前文 再續 啊 書 接 上 一回 啊 。
話説 嗰個 女人 ，或者 女鬼 ，走咗 之後 ，韋小寶 個 身 搖咗 幾下 ，但係 穴道 畀 人 點 咗 啊 唔逳得 。
個心話 ：佢 阿爺 吖 ，搖咗 骰仔 嘞 又 唔 揭 盅 ，噉 啊 想 點 啫 。
先頭 佢 一時 衝動 啊 ，個 心 想 大賭 一場 輸贏 都 唔 在乎 嘅 。
但係 而家 靜翻落嚟 ，越 想 越 覺得 先頭 同 自己 講説話 嘅 係 鬼 唔係 人 。
嗰 兩道 門 畀 風吹 到 嘭嘭聲 響 。
身上 嘅 衫 呢 就 未 乾 咯 喎 ，畀 啲 冷風 一 吹 啊 ，嘿呀 忍唔住 猛咁 震 。
忽然間 ，遠處 出現 一團光 ，慢慢慢慢 噉 越嚟越近 。
韋小寶 好 驚 啊 ：鬼火 啊 。
嗰團 火 嚟到 近 喇 ，原來 係 一個 燈籠 ，挽住 燈籠 嘅 係 一個 白衣 女鬼 。
韋小寶 即刻 眯 埋 雙眼 ， 只 聽見 好輕 好 輕 嘅 腳步聲 ， 行到 自己 面前 就 停住 嘞 。
佢 嚇到 連 氣 都 唔敢 唞 啊 ，全身 一味 發抖 。
呢個 時候 ，聽見 一個 少女 嘅 聲音 笑住 話 ：你 點解 眯埋 雙眼 唧 ？
把 聲 好 温柔 動聽 嘅 。
韋小寶 話 ： 你 你 唔 好嚇 我 啊 ， 我 我 ， 我 唔 敢 睇 你 啊 。
你 怕 我 七孔 流血 ，條 脷 髧 出嚟 呢 係 唔係 呢 ？你 睇 一眼 先 啦 。
我 先至 唔 上 你 當 ，你 披頭散髮 ，七孔 流血 又又 ，又 有 咩 咁 好睇 啊 ？
嗰個 女鬼 咭噉 笑一笑 ，對住 佢 塊面 吹咗 啖 氣 。
呢啖 氣 吹到 塊面 處 啊 有 啲 暖暖地 ，仲 帶住 一啲 香𡃴 添 。
韋小寶 左眼 微微 擘開 一線 ，依稀 見到 一塊 面 雪 咁 白 ，眉 彎 嘴 細 ，個 樣 好似 花 噉 。
咪即刻擘大啲多眼咯喎 ，只見面前 係 一個 十分 清秀 嘅 少女 ，大概 十四五 歲 啦 ，梳咗 一對 孖角髻 ，笑騎騎 噉 望住 自己 。
韋小寶 個 心定 翻晒 嘞 佢 問 ： 你 ， 你 真 係 唔 係 鬼 吖 嘛 ？
嗰個 少女 微微笑話 ：我 梗係 鬼 啦 ，係 吊頸鬼 。
韋小寶 個 心 打 個 特 ，又 有 啲 思疑 嘞 。
嗰個 少女 話 ：你 殺 惡人 嘅 時候 咁 大膽 ，點解 見到 吊頸鬼 又 咁 膽細 呢 ？
韋小寶 松翻 啖氣 佢 話 ：我 唔怕 人 ，淨係 怕 鬼唧 。
嗰個 少女 又 試 笑 一笑 佢 話 ：你 畀 人 點中 咗 咩 穴道 啊 ？
我 知 就 好嘞 。
嗰個 少女 喺 佢 膊頭 後便 推拿 咗 幾下 ，又 喺 佢 背脊 輕輕 噉 拍 三拍 ，韋小寶 雙手 當堂 逳得 嘞 。
佢 遞 高 隻 手 拂 咗 幾 下 笑住 話 ：你 會 解穴 嘅 真係 好 喇 。
我 學咗 冇 幾耐 ，今日 先至 第一次 喺 你 身上 試下 㗎 咋 。
噉 又 喺 佢 胳 肋 底 同埋 條腰 處 推拿 咗 幾下 ， 韋小寶 彈 起身 佢 話 哎呀 唔 得 啊 唔 得 啊 ， 我 好 怕 擳 㗎 。
吖 就係 噉樣 ，佢 雙腳 被 封 嘅 穴道 亦都 解埋 喇 。
佢 伸出 雙手 笑 住 話 ： 你 擳 我 ， 我 要 擳 翻 你 。 講完 就 行前 一步 。
嗰個 少女 伸出 條 脷 ，扮 個 鬼臉 ，但係 呢個 鬼臉 呢 只係 見到 佢 可愛 唧 ，一啲 恐怖 嘅 意思 都 冇 嘅 。
韋小寶啊 伸隻手 想 去 捻 佢 條 脷 。
嗰個 少女 擰歪 面 避開 咭咭聲 咁 笑 ：你 唔 怕 吊頸鬼 嘞 咩 ？
你 有 個 影 ，又 暖 嘅 係 人 ，唔係 鬼 。
嗰個 少女 雙眼 突然間 睩到 大大 ，好 嚴肅 噉 話 ：我 係 僵尸 ，唔係 鬼 。
韋小寶 一 窒 ， 但 係 喺 燈火 之下 見到 佢 面色 又紅 又 白 ， 就 笑 住 話 ： 誒 殭屍 隻 腳 唔 會 彎 嘅 ， 亦 唔 會 講 説 話 嘅 。
嗰個 少女 又 笑嘞 ：噉 我 一定 係 狐狸精 喇 。
我 又 唔怕 狐狸精 嘅 。
個口 係 噉 講 啊 ，不過 個 心 有 啲 思思疑疑 ：唔通 佢 真係 狐狸精 ？
噉就 行 去 佢 後便 睇下 。
嗰個 少女 話 ：我 係 千年 嘅 狐狸精 ，道行 係 好 深 嘅 我 冇 尾 㗎 。
好似 你 咁 靚 嘅 狐狸精 ，畀 你 迷死 咗 都 唔 在乎 啦 。
嗰個 少女 塊 面 紅咗 一 紅 ，用 手指 刮 下 個 面 醜 佢 ：
唔 怕醜 唔 怕醜 ， 先頭 仲 怕鬼 怕 到 乜嘢 噉 ， 而家 就 嚟 攞 人 便宜 嘞 。
韋小寶 第一 怕 僵尸 ，第二 又 怕 鬼 ，至於 狐狸精 就 唔係 點 怕 㗎啫 。
見到 呢個 少女 和藹可親 ，比起 方怡 、沐劍屏 ，令人 覺得 仲 容易 親近啲 。
何況 佢 講 嘅 係 一口 江南 口音 ，比起 方沐 兩個人 嘅 雲南 話 就 好聽 得多 嘞 ，就 問 佢 ：
姑娘 ，你 叫做 咩 名 啊 ？
我 叫做 雙兒 ，一 雙 嗰個 雙 啊 。
嗰個 雙啊 ，好好聽啊 ，就係 唔知 一雙 香鞋 定係 一雙 臭襪 唧 。
臭襪 亦 好 ， 香鞋 亦 好 啦 ， 由 得 你 講啦 。
桂相公 ，你啲 衫 濕滴滴 ，一定 好唔舒服 定 嘞 ，唔該 去 嗰便 換過 啲 乾衣服 啦 。
不過 有 件事 好 為難 嘅 ，你 唔好 見怪 噃 。
咩 嘢 事 咁 為 難 啊 ？
我哋 呢處 冇 男人 衣服 。
韋小寶 個 心 又 打 個 特 ，當堂 面 都 變晒 色 ，個 心 諗 ：
呢間屋 都係 女鬼 嚟 㗎 。
雙兒 挽起 個 燈籠 話 ：唔該 你 跟住 嚟 啦 。
韋小寶 遲遲疑疑 唔敢 行 。
雙兒 已經 去到 門口 嘞 ，擰轉頭 等 佢 ，微微 笑話 ：
着 女人 衣服 你 怕 唔 利是 啊 ， 係 唔 係 啊 ？
不如 噉 啦 ， 你 瞓 喺 鋪 床 處 ， 我 嗱嗱 聲 同 你 熨 乾 啲 衣服 啦 。
韋小寶 見 佢 神情 温柔 體貼 啊 難以 拒絕 ，咪 只有 跟住 佢 行 出 房門 ，佢 又 問 ：
我哋 嗰班 人 呢 ？佢哋 去咗 邊處 啊 ？
雙兒 等埋 佢 一拍 行 ，佢 低聲 話 ：
三少奶 吩咐 過 ，咩嘢 都 唔能夠 同你 講 咁多 。
等陣 你 食過 點心 之後 ，三少奶 自己 會 同 你 講 㗎 喇 。
韋小寶 早就 好肚餓 喇 ，聽見 話 有 點心 食 啊 即刻 精神大振 。
雙兒 帶 韋小寶 行過 一條 黑沉沉 嘅 冷巷 ，嚟到 一間 房 ，噉啊 點着咗 蠟燭 。
嗰間 房 裏 便 只有 一 張 枱 、一鋪 床 ，陳設 簡單 ，不過 十分 乾淨 企理 。
鋪床 鋪住 被褥 。
雙兒 將 棉被 掀開 一角 ，噉啊 放低 堂蚊帳 佢 話 ：
桂相公 ，你 上床 除咗 啲 衣服 掉出嚟 畀 我 啦 。
韋小寶 就 上咗 床 ，除咗 啲 衫褲 ，蜎入 被竇 ，噉 啊 將 衫褲 掉出嚟 。
雙兒 接咗 行去 門口 佢 話 ：
我 去 攞 點心 嚟 畀 你 食 ，你 鐘意 食 甜粽 定係 鹹粽 啊 ？
韋小寶 話 ：我 個 肚 啊 餓 到 咕咕叫 ，就係 泥沙粽 我 都 食 佢 三 隻 啊 。
雙兒 笑 一笑 就 行咗 出去 嘞 。
韋小寶 見到 佢 一走 ，間房 靜 英英 ，睇住 啲 蠟燭 火 閃下閃下 又 怕 嘞噃 。
哎呀 ，弊 ！啲 女鬼 請 人 食 麵 食雲吞 ，其實 食嘅 都係 黃䘆 、蟲蟲 。
哎呀 我千祈 唔 好 上當 啊 。
過咗 一陣 ，韋小寶 聞到 一陣 肉香 同埋 糖香 。
雙兒 雙手 捧住 個 托盤 ，用 手臂 挭開 堂 蚊帳 。
韋小寶 見 隻 碟 裏 便 ，有 四 隻 剝開 嘅 粽 ，個 心 好 歡喜 。
實在 餓得 緊要 過頭 嘞 佢 心想 ：就算 係 黃䘆蟲蟲 啊 老子 都 食咗 再 講 。噉 啊 攞起 筷子 就 食 。
入口 甘美 真係 冇得彈 啊 ，佢 兩啖 就 食咗 半隻 喇 ，佢 話 ：
雙兒 ，呢啲 好似 係 湖州 粽 噉 ，真係 好味道 嘞 。
浙江 湖州 出 嘅 粽 ，米 軟 餡 靚 ，天下 無雙 啊 。
揚州 啊 有 間 鋪頭 專賣 湖州 粽 ，麗春院 啲 嫖客 時時 叫 韋小寶 去 買 。
啲 種啊 用 粽葉 包住 嘅 ，韋小寶 要 偷食 呢 好 艱難 。
但係 佢 總係 喺 粽角 裏頭 啊 擳 啲 米粒 出嚟 食 ，咪 過 下 癮 都 好吖 。
自從 嚟咗 北方 之後 ，湖州 粽 就 食 唔到 嘞 。
雙兒話 ：你 真係 識食 嘞 ，食得出 呢啲 係 湖州 粽 。
韋小寶 個 口 喺度 食緊 ，一面 就 含含糊糊 噉 話 ：
呢啲 真係 湖州 粽 啊 ？嗯 ，呢處 點解 買到 湖州 粽 嘅 ？
唔 係 買 㗎 ， 係 狐狸精 ， 嘿嘿 ， 狐狸精 使 法術 變 㗎 咋 。
狐狸精 係 神通廣大 。
忽然間諗起 章老三 佢哋 嗰班人 ，噉 又 加多 一句 ：壽 與 天齊 啊 哈哈哈哈哈 。
你 慢慢 食 啦 ，我 去 同 你 熨 衣服 啊 。
噉行咗一步 ，雙兒 又 問 ：你 怕唔怕 啊 ？
韋小寶 個 心 怕 就 唔係 點 怕 ，不過 驚 呢 就 驚驚地 嘞 ：誒 ，你 快啲 返嚟 啊 。
雙兒 應咗 佢 就 行 出去 嘞 。
過咗 冇 幾耐 ，雙兒 攞住 一個 熨斗 入嚟 ，將 佢 嘅 衫褲 攤 喺 枱面 ，一面 燙 衫 啊 一面 陪 佢 。
四隻粽 ，兩 鹹 兩 甜 ，韋小寶 食咗 三隻 就 點都 食唔落 嘞 。
嘿 ，啲 粽 啊 真係 好食 喇 ，係咪 你 包 㗎 ？
雙兒話 ：係 三少奶 調味配料 ，我 幫手 包 嘅 啫嘛 。
韋小寶 聽 佢 把 聲 係 江南 口音 ，心念 一動 就 問 佢 ：
你哋 係 唔係 湖州 人 啊 ？
雙兒 遲遲 疑疑 冇 回答 。
啲衫 就 熨好喇 ，韋相公 見到 三少奶 嘅 時候 自己 問 佢 啦 好唔好 ？
好 有 咩 唔好 唧 ？
噉啊掀起堂蚊帳 ，睇住佢熨衫 。
雙兒 抬起 頭 ，向 佢 微微 一 笑話 ：你 冇 着 衫 啊 因住 冷 親 喇 。
韋小寶 忽然間 頑皮 起嚟 ，個身 一聳 ，佢 話 ：嗱 ，我 跳出嚟 啊 ，唔着衫 都 唔會 冷親 嘅 。
雙兒 吃咗 一驚 ，誰知 佢 一瀡 成個人 蜎 入 被竇 連 頭殼 都 入埋去 ，不禁 咭咭聲 噉 笑起上嚟 。
過咗 一陣 ，雙兒 將 熨 乾咗 嘅 衫褲 遞 入去 蚊帳 裏 便 。
韋小寶 着 翻衫褲 就 落 床 嘞 。
雙兒 幫 佢 扣 好 衫 紐 ，又 攞 咗 一 隻 木梳 ，同 佢 梳 頭 鬢辮 。
韋小寶 聞到 佢 身 啊 有 一浸 淡淡 嘅 幽香 ，個 心 好 歡喜 啊 佢 話 ：
哎 ，原來 狐狸精 係 咁 好人 嘅 。
雙兒話 ：咩 狐狸精 唧 ？咁 難聽 ，我 唔係 狐狸精 。
吖 我 知 喇 ，要 話 係 大仙 ，唔 能夠 講 狐狸精 㗎 。
我 亦 唔係 大仙 唧 ，我 係 個 小丫鬟 。
我係 個 小太監 ，你係 個 小丫鬟 ，我哋 兩個 都係 服侍 人 嘅 ，啱啱 係 一對 。
你 係 服侍 皇帝 嘅 我 點 能夠 同 你 比 吖 ？一個 喺 天 一個 喺 地 啦 。
喺 傾講 個 時候 ，已經 鬢 好 辮 嘞 。
雙兒話 ：我 唔識 同 男人 鬢辮 嘅 ，唔知 鬢 得 啱唔啱 呢 你 睇下 。
韋小寶 將條 辮 搦 到 去 胸前 一睇 就 話 ： 哎呀 ， 得 啊 ， 好靚 啊 。
我 最唔 鐘意 鬢辮 㗎 嘞 ，你 日日 能夠 幫 我 鬢辮 就 好 喇 。
我 真係 冇 噉 嘅 福氣 啊 。
你 係 大英雄 噃 ，我 今日 同 你 鬢 一次 辮 ，已經 係 前世 修翻嚟 㗎 喇 。
咦 唔 好 咁 客氣 啦 ， 有 你 噉 樣 一位 俏佳人 同 我 鬢 辮 啊 ， 我 先 至 係 前世 㩧 穿 咗 十七八個 大 木魚 啊 。
雙兒塊面一紅 ，低聲話 ：我講嘅係真心話 ，你又笑人哋嘅 。
冇冇冇 ，我 講 嘅 亦係 真心話 啫 。
三少奶話 ，桂相公 如果 願意 ，就 唔該 你 去 後堂 坐下 喎 。
好 啊 ， 你 三 少爺 唔 喺 屋企 啊 ？
嗯 ，已經 過咗 身 喇 。
韋小寶啊 即刻 想到 好多 間 屋 裏 便 嘅 靈堂 ，個 心 一 寒 ，唔敢 再 問 喇 。
噉 跟住 雙兒 嚟到 後堂 一 間 小小 嘅 花廳 裏 便 ，坐落 之 後 ，雙兒 攞咗 一 杯 熱茶 畀 佢 。
韋小寶 個 心 十五十六 ，唔敢 再 同佢 講笑 嘞 。
過咗一陣 ，聽見 腳步聲 好 輕 好慢 ，喺 板壁 後 便 ，有 一個 全身 縞素 嘅 少婦 行出嚟 ，佢 話 ：
桂 相公 一路 辛苦 喇 。
講完 深深萬福 ，行禮 十分 恭敬 。
韋小寶 急忙 還禮 佢 話 ：唔敢當 。
桂 相公 請 上座 啦 。
韋小寶 見 呢個 少婦 約莫 二十六七歲 ，不施 脂粉 面色 蒼白 ，雙眼 紅一紅 ，顯然 係 啱啱 喊過 嘅 。
燈光 之下 見到 有 個 影 ，噉 啊 九成九 唔係 鬼 嘞 。
噉 見 佢 叫 自己 坐 ，就 話 ：哦 ，哦 。
打側個身 ，喺 張 椅 處 坐落 ，佢 話 ：
三少奶 ，你嘅 湖州粽 真係 好食 啊 ，多謝 你 。
個 少婦 話 ： 亡夫 姓莊 ， 你 稱呼 我 做 三少奶 真 係 唔 敢當 啊 。
桂相公 喺 宮 裏 便 幾 多年 喇 ？
韋小寶 個心 諗 ： 先頭 黑 麻麻 有個 女人 嚟 問我 殺 鰲拜 嘅 事 ， 我認 咗 係 我 殺 嘅 ， 噉 佢 哋 又 派 個 小 丫鬟 送 粽 畀 我 食 嘞 。
嗯 ，睇嚟 呢場 賭 ，自己 係 算 買啱 喇 。
佢 話 ：不過 一年 幾 啫 。
莊夫人 話 ：桂相公 親手 殺咗 奸相 鰲拜 嘅 經過 ，能唔能夠 同 小女子 講下 呢 ？
韋小寶 聽 佢 將 鰲拜 叫做 奸相 咪 更加 放心 嘞 。
於是就 將 康熙 點樣 下令 擒拿 ，鰲拜 點樣 反抗 ，班 小太監 又 點樣 一擁而上 ，不過 呢 就 畀 佢 殺咗 幾個 人 ；
自己 又 點樣 用 香爐 灰 糝 佢 雙眼 ，噉 先至 捉住 佢 等等 嘅 情形 講咗 。
噉啊只係 康熙 拔刀 刺傷 佢 呢 ，就 講 成 係 自己 出其不意 ，喺 鰲拜 背脊 啊 搏命 噉 刺咗 佢 一刀 。
莊夫人 粒 聲 都 唔 出 ，只係 靜靜 噉 喺度 聽 。
聽到 韋小寶 點樣 撒 香爐灰 迷住 鰲拜 雙眼 ，用 刀 刺 佢 背脊 ，又 用 銅 香爐 𢱕 佢 個 頭 而 將 佢 捉住 ，噉 不由得 輕輕 唞 咗 個 大氣 。
韋小寶 啊 聽慣 咗 講古 先生 講古 ， 邊處 應該 停頓 ， 邊處 要 昂揚 ， 總之 就 樣樣 都 恰到好處 。
何況 呢件事 佢 親身 經歷 ，種種 細微 曲折 嘅 地方 ，講得 真係 十分 詳盡 ，噉啊 再 加 啲 油 鹽 醬 醋 。
聽佢 講 呢個 古仔 啊 ，怕 比 佢 當時 捉拿 鰲拜 啊 仲要 驚心動魄 啊 。
莊夫人 話 ：原來 係 噉樣 嘅 。
外邊啲 傳説 都係 不實 不盡 啊 ，話 桂相公 你 武功 好 使得 ，同 嗰個 鰲拜 大戰 三百 個 回合 ，收尾 用咗 絕招 先至 將佢 制服 噉 。
嗰個 鰲拜 號稱 滿洲 第一 勇士 ，桂相公 武功 再 高 啊 ，到底 仲係 細個 吖 。
韋小寶話 ：真係 打交 啊 ，就算 有 一百個 小桂子 啊 ，亦都 唔係 呢個 奸賊 嘅 對手 啦 。
收尾鰲拜 又係 點樣 死 嘅 呢 ？
韋小寶 個 心 諗 ：呢個 三少奶 九成九 唔係 女鬼 ，噉 就 必定 係 武林 人士 喇 。
唔需要 講大話 嘅 時候 就 千祈 唔好 講大話 ，以免 辛辛苦苦 贏翻嚟 嘅 錢 一鋪牌 又 輸翻 出去 。
於是 老老實實 將 康熙 派 佢 去 睇下 鰲拜 ，撞到 天地會 嚟 攻打 康親王府 ；
自己 又 認錯 咗 人 係 鰲拜 嘅 部屬 ，就 蜎 入去 囚室 ，殺 咗 鰲拜 等等 嘅 情形 ，一一二二 講晒 嘞 ，噉 收尾 佢 話 ：
呢 啲 人 啊 ， 原來 係 鰲拜 嘅 對頭 ， 係 天地會 青木堂 嘅 英雄好漢 啊 。
佢哋 見 我 殺咗 鰲拜 ，居然 對 我 好客氣 噃 ，話 同 佢哋 報咗 大仇 喎 。
桂相公 所以 得蒙 陳 總舵主 收 為 弟子 ，又 做咗 天地會 青木堂 香主 ，原來 都係 因為 噉嘅 。
韋小寶 個 心 諗 ：唓 你 乜 都 知道 嘞 ，仲 問 我 做 乜鬼嘢 吖 ？
佢 話 ：其實 我 都係 糊里糊塗 㗎 咋 咩嘢 都 唔識 嘅 ，做 天地會 青木堂 香主 ，直情 係 有名無實 啦 。
事關佢唔知道 莊夫人 同 天地會 係 咩嘢 關係 ，所以 先 嚟 個 模棱兩可 再 講 。
莊夫人 諗咗 一陣 就 話 ：
桂相公 當時 喺 監牢 裏 便 殺死 鰲拜 ，用 嘅 係 咩 招數 呢 ？
可唔可以 使出嚟 畀 我 睇下 啊 ？
韋小寶 見到 佢 雙眼 炯炯有神 個心 諗 ：
呢個 女子 好 厲害 㗎 ，我 如果 亂噏 一通 大吹牛皮 ，實會 穿煲 啫 ，我 老老實實 為 高 喇 。
噉佢 即刻 企起身 話 ：我 又 有 乜嘢 鬼招數 吖 ？
噉佢就 打咗 幾下 ，然後 話 ：
當時 我 嚇到 魂不附體 ，亂七八糟 ，噉 就係 嗰 幾下 唧 。
莊夫人 岌一岌頭 話 ：桂相公 請坐 。
講完 企起身 ，佢 又 話 ：
雙兒啊 ，我哋 啲 桂花糖 點解 唔 去 搦 啲 嚟 請 桂相公 試下 呢 ？
講完 ，向 韋小寶 萬福 行禮 ，就 行入 內堂 嘞 。
韋小寶 個 心 諗 ：佢 請 我 食 糖 ，梗係 冇 惡意 嘞 。
不過 呢個 三少奶 雖然 睇嚟 唔似 女鬼 啊 ，亦 講唔定 佢 道行 高 鬼氣 唔露 呢 ？
雙兒 行 入內堂 ，捧咗 一隻 青花 高腳 瓷碟 出嚟 ，碟 裏 便 裝咗 好多 桂花糖 同埋 松子糖 ，佢 話 ：
桂相公 ，食糖啦 。
將 隻 瓷碟 放 喺 枱面 ，就 行翻 入去 內堂 嘞 。
韋小寶 坐喺 花廳 ，食咗 唔少 桂花糖 同 松子糖 ，一味 望 快啲 天光 。
過咗 好耐 ，忽然間 ，聽見 啲 衣服 嘶嘶 沙沙 噉 聲 。
門啊 、窗啊 、屏風啊 後 便 ，多咗 好多 雙眼 ，偷偷地 喺度 裝佢 ，似乎 都係 女子 嘅 眼睛 。
黑麻麻 好 難分辨 係 人 定係 鬼 啊 ，睇到 佢 啊 心 都 寒晒 。
忽然間 聽見 一個 蒼老 嘅 女子 聲音 ，喺 屏風 門外 便 話 ：
桂相公 ，你 殺咗 奸賊 鰲拜 ，為 我哋 各家 報咗 血海深仇 ，大恩大德 ，唔知 點樣 報答 啊 。
屏風門 一 打開 ，外 便 幾十個 白衣 女子 一齊 跪晒 喺 地 。
韋小寶 吃咗 一驚 啊 連忙 答禮 。
聽見 啲 女子 喺 地下 咚咚咚 噉 叩頭 ，佢 亦都 叩頭 。
道 屏風 門 忽然 閂 翻 埋 喇 ， 嗰 老婦人 話 ： 恩公 唔 使 多禮 ， 未亡人 唔 敢當 啊 。
講完 ，聽見 屏風 門外 便 班 女子 大聲 噉 喊 起上嚟 。
韋小寶 毛骨悚然 啊 。
過咗 一陣 ，哭泣 個 聲音 漸漸 去 遠咗 ，呢啲 女子 呢 就 散嘞 。
佢 又 好似 發場夢 噉 啊 ，佢 諗 ：
到底係人呢定係鬼啊 ？誒 睇起上嚟 ，睇起上嚟 。
過咗一陣 ，莊夫人 喺 內堂 出嚟 佢 話 ：
桂相公 ，你 唔使 慌 嘅 。
住喺 呢處 嘅 人 ，都係 畀 鰲拜 害死 嘅 忠臣 義士 嘅 遺屬 。
大家 知道 桂相公 殺咗 鰲拜 ，為 我哋 報咗 大仇 ，都 好 感謝 桂相公 嘅 恩德 啊 。
噉樣 莊三爺 亦都係 ，誒 ，誒畀 鰲拜 害死 㗎 啦 ？
係 。
呢處 人人 泣血 痛心 ，日夜 都 等住 機會 報仇 ，想唔到 呢個 奸賊 ，惡貫滿盈 得 咁快 ，竟然 死 喺 桂相公 嘅 手下 。
哦 我 有 咩 功勞 唧 ？不過 係 撞啱 㗎啫 。
呢陣時 ，雙兒 將 韋小寶 嗰個 包袱 捧 翻 出嚟 放 喺 枱面 嘞 。
嗱 各位 ，欲知 後事 如何 ，且 聽 下回 分解 。
