前文 再續 啊 書 接 上 一回 。
話 説 葛爾丹 下令 發 金鏢 打 晦聰 、 澄觀 同 韋小寶 ， 晦聰 、 澄觀 呢 已經 接 住 金鏢 嘞 。
但係 仲有 三支 金鏢 ，已經 射中 韋小寶 嘅 心口 ，晦聰 同 澄觀 想 話 要 救 都 嚟唔切 啦 。
只聽見 噹噹噹 三聲 響 ，三支 金鏢 跌咗 落地 噃 。
韋小寶啊 身穿 護身寶衣 ，金鏢啊 傷害 佢 唔到 。
嘩 ， 大殿 啲 人 啊 個個 都 聳動 起 嚟 啊 。
見到 呢個 和尚仔 年紀 細小 ，居然 已經 練成 少林派 內功 最高 境界 嘅 金剛護體神功 ，實在 係 不可思議 啊 。
不過 昌齊 喇嘛 就 話 喇 ：小高僧 嘅 金剛護體神功 練到 噉 嘅 地步 ，亦 可以 講 係 非常 唔 容易 喇 。
只不過 神功 似乎 仲 有 啲 欠缺 唧 ，仲 唔 能夠 震開 暗器 。
呢 你 睇下 搞到 僧袍 上 便 ，督 穿咗 三個 窿仔 。
相傳 ，呢種 金剛護體神功 啊 ，嚟到 登峰造極 嘅 時候 ，周身 有 一層 無形 嘅 罡氣 ，敵人 嘅 兵刃 暗器 仲未 打到 埋身 ，就 畀 佢 震開 㗎 嘞 。
不過 呢 ， 呢 啲 亦 只 係 武林中 傳 説 而已 唧 ， 亦 唔 知 係 唔 係 真 係 有 噉 嘅 人 能夠 練成 嘅 。
昌齊 喇嘛 噉樣 講 ，人人 都 知道 不過 係 雞蛋 裏頭 搵 骨頭 啫 ，夾硬 貶低 敵手 嘅 身價 。
韋小寶 畀 三支 金鏢 打到 心口 痛到 不得了 ，噉 其中 有 一支 呢 ，撞正 傷口 旁邊 ，更加 係 痛到 入骨 。
條氣 都 轉唔過 啊 ，仲 邊度 講得出 説話 呢 ？噉 聽見 噉 講 ，只有 勉強 笑一笑 。
啲人 仲 以為 佢 修養 極高 ，不屑 同 昌齊 喇嘛 呢種 無理取鬧 嘅 説話 爭辯 噃 。
葛爾丹 見到 韋小寶 咁 厲害 ，滿腔 怒火 當堂 化為 烏有 ，個 心 諗 ：
少林派 武功 ，果然 好嘢 啊 。
昌齊喇嘛 又 話 喇 ：少林寺 嘅 武功 ，我哋 已經 見識過 嘞 ，當然 唔係 浪得虛名 狗屁不如 。
只不過 聽講 貴寺 窩藏 婦女 ，噉 你哋 啲 戒律 唔夠 嚴 噃 。
晦聰 面色 一沉 ，佢 話 ：大喇嘛 噉 講 係 錯咯 。
敝寺 素來 唔 接待 女施主 入 寺 禮佛 ，邊度 會 窩藏 婦女 呢 ？
昌齊 笑住 話 ：不過 江湖 上 眾口 一詞 ，講到 含含聲 噃 。
晦聰方丈 微微 一笑 話 ：江湖 流言 ，使 乜 理 咁多 呢 ？
要好似 晦明 師弟 一樣 ，對於 外界 橫逆 嘅 事情 ，完全 唔 動心 ，噉 先至 係 悟妙理 、證正覺 嘅 功夫 啊 。
昌齊話 ： 聽講 呢 位 小 高僧 嘅 禪房 裏 便 ， 就 收埋 一位 絕色美女 ， 而且 係 佢 強力 綁架 翻 嚟 嘅 。
唔通 晦明禪師 對 呢位 美女 ，亦 係 完全 唔動心 咩 ？
韋小寶 呢陣時 已經 唞翻 順條氣 嘞 ，聽 佢 噉 講 大吃一驚 ：佢哋 點解 會 知道 嘅 ？
啊冇錯喇 ，嗰個 着 藍衫 嘅 姑娘 逃跑 出去 ，梗係 去 同 佢 嘅 師長 講咗 。
睇嚟 呢啲 人 係 佢 班 嚟 嘅 救兵 ，今日 嚟 搭救 我 老婆 嘅 。
佢 話 我 間 房 裏 便 有 個 美女 ，噉 即係 話 我 老婆 逃走 出去 ，仲 未曾 遇到 佢哋 啫 。
佢 微微笑話 ：我 間 房 有 冇 女子 一 睇 就 知 嘞 ，各位 如果 有 興致 ，不妨 而家 去 睇 下 啦 。
葛爾丹 大聲話 ：好 ，我哋 去 查 個 水落石出 。
講完 企 起身 ，左手 一揮 ：搜查 ！
佢 手下 啲 人 就 想 行 去 後 便 咯 喎 。
晦聰話 ：殿下 要 搜查 本寺 ，唔知 係 奉 咗 邊個 嘅 命令 呢 ？
葛爾丹話 ：係 我 本人 下令 就 得嘞 ，何必 再 奉 第二個 人 嘅 命令 啊 ？
晦聰話 ：噉講 就 唔啱 咯 。
殿下 係 蒙古 王子 ， 如果 喺 蒙古 ， 當然 可以 下令 隨你點 做 都 得 。
少林寺 唔 喺 蒙古 境內 ，唔係 由 殿下 管轄 㗎 噃 。
葛爾丹 指住 馬 總兵 話 ：噉 佢 係 朝廷 命官 ，由 佢 下令 搜查 噉 就 得 喇啩 ？
佢 眼見 少林 和尚 武功 高強 ，人數 眾多 ，如果 打起上嚟 ，自己 呢 便 幾十 人 唔係 對手 ，於是 佢 又 話 ：
你哋 違抗 朝廷 命令 ，噉 就係 造反 。
晦聰話 ： 違抗 朝廷 嘅 命令 ， 少林寺 係 唔 敢 嘅 。
不過 呢一位 係 雲南 平西王 麾下 嘅 武官 ，平西王 權力 更 大 ，亦 管唔到 河南省 吖 。
昌齊喇嘛 笑住 話 ：呢位 小高僧 都 應承 嘞 ，方丈 大師 又 何必 阻頭阻勢 呢 ？
唔 通 呢 位 美女 唔 係 喺 晦明 禪師 間 房處 ， 而 係 喺 ， 係 喺 ， 嘿嘿 嘿嘿 ， 喺 方丈 大師 嘅 禪房 裏 便 咩 ？
晦聰話 ： 阿彌陀佛 ， 罪過 啊 ， 罪過 啊 ， 大師 點解 噉 講 啊 ？
喺 葛爾丹 後 便 有 個人 突然間 話 ：
殿下 ，我 妹妹 明明 係 畀 呢個 和尚仔 捉咗 去 嘅 ，快啲 叫 佢哋 交翻 個人 出嚟 ，否則 我哋 決 唔 能夠 罷休 ，一把火 將 少林寺 燒平 佢 。
講 呢 幾句 説話 嘅 ，係 把 女子 聲音 ，但係 講説話 嘅 人 呢 係 個 男人 ，面色 焦黃 滿 面 鬍鬚 。
韋小寶 一 聽 ，即刻 知道 呢個 人 就係 嗰個 藍衫 女郎 喬裝 改扮 㗎 ，不過 塊 面 呢 ，搽 咗 黃蠟 ，黐 咗 假鬍鬚 唧 。
個 心 好 歡喜 喇 佢 ：
呢幾日 我 正 喺度 擔心緊 ，老婆 個 門派 又 唔 知道 ，姓名 又 唔 知道 ，佢 背夫 私逃 ，去 邊處 搵 佢 吖 ？
而家 知道 佢哋 同 呢個 蒙古 王子 係 同夥 嘅 ，好極 喇 ，噉 就 走唔甩 喇 佢 。
晦聰 亦 認出嚟 喇 ，佢 話 ：原來 呢一位 就係 嗰日 嚟到 敝寺 打傷人 嘅 姑娘 。
另外 有 一位 姑娘 ，的確 係 喺 敝寺 醫 傷 ，佢 唔係 跟埋 姑娘 一齊 扯 咗 嘞 咩 ？
嗰個 女郎 話 ：收尾 我 師妹 又 畀 呢個 和尚仔 捉咗 ，韞 咗 喺 你哋 間 廟 裏 便 。
呢個 老和尚 就係 幫手 ，係 佢 將 我 師妹 打低 嘅 。
講完 ，用 手 指住 澄觀 。
韋小寶 驚 喇 佢 諗 ：哎呀 弊喇 ，澄觀 老和尚 唔 會 講 大話 ，呢件事 要 穿煲 喇 點算 好 呢 ？
冇 計 嘞 。
嗰個 女郎 用 手指 住 澄觀 ，大聲 話 ：老和尚 你 講 ，有冇 呢件事 ，講 啦 。
澄觀合十話 ：令 師妹 女 施主 去咗 邊處 ，請 你 賜告 。
我 師叔 中咗 佢 落 嘅 劇毒 ，只有 佢 本人 至 有 解藥 嘅 。
女施主 大慈大悲 ，請 你 快啲 去 求 下 令 師妹 ，賜予 解藥 啦 。
雖然 ，晦明 師叔 智慧 深湛 ，勘破 生死 ，對 呢種 事 漫不在乎 ，所謂 生死 即 涅槃 ，涅槃 即 生死 ，不過 ，唉 。
佢 顛三倒四 講咗 一大堆 ，人哋 雖然 唔能夠 全部 明白 啊 ，但係 亦 知道 嗰個 女郎 唔 喺 寺 裏頭 ，而且 韋小寶 呢 畀 佢 放 咗 毒 ，正係 要 搵 佢 攞 解藥 解毒 ，否則 就 性命 難保 。
大家 見 佢 相貌 質樸 ，呢番 説話 講得 極之 誠懇 ，邊個 都 相信 唔係 假 嘅 。
佢哋 又 諗 ：就算 寺 裏 便 真係 窩藏 婦女 ，而 住持 又 畀 人 搜查 ，少林寺 百房千舍 ，一時半時 ，又 去 邊處 搜查 得出 呢 ？
真係 要 搜查 ，多數 係 攞嚟 冇癮 嘅 啫 。
但係 嗰個 女郎 大聲 話 ：
我 師妹 明明 係 畀 你哋 擄 咗 入 寺 嘅 ，都 怕 畀 你哋 害死 咯 。
你哋 呢啲 惡和尚 傷天害理 ，毀尸滅跡 ，梗係 搜查 唔到 啦 。
講到 收尾 又 氣 又 急 ，聲音 裏 便 ，已經 帶住 嗚咽 嘞 。
葛爾丹岌頭話 ：噉講好啱啊 。
呢個 ，呢個 和尚仔 唔係 好人 。
嗰個 女郎 指住 韋小寶 鬧 佢 話 ：
你 呢 個 壞蛋 ， 嗰 日 ， 嗰 日 喺 妓院 裏 便 同 咁 多壞 女人 鬼混 。
又見 我師妹 生得靚 ，個心 啊 諗 啲 主意 嘞 ，一定係 我師妹 唔肯 ，唔肯 聽 你 話 ，你就 殺咗 佢 。
你 連 妓院 都 去 ，仲有 咩嘢 壞事 做 唔出嚟 吖 ？
晦聰 一聽 微微 一笑 ，個心 諗 ：邊度 有 噉 嘅 事 呢 ？
澄觀啊 更加 唔 知道 妓院 係 咩 東東 ，仲 以為 係 類似 少林寺 嘅 戒律院 、達摩院 、菩提院 嘅 地方 添 。
韋小寶 個 心 就 急 到 不得了 ，怕 佢 一五一十 ，將 自己 啲 嘢 啊 扽晒 出嚟 。
突然間 喺 馬總兵 後 便 有 個人 行 出嚟 ，抱拳 行禮 話 ：
姑娘 ，小人 知道 呢位 小禪師 戒律 精嚴 ，絕冇 涉足 妓院 嘅 事 ，怕係 傳聞 所 誤唧 。
韋小寶 一見 呢個人 當堂 歡喜晒 ，原來 此人 啊 就係 喺 北京 見過面 嘅 楊溢之 。
佢 當日 保護 吳應熊 去 北京 ，睇嚟 吳應熊 已經 返咗 去 雲南 嘞 ，呢 一趟 呢 跟住 馬 總兵 嚟到 河南 。
佢 係 一直 都 耷低 頭 ，又 企 喺 人哋 後便 ，所以 見 佢 唔到 。
嗰個 女郎 好 嬲 噉 話 ：你 又 點 知道 啊 ？你 認得 佢 咩 ？
楊溢之 神態 恭敬噉 話 ：小人 認得 呢位 小禪師 ，我哋 世子 亦 認得 佢 。
呢位 小禪師 對 我哋 王府 有 極大 恩惠 ，佢 出家 之前 ，係 皇宮 裏 便 嘅 一位 公公 。
因此 去 妓院 啊 ，咩嘢 強逼 令 師妹 啊 ，決唔係 事實 ，請 姑娘 明鑒 。
大家 一聽 都 哦噉 一聲 ，都 諗 ：
如果 佢 係 個 太監 ，當然 唔會 去 嫖 妓女 ，更加 唔會 強搶 女子 收埋 喺 寺 裏頭 啦 。
嗰個 女郎 見到 大家 嘅 神情 ，知道 大家 已經 唔 信 自己 嘅 説話 喇 就 更加 嬲 嘞 。
佢 大聲 話 ：你 點 知道 佢 係 太監 啊 ？
佢 如果 係 太監 ， 點會 話 要 娶 ， 娶 我 師妹 做 ， 做 老婆 吖 ？
唔淨止 和尚仔 瘋言瘋語 ，呢個 老和尚 亦係 油嘴滑舌 ，鐘意 攞人便宜 嘅 。
講完 ，指住 澄觀 老和尚 。
大家 見 澄觀 都 八 十幾歲 嘞 ， 一副 呆頭呆腦 噉 嘅 樣 ， 啱 先 聽 佢 講 説 話 論 論 盡 盡 詞不達意 ， 話 佢 油嘴滑舌 喎 ， 真 係 第二 世投過 胎 都 未 得 啊 。
所以 對 嗰個 女郎 嘅 説話 更加 唔 信 嘞 ，都 覺得 今日 貿貿然 聽咗 佢 異想天開 嘅 一面之詞 ，嚟到 少林寺 出醜 ，都 幾 後悔 啊 。
楊溢之話 ：姑娘 ，你 唔 知道 呢位 小禪師 出家 之前 ，係 非常 有名 嘅 ，佢 就係 手誅 大奸臣 鰲拜 嘅 桂公公 。
我哋 王爺 受 奸人 誣陷 ，爭啲 蒙受 不白之冤 ，全靠 呢位 小禪師 喺 皇上 面前 一力 分辯 ，大恩大德 ，到而家 仲未曾 報答 啊 。
大家 都 曾經 聽過 殺死 鰲拜 嗰個 小桂子 嘅 名 ，知道 佢 係 康熙 所 寵幸 嘅 一位 小太監 ，不由得 哦噉 一聲 ，都 非常 佩服 佢 。
韋小寶 笑住 話 ：楊兄 ，好耐 冇見 嘞 ，你哋 世子 好吖 嘛 ？
以前 一啲 小事 ，你 成日 都 掛喺口邊 做 咩嘢 呢 ？
楊溢之 跟隨 馬總兵 上 少室山 ，除咗 平西王 手下 各人 之外 ，葛爾丹 同 昌齊 喇嘛 嗰 班 人 都 唔 知道 佢 姓名 嘅 ，聽見 韋小寶 叫 佢 做 楊兄 ，噉 兩個人 實 係 老 相識 嘞 。
楊溢之話 ：禪師 慈悲為懷 與人為善 ，禪師話 係 小事 一件 ，不過 我哋 王爺 真係 感激無限 啊 。
雖然 皇上 聖明 ，是非 黑白 ，最後 終歸 會 辨明 嘅 。
不過 如果 唔係 禪師 及早 講明 真相 ，噉 其中 嘅 波折 ，亦 好 難 講 啊 。
韋小寶 笑 住 話 ： 好話 ， 好話 。 你 哋 王爺 太過 客氣 嘞 。
佢 個 心 就 諗 ：我 恨不得 推冧 你哋 嗰個 漢奸 王爺 啊 ，只不過 係 皇上 聖明 ，自己 查明 咗 真相 ，噉 我 呢個 順水人情 就 想 唔 做 都 唔得 嘞 。
總算 當日 結落咗 善緣 ，今日 居然 係 呢個 人 嚟 同 我 解圍 。
葛爾丹 仔細 噉 睇咗 佢 一輪 就 話 ：
原來 你 就係 殺死 鰲拜 嘅 小太監 。
我 喺 蒙古 ，亦 曾經 聽過 你 嘅 名 。
鰲拜 號稱 滿洲 第一 勇士 ，噉 你 嘅 武功 ，就 唔係 喺 少林寺 學 㗎 嘞 。
韋小寶 話 ：我 嘅 武功 好 水 嘅 啫 ，講出嚟 真係 不值 一笑 啊 。
不過 教過 我 武功 嘅 人 的確 唔 少 ， 呢 ， 呢 位 楊大哥 啊 ， 就 曾經 教過 我 一招 橫掃千軍 、 一招 高山流水 喇 。
講完 企起身 ，將 呢 兩 招 隨便 噉 表演 一下 。
佢 一 啲 內 勁 都 冇 使 ， 啲 人 啊 睇 唔 出 高低 ， 但 係 招式 呢 的 確係 沐家拳 啊 。
楊溢之話 ：全靠 禪師 將 呢 兩招 演 畀 皇上 睇咗 ，噉 先至 辨明 我哋 王爺 畀 仇家 誣陷 嘅 冤屈 咋 。
嗰個 女郎 嘅 面色 ，已經 唔係 先頭 咁 嬲 嘞 ，佢 話 ：
楊大哥 ，呢個 ，呢個人 ，本來 係 個 太監 啊 ？真係 對 平西王府 有 恩 ？
楊溢之話 ：係 ，呢件事 北京 知道 嘅 人 好多 。
嗰個 女郎 稍為 沉吟咗 一下 ，問 韋小寶 話 ：
噉 ， 你 同 我 哋 姊妹 噉 樣 ， 噉 樣 開玩笑 ， 係 唔 係 另外 有 用意 㗎 ？
韋小寶 話 ：玩笑 就 冇 開 ，用意 啊 當然 係 有 啦 。
個心話 ：我 嘅 用意 係 要 娶 你 嘅 妹妹 做 老婆 ，不過 呢處 人多 講唔出口 唧 。
嗰個 女郎 話 ：咩嘢 用意 啊 ？
韋小寶 微微 一 笑 ，並冇 回答 。
噉 大家 都 諗 ：既然 係 另有用意 咯 ，當然 係 不便 當眾 講 嘅 。
昌齊 企起身 雙手 合十 話 ：
方丈大師 ，晦明禪師 ，我哋 嚟得 魯莽 嘞 ，多多得罪 ，請唔好見怪 ，告辭喇 。
晦聰合十還禮 ：各位 咁遠 嚟到 ，請 食咗齋 至 走啦 ，誒 不過 呢位 女施主 。
佢 諗住 你 喬裝 男人 ，入咗嚟 少林寺 唔 追究 你 就算 嘞 ，再 請 你 食齋 就 未必 唔 啱 寺規 咯 。
昌齊 笑住 話 ：多謝喇 ，免得 方丈 師兄 為難 添 ，呢 餐 齋飯 大家 都 唔 食 喇 。
於是 眾人 告辭 出去 ，方丈 同 韋小寶 、澄觀 等人 就 送 出去 山門 外 便 。
忽然間 聽見 馬蹄聲 ，十幾 騎馬 飛跑 而嚟 。
跑到 近 喇 ，見 騎馬 嘅 人 着 嘅 都 係 御前侍衞 服飾 ，總共 係 一十六 人 。
嚟到 寺前 便 ，十六 個 人 就 翻身 落馬 ，排隊 行過嚟 ，行 先 嗰 兩個 ，係 張康年 同 趙齊賢 啊 。
張康年 一見 韋小寶 大聲 話 ：都 ，大人 ，你 老人家 好吖 嘛 ？
佢 本來 係 想 叫 都統大人 嘅 ，但係 見 佢 着住 件 僧袍 ，呢 一句 稱呼 只有 含含糊糊 就 算 嘞 。
噉 十六 個 人 一齊 向 佢 跪低 行禮 。
韋小寶 好 高興 啊 話 ：各位 請 起 ，不必 多禮 。我 日日 都 喺度 等 你哋 啊 。
葛爾丹 等 見 呢 十六 個 人 ，都 係 品級 唔低 嘅 御前 侍衞 ，對 韋小寶 咁 恭敬 都 諗 ：
呢個 和尚仔 果然 係 有啲 來歷 㗎 噃 。
清朝 制度 總兵 係 正二品 官 ，一等 侍衞 係 正三品 ，二等 侍衞 係 正四品 。
張康年 佢哋 官階 雖然 係 低過 總兵 ，但係 佢哋 係 皇帝 侍衞 ，對 外省 武官 ，並 唔 放在 眼內 嘅 。
噉只係 對 馬 總兵 稍為 岌 一下 頭 ，打個 招呼 ，就 向 韋小寶 大獻 殷勤 嘞 。
葛爾丹 見 呢班 御前侍衞 一味 奉承 韋小寶 ，對 旁人 好似 冇 睇見 噉 嗰 心唔高興 ，哼咗 一聲 話 ：
走喇 ，我 睇唔慣 呢啲 噉嘅 樣 。
一行人 向 晦聰方丈 拱一拱手 ，落山 走咗咯 。
韋小寶 請 班 侍衞 入到去 寺裏 便 。
張康年 同 佢 一拍 噉 行 低聲 話 ：皇上 有 密旨 啊 。
韋小寶 岌一岌頭 。
嚟到 大雄寶殿 ，張康年 攞出 聖旨 嚟 宣讀 ，不過 呢 係 幾句 官樣文章 。
皇帝 賜咗 五千 兩 銀 畀 少林寺 ，修建 僧舍 ，重修 佛像 金身 ，又 冊封 韋小寶 ，為 輔國 奉聖 禪師 。
晦聰 同 韋小寶 叩頭 拜謝 。
張康年 話 ：皇上 吩咐 ，要 輔國 奉 聖禪師 克日 啟程 前去 五台山 。
呢件事 韋小寶 早就 諗到 㗎嘞 ，佢 躬身 話 ：奴才 遵旨 。
飲完茶 ，韋小寶 請 張康年 、趙齊賢 兩個 去 自己 禪房 傾偈 。
張康年 喺 身邊 攞出 一道 密旨 ，雙手 呈上去 話 ：皇上 另外 有 旨意 啊 。
韋小寶 跪低 叩頭 雙手 接過 聖旨 ，見 係 用 火漆 密封 咗 嘅 ，佢 諗 ：
唔知 皇上 有 咩 吩咐 呢 ？
聖旨 上面 寫 嘅 字 ，佢 識得 我 我 唔識得 佢 㗎 噃 。
既然 係 密旨 就 唔能夠 畀 張康年 佢哋 知 嘅 ，仲 係 要 請教 方丈 師兄 ，佢 決 唔會 洩漏 機密 嘅 。
於是 揸住 密旨 ，嚟到 晦聰 嘅 禪房 話 ：
方丈師兄 ，皇上 有 一道 密旨 畀 我 ，要 請 你 指點 啊 。
拆開 密旨 嘅 封套 ，見到 裏面 褶住 一 大 張 宣紙 ，攤開嚟 一 睇 ，原來 畫住 四 幅 圖畫 。
第一幅 ，畫住 五座 山峰 ，噉 韋小寶 認得 係 五台山 喇 。
喺 南台 頂 嘅 北方 ，畫住 一座 廟宇 ，寫住 清涼寺 三個 字 。
佢 喺 清涼寺 咁 耐 ，呢 三 個 字 有 啲 面熟 ，如果 寫 喺 第二 處 佢 一定 唔 識 嘅 ，寫 喺 廟 上 便 呢 ，就算 遇見 熟人 嘞 。
第二幅 ，係 一個 和尚仔 行 入 一座 廟宇 ，廟上 便 ，亦 寫住 清涼寺 三個 字 。
和尚仔 後便 呢 跟住 一班 和尚 ，班和尚 頭頂 寫住 少林寺 和尚 五個字 。
前便 三個 字 ，韋小寶 亦 識得 ，和尚 兩個 字 雖然 唔識 啊 ，不過 就 估得到 。
第三幅 畫咗 間 大雄寶殿 ，有 個 和尚仔 喺 中間 坐 響處 ，嬉皮笑臉 ，個樣啊 十足 係 韋小寶 ，但係 身披 大紅 袈裟 ，着住 方丈 法衣 。
旁邊 呢 ，有 好多 和尚 企 喺 度 侍候 。
韋小寶 睇住 畫裏 便 嘅 和尚仔 同 自己 似到 極 ，噉 啊 越 睇越 覺得 得意 ，不覺 笑起 上嚟 嘞 。
第四幅畫 裏 便 ，呢個 和尚仔 啊 跪 喺 地下 ，侍奉 一個 中年 和尚 。
呢個 和尚 相貌 清秀 ，就係 出家 之後 法名 叫做 行癡 嘅 順治 皇帝 。
嗱 各位 ，欲知 後事 如何 ，且 聽 下回 分解 。
