前 文 再續 啊 書 接上 一回 啊 。
話説 吳立身 就 假扮 鄉下佬 ，要 阿珂 嫁 畀 佢 兄弟 。
阿珂 呢 世人 呢 最 驚怕 就係 呢趟 咯 ，嚇到 佢 連 説話 都 講唔出 。
啱晒啦吳立身話 ：好極喇 ，你應承喇 。
右手 一揮 ，班人 停咗 鑼鼓 。
阿珂話 ： 哎呀 冇 啊 ， 冇 啊 ， 我 冇 應承 啊 ， 你 哋 快 啲 殺 咗 我 啦 。
吳立身 話 ：好 ，我 而家 就 殺咗 你 ，連 你 師弟 都 殺埋 。
講完 ，攞咗 敖彪 把 鋼刀 ，高高噉 舉起 。
阿珂 喊 嘞 ： 你 快 啲 殺 ， 唔 殺 嘅 唔 係 好漢 ， 你 ， 你 快 啲 殺 咗 我 師弟 啦 ， 你 ， 你 殺 佢 先 啦 。
吳立身 就 睇咗 韋小寶 一眼 ，個心 話 ：
呢個 姑娘 對 你 咁 無情無義 ，你 又 何必 娶 佢 呢 ？
韋小寶 個 心 亦 喺度 鬧 佢 ：臭妹釘 ，點解 要 殺 我 先 啊 ？
吳立身 發惡話 ：我 偏偏 唔 殺 你 師弟 ，阿狗 ，將 呢個 衰仔 拉 出去 斬頭 。
講完 ，指一指 鄭克塽 。
敖彪 應 佢 話 ：係 。就 去 拉 鄭克塽 咯 喎 。
阿珂 大吃一驚 話 ：唔好啊 ，唔好啊唔好害佢啊 ，佢 係 唔殺得㗎 ，佢阿爹 ，誒 佢阿爹 。
好啦 ，噉 你 做唔做 我 弟婦 吖 ？
唔做 ，你 ，你殺死我啦 。
吳立身 掉咗 鋼刀 ，攞起 條 馬鞭 佢 話 ：我 唔 殺 你 ，鞭 你 一百 鞭 先 。
吳立身 嬲 起上嚟 一時 難以 遏止 ，舉起 馬鞭 喺 空中 啪噉 一聲 ，虛擊 一鞭 ，跟住 就 要 鞭落嚟 嘞 。
韋小寶 話 ：咪住 ！
吳立身 話 ：做咩啊 ？
我哋 英雄好漢 ，講究 義氣 吖嘛 ，我 同 師姐 係 好似 同胞 手足 噉 ，呢一百鞭 你 打 我 啦 。
阿珂 見到 吳立身 惡屎 騰騰 噉 舉起 條 馬鞭 ，早就 嚇到 慌晒 嘞 。
聽 韋小寶 噉樣 講 ，個 心 唔知 幾 歡喜 ，就 話 ：師弟 ，你 真係 好人 喇 。
韋小寶 對 吳立身 話 ：喂 ，老兄 ，咩嘢事 都 由 我 一力 擔當 ，嚱 ，呢啲 就 叫做 大丈夫 不怕 危難 ，挺身而出 。
你唔好逼佢嫁你細佬喇 ，你如果有咩姊姊妹妹嫁唔出去嘅 ，由我嚟同佢拜堂成親啦 。
呢個 鄭公子 已經 娶咗 一個 咯 ，我 再 娶 一個 ，連氣 推銷 咗 兩個 都 怕 差唔多 嘞啩 ？
噉 如果 仲有 ，一齊 嫁畀 我 啦 老子 爛銅爛鐵 冚𠾴唥 都 收 啊 。
佢 講到 呢處 吳立身 佢哋 都 哈哈大笑 。
阿珂 忍唔住 都 笑嘞 ，不過 呢 ，只係 笑咗 一下 唧 ，想起 自己 咁 委屈 ，又 流出 眼淚 。
吳立身 笑住 話 ：哈哈哈哈 ，你 呢個 細路 吖 ，好識 做人 ，係 條 漢子 。
我 本來 想 即刻 放咗 你哋 嘅 ，不過 畀 你 講 幾句 説話 就 嚇窒晒 ，噉 老子 太過 衰牌 啦 。
拜堂 成親 嘅 事 係 一定 要辦 嘅 ， 噉 到底 係 你 拜堂 ， 定 係 佢 啊 ？
阿珂 急於 甩身 嘞 ，就 連忙 話 ：係 佢 啊 ，係 佢 啊 。
吳立身 睩 大 雙眼 望 實 佢 ，大聲 話 ：你 話 要 佢 拜堂 成親 係嘛 ？
阿珂 有啲 慚愧 嘞 ，耷低頭 話 ：係 。
好 。
吳立身 指住 韋小寶 大聲 話 ：今日 非要 你 同人 拜堂 成親 不可 。
韋小寶 望住 阿珂 話 ：我 ，誒 我 。
阿珂 低聲 話 ：師弟 ，你 今日 救 我 脱離 大難 ，我 永遠 都 唔會 忘記 嘅 ，你 應承 佢 啦 。
韋小寶 愁眉苦臉 話 ：嗯 你 要 我 拜堂 成親 啊 ，唉 你 知道 啦 呢 件事 好 為難 㗎 。
我 知道 ，你 今日 如果 唔 幫 我 呢個 大 忙 ，我 唯有 一頭 撞死 佢 嘅 啫 。
我 ， 我 無可奈何 ， 只有 求 你 啦 ， 佢 哋 啊 ， 佢 哋 好惡 㗎 。
嗱 師姐 ， 今日 係 你 開口 求 我 ， 我 韋小寶 啊 只有 勉為 其難 應承 你 係 啦 。
係你求我拜堂成親㗎 ，唔係 我 自己 願意 㗎 係咪啊 ？
係 ， 係 我求 你 嘅 。
你 係 英雄好漢 ，大丈夫 挺身而出 ，濟人之急 ，又 ，又 最 聽 我 話 嘅 。
唉師姐 ，我 對 你 一番 心意 ，你而家 總算 明白 喇 。
無論 你 叫 我 做 乜嘢 事 ，我 都 一啖 應承 ，眉頭 都 唔會 皺 下 嘅 。
你既然要我拜堂成親 ，我梗係應承嘅 。
我 知道 你 對 我 好好 ， 以後 ， 以後 我亦會 對 你好 嘅 。
吳立身 話 ：一於 係 噉啦 。
細路 ，我 啊 冇 個 妹 嫁 畀 你 嘞 ，個 女 呢 只有 三歲 大 亦 唔得 。
喂 ，你哋 有 邊個 有 姊姊 妹妹 嘅 快啲 去 叫嚟 ，同 呢個 小英雄 拜堂 成親 啦 。
敖彪 啊 笑 住 話 ： 呵呵 ， 我 啊 冇 喇 。
另外 有 個人 話 ： 呢 位 小 英雄 義薄雲天 ， 如果 我 同 佢 做 咗 親戚 啊 ， 我 就 行運 咯 ， 可惜 我 只有 兄弟 冇 姊妹 呢 。
又 有 個人 話 ：我 家姐 早就 嫁咗 人 咯 ，已經 生咗 八 個 細路 。
小英雄 ，你 如果 等得 呢 ，等 我 姐夫 大死咗 咯 ，我 叫 我家姐 改嫁 畀 你 吖 。
吳立身 話 ：唓 ，點得㗎 ，唔等得啊 。
邊 一個 有 現成 㗎 ？
噉 眾人 都 擰頭 話 ：冇啊 。個個 顯得 錯過 良機 可惜 到 極 噉樣 。
韋小寶話 ：嗱 各位 朋友 ，唔係 我 唔肯 啊 ，不過 係 你哋 冇 姊妹 咋 ，噉 就 放咗 我哋 啦 。
吳立身 擰頭 話 ：唔得 ，大丈夫 一言既出 ，駟馬 難追 。
今日 啊非 拜堂 不可 ，否則 衝撞 咗 煞神 太歲 ，呢度 啊 一個 二個 都 要 死於 非命 ，噉嘅 玩笑 都 開得 嘅 咩 ？
好 ，你 就 同佢 拜堂 成親 啦 。
講完 向 阿珂 一 指 。
阿珂 同 韋小寶 一齊 話 ：哎呀 唔好啊 ，唔好啊 。
吳立身 話 ：有 咩 叫做 好 唔好 啊 ？
姑娘 仔 ， 你 情願 同 我 細佬 拜堂 呢 ， 定 係 同 呢 位 小 英雄 拜堂 啊 ？嗱 你 自己 揀 一個 啦 。
阿珂 唂 到 塊 面 紅晒 ，佢 擰擰頭 話 ：都 唔同 。
到 呢個 時候 仲 喺度 推三推四 。
時辰 到嘞 錯過 呢個 好 時辰 啊 ，兇煞 降臨 ，呢度 冇 一 個 人 有 命 啊 。
喂 ，阿三 ，阿狗 ，呢 兩個 嘢 唔 肯 拜堂 成親 ，將 佢哋 兩個 嘅 鼻哥 都 割咗 落嚟 。
敖彪 同 一名 師弟 齊聲 答應 ，就 攞起 鋼刀 ，將 刀身 喺 阿珂 嘅 鼻哥 上面 擦 咗 幾 擦 。
阿珂 死 就 唔 怕 噃 ，但係 想到 割咗 鼻哥 噉 唔係 好 醜樣 ？哎呀 驚到 佢 塊 面 啊 全 無 血色 。
韋小寶 話 ：唔好 割 我 師姐 嘅 鼻哥 喇 ，割 我 㗎 啦 。
吳立身 話 ：要 割 兩個 鼻哥 嚟 祭 煞神 ，你 只有 一個 啫 嘛 。
喂 ，鄭某人 ，割埋 你 嘅 鼻哥 嚟 代 呢個 姑娘 㗎 啦 ，好唔好啊 ？
阿珂 望住 鄭克塽 ，眼光 之中 露出 乞憐 嘅 意思 。
鄭克塽 擰轉頭 唔敢 望佢 嘞 ，不過 呢 就 擰擰頭 。
吳立身 就 話 ：呢個 衰仔 唔肯 啊 ，你 師弟 就 肯 。
嘿 ，你 師弟 對 你 啊 好得多 喇 ，呢種 人 唔 嫁 又 嫁 邊個 吖 ？拜堂 ，奏樂 ！
喺 鑼鼓聲 中 ，敖彪 又 過去 攞 咗 假 新娘 頭上 嘅 紅巾 ，褸 喺 阿珂 頭上 ，解開 咗 佢 雙手 。
阿珂 出手 就係 一拳 啊 ，啪 一聲 ，打正 佢 心口 ，好在 佢 冇 咩 內力 唧 ，雖然 打中 就 唔係 點 痛 嘅 。
敖彪 打橫 把 鋼刀 ，晾 喺 佢 條 頸 嘅 後便 。
吳立身 讚禮喇 ：新郎 新娘 拜 天 ！
阿珂 只 覺得 後 便條 頸 肌膚 一 涼 ，微微 有啲 痛 ，無可奈何 嘞 ，只有 同 韋小寶 一拍 噉 向 外 跪拜 。
吳立身 又 話 ：新郎 新娘 拜 地 。
敖彪 又 推轉 佢 個 身 ，向 內 跪拜 。
吳立身 話 ：夫妻 交拜 。
兩個人 面對面 噉 跪低 拜咗 幾 拜 。
吳立身 哈哈大笑話 ：哈哈哈哈哈哈 ，新夫婦 謝媒 。
阿珂 嬲 到 極 喇 ，突然 飛起 一 腳 ，踢中 佢 小腹 。
呢一腳 好大力啊 ，吳立身 一聲 大叫 褪 後 幾步 ，猛咁 咳佢 笑住 話 ：嘿嘿嘿 ，你嘅 新娘 咁 惡 嘅 ，連 媒人 都 踢 噃 。
就喺呢個時候 ，聽見 祠堂 外 便 猛咁 吹 唿哨 ，東南西北 都有 腳步聲 ，至少啊 都有 四五十 人 。
吳立身 即刻 收起 笑容 ，佢 話 ：吹熄 蠟燭 。
祠堂 裏 便 即時 一團 漆黑 啊 。
韋小寶 衝到去 阿珂 身邊 ，拖住 佢 隻手 低聲 話 ：外便 有 敵人 嚟 啊 。
阿珂 好 激氣 啊 ，佢 嗚噎住 話 ：我 ，我 同 你 拜咗 天地 喇 。
我啊真係求之不得喇 ，不過 拜天地 拜得 太過 馬虎啲 唧 。
唔算數㗎 ，你 估 係 真㗎 ？
哈 ，噉 仲有 假 嘅 ？呢啲 叫 生米煮成熟飯 ，木已成狗 吖 嘛 。
咩 叫做 木已成狗唧 ，木已成舟 啊 。
哈 冇錯冇錯 ，木已成舟 。
娘子 學問 真係 好 嘞 ，以後 呢 ，多啲 教 下 我 相公 吓 。
阿珂 聽見 佢 居然 厚住 面皮 ，叫起 娘子 相公 嚟 嘞 ，個 心 一 急 ，就 喊 嘞 。
呢陣時 ，祠堂 外 便 好 嘈 啊 ，幾十 人 齊聲 吶喊 ，嘰里咕嚕 ，都 唔知 喺度 叫 啲 乜嘢 。
阿珂 個 心 好 怕 ，不由自主 噉 向 韋小寶 挨過去 。
韋小寶 用 手 攬住 佢 低聲 話 ：唔使 怕 㗎 。
啊 好似 係 大批 西藏 喇嘛 嚟 進攻 啊 。
阿珂 話 ：噉 點算 啊 ？
韋小寶 拉住 佢 隻手 ，靜靜 行到 去 神庵 後 便 。
突然 間 火光 耀眼 ， 幾十人 湧入 嚟 祠堂 ， 手上 都 揸 住 火把 兵器 ， 韋小寶 同阿珂 一 見到 啊 都 係 大吃一驚 啊 。
呢班人 塊面 ，油到 花哩花綠 ，頭上 又 插咗 雀毛 ，上身 赤裸 ，腰間 就 圍住 獸皮 ，心口 同 手臂 都 畫咗 花紋 嘅 ，原來 係 一班 生番 。
阿珂 見到 呢班 蠻子 人 唔似 人 鬼 唔似 鬼 ，個個 面目 猙獰 ，更加 怕得 厲害 啦 ，縮 喺 韋小寶 懷抱 啊 一味 發抖 。
班蠻子 啊 嘰裡呱啦 猛咁 叫 ，當先 一個人 話 ：漢人 ，唔好 ，都 殺喇 ！蠻子 ，好人 ，要 殺人 ！咕花吐魯 ，阿巴斯里 。
班 蠻子 放聲 大叫 講 嘅 都係 蠻話 。
吳立身 係 雲南 人 吖嘛 ，佢 又 識得 夷語 嘅 ，但係 呢啲 蠻子 嘅 説話 就 一句 都 唔 識 。
佢 用 夷語 話 ：我哋 漢人 係 好嘅 ，大家 唔 殺 。
嗰個 蠻子 首領 仍然 話 ：漢人 ，唔好 ，都 殺 喇 ！咕花 吐魯 ，阿巴斯里 。
班 蠻子 齊聲 高叫 ：咕花 吐魯 ，阿巴斯里 。
舉起 大刀 鋼叉 殺過嚟 。
噉 眾人 冇 法子 嘞 ，唯有 舉起 兵器 迎敵 。
打咗 幾個 回合 唧 ，吳立身 佢哋 好 驚奇 啊 。
原來 嗰班 蠻子 武藝 精熟 ，兵器 招數 中規中矩 ，一攻一守 都有 尺寸 ，完全 唔係 亂斬亂殺 嘅 。
再拆得幾招 ，韋小寶 同 阿珂 都 睇出嚟 喇 。
吳立身 一便 打 一便 話 ：大家 因住 啊 ，呢啲 蠻子 學過 我哋 漢人 武功 ，唔好 輕視 啊 。
為首嘅蠻子 話 ：漢人 殺法 ，蠻子 都會 ，唔怕 漢人 。咕花吐魯 ，阿巴斯里 。
蠻子人 又 多 ，武功 又 非常 使得 。
沐王府 啲 人 個個 係 以 一 敵 三 或者 以一敵四 㗎 ，好快 脆 就 連 二 接 三 噉 打 輸 喇 。
吳立身 揮刀 同 嗰個 首領 猛打 ，竟然 佔唔到 一啲 便宜 ，就 越鬥越 驚 。
鬥咗 一陣間 ，兩名 弟子 受傷 跌倒 嘞 。
又過咗一陣 ，敖彪 隻腳 啊 畀 獵叉 㓤中 ，一跤 𢴈 喺 地 ，三名 蠻人 就 撲上去 捉住 佢 。
冇 幾耐 ，沐王府 十幾個 人 冚𠾴 唥 畀 人 打倒 晒 。
鄭克塽 呢 早就 周身 係 傷 ，稍為 抵抗 就 畀 人 撳住 。
班 蠻人 身上 啊 帶住 牛筋 嚟 嘅 ，將 眾人 綁起 上嚟 ，嗰個 蠻子 頭領 ，跳上跳落 猛咁 講 蠻話 。
吳立身 個 心 暗暗 叫苦 嘞 ，想話 要 逃走 啦 ，不過 又 掛住 韋小寶 同埋 班 弟子 ，就 奮力 狠鬥 。
希望 能夠 制服 呢個 首領 ，就 逼 佢哋 罷手 放人 嘅 。
突然 嗰個 首領 迎頭 揮刀 斬落嚟 ，吳立身 舉刀 擋格 ，咣 一聲 ，隻手 有啲 痹嘞 。
突然間 覺得 背後 一棍 貼地 掃過嚟 ，咪 急忙 跳起 閃避 。
嗰個 首領 單刀 一翻 ，已經 晾 喺 佢 條 頸 處 嘞 ，佢 話 ：漢人 ，輸 喇 ！蠻人 ，唔 輸 喇 ！
吳立身 擰 下個 頭 長歎 一聲 ，掟咗 把 刀 由得 佢哋 綁 啦 。
眾蠻子 啊 舉起 火把 到處 咁 搜查 。
韋小寶 睇住 匿唔住 喇 ，拉住 阿珂 向 外 便 就 跑 佢 話 ：
蠻子 ，好人 ，我哋 兩個 ，都係 蠻子 ，咕花吐魯 ，阿巴斯里 。
噉就 走咯 噃 。
嗰個 首領 一 伸手 捉住 阿珂 。
另外 三名 蠻子 撲上嚟 攬住 韋小寶 。
嗰個 蠻子 首領 一 見到 佢 ，忽然間 打個 特 ，一手 將 韋小寶 抱住 ，佢 話 ：
希呼阿布 ，奇里溫登 。
噉 抱住 佢 行 出 祠堂 。
韋小寶 大驚 啊 擰轉頭 對 阿珂 話 ：
娘子啊 ，呢個 蠻子 要 殺 我 啊 ，你 要 同 我 守寡 啊 唔能夠 改嫁 呢個 。
説話 都 未 講完 ，已經 畀 嗰個 首領 抱 出去 大門 外 便 嘞 。
嗰個 蠻子 首領 走咗 十幾 丈 遠 之後 ，將 韋小寶 放翻低 ，佢 話 ：
桂公公 ，點解 你 喺 呢處 啊 ？
聽 佢 啲 聲 呢 又 驚奇 又 歡喜 。
韋小寶 驚喜 交集 佢 話 ：你 ，你呢個 蠻子 識得 我 啊 ？
嗰個人 笑住 話 ：小人 係 楊溢之 啊 ，平西王府 嘅 楊溢之 呢 。
桂公公 認唔出 呢 ？哈哈哈哈哈哈哈 。
韋小寶 哈哈大笑 ， 噉 正話 想 問 佢 ， 楊溢之 拉 住 韋小寶 隻 手話 ： 我 哋 再行 遠 啲 先至講 ， 咪 畀 人 哋 聽見 啊 。
兩個人 又 行咗 二十幾丈 停住 腳步 ，楊溢之 話 ：
喺 呢處 竟然 間 會 遇到 桂公公 ，真係 想唔到 啊 。
韋小寶話 ：楊大哥 ，你 又 點 會 嚟到 呢處 㗎 ？又 扮成 ，咕花吐魯 ，阿巴斯里 㗎 ？
有 一大批 傢伙 ， 喺 河間 府 聚會 ， 想 不利於 我 哋 王爺 ， 王爺 得到 消息 ， 就 派 小人 嚟 查探 下 。
韋小寶 個 心 有 啲 驚 喇 ，頭腦 就 飛快 咁 諗 法子 嚟 對付 ，佢 話 ：
上次 沐王府 嗰 批 傢伙 入 宮 行刺 ，陷害 平西王 。
楊溢之 立即 接住 話 ：多承 公公 雲天 高義 ，向 皇上 奏明 ，洗刷 咗 平西王 嘅 冤屈 。
我哋 王爺 非常 感激 ，佢 時時 都 話 ，希望 能夠 向 公公 親口 多謝 啊 。
多謝 就 唔敢當 。
蒙王爺 咁 睇得起 ，我 喺 皇上 身邊 ，有 咩事 能夠 幫得 王爺 嘅 ，噉 梗係 要 做 嘅 。
呢次 皇上 知道 有 一班 反賊 ，要 喺 河間府 聚會 ，又 想 害 平西王 ，我 就 自告奮勇 過嚟 睇下 喇 。
楊溢之 好 歡喜 啊 佢 話 ： 啊 ， 原來 皇上 已經 知道 喇 ？
噉班 反賊 嘅 奸計 就 不能 得逞 喇 ，真係 好極 喇 。
小人 奉 咗 王爺 之 命 ，混 咗 入 嗰個 狗頭 大會 裏 便 。
聽到 佢哋 推舉 各省 盟主 ，想 害 我哋 王爺 。
唔 怕 同 桂公公 講吖 ， 我 哋 嘅 心 啊 真 係 好 擔憂 啊 。
明槍 易擋 暗箭 難防 。
班反賊 如果 有膽 嚟 雲南 逳手 ，唔係 小人 誇口 啊 ，嚟 一千 捉 一千 ，嚟 一萬 殺 一萬 。
怕嘅 ，係 佢哋 學似 上次 沐家 班 狗賊 噉樣 ，胡作非為 ，嫁禍於 我哋 王爺 ，噉 就 真係 後患無窮 啊 。
韋小寶 一拍 心口 ，昂昂然 噉 話 ：
請 楊大哥 去 稟告 王爺 ，一啲 都 唔使 擔心 。
我 一 返到 京師 呢 ，就 將 嗰個 狗頭 大會 裏 便 嘅 事 一五一十 、十五二十 ，詳詳細細 噉 奏明 皇上 。
佢哋 同 平西王 作對 ，就係 同 皇上 作對 喇 。
佢哋 越係 嬲 平西王 ，就 越 顯得 王爺 對 皇上 忠心耿耿 。
皇上 一 歡喜 啊 ， 咪 講話 平西王爺 啊 ， 連你 楊大哥 都 係 重重 有賞 ， 升官發財 就 不在話下 啦 。
全靠 桂公公 大力 幫忙 。
小人 自己 就 唔 想 升官 發財 喇 。
王爺 對 先父 有 大恩 ，曾經 救咗 小人 全家 性命 。
先父 臨死 嘅 時候 有 遺命 ，吩咐 小人 誓死 保護 王爺 平安 。
公公 ，你 嚟 呢處 係 唔係 嚟 探聽 沐家 班 狗賊 嘅 陰謀 㗎 ？
嘿 楊大哥 啊 ，你 不但 武功 使得 ，而且 料事如神 啊 我 真係 佩服 你 啊 。
我 同 師姐 喬裝 改扮 ，嚟 探聽 佢哋 搞 乜鬼 ，就 畀 佢哋 發覺 咗 噃 。
噉 我 又 亂噏 一通 ，哈 ，佢哋 居然 信以為真 ，反而 逼 我 同 師姐 當堂 拜堂 成親 喎 ，哈哈 ，真係 叫 因禍得福 喇 。
楊溢之 嘅 心諗 ：你 係 太監 ，成 咩 嘢 親 呢 ？
啊冇錯 ，你 同 嗰個 姑娘仔 假裝 係 一對 情侶 ，呃到 佢哋 信咗 。
楊溢之話 ：呢個 搖頭獅子 嘅 武功 唔錯 ，不過 係 有勇無謀 唧 。
你哋 假扮 蠻子 就係 嚟 捉 佢哋 啊 ？
沐家 同 我哋 王府 仇 深 似 海 ，上次 吃咗 佢哋 大虧 ，一直 仲 未能 報仇 。
呢次 喺 狗頭 大會 裏 便 又 見到 佢哋 。
噉 小人 諗 ：如果 喺 直隸 搞出事嚟 ，皇上 知道咗 ，怕 會 怪罪 我哋 王爺 ，話 平西王府 個人 喺 京師 附近 不 遵 王法 ，殺人 鬧事 。
韋小寶 戙起 手指公 讚佢 話 ：楊大哥 呢條計 啊 真係 叻 喇 。
你哋 扮成 蠻子 生番 ，咕花 吐魯 ，阿巴斯里 ，就算 將 沐家 一班人 冚𠾴 唥 殺晒 ，人哋 只話 係 蠻子 造反 啫 ，邊個 都 唔會 懷疑 到 平西王 㗎 。
係 ，不過 我哋 扮成 咁 古古怪怪 ，使 公公 笑話 喇 。
咩嘢 笑話 啊 ？我 啊 都 唔知 幾 羨慕 你哋 啊 ，宜得 除咗 衣服 ，塊面 呢 畫到 花花綠綠 ，同埋 你哋 一齊 大叫 大跳 啊 。
公公 如果 係 有興致 ，而家 就 扮 啦 。
唉 ，呢 一次 就 唔得 喇 ，我 老婆 見到 我 咁 古怪 啊 ，實 會 大發脾氣 啫 。
公公 真係 娶咗 夫人 咩 ？唔係 話 畀 嗰啲 狗賊 逼住 詐假意 嘅 咩 ？
呢啲嘢呢 ，就 唔 容易 三言兩語 就 講得明白 㗎 喇 。
韋小寶 就 改換 話題 喇 ，佢 話 ：楊大哥 ，我 同 你 又 有 緣 又 啱巧 。
你 如果 睇得起 我 嘅 ，我哋 兩個 就 結拜 做 金蘭 兄弟 ，噉 就 唔使 公公 啊 、小人 啊 噉 ，聽起上嚟 啊 ，幾咁 硬耳 啊 。
楊溢之 好 歡喜 啊 ，一來 ，平西王 正係 有求於佢 ，今後 好多 大事 ，都 要 靠 佢 喺 皇帝 面前 幫忙 嘅 ；
二來 ，呢個 小公公 為人 慷慨豪爽 ，好夠 朋友 ，當日 喺 康親王府 就 對 自己 十分 客氣 。
佢 就 話 ：噉 啊 真係 求之不得 嘞 ，就係 怕 高攀 唔上 唧 。
韋小寶 話 ： 咩 嘢 高攀 低攀 啊 ？嗱， 我 哋 嚟 鬥下 高矮 吖 嗱， 睇 下 係 你 高 呢 ， 定 係 我 高 。
楊溢之 哈哈大笑 。
噉 兩個人 就 跪低 ，撮土為香 ，拜咗 八拜 ，改口 以 兄弟 相稱 。
嗱 各位 ，欲知 後事 如何 ，且 聽 下回 分解 。
