前 文 再續 啊 書 接上 一回 啊 。
話説 徐天川 就 跟住 嗰班人 行咗 入去 大屋 裏便 ，敖彪 又 問 吳立身 嘞 ：
師父 ， 嗰 啲 人 係 咩 嘢 路數 啊 ？
吳立身啊搖頭話 ：睇唔出 ，聽口音似乎係 魯東 、關東 一帶 嘅人 ，唔似係 六扇門 嘅 鷹爪 。
唔 通 係 私梟 ？ 不過 又 冇 見 帶貨 啊 。
六 扇門 、 鷹爪 ， 都 係 江湖 暗語 ， 六 扇門 即 係 官府 ， 鷹爪 呢 即 係 差人 啊 。
劉一舟 話 ： 嗰 一班人 亦 冇 咩 大不了 唧 ， 倒 是 呢 間 屋裏 便 大批 女鬼 啊 認真 厲害 啊 。
講完 ，對住 韋小寶 伸 一 伸條脷 。
韋小寶 又 打咗 個 冷震 ，緊緊 噉 揸住 方怡 隻 手 ，自己 嘅 手板心 啊 ，冚𠾴唥 都係 冷汗 。
沐劍屏 聲震震噉 話 ：劉 ，劉師哥 ，唔該 你 唔好 一味 嚇人 啦 好唔好 ？
劉一舟 話 ：小郡主 ，你 又 唔使 擔心 噃 ，你 係 金枝玉葉 ，咩嘢 猛鬼 見到 你 都 遠遠 避開 唔敢 侵犯 嘅 。
啲 猛鬼 至 憎 嘅 呢 就係 不男不女 嗰啲 太監 。
方怡 即刻 豎起 道 眼眉 ，唔 高興 嘞 ，正 話 想 出聲 ，終歸 又 忍翻住 。
過咗 好耐 下 ，噉 大家 先至 返翻嚟 。
韋小寶 啊 唞 翻 個 大氣 ，個心 啊 稍為 定翻 啲 。
徐天川 低聲 話 ：
七八間 房 裏 便 ，總共有 三十幾 座 靈堂 ，每 座 靈堂 都 供奉 住 五六個 、七八 個牌位 。
睇嚟 ，每一座 靈堂 供奉 嘅 都係 一家 死咗 嘅 人 啊 。
劉一舟 話 ：咦 ？呢間 大屋 ，豈唔係 有 ，幾百 隻 惡鬼 ？
徐天川 擰擰頭 ，佢 見多識講 ，不過 從來 冇 聽過 噉樣 嘅 怪事 嘅 。
過咗 一陣 佢 話 ：最 奇怪 嘅 係 ，靈堂 都 點咗 蠟燭 啊 。
韋小寶 、方怡 、沐劍屏 三個人 同時 都 驚叫 起嚟 。
一名 漢子 話 ：我哋 先頭 入去 嘅 時候 ，蠟燭 明明 冇 點着 㗎 噃 。
嗰個 老人 問 ：你哋 冇 記錯 吖 嘛 ？
四名 漢子 啊 你 睇下 我 我 睇下 你 都 擰一擰 頭 。
嗰個 老人 話 ：唔係 有 鬼 ，我哋 遇到 高人 喇 。
咁快脆 ，就 將 嗰 三十幾 座 靈堂 個 蠟燭 都 點着 咗 ，噉嘅 身手 真係 敏捷 到 極 喇 。
許大爺 ，你 話 係唔係 吖嗱 ？
最收尾 呢句 説話 ，係 對住 徐天川 講 嘅 。
徐天川 就 扮 傻 喇 佢 話 ：
我 哋 最怕 係 衝撞 咗 屋主 啊 ， 不如 ， 不如 去 靈堂 叩翻 ， 叩翻 幾個 頭啦 。
突然 間 ， 喺 啲 雨聲 當中 ， 東便間 屋裏 便 傳 嚟 幾下 女子 嘅 啼哭 聲 ， 聲音 十分 悽切 。
雖然 大雨 落到 叭叭聲 啊 ，呢幾下 啼哭聲 卻 係 聽得 清清楚楚 嘅 。
哎呀 嚇到 韋小寶 張口結舌 ，面色 都 變晒 。
眾人 互相 睇下 ，毛骨悚然 。
過咗 一陣間 ，西便 間屋裏 便 呢 又 傳嚟 幾聲 女子 啼哭 嘅 聲音 。
劉一舟 、敖彪 ，同埋 兩名 漢子 一齊 叫話 ：鬼 喊啊 ！
嗰個 老人 突然間 大聲 話 ：
我哋 路經 貴處 ，嚟 呢處 避雨 ，擅闖 貴宅 真係 對唔住 喇 。
賢主人 肯唔肯 賜見 呢 ？
呢番 説話 中氣 充沛 ，一直 送出去 。
過咗 好耐 ，後便 一啲 動靜 都 冇 。
嗰個 老人 擰擰頭 ，大聲 話 ：
呢度 主人 既然 唔願意 接見 俗客 ，我哋 就 唔好 擅自 騷擾 嘞 。
就喺 間 廳 處 避 一避 雨 ，等到 天光 停咗 雨 嘞 ，大家 盡快 起程 啦 。
講完 猛打 手勢 ，叫 大家 唔好 講説話 ，又 打 側 個 耳 嚟 聽 ，過 咗 好耐 ，再 冇 聽見 啼哭 嘅 聲音 嘞 。
一名漢子 低聲 話 ：
章三爺 ，理佢 係 人 係 鬼 吖 ，一等 天光 ，一把火 ，將 呢間 鬼屋 燒成 瓦渣缸 。
唔好啊 ，我哋 緊要 嘅 事情 仲未 做 ，唔好 另生 枝節 ，坐低 唞下 罷啦 。
噉啊 大家 啲 衣服 都 濕晒 喇 ，就 喺 大廳 透 起 個 火 嚟 焙火 。
有人就攞出 個酒葫蘆 ，拔咗 個塞 ，遞畀 個老人家 飲 。
個 老人 飲咗 幾啖 酒 ，打 斜眼 向 徐天川 望咗 一陣 佢 話 ：
許大爺 ，你話 你哋 幾個人 係 一家人 啦 ，點解 口音 都 唔同 嘅 ？
你 係 北京 人 ， 呢 幾位 係 雲南 人 噃。
徐天川 笑住 話 ：大爺 真係 好 耳力 嘞 ，果然 係 老江湖 。
我 大妹 嫁 雲南 嘅 ，呢位 係 我 妹夫 。
講完 指一指 吳立身 。
佢 話 ：我 妹夫 、外甥 佢哋 都 係 雲南 人 。
我 二妹 又 嫁 喺 山西 。
天南地北 ，十幾年 都 好難 見 一次 面㗎 。
我哋 而家 係 去 山西 探 我 二妹 。
個 老人 岌一岌頭 ，飲咗 啖 酒 ，朦起 雙眼 話 ：幾位 喺 北京 嚟 啊 ？
係啊 。
喺 半路 有冇 見到 一個 十四五歲 嘅 小太監 呢 ？
呢句 説話 一出 ，徐天川 等 個 心 都 一震 嘞 。
好彩 嗰個 老人 只係 睇實 佢 ，而 徐天川 塊面 呢 係 神色 不露 ，而 敖彪 、沐劍屏 就 變咗 面色 嘞 。
徐天川 話 ：你 話 太監 啊 ？
北京城 裏 便 老 嘅 嫩 嘅 太監 好多 嘅 ， 一 出門 啊 總 係 撞 到 幾個 嘅 。
唔 係 啊 ， 我問 你 喺 半路 啊 ， 喺 半路 有 冇 撞見 過 ， 唔 係 喺 北京城 啊 。
大爺 ，你 噉 講 就 唔 在行 咯 。
大清 個 規矩 ，太監 一 出 京城 就 犯 死罪 。
啲 太監 就 唔似得 明朝 嗰陣時 咁 威風十足 咯 。
而家 有 邊個 太監 敢 出 京城 一步 啊 ？
哦 ，啊 講唔定 佢 換咗 裝束 呢 ？
唔會唔會 ，冇 呢個 膽 ，冇 呢個 膽 。
哎大爺啊 ，你 搵 嗰個 小太監 係 點樣 㗎 ？
等我 喺 山西 探完 親 返到 京城 喇 ，亦 可以 幫 你哋 打聽 下 吖 。
哼哼哼 ，多謝晒 ，我 唔知 我 有冇 咁長 嘅 命 唧 。
個 老人 講完 就 閉目 養神 嘞 。
徐天川 個 心 諗 ：佢 打聽 一個 十四五歲 嘅 小太監 ，噉 唔係 衝住 韋香主 ？
呢批人 ，唔係 天地會 嘅 ，又 唔係 沐王府 嘅 。
哼 ，十之八九 ，都 冇 好嘢 㗎喇 ，要 查問 明白 至 得 。
佢 唔 惹 我哋 我 又 要 惹 下 佢 吖 。
噉佢話 ：大爺啊 ，北京城 裏 便 嘅 小太監 ，只有 一位 係 好 出名 嘅 。
佢 個 大名 傳遍咗 天下 ，睇嚟 你 都 怕 聽過 㗎 喇 ，佢 就係 殺咗 奸臣 鰲拜 ，立咗 大功 嗰 一 位 呢 。
嗰 個 老人 擘開 隻 眼話 ： 吓 ？ 你 講 嘅 ， 係 小桂子 桂公公 啊 ？
唔係 佢 仲 有 邊個 吖 ？
呢個人 有膽有勇 ，武藝高強 ，真係 了不起 啊 ！
呢 個人 個 樣點 㗎 ？ 你 有 冇 見 過 佢 呢 ？
哈哈 ，呢個 桂公公 啊 ，日日 都 喺 北京城 逛嚟逛去 ，北京人 冇 見過 佢 嘅 都 怕 冇 幾多 個 唧 。
呢個 桂公公 又 黑 又 肥 ，係 個 肥仔 嚟 ，至少 ，誒 都有 十八九 㗎 喇 ，點 講 都 唔 信 佢 只係 得 十五歲 嘅 。
方怡 握住 韋小寶 隻手 出力 噉 揸咗 佢 一下 ，沐劍屏 用 手 踭 喺 佢 背心 輕輕 撞 一撞 ，都 喺度 偷笑 。
韋小寶 啊 本來 一直 喺度 怕鬼 嘅 ，聽 嗰個 老人 問起 自己 ，個 心 啊 緊張 起嚟 ，將 怕鬼 嘅 事 呢 ，都 唔 記得起 咁多 嘞 。
嗰個 老人 話 ：係咩 ？我 聽 人 講嘅 就 唔同 噃 。
聽講 呢個 桂公公 ，只不過 係 十三四歲 嘅 細佬哥 ，不過 就係 狡猾 機警 ，呢怕 同 你 嗰個 外甥 有 幾分 似 唧 ，哈哈哈哈哈哈哈 。
講完 ，就 望 實韋小寶 嘞 。
劉一舟 忽然間 話 ：聽講 嗰個 小桂子 卑鄙無恥 ，最叻 就係 使 蒙汗藥 嘞 。
佢 殺死 鰲拜 ，就係 用 藥 迷暈 佢 先 嘅 啫 ，如果 唔係 啊 ，呢個 賊仔 又 膽小 又 怕 鬼 ，點 殺得 鰲拜 吖 ？
佢 向 韋小寶 笑微微噉 話 ：表弟 ，你 話 係唔係 啊 ？
吳立身 嬲 到 極 啊 ，反手 一掌 ，對住 佢 塊 面 就 打過去 。
劉一舟 耷低頭 避開 ，左腳 一彈 ，已經 企起身 嘞 。
吳立身 反手 呢一掌 ，乃係 一招 碧雞展翅 ，劉一舟 閃避 彈起身 ，使嘅 ，係 一招 金馬嘶風 ，都係 沐家拳 嘅 招式 。
一個 打得 急 一個 又 避得 快 ，不知不覺 都 使出 本門 嘅 拳法 。
嗰 個 姓 章 個 老人 啪 聲企 起身 ， 笑 住 話 ： 好 啊 ， 眾位 喬裝改扮 得 好好 啊 ！
佢 一 企 起身 ，手下 十幾個 人 跟住 都 跳 起身 。
嗰個 老人 大喝話 ：都 捉起嚟 ，一個 都 唔能夠 放走 ！
吳立身 喺 身邊 抽出 短刀 ，個頭 向 左 便 一 搖 ，斬低咗 一名 漢子 ，向 右 又 一 搖 ，又 有 一名 漢子 喉嚨 中 刀 跌 咗 喺 地 嘞 。
嗰個 老人 ，雙手 喺 條 腰處 摸出 一對 判官筆 ，雙筆 互相 摩擦 發出 滋滋噉 聲 。
噉啊 雙筆 左 點 吳立身 咽喉 ，右 取 徐天川 心口 ，以 一 攻 二 身手 快捷 。
徐天川 向 右 便 一衝 ，左手 向 一名 大漢 雙眼 揦過去 。
嗰個 大漢 就 急急 向 後 一仰 避開 ，但係 手上 嘅 單刀 呢 ，已經 畀 佢 搶咗 咯 ，條 腰 一 痛 ，自己 把 刀 已經 斬 入 自己 嘅 肚 裏 便 。
嗰便 敖彪 亦 已經 同人 打起上嚟 嘞 。
劉一舟 遲疑咗 一下 ，解咗 條 軟鞭 上前 廝殺 。
噉 對方 雖然 人多 啊 ，不過 就 得 嗰個 老人 同 吳立身 鬥 得 個 旗鼓相當 ，其餘 啲 人 呢 ，都 係 武功 平平 唧 。
韋小寶 睇出 有 便宜 執 嘞 ，佢 諗 ：
只要 唔去 碰 嗰個 老龜公 ，其餘 嗰啲 呢 我 都 可以 對付 下 㗎 噃 。
就 揸住 匕首 想 衝上去 。
方怡 一手 拉住 佢 ：我哋 實贏 嘅 ，唔使 你 幫手 。
韋小寶 個 心 諗 ：我 梗係 知道 實贏 啦 噉 我 先 出去 打 啫 嘛 。
如果 實輸 㗎 ，嘿 ，仲唔 快啲 趯佬 咩 ？
忽然間 ，只 聽見 滋滋聲 ，原來 嗰個 老人 已經 跳埋 一便 嘞 ，兩支 判官筆 互相 摩擦 。
噉佢 手下 嗰 班 人 呢 ，一齊 走去 佢 身 嘅 後便 ，好快 就 排成 一個 方陣 。
呢班人啊 用咗 幾個 箭步 ，就 各自 企好 方位 嘞 。
十幾個人 ，亦冇 話 你 推 我 擁 嘅 ，誒 又 冇 碰碰撞撞 ，可見 平日 ，練習 有素 ，喺 擺陣 上 啊 已經 用咗 唔少 功夫 嘞 。
徐天川 同 吳立身 吃咗 一驚 ，退開 幾步 。
敖彪 就 唔 知道 厲害 ，仲 奮勇 上前 。
突然間 ，方陣 裏頭 四刀 齊出 ，兩把 刀 斬 佢 膊頭 ，兩把 刀 就 斬 佢 隻 腳 。
配合得 好巧妙嘅 ，中間 仲有 兩支槍 ，就 格開 佢 斬過去 嗰一刀 嘞 。
敖彪 大叫 一聲 ，膊頭 中咗 一刀 喇 。
吳立身 大叫 話 ：阿彪 ，退後 啊 ！
敖彪 即刻 向 後 跳開 。
噉 戰局 喺 眨下眼 之間 呢 ，勝負 突然間 掉轉頭 。
徐天川 企 喺 韋小寶 、沐劍屏 、方怡 前 便 ，保護 佢哋 ，同時 呢 睇 下 對方 呢個 陣法 係 點樣 運用 嘅 。
只見 嗰個 老人 右手 舉起 判官筆 ，高聲 大叫 ：
洪教主 萬年不老 ，永享仙福 ！壽 與 天 齊 ，壽與天齊 ！
嗰 十幾 名 漢子 一齊 舉起 兵器 ，大叫話 ：洪教主 壽 與 天齊 ，壽與天齊 ！
聲震屋瓦 ，個個 都 好似 癲咗 噉 。
徐天川 個 心 好 驚 啊 ，唔知 佢哋 喺度 搞 咩 嘢 鬼 。
但係 韋小寶 聽咗 洪教主 三個字 ，突然間 記起 陶紅英 慌到 極嘅 神情 同埋 佢 講嘅 説話 ，就 衝口而出 話 ：神龍教 ，佢哋 係 神龍教㗎 ！
嗰個 老人 變咗 面色 嘞 佢 話 ：
你 都 知道 神龍教 個 名堂 啊 ？
就 高舉 右手 又 嗌 嘞 ：洪教主 神通廣大 。
我 教 戰 無 不勝 ，攻 無 不克 ，無 堅 不摧 ，無 敵 不破 。
敵人 望風 披靡 ，逃之夭夭 。
徐天川 等 聽見 佢哋 每 唸 一句 ，個 心 就 一震 ，覺得 呢啲 人 嘅 行為 啊 稀奇古怪 ，從來 都 未 見過 嘅 ，對 敵 嘅 時候 ，居然 大聲 唸起 書 上 嚟 。
韋小寶 大叫 話 ：呢啲 人 會 唸咒 㗎 ，唔好 上 佢哋 當 ，大家 衝 上去 殺 啊 ！
嗰個 老人 同 佢 嘅 手下 越 唸 越 快 ，已經 唔係 嗰個 老人 唸 一句 眾人 跟 一句 嘞 ，而係 十幾個 人 齊聲 念誦 。
洪教主 神通 保佑 ，眾弟子 勇氣 百倍 ，以一當百 ，以百當萬 。
洪教主 神目如電 ，燭照 四方 。
我 弟子 殺敵 護教 ，洪教主 親 加 提拔 ，升任 聖職 。
我 教 弟子 護教 而 死 ，同 升 天堂 。
哇 ！突然間 ，放聲大叫 ，飛快 噉 衝出嚟 。
吳立身 、徐天川 佢哋 舉起 兵器 迎戰 。
不過 呢啲 人 呢 就 喺 咁 短暫 嘅 時間 裏 便 ，竟然 間 武功 大進 ，無論 用 刀 用 槍 ，都 比 先頭 嘅 勁力 增加 咗 幾 倍 。
佢哋 如痴如狂 啲 兵器 啊 亂斬亂殺 。
打咗 冇 幾多 個 回合 唧 ，敖彪 同埋 劉一舟 ，已經 畀 佢哋 斬低 嘞 。
跟住 韋小寶 、方怡 、沐劍屏 ，都 一個個 畀 佢哋 打低 。
方怡 啊 傷 腳 ，沐劍屏 傷 手 。
韋小寶 背心 啊 畀 人哋 㓤咗 一槍 ，好彩 佢 有 寶衣 護身 ，呢 一槍 呢 並冇 㓤入 佢 身體 ，但係 來勢 好勁 啊 ，一下 企唔穩 就 成個 趴 喺 處 。
過咗 冇 幾 耐 ，吳立身 同埋 徐天川 亦 先後 受傷 。
嗰個 老人 跟住 用 手指 點咗 各人 身上 嘅 要穴 。
佢 班 手下 一齊 叫話 ：洪教主 神通廣大 ，壽 與 天 齊 ，壽與天齊 ！
嗌完之後 ，突然間 一齊 坐喺 處 ，各人 嘅 額頭 啲 汗水 啊 ，白豆 咁 大粒 叭叭聲 咁 流 ，㗾㗾聲 咁 喘氣 ，顯然 疲倦 不堪 啊 。
呢一 戰 唔使 一杯茶 咁 耐 唧 ，就 分 勝敗 ，不過 呢啲 人 呢 就 好似 激戰 咗 好 幾個 時辰 一樣 啊 。
韋小寶 個 心 猛咁 叫苦 啦 佢 諗 ：
呢啲 人 原來 都 會 妖法 嘅 ，唔怪得 陶阿姨 一 提起 神龍教 就 嚇到 乜嘢 噉 啦 ，果然 係 神通廣大 。
嗰個 老人 坐 喺 張 椅 處 閉目 養神 ，過咗 好 耐 先至 企翻 起身 ，抹 咗 額頭 啲 汗水 ，喺 大廳 行嚟行去 。
又過咗 好耐 下 ，佢 手下 啲 人 都 紛紛 企起身 嘞 。
嗰個 老人 對住 徐天川 佢哋 話 ：
你哋 大家 一齊 跟住 我 唸 。
聽住喇 ，我 唸 一句 ，你哋 就 跟 一句 。
洪教主 神通廣大 ，壽 與 天 齊 。
徐天川 鬧 佢 話 ：邪魔左道 ，裝神扮鬼 ，要 老子 跟埋 你 搞鬼 啊 ，發夢 啦 你 ！
嗰個 老人 揸住 判官筆 ，喺 佢 額頭 一 打 ，噗 一聲 ，鮮血 惦 流 啊 。
徐天川 鬧 佢 嘞 ：你 係 狗賊 ，妖人 ！
嗰個 老人 就 問 吳立身 嘞 ：你 唸 唔 唸 啊 ？
吳立身 都 未 回答 就 擰頭 嘞 。
嗰個 老人 攞起 判官筆 ，亦 喺 佢 個 額頭 一㩧 。
噉啊再問敖彪 ，敖彪 鬧 佢 話 ：你 阿爺 壽 與 狗 齊 啊 。
嗰個 老人 好 嬲 啊 ，判官 筆 㩧 落去 嘅 時候 好 大力 ，敖彪 當堂 暈咗 。
吳立身 話 ：阿彪 ，你 係 好漢 ！
你哋 呢班 嘢 只係 會 搞 妖法 ，叉叉叉 有 種 就 殺咗 我哋 啦 ！
嗰個 老人 舉起 判官筆 ，對住 劉一舟 問 ：你 唸唔唸 啊 ？
劉一舟 話 ：我 ，我我 。
你 講 ：洪教主 神通廣大 ，壽 與 天 齊 。
劉一舟 話 ：洪教主 ，洪教主 。
嗰個 老人 將 判官 筆 嘅 尖尖 喺 佢 額頭 上 輕輕 督 一 督 ：快啲 唸 ！
係 ， 係 ， 洪 教主 ， 洪 教主 壽與天 齊 。
嗰個 老人 哈哈大笑 啊 ：哈哈哈哈哈哈哈哈哈哈哈 。
到底係 識時務 嘅 人 着數 ，你 呢個 僆仔 ，唔使 受 皮肉之苦 喇 。
噉佢 又 去到 韋小寶 面前 喝 佢 話 ：衰仔 ，你 跟住 我 唸 。
韋小寶 話 ：唔使 你 唸 啊 。
咩嘢話 ？老人 舉起 咗 判官筆 。
韋小寶 大聲 噉 唸話 ：
韋教主 神通廣大 ，壽 與 天 齊 ，永享 仙福 。
韋 教主 戰無不勝 ， 勝 無不 戰 ， 韋 教主 攻無不克 ， 克 無不 攻 。
韋 教主 提拔 你 哋 大家 ， 大家 同升 天堂 。
佢 將 韋 教主 呢個 韋字 講得 含含糊糊 。
嗰個 老人 呢邊 處 知 佢 搞鬼 唧 ，估話 佢 講 嘅 係 洪教主 啫 。
聽佢 噉樣 一連串 唸出嚟 ，哈哈大笑 讚佢 話 ：
哈哈哈哈哈哈 ，哈哈哈，啊你呢個細佬哥都幾精叻㗎噃。
佢 又 行到 方怡 面前 摸 佢 下 爬話 ：嗯 呢個 妹仔 嘅 樣 都 唔 錯 ，乖乖地 跟住 我 唸 啦 。
方怡 將 個 頭 一 扭 佢 話 ：唔 唸 。
嗰個 老人 舉起 判官筆 想 㩧落去 嘞 ，但 喺 燭光 之下 ，見到 佢 個 樣 咁 靚 個心 就 不忍 。
就 將 筆尖 對準 佢 嘅 面珠 佢 大聲 話 ：
你 唸 唔 唸 啊 ？ 你 再 話 唔 唸 ， 我 就 喺 你 塊 面 處 畫 三筆 。
方怡 好 硬頸 啊 係 都 唔 唸 ，但係 唔唸 兩個字 呢 亦 唔 敢 出口 。
個 老人 話 ：你 到底 唸唔唸 啊 ？
韋小寶 話 ： 我 代 佢 唸 啦 ， 擔保 啊 ， 好 過 佢 自己 唸 啊 。
嗰 個 老人 話 ： 邊個 要 你 代 啊 ？
攞起 判官筆 ，喺 方怡 膊頭 㩧 落去 ，方怡 痛到 吖噉 大叫 一聲 。
忽然間 有 個人 笑住 話 ：
章三爺 ，呢個 女仔 如果 唔 唸 呢 ，我哋 就 剝 佢 衣服 。
其他嘅人 一齊 叫話 ：好啊好啊噉啊 過癮啊 。
突然間 劉一舟 話 ：你哋 為咩 要 欺負 呢個 姑娘 啊 ？
你哋 要 搵 嗰個 小太監 ，我 知道 喺 邊處 。
嗰個 老人 連忙 問 佢 ：你 知道 ？喺 邊處 啊 ？快啲 講 ，快啲 講 ！
劉一舟 話 ：你 應承 我 ，唔 再 為難 呢個 姑娘 我 同 你 講 ，否則 你 殺咗 我 我 都 唔 講 。
方怡 大聲 話 ：師哥 ，唔使 你 理 我 。
嗰個 老人 笑住 話 ：好 ，我 應承 你 唔 難為 呢個 姑娘 。
你 講 說話 要 算數 噃 。
我 章 某人 講過 個 説話 ，當然 算數 啦 。
嗰個 小太監 ，就係 殺咗 鰲拜 ，皇帝 非常 寵幸 嘅 小桂子 ，你 真係 知道 佢 喺 邊處 ？
遠在天邊 ，近在目前 。
嗰 個 老人 跳 起身 嚟 ， 指住 韋小寶 話 ： 就 ， 就 ， 就 係 佢 ？
嗰個 老人 嘅 神情 真係 驚喜 交集 啊 。
嗱 各位 ，欲知 後事 如何 ，且 聽 下回 分解 。
