前 文 再續 啊 書 接上 一回 啊 。
話 説 吳六奇 掟 咗 鄭克 塽 上岸 ， 放走 咗 佢 ， 見到 鄭克 塽 咁 狼狽 ， 吳六奇 同埋 韋小寶 啊 哈哈大笑 啊 。
馬超興 話 ：呢個 嘢 ，丟晒 國姓爺 嘅 架 咯 。
吳六奇 問嘞 ：呢個 嘢 ，點 殺傷 本會 兄弟 陷害 總舵主 㗎 ？
韋小寶話 ：呢件事啊 講起上嚟 一匹布 咁長 喇 ，我哋 上岸 先 ，等 兄弟 慢慢 同 大哥 詳詳細細 噉 講 啦 。
咦 ？你 睇下 ，嗰便 天邊 冚𠾴唥 都係 烏雲 ，怕 大雨 就嚟嚟喇 ，我哋 快啲 上岸 罷 啦 。
一陣 大風 颳過嚟 ，吹到 各人 啲 衫 啊 霎霎聲 。
吳六奇話 ：呢場 風雨 都 怕 唔 細噃 ，不如 我哋 將 隻 船 駛 去 江心 ，喺 大風大雨 裏 便 飲酒 傾偈 都 幾 過癮 噃 。
韋小寶 吃咗 一 驚嘞 連忙 話 ：
呢隻船 怕 頂唔住 啲 風 㗎 ，如果 沉咗 唔係 弊 ？
馬超興 微微笑話 ：噉就 冇有怕 。
講完 ，捩轉頭 吩咐咗 船家 幾句 ，船家 應咗 ，就 調翻轉 船頭 ，掛起 道帆 嘞 。
呢個 時候 ，風勢 已經 好大 喇 ，道 帆 鼓滿 咗 風 ，隻 船 啊 箭噉 向住 江心 駛 出去 。
江 裏頭 浪頭 大起 ，隻 船 呢 又 忽 高 忽 低 ，江水 又 瀄 入 去 艙 裏 便 。
韋小寶 呢 枉 佢 嘅 外號 叫做 小白龍 咯 ，佢 都 唔識 游水 嘅 。
吳六奇 笑住 話 ：韋兄弟 ，我 都 唔識 水性 㗎 。
韋小寶 好奇怪嘞 ：乜 你 唔識 游水 㗎 ？
從來 都 唔識 ，我 一 見到 水 就 頭暈腦脹 㗎 嘞 。
噉 ， 噉 ， 噉 你 點解 叫 ， 叫 人將 隻 船 駛去 江心 唧 ？
哈哈哈哈哈哈哈哈 ，天下 嘅 事情 ，越係 可怕 ，我 越係 要 去 碰 一 碰 佢 。
至多唔係 大浪 打沉 隻 船 ，大家 都 做 柳江 水鬼 啫 ，噉 亦 冇 咩嘢 大不了 啊 。
何況 馬大哥 外號 叫做 西江神蛟 ，水上 功夫 幾 使得 啊 。
馬大哥 ，我哋 講定 先吓 ，等陣 如果 係真係 船 沉咗 ，你 要 救 韋兄弟 先 ，第二個 再嚟 救 我 。
馬超興 笑住 話 ：好 ，一言為定 哦 。
韋小寶 噉 就 覺得 稍為 放心 嘞 。
呢陣時 ，風浪 越發 大嘞 ，隻船 跟住 啲 浪頭 升 咗 丈幾 高 ，突然間 呢 ，就 好似 由 半空中 跌翻落嚟 噉 ，要 蜎入 水底 噉樣 。
韋小寶 成個 畀 佢 拋起 ，嘣 一聲 ，𢴈 落 艙板 處 ，驚到 佢 啊嘰嘰 聲 咁 叫 。
船篷 忽然間 沙沙聲 ，落 大雨 嘞 ，跟住 一陣 狂風 颳過嚟 ，將 船頭 船尾 嘅 燈籠 都 捲走 咗 ，船艙 裏 便 嘅 燈火 都 熄晒 。
嚇到 韋小寶 又 試 大叫 ：哎呀 弊喇弊喇 ！
喺 船艙 望出去 ，只見 江面 白浪 洶湧 ，風 大 雨 大 ，氣勢 驚人 。
馬超興 話 ：兄弟 你 冇有 怕 ，呢場 風雨 果然 係 厲害 ，等 我 去 揸軚 啦 。
行到 船尾 ，叫 啲 船夫 入 艙 。
點知風啊 ，大到極 ，兩名船夫 又啱啱 行到 桅杆 邊 唧 就 爭啲 畀 風吹 咗 落水 ，咪 即刻 攬實 桅杆 ，唔敢 放手 嘞 。
喺 大風浪 之中 ，嗰隻 船 啊 忽然 打側 。
韋小寶 成個 𢴈咗 去左 便 ，驚到 佢 又 試 尖聲 大叫 ，個心 又 猛咁 鬧 ：
呢個 老乞衣 啊 ，好 諗唔諗 諗埋晒 啲 噉 嘅 古怪 主意 。
你 自己 又 唔識 游水 ，咩 地方 唔好玩 吖 ？走嚟 大風大雨 嘅 江心 嚟 開玩笑 ？
狂風 夾住 暴雨 ，一陣陣 打入嚟 船艙 ，韋小寶 早就 周身 濕透 嘞 。
猛聽見 咵嘞 一聲 ，道帆 跌咗 落嚟 ，隻 船 一側 ，韋小寶 撞咗 過去 右便 嘭 一聲 ，頭殼 撞 落去 茶几 上 便 。
風雨聲中 ，忽然間 聽見 吳六奇 放開 喉嚨 唱起 曲 嘞 。
曲詞 係 噉嘅 ：
走江邊 ，滿腔憤恨 向 誰 言 ？
老淚 風吹 ，孤城 一片 ，望救 目 穿 ，使盡 殘兵 血戰 。
跳出重圍 ，故國 悲戀 ，誰知 歌罷 剩 空筵 。
長江 一線 ，吳 頭 楚 尾 路 三千 ，盡 歸 別姓 ，雨 翻 雲 變 。
寒濤 東卷 ，萬事 付 空煙 。
精魂 顯 大招 ，聲 逐 海天 遠 。
噉啊 歌聲 喺 江 上 傳出去 ，風雷 嘅 聲音 雖然 係 好 響啊 ，不過 亦 壓 佢 唔到 。
馬超興 喺 船尾 猛咁 喝彩 ：好啊 ，好一個 聲 逐 海天 遠咯 ！
韋小寶 只係 聽 佢 唱得 慷慨激昂 ，亦 唔 知道 曲文 係 咩 嘢 意思 ，個 心 就 鬧 佢 嘞 ：
你 咁好 把聲 又 唔 去 戲台 做 大戲 ？做 大花面 吖 笨 。
老乞衣 ，放開 喉嚨 大聲 噉 嗌 ：老爺 ，太太 ，施捨 啲 冷飯菜汁 啦 ，啊 真係 餓 你 唔 死 啊 。
忽然間 聽見 江 上面 好遠 嘅 地方 ，有人 高聲 噉 叫 ：
千古 南朝 作話 傳 ，傷心 血淚 灑 山川 。
啲叫聲 喺 好遠 嘅 ，但係 喺 大風大雨 之中 ，清清楚楚 噉 傳過嚟 ，可見 嗰個人 內力 深湛 。
韋小寶 打個 特嘞 ，馬超興 啊 大聲 叫 ：
係冇 係 總舵主 啊 ？兄弟 馬超興 喺 呢度 喎 。
嗰便 回答 話 ：係啊 ，小寶 喺 處 嘛 ？
果然 係 陳近南 嘅 聲 。
韋小寶 又 驚 又 喜 喇 ：師父 ，我 喺 呢度 啊 ！
但係 咁 大風雨 ，佢 嘅 聲音 又 點 能夠 傳得 出去 呢 ？
馬超興 又 話 ：韋香主 喺 呢度 啊 ，仲有 洪順堂 紅旗 吳香主 哦 。
陳近南話 ：好極喇 ！唔怪得 江上 唱曲 ，高亢 入雲 啦 。
吳六奇 話 ： 屬下 吳六奇 ， 參見 總舵主 。
陳近南話 ：自己 兄弟 ，唔使 客氣 。
聲音 漸漸 近嘞 ，佢 嗰隻 船 正係 駛緊 過嚟 呢便 。
風雨 仲未停 啊 ，韋小寶 喺 船艙 望出去 ，只見 江上 一片 漆黑 ，有 一點 火光 慢慢噉 喺 江面 上 移過嚟 。
陳近南 隻 船 係 點着 燈 嘅 ， 過 咗 一陣 ， 火光 移到 好 近 嘞 ， 就 覺得 船頭 微微 一沉 ， 陳近南 已經 跳 上船 。
韋小寶 諗 ：哎呀 師父 嚟到 ，呢次 條命仔 有救 喇 。
連忙 行去 艙口 迎接 ，不過 又 黑𠵼𠵼 睇唔見 陳近南 個樣 ，就 大聲 叫咗聲 師父 先至 講 。
陳近南 拖住 佢 隻手 行入 船艙 ，笑住 話 ：
呢場 大風雨 真係 厲害 喇 ，有冇 嚇親 你 啊 ？
韋小寶 話 ：冇乜事 。
吳六奇 同 馬超興 都 過嚟 參見 。
陳近南話 ：我 去到 柳州城 ，知道 你哋 嚟咗 柳江 ，就 嚟 搵 你哋 啦 ，點知 遇到 呢場 大風雨 。
如果 唔係 吳大哥 一曲 高歌 ，真係 搵唔到 添 。
吳六奇話 ：屬下 一時 興起 ，令 總舵主 見笑 嘞 。
陳近南話 ：大家 兄弟 相稱 就 得嘞 。
吳大哥 唱 嘅 係 唔係 桃花扇 裏 便 沉江 嗰 齣 戏 啊 ？
係啊 。
呢首曲 寫 史閣部 精忠 抗敵 ，沉江 殉難 ，兄弟 平時 最 鐘意 聽 。
而家 江上 橫風 橫雨 ，就 不禁 唱起嚟 嘞 。
陳近南話 ：唱得 真係 好 。
韋小寶 就 諗嘞 ：
原來 呢齣戏 叫做 沉江 啊 ？哼 ，好 唱唔唱 唱 呢齣戏 ，你 要 沉江 ，小弟 恕不 奉陪 啊 。
陳近南 話 ： 嗰 日 ， 喺 浙江 嘉興 隻 船 裏 便 ， 聽 黃宗羲 先生 、 呂留良 先生 、 查伊璜 先生 三位 江南 名士 ， 講過吳 兄 嘅 事蹟 ， 兄弟 十分 佩服 。
你我雖然係同會弟兄 ，不過 兄弟 事忙 ，一直 唔能夠 去 廣東 相見 。
吳兄 身份 又 唔同 ，亦 唔能夠 北上 。
啊 ，想唔到 今日 喺 呢處 聚會 ，真係 大 慰 平生 啊 。
吳六奇話 ：兄弟 入咗 天地會 之後 ，冇 一日 唔 想 參見 總舵主 嘅 。
江湖上 都 話 ：平生 不見 陳近南 ，就 稱 英雄 也 枉然 啊 。
從 今日 起 ，我 先至 可以 稱為 英雄 啊 ，哈哈哈哈哈哈哈哈 。
陳近南話 ：承蒙 江湖上 朋友 抬舉 ，好慚愧啊 。
兩個人 惺惺相惜 ，意氣相投 ，就 暢談 平生 抱負 ，都 唔記得 江上 嘅 風雨 嘞 。
傾談咗 一陣 ，風雨 漸漸 細嘞 。
陳近南 問起 吳三桂 嘅 事 ，韋小寶 啊 逐一逐二 噉 講咗 。
講到 驚險 嘅 地方 ，咪 不免 加油 添醬 一番 啦 ，噉 啊 種種 經過 ，連 馬超興 亦 都 係 第一次 聽到 唧 。
陳近南 聽講 已經 捉到咗 蒙古 使者 罕帖摩 ，真憑實據 ，吳三桂 呢趟 係 實衰嘞 ，所以 十分 歡喜 ；
又 聽講 羅剎國 要 喺 北方 響應 吳三桂 ，奪取 關外 大片 土地 ，不由得 皺起 眉頭 好耐 都 唔出聲 。
韋小寶話 ：師父 ，羅剎國 啲 人 呢 ，紅毛 綠眼 ，都 唔使 怕 佢 ，至多 就 唔 睇 佢哋 咁多 啫 嘛 。
不過 佢 哋 嘅 火器 啊 真 係 犀利 啊 ， 一槍 揈 過 嚟 呀 ， 任 你 英雄好漢 亦 頂 唔 住 㗎 。
陳近南話 ：我 亦 係 為 呢件事 擔心 ，吳三桂 同 清廷 拼 個 兩敗俱傷 ，係 恢復 我哋 漢家 山河 嘅 天賜 良機 。
但係 前門 驅 虎 後門 進 狼 ，趕走咗 清廷 ，又 嚟 咗 個 仲 兇惡 過 清廷 嘅 羅剎國 ，嚟 佔領 我哋 錦繡 江山 噉 又 點 好 呢 ？
吳六奇話 ：羅剎國 嘅 火器 ，真係 冇法子 對付 嘅 咩 ？
陳近南話 ：有 一個 人 兩位 可以 見下 。
行到去艙口 ，佢 話 ：興珠 ，你 過嚟啦 。
喺 嗰便 隻 船 有 個 人 應咗 一 聲 ，就 跳 上 船 行 入 船艙 ，向 陳 近南 躬身 行禮 。
呢個人 四十零歲 ，身材 瘦小 ，神情 英悍 。
陳近南話 ：呢 兩位 係 吳大哥 、馬大哥 ，呢個 係 我 徒弟 ，姓 韋 。
嗰個人 抱拳 行禮 ，噉 啊 吳六奇 等人 呢 都 起身 還禮 。
陳近南話 ：呢位 林興珠 林兄弟 ，一直 喺 台灣 跟 我 做事 ，好得力 嘅 。
當年 國姓爺 打敗 紅毛鬼 ，攻克 台灣 ，林兄弟 亦係 有功之人 啊 。
韋小寶 笑住 話 ：林大哥 同 紅毛鬼 交過手 啊 ，真係 好極 嘞 。
羅剎鬼 有 槍炮火器 ，紅毛鬼 亦 有 槍炮火器 ，林大哥 啊 實 有 法子 嘅 。
吳六奇 同 馬超興 同時 拍掌 一齊 話 ：
韋兄弟 嘅 頭腦 啊 真係 快 嘞 。
吳六奇 本來 對 韋小寶 啊 唔係 點 重視 嘅 ，因為 見 佢 迷戀 阿珂 ，仲有 幾分 鄙夷 佢 添 ，到 而家 ，都 不由得 有 啲 佩服 嘞 ：
呢個 細路 好 醒目 ，都 有 啲 本事 㗎 噃 。
陳近南 微笑話 ：當年 國姓爺 攻打 台灣 ，紅毛鬼 啲 炮火 好 厲害 ，果然 係 極難 抵敵 。
當時 我哋 就 築起 條 土堤 ，將 幾千名 紅毛兵 圍 喺 城 裏 便 ，截斷 咗 城 裏 便 嘅 水源 ，等 佢哋 冇 水 飲 。
紅毛兵 頂唔住 喇 ，就 衝出嚟 攻擊 ，我哋 日頭 唔同 佢哋 打 ，晚頭 黑 就 同 佢哋 近鬥 。
興珠 ，當時 點樣 打法 你 同 大家 講下 啦 。
林興珠 話 ：呢啲 係 軍師 嘅 神機妙算 。
陳近南 為 鄭成功 獻計 攻打 台灣 就 終於 成功 ，所以 軍隊 裏頭 ，都 稱呼 佢 做 軍師 嘅 。
林興珠 話 ：國姓爺 喺 永歷 十五 年 ，二月 初一 祭 江 ，就 率領 文武百官 、親軍 武衛 ，坐 戰艦 由 科羅灣 出海 ，佢 二十四 日 呢 就 去到 澎湖 嘞 。
四月初一 呢 ，就 到達 台灣 鹿耳門 。
噉門外 ，有 幾十里 淺灘 嘅 ，紅毛兵 呢 又 鑿 沉 咗 啲 船 ，阻塞 港口 ，噉 我哋 嘅 戰艦 咪 開 唔 入去 啦 。
噉 正在 冇法子 嘅 時候 ，哈 忽然間 ，潮水 漲起 上嚟 ，噉 啊 眾兵將 就 歡聲 震天 啦 ，各條 戰艦 啊 一齊 湧入去 ，噉 喺 水寨港 登岸 。
紅毛兵 呢 就 用 槍炮 嚟 打 ，國姓爺 對 大家 話 ：
我哋 如果 退後 一步 ，就 畀 佢哋 趕 入 咗 大海 就 死 無 葬身之地 嘞 。
紅毛鬼 槍炮 雖然 係 厲害 ，大家 都 要 奮勇 上前 啊噉 。
眾兵 將 得咗 命令 ，軍師 就 親自 帶住 我哋 衝鋒 。
突然之間 ，我 耳仔 邊 啊 ，好似 打咗 幾千幾百個 霹靂 噉 ，煙霧 瀰漫 ，前面 嘅 弟兄 呢 冧 咗 一排 。
噉 大家 又 慌 又 亂 ，就 逃跑 翻轉頭 嘞 。
韋小寶話 ：係啊 ，我 第一次 聽見 開 紅毛槍 啊 ，都 嚇到 傻晒 啊 。
林興珠 話 ：嗰陣時 ，我 就 好似 冇頭 烏蠅 噉 。
正係慌亂嘅時候 ，聽見 軍師 大聲 話 ：
紅毛鬼 開咗 一槍 ，要 上 火藥 裝 鉛彈 嘅 ，大家 衝 啊噉 。
我 連忙 帶住 班 兄弟 衝 上去 啦 ，果然 紅毛鬼 一時 就 嚟唔切 開槍 嘞 。
但係 啱啱 衝到埋去 唧 ，紅毛鬼 又 開槍 咯噃 ，我 即刻 趢低 ，喺 地下 躲避 啦 。
不過 好多 兄弟 都 打死咗 ，冇法子 嘞 ，就 只有 退翻落嚟 。
紅毛鬼 呢 亦 唔 敢 追 。
呢一仗 陣亡咗 好幾百 兄弟 ，大家 都 垂頭喪氣 ，一諗起 紅毛鬼 嘅 槍炮 就 心驚肉跳 啊 。
韋小寶 話 ：噉 收尾 係 唔係 軍師 諗出 咗 妙計 呢 ？
林興珠 話 ：係咯 。
嗰晚 軍師 叫咗 我 去 ，問 我 話 ：
林兄弟 ， 你 係 武夷山 地堂 門 嘅 弟子 係 唔 係 啊 ？
我 話 係 啊噉 。
軍師 話 ：日頭 紅毛鬼 一 開槍 ，你 即刻 就 趢低 喺 地 嘞 ，身法 好 敏捷 噃 。
我 好 慚愧 啦 就 話 ：
小將 唔 敢 貪生怕死 ，聽日 上陣 嘅 時候 ，決 唔 敢 再 趢低 躲避 嘞 ，滅咗 我哋 大明 官兵 嘅 威風 。
否則 ，你 殺 我 個 頭 啦 。
韋小寶 話 ： 林大哥 ， 我估 軍師 呢 唔 係 怪 你 貪生怕死 啊 ， 係 讚 你 趢 喺 地 躲避 嘅 法子 好好 ， 要 你 傳授 畀 眾 兄弟 啊 。
林興珠 一拍 大髀 ，大聲 話 ：係咯 ，你 係 軍師 嘅 徒弟 ，果然 係 名師 出 高徒 啊 。
韋小寶 笑 住 話 ： 你 係 我 師父 嘅 部下 ， 果然 係 強將手下無弱兵 啊 。
眾人 都 笑起上嚟 嘞 。
林興珠 話 ：嗰晚 ，軍師 真係 噉樣 吩咐 我 嘅 。
佢 話 ：你 唔好 會錯 我 意 。
我 見 你 嘅 燕青 十八翻 、松鼠 草 上 飛 嘅 身法 好 啱 使 ，可以 趢 到 敵人 前 便 ，用 單刀 斬 佢哋 嘅 腳 。
有 一 套 地堂 刀法 ，你 練得 點 啊 ？
我 聽見 軍師 唔係 鬧 我 膽小怕死 噉 至 放心 咋 ，我 話 ：
地堂刀法 呢 小將 係 練過 嘅 ，當年 師父 話 ，如果 上陣 打仗 ，可以 趢過去 斬 敵人 嘅 馬腳 ，不過 紅毛鬼 唔 騎 馬 怕 冇用 唧 。
軍師 又 話 喇 ：紅毛鬼 雖然 係 冇 騎馬 ，我哋 斬 佢 嘅 人腳 ，有 咩 嘢 唔得 啊 ？
吖 我 一聽 就 恍然大悟 ，猛咁 話 ：冇錯啊冇錯啊 ，小將 頭腦 唔靈活 ，想唔到 呢一點 啊噉 。
韋小寶 微微 一 笑 佢 諗 ：
你 師父 教 你 呢 路 刀法 可以 斬 馬 腳 ，你 就 以為 唔 能夠 斬 人 腳 ，嘿 老兄 嘅 頭腦 啊 ，果然 唔係 點 靈活 喇 。
林興珠 話 ：當時 ，軍師 就 叫 我 演咗 一次 呢路 刀法 。
佢 讚 我 練得 仲 可以 ，佢 話 ：
你嘅 地堂 門 刀法 身法 ，如果 冇 十幾年 嘅 寒暑 之 功 呢 就 練唔到 呢個 地步 ，但係 我哋 聽日 呢 就 要 打仗 ，大家 要 練 就嚟 唔切 嘞 。
我話 ：係啊 ，呢路 地堂 門刀法 呢小將 啊 練得 唔好 ，不過 的確 呢 已經 練咗 十幾年 喇噉 。
軍師 就 話 ：我哋 趕緊 築土堤 ，用 弓箭 嚟 守住 先 ，你 馬上 去 教 啲 兵將 ，練 轆 地上 前 ，揮刀 斬 腳 嘅 法子 。
只要 教 三幾下 招式 ，大家 練熟 就 可以 嘞 ，地堂門 嘅 深奧 武功 一概 唔 使 教 噉 。
噉 我 接咗 軍師 將令 ，當晚 呢 ，就 教咗 本隊 嘅 士兵 先 。
第二日 一早 ，紅鬼 衝過嚟 ，噉 畀 我哋 一陣 弓箭 射翻 轉頭 。
噉 本隊 士兵 將 地堂 刀法 啊 基本 五招 學會咗 ，再 傳授 第二隊 嘅 官兵 。
軍師 又 吩咐 大家 斬 咗 啲 樹枝 ， 扎成 盾牌 ， 要 嚟 擋住 紅毛兵 嘅 鉛彈 嘅 。
第四日 朝頭早 ，紅毛兵 又 試嚟 進攻 嘞噃 。
我哋 上去 迎戰 ，趢地 前進 ，殺到 紅毛鬼 啊 落花流水 ，戰場 上 便 啊 留低 咗 幾百 隻 腳 。
連 赤嵌城 守將 紅毛頭 嘅 左腳 都 斬咗 落嚟 ，呢個 紅毛頭 呢 就 投降 喇 。
收尾 再 攻 衛城 ，仍然 係 用 呢個 法子 啊 。
馬超興 好 歡喜 噉 話 ：
噉以後 同 羅剎鬼 交鋒 打仗 ，就 可以 用 地堂 功夫 啊 對付 佢哋 咯 。
陳近南話 ：不過 而家 嘅 情形 呢 就 有啲 唔同 。
當年 喺 台灣 嘅 紅毛兵 不過 係 三四千 人 ，噉 啊 死 一個 少 一個 。
羅剎兵 如果 嚟 侵犯 ，至少 都有 幾萬人 㗎 ，佢哋 源源而嚟 ，殺不勝殺 。
再講吖 ，地堂 刀法 只能 用於 近戰 ，羅剎兵 如果 用 大炮 轟擊 ，噉 亦 好難 抵擋 㗎 。
吳六奇話 ：噉啊係啊 ，軍師 你 話 點做好 呢 ？
佢 聽 陳近南 介紹 林興珠 嘅 時候 ， 並 冇 稱呼 自己 做 香主 ， 就 估計 林興珠 唔 係 天地會 嘅 人 ， 所以 亦 唔 用 總舵主 嚟 稱呼 陳近南 嘞 。
陳近南話 ：中國 地大 人多 ，如果 冇 漢奸 做 內應 ，外國人 係 極 難 打入嚟 嘅 。
噉 大家 都 話 ：冇錯喇 冇錯喇 ，清兵 佔據 我哋 江山 ，全 靠 漢奸 吳三桂 帶 路 啫 嘛 。
陳近南話 ：而家 吳三桂 又 去 同 羅剎國 勾結 ，佢 起兵 造反 嘅 時候 ，我哋 首先 一鼓作氣 將 佢 打垮 ，噉 羅剎國 冇咗 內應 就 唔能夠 貿貿然 入侵 嘞 。
馬超興 話 ：如果 吳三桂 垮得 太 快 ，就 唔能夠 同 清廷 打到 兩敗俱傷 嘞噃 。
陳近南話 ：噉啊 係嘅 。
但係 比較起嚟 ，羅剎人 比較 清廷 更加 可怕 。
韋小寶話 ：係定啦 ，滿洲人 亦係 黃皮膚 、黑眼睛 、扁鼻哥 ，同 我哋 冇咩 唔同 嘅 ，講 嘅説話 亦係 一樣 嘅 。
外國 鬼 又 紅毛 綠眼 ，講起 説話 上嚟 啊 ，嘰哩咕嚕 都 唔知 佢 噏 乜 。
噉啊眾人 傾咗 一陣 國家大事 ，個 天 上下 光 嘞 ，風雨 亦 停咗 嘞 。
馬超興 話 ：大家 衣服 都 濕 咯 ，不如 上岸 飲翻 兩杯 ，驅 下 寒氣 呢 ，好唔好 啊 ？
陳近南話 ：好極嘞 。
嗱 各位 ，欲知 後事 如何 ，且 聽 下回 分解 。
