前 文 再續 啊 書 接上 一回 啊 。
話説 阿珂 滿腔 怨憤 ，唔認 阿爹 ，唔認 阿媽 ，又 唔認 師父 ，講講下 揞住 塊面 痛哭 起嚟 。
九難 歎咗 口氣 ，佢 話 ：冇錯 ，我 唔係 你 師父 ，我 將 你 喺 吳三桂 身邊 偷 咗 翻嚟 ，原來 就 唔係 好心 嘅 。
你 ，你自己 扯 啦 。
不過 你 親生 父母 ，唔好 唔認 啊 。
阿珂 𨂽 住 腳 噉 話 ： 我 唔 認 我 唔 認 ， 我 冇 爹 冇 媽 ， 亦 冇 師父 。
韋小寶 話 ：哈 ，不過 你 有 我 做 老公 啊 。
阿珂 嬲 到 極 啊 ，執起 一嚿 石頭 ，對住 佢 出力 噉 掟過去 。
韋小寶 閃開 。
阿珂 擰轉身 ，跟住 條 小路 向 西 便 猛咁 跑 。
韋小寶 話 ：喂喂喂 ，你 去 邊處 啊 ？
阿珂 停住 腳步 ，擰轉 身 佢 話 ：總有一日 ，要 你 死 喺 我 手上 。
韋小寶 唔敢 再 追 嘞 ，眼白白 噉 由得 佢 扯 。
九難 心情 抑鬱 ，向 李自成 擺 一擺手 ，一言不發 ，縱馬 就 走 。
韋小寶 話 ：岳父大人 啊 ，我 師父 唔 殺 你 喇 ，你 快啲 走 啦 。
李自成 嘅 心 亦 係 講唔出 咁 唔痛快 ，嬲嬲 噉 望住 韋小寶 。
韋小寶 畀 佢 睇 到 周身 寒毛 棟 篤 企 ， 佢 怕 喇 ， 退後 兩步 。
李自成 呸噉 一聲 ，喺 地下 𦧲咗 㞘口水 ，轉身 行 上 小路 ，大踏步 而去 。
韋小寶 擰擰 頭 佢 諗 ：
阿珂 連 父母 都 唔 認 嘅 ，我 呢個 老公 當然 係 更加 唔 認 啦 。
一回頭 ，見到 徐天川 同 高彥超 手執 兵器 企 喺 身後 便 。
佢 兩個 啊 ，怕 李自成 突然 行兇 ，傷害 咗 韋香主 啊 。
徐天川 話 ：呢個 人 當年 翻天覆地 ，斷送咗 大明 嘅 江山 ，到咗 老喇 ，仍然 係 咁 英雄氣概 喎 。
韋小寶 伸 下 條 脷 話 ：嘿 ，好 厲害 啊 。
啊係喇 ，罕帖摩 呢 ？有冇 帶埋嚟 啊 ？
徐天川 話 ：佢 係 個 緊要 人物 ，梗係 帶住 嚟 啦 。
好 ，兩位 務必要 小心 在意 ，唔好 畀 佢 半路 走咗 啊 。
噉 一行人 又 起程 嘞 。
韋小寶 過去 同 沐劍聲 、柳大洪 寒暄 。
沐劍聲 佢哋 嘅 心情 啊 亦係 非常之 唔好 ，佢 諗 ：
我 哋 呢 一班人 條命 ， 都 係 佢 救 嘅 ， 從今 之後 ， 沐 王府 仲點 能夠 同 天地會 爭 咩 長短 呢 ？
柳大洪話 ：韋香主 ，推冧 吳三桂 ，呢件事 我哋 亦 唔能夠 再 同 天地會 比賽 嘞 。
請你 稟告 陳 總舵主 ，就 話 沐王府 從此 對 天地會 甘拜下風 。
韋香主 嘅 相救 之 德 ，恐怕 呢 一生一世 我哋 都 報答 唔 了 喇 。
韋小寶話 ：柳大爺 ，乜噉講呢 ？大家 都係 死裏逃生 ，呢條命啊 ，人人 都係 執翻嚟 嘅 啫 。
柳大洪 好嬲 噉話 ：劉一舟 呢個 賊仔 ，總有一日 將 佢 千刀萬剮 ！
韋小寶 問嘞 ：係 佢 告密 㗎 ？
唔係 佢 仲 有 邊個 吖 ？
呢個 傢伙 ，呢個 傢伙 ！
講到 呢 處 ， 嬲 到 佢 鬍鬚 都 棟 篤 企 。
韋小寶 話 ：佢 留 喺 吳三桂 嗰 處 啊 ？
沐劍聲 話 ：多數 係 啦 。
嗰日 柳師父 派 佢 去 探聽 消息 ，佢 就 畀 吳三桂 嘅 手下 捉咗 去 。
當晚 ，大隊 兵馬 就 圍住 咗 我哋 嘅 住地 嘞 。
我哋 住得 好 秘密 嘅 ，如果 唔係 呢個 人 講 嘅 ，吳三桂 決 唔 能夠 知道 嘅 。
唉 ，可惜 敖大哥 為 國 殉難 。
韋香主 ，天地會 今後 如果 有 咩 差遣 ，姓沐嘅 自當 效命 。
青山 不改 ，綠水 長流 ，我哋 分別 嘞 。
韋小寶 話 ：呢處 仲 係 大漢奸 嘅 地界 噃 ，如果 有 咩 咿逳 ，噉 大家 一齊 喺 處 ，人手 多啲 好吖 。
等到 出咗 雲南 咯 ，我哋 先至 各走各路 呢 ？
沐劍聲 擰擰頭 話 ：多謝 韋香主 好意 ，如果 再 衰 喺 大漢奸 手上 ，我哋 亦 冇 面 再 做人 嘞 。
佢 個 心 諗 ：沐王府 已經 衰 到 貼地 嘞 ，再 靠 清廷 官兵 保護 ，仲 似 咩 樣 吖 ？
噉 帶領 沐王府 眾人 ，告別咗 就 走咗 嘞 。
沐劍屏 行 喺 最後 ，行咗 幾步 擰轉身 話 ：
我 走 喇 ，你 ，你要 好好 保重 啊 。
韋小寶 話 ：哦 ，你 自己 都 要 保重 啊 。
你 跟住 哥哥 ，唔好 返去 神龍島 喇 。
我 日日 都 會 掛住 你 㗎 。
沐劍屏 岌 一岌頭 ，細細聲 話 ：我 都 係 啫 。
韋小寶 牽過 自己 嗰 匹 馬 ，將 韁繩 交畀 佢 手 ，佢 話 ：我 呢匹 馬 畀 你 騎 啦 。
沐劍屏 眼圈 一 紅 ，接過咗 韁繩 ，騎 上 馬 ，追上 沐劍聲 佢哋 就 走咗 喇 。
話説 韋小寶 佢哋 行咗 幾日 ，離開 昆明 已經 好 遠 嘞 ，始終 唔見 吳三桂 派 兵馬 追 嚟 噉 大家 漸漸 放心 。
呢一日 ，上下 到 曲靖 ，傍晚 時分 有 四 騎馬 迎面 跑過嚟 。
有個人 翻身 下馬 ，對 驍騎 營 嘅 前鋒 話 有 緊急 軍情 ，要 稟報 欽差 大臣 。
韋小寶 得到 報告 就 即刻 接見 。
只見 當先 一個人 啊 ，身材 瘦小 面目 漆黑 ，正 話 想 問 佢 有 咩 軍情 咯噃 ，噉 啊 企 喺 佢 身後 嘅 錢 老本 忽然 話 ：
你 唔係 鄺兄 咩 ？
嗰個人 躬身 話 ：兄弟 鄺 天雄 ，錢 大哥 你好 。
韋小寶 睇 下 錢 老本 。
錢老本 岌一岌頭 低聲 話 ： 係 自己 人 啊 。
韋小寶 話 ：好 ，鄺老兄 辛苦喇 ，我哋 去 後 便 坐啦 。
噉啊 去到 後便 ，韋小寶 周圍 嘅 都係 天地會 嘅 兄弟 。
錢老本話 ：鄺兄弟 ，呢位 就係 我哋 青木堂 韋香主 嘞 。
鄺天雄 抱拳 躬身 話 ：天父 地母 ，反清復明 。
赤火堂 古香 主 屬下 鄺天雄 ，參見 韋香主 同 青木堂 眾位 大哥 。
韋小寶 話 ：原來 係 赤火堂 鄺大哥 ，幸會 ，幸會 。
錢老本 同 呢個 鄺天雄 ，當年 喺 湖南 見過 幾次 面 ，就 介紹 佢 認識 李力世 、祁彪清 、風際中 、徐天川 、玄貞道人 、高彥超 等等 。
鄺天雄 帶 嗰 三個 人 ，亦都係 赤火堂 嘅 兄弟 。
大家 知道 赤火堂 管轄 貴州 ，噉 再 行 幾 日 呢 ，就 到 貴州省 嘞 ，而家 有 本會 兄弟 嚟到 先 通 消息 ，個 心 都 好 歡喜 。
韋小寶 話 ：自從 同 古香主 喺 直隸 分手 ，一直 冇 再見面 ，古香主 一切 都 順利 吖 嘛 ？
鄺天雄 話 ：古香主 好好 。
佢 吩咐 屬下 問候 韋香主 同 青木堂 各位 大哥 。
我哋 知道 韋香主 同 各位 大哥 近來 做咗 好多 件 大事 ，十分 仰慕 ，今日 拜見 真係 三生有幸 啊 。
韋小寶 笑住 話 ：嚱 大家 都 自己 兄弟 啫 嘛 客氣 話 就 唔 講 嘞 。
我哋 再 過 幾日 就 到 貴省 ，希望 能夠 同 古香主 聚 下 。
鄺天雄 話 ：古香主 吩咐 屬下 稟報 韋香主 ，最好 請 各位 改路 向 東 便 行 ，唔好 經 貴州 。
韋小寶 同 群雄 都 愕然 嘞 。
鄺天雄 跟住 話 ：古香主 話 ，佢 好 想 同 韋香主 同埋 各位 大哥 見面 ，但係 最好 喺 廣西 。
韋小寶 問 ：點解 呢 ？
鄺天雄 話 ：我哋 得到 消息 ，吳三桂 派 咗 兵馬 分散 喺 宣威 、虹橋鎮 、新天堡 一帶 ，想 對 韋香主 同 各位 大哥 不利 啊 。
青木堂 群雄 都 吖噉 一聲 。
韋小寶 又 驚 又 嬲 佢 話 ：
死人頭佢嘩 ，呢個 奸賊 果然 唔肯 就噉樣 認輸 。
佢 連 個 仔 條 命 都 唔 要 喇 。
鄺天雄 話 ：吳三桂 非常之 陰毒 啊 ，佢 派 咗 唔少 好手 ，話 要 纏住 韋香 主 身邊 一 位 武功 極高 嘅 師太 ；
然後 將 佢 個 仔 、清廷 公主 同埋 韋香主 三個人 帶走 ，其餘 各人 啊 一律 殺死 滅口 喎 。
而家 曲靖 同埋 沾益 之間 嘅 松韶關 已經 封關 嘞 ，邊個 都 唔准 通行 。
我哋 四個人 啊 ，係 由 山間小路 混路 嚟 嘅 ，怕 韋香 主 得到 消息 遲過 頭 ，中 咗 呢個 大漢奸 嘅 詭計 ，所以 連日連夜 咁 趕路 啊 。
韋小寶 見 呢 四個人 眼 都 紅晒 ，腮 都 凹咗 ，顯然 係 疲勞 到 極 嘞 就 話 ：
四位 大哥 真係 辛苦 嘞 ，真係 好 感激 啊 。
鄺天雄 話 ：總算 將 消息 及時 送到嚟 ，冇 誤咗 大事 。
講起嚟 都 好 安慰 。
韋小寶 問 青木堂 啲 人 話 ：各位 大哥 認為 點樣 做好 啊 ？
錢老本話 ：鄺大哥 知唔知道 吳三桂 埋伏 嘅 兵馬 ，總共有 幾多人 呢 ？
鄺天雄 話 ：吳三桂 嚟唔切 喺 昆明 派兵 ，聽講 係 飛鴿 傳書 ，調齊 咗 滇北 同 黔南 嘅 兵馬 ，總共有 三萬 幾 人 啊 。
大家 聽到 一齊 鬧 啦 。
韋小寶 帶領 嘅 部屬 不過 二千幾 人 ，仲 冇 對方 嘅 一成 ，當然 係 寡 不敵 眾 嘞 。
錢老本 又 問 ：古香 主要 我哋 去 廣西 邊處 會面 啊 ？
鄺天雄 話 ：古香主 已經 派人 通知 廣西 家 後堂 馬香主 ，韋香主 如果 同意 呢 ，三位 香主 就 喺 貴西 潞城 會面 。
喺 呢處 由 東 便 行 ，去 潞城 條 路 就 唔係 點 好 行 嘅 ，而且 路程 亦 遠 ，不過 就 冇 吳三桂 嘅 兵馬 把守 ，家 後堂 兄弟 沿 路 接應 ，應該 唔會 出 亂子 嘅 。
韋小寶 聽見 吳三桂 派咗 三萬幾人 攔截 ，個心 啊 唔知 幾 寒 。
而家 一聽 古香主 已經 佈置 妥當 嘞 ，馬香主 派 人 接應 ，當堂 精神 大振 佢 話 ：
好 ，我哋 就 去 潞城 。
吳三桂 你個 老蚊公 死龜蛋 吖 ，總有一日 要 畀 啲 好嘢 你 歎 下 。
噉啊即刻下令改向東南 ，叫 鄺天雄 等 四個人 呢 坐 喺 大車 裏 便 休息 。
嗰班 官兵 聽 講話 吳三桂 派 咗 兵 喺 前 便 攔截 ，個個 又 驚 又 嬲 啊 。
因為 都 知道 身在 險地 ，所以 就 加緊 趕路 ，一路 都 唔敢 驚動 官府 ，每晚 都 喺 荒郊 扎營 唧 。
呢一日 ，嚟到 潞城 嘞 。
天地會 家 後堂 香主 馬超興 、 赤火堂 香主 古至 中 ， 以及 兩堂 屬下 嘅 為 首 兄弟 都 已經 喺 潞城 等候 。
三堂兄弟 相會 ，當然 有 一番 親熱 嘞 。
當晚 馬超興 大排筵席 ，為 韋小寶 及 青木堂 群雄 接風 。
席上 群雄 講起 沐王府 從此 對 天地會 甘拜下風 ，都係 興高采烈 啊 。
散咗席之後 ，赤火堂 探子 嚟 報告 ，話 吳三桂 部屬 ，知道 韋小寶 改道 入 廣西 ，就 帶兵 急追 ，到咗 廣西邊境 就 唔敢 再 追過嚟 ；
已經 急報 昆明 請示 ，係唔係 改扮 盜賊 ，潛入 廣西 境內 行事 噉 。
馬超興 笑 住 話 ： 廣西 又 唔 歸 吳三桂 管轄 呢 ， 呢 個 奸賊 ， 如果 帶兵 越境 就 係 公然 造反 咯 。
佢 如果 派兵 改扮 盜賊 ，想 將 呢筆 賬 推 喺 廣西 孔四貞 頭上 ，不過 咁 匆忙 都 嚟唔切 啦 ，哈哈哈哈哈 。
噉 眾人 喺 潞城 唞 咗 一 日 。
韋小寶 覺得 離開 雲南 仲 係 太 近 嘞 ，個 心 怕 喇 ，催住 起行 。
第三日 早晨 同 古至中 以及 赤火堂 眾 兄弟 分別 之後 ，帶住 隊伍 向 東 行 。
噉 馬超興 同 家 後堂 眾 兄弟 一路 陪住 佢哋 。
眼見 離開 雲南 越嚟越遠 ，韋小寶 亦 漸漸 放心 。
話説 行咗 好幾日 ，一嚟到 廣西中部 ，嗰班 侍衞官兵 就 唔驚嘞 ，一唔驚唧 就 故態復萌 嘞噃 ，又 試 嚟 勒索 州縣 騷擾 地方 。
呢一日 ，嚟到 柳州 ，噉 當地 知府 聽見 話 公主 嚟到 唄 ，就 竭力 巴結 供應 就 不在 話下 啦 。
一班 御前侍衞 同埋 驍騎營 官兵 ，亦係 如魚得水 啊 ，喺 城內 到處 猛食猛玩 。
第三日 挨晚 ，韋小寶 喺 廂房 同 馬超興 以及 天地會 眾 兄弟 閒談 。
御前侍衞領班 張康年 匆匆忙忙 入嚟 ，叫咗聲 ：韋副總管 。
就唔再講落去嘞 ，神色啊 非常 尷尬 。
韋小寶 見 佢 左便 塊面 就 腫起咗 一嚿 ，右眼 烏黑 ，顯然 係 同人 打交 吃咗虧 啊 ，佢 諗 ：
御前侍衞 唔 去 打 人人 哋 已經 偷笑 啦 ，有 邊個 咁鬼 大膽 竟然 膽敢 打 佢 呢 ？
佢 唔想 御前侍衞 喺 天地會 兄弟 面前 丟架 ，就 對 馬超興 話 ：馬大哥 隨便 坐 ，兄弟 失陪 下 先 。
馬超興 笑住 話 ：好話 ，韋爵爺 請便 啦 。
韋小寶 同 張康年 出 咗 廂房 ， 張康年 就 話 嘞 ：
稟告 副總管 ，趙二哥 畀 人哋 扣押 咗 啊 。
佢哋 講 嘅 趙二哥 就係 御前侍衞 嘅 另一個 領班 趙齊賢 嘞 。
韋小寶 話 ：豈有此理 邊個 咁 大膽 啊 ？係 柳州 守備 呢 ，定係 知府 衙門 唧 ？
犯咗咩嘢罪啊 ？殺咗人啊 ？
佢 諗住 如果 唔係 犯咗 人命案 啊 ，當地 官府 決 唔敢 扣押 御前侍衞 嘅 。
張康年 扭 扭怩 怩 佢 話 ： 唔 係 官府 扣押 嘅 係 ， 喺 賭場 啊 。
韋小寶 哈哈大笑話 ：哈哈哈哈哈 ，死人頭 佢 嘩 ，柳州城 嘅 賭場 有 膽 扣押 御前侍衛 真係 天大 新聞 嘞 。
你哋 輸 咗 錢 呢 係咪 呢 ？
張康年 岌一岌 頭 苦笑話 ：
我哋 七個 兄弟 去 賭錢 ，賭 大細 。
叉叉佢吖 呢個 賭場 有 鬼 啊 ，竟然 連 氣 開 十三 鋪 大 ，我哋 七 個 人 已經 輸咗 千幾 兩 銀 嘞 。
第十四鋪 ，趙二哥 同 我 都 話 喇 呢 一次 啊 非 開 細 不可 。
韋小寶 擰擰 頭 話 ：錯喇 噉就 ，多數 仲 係 開大 。
唉 ，可惜 我哋 冇 請 副總管 帶埋 我哋 去 賭 呢 ，否則 亦 唔會 上 呢個 當 嘞 。
噉 我 哋 七個 人將 身邊 銀 啊 銀票 啊 都 扲 晒 出 嚟 ， 一 於 買 個細 ， 唉 。
哈哈哈哈哈 ，開大 ，係咪 呢 ？
張康年 雙手 一攤 ，作個 無可奈何 狀 佢 話 ：
荷官 就要 收銀 ，我哋 就唔畀 ，我哋 話 天下 賭場 ，邊度 有 連氣 開 十四 鋪 大 㗎 ？實係 作弊 。
噉 呢個 時候 賭場 主人 啊 出嚟 做 和事佬 嘞 ，話 呢次 唔算 喇 唔食 又 唔賠 噉 。
趙二哥 話 唔得 ，呢次 本來 係 細 嘅 ，荷官 做咗 手腳 ，我哋 已經 輸 咗 咁多 錢 嘞 ，呢次 明明 係 贏 嘅 ，點 能夠 話 唔算 喇噉 。
韋小寶 笑住 話 ：哈哈 死人頭 你 嘩 ，你哋 呢班 嘢 啊 唔 要 面 ，明明 輸咗 嘞 走去 撒賴 。
莫 講話 連 氣 開 十四 鋪 大 啊 ，連 氣 開 廿四 鋪 啊 我 都 見過 啊 。
張康年 話 ：嗰個 賭場 主人 亦都係 噉 講 。
噉趙二哥就話啦 ：我哋 北京城 內 天子 腳下 ，就 冇 呢個 規矩 。
噉 趙二哥 一 發脾氣 咯 ， 我 咪 掹 刀 出 嚟 囉 。
賭場 主人 嚇到 面 都 青晒 ，話 ：
誒 承蒙 各位 侍衞 大人 睇得起 ，嚟到 玩 幾手 ，我哋 點 敢 贏 各位 大人 嘅 錢 啦噉 。
噉 各位 大人 輸咗 幾多 錢 啊 ？小人 全數 奉還 就係 喇 。
趙二哥 就 話 ：我哋 冇 輸 ，不過 畀 你 呃咗 三千一百五十三 兩 銀唧 。
零頭 亦 唔 要 喇 ，算 我哋 倒霉 ，你 還翻 三千 兩 畀 我哋 就 算 啦 噉 。
韋小寶 哈哈大笑 ，一便 行入 花園 一便 問 ：哈哈哈哈哈哈 ，噉咪 發財 ？佢 賠唔賠 啊 ？
賠 ，開賭場 嘅 主人 啊 的確 豪爽 嘅 ，佢 話 交朋友 義氣 為 先 ，噉 捧 咗 三千 兩 銀 交畀 趙二哥 。
趙二哥 接咗 ，多謝 都 冇 聲 ，只係 話 ：
你 識 做 ，算 你好彩 ，下次 如果 再 作弊 呢 ，就 唔 放過 你 噉 。
韋小寶 皺住 眉頭 話 ：噉 就係 趙齊賢 唔啱 喇 。
人哋 畀面 你 ，又 等 你 雙手 捧住 白雪雪 嘅 銀走 ，真係 又 有面 又 實惠 ，噉 仲 講 啲 説話 嚟 做 乜鬼 吖 ？
噉唔係 ，趙二哥 如果 講 幾句 好聽啲 嘅 説話 ，多謝 佢 一聲 ，就 冇事 嘞 。
不過 佢 攞咗 銀 仲 講 說話 踩人 。
冇 錯 喇 。
我哋 喺 江湖 上 撈 碗飯 食 ，偷呃拐騙 乜嘢 都 唔 緊要 ，就係 唔能夠 得罪 朋友 。
係 ，係 。
張康年 諗 ：
我哋 明明 喺 皇宮 裏 便當 差 ，你 係 官 封 欽差 大臣 、一等 子爵 ，點解 叫做 喺 江湖 上 撈 碗 飯 食 唧 ？
韋小寶 又 問 ：噉 點解 又 打起上嚟 呢 ？個 賭場 主人 武功 好 高 㗎 ？
張康年 話 ：噉 就 唔係 。
我哋 七個人 攞咗 銀 ，正話 想 行出 賭場 ，有 個 賭客 忽然間 鬧起上嚟 話 ：
車 發財 咁 容易 ，我 念到 個 屁 咩 ，
不如 大家 啊 都 去 皇宮 侍候 皇帝 嗰個 。
誒 副 總管 ， 呢 個 反賊 講到 皇上 嘅 時候 呢 ， 講 咗 啲 極之 唔 尊敬 嘅 説 話 ， 嗯 嗯 ， 嗯 ， 我 唔 敢 學 佢 講 嘞 。
我 明白 嘅 ，哈 呢個 嘢 膽 都 唔 細 噃 。
噉 唔 係 ， 噉 我 哋 一 聽 梗 係 火滾 啦 。
趙二哥 將 啲 銀 呢 喺 枱 上面 一 掉 ，拔出 把 刀 ，左手 就 去 揦 嗰個 人 嘅 心口 。
嗰個人 嘭噉 一拳 ，就 將 趙二哥 打到 暈咗 。
噉 我哋 六個人 就 一齊 逳手 嘞噃 。
嗰 個 反賊 嘅 武功 啊 真 係 高 啊 ， 我 睇 都 冇 睇 清楚 唧 ， 塊面 就 捱 咗 一拳 ，𢴈 咗 出去 賭場 外 便當 堂 昏天黑地 ， 噉 收尾 點樣 我 就 唔 知 嘞 。
等到 醒翻 ，只見 趙二哥 同 五個 兄弟 都 瞓晒 喺 地下 。
嗰個人 一隻腳 踩住 趙二哥 個 頭殼 佢 話 ：
呢處 六 隻 畜生 ，一千 兩 銀 一 隻 。
嗱 你 快啲 返去 攞 銀 嚟 贖 。
老子 只係 等 你 兩個 時辰 咋 ，過得 兩個 時辰 仲 唔見 銀 ，老子 要 劏 嚟 另 賣 。
十兩 銀 一 斤 ，如果 生意 唔 曳 呢 ，一隻 畜生 亦 賣得 千多 兩 銀 嘅 噉 。
韋小寶 又 覺得 好笑 又 有啲 吃驚 ，佢 問 ：
呢個 嘢 係 咩 嘢 人馬 啊 ？你 睇 唔 睇得出 嚟 啊 ？
張康年 話 ：呢個人啊 ，個頭 好高大嘅 ，拳頭 大過 飯碗 ，成面 都係 花白 絡腮鬍鬚 ，着得 破破爛爛 ，就好似 ，好似 個乞衣噉 。
佢 有 幾多 人 嚟 啊 ？
嗯 ，佢 有 ，誒誒 屬下 就 唔係 點 清楚 喇 。
賭場 裏 便 啲 賭客 啊 嗰個 時候 有 十七八 個 ，都 唔知 係咪 佢哋 一班 人 嘅 。
韋小寶 知 佢 畀 人 打 到 昏天黑地 ，當時 係 只求 甩身 ，亦 唔敢 睇 咁多 㗎嘞 ，佢 諗 ：
嗰個 老乞衣 實係 江湖上 嘅 英雄好漢 ，見到 啲 侍衞 賭 得 咁 冇品 就 忍唔住 出手 ，話 劏 咗 佢哋 嚟 賣 ，亦 唔 見得 嘅 。
我 睇 亦 冇 邊個 肯 出 十兩 銀 去 買 趙齊賢 一 斤 肉 。
不過 我 如果 調動 大隊 人馬 去 打 佢 一個 人 又 唔係 好漢 行為 啊 。
呢個 老乞衣 武功 咁 叻 ，如果 求 師父 去 對付 佢 噉 當然 係 手到擒來 啦 ，不過 師父啊 點 肯 去 為 皇宮 嘅 侍衛 出力 呢 ？
呢件事 如果 畀 馬香主 佢哋 知道咗 ，就 會 笑 我 屬下 呢啲 侍衞 咁 水皮 啫 。
噉 韋小寶 覺得 派 風際中 、徐天川 佢哋 去 亦都 唔 妥 。
突然間 佢 諗起 兩個人 喇 ，哈 佢 有 計 喇 。
嗱 各位 ，欲知 後事 如何 ，且 聽 下回 分解 。
