 講咗 好多 大逆不道 嘅 説話 ，奴才 點 都 唔 敢 轉述 。
你 講 啦 ，係 佢 講 嘅 啫 嘛 又 唔係 你 講 嘅 。
係 。
吳三桂 呢 有 三件 寶貝 ，佢 話 呢 三件 寶貝 雖然 係 好 ，可惜 有 啲 美中不足 。
第一件 寶貝 呢 ，係 一塊 白鴿 蛋 咁 大 嘅 紅寶石 ，真係 雞血 咁 紅 㗎 。
佢 要 嚟 鑲 喺 頂帽 上 便 ，佢 話 ：寶石 啊 好 大 喇 ，可惜 頂帽 呢 細 過 頭 。
康熙 哼咗 一 聲 。
眾 大臣 啊 你 睇 我 我 睇 你 ， 都 諗 ：
寶石啊好大 ，可惜 頂帽 細過 頭 ，呢句 説話 言下之意 ，顯然 係 想 戴 頂 皇冠 嘞 。
韋小寶 又 話 ：佢 第二件 寶貝 呢 ，係 一張 白底黑紋 嘅 白老虎皮 。
奴才 喺 皇宮 裏 便服 侍 咗 皇上 咁 耐 ，不過 從來 都 冇 見過 噉樣 嘅 白老虎皮 嘅 。
吳三桂 話 ：呢種 白老虎 啊 ，幾百年 難得 見到 一次 㗎 。
當年 ，宋太祖 趙匡胤 打過 一隻 ，朱元璋 啊 打過 一隻 ，曹操 同 劉備 都 打過 。
噉啊吳三桂 將 白老虎皮 ，墊 喺 張 椅 上 便 佢 話 ：
白老虎皮 好 難得 ，可惜 張 椅 呢 太過 尋常 啊噉 。
康熙 岌一岌頭 ，個心 偷笑 嘞 。
知道 韋小寶 信口開河 誣陷 吳三桂 ，又 知道 佢 毫無 學問 ，以為 曹操 都 做過 皇帝 。
韋小寶話 ：第三件 寶貝 呢 ，係 一塊 大理石 屏風 ，啲 風景 啊 係 天然 生成 嘅 。
圖畫 裏 便 呢 ，有 隻 黃鶯 ，踎 喺 樖樹 上 便 ，樹 底 呢 ，有 隻 大 老虎 。
吳三桂 話 ，屏風 確係 珍貴 ，就 可惜 猛虎 喺 樹腳 ，黃鶯 就 踎 喺 高枝 上 便 唧噉 。
康熙話 ：佢 呢 三句 説話 ，不過 係 比喻 啫 ，未必 係 有心 造反 嘅 。
韋小寶 話 ：皇上 寬洪大量 ，愛惜 奴才 。
吳三桂啊 如果 有 三分 良心 ，就 知道 感恩圖報 噉 就好喇 。
可惜 佢 就係 會 向 朝中 嘅 王公大臣 送禮 ，呢位 就 黃金 一千 兩 ，嗰位 就 白銀 二萬 兩 ，出手 啊 闊綽 到 不得了 。
之 嗰 三件 寶貝 呢 ，就 唔 向 皇上 進貢 噃 。
康熙 笑住 話 ：我 又 唔 貪圖 佢 乜嘢 嘢 。
韋小寶 話 ：係啊 ，吳三桂 一味 向 朝廷 要 餉銀 ，請求 犒賞 ，攞到 銀喇 ，有 成 大半 留 喺 北京 ，要嚟 送 畀 文武百官 。
噉 奴才 對 佢 話 啦 ，王爺 ，你 送 金銀 畀 當朝 嗰啲 大官 ，出手 呢 實在 闊綽 過頭 喇 ，我 都 戥 你 肉赤 啊 噉 。
吳三桂啊笑住話 ：小兄弟 ，呢啲 金銀 呢 ，不過 係 暫時 寄存 喺 佢哋 屋企 嘅 啫 ；
等 佢哋 個個 幫 我 講 好話 ，過得 幾年 呀 ，佢哋 就 會 乖乖噉 加埋 利錢 ，連 本 帶 利 還翻 畀 我 個 喇 。
奴才 噉 就 唔 明白 啦 我 問 佢 ：
王爺啊 ，財物 到咗 人哋 手裏 便 ，點解 仲 會 還翻 畀 你 嘅 啫 ？
呢啲 係 你 心甘情願 送畀 佢哋 嘅 ，又唔係 人哋 問 你 借 嘅 ，噉 點解 仲 會 有 利錢 㗎 ？
吳三桂 就 哈哈大笑 ，拍下 我 膊頭 ，攞咗 個 綢緞袋仔 畀 我 ，佢 話 ：
小兄弟 ，呢啲 係 小王 送畀 你 嘅 一啲 小意思 ，希望 你 喺 皇上 面前 ，多啲 幫 我 講 幾句 好話 。
皇上 如果 要 撤藩 ，你 務必 話 ，千祈 唔好 撤 啊噉 。
你 放心 啦 ，呢啲 嘢 啊 ，我 將來 唔會 問 你 攞翻 嘅 。
韋小寶 一面 講 ，一便 喺 衫袋 裏 便 ，攞出 個 綢緞 袋仔 出嚟 ，揸住 喺 手 高高 噉 舉起 。
噉啊 人人 都 見到 袋 上面 繡住 平西王府 四個 紅字 。
佢 護 低 身 ， 打開 袋口 ， 將個 袋 一 倒轉 ， 只 聽見 叮叮噹噹 ， 珍珠 啊 寶石 啊 翡翠 啊 美玉 啊 ， 幾十件 珍品 啊 倒 喺 金殿 上 便 ， 珠光寶氣 啊 耀眼 生花 。
呢啲珠寶 ，有啲 確係 吳三桂 送 嘅 ，有啲 呢 ，係 韋小寶 喺 人哋 嗰處 攞翻嚟 嘅 賄賂 ，而家 撈埋一齊 ，大家 點 分得出 啦 ？
康熙 微笑 話 ：你 去咗 雲南 一趟 ，確係 大有所獲 噃 。
韋小寶 話 ：呢啲 珍珠 寶貝 奴才 係 唔 敢 要 㗎 ，請 皇上 要嚟 賞畀 人哋 啦 。
係 吳三桂 送畀 你 嘅 ，我 又 點 能夠 攞嚟 畀 人哋 嘅 呢 ？
吳三桂 送畀 奴才 ，係 要 我 喺 皇上 面前 車 大炮 ，幫 佢 講 好話 ，話 千祈 唔能夠 撤藩 。
奴才 對 皇上 忠心耿耿 ，唔能夠 貪圖 一啲 金銀財寶 ，將 反賊 講成 係 忠臣 㗎 。
但係噉樣一嚟呢 ，收咗 吳三桂 嘅 嘢 ，有啲 對佢 唔住 噉 。
誒 橫掂 普天下 嘅 金銀珠寶 ，都 係 皇上 嘅 嘢 嚟 嘅 。
皇上 賞畀 邊個 係 皇上 嘅 恩德 ，唔使 吳三桂 攞嚟 做好人 收買 人心 吖 。
哈哈哈哈哈哈 ，你 對 朕 都 好 忠心 ，噉啦 ，呢啲 珍珠寶貝 ，算係 我 再 賞畀 你 㗎 啦 。
講完 ，康熙 又 喺 衫袋 攞 咗 個 西洋 彈簧 金錶 出嚟 ，佢 話 ：
另外 ，再 賞 一件 西洋 寶貝 畀 你 。
韋小寶 連忙 跪低 叩頭 ，行 前 幾步 ，雙手 接咗 金錶 。
佢 君臣 兩個人 噉樣 一番 做作 ，班 大臣 都 係 善 觀 氣息 嘅 人 ，邊度 話 唔 明白 康熙 嘅 心意 呢 ？
嗰班 大臣 都 收過 吳三桂 嘅 賄賂 ，最近 呢一批 啊 ，仲 係 韋小寶 轉交 嘅 。
佢哋 諗 ：自己 如果 仲唔識相 ，韋小寶 將 吳三桂 送過 幾多 禮 畀 佢哋 ，當朝 講晒 出嚟 ；
皇上 嬲 起上嚟 ，以 交通 外藩 圖謀 不軌 嘅 罪名 論處 ，嘿 ，唔 殺頭 啊 都 要 充軍 啊 。
韋小寶 誣陷 吳三桂 嘅 説話 ，極之 幼稚 可笑 。
吳三桂 就算 真係 有 造反 嘅 心 啊 ，亦 決 唔會 喺 皇帝 派 去 嘅 欽差 面前 透露 嘅 。
又 講 咩 送咗 畀 朝上 大臣 嘅 金銀 ，將來 要 連本帶利 收回 ，至於 暗示 日後 造反 成功 ，做咗 皇帝 嘞 ，要 向 各 大臣 攞翻 金銀 。
呢啲 明明 係 從未見過 世面 嘅 細佬哥 想法 。
吳三桂 呢 種 老謀深算 嘅 人 ，點會 斤斤計較 送咗 幾多 金銀 啦 ？
但 係 明知 韋小寶 嘅 説 話 不堪 一駁 啊 ， 不過 佢 有 皇帝 撐腰 ， 又 有 邊個 敢 自討苦吃 ， 出口 辯駁 呢 ？
明珠 嘅 腦筋 係 最快 嘞 ，即刻 就 話 ：
韋都統 ，少年 英才 ，見事明白 ，對 皇上 赤膽忠心 ，深入 吳三桂 嘅 虎穴 ，探聽到 事情 真相 ，真係 令人 非常 佩服 啊 。
如果 唔係 皇上 洞燭 機先 ，派遣 韋都統 親自 去 查探 ，我哋 喺 北京 辦事 嘅 ，又 邊處 知道 吳三桂 呢個 傢伙 深蒙 國恩 ，竟然 會 心存 作反 㗎 ？
明珠 呢 幾句 説話 ，既 捧咗 康熙 同 韋小寶 ，又 為 自己 同 滿朝 同僚 輕輕 開脱 ，跟住 呢 ，再 坐實 咗 吳三桂 嘅 罪名 。
太和殿 上 人人 都 覺得 呢幾句 説話 非常 啱聽 。
眾大臣 本來 都 惴惴不安 嘅 ，而家 呢 ，不由得 松翻啖氣 嘞 。
康親王 同 索額圖 本來 同 韋小寶 係 好 朋友 ，而家 當然 係 會意 啦 ，即刻 就 落井下石 ，大講特講 吳三桂 嘅 錯處 。
噉眾大臣啊 你 一句 我 一句 ，都 話 應該 撤藩 。
有啲 仲 痛責 自己 糊塗 啊 ，幸蒙 皇上 開導 指點 ，噉 先至 好似 撥開 雲霧 見 青天 咋 。
有啲 係 直情 獻計 嘞 ，話 點樣 撤藩 ，點樣 將 吳三桂 捉嚟 京師 ，又 點樣 去 抄 佢 嘅 家 噉 。
吳三桂 富 可 敵 國 噃 ，一 講到 抄 佢 個 家 啊 ，人人 都 覺得 係 個 大大 嘅 優差 ，但係 轉念 一 諗 ，嗯 又 覺得 呢件事 啊 ，好 難搞 嘅 。
吳三桂 一 反面 ，你 都 仲 未 抄到 佢 嘅 家 啊 ，佢 就 斬咗 你 嘅 人頭 先 喇 。
康熙 等 人人 都 講過 喇 ， 就 話 ：
吳三桂 雖然 有 不軌之心 ，但係 反狀 未 露 ，今日 喺 呢處 講過 嘅 説話 ，邊個 都 唔 准 漏 一句 出去 。
要畀佢 一個 改過自新嘅 機會 。
眾大臣 一齊 頌揚 皇恩 浩蕩 ，寬仁 慈厚 。
康熙 喺 身邊 攞出 一 張 黃紙 ，佢 話 ：
呢一道 上諭 你哋 睇下 有 咩 唔妥當 嘅 。
原來 呢 一道 乃係 批准 吳三桂 請求 撤藩 嘅 上諭 ，甚至 話 喺 北京 ，都 同 吳三桂 準備 好住處 喇 ，一到 就 有 地方 住 噉 。
班 大臣 睇完 ，都 大讚 皇恩浩蕩 ，話 吳三桂 如果 稍 有人性 啊 ，真係 慚愧 到 死咯 。
康熙話 ：最好 吳三桂 能夠 奉命 歸朝 ，噉 百姓 呢 就 免咗 一場 刀兵之災 。
朕嘅 意思 ，係 要 派 兩個 能説會道 嘅 人 去 雲南 宣諭 朕意 。
眾大臣 聽 皇帝 噉樣 講 ，都 望住 韋小寶 。
韋小寶 畀 大家 睇到 慌 ，佢 諗 ：
喂喂 喂喂 ， 你 哋 睇 咩 啊 ， 睇 咩 啊 ？
呢件事 唔係 講 玩 㗎噃 。
上次 送 新娘 去 ，仲 爭啲 冇命 ，呢次 要 撤藩 啊 ，吳三桂 仲 有 話 唔 殺 欽差 大臣 嘅 咩 ？
明珠 見到 韋小寶 面如土色 ，知道 佢 唔敢 去 喇 就 話 ：
皇上 明鑒 ，以 能説會道 而言 ，本來 都統 韋小寶 極之 能幹 。
不過 韋都統 為 人 嫉惡如仇 ， 知道 吳三桂 對 皇上 不 敬 ， 恨之入骨 ， 多數 一 見面 呢 ， 就 會 申斥 吳三桂 ， 噉 就 會 壞事 喇 。
奴才 愚見 ，不如 派 禮部 侍郎 折爾肯 、翰林院 學士 達爾禮 兩個人 去 雲南 ，宣示 上諭 。
呢 兩個 人 文質彬彬 ，頗 具 雅望 ，或者 能夠 感化 頑惡 亦 未可知 。
康熙 一聽 ，覺得 好啱心意 ，即刻 口諭 折爾肯 、達爾禮 兩個人 前往 宣旨 。
眾大臣 見到 皇帝 撤藩 嘅 意思 早就 決定 㗎 嘞 ，連 上諭 都 寫定 帶 喺 身邊 ，都 好 後悔 啱先 幫 吳三桂 講咗 好話 。
呢 陣時 呀 ， 人人 都 改口 啊 ， 講 咗 好多 吳三桂 無中生有 嘅 罪狀 ， 真 係 大奸 大惡 ， 罪 不可 赦 啊 。
康熙 岌一岌頭 ，佢 話 ：
吳三桂 雖然 係 壞 ，亦 不至於 噉樣 ，大家 實事求是 ，小心 辦事 啦 。
講完 ，企起身 ，向 韋小寶 擪一擪手 ，噉啊 帶埋佢 行去 後殿 。
話説 韋小寶 跟住 皇帝 身後 一直 行 ，嚟到 御花園 裏 便 。
康熙 笑住 話 ：小桂子 你 真係 叻 㗎 。
如果唔係 你 攞咗 嗰袋 珍珠寶貝 出嚟 倒 喺 地下 ，佢 阿爺 吖 嗰班 老嘢 啊 ，仲 喺度 幫 吳三桂 講 好話 呢 。
韋小寶 話 ： 其實 皇上 只要 講 一聲 ， 仲 係 撤藩 好 ， 噉 大家 仲 唔 係 個個 都 話 ， 果然 係 撤藩 好 啊 噉 。
不過 呢 ，要 佢哋 自己 講出嚟 ，就 比較 有趣啲 。
班老嘢 做事 力求 穩當 ，佢哋 諗 嘅 ，亦 唔 能夠 話 冚𠾴唥 都 錯晒 。
不過噉樣 一嚟 ，吳三桂 想 幾時 逳手 ，就 幾時 逳手嘞 ，一切 冚𠾴唥 由 佢 嚟 揸 主意 ，對於 我哋 就 好 不利 。
我哋 先 撤咗 佢 嘅 藩 ，就 可以 打亂 佢 嘅 腳步 。
係咯 ，就好似 賭牌九 噉啫嘛 ，邊度 會話 由得 吳三桂 一路 做莊 個啫 ？
皇上 都 要 擲 翻 幾 下 骰仔 做 莊 㗎 嘛 。
你呢個 比喻 呢就 啱嘞 ，唔能夠 一味 等佢 做莊 。
小桂子 ，我哋 呢手 骰仔 係 擲咗 落去 嘞 ，但係 吳三桂 呢個 嘢 真係 好 難 鬥 㗎 。
佢 部下 啲 大將 、兵卒 ，都 係 身經百戰 好 厲害 㗎 。
佢 一起 兵 造反 ，如果 普天下 嘅 漢人 都 響應 佢 噉 就 弊傢伙 嘞 。
韋小寶 近年來 去過 唔少 地方 ，聽到 漢人 咒罵 清廷 嘅 説話 果然 係 唔少 。
漢人 人數 眾多 啊 ，一百個 漢人 裏 便 ，都 怕 冇 一個 滿洲人 。
如果 天下 漢人 都 造起 反 上嚟 ，滿洲人 無論 如何 係 抵擋 唔住 嘅 。
不過 咒罵 清廷 嘅 人 雖然 多 ，痛恨 吳三桂 嘅 人 呢 就 更多 嘞 。
佢 諗到 呢一層 就 話 ：皇上 望安 ，普天下 嘅 漢人 ，冇 一個 係 歡喜 吳三桂 呢個 嘢 嘅 。
佢 要 造反 啊 ，除咗 佢 自己 嘅 親信 之外 啦 ，唔會 有 咩 人 捧 佢 場 嘅 。
康熙 岌一岌頭 ，佢 話 ：呢層 我 都 想到 。
前 明 桂 王 趯咗 去 緬甸 ，係 吳 三桂 派 人 捉 佢 返嚟 殺咗 嘅 。
吳三桂 要 造反 ，只能 話 係 興漢 反滿 ，就 唔能夠 話 係 反清 復明 。
嗯 ，前明崇禎皇帝 係 邊日 死㗎 ？
嗯 ， 嗯 奴才 嗰 陣 時 仲 未 出世 ， 都 唔 係 ， 唔 係 幾 清楚 喇 。
哈哈哈哈哈哈 ，我 真係 問道 於 盲 喇 ，嗰陣時 我 都 未 出世 。
係喇 ，到 佢 忌辰 嗰日 ，我 派 幾名 親王 貝勒 ，去 崇禎 墳墓 拜祭 一番 ，等 天下 百姓 都 感激 我 ，痛恨 吳三桂 。
皇上 神機妙算 啊 ，但係 如果 崇禎 皇帝 嘅 忌辰 仲有 好耐 先至 係 ，吳三桂 又 造反 先 呢 ？
康熙 踱咗 幾步 微微 笑話 ：
呢一排 ，你 奉旨 辦事 ，都 捱咗 唔少 苦喇 。
五台山 、雲南 、神龍島 、遼東 ，收尾 啊 連 羅薩國 都 去埋 。
我 呢次 ，派 你 去 笪 好 地方 ，調劑 一下 。
天下 最好 個 地方 ，就 喺 皇上 身邊 㗎 嘞 。
只要 聽到 皇上 講 一句 説話 ，見到 皇上 一眼 ，我 就 周身 有力 ，個 心 啊 ，真係 講唔出 咁 舒服 啊 。
啊 皇上 ，我 講 嘅 係 千真萬確 㗎 ，唔係 托 你 大腳 啊 。
康熙 岌一岌頭 話 ：係 ，呢啲 係 實情 。
我 同 你 君臣 投機 ，亦係 緣分 。
我同 你 係 自細 打交 打出 嚟 嘅 交情 ， 同 第 啲 唔 同 ， 我 見到 你 ， 個心 亦 係 好 高興 。
小桂子 ， 嗰 半年 裏頭 得 唔 到 你 嘅 消息 ， 以為 你 喺 大海 浸死 咗 ， 我 一直 啊 都 好 後悔 ， 唔 應該 派 你 去 冒險 ， 我 真 係 好 傷心 難過 啊 。
韋小寶 心情 激動 佢 話 ： 但願 ， 但願 我 能夠 一世 服侍 你 。
講完 把 聲 都有 啲 哽噎 嘞 。
康熙話 ：好 ，我 做 六十年 皇帝 ，你 就 做 六十年 大官 ，我哋 君臣 兩個 有 恩 有 義 ，有始有終 。
皇帝 對 臣子 講到 噉樣 ，真係 難得到 極嘞 。
一來 ， 康熙 係 年輕 ， 説 話 爽直 ； 二來 ， 佢 同 韋小寶 喺 總角之交 ， 互相 真誠 。
韋小寶 話 ：你 做 一百年 皇帝 ，我 啊 同 你 做 一百年 嘢 ，做唔做 大官 我 唔 在乎 㗎 。
做 六十年 皇帝 仲 唔夠 啊 ？哈哈哈 ，一個人 唔能夠 太過 唔知足 喇 。
小桂子 ，呢次 我 派 你 去 揚州 ，等 你 衣錦 還鄉 。
韋小寶 聽見 去 揚州 三個 字 個 心 啊 乒乓 噉 一跳 ，佢 問 ：咩 叫 衣錦還鄉 啊 ？
你 喺 京城 做咗 大官 ，返去 故鄉 見 下 啲 親戚 朋友 ，出 下 風頭 ，等 大家 羨慕 你 噉 幾 好 啊 。
你 叫 手下 啲 人 幫 你 寫 道奏章 ，你 個 父親 母親 ，朝廷 都 可以 畀 佢哋 誥命 ，等 佢哋 威 下 。
係 ，多謝 皇上 恩典 。
康熙 見 佢 嘅 神情 有啲 尷尬 就 問 ：咦 ？你 唔 歡喜 啊 ？
我 好 歡喜 ，不過 ，嗯 不過 我 都 唔 知道 自己 親生 阿爹 係 邊個 。
康熙 窒咗 一窒 ，想到 自己 父親 喺 五台山 出家 ，同佢 都有 啲 同病相憐 。
就 拍下 佢 膊頭 話 ：你 去到 揚州 ，就 慢慢 搵下 ，上天 或者 可憐 你 ，能夠 令 你 父子 團圓 嘅 。
小桂子 ，你 去 揚州 呢 趟 差 就 容易 辦 喇 。
我 派 你 去 做 一座 忠烈祠 。
韋小寶 撓撓 頭 話 ：種 紅柿 啊 ？
皇上 ，乜 你 想 食 紅柿 咩 ？我 而家 同 你 出去 街 買 啦 。
啲 大蓋柿 啊 好好食 㗎 ，唔使 去 揚州 種 吖 。
康熙 哈哈 大笑話 ：哈哈哈哈 你 阿爺 吖 ，小桂子 就係 冇 學問 。
我話 係 忠烈祠 ，你 聽成 係 種 紅柿 。
忠烈祠 係 一座 祠堂 ，供奉 忠臣 烈士 嘅 。
哈哈 ，哎奴才 真係 笨 嘞 ，原來 係 叫 我 起 一座 關帝廟 啲 噉嘢 。
冇錯喇 ，清兵 進關 之後 ，喺 揚州 、嘉定 殺咗 好多人 ，以致 有 咩嘢 揚州十日 、嘉定三屠 呢啲 講法 。
想到 呢啲 事 ，我 個 心 總係 好 唔 安樂 啊 。
當時啊的確殺得好慘啊 。
揚州 到處 都係 死屍 ，隔咗 十幾年 喇 ，啲 井 啊 、河流 啊 ，仲 時時 見到 死人 骷髏頭 。
不過 嗰陣時 呢 ，我 仲 未 出世 ，你 都 未 出世 ，噉 啊 怪唔到 我哋 嘅 。
説話雖然 係 噉 講 ，不過 係 我 祖宗 嘅 事 ，亦即係 我 嘅 事 。
當時 有 個 史可法 ，你 有冇 聽講過 啊 ？
聽過 ，史閣部 史大人 死守 揚州 ，佢 係 一位 大忠臣 吖嘛 。
我哋 揚州 嘅 老人家 講起 佢 啊 ，都 會 流眼淚 㗎 。
我哋 間 院子 裏 便 供奉 咗 個牌位 ，寫住 九紋龍 史進 之 靈位 ，初一 十五 ，大家 都 向 呢 個牌位 叩頭 。
我 聽 人哋 講 啊 ，其實 就係 史閣部 ，不過 瞞住 官府 就係 喇 。
忠臣 烈士 ，遺愛 自 在人心 。
原來啲 百姓 供奉 九紋龍 史進 嘅 靈位 ，焚香 跪拜 ，其實 ，係 紀念 史可法 嘅 。
係喇 ，小桂子 ，你 屋企 嗰個 係 咩 院子 啊 ？
韋小寶 塊 面 一 紅 ，佢 話 ：
皇上 ，呢件事 講起嚟 就 唔係 點 好聽 。
我哋 屋企 開咗 一 間 老舉寨 ，叫做 麗春院 ，喺 揚州 算 係 數一數二 嘅 大妓院 喇 。
康熙 微微 一笑 佢 諗 ：
你 一口 街市仔 嗰啲 粗言爛語 ，早就 知道 你 一定 唔係 出身 於 書香世家 㗎 嘞 。
不過 你 個 嘢 對 我 確係 好 忠心 ，連 噉樣 嘅 醜事 亦 唔 瞞 我 。
其實 話 開 妓院 啊噉 ，韋小寶 ，已經 喺 處 車 大炮 。
佢 母親 不過 係 個 妓女 而已 唧 ，邊處 係 咩 妓院 老闆 啦 ？
嗱 各位 ，欲知 後事 如何 ，且 聽 下回 分解 。
