前文 再續 啊 書 接 上 一回 啊 。
話説 韋小寶 聽見 話 平西王 世子 駕到 ，康親王 啊 出去 迎接 噉 ，佢 諗 ：
平西王 世子 ？噉 唔 係 吳三桂 個 仔 咩 ？佢 嚟 呢 處 做 咩 呢 ？
索額圖 喺 佢 耳仔 邊 細細聲 話 ：
好兄弟 ，恭喜 你 今日 要 發財 喇 。
韋小寶 笑住 話 ：噉啊 要 睇 手氣 點樣 喇 。
手氣 當然 係 好 㗎 啦 ，除咗 賭錢 發財 之外 ，仲有 一處 走 唔 甩 嘅 大財 啊 。
係咩嘢呢 ？
吳三桂 派咗 個 仔 嚟 進貢 ，朝上 嘅 大官 ，個個 都 有 份 。
哦 ，吳三桂 派 個 仔 嚟 進貢 啫嘛 ，不過 我 唔係 朝上 大官 啊 。
你 係 宮裏頭 嘅 大官 ，仲比 朝廷 嘅 大官 威風 得 多 啊 。
吳三桂 個仔 吳應熊 ，精明 能幹 ，懂事 到 極 嘅 。
嗱 ，等陣 吳應熊 無論 送 咩 重禮 畀 你 ，你 都 唔 好 露出 歡喜 嘅 樣 啊 。
只係 隨便話 ：世子 嚟到 北京 ，一路上 辛苦喇 。
佢 如果 見 你 歡喜 咯 ，就 冇 下文 㗎 喇 。
你 神情 冷淡 ，佢 一定 係 當 你 嫌 禮物 輕 啊 ，聽日 又 嚟 重重 噉 補翻 一份 畀 你 啊 。
哈哈哈哈哈 ，原來 係 噉樣 敲 竹槓 嘅 法子 。
雲南 竹槓 ，唔 乒乒乓乓 敲 佢 一筆 就 笨 啦 。
佢 老子 擁有 云貴 兩 省 ，都 唔知 刮咗 幾多 民脂民膏 。
我哋 如果 唔 幫佢 使下 ，一來 對 唔住 佢 老子 ，二來 亦 對 唔住 雲南 貴州 嘅 老百姓 吖 。
冇 錯 喇 冇 錯 喇 。
正 喺 度 傾偈 ，康親王 已經 陪 咗 吳應熊 入嚟 嘞 。
呢個 平西王 世子 啊 ，廿四五 歲 年紀 ，相貌 十分 英俊 ，步履 矯捷 ，確實 係 將門 之 子 嘅 風範 。
康親王 第一個 就 拉咗 韋小寶 過嚟 ，佢 話 ：
小王爺 ，呢位 桂公公 ，係 萬歲爺 面前 最 得力 嘅 公公 。
上書房 力擒 鰲拜 ，就係 呢位 桂公公 嘅 大功 啊 。
吳三桂 派 喺 北京 城 裏 便 嘅 耳目 眾多 ，京城 裏 便 有 咩 大小 動靜 ，每 日 都 有 快馬 去 昆明 稟報 嘅 。
康熙 捉拿 鰲拜 ，係 呢 幾年 來 嘅 頭等 大事 ，吳應熊 當然 早就 知道 詳細 情形 。
吳三桂 曾經 同 佢 商量過 ，覺得 皇帝 剷除 權 要 喺 不動聲色 之間 ，佢 年紀 雖然 細小 啊 ，英氣 已經 顯露 。
日後 做 臣子 嘅 日子 只怕 唔係 點 好過 唧 。
吳應熊 呢次 秉承 父親 嘅 命令 嚟到 北京 朝見 天子 ，攜帶 大量 財物 ，賄賂 大臣 。
噉啊 最大嘅 用意 呢 ，就係 嚟 觀察 康熙 嘅 性格 同埋 為人 ，以及 佢 手下 重用 嘅 親信 大臣 啊 係 點樣 嘅 人物 。
今日 嚟到 康親王府 赴宴 ，冇估到 竟然 會 遇上 康熙 手下 最 得寵 嘅 太監 ，不由得 好 歡喜 ，連忙 伸出 雙手 ，握住 韋小寶 個 右手 猛咁 搖 佢 話 ：
桂公公 ，我 ，在下 。
佢 先 講咗 個 我 字 ，覺得 唔夠 恭敬 嘞 ，噉 啊 想 自稱 晚生 ，就 對方 年紀 太 細 吖 ；
噉 如果 講話 兄弟 ，噉 同 佢 又 冇 呢 個 交情 嘅 ；
如果 講話 卑職 ，對方 又 唔係 朝上 大官 ，噉 自己 嘅 品位 就 比 佢 高得多 嘞 ；
急急忙忙 ，就 用咗 句 江湖 口吻 ，就 話 在下 噉 。
好喇 ，閒話 休提 言歸正傳 。
吳應熊 話 ：在下 喺 雲南 嘅 時候 ，就 聽到 公公 嘅 大名 。
父王 同 大家 傾 起 上 嚟 都 稱頌 皇上 英明 果斷 ，確實 係 聖明 天子 。
仲話 聖天子 在位 ，連 公公 咁 細 嘅 年紀 ，都 能夠 立 呢個 大功 ，真係 令人 好 仰慕 啊 。
父王 吩咐 ，命 在下 準備咗 禮物 ，向 公公 表示 敬意 。
不過 大清 規矩 ，外臣 不便 結交 內官 ，在下 空有 呢個 心 ，唔敢 貿然 求見 。
今日 康王爺 賜 此 良機 ，真係 不 勝 之 喜 啊 。
佢 口齒 伶俐 ，一番 説話 講得 非常之 動聽 。
韋小寶 聽見 連 吳三桂 噉樣 嘅 大人物 ，喺 萬里 之外 啊 竟然 亦 知道 自己 嘅 名 ，哎呀 ，骨頭 都 鬆 晒 。
好在 呢啲 奉承 嘅 説話 呢 亦 聽得 多 嘞 ，早就 知道 點樣 應付 。
咪 於是乎 淡淡噉 話 ：
我哋 做 奴才 嘅 ，只係 奉 皇上 嘅 聖旨 辦事 ，就係 一 不怕 苦 ，二 不怕 死 而已啫 ，有 咩 功勞 好 講 呢 ？小王爺 嘅 説話 太過 誇獎 嘞 。
我 心諗 ：索額圖 哥哥 料 事 如 神 ，呢個 小 漢奸 果然 一見面 唧 ，就 提到 禮物 兩個 字 喇 。
吳應熊 係 遠客 ，又 係 平西王 嘅 世子 ，康親王 就 請 佢 坐 咗 首席 ，請 韋小寶 坐 次席 。
席上 嘅 大官 係 好多 㗎 ，尚書 、將軍 ，個個 爵高 位尊 。
噉 韋小寶 雖然 係 狂妄 啊 ，呢 個 次席 呢 亦 唔 敢 坐 ，一味 推辭 。
康親王 就 笑住 話 喇 ：桂兄弟 ，你 係 皇上 身邊 嘅 人 ，大家 敬重 你 ，亦 係 愛戴 皇上 嘅 一番 忠心 ，你 唔好 再 客氣 喇 。
講完 就 將 佢 扤 落 張 椅 處 。
索額圖 呢陣時 已經 升咗 國史館 大學士 ，官位 喺 各人 之 首 ，就 坐 喺 韋小寶 身邊 。
其餘 文武 大官 ，按 品級 、官職 高低 ，就 按 次序 坐落 喇 。
韋小寶 啊 忽然間 想起 ：豈有此理 ，以前 喺 麗春院 啲 嫖客 擺 花酒 ，阿媽 呢 ，就 坐 喺 嫖客 後便 ，順手 攞 幾件 糕餅 畀 我 食 ，啲 王八 仲 時時 趕開 我 。
嗰 陣 時 只 係 諗 ：幾時 老子 發 咗 達 呢 ，亦 都 嚟 麗春院 擺翻 一台 花酒 ，叫 龜婆 啊 、王八 啊 、姑娘 啊 都 嚟 陪酒 。
點 知道 今日 居然 有 親王 、王子 、尚書 、將軍 陪 我 ，只係 可惜 麗春院 呢啲 龜婆 啊 王八 啊 見 唔到 老子 噉 嘅 神氣 唧 。
噉 啊 大家 坐 落 飲酒 嘞 。
吳應熊 帶嚟 嗰 十六名 隨從 ，企 喺 長窗 嘅 側 跟 ，對 席上 眾人 敬酒 、夾餸 ，以及 僕人 傳送 酒菜 嘅 一 舉 一 動 ，都 係 目 不 轉 睛 咁 注視 住 。
韋小寶 稍為 諗 下 ，已經 明白 晒 嘞 ：
冇錯 喇 ，呢啲 係 平西王府 嘅 武功 高手 ，跟住 嚟 保護 吳應熊 嘅 ，慌怕 有人 行刺 放毒 。
沐王府 啲 人 ，怕 早 就 已經 守候 喺 外 便 嘞 。
等陣 最好 雙方 呢 搏命 打翻 一場 ，睇下 係 沐王府 個人 贏 呢 ，定係 吳三桂 嘅 手下 厲害 。
呢種 情形 啊 ，康親王 已經 睇見 嘞 ，不過 佢 身為 主人 ，亦 唔好 講 乜嘢 。
嗰個 侍衞 總管 多隆 呢 ，武功 使得 ，脾性 又 直 ，飲咗 幾杯 酒 就 話 喇 ：
小王爺 ，你 帶嚟 呢 十幾個 隨從 啊 ，一定 都 係 千中挑 、萬中選 嘅 武功 高手 喇 。
吳應熊 啊 笑住 話 ：佢哋 有 咩 武功 吖 ？
只不過 係 父王 府 裏 便 嘅 親兵 ，一向 跟住 兄弟 ，知道 兄弟 嘅 脾氣 ，出門 嘅 時候 ，貪 個 使喚 方便 而已 啫 。
多隆 話 ：小王爺 噉 就 講得 太 謙 喇 。
你 睇 呢 兩位 太陽穴 高高 噉 唂起 ，內功 呢 ，已經 到 咗 九成 火候 嘞 。
嗰 兩位 嘅 面 同埋 條 頸 ，肌肉 糾結 ，一身 嘅 上等 橫練 功夫 。
呢 ，仲有 嗰 幾位 滿面 油光 ，髧條 大辮 落嚟 ，嗯 ，我 睇 九成 條辮 都 係 假 嘅 。
呢 ，你 如果 叫 佢哋 除咗 頂 帽 啊 ，一定 係 光頭佬 喇 ，啊 係咪 呢 ？
吳應熊 微微笑 唔 回答 。
索額圖 就 話 ：我 只係 知道 多總管 武功 高強 啫 ，估唔到 你 仲係 識 睇相 添 噃 。
多隆話 ：索大人 有所不知 嘞 。
平西王 當年 駐兵 遼東 ，麾下 好多 錦州 金頂門 嘅 武官 。
金頂門 嘅 弟子 ，頭上 功夫 非常 厲害 嘅 。
凡係 功夫 練到 高深 嘅 時候 ，滿面 油光 ，之 頭殼 頂 呢 ，就 連 一條 頭髮 都 冇 嘅 。
康親王 話 ：好 唔 好 請 世子 吩咐 呢 幾位 尊價 ，將 帽 除 低 ，等 大家 睇 下 多 總管 嘅 推測 到底 準 唔 準 呢 ？
尊價 ，係 尊稱 人哋 嘅 僕人 。
吳應熊 話 喇 ：多 總管 目光 如炬 ，點 會 話 有 唔 準 㗎 ？
呢 幾 名 親兵 的確 練過 金頂門 嘅 功夫 ，但係 功夫 冇 練到 家 ，頭上 嘅 頭髮 仲係 唔 少 嘅 ；
除咗 頂 帽 咯 ，不免 令 佢 當眾 出醜 啫 ，希望 各位 大人 包涵 。
眾人 哈哈大笑 ，噉 既然 見到 吳應熊 唔願意 嘞 ，亦都 不便 勉強 。
韋小寶 啊 目不轉睛 噉樣 仔細 睇 呢 幾個 人 ，心痕 嘞 佢 ：
唔知 嗰個 大嚿佬 頭殼 有 幾多 頭髮 呢 ？
嗰個 瘦佬 功夫 啊 差啲 ，睇嚟 佢 頭髮 一定 好多 定喇 。
佢 忽然間 諗起 一件事 ，忍唔住 又 咭咭聲 噉 笑起上嚟 。
康親王 就 問 佢 ：桂兄弟 ，有 咩事 咁 好笑 啊 講出嚟 大家 聽下 。
韋小寶 話 ：我 諗 金頂門 嘅 師傅 呢 ，大家 一定 好 和氣 ，又 少 同 人家 逳手 ，自己人 呢 就 更加 唔會 打交 嘅 。
康親王 問 ：何以 見得 呢 ？
大家 如果 嬲 嘞 ，睩 一 睩 雙眼 ，噉 啊 各人 將 帽 除低 ，你 數數 我 嘅 頭髮 ，我 又 數數 你 嘅 頭髮 ，邊個 頭髮 少 呢 ，邊個 本事 就 高 ，頭髮 多 嘅 人 係 唯有 認輸 咯 。
眾人 哈哈大笑 ，都 話 韋小寶 個 想法 係 非常 有趣 。
韋小寶 又 話 ：金頂門 嘅 師傅 呢 睇嚟 隨身 都 要 帶 把 算盤 至 得 ，否則 計 起 頭髮 上 嚟 啊 ，就 唔 方便 咯 。
眾人 又 是 一陣 大笑 啊 。
有位 尚書 啊 正 飲緊 啖 酒 ，都 未 吞落 喉嚨 啊 ，一 聽見 呢 句 説話 ，成 啖 酒 噴 晒 出 嚟 。
就怕 噴 喺 枱面 失禮 啊 ，一 耷 低 頭 ，噴晒 喺 自己 衣襟 上 便 不停 咁 咳 。
多隆 話 ：康王爺 ，上次 鰲拜 嘅 餘黨 嚟 你 王府 騷擾 ，聽講 你 呢 幾 個 月 嚟 ，認真 招攬 咗 唔少 高手 噃 。
康親王 右手 慢慢 噉 捋 下 鬍鬚 ，好 得意 噉 話 ：
真係 有 身份 有 本事 嘅 高手 ，係 極 難 請 得到 嘅 ，肯 應 官府 聘請 嘅 ，多數 只係 二三流 嘅 貨色 而已 啫 。
噉啊 總算 小王 求賢若渴 ，除咗 重金 禮聘 之外 ，仲 幫 佢哋 辦咗 幾 件 事 ，噉 先至 請到 幾位 真正 頂尖 嘅 高手 。
不過呢 ，日日 都 要 好好 侍候 佢哋 ，亦 好 費心機 㗎 ，哈哈哈哈哈哈 。
隆話 ：王爺 聘請 高人 呢個 秘訣 ，肯唔肯 傳授 啊 ？
康親王 話 喇 ：多總管 自己 就係 一 等 一 嘅 高手 ，仲 請 咩 武學 高手 嚟 做 咩 嘢 吖 ？
多隆話 ：多謝 王爺 稱讚 。
想 當年 ，我哋 朝中 武將 喺 大校場 較技 ，攝正親王 啊 親自 監臨 ，王爺 同 小將 都 曾經 得到 攝政 親王 嘅 賞賜 。
聽講 呢次 鰲拜 嘅 餘孽 前嚟 滋擾 ，王爺 箭 不 虛 發 ，親手 射死 咗 二十幾 名 亂黨 啊 。
康親王 聽咗 微微 一笑 ，並 冇 回答 。
嗰日 呢 ，佢 確實 係 發箭 射死咗 兩名 天地會 會眾 ，至於 話 廿幾名 ，多咗 成 十倍 咯 。
韋小寶 話 喇 ：呢件事 我 係 親眼 睇見 嘅 。
當時 ，我 耳 仔邊 只 係 聽見 拂拂 聲 亂 咁 響 ，前面 呢 不停 噉 大叫 哎 吖 哎 吖 ，後 便 大叫 話 好 箭 好 箭 噉 。
一個 文官 就 唔 明白 韋小寶 講説話 嘅 意思 就 問 佢 ：
桂公公 ，點解 前面 嘅 人 啊 大叫 哎吖 ，後便 嘅 人 啊 大叫 好 箭 呢 ？
韋小寶 話 ：康親王 射箭 啊 百發百中 嘅 ，前便 畀 佢 射中 嘅 人 就 大聲 叫 話 哎喲 噉啦 ，後便 係 我哋 自己 人 喇 ，噉 當然 係 大讚 好箭 嘞 。
不過 嗰個 叫 好箭 嘅 人 呢 ，又 比 叫 哎吖 嘅 人 呢 多 幾 倍 噃 ，大人 知 唔 知道 其中 緣故 呢 ？
嗰個 官話 ：睇嚟 實係 我哋 呢便 嘅 人 ，比起 亂黨 要 多 幾 倍 喇 係 唔係 啊 ？
韋小寶 話 ：大人 呢 一下 就 估錯 咯 。
當其時 ，亂黨 大隊人馬 嚟 攻打 ，康王爺 以 少勝多 ，人數 呢 ，係 對方 多 。
不過 有啲 亂黨 畀 康王爺 一箭 射中 咽喉 ，呢 一聲 哎喲 啊 ，只係 到咗 喉嚨頭 唧 ，就 嗌唔出口 。
而 康王爺 呢 又 箭法 如神 ，亂黨 裏頭 啊 ，有 唔 少人 真 係 好 佩服 嘅 ，忍 唔 住 要 大聲 叫好 箭 好 箭 噉 。
明知 唔該 叫 喇 ，但 硬係 忍唔住 。
嗰 個 官 猛 咁 岌頭 話 ： 哦 ， 原來 如此 。
吳應熊 啊 舉起 酒杯 佢 話 ：康王爺 神箭 ，晚生 佩服 之至 ，敬 王爺 一杯 。
噉 眾人 都 舉起 酒杯 ，飲盡 為 敬 嘞 。
康親王 好 歡喜 個 心 諗 ：
小桂子 知 情 識 趣 ，唔怪得 皇上 歡喜 佢 啦 。
多隆 話 ：王爺 ，你 府中 請到咗 咁 多 武功高手 ，不如 請出嚟 同 大家 見下 好唔好 ？
康親王 本來 係 要 炫耀 下 嘅 ，就 吩咐 侍從 ：喺 呢便 再 開 兩 席 ，請 神照 上人 佢哋 出嚟 入席 。
過咗 冇 幾耐 ，喺 後堂 行出嚟 二十幾 個人 ，為首 嗰個人 身穿 大紅 袈裟 ，係 個 肥肥大大 嘅 和尚 。
康親王 起身 笑住 話 ：眾位 朋友 ，大家 嚟 飲 一杯 啦 。
席上 眾 賓客 見到 康親王 企起身 唄 ，亦都 企起身 嚟 相迎 嘞 。
嗰個 神照 上人 合十 笑住 話 ：不敢當 ，不敢當 ，列位 大人 請坐 。
講說話 把聲 啊 好響 ，淨係 呢份 中氣 唧 ，就知道 內功 修煉 得 十分 使得 嘞 。
其餘 嗰啲 人 高高矮矮 ，英俊嘅 又有 醜陋嘅 又有 ，分別 喺 新擺 嗰 兩圍 坐落 。
多隆 個人 又 好武 又 性急 ，唔 等 眾 武師 嘅 第一 巡 酒 飲完 就 話 ：
王爺 ，小將 睇 王府 呢啲 武林 高手 ，個個 相貌堂堂 ，神情 威武 ，功夫 啊 一定 係 極高 㗎喇 。
能唔能夠 請 呢啲 朋友 施展 下 身手 啊 ？
平西王 世子 同 桂公公 都係 難 請得到 嘅 貴客 ，睇嚟 ，亦都 想 睇下 康親王 門下 嘅 手段 嘅 。
韋小寶 第一個 附和 。
吳應熊 呢 就 拍掌 嗌 好 。
噉 其餘 眾 賓客 亦 都 話 ：係 啊 ，係 要 睇 啊 。
康親王 啊 笑住 話 ：
眾位 朋友 ，好多 貴客 都 想 見下 各位 嘅 功夫 ，唔知 係 點樣 嘅 練法 呢 ？
左手 便 武師 席上 一個 中年 漢子 啪 聲 企 起身 ，高聲 噉 話 ：
我 只話 康王爺 愛重 人才 ，噉 先至 前嚟 投靠 啫 ，誰知 將 我哋 當做 江湖 上 賣藝人 嚟 看待 。
列位 大人 要 睇 舞馬騮 、走 繩索 ，點解 唔 去 天橋 呢 ？告辭 喇 ！
講完 ，左手 一起 ，打 喺 椅背 上面 ，啪 一聲 ，椅背 當堂 粉碎 。
噉 大踏步 就 向 門邊 行 嘞 。
眾人 愕然 失色 啦 。
同 嗰個 漢子 一直 坐 嘅 有 一個 瘦小 嘅 老人 ，個 身 一晃 ，已經 攔住 喺 佢 前便 喇 佢 話 ：
郎 師傅 ，你 噉樣 講説話 太過 豈有此理 喇 。
王爺 對 我 哋 禮敬 有加 ，要 我 哋 獻 下 身手 ，郎師傅 如果 肯 練 嘞 ，固之然 係 好好 啦 ，如果 唔 願意 ，王爺 亦 唔 會 勉強 㗎 。
你 喺 王府 大廳 上面 拍 枱 拍 凳 ，毀壞 物件 ，王爺 就算 係 寬宏大量 啊 不加罪責 ，噉 第啲 兄弟 個 面 ，放 喺 邊處 好 啊 ？
嗰個 姓 郎 嘅 冷笑話 ：呵呵 ，人 各 有 志 。
陶師傅 鐘意 喺 王府 裏 便 玩嘢 ，即管 玩到 夠 啦 ，兄弟 少 陪 嘞 。
講完 ，𨂾 上 一步 。
嗰個 姓 陶 嘅 老人 話 ：你 真係 要 走 ，亦都 要 向 王爺 叩頭 辭行 ，王爺 岌 咗 頭 嘞 你 先至 走得 。
嗰個 姓 郎 嘅 冷笑話 ：我 又 唔係 賣身 畀 王府 嘅 奴才 ，兩隻 腳 係 我 嘅 ，要 行 就 行 要 走 就 走 ，使 你 管 咩 ？
講完 向前 就 行 。
嗰個 姓 陶 嘅 老人 竟然 唔 讓開 ，眼見 佢 就 要 撞到 自己 嘅 身上 嘞 ，伸手 就 向 佢 左臂 就 揦 。
話 你 唔 聽 亦 只好 管 下 喇 。
姓郎 嘅 左臂 一 沉 ，突然間 翻上 ，就 向 佢 條 腰 處 就 打 。
姓陶 嘅 右腳 飛起 ，踢 佢 心口 。
姓郎 嘅 右手 飛快 伸出去 ，托 喺 嗰個 姓陶 老人 踢 高 嘅 右腿 膝彎 之中 ，趁勢 一送 ，噉 向外 便 推咗 出去 。
嗰個 姓 陶 個 老人 ，仰面朝天 就 跌倒 。
啊 總算 佢 伸手 敏捷 ，右手 喺 地下 一撐 已經 跳 翻起 嘞 。
雖然 冇 跌倒 啊 ，不過 已經 出醜 ，嗰 塊 面 呀 唂 到 通紅 。
嗰個 姓 郎 嘅 漢子 冷笑 幾 聲 ，飛步 走向 廳口 。
突然之間 ，本來 空無一人 嘅 廳口 多咗 個 瘦削 漢子 ，拱手 話 ：郎兄 請回 。
嗰個 姓 郎 嘅 走得 好快 收勢 唔切 ，就 向 佢 身上 撞過去 嘞噃 。
嗰個 瘦佬 完全 唔 閃避 ，嘣 一聲 ，兩個人 已經 撞埋 一齊 嘞 。
姓郎 嘅 一個 踉蹌 ，連氣 退 咗 三步 。
然後 向 左便 打斜行 兩步 ，突然間 轉 右 ，向 右便 長窗 趯 出去 。
上下 到 門檻 嗰處 ，只見 嗰個 瘦佬 又 已經 攔 喺 佢 身前 便 嘞 。
姓郎 嘅 啱先 同 佢 撞咗 一 撞 知道 佢 厲害 ，唔敢 再 對 佢 撞過去 ，急忙 收 腳 。
噉 胸膛 同 佢 胸膛 呢 距離 不到 兩 寸 ， 鼻哥 尖 同 鼻哥 尖 呢 已經 碰埋 一 碰 嘞 。
嗰 個 瘦佬 紋絲不動 ， 連 眼 都 唔 眨 下 。
姓郎 嗰 個 突然 間 向 左 便 閃 ， 不過 只 係 一企定 唧 ， 嗰 個 瘦佬 又 已經 攔住 喺 佢 身前 便 。
姓郎 嘅 發惡 喇 ， 拂 一拳 ， 向 佢 面門 就 打 。
噉 兩個人 距離 咁 近 ，呢 一拳 勁力 又 大 ，睇 住 嗰個 瘦佬 唔係 側身 呢 就 需要 低頭 。
誰知 見 佢 左掌 喺 自己 面前 一豎 ，啪 一聲 ，呢一拳 打正 佢 掌心 。
佢 隻 手掌 微微 彎曲 ，姓 郎 嗰個 呢 已經 畀 佢 彈 到 連 退 幾 步 。
廳上 眾人 啊 ，大聲 贊好 ，一齊 話 佢 好 功夫 啊 噉 。
姓郎 嗰個 神情 十分 尷尬 ，走 係 走 唔 甩 喇 ，之 上前 逳手 呢 ，又 同 佢 武功 相差 太過 遠 ，一 時 之 間 手 足 無 措 。
嗰個 瘦佬 拱手 話 ：郎兄 請坐 。
王爺 吩咐 我哋 練 幾手 ，我哋 兩個 噉 唔係 練過 嘞咩 ？
講完 ，就 坐翻落 右手便 嗰 席 嘅 原位 。
噉 眾人 又 試 喝彩 。
姓郎 嗰個人 滿面 羞慚 ，耷 低 頭 入座 啊 。
嗰 姓郎 嘅 噉樣 一鬧 ，康親王 本來 搞到 面目 無 光 ，好彩 嗰個 瘦佬 幫 佢 攞 翻 面 ，逼到 呢個 姓郎 嘅 武師 回席 ，即刻 吩咐 侍從 話 ：
攞 啲 五十 兩 銀 嘅 元寶 嚟 。
韋小寶 笑 住 話 喇 ：呢 位 師傅 嘅 武功 真 係 叻 喇 ，噉 樣 一下 惡 ，誒 惡 ，惡虎攔路 ，嗰 個 傢伙 呢 就 點 都 走 唔 甩 嘞 。
唔知 佢 叫做 咩 名 呢 噉 ？
本來 佢 係 想話 惡狗攔路 嘅 ，吖 噏 咗 個 惡 字 呢 ，覺得 狗 字 唔好聽 ，就 臨時 改做 惡虎攔路 。
康親王 摸 一摸 個 面 ，想唔起 個 瘦佬 叫做 咩 名 嘞 。
呢個人 幾時 嚟到 王府 嘅 ，佢 嘅 心 亦 已經 冚𠾴唥 唔記得起 ，噉 就 話 ：
嗨 小王 記性 唔好 ，一時 諗唔起 嘞 。
過咗 一陣間 ，侍從 托住 一隻 大 木盤 ，盤上面 用 紅綢 墊底 ，放咗 二十 隻 五十 兩 個 大 元寶 ，銀光 閃閃 十分 耀眼 ，企 喺 康親王 嘅 身邊 。
嗱 各位 ，欲知 後事 如何 ，且 聽 下回 分解 。
