前 文 再續 啊 書 接上 一回 啊 。
話說 肥頭陀 細細聲 ，叫 韋小寶 千祈 唔好 對 洪教主 提起 經書 嘅 事 。
韋小寶 聽 佢 語氣 好 怕 噉 ，而且 顯然 係 怕 畀 陸 先生 聽到 ，就 低聲 話 ：
你 明明 已經 搶到 咗 經書 嘞 ，又 還 咗 畀 少林寺 和尚 。
教主 知道 啊 ，非 將 你 掉入 毒蛇 竇 不可 。
哼 ，就算 暫時 唔罰 你 ，不過 派 你 去 少林寺 搶 翻 部 經書 返嚟 ，你 都 幾 難 頂 呢 。
肥頭陀 個 身 一震 ，唔 出聲 嘞 。
嗱 ，我哋 老友記 做 單生意 啦 ，有 咩事 ，你 關照 我 我亦 關照 你 。
否則 大家 一拍兩散 同歸於盡 㗎 咋 。
陸 先生 突然間 喺 後便 接口 話 ：咩嘢 一拍兩散 同 歸於盡 啊 ？
噉唔係 我哋 三個人 有福 同享 ，有難 同當 囉 。
韋小寶 諗 ：而家 嘅 處境 呢 ，已經 係 一塌糊塗 㗎 嘞 ，能夠 將 呢 兩個 好手 連累 埋 ，多少 有啲 依傍 吖 。
肥頭陀 同 陸 先生 都 唔 出聲 ，過咗 一陣 兩個 人 齊聲 長歎 啊 。
又行咗 一餐飯 咁上下 時間 ，上到 峰頂 嘞 。
只見 四個 着住 青衣 嘅 少年 ，拖住 手 噉 行嚟 ，每人 都 孭住 一把 長劍 。
左便嗰個人 問 ：肥頭陀 ，呢個 細路 做 咩嘢 㗎 ？
肥 頭陀 放低 韋小寶 話 ： 教主 有令 傳 佢 嚟 嘅 。
噉啊西 便 有 三名 紅衣 少女 嘻嘻哈哈 噉 行過嚟 ，亦 係 孭住 長劍 嘅 。
見到 三個人 就 行埋嚟 ，一個 少女 笑住 話 ：肥頭陀 ，呢個 細路 係 你 嘅 私生子 啊 ？
講完 ，喺 韋小寶 塊 面 珠 捻咗 一下 。
肥頭陀 話 ：姑娘 講笑 啦 。
呢個 細路 係 教主 佢 老人家 特旨 傳召 ，有 緊要 事情 問 佢 㗎 。
另外一個 圓面 少女 搣咗 下 韋小寶 個 面珠 ，笑住 話 ：
睇 呢個 細路 個樣 呢 ，梗係 肥頭陀 個 私生仔 喇 ，你 賴 都 賴唔甩 喇 。
激到 韋小寶 好嬲啊 ，佢 大聲 話 ：
我係 你 嘅 私生仔 ，你 同 肥頭陀 私通 ，生 我 出嚟 嘅 。
嗰班 少男少女 打 個 特 ，跟住 就 哈哈大笑 嘞 。
嗰個 圓面 少女 滿面 通紅 ，啋 佢 話 ：啋啋啋 ，衰仔 ，你 作死 啊 ？
逳手就打 ，韋小寶 打 側 個 頭 避開 佢 。
呢個 時候 ，又 有 十幾 名 年輕 男女 聽見 聲 趕到 嚟 ，都 笑 嗰個 圓面 少女 嘞 。
嗰個 少女 又 醜 又 嬲 ，出力 喺 韋小寶 個 𦣇 柚 踢 一 腳 。
韋小寶 大聲 話 ：媽 ，你 做咩 打個仔 喎 ？
嗰班 少年 笑得 更 厲害 嘞 。
突然間 ，噹噹噹 敲起 鐘 ，大家 即刻 肅靜 嚟 聽 ，廿幾 名 年輕 男女 轉身 向住 竹屋 走過去 。
肥頭陀 話 ：教主 召集 啲 人 訓話 啊 。
噉 又 同 韋小寶 話 ： 等陣 見到 教主 嘅 時候 ， 千祈 唔 好 亂 噏 無為 啊 。
韋小寶 見 佢 神情 咁 憂鬱 ，呢啲 年輕 男女 對 佢 呢 又 幾 無禮 嘅 ，個 心 諗 ：
佢 武功 好 高 㗎 ，點解 怕咗 呢啲 十幾歲 嘅 細路 呢 ？
不由得 對 佢 有 啲 可憐 嘞 就 岌一岌頭 。
呢個 時候 只見 四面八方 有人 行 去 竹屋 ，肥頭陀 同 陸 先生 帶住 韋小寶 行入去 。
經過 一條 長廊 ，就係 一座 大廳 嘞 。
呢座廳啊 大到 無比 嘅 ，足足 可以 坐得 成千 人 。
韋小寶 喺 北京 皇宮 裏 便 住得 耐 嘞 ，再 大啲 嘅 廳堂 亦 都 唔 放 在 眼內 。
不過 呢座 大廳 呢 實在 大 啊 ，一 見到 ，不由得 肅然 起敬 。
只見 一群群 少男少女 ，着住 啲 衣服 呢 分別 係 五 種 顏色 嘅 ，噉 分 喺 五 個 方位 企 。
青 、白 、黑 、黃 ，四色 都係 男仔 ；
着紅嘅 呢 係 少女 ，人人 都 孭住 長劍 ，噉 每一隊 呢 ，大概 係 一百 人 咁上下 啦 。
大廳 嘅 盡頭 ，喺 當中 一拍 放住 兩張 竹椅 ，鋪咗 錦緞 椅墊 嘅 。
兩便 都 企住 幾十 人 ，噉啊 有 男 有 女 ，年紀 輕 嘅 呢 三十 零 歲 啦 ，老 嘅 呢 ，已經 六 七 十 歲 嘞 ，身上 都 唔 帶 兵器 。
大廳 裏 便 ，有 五六百 人 ，竟然 一啲 聲 都 冇 ，連 咳 都 冇 一 聲 。
過咗 一陣 ，響咗 九 下 鐘聲 ，聽見 內堂 有 腳步聲 嘞 。
韋小寶 諗 ：個 鬼教主 出嚟 定 嘞 。
誰知 出嚟 嘅 係 十名 漢子 ，都 係 三十歲 咁上下 ，衣服 又 分別 係 五 種 顏色 ，咪 分 喺 兩 張 椅 旁邊 企 喺 度 ，每一 便 五 個 人 。
又過咗一陣 ，噹咁一聲鐘響 ，跟住 幾百個 銀鈴 一齊 演奏 。
廳上 幾百 人 一齊 跪低 齊聲 噉話 ：
教主 永享 仙福 ，壽 與 天 齊 。
肥頭陀 掹 下 韋小寶 件 衫 叫 佢 跪低 。
韋小寶 唯有 跪低 啦 ，噉 佢 偷偷 睇 下 ，只見 一 男 一 女 喺 內堂 出嚟 坐 喺 張 椅 處 。
鈴聲 又 響嘞 ，大家 慢慢 企翻 起身 。
嗰個 男 嘅 年紀 好 老 喇 ，白鬚 垂 胸 ，塊 面 上 便 呢 都 係 傷疤 皺紋 ，好 醜樣 嘅 。
韋小寶 諗 呢個 實係 教主 嘞 。
嗰個 女 嘅 呢 ，係 個 美貌 少婦 ，睇 個 樣 不過 係 二十三四歲 ，微微 一 笑 媚態 橫生 ，豔麗 無匹 。
韋小寶 個 心 喺 度 諗 ： 嘩 嗨 呢 個 女人 吖 ， 仲靚過 我 嗰 個 老婆 啊 。
皇宮 又 好 麗春院 又 好 ，都 仲 冇 咁 標青 嘅 女人 呢 。
噉話説 左手 便 一名 青衣 漢子 行 上 兩 步 ，捧住 一張 青紙 ，高聲 噉 念誦 ：
恭讀 慈恩 普照 、威臨 四方 洪教主 寶訓 ：
眾志齊心 可 成城 ，威震 天下 無比 倫 ！
大廳 嗰 幾百 人 齊聲 噉 念 。
眾志齊心 可 成城 ，威震 天下 無比倫 ！
韋小寶 正在 擒擒 青噉 睇住 嗰個 麗人 ，大家 齊聲 噉樣 一念 ，嚇咗 佢 一跳 啊 。
嗰個 青衣 漢子 繼續 念 ：
教主 仙福 齊天 高 ，教眾 忠字 當頭 照 。
教主 駛穩 萬年 船 ，乘風 破浪 逞 英豪 。
神龍 飛天 齊 仰望 ，教主 聲威 蓋 八方 。
個個 生為 教主 生 ， 個個 死為 教主 死 。
教主 令旨 盡 遵從 ， 教主 如同 日 月光 。
嗰個 漢子 念 一句 ，眾人 就 跟住 讀 一句 。
大家 念完 喇 ，齊聲 大叫 ：
教主 寶訓 ，時刻 在心 ，建功 克敵 ，無事 不成 。
嗰啲 少男少女 叫得 尤其是 落力 。
洪教主 嗰個 醜陋 嘅 尊容 ，一啲 表情 都 冇 啊 ，但係 佢 身邊 嗰個 麗人 呢 ，就 笑口吟吟 噉 跟住 念誦 。
大家 念完 嘞 ，大廳 裏 便 靜一靜 ，真係 連 針 跌落 地 都 聽見 喇 。
話說 嗰個 麗人 雙眼 由 西 向 東 噉 掃過嚟 ，一直 都係 蓮子蓉 噉 口面 ，佢 慢慢 噉 話 ：
黑龍門 掌門 使 今日 限期 到嘞 ，請 你 將 經書 繳 上嚟 啦 。
佢 把 聲 啊 又 清脆 又 嬌媚 ，認真 好聽 啊 。
佢 伸出 隻 左手 攤開 手掌 。
韋小寶 遠遠 噉 望過去 ，見到 佢 嘅 手掌 呢 真係 好似 白玉 雕成 一樣 ，佢 個 心 啊 即時 湧起 一個 念頭 ：
呢個 女人 做 我 老婆 都 唔錯 噃 。
佢 如果 去 麗春院 做 生意 啊 ，揚州 嘅 嫖客 冚𠾴唥 都 湧晒嚟 ，將 麗春院 大門 都 撐爆 啊 。
只見 左手 便 一名 黑衣 老人 行 上 兩步 躬身 話 ：
啟稟夫人 ，北京 傳嚟 消息 ，已經 查到 四部 經書 嘅 下落 ，正在 加緊 出力 。
根據 教主 寶訓 嘅 教導 ，就算 唔要 條命 亦都 要 攞翻嚟 奉呈 教主 同 夫人 嘅 。
佢 把 聲 微微 有啲 發抖 ，顯然 係 十分 害怕 。
韋小寶 諗 ：哎 真係 可惜 喇 ，可惜 喇 。
咁 標青 嘅 女人 ，原來 竟然 係 洪教主 嘅 老婆 喎 ，一 朵 鮮花 插 喺 牛屎 上 啦 ，真係 月光光 照 屎坑 嘞 。
只見 嗰個 女人 微微 一笑 佢 話 ：
教主 已經 將 日期 寬限 咗 三 次 嘞噃 ，黑龍 使 你 總係 推三推四 ，唔肯 出力 ，對 教主 未免 太過 唔忠心 嘞啩 ？
黑龍 使 深深 咁 鞠躬 ，佢 話 ：
屬下 受教主 同 夫人 嘅 大恩 ，就算 粉身碎骨 亦 好 難 報答 。
實在 呢件事 萬分 棘手 ，屬下 派去 皇宮 嗰 六個人 之中 ，已經 有 鄧炳春 、柳燕 兩個人 殉教 身亡 。
希望 教主 同 夫人 恩准 寬限 啊 。
韋小寶 個 心 諗 ：嗰隻 肥豬 同 假 宮女 原來 都 係 你 嘅 下屬 嚟 ，哼 都 怕 老 舉乸 嘅 職位 都 冇 你 咁 大 啊 。
嗰個 女人 用 隻 手 擪 一擪 韋小寶 ，笑住 話 ：小弟弟 ，你 過嚟 啦 。
韋小寶 嚇咗 一跳 低聲 話 ：我 啊 ？
嗰個 女人 話 ：係啊 ，係 你 啊 。
韋小寶 對住 身邊 嘅 陸 先生 、肥頭陀 望咗 一眼 。
陸 先生 話 ：夫人 叫 你 啊 ，上前 恭敬 行禮 啦 。
韋小寶 個 心 諗 ：我 偏偏 唔 恭敬 睇 你 又 點 至 得 。
但係 行到 上前 仲係 恭恭敬敬 躬身 行禮 話 ：
教主 同 夫人 永享 仙福 ，壽 與 天 齊 。
洪夫人 笑住 話 ：你 呢個 細佬哥 好 精叻 噃 。
邊個 教 你 喺 教主 下 便 加埋 同 夫人 三個 字 㗎 ？
韋小寶 唔知 神龍教 裏 便 啲 教眾 向來 只係 講 教主 永享 仙福 ，壽 與 天 齊 嘅 啫 。
一入咗教之後 ，就 將啲説話 念到 滾瓜爛熟 ，邊個 都 唔敢 增多 一個 字 減少 半句 説話 。
韋小寶 見到 呢位 夫人 ，個樣 又 靚 ，又 極 有 權勢 ，噉 橫 掂托 大腳 又 唔 使 本錢 嘅 ，就 隨口 加多咗 同 夫人 三 個 字 嘞 。
而家 聽佢 問到 就 話 ：
教主 有 夫人 陪伴 ， 噉 壽與天 齊先 至 有 趣味 㗎 ， 如果 唔 係 ， 過得 一兩百年 ， 夫人 歸 咗 天咯 ， 教主 唔 係 好 寂寞 ？
洪夫人 一 聽 ，笑到 啊 好似 花枝亂顫 。
洪教主 呢 ，亦 不禁 用手 捋 下 長鬚 笑起上嚟 嘞 。
神龍教 裏 便 上下 人 等 ， 一 見到 教主 個個 都 心驚膽戰 ， 邊個 敢 咁 大膽 隨口 亂 咁 噏 啊 ？
先頭 聽見 韋小寶 噉 樣講 ， 都 戥 佢 心驚 啊 ， 等到 見到 教主 同 夫人 神情 好和氣 噉 先至 放心 。
洪夫人 笑住 話 ：噉 呢 三個字 ，係 你 自己 想出嚟 加上去 㗎 嘞噃 ？
韋小寶 話 ： 係 定 啦 ， 而且 係 非加 不可 㗎 。
嗰個 石碑 上面 啲 字 啊 ，亦都 提到 夫人 㗎 。
呢句 説話 一出 ，陸先生 全身 啊 即刻 好似 跌入 冰氹 噉 ，唉 ，自己 嘥咗 唔少 心血 ，先至 將 一篇 碑文 教 佢 背熟 。
而家 佢 忽然間 別出心裁 加上 夫人 個 名 喎 ，噉 仲 點樣 夾得齊 啲 字數 呢 ？
呢個 奀皮仔 信口開河 ，實係 將 碑文 亂噏 㗎 嘞 。
自己 作 嗰 篇 文字 本來 就 破綻 好多 ， 噉 樣 搞 仲 唔 係 當場 敗露 唉 死 喇 死 喇 。
洪夫人 聽咗 亦 打個特 ，佢 話 ：
你話 石碑 上 便 ，亦 刻咗 我 個 名 啊 ？
係啊 。
韋小寶 隨口 講咗 係啊 兩個字 ，即刻 知道 弊喇 。
哎呀 ，佢 如果 要 我 背 嗰篇 碑文 ，碑文 裏 便 冇 講到 夫人 㗎 噃 。
好在 洪夫人 並冇 問 佢 ，佢 只係 話 ：
你 姓 韋 喺 北京 嚟 嘅 係 唔係 啊 ？
係啊 。
聽 肥頭陀 講 ，你 喺 北京 見過 一個 叫做 柳燕 嘅 姑娘 ，佢 仲 教過 你 武功 係唔係 啊 ？
韋小寶 諗 ： 我 同肥 頭陀 講 個 説 話 ， 除 咗 嗰 部 經書 之外 佢 都 稟告 咗 教主 同 夫人 。
而家 只有 死頂到底 啦 ，橫掂 柳燕 已經 死咗 咯 ，呢啲 叫做 死無對證 。
於是就話 ：係啊 ，呢個 柳阿姨 呢 係 我 阿叔 嘅 好朋友 ，無論 日頭 夜晚 ，時時 都 去 我 屋企 嘅 。
佢 去 做 咩嘢 啊 ？
同 我 阿叔 傾偈 囉 。
有時 佢哋 仲 攬埋 接吻 添啊 ，佢哋 以為 我 睇唔到 噃 ，其實 啊 ，我 偷偷 都 睇見 晒 嘞 。
你 呢個 細路 吖 真係 曳 嘅 啫 ，人哋 接吻 你 都 偷睇 。
洪夫人 對 黑龍 使 話 ：你 聽見 嘛 ？細佬哥 總 唔會 講 大話 啩 ？
只見 黑龍 使 面色 都 變晒 ，即刻 跪 喺 地下 猛咁 叩頭 ：
屬下 ， 屬下 ， 督導 無方 ， 罪該萬死 ， 求 教主 同 夫人 開 ， 網開一面 ， 准 屬下 將功贖罪 。
韋小寶 好奇怪 嘞 佢 諗 ：
我話 柳燕 同 我 阿叔 接吻 ，噉 同 呢個 老坑 有 咩 嘢 關係 呢 ？
點解 嚇 成 噉樣 嘅 ？
洪夫人 微微 笑話 ：將功贖罪 ？你 有 咩嘢 功勞 啊 ？
我 仲 以為 你 派去 嘅 人 ，真係 忠心耿耿 喺度 為 教主 辦事 添 。
誰知 喺 北京 咁 得閒 做埋 啲 風流勾當 。
黑龍使 又 猛咁 叩頭 ，額頭 上 啊叭叭聲 咁 流血 。
韋小寶 於 心 不忍 嘞 ，想 講 幾句 對 佢 有利 嘅 説話 ，不過 一時 就 諗唔出 。
黑龍 使用 膝頭哥 行 上前 佢 話 ：
教主 ，我 跟住 你 老人家 出生入死 ，雖然 冇 功勞 啫 ，亦 有 苦勞 吖 。
洪夫人 冷笑話 ：哼哼哼 ，你 仲 提 以前 嘅 事 做 咩嘢 唧 ？
你 年紀 都 咁 大 咯 ，仲 能夠 同 教主 做 幾 多年 事 添 啊 ？
黑龍 使 呢個 職位 ，早啲 唔做 ，唔係 仲 快活啲 咩 ？
黑龍 使 擔 高頭 望住 洪 教主 𠼮 求 佢 話 ：
教主 ，你 對 老部下 、老兄弟 ，真係 一啲 舊情 都 冇 咩 ？
洪教主 嘅 表情 木木獨獨 ，冷冷淡淡 噉 話 ：
我哋 教 裏頭 ，老朽 糊塗 嘅 人 太 多 ，亦 應該 好好 整頓 一下 先至 得喇 。
佢 嘅 聲音 低沉 ，講説 話 模糊 不清 。
韋小寶 係 第一次 聽到 佢 講説話唧 。
突然間 幾百名 少男少女 齊聲 高呼 ：
教主 寶訓 時刻 在 心 ，建功 克敵 無事 不成 。
黑龍 使 歎 一口氣 ，揗揗 震噉 企 起身 佢 話 ：
吐故納新 ，我哋 啲 老年人 ，都 該 死 咯 。
擰 轉身 嚟 話 ：攞 嚟 啦 。
大廳 門口 四名 黑衣 少年 快步 上前 ，佢哋 托住 一個 木盤 ，盤 上面 有 黃銅 圓罩 罩住 ，行到 黑龍 使 前 便 就 將 木盤 放 喺 地下 ，即刻 轉身 行翻 轉頭 。
大廳 啲 人 不約而同 噉 退後 兩步 。
黑龍 使 吟吟 沉沉 噉 話 ：
教主 寶訓 ，時刻 在心 ，建功 克敵 ，無事 不成 。
呵呵 ，有 一件事 唔成 ，就係 屬下 並 唔 忠心耿耿 。
講完 ，用 手 揸住 銅蓋 頂上面 嘅 裂 向 上一揭 。
盤裏便有件嘢 突然間 飚起 ，跟住 白光 一閃 ，一把 飛刀 激飛而至 ，將 嗰件嘢 斬為 兩橛 ，跌 喺 個盤 處 仲 喺度 逳逳下 。
原來 係 一條 五彩斑斕 嘅 蛇 啊 。
嚇到 韋小寶 哎吖 一聲 大叫 。
大廳啲人 呢 都 嗌起 上嚟 ：邊個 啊 ？邊個人 犯上作亂 啊 ？捉起佢 ！
喺 邊個 叛徒 敢 忤逆 教主 啊 ？
洪夫人 突然間 企起身 雙手 環抱 ，跟住 擺咗 三擺 。
只聽見 撐撐撐撐 長劍 出鞘 ，幾百名 少年男女 即刻 衝上嚟 ，將 五六十名 年長 教眾 沊沊𡃈噉 圍住 。
呢幾百名 少年 ，青衣 歸 青衣 ，白衣 歸 白衣 ，毫不 混雜 。
各人 企 好 方位 ，六七人 ，或者 八九人 對付 一個 ，用 長劍 指住 要害 。
噉嗰 幾十名 年長 教眾 ，即刻 就 畀 佢哋 制服 嘞 。
肥頭陀 同 陸 先生 嘅 周圍 ，亦都 各 有 七八個 人 用 長劍 指住 。
一名 五十幾歲 嘅 黑鬚 道人 哈哈大笑 佢 話 ：
哈哈哈哈哈哈 ，夫人 ，你 操練 呢個 陣法 ，都 怕 有 好幾個月 㗎 嘞啩 ？
要 對付 老兄弟 ，其實 唔使 咁 費事 嘅 。
企喺佢周圍嘅 係 八名 紅衣 少女 ，兩名 少女 長劍 向前 一 挺 ，劍尖 頂住 佢 心口 喝叫 話 ：
唔 准對 教主 同 夫人 冇 禮 。
嗰個 道人 話 ：夫人 ，嗰條 五彩神龍 ，係 我 無根 道人 殺 嘅 。
你 要 處罰 ，即管 逳手 ，何必 連累 第二啲 人 呢 ？
洪夫人 坐 翻 喺 椅 微微 笑話 ：
你 自己 認 咗 咯噉 就 好啦 。
道長 ，教主 待 你 不薄 啩 ？
委任 你 做 赤龍門 掌門使 ，嗰個 係 教主 一人 之下 ，萬人 之上 嘅 高級 職位 噃 ，你 點解 要 作反 呢 ？
無根 道 人 話 ：屬下 冇 作 反 。
黑龍 使 張淡月 有 大功 於 本教 ，皆因 屬下 有人 辦事 不力 ，夫人 就 要 攞 佢 條命 ，屬下 大膽 向 教主 同 夫人 求 個 情 啊 。
如果 我 唔 應承 呢 ？
神龍教 雖然 係 教主 手創 ，不過 幾萬 兄弟 赴湯蹈火 ，人人 都有 功勞 。
當年 起事 ，總共有 一千零二十三 名 老兄弟 ，到咗 今日 ，有啲 畀 敵人 殺死 ，有啲 畀 教主 殺 咗 ，剩翻落嚟 嘅 已經 唔到 一百 人 嘞 。
屬下 求教 主 開恩 ，放生 我哋 幾十個 老兄弟 ，將 我哋 冚𠾴唥 開除 出 教 啦 。
教主 同 夫人 見到 我哋 啲 老坑 咁 討厭 ，要 起用 新人 ，就 叫 我哋 班 老坑 一齊 躝屍 罷 啦 。
哼哼哼 ，神龍教 創教 以來 ，從來 冇 聽過 話 有人 有命 出教 嘅 。
無根道長 噉樣 講 ，真係 異想天開 之至 嘞 。
噉樣講 ，夫人 係 唔肯 應承 喇 ？
對唔住喇 ，本教 冇 呢個 規矩 。
哈哈哈哈 ，原來 教主 同 夫人 非 將 我哋 冚𠾴 唥 殺晒 不可 。
噉亦唔係 ，老人 忠於 教主 ，教主 自然 仍舊 當 佢 係 好兄弟 ，決冇 歧視 嘅 。
我哋 不 問 年少 年長 ，只係 問 佢 對 教主 係唔係 忠心耿耿 唧 。
邊個 忠於 教主 嘅 ，舉手 。
幾百名 少年男女 一齊 舉起 左手 。
畀 人 圍住 嘅 年長 教眾 啊 ，亦都 一齊 舉手 ，連 無根 道人 亦都 高舉 左手 。
大家 一齊 話 ：忠於 教主 ，決無 二心 ！
韋小寶 見到 大家 舉手 ，佢 都 舉埋 手 嘞 。
嗱 各位 ，欲知 後事 如何 ，且 聽 下回 分解 。
