前 文 再續 啊 書 接上 一回 啊 。
話説 韋小寶 覺得 白衣尼 心腸 軟 ，就 唔 接 佢 嘅 銀 嘞 ，突然 趴 喺 地下 ，攬住 佢 隻 腳 放聲 大哭 。
白衣尼 皺住 眉頭 話 ：做咩唧 ？起身 ，起身啦 。
韋小寶 話 ：啊 ，我 ，我唔要 銀 。
噉 你 喊 咩嘢 啊 ？
我 冇 爹 冇 娘 ， 從來 都 冇 人痛 我 嘅 ， 師太 ， 你 ， 你 就 好似 我 阿媽 噉 。
我 時時 都 諗 ，有 ，有個 好痛 我 個 媽媽 就 好喇 。
白衣尼 嘅 面 一 紅 ，細細聲 話 ：亂講 ，我 係 出家人 。
嗯 ，噉 又係嘅 ，嗯 。
韋小寶 企 翻 起身 ，淚痕 滿面 ，話 喊 就 喊 ，本來 係 佢 絕技 之一 。
白衣尼 沉吟 話 ：我 而家 要 去 北京 ，噉 帶埋 你 一齊 去 就 啱喇 。
不過 你 係 個 和尚仔 。
韋小寶 諗 ：返去 北京 啊 ，嘿 ，噉 就 好咯 。
佢 連忙 話 ：我 呢個 和尚仔 係 假 㗎 咋 ，落山 之後 換過 衫 ，就 唔係 和尚仔 嘞 。
白衣尼 岌一岌頭 ，就 唔 講 嘢 嘞 ，帶住 韋小寶 落 山 。
遇到 險峻 難行 嘅 地方 ，白衣 尼 扚住 佢 衫領 ，輕輕巧巧 就 跳過去 。
韋小寶 啊 猛咁 讚佢 ，又 話 少林派 嘅 武功 雖然 天下 聞名 ，不過 唔 及得 佢 一啲啲 啊 噉 。
嗰個 白衣尼 好似 聽唔見 噉噃 。
等 韋小寶 講到 第七 次 八次 嘅 時候 ，白衣尼 話 ：
少林 派 武功 佢 有 佢 獨到 個 地方 ， 細佬哥 井底之蛙 ， 唔 好 順口 雌黃 啊 。
好似 你 呢種 刀槍不入 嘅 護體 神功 ，我 就 唔會 喇 。
韋小寶 衝動 起嚟 佢 就 話 ：我 呢個 護體神功 係 假 㗎 咋 。
佢 解開 件 外衣 ，畀 件 背心 白衣 尼 睇 佢 話 ：呢 件 背心 先至 係 刀槍不入 啊 。
白衣尼 用 手 一掹 ，佢 手指 用咗 力 ，佢噉樣 掹 啊 連 鋼絲 都 掹得 斷 嘅 ，不過 嗰件 背心 一啲 都 冇事 。
佢 微微 一笑 話 ：原來 噉嘅 。
我 本來 就 奇怪 ，就算 少林派 嘅 內功 真係 使得 ，以 你 小小 年紀 亦 決 練唔到 呢個 火候 吖 。
佢 解開咗 心裏 便 一個 疑問 非常之 高興 ，笑住 話 ：
哈 你 呢個 細佬 哥 ，講嘢 都 幾 老實 噃 。
韋小寶 偷笑 嘞 ，呢一生之中 ，居然 有人 讚 佢 老實 ，真係 稀罕 之至 啊 ，佢話 ：
我 對 第二個 人 啊 都 唔係 點 老實 㗎 咋 ，不過 對 師太 呢 就 句句 都 係 老實 説話 ，都 唔知 點解 嘅 ，多數 係 我 將 你 當做 係 我 ，誒 係 我 媽媽 啦 。
白衣尼 話 ：以後 唔好 再 講 呢啲 説話 喇 ，咁 難聽 。
哦哦 。
韋小寶 諗 ：你 喺 我 心口 督 咗 呢一下 ，而家 仲 痛 。
不過 我 叫咗 你 幾 聲 媽媽 喇 ，噉 就算 和果 啦 。
佢 叫 人 做 媽媽 即係 鬧 人 係 老舉 。
佢 得意 起嚟 ，又 向 白衣尼 睇咗 一 眼 ，見到 佢 嗰種 高貴 嘅 氣概 ，不由自主 噉 對 佢 尊敬 起嚟 ，好 後悔 ，叫咗 佢 幾 聲 媽媽 嘞 。
佢 又 向 白衣尼 望咗 一 眼 ，咦 ，見到 佢 眼淚 盈眶 ，個 心 好 奇怪 。
佢 當然 唔 知道 啦 ，白衣尼 個 心 而家 喺度 想 ：
呢 件 背心 我 早就 應該 想到 喇 ， 佢 ， 佢 唔 係 亦 都 有 一件 噉 樣 嘅 背心 咩 ？
白衣尼 同 佢 喺 北邊 落咗 山 ，然後 屈翻 向 東 便 ，去到 一 座 市鎮 。
韋小寶 就 去 買 衣服 ，打扮 成 一個 少年 公子 噉 嘅 樣 。
佢 假扮 喇嘛 ，保護 順治 離開 清涼寺 嘅 時候 ，幾十萬 兩 銀票 啊 當然 係 決不 離身 。
噉 一路上 吩咐 店家 供應 精美 素齋 ，服侍 到 白衣尼 十分 周到 。
白衣尼 對於 餸菜 嘅 好 醜 分辨 得 好 清 嘅 ，就 好似 出身 於 大富大貴 嘅 家庭 一樣 ，同 嗰班 少林 僧 完全 唔同 。
佢 雖然 唔係 有意 挑剔 啊 ，但係 如果 餸菜 精緻 ，就 會 食 多 幾箸 嘅 。
韋小寶 有錢 啊 ， 只要 市面上 買 得到 嘅 係 咩 人 參 啊 、 燕窩 啊 、 茯苓 、 銀耳 、 金錢 菇 ， 有 幾貴 就 買 幾貴 。
佢 掌管 御廚 都 幾 耐 嘞 ，太后 、皇帝 每 逢 佛祖 誕 啊 、觀音 誕 啊 或者 係 祈年 大齋 啊 ，都 要 食 齋 㗎 ，佢 點 起 齋菜 嚟 ，梗係 十分 在行 啦 。
有時 客店 嘅 廚師 ，唔知 點樣 煮 ，噉 佢 入去 廚房 指點 一番 ，哈 ，煮出嚟 嘅 餸菜 啊 ，同 御廚 有 七八分 相似 噃 。
白衣尼 沉默寡言 ，枉往 成日 都 唔 講 一句 説話 嘅 。
韋小寶 對 佢 既然 有咗 尊敬 嘅 心 咯 ，就 唔敢 亂講 一通 。
呢一日 ，嚟到 北京 嘞 ，韋小寶 去 搵咗 一間 大客店 ，一 入門 就 打賞咗 十兩 銀 。
客店 個 事頭 雖然 覺得 師姑住 客店 啊 有 啲 突兀 ， 但 係 呢 位 貴公子 出手 豪闊 ， 理 佢 師 姑 唔 師 姑 吖 ， 一 於 殷勤 接待 啊 。
白衣尼 似乎 對 呢一切 都 睇作 係 當然 嘅 噉 ，從來 唔 問 嘅 。
食完 晏晝飯 之後 白衣尼 話 ：我要 去 煤山 睇下 。
韋小寶話 ：去 煤山 啊 ？嗰處 係 崇禎 皇上 歸天 嘅 地方 ，啊係喇 ，我哋 一齊 去 叩翻 幾個 頭 至得 。
嗰座 煤山 就 喺 皇宮 附近 ，一陣 就到 嘞 。
去到 山上 ，韋小寶 指住 一樖 大樹 話 ：呢 ，崇禎 皇上 就 喺 呢樖 樹 上面 吊頸 死 㗎 。
白衣尼 摸 下 樖樹 ，隻手 啊 不停 咁 震 ，眼淚 滴滴嗒嗒 噉 流落嚟 ，忽然間 放聲 痛哭 ，趴咗 喺 地 。
韋小寶 見 佢 喊得 咁 傷心 就 諗 ：唔通 佢 識得 崇禎皇帝 嘅 ？
唔 通 佢 同 陶 阿姨 一樣 ， 亦 係 大明 皇宮 裏 便 嘅 宮女 ？ 哼講 唔 定仲 係 崇禎 皇帝 嘅 妃子 啊 。
啊唔係唔係唔係 ，年紀唔啱 ，佢 好似 仲 後生過 老舉乸噉 ，唔會 係 崇禎 嘅 妃子 嘅 。
只聽見佢 喊得 咁 悲哀 ，忍唔住 亦 流起 眼淚 ，跪喺 地下 向 嗰 樖樹 拜咗 幾 拜 。
白衣尼 喊咗 好耐 ，然後 企翻 起身 ，抱住咗 樹幹 ，突然 全身 咁 震 ，暈咗 噃 ，個人啊 慢慢 噉 瀡落嚟 。
韋小寶 吃咗 一驚 連忙 扶住 佢 ：師太 ，師太 ，你 醒下 啦 。
過咗 一陣間 ，白衣尼 醒翻嘞 ，定一定神 話 ：我哋 去 皇宮 睇下 咯 。
韋小寶 話 ：好啊 ，我哋 返去 客店 先 ，我 搵 套 太監 嘅 衣服 嚟 ，師太 換咗 佢 我 帶 你 入 宮 啦 。
白衣尼 嬲 嘞 ：我 點 能夠 着 清廷 太監 嘅 衣服 呢 ？
哦 ， 係 係 係 ， 噉 誒 ， 誒 ， 啊 噉 啦 ， 師太扮 個 喇嘛 啦 ， 皇宮 裏 便 經常 有 喇嘛 出入 嘅 。
我 亦 唔 扮 喇嘛 。
就噉樣 衝入 宮 邊個 能夠 阻擋 啊 ？
誒噉又係嘅 ，嗰啲侍衞 亦 擋唔住 師太 嘅 。
只不過 ，噉 就要 大開殺戒 喇 。
師太 顧住 殺人 ，就 唔能夠 安安靜靜噉 睇嘢 啦嘛 。
噉 亦 係 嘅 ， 今晚 趁住 黑 闖入 去 啦 。
你 喺 客店 等 我 ，噉 就 冇 危險 喇 。
哦唔好 ，我 同 你 一齊 去 。
你 一個人 入 宮 啊 我 唔 放心 啊 。
皇宮 裏 便 我 熟到爛 啦 ，地方 熟 人 又 熟 。
你 想 睇 邊處 ，我 就 帶 你 去 邊處 咪 得囉 。
白衣尼 唔 出聲 嘞 ，定咗 噉 出晒 神 。
到咗 二更 時分 ，白衣尼 同 韋小寶 離開 客店 ，去到 宮墻 外 便 。
韋小寶話 ：我哋 去 東北角 嗰便 咯 ，嗰便嘅 宮墻 比較 矮 ，裏便 係 蘇拉雜役 住 嘅 地方 冇 咩 侍衛 巡查 嘅 。
白衣尼 照住 佢 嘅 指點 ，嚟到 北十三排 嘅 側跟 ，揦住 韋小寶 條 腰 輕輕 噉 跳入 皇宮 。
韋小寶 低聲 話 ：呢便 過去 就係 樂壽堂 同 養性殿 ，師太 你 想 睇 咩 地方 吖 ？
白衣尼 沉吟咗 一下 話 ：咩嘢 地方 都 睇 下 。
於是 由 樂壽堂 同 養性殿 中間 穿過去 ，行過 一道 長廊 ，經 玄穹寶殿 、景陽宮 、鐘粹宮 就 嚟到 御花園 裏 便 喇 。
白衣 尼 雖然 喺 黑暗 之中 ， 但 係 行得 十分迅速 ， 轉彎抹角 一 啲 都 唔 遲疑 嘅 ， 遇到 侍 衞 同 更夫 巡查 ， 就 喺 屋角 或者 樹林 後 便 匿 埋 。
韋小寶 好奇怪 喇 ：佢 點解 對 皇宮 裏 便 嘅 情形 咁 熟悉 嘅 ？
哼 ，佢 以前 啊 ，一定 喺 宮內 住過 嘅 。
韋小寶 跟住 佢 過咗 御花園 ，繼續 向 西 行 ，出咗 坤寧門 ，嚟到 坤寧宮 外 便 。
白衣尼 躊躇 咗 一下 就 問 ：皇后 係咪 喺 呢度 住 㗎 ？
韋小寶 話 ：皇上 仲 未 大婚 ，都 冇 皇后 嘅 。
以前 太后 喺 呢處 住 ，而家 搬咗 去 慈寧宮 喇 。
坤寧宮 冇 人 住 㗎 。
我哋 去 睇 下 咯 。
白衣尼 行埋去 坤寧宮 ，用手 撳住 窗格 微微 一用力 ，窗戌 啪 一聲 ，已經 斷咗 嘞 ，拉開 窗門 ，跳咗 入去 。
噉 韋小寶 跟住 爬入去 。
坤寧宮 係 皇后 嘅 寢宮 ，韋小寶 從來 冇 嚟過 嘅 。
呢間 寢宮 好耐 都 冇 人 住 喇 ，一浸 黴𡃴 。
月光 喺 窗紙 處 啊 映咗 一啲 微光 入嚟 ，依稀 見到 白衣尼 坐 喺 張 床 處 ，逳 都 唔 逳 。
過咗 一陣間 ，聽到 滴滴嗒嗒聲 ，係 佢 啲 眼淚 滴咗 落 衣襟 啊 。
韋小寶 諗 ：冇錯喇 ，佢 多數 同 陶阿姨 一樣 ，本來 係 宮內 嘅 宮女 ，服侍 過 前朝 皇后 嘅 。
只見佢 擔 高頭 睇住 屋樑 ，低聲 話 ：
周皇后 就係 ，就係 喺 呢度 自盡 死嘅 。
韋小寶 應 佢 話 ：係啊 。
佢 個 心 再 冇 思疑 嘞 就 低聲 問 ：
師太 ，你 要唔要 見下 我 阿姨 啊 ？
白衣尼 奇怪 喇 ：你 阿姨 ？佢 係 咩嘢人 啊 ？
我 阿姨 姓 陶 ，叫做 陶紅英 。
吓 ？紅英 啊 ？
係啊 ，講唔定 你 認得 佢 嘅 。
我 阿姨 以前 係 服侍 崇禎 皇帝 嘅 長 公主 嘅 。
好 啊 好 啊 ， 佢 喺 邊度 啊 ？ 你 快 啲 ， 你 快 啲 去 叫 佢 嚟 見 我 。
白衣 尼 一直 都 係 泰然自若 ， 就算 係 喺 嗰 日 喺 清涼寺 行刺 康熙 ， 儘管 係 行動 迅捷 啊 ， 仍然 係 非常 鎮靜 ， 但 係 而家 把 聲 呢 竟然 顯得 十分 焦急 。
韋小寶 話 ：今晚 係 叫唔到 㗎喇 。
點解啊 ，點解啊 ？
我 阿姨 係 忠於 大明 ，曾經 行刺過 當今 太后 ，就 可惜 殺佢 唔死 ，噉 只好 喺 宮內 匿埋 啦 。
佢 要 見到 我 個 暗號 之後 ，聽晚 先 能夠 見 佢 㗎 。
好極喇 ，紅英 呢個 丫鬟 有 氣節 。
你 做咩 暗號 呢 ？
我 同 阿姨 約好 嘅 ，我 喺 火場 冧 一 個 石堆 ，插 一 條 木棍 ，噉 佢 就 知道 㗎 喇 。
好 ，我哋 而家 就 去 做 暗號 。
白衣尼 由 窗口 跳出去 ，咪 拉住 韋小寶 隻 手 ，出 隆福門 ，過 永壽宮 、體元殿 、保華殿 ，向北 呢 一直 嚟到 火場 。
韋小寶 啊 執起 一嚿 炭 ，喺 一條 木條 上 便 ，畫咗 隻 雀仔 ，用 啲 石頭 冧 成 一個 堆 ，然後 將 木條 插入 石堆 處 。
白衣尼 忽然 話 ：有人 嚟喇 。
火場 係 宮內 焚燒 廢物 嘅 地方 ，三更半夜 忽然間 有人 嚟 ，古怪 喇 。
韋小寶 一 拉 白衣尼 隻 手 ，噉 兩個人 匿埋 喺 個 大 瓦缸 後 便 。
只聽見 響起 腳步聲 ，有 個人 行到嚟 ，企定身 四圍 咁 望下 ，見到 韋小寶 插 嗰條 木條 ，就 行過去 拔起 佢 。
呢個人 一轉身 ，月光 啊 照到 佢 塊面 ，韋小寶 見 佢 正係 陶紅英 ，好 歡喜 就 叫 佢 ：阿姨 啊 ，我 喺 呢度 啊 。
跟住 喺 瓦缸 後 便 行出嚟 。
陶紅英 衝上前 ，一手攬住 韋小寶 好 歡喜 噉 話 ：
哎呀 ，你 終於 嚟 嘞 。
晚晚 我 都 嚟到 呢處 睇下 ，就係 望 早日 見到 你 嘅 記號 啊 。
韋小寶 話 ：阿姨 啊 ，有 個人 想 見 你 。
陶紅英 微微 有啲 詫異 放翻開 韋小寶 問 ：係 邊個 啊 ？
白衣尼 企 翻起身 低聲 話 ：紅英 ，你 ，你仲認得我嘛 ？
陶紅英 估 唔 到 瓦 缸 後 便 仲 有人 ， 吃 咗 一驚 退後 三步 ， 拔 把 短劍 喺 手 佢 話 ： 係 ， 係 邊個 啊 ？
白衣尼 歎咗 口氣 話 ：唉 ，原來 你 唔 認得 我 喇 。
陶紅英 話 ： 我 ， 我見 唔 到 你 嘅 樣 啊 ， 你 ， 你 係 。
白衣尼 輕輕 打側 個 身 ，等 啲 月光 照住 佢 半邊 面 低聲 話 ：
你嘅 相貌 亦 變咗 好多 喇 。
陶紅英 聲 都 震晒 噉 話 ：你 係 ，你係 。
突然間 掉低 短劍 佢 話 ：公主 ，係 你 啊 ？我 ，我 。
撲過去 跪喺度 攬住 白衣 尼隻 腳 ，佢 嗚咽 話 ：
公主 ，今日 能夠 再見到 你 ，我 就算 係 即刻 死咗 咯 ，我 亦 會 好 歡喜 㗎 。
一聽 公主 兩個字 ，韋小寶 真係 驚奇 喇 。
但係 佢 跟住 諗起 陶紅英 以前 講過 個 故事 ，佢 係 先 朝 宮內 嘅 宮女 ，一直 服侍 長公主 。
李闖 攻入 北京 之後 ，崇禎 就 攞住 劍 要 殺 長公主 就 斬斷 咗 佢 隻 手臂 。
陶紅英 喺 混亂 之 中 暈咗 ，噉 醒翻 嘅 時候 ，皇帝 同 公主 都 已經 唔見咗 嘞 。
韋小寶 向 白衣尼 望咗 一眼 佢 諗 ：
佢 冇 咗 隻 手 ，對 宮內 情形 咁 熟悉 嘅 ，又 喺 坤寧宮 裏 便 喊 ，我 早 就 應該 想到 㗎啦 。
好似 佢 咁 高貴 嘅 樣 ，又 點 會 係 宮女 呢 ？
唉 ，我 個人 啊 真係 蠢蠢蠢蠢 到 極 啊 。
只聽見 白衣尼 話 ：咁耐 你 一直 都 喺 皇宮 裏 便 啊 ？
係 。
呢個 細佬哥 話 你 行刺 過 皇太后 ，噉 好極嘞 ，不過 ，唉 ，不過 亦都 難為 你 咯 。
講到 呢處 白衣尼 啲 眼淚 ，就 湧出嚟 喇 。
陶紅英 話 ：公主 係 萬金之體 ，唔好 喺 呢處 耽擱 咯 ，奴婢 即刻 送 公主 出去 啦 。
唉 ，我 早就 唔係 公主 喇 。
唔係 ，唔係 ，喺 奴婢 嘅 心處 ，你 永遠 係 公主 ，係 我 嘅 長公主 。
白衣尼 悽然 一笑 啊 。
月光 之下 ，佢 塊面 啲 淚珠 閃閃 ，呢 一 笑 更加 顯得 悽清 。
佢 話 ：寧壽宮 而家 有 冇 人 住 啊 ？我 想 去 睇 下 。
陶紅英 話 ： 寧壽宮 ， 而家 係 ， 係 清廷 嘅 建寧公主 喺 度 住 。
不過 呢 幾日 小皇帝 、太后 同 公主 都 唔 喺 宮內 ，唔知 去 咗 邊度 呢 ？
寧壽宮 只係 有 幾個 宮女 太監 唧 。
等 奴婢 去 將 佢哋 殺咗 ，請 公主 過去 啦 。
寧壽宮 係 公主 嘅 寢宮 ，係 呢位 大明 長公主 嘅 舊居 。
白衣尼 話 ：噉 亦 唔使 殺人 ，我哋 過去 睇下 啦 。
係 。
陶紅英 唔 知道 長公主 已經 有 超凡入聖 嘅 武功 ，以為 係 韋小寶 帶住 佢 混入嚟 皇宮 嘅 。
於是 三個人 向北 行出 西鐵門 ，轉身 向東 ，過 順貞門 ，經 北五所 、茶庫 ，嚟到 寧壽宮 。
陶紅英 低聲 話 ：等 奴婢 入去 趕走 啲 宮女 太監 先 。
白衣尼 話 ：唔使 嘞 。
一推門 ，門戌 輕輕 一響 就 斷嘞 ，宮門 打開 ，白衣尼 行咗 入去 。
雖然 係 換咗 朝代 啊 ，宮內 嘅 規矩 ，並 冇 幾多 更改 。
寧壽宮 係 白衣尼 嘅 舊居 ，佢 知道 太監 宮女 喺 邊處 住 。
啲人 仲 瞓緊 ，佢 就 逐個逐個 點咗 各人 嘅 暈穴 ，就嚟到 公主 嘅 寢殿 嘞 。
陶紅英 又 驚 又 喜 話 ：哎呀 公主 ，想唔到 你 武功 咁 使得 嘅 。
白衣尼 坐喺 床邊 ，想起 二十幾年前 嘅 往事 ，自己 曾經 喺 呢處 畫過 一個 人 嘅 肖像 ，又 曾經 同 呢個 人 同床共枕 。
而家 天下 ，都 畀 清廷 佔咗 去咯 ，自己 呢 一間 臥室 ，就 畀 佢 嘅 公主 佔住 咯 。
嗰個人 遠在 邊疆 萬里 之外 ，唉 今生今世 ，都 難以 相見 喇 。
各位 ，明朝 長公主 嘅 事 啊 ，喺 金庸 作 嘅 碧血劍 裏 便 有 得 講 嘅 。
陶紅英 同 韋小寶 企 喺 旁邊 靜一靜 唔 出聲 。
過咗一陣 ，白衣尼 輕輕噉 歎一口氣 佢 話 ：點着啲蠟燭啦 。
陶紅英 應咗 ，就 點着 啲 蠟燭 。
只見牆壁上 、枱椅上 ，都係 刀劍皮鞭之類 嘅 兵器 ，十足 一個 武人 嘅 居室 ，一啲 都 唔似 係 金枝玉葉 嘅 公主 寢宮 。
白衣尼 話 ：原來 呢個 公主 亦 鐘意 武藝 嘅 。
韋小寶 話 ： 呢 個 小 公主 嘅 脾氣 啊 好 古怪 㗎 ， 不但 鐘意 打人 ， 仲 鐘意 人 哋 打 佢 ， 武功 呢 就 好 平常 嘅 啫 ， 連我 都 不如 啊 。
白衣尼 細細聲 話 ：我 嗰啲 圖畫 、書籍 ，都 畀 佢 掉咗 喇 ？
陶紅英 話 ：係啊 。
呢個 番邦 女子 ，怕 連 字 都 唔 識 幾個 ，識得 咩 嘢 丹青 圖畫 呢 ？
白衣尼 左手 一抬 ，衫袖 輕輕 一揚 ，蠟燭 當堂 熄咗 ，佢 話 ：你 跟 我 出 宮 啦 。
陶紅英 話 ：係 。
公主 ， 你 身手 咁 使得 ， 如果 捉 到 太后 ， 逼 佢 將 嗰 幾部 經書 交出 嚟 ， 就 可以 破 咗 佢 哋 嘅 龍脈 喇 。
咩嘢 經書 啊 ？清廷 嘅 龍脈 ？
陶紅英 於是 簡單噉 講咗 八部 四十二章經 嘅 來歷 。
白衣尼 聽完 之後 ，沉吟咗 一陣 就 話 ：
呢八部經書 之中 ，如果 真係 藏住 一個 大 秘密 ，能夠 破得到 佢哋 嘅 龍脈 當然 係 好喇 。
等 呢位 皇太后 回宮 ，我哋 再 嚟 。
噉 三個人 離開 寧壽宮 ，仍然 混 北 三排 側跟 嘅 城牆 出 宮 ，就 返到 客店 過夜 。
陶紅英 同 白衣 尼住 埋 一間 房 ， 事隔 二十幾年 ， 今晚 ， 竟然 能夠 再同 舊日 嘅 主人 同一 間 房 瞓 ， 真 係 歡喜 到 佢 不得了 ， 呢 一晚 邊度 瞓 得 着 呢 ？
韋小寶 喺度 諗 喇 ：我 有 五部 經書 嘞 ，有 一部 喺 皇上 嗰處 ，另外 兩部 呢 就 唔 知道 喺 邊度 嚟 。
呢位 公主 師太 要 逼 老舉乸 交出 經書 ，佢 係 交唔出 嘅 。
啱喇 ，等我 三言兩語 ，㨃鬼 公主 師太 殺咗 佢 ，拔咗 皇上 同 我 個 眼中 盯 至 得 。
嗱 各位 ，欲知 後事 如何 ，且 聽 下回 分解 。
