前 文 再續 啊 書 接上 一回 啊 。
話説 李自成 就 已經 畀 李西華 逼到 退到 排邊 ，只要 再 退 一步 ，就 跌落 水 㗎嘞 。
呢個 時候 ，馮錫范 已經 喺 木屋 行 出嚟 ，佢 話 ：
喂 ，衰仔 ，我 刺 你 背心靈台穴 嘞 。
長劍 慢慢 刺出去 ， 哈 果然 係 刺 李西華 嘅 靈 台 穴 。
李西華 正話 要 回 劍 擋格 ，突然之間 ，屋頂 有人 話 ：
喂 ，衰仔 ，我 刺 你 背心靈台穴 嘞 。
白光 一閃 ，有 個人 好似 飛鳥 一樣 噉 撲落嚟 ，手中 兵器 猛 刺 馮錫范 後心 。
呢一下 ，人人 都係 大出意料之外 啊 ，想唔到 喺 啲 屋頂 上 便 ，仲 伏住 一個 人 喺 處 。
馮錫范 嚟唔切 攻擊 李西華 嘞 ，就 側身 回劍 ，格開 敵人 嘅 兵器 ，咣 一聲 ，來人 手上 揸 嘅 ，係 一把 單刀 。
噉 兩件 兵器 相交 ，兩個 人 都 退咗 一步 。
馮錫范 喝 佢 ：咩嘢 人 啊 ？
嗰個人 笑住 話 ：我 認得 你 係 半劍有血 馮錫范 ，你 唔識得 我 咩 ？
韋小寶 佢哋 呢陣時 ，都 睇得 清清楚楚 。
嗰個人 ，身穿 粗布 衫褲 ，頭墊 白布 ，腰間 圍 一條 青布 腰帶 ，着 一對 草鞋 ，乃係 日頭 喺 賭場 裏 便 自解 穴道 嗰個 農夫 啊 。
睇嚟 ，佢 係 畀 馮錫范 暗算 咗 ，心中 唔忿氣 ，嚟 報 嗰 一劍 之 辱 。
馮錫范話 ： 以 閣下 噉 嘅 身手 ， 都 唔 係 無名之輩 吖 ， 點解 要 藏頭露尾 躲躲閃閃 啊 ？
嗰嗰 農夫 話 ：就算 係 無名之輩 ，亦 叻過 半劍 有血 啊 。
馮錫范 嬲嘞 ，挺劍 刺過去 。
嗰個 農夫 既 唔 閃避 亦 唔 擋格 ，舉 刀 就 向 馮錫范 當頭 斬落去 。
驟眼 一 睇 ， 好似 係 兩敗俱傷 嘅 搏 命 打法 ， 其實 呢 一刀 啊 後發 先至 ， 快到 異乎尋常 。
馮錫范 長劍 啊 劍尖 離 對方 仲有 尺幾 遠 ，但係 單刀 呢 ，已經 斬到 自己 頭殼 嘞 ，嘩 ，佢 大吃一驚 ，急忙 向 左 便 飆 出去 。
嗰個 農夫 揮刀 橫削 ，攻 佢 腰部 。
馮錫范 啊 豎起 把 劍 嚟到 擋格 ，嗰個 農夫 把 單刀 突然間 輕飄飄 噉 轉咗 個 方向 ，劈 佢 左膊 。
馮錫范 側身 避開 就 還 翻 一劍 。
嗰個 農夫 仍然 唔擋唔格 啊 ，揮刀 攻 佢 手腕 。
兩個人 拆咗 三招 ，嗰個 農夫 竟然 攻咗 三招 。
佢 嘅 相貌 忠忠厚厚 ，吖 仲 好似 鈍鈍地 ，但係 刀法 嗰種 凌厲 狠辣 ，武林 之中 確係 好 少 有 㗎 。
吳六奇 同 馬超興 見到 都 覺得 好奇怪 啊 。
馮錫范 突然間 話 ：停手 ！
跳開 兩步 佢 話 ：原來 尊駕 係 百勝 。
打就打 ，講咁多 做乜吖 ？
嗰 個 農夫 跳 上前 ， 呼 ， 呼 ， 呼 ， 連氣 三刀 。
馮錫范想 講都 冇 時間 嘞 ， 就 唯有 打醒 精神 啊 見招拆招 啦 。
馮錫范 劍法 上便 真係 有 高深 造詣 ，佢 定起 神 嚟 打 ，嗰個 農夫 就 佔唔到 上風 。
兩個人 刀劍 忽快忽慢 ，有時 密到 好似 暴風驟雨 啊 ，碰撞 幾十下 ；
有時呢 ，迴旋轉身 ，一招 都冇 碰到 。
好嘞 ，唔講 呢便住 ，話説 李自成 同 李西華 仍然 係 惡鬥緊 。
鄭克塽 同 阿珂 呢 ，都 揸住 兵器 ，企 喺 李自成 側 跟 ，一 有 機會 就 幫手 。
李自成 一條 禪杖 舞 起嚟 ，勢道 剛猛 。
李西華 嘅 劍法 啊 雖然 係 精妙 ，一時之間 呢 亦 冇法子 埋身 。
鬥到興起 ，李西華 忽然 手腳縮起 ，一轆 ，就轆到 敵人 腳邊 ，劍尖 就 已經 指住 李自成 小腹 ，喝咗話 ：
你 今日 仲 有 命 ？
呢 一招 啊 叫做 卧雲翻 ， 相傳 ， 係 宋代 梁山泊 好漢 ， 浪子 燕青 流傳 落 嚟 嘅 絕招 ， 迅捷 無比 ， 敵人 防不勝防 嘅 。
阿珂 同 鄭克塽 吃咗 一驚 啊 ，等到 發覺 嘅 時候 ，李自成 已經 受制 嘞 ，嚟唔切 救 嘞 。
點知 李自成 ，突然間 睩 大 雙眼 ，猛喝 一聲 ，人人 都 震到 耳仔 嗡嗡響 ，呢一 喝 之 威 ，直情 好似 雷震 噉 啊 。
李西華 一驚 ，長劍 啊 竟然 甩手 。
李自成 飛起 左腳 ，踢到 佢 轆咗 個 關斗 ，禪杖 杖頭 已經 頂住 佢 心口 ，當堂 將 佢 壓 喺 木排 上 便 唔逳得 。
眼見 李自成 只要 禪杖 舂 落去 啊 ，李西華 心口 肋骨 ，就 會 斷晒 心肺 碎裂 ，冇命 㗎 嘞 。
李自成 喝 佢 話 ：你 如果 服嘞 ，就 放生 你 。
李西華 話 ：快啲 殺咗 我 啦 ，我 唔能夠 報 殺父 大仇 ，仲有 咩 面目 留 喺 人世 吖 ？
哈哈哈哈哈哈哈 ，好極嘞 。
李自成 雙手 正話 想 運力 將 禪杖 插落去 ，呢個時候 ，一片 清冷 嘅 月光 ，由 佢 身後 射落嚟 ，照正 李西華 塊面 ；
只見佢面色平和 ，微露笑容 ，哈 ，竟然 一啲都唔驚噃 。
李自成 心中 一震 ，就 喝佢話 ：
你 係 河南人 ，姓 李 嘅 係 唔 係 啊 ？
李西華 話 ：可惜 我哋 姓 李 嘅 ，出咗 你 噉樣 一個 心胸狹窄 ，做唔成 大事 嘅 懦夫 。
李岩 李公子 係 你 咩嘢 人 ？
你既然知道 ，噉就好啦 。
講完 李西華 微微 一 笑 。
李自成 攞翻 起 支 禪杖 佢 話 ：
你 係 李兄弟 ，李兄弟嘅 仔 啊 ？
難為 你 仲 有 面 叫 我 阿爹 做 兄弟 啊 。
李自成 個人 岌咗 幾岌 ，左手 揞住 自己 胸膛 ，吟吟沉沉 噉 話 ：
李兄弟 仲有 個 仔 啊 ？
你 ，你係 紅娘子 生 嘅 係唔係 啊 ？
李西華 見 佢 將 禪杖 攞起 幾尺 ，就 大聲 話 ：
快啲 落手 啦 ，一味 講埋 呢啲 嘢 做咩嘢 。
李自成 退開 兩步 ，將 禪杖 戙 喺 木排 上 便 佢 話 ：
我 生平 第一件 大錯事 ，就係 害咗 你 阿爹 。
你 鬧 我 心胸狹窄 ，係 個 做唔成 大事 嘅 懦夫 ，鬧得 冇 錯 ，一啲 都 冇 錯 。
你 要 為 你 阿爹 報仇 ，係 理所當然 嘅 。
我 李自成 生平 殺人 多到 計唔掂 ，從來 都 冇 放 喺 心上 ，但係 殺咗 你 阿爹 ，我 ，我 好 慚愧 啊 。
啊 ，啊 ，突然間 ，啊一聲 ，噴出 一大啖 鮮血 。
李西華 點 都 估唔到 會 噉 嘅 變化 ，佢 跳翻 起身 ，執翻 長劍 ，睇住 李自成 白鬚 上 便 都 係 斑斑點點 嘅 鮮血 ，長劍 啊 刺 唔 出去 嘞 。
佢 話 ：你 既然 內心 有 愧 ，就 好過 一劍 殺咗 你 。
講完 飛身而起 ，雙腳 喺 綁住 木排 上面 嘅 大纜 ，點咗 幾下 ，就 跳到 岸上 ，幾個 起落唧 ，就 隱沒 喺 黑暗 之中 唔見咗 嘞 。
阿珂 叫咗聲 ，阿爹 噉 ，就 行 去 李自成 身邊 想 扶佢 。
李自成 耍耍手 ，自己 行到 木排 側跟 ，左腳 𨂾 出去 ，什一聲 ，個身 就 沉咗 入 江水 裏 便 。
阿珂 大吃一驚 啊 ： 阿爹 ， 阿爹 你 唔 好 ， 你 。
眾人 見 江面 一啲 動靜 都 冇 ，以為 李自成 投水 自盡 啦 。
過咗一陣 ，見到 李自成 嘅 頭頂 喺 江面 上面 伸出嚟 ，原來 佢 竟然 係 喺 江底 步行 啊 。
因為 鐵禪杖 啊 十分 沉重 ，所以 個 身 呢 就 唔 浮起 。
只見 佢 嘅 頭殼 同 膊頭 漸漸 喺 江面 升起 ，浭住 江邊 嘅 淺水 一步步 噉 行 上岸 ，拖住 鐵禪杖 ，趷下趷下 噉 ，慢慢 就 越行越遠 就 唔見咗 嘞 。
阿珂 回過身嚟 ，佢 話 ：鄭公子 ，我 阿爹 ，佢 ，佢 扯咗 喇 。
跑過去 撲 喺 鄭克塽 嘅 懷抱 喊起上嚟 。
鄭克塽 左手 攬住 佢 ，右手 輕輕 拍下 佢 背脊 ，安慰 佢 話 ：
你 阿爹 扯咗 咯 ，有 我 吖 嘛 。
一句 説話 未 講完 ，突然間 腳下 嘅 木材 滾動 ，兩個人 驚叫 一聲 乒乓 就 跌咗 落水 。
原來 天地會 家 後堂 精通 水性 嘅 好手 啊 ，昧水 將 綁住 木排 嘅 竹索 割斷 ，噉 木排 當堂 散開 。
馮錫范 啊 急急 一跳 ，睇準咗 一條 大木 ，咪 跳咗 落去 。
嗰個 農夫 跟住 追到嚟 嘞 ，呼 一刀 ，兜頭 劈落 。
馮錫范 揮劍 格開 。
兩個人 ，就 喺 條 大木 上面 就 繼續 打過 。
呢次 打鬥 呢 ，比起 先頭 喺 木排 上面 過招 又 難咗 幾 倍 。
點解 呢 ？因為 嗰條 木 啊 不停 噉 喺 水 裏 便 轆 ，企 喺 上 便 固之然 係 企唔穩 啦 ，又 冇 法子 借力 噃 。
但係 馮錫范 同 嗰個 農夫 呢 ，就 企得 好 穩 ，刀 來 劍 往 ，一啲 都 冇 慢到 。
條木 啊 順住 江水 噉 流 ，漸漸 呢 ，就 流到去 江心 嘞 。
吳六奇 突然 間 叫 起 上 嚟 話 ： 哎呀 ， 我 諗 起 嚟 喇 ， 呢 位 老兄 係 百勝刀王 胡逸之 啊 。
佢 ，哦 ，佢 點解 變成 噉嘅 樣嘅 ？
快啲 追 ，扒隻船 過去 。
馬超興 啊 好奇怪 噉 話 ：胡逸之 ？佢 唔係 仲 有 個 外號 叫做 美刀王 麼 ？
呢個人 風流英俊 ，當年 話 係 武林 之中 第一 美男子 ，吖 ，乜 而家 居然 扮成 個 ，傻傻更更 嘅 鄉下佬 喎 。
韋小寶 就 猛 咁 問 ： 我個 老婆 救起 上 嚟 未 啊 ？ 吓 ， 救起 未 啊 ？
吳六奇 有 啲 唔 高興 嘞 ，睩 咗 佢 一 眼 ，顯然 係 話 ：
百勝刀王 胡逸之 遇到 強敵 ，水面 又 兇險 ，我哋 梗係 要 即刻 上前 幫手 至係 㗎嘛 。
你 一味 掛住 個 女仔 ，哼 ，重色輕友 ，都唔係 英雄所為 。
馬超興 話 ：快啲 傳令 ，多派 人手 ，一定 要 救起 嗰個 姑娘 哦 。
船尾 嘅 船夫 就 大聲 噉 傳令 落去 嘞 。
過咗 一陣 ，忽然 見到 有 兩個 人 ，喺 水底 蜎 上嚟 ，托住 濕淋淋 嘅 阿珂 ，佢 話 ：女仔 捉到 喇 。
跟住 左手 便 一個人 ，揦住 鄭克塽 條 衫領 ，扚起 上嚟 佢 話 ：個 男人 亦 捉到 喇 。
眾人 哈哈大笑 。
韋小寶 噉 就 當堂 放心 嘞 ，佢 笑逐顏開 噉 話 ：
我哋 快啲 去 睇下 嗰個 百勝刀王 ，睇下 佢 同 半劍 有 血 打成 點樣 吖 。
佢哋 坐 嗰隻 船 呢 ，喺 吳六奇 催促 之下 ，早就 四支 槳 一齊 扒 ，好快 噉 啊 向住 胡馮 兩個人 ，相 鬥 嗰條 大 木 駛 過去 ，越 扒 越 近 嘞 。
喺 溶溶 月色 之下 ，見到 江面 上 白光 閃爍 ，兩個人 鬥得 好 劇烈 啊 。
噉 兩個人 嘅 武功 本來 呢 亦 不分上下 ，但係 馮錫範 日頭 呢 同 風際中 、玄貞道人 啊 拼咗 兩掌 。
風際中 內力 認真 使得 ，當時 馮錫范 呢 ，就 已經 覺得 胸口 氣血 唔夠 暢順 ，而家 打咗 咁耐 嘞 ，更加 覺得 右胸 隱隱 作痛 。
喺 呢條 不停咁 轉動 嘅 大木 上 便 ，真係 除咗 前進 後退 一步 半步 之外 啊 ，就 絕無 迴旋 餘地 嘅 。
百勝刀王 胡逸之 嘅 刀法 招招 險 啊 刀刀 狠 ，只 攻 不守 ，每一刀 呢 似乎 都係 要 拼 個 同歸於盡 嘅 。
呢種 打法 啊 ，如果 喺 武藝 平庸 嘅 人 用起上嚟 呢 ，本來 係 拼爛 ，發爛渣 。
但係 胡逸之 嘅 刀法 自成 一家 ，雖然 係 險 啊 ，其實 好 安全 。
佢 嘅 武功 本來 就 精奇 嘞 ，加之 呢一 股 凌厲 無前 嘅 狠勁 ，馮錫范 啊 不由得 心怯 喇 。
佢 又 見 一隻 船 扒 緊過 嚟 ， 船頭 有 幾個 人 企響 處 ， 一 擸 眼 ， 日頭 喺 賭場 上面 相遇 嘅 老 乞 衣 亦 喺 處 。
胡逸之 大喝 一聲 ，左 一刀 、右 兩刀 、上 一刀 、下 兩刀 連 攻 六刀 啊 。
馮錫范 啊 奮力 頂住 ，百忙之中 ，仍然 還咗 兩劍 ，門户 守得 嚴密 非常 。
吳六奇話 ：好刀法 ，好劍法 啊 ！
只見 胡逸之 又 試 揮刀 迎面 直劈 ，馮錫范 退咗 半步 ，身體 向右 便 昂 ，就 避開咗 呢一刀 ，噉啊 長劍 晃動 擋住 個 身前 便 。
呢陣時 ，佢 嘅 左腳 已經 踩住 大木 嘅 尾尾 嘞 ，腳踭 呢 就 浸 喺 水 裏 便 ，就 半寸 都 唔 退得 㗎 嘞 。
胡逸之 再 斬 三刀 ，馮錫范 就 還 咗 三劍 ，竟然 分毫 都 唔 退 噃 。
胡逸之 突然間 一聲 大喝 ，舉刀 直斬 落嚟 。
馮錫范 係 側身 讓開 ，點知道 胡逸之 呢 一刀 呢 竟然 唔 收手 ，向下 直斬 落去 ，嚓 一聲 ，將 大木 斬 為 兩 橛 。
馮錫范 企 腳 個 地方 ，係 大木 嘅 尾尾 ，條 大木 一 斷 ，佢 哎吖 一 聲 ，就 跌咗 落水 嘞 。
胡逸之 用 鋼刀 向住 佢 猛掟 過去 。
馮錫范 個人 喺 水 裏頭 吖嘛 ，閃避 唔夠 靈活 ，眼見 鋼刀 掟 到嚟 喇 ，連忙 將 長劍 掟翻 出去 ，刀劍 噹 一聲 ，喺 空中 相交 ，撞出 幾星 火光 就 遠遠 飛開 跌咗 落 水 。
馮錫范 昧咗 入水裏 便 ，噉 就 唔見 人 。
胡逸之 暗暗 心驚 啊 佢 諗 ：
呢個人 水性 咁 使得 ，先頭 我 如果 同佢 一齊 落水 啊 ，實 畀 佢 害死 嘞 。
吳六奇 大聲 噉 話 ：百勝刀王 名 不虛傳 啊 ！
今日 得見 神技 ，令 人 大開眼界 。
請 上船 嚟 飲 翻 杯 呢 ？
胡逸之 話 ：滾攪晒嘞 。
飛身 一 跳 上咗 船 ，船頭 只係 微微 一沉唧 ，船身 竟然 一啲 搖晃 都 冇 嘅 。
韋小寶 就 唔明白 呢一 跳 幾 咁 高明 ，但係 吳六奇 、馬超興 呢 ，都 大為 佩服 。
吳六奇 拱手 行禮 話 ：在下 吳六奇 。
呢位 馬超興 兄弟 ，呢位 韋小寶 兄弟 。
我哋 都係 天地會 嘅 香主 。
胡逸之 戙起 手指 公話 ：
吳兄 ，你 身在 天地會 ，呢件事 好 秘密 嘅 ，如果 洩漏咗 風聲 ，全家 性命 都 保唔住 啊 。
今日 同 你 初次 相會 ，你居然 對 兄弟 毫不隱瞞 ，呢種 豪俠 氣概 ，令人 非常 佩服 啊 。
如果 信唔過 百勝刀王 ，兄弟 ，豈不是 係 卑鄙 小人 嘞咩 ？
胡逸之 好 歡喜 ，緊緊 握住 佢 隻手 話 ：
咁 多年嚟 ，兄弟 隱居 種菜 ，亦 不問 江湖 之 事 ，估唔到 今日 仲 能夠 結交到 鐵丐 吳 六奇 噉樣 一位 好 朋友 。
講完 ，拖住 手 噉 行 入 船艙 。
佢 對 馬超 興 、韋小寶 只係 微微 岌下 頭 唧 ，並唔係 點理 佢哋 。
韋小寶 見 佢 打敗咗 鄭克塽 嘅 師父 ，又 佩服 又 感激 ，就 話 ：
胡大俠 將馮錫范 打 咗 落水 ， 江 裏 便 嗰 啲 烏龜 啊 、 水魚 啊 ， 一定 咬 到 佢 全身 都 係 血 啫 。
半劍 有血 啊 ， 變成 無劍 有 血 咯 ， 哈 ， 哈哈哈哈 。
胡逸之 微微 一笑話 ：韋香主 ，你 擲骰仔 嘅 本事 真係 唔錯 噃 。
呢 句 説 話 本來 略有 譏諷 嘅 意思 嘅 ， 即 係 笑 佢 武功 唔 得 ， 淨 係 會 擲 骰仔 ， 作弊 嚟 呃 嗰 啲 羊 牯 。
不過 韋小寶 亦 唔 嬲 噃 ，反而 覺得 好得意 添 ，佢 笑住 話 ：
胡大俠 ，砌牌 嘅 本事 直情 係 一流 高手 啦 。
我哋 兩個 夾份 做 莊 ，贏咗 個 矮肥佬 好多 銀 喇 ，胡大俠 有 一半 嘅 ，等陣 就 分畀 你 。
韋香主 下次 做莊 ， 兄弟 仲 係 幫莊 。
同 你 對賭 啊 ，非 輸 不可 。
好啊 ，好啊 。
馬超興 又 吩咐 人 重新 開 枱 ，就 喺 船 裏 便 飲酒 。
胡逸之 飲咗 幾杯 酒 佢 話 ：
我哋 今日 既然 一見如故 ，兄弟 嘅 事 ，亦 唔敢 瞞 你 。
講起嚟就慚愧喇 ，兄弟 二十幾年 嚟 退出 江湖 ，隱居 昆明 城郊 ，唉 ，只不過 係 為咗 一個 女子 唧 。
韋小寶話 ：嗰個 陳圓圓 唱歌 ，其中 有 一句 叫做 英雄 ，英雄 咩嘢 是 多情 嘅 ，噉 既然 係 英雄 咯 ，當然 係 要 多情 㗎啦 。
吳六奇 眉頭 一皺 ，佢 諗 ：細佬哥 就 鐘意 亂噏 一通 ，你 識得 乜嘢 吖 ？
點知 胡逸之 面色 微微 一變 ，歎咗 口氣 慢慢 噉 話 ：
唉 ，英雄 無奈 是 多情 啊 ，吳梅村 呢 句 詩 ，做得 極之 好 。
不過 嗰個 吳三桂 並唔係 咩 英雄 ，佢 亦 唔係 多情 ，哼哼 ，只不過 係 個 好色之徒 唧 。
妻子 豈 應 關 大計 ，英雄 無奈 是 多情 。
韋香主 ，嗰日 你 喺 三聖庵 裏 便 聽 陳姑娘 唱 呢首 曲 ，真係 耳福 不淺 喇 。
我 喺 佢 身邊 住咗 二十三 年 ，斷斷續續 ，呢 首 曲 ，亦 只係 聽過 三 次 唧 。
最後 呢 一次 ，仲 係 託 你 嘅 福 聽到 㗎 咋 。
韋小寶 好奇怪 噉 話 ：你 ，你 喺 佢 身邊 住 咗 二十三 年 喇 ？
你 ，你 都係 陳圓圓 嘅 契 ，誒誒誒 係唔係 啊 ？
胡逸之 苦笑話 ：
呵呵 ，佢 ，佢 ，唉 ，佢 從來 正眼 都 冇 睇 我 一 眼 。
我 喺 三聖庵 裏 便 種 菜 掃 地 ，打 柴 擔 水 ，佢 一直 以為 我 係 個 鄉下 農夫 咋 。
吳六奇 同 馬超興 對望 咗 一 眼 ，都 覺得 好 驚奇 啊 ：
諗住 呢位 美刀王 ，必定 係 迷戀 陳圓圓 嘅 美色 ，以致 甘心 做 奴 做 僕 。
呢個人 嘅 武功 之 高 、聲望 之 隆 ，當年 喺 武林 ，都 算得 係 第一流 人物 嘞 。
居然 心甘情願 噉 去 做 呢啲 低三下四 嘅 人 ，真係 令人 費解 。
睇 下 胡逸之 ， 見到 佢 白髮蒼蒼 ， 鬍鬚 稀稀落落 ， 亦 都 係 白多 黑少 ， 滿面 皺紋 ， 皮膚 漆黑 ， 又 邊度 講得 上 一個 美字 呢 ？
嗱 各位 ，欲知 後事 如何 ，且 聽 下回 分解 。
