前文 再續 啊 書 接 上 一回 啊 。
話說 韋小寶 率領 水師 ，離開 大沽 嚟到 海上 。
到咗而家 ，韋小寶 先至 宣示 聖旨 ，話 呢次 ，係 去 剿滅 神龍島 ，上下 官兵 務須 用命 ，成功之後 各有 升賞 。
眾官兵 啊 眼見 自己 方面 人多勢眾 ，欽差大臣 ，又 帶咗 十門 西洋 大炮 ，而 神龍島 呢 ，不過 係 一群 海盜 盤踞 嘅 地方 。
大炮 揈得 幾炮 ，啲 海盜 仲 唔 打到 清光 咩 ？呢次 立功 升官 係 一定 㗎 嘞 。
於是 人人 歡呼 就 精神百倍 。
韋小寶 坐喺 主艦 上便 ，想起 上次 去 神龍島 係 畀 方怡 呃 去 嘅 。
呢個 姑娘 雖然 係 狡猾 ，但係 嗰 幾日 喺 海上 一齊 相處 嘅 温柔 滋味 ，呢個時候 諗起 上嚟 啊 ，仲係 非常 神往 ，佢 諗 ：
一到島邊 如果 大炮 亂轟 ，將 神龍教 嘅 教眾 轟死 大半 先 ，然後 幾千名 官兵 一擁而上 ，噉啊 洪教主 武功 再高 佢 都 頂唔住 嘅 。
不過噉樣一嚟 ，講唔定 將 我嗰個 方怡 一炮 揈死咗 就 認真 唔妥 噃 。
就算唔死啊 ，揈鬼咗佢一隻手 ，噉啊夠可惜㗎啦 。
所以 佢 又 想 保住 方怡 冇事 ，又 要 滅 咗 神龍教 兩全其美 。
於是就叫 施瑯 嚟 ，問 佢 進攻 神龍島 嘅 計策 。
施瑯 打開 卷宗 ，攞出 一張 大地圖 攤 喺 枱 上 ，指住 海 裏頭 一個 小島 話 ：呢個 係 神龍島 嘞 。
韋小寶 見到 神龍島 上面 已經 畫咗 個 圓圈 ，紅色 嘅 ，三個 紅色 箭頭 ，由 北 、東 、南 三 方面 指向 紅圈 ，佢 不禁 大為 佩服 喇 就 話 ：
原來 你 早就 想好咗 攻打 神龍島 嘅 計策 嘅 。
我 係 離開 咗 大沽 之後 先至 頒布 皇上 嘅 密旨 嘅 ， 乜 點解 你 早就 預備 好 地圖 個 呢 ？
施瑯話 ：卑職 聽講 大人 ，係 要 由 大沽 經 海路 去 遼東 嘅 ，所以 預備咗 呢一帶 嘅 海圖 。
卑職 一向 喜歡 海上 生涯 ，海圖 一直 係 睇慣 咗 嘅 。
哦 ，原來 噉嘅 ，睇嚟 我哋 呢一戰 必定 係 旗開得勝 ，船到 成功 喇 。
呢啲 係 托賴 皇上 嘅 聖德 ，韋大人 嘅 威望 。
依卑職嘅淺見 ，我哋 分兵 三路 ，由 島北 、島東 、島南 三路 進攻 ，留翻 島西 呢 一路 唔攻 。
噉 轟 咗 輪 大炮 之後 ， 島上 嘅 匪徒 抵擋 唔 住 嘞 ， 多數 會由島 西 落海 逃走 嘅 。
我哋 喺 島西 三十 里 之外 呢個 小島 嘅 背後 ，埋伏 定 二十 隻 戰船 。
一等匪徒 趯到嚟嘞 ，呢 二十 隻 戰船 湧出嚟 攔住 去路 ，大炮 一響 ，北 、東 、南 三路 戰船 跟住 圍上嚟 ，將 海盜 嘅 船隻 圍喺 中間 。
嗰陣時 一網打盡 ，冇 一個 海盜 能夠 走得甩 喇 。
韋小寶 拍掌 叫好 ，猛稱 妙計 。
施瑯 話 ：請 大人 率領 中軍 ，喺 呢個 無名 小島 上面 坐鎮 督戰 ，務請 唔好 上船 出戰 喇 。
中軍 之 地 必須 穩如泰山 ，統帥 嘅 旗艦 ，如果 有 稍微 損傷 ，好似 畀 大風 吹 斷 咗 桅杆 啊噉 ，不免 動搖 軍心 嘞 。
卑職 統率 戰船 ，三路 進攻 。
黃 總兵 統率 伏兵 攔截 。
十隻 小艇 來回 報告 軍情 ，點樣 行動 請 大人 隨時 發號施令 ，以便 卑職 同 黃 總兵 遵行 啊 。
韋小寶 非常 歡喜 佢 諗 ：
你呢個人 真係 精 ，明知 我 怕死 ，就 叫 我 喺 呢個 三十里 之外 嘅 小島 上面 坐鎮 ，嘿 真係 認真 萬無一失 喇 。
就算 你哋 全軍覆滅 啊 ，老子 都 仲 嚟得切 上船 溜之乎也 ，吖 妙計 ，妙計 ！
就 大讚 佢 一番 。
施瑯話 ：卑職 久仰 韋大人 嘅 威名 ，得知 韋大人 當年 親手 殺死 滿洲 第一 勇士 鰲拜 ，將 滿漢 第一 勇士 嘅 名號 搶咗 過嚟 ，因此 欽賜 巴圖魯 勇號 ，武勇 天下 揚名 啊 。
不過 卑職 只係 擔心 一件事 ，就係 怕 大人 要 上報 天恩 ，打仗 嘅 時候 奮不顧身 ，如果 畀 炮火 損傷 咗 大人 一隻 手指尾 ，噉 皇上 必定 係 大大 怪罪 。
噉 卑職 呢 一生 嘅 前程 ， 就 從此 𢰸 晒 喇 ， 但 係 噉 都 唔 緊要 ， 至 緊要 嘅 係 辜負 咗 大人 提拔 重用 嘅 知遇 大恩 ， 卑職 真 係 萬 死 莫 贖 。
因此 ，務請 大人 體諒 ，保重 萬金之體 啊 。
韋小寶 歎咗 口氣 話 ：
唉 ，坐船 打仗 ，好好玩 㗎 嘛 。
我啊 本來 想 親自 衝鋒 ，將 神龍教 嘅 教主 捉住 嘅 。
你既然噉樣講 ，噉誒 ，唯有等你去做啦 。
施瑯 話 ：係 ，大人 體諒 下 情 ，卑職 感激不盡 啊 。
韋小寶 個 心 諗 ：你 喺 北京 熬咗 三 年 ，已經 精通 做官 嘅 竅門 嘞 。
老子 本來 想 做低 你 嘅 ，睇 你 咁 識做 ，真係 有啲 唔忍心 喇 。
滿漢 第一 勇士 呢個 銜頭 今日 係 第一次 聽見 唧 ，哈哈 難為 你 想得出 。
韋小寶 話 ：神龍島 上 便 啊 ，有 幾百 名 姑娘仔 。
其中 有 幾個 係 由 皇宮 逃跑 去 嘅 ，皇上 吩咐 ，務必要 生擒活捉 。
攻島 個 時候 要 小心 在意 至得 ，大炮 呢 就 唔好 亂放 。
如果 揈死咗 嗰 幾名 宮女 ，皇上 必定 怪罪 嘅 ，你 功勞 再 大 都 好 ，亦 係 功不抵過 。
呢件 係 第一件 大事 嚟 啊 ，一定要 記住 啊 。
施瑯 吃咗 一驚 話 ：
如果 唔係 大人 關照 ，卑職 爭啲 闖咗 大禍 喇 。
呢次 攻島 ，只要 係 女人 ，就 只能夠 活捉 ，唔能夠 殺傷 ，總之 冚𠾴 唥 捉翻嚟 ，由 大人 發落 就係 嘞 。
噉就啱喇 。
呢幾名 宮女 我 係 見過 嘅 ，一見 就 認得出 。
不過 呢種 皇宮 裏 便 嘅 事 呢 ， 啊 ， 啊 你 係 知道 㗎 啦 。
係 ，大人 望安 ，卑職 守口如瓶 。
宮裏 便 嘅 事情 ， 邊度 敢 隨口 亂講 啊 ？
噉眾戰船 向 東北 進發 ，噉啊啱啱 遇到 額風 ，行得 好慢 。
呢一日 ，神龍島 已經 唔 遠 嘞 ，施瑯 指住 左舷 前方 一座 小島 話 ：
嗰座 小島 ，就係 都統 大人 嘅 大營 駐扎 嘅 地方 。
呢座 小島 一向 都 冇 名稱 嘅 ，請 大人 賜 個 名 啦 。
韋小寶 撓 下 個 頭殼 ，佢 話 ：哎呀 要 我 想 個 名 啊 真係 攞 我 條 命 好過 喇 。
誒噉啦 ，我哋 推牌九 ，噉 總係 要 將 神龍島 食到 一乾二淨 啦 。
呢個 小島 ，就 叫做 通食島 啦 。
施瑯 笑住 話 ：妙極妙極 ！
韋大人 坐鎮 通食島 ，真係 大吉大利 ，無論 敵軍 幾 咁 頑強 厲害 ，總係 要 食 清 佢 嘅 。
大人 前 關係 一對 天牌 ， 嗰 個 係 大人 自己 嘞 ， 後 關係 至尊 ， 噉 梗 係 皇上 啦 。
呢 兩 副 牌 攤 出去 ，有 乜 法子 唔 通 食 呢 ？
韋小寶 哈哈大笑啊 ，佢 喝 一 聲 ：誇啦啦 ，兵 發 通食島 而去啊 ！
呢句説話 ，係 佢 睇戲 嘅 時候 學翻嚟 嘅 ，而家 唱出嚟 ，真係 威風凜凜 ，意氣風發 之至 啊 。
噉幾十隻戰船 ，前後 擁衛 主帥 旗艦 ，慢慢 向住 通食島 駛去 。
忽然 一 隻 小船 上 嘅 兵士 嗌 起 上嚟 ，過 咗 冇 幾 耐 ，小船 駛 近嚟 稟報 ，話 海上 發現 一 具 浮屍 。
韋小寶 眉頭 一皺 個 心 諗 ：出師 不利 撞見 浮屍 。
唔通 我 做 呢個 莊 要 通賠 ？
施瑯話 ：恭喜 大人 旗開得勝 ，仲未曾 開炮 放箭 ，敵人 已經 死咗 一名 先 嘞 ，真係 大大 嘅 吉兆 。
卑職 過去 睇 下 。
講完 ，就 跳落 小船 嘞 。
過咗一陣 ，施瑯 返上 旗艦 佢 話 ：
啟稟 都統 大人 ，呢具 浮屍 手腳 反綁 ，似乎 係 海盜 謀財害命 ，推人 落 海 嘅 。
啱啱 講到 呢度 ，小船 上 便 又 叫起嚟 ，話 又 發現 兩具 浮屍 。
韋小寶 面色 好 難睇 啊 ，呢陣時 ，施瑯 亦 講唔出 咩 好意頭 嘅 説話 嘞 ，噉 又 再 跳落 小船 去 睇 。
返嚟 旗艦 嘅 時候 ，卻係 笑容滿面 噃 佢 話 ：
回大人 ，呢 三具 浮屍 ，睇嚟 係 神龍島 嘅 。
韋小寶 問 ：你 點 知道 呢 ？
第一具屍首 仲 睇唔出 咩嘢 ，收尾 呢 兩具屍體 ，顯然 都係 海盜 嚟 ，佢哋 身子 壯健 ，一定 係 識 武功 嘅 人 啊 。
唔通 係 神龍島 起 內訌 ？
啲 風 喺 神龍島 吹過嚟 ，呢 三 具 浮屍 ，多數 係 順風 飄嚟 嘅 。
如果係 敵人 起 內訌 ，韋大人 呢個 莊 啊 ，就 好似 係 食紅燒豆腐 噉 ，咬 都 唔 使 咬 ，一啖 就 食晒 喇 。
韋小寶 手搭 涼棚 望開去 ，只見 海上 水汽 蒸騰 ，白霧 瀰漫 ，望唔見 神龍島 。
忽然間 ，覺得 海面上 有 個 皮球 噉嘅 嘢 ，載浮載沉 ，漸漸 飄過嚟 ，佢 就 問 ：
哎 ， 嗰 啲 係 咩 嘢 啊 ？
施瑯 睇咗 一陣 就 話 ：呢嚿嘢 有啲 古怪 嘞 。
就 傳令 落去 ，吩咐 小船 駛過去 撈起 嗰 嚿 嘢 。
一隻 小船 接到 命令 就 駛過去 撈起 佢 ，船上 嘅 軍官 大聲 噉 叫 ：又係 一具 浮屍 ，係 個 矮肥佬 啊 ！
韋小寶 心中 一動 ：唔通 係 佢 ？
韋小寶 話 ：抬 上嚟 等 我 睇下 。
三名 水兵 將 嗰具 浮屍 啊 抬 上 旗艦 ，放 喺 甲板 上便 。
呢個 矮肥佬 手腳 都 畀 牛皮 綁住 咗 ，韋小寶 一 睇 ，果然 就係 瘦頭陀 。
佢 本來 就 已經 極之 肥 㗎 嘞 ，呢個 時候 飲 飽咗 水 ，個 肚 啊 漲 到 高高 ，十足十 個 大 皮球 。
只見啲 海水 喺 個 口處 不斷 咁 流出嚟 ，過咗 一陣 ，佢 個 肚腩 一起一伏 ，呼吸 起嚟 嘞 。
眾官兵 話 ：浮屍 翻生 啊 ！
施瑯 扚起 瘦頭陀 ，將 佢 後腰 放 喺 船頭 嘅 鏈墩 上 便 ，個 頭 一 低 ，口裏 便 嘅 海水 流得 更加 快 嘞 。
過咗 一陣 ，瘦頭陀 突然 一彈而起 ，鬧咗 一聲 ：死人頭 你 嘩 ！
跌翻 落嚟 嘅 時候 ，坐 喺 船頭 。
眾官兵 嚇咗 一跳 ，跟住 就 哈哈大笑 。
瘦頭陀 雙手 出力 一擢 ，但係 牛皮 索 浸濕 咗 水 就 更加 堅韌 ，邊度 擢得 斷 呢 ？
佢 擰擰頭 ，雙眼 迷迷濛濛 佢 問 ：
喂 ，呢度 係 龍宮 吖 ，定係 陰間 啊 ？
韋小寶 笑住 話 ：呢度 係 龍宮 ，我 就係 海龍王 。
眾官兵 又 試 笑起 上嚟 。
瘦頭陀 擘大 雙蒙豬眼 ，睇實 韋小寶 ，佢 話 ：
你 ， 你 ， 誒 ， 點解 喺 呢 處 嘅 ？
韋小寶 怕 佢 洩漏 自己 嘅 隱私 就 話 ：
呢個 嘢 奇形怪狀 ，講唔定 知道 神龍島 個 底細 啊 ，快啲 提到 我 個 艙 裏 便 審問 。
兩名 親兵 將 瘦頭陀 提 入 韋小寶 嘅 坐艙 。
韋小寶話 ：你哋 喺 外邊 侍候 ，唔聽見 我 叫 你哋 就 唔使 入嚟 嘞 。
等到 親兵 閂埋 艙門 喇 ，韋小寶 就 問 佢 ：
瘦頭陀 ， 你 武功 好 高 㗎 ， 點解 會 畀 人 綁住 掉 咗 落 大海 啊 ？
瘦頭陀話 ：老子 又唔係 武功 天下 第一 ，點解 唔會 畀 人哋 綁住 掉入 海 啊 ？
嘿嘿嘿 嘿嘿 嘿嘿 嘿嘿 ， 你 打 唔 過 教主 呢 ？
噉 有 咩 好笑 啊 ？有邊個 能夠 打得過 教主 唧 ？
你 點解 得罪 教主 啊 ？
邊個 敢 得罪 教主 佢 老人家 噃 ？
夫人 話 毛東珠 喺 皇宮 裏 便 辦事 不力 ， 欺瞞 教主 ， 要 將 佢 送入 神龍 窟 餵 龍 ， 我 ， 我 ， 我 。
韋小寶 明白 嘞 ，嗰 晚 喺 慈寧宮 裏 便 ，假太后 對 佢 師父 九難 講 ，佢 係 明朝 大將 毛咩龍 嘅 女 ，叫做 毛東珠 ，就 笑住 話 ：
你 喺 皇宮 裏 便 同 毛東珠 瞓埋 一床 ，好快活 噃 。
瘦頭陀 好得意噉 話 ：係定啦 。
你 呢條命 係 我 救 嘅 ，係唔係 啊 ？
就算係啦 。
咩嘢 算唔算 唧 ？
你 如果 話 我 冇 救翻 你 條 命 ，噉 亦 好 容易 嘅 啫 。
點樣 容易 啊 ？
我 再 將 你 推翻 落 海 ，噉 就算 冇 救過 你 條 命 噉 咪 得囉 。
唔 好 啊 ， 唔 好 啊 ， 你 浸 死 我 唔 緊要 啊 ， 我個 東珠 妹妹 ， 就 冇 命 㗎 喇 。
佢 冇 命 咪 冇 命 囉 ，橫掂 你 都 死咗 㗎 喇 。
誒唔好啊 ，唔好啊 。
如果 我 放咗 你 你又 點啊 ？
噉 我 多謝 你 啦 ，我 仲要 再 上 神龍島 ，去 救 我 阿東珠 妹妹 㗎 。
吖 你 真係 有情有義 噃 。
韋小寶 諗 ：皇上 要 捉 老舉乸 ，我 都 唔知 幾 擔憂 啊 冇 地方 搵到 佢 。
嗯啱喇 ，而家 跟住 呢個 矮肥佬 ，老舉乸 一定 可以 搵得到 嘅 。
但係 呢個 人 武功 高強 ，一 放咗 佢 ，噉 就係 放 虎 容易 捉 虎 難 嘞 。
哼 ， 講唔 定 一下 喎 嗬 ， 反咬 我 一 啖 添 。
瘦頭陀話 ：好彩 神龍島 而家 打到 天翻地覆 ，再 救人 啊 就 方便得多 喇 。
韋小寶 一 聽 精神 為之 一振 啊 ，連忙 問 ：
神龍島 上面 點解 打到 天翻地覆 啊 ？
五 龍門 你 打 我 我 打 你 ， 已經 打 咗 十幾日 喇 。
邊個 畀 邊個 捉到 啊 ，就 綁住 手腳 ，掉落 大海 餵 海龍 。
為咩事 打起上嚟 嘅啫 ？
瘦頭陀 打側個頭 ，打斜眼 睇住 韋小寶 佢 話 ：
東珠妹妹 講 ，你 係 本 教 白龍 使 ，執掌 五龍令 嘅 ，點會 唔 知道 㗎 你 ？
我 奉 咗 教主 嘅 命令 ， 去 中原 辦事 吖 嘛 ， 島上 嘅 事情 就 唔 清楚 嘞 。
瘦頭陀 突然間 大聲 怪叫 。
韋小寶 嚇咗 一跳 啊 退開 兩步 。
門外 便 嗰 四名 親兵 聽到 怪叫 ，怕 呢個 矮肥佬 傷咗 都統大人 ，手執 佩刀 一齊 衝入嚟 。
噉啊 見到 矮肥佬 手腳 被綁 ，坐 喺 地下 ，噉 先至 放心 。
韋小寶 揮 一揮手 話 ：你哋 出翻去 啦 ，冇事 。
四個 親兵 啊 退翻 出去 。
韋小寶 話 ：你 怪叫 咩 啊 你 ？
瘦頭陀 話 ： 弊 喇 ， 你 係 教主 同 夫人 嘅 心腹 ， 我 啊 乜嘢 事 都 同 你講 咗 喇 。
噉亦有咩弊唧 ？嗱 ，你就當我冇救起你 ，你仲喺大海嚟 ，飄啊飄啊 ，咕嚕咕嚕咕嚕 猛飲海水咪得囉 。
死人頭吖 ，啲 海水啊 ，好 鹹㗎 唔好 飲㗎 。
你唔想飲鹹水 ，就 老老實實 講 我 聽 ，五龍門 為咩事 自己 打起上嚟 ？
我 同 東珠 妹妹 返到 神龍島 嘅 時候 ，佢哋 已經 打 咗 好幾 日 喇 。
我 一問 人 ，原來 青龍 使 許雪亭 ，有 一 晚 忽然間 畀 人 殺死 咗 ，佢 房間 地下 有 一把 血刀 。
收尾查到 ，呢把 血刀 啊 ，係 赤龍使 無根道人 嘅 大弟子 何盛 嘅 。
韋小寶 聽到 許雪亭 畀 人哋 殺死 ，微微 一驚 ，佢 即時 就 諗 ：
多數 係 洪教主 派 人 殺 嘅 。
瘦頭陀 又 話 ：教主 好嬲 啊 ，問 何盛 為咩事 要 暗殺 青龍使 ，何盛 啊 死 都 唔 認 ，話 冇 殺 青龍使 。
收尾 青龍門 嘅 門下 ，為 掌門 使 報仇 ，就 殺咗 何盛 。
噉 赤龍門 同 青龍門 就 打起上嚟 喇 。
噉淨係 赤龍 同 青龍 兩門 嘅 事 啫 ，點解 你 話 五龍門 打到 一塌糊塗 呢 ？
我 都 唔知 點解 啊 ，黑龍門 又 幫 青龍門 ，黃龍門 又 幫 赤龍門 ，噉 你 殺 我 我 殺 你 ，打 到 不亦樂乎 啊 。
噉 我 個 白龍門 呢 ？
你係 白龍使 ，點解 自己 門裏 便 嘅 事 都 會 唔知 嘅 呢 ？
我 唔係 同 你 講過 囉 ，我 唔 喺 島 上 梗係 唔知 吖嘛 。
你門下 分成為 兩派 ，老兄弟 一派 ，幫 青龍門 ，少年弟子 又 一派 ，幫 赤龍門 。
五龍門 打群架 ，噉 教主 唔通 唔理 咩 ？
大家 都 打到 㷫晒 ，教主 都 鎮壓 唔 了 咯 。
正話 講到 呢處 ，只覺得 隻 船 已經 停駛 嘞 ，拋錨 入海 ，原來 已經 到咗 通食島 。
韋小寶 行到 船頭 ，只見 島上 樹木 茂盛 ，山丘 起伏 ，地方 睇嚟 都 唔錯 嘅 ，就 對 施瑯 話 ：
神龍島 啊 到處 都係 毒蛇 ，你 派 人 上去 探下 先 ，睇下 通食島 有 冇 蛇 啦 。
施瑯 接咗 命令 ，就 派咗 十 隻 小艇 ，扒去 島 上面 睇下 。
噉班 水兵 啊 登陸 之後 ，入去 樹林 搜索 。
冇 幾耐 就 點起 火把 ，即係話 ，島上 平靜 無事 ，並 冇 敵人 蹤跡 ，亦 冇 毒蛇 。
噉 先鋒隊 登陸 喇 ，搭起 中軍 營帳 。
一面 繡住 斗大 韋字 嘅 帥旗 ，喺 中軍 帳 前 高高 升起 。
搞掂晒喇 ，韋小寶 先至 落艇 。
施瑯 同 黃總兵 啊 左右 護衞 ，登陸 通食島 。
咪 吹 響 號角 ，燒起 炮仗 ，眾 軍士 躬身 行禮 ，啊 都 幾 熱鬧 啊 。
韋小寶 昂昂然 行入 中軍 帳 坐落 ，吩咐 親兵 將 瘦 頭陀 韞 喺 營 後 便 ，攞 啲 酒肉 畀 佢 食 。
但係就唔好解佢手腳上嘅牛皮索 ，仲要再加上幾條鐵鏈綁住 以策萬全 。
跟住 呢 ，傳 下 將 令 ：
命令 施瑯 率領 三十 組 戰船 ，分別 喺 神龍島 東 、北 、南 三面 進攻 。
又 命令 黃 總兵 率領 其餘 戰船 ，埋伏 喺 通食島 西側 ，一 聽 施瑯 發出 號炮 ，就 駛出嚟 攔截 。
噉啊邊一艘戰船喺前便 ，邊一艘戰船接應 ，邊隊衝鋒 邊隊側擊 ，冚𠾴唥都分派得井井有條 指示周詳啊 。
黃總兵 及 水師營 裏 便 嘅 副將 、 參將 、 守備 ， 驍騎 營 嘅 參 領 、 佐領 等 大小 軍官 ， 見到 都統 大人 小小年紀 ， 居然 咁 熟悉 水戰 策略 ， 計謀 精妙 指揮 合宜 ， 個個 都 深為 歎服 。
點知 呢啲 冚𠾴唥 都係 出於 施瑯 嘅 策劃 ，呢位 都統 大人 啊 ，只不過 喺 台前 依樣 畫 葫蘆 ，唱 一齣 雙簧 而已 唧 。
嗱 各位 ，欲知 後事 如何 ，且 聽 下回 分解 。
