前 文 再續 啊 書 接上 一回 啊 。
話 說 徐 老伯 突然 間 話 唔 主張 韋小寶 ， 同埋 去 搵 沐 王府 個人 ， 就 避免 暴露 身份 噉 。
大家 一聽 ， 覺得 好 有 道理 。
但 係 韋小寶 呢 ， 佢 雖然 對 沐 王府 本來 有 啲 忌憚 嘅 ， 但 係 既然 請 武林 中 一 批 有 名望 嘅 人 同埋 去 ， 噉 即 係 話 有 贏 冇 輸 啫 。
好似 用 灌咗 鉛 嘅 骰仔 同 羊牯 賭 錢 ，點 能夠 置身 局外 呢 ？
佢 話 ，噉 我 如果 唔 去 就 唔好 玩 嘞 喎 ，我 個 姓名 身份 ，你哋 唔好 同 外人 講 就 得 啦 。
玄貞道人 話 ：如果 韋香主 喬裝 改扮咗 ，噉 就 冇人 知道 佢 喺 宮裏 便 辦事 啊 。
韋小寶 冇 聽 佢 講完 喇 即刻 就 拍手 嗌 好 ，一味 話 ：妙極 ，妙極喇 。
呢 個 主意 啊 投其所好 ， 上門 生事 本 嚟 已經 十分 有癮 㗎 啦 ， 改裝 之後 去 生事 啊 嘿 更加 妙上 加妙 啊 。
大家 本來 都 覺得 ， 如果 唔 係 韋香 主 率領 去 呢 ， 各人 擔 嘅 關係 太過 大 。
而家 見到 佢 咁 熱心 爭住 話 要 去 ， 當然 冇 意見 啦 。
噉 徐 老伯 話 ：大家 ，大家 千 祈 要 小心 啊 。
韋香主 ，扮 ，扮 咩嘢 人 啊 ？
噉 大家 望住 韋小寶 聽 佢 指示 。
韋小寶 個 心 諗 ：噉 我 扮 個 富家公子 好 呢 ，定係 扮 個 乞兒仔 好 呢 ？
佢 喺 妓院 嘅 時候 ，見到 嚟到 嫖妓女 嘅 王孫公子 衣飾 華貴 ，向來 都 十分 羨慕 嘅 ，就係 可惜 一直 冇 機會 着 。
稍為 沉吟 下 ，就 喺 個 袋 處 扲出 三張 五百 兩 銀 嘅 銀票 ，佢 話 ：
呢處 有 一千五百 兩 銀 ，勞煩 邊位 大哥 去 同 我 買 啲 衣服 啦 。
大家 一見 都 微微 吃一驚 ，幾個人 一齊 話 ：邊度 用得 咁 多 銀 啊 ？
韋小寶 話 ：我 銀 係 有 啊 ，衣服 呢 買得 越 貴 越 好 ，誒 再 買啲 珠寶 戴起 上嚟 ，噉 邊個 都 唔 知道 我 係 宮 裏 頭 個 小 ，誒誒 小太監 啦 。
玄貞 道人 話 ：韋 香 主 講得 啱 。
高 兄弟 ，你 去 幫手 買 韋 香主 嘅 衣服 啦 。
韋 小寶 又 攞咗 一千兩 銀 嘅 銀票 佢 話 ：誒 使 多啲 錢 啦 ，唔緊要 㗎 。
嘩 ，啲 人 見到 呢個 細路 ，身邊 嘅 銀票 咁 多 ，都 暗中 驚奇 嘞 。
點講 都 估 唔 到 佢 屋裏 便 嘅 銀 啊 ，竟然 有 四十幾萬 兩 咁 多 啊 。
按照 韋小寶 本來 嘅 脾氣 呢 ，佢 身邊 就算 有 二三 錢銀 啊 ，都 要 使 清使淨 先至 舒服 嘅 。
不過 而家 四十幾萬 兩 銀 噃 ，點至 使得完 啦 ，能夠 買 啲 華貴 衣服 嚟 着 下 ，出 下 風頭 ，哎 真係 機會 難得 。
見 大家 眼 都 擎晒 ，吖 又 伸手 入 袋 嘞 。
佢 個 手 伸翻 出 嚟 嘅 時候 ， 手掌 裏 便 已經 有 三千五百 兩 銀 嘅 銀票 ， 噉 啊 交 畀 玄貞 道人 話 ：
兄弟 同 各位 大哥 今日 初初 相見 ，冇 咩 孝敬 嘞 ，呢 啲 銀 呢 ，喺 宮裏 便 攞 㗎 ，都 係 不義 ，誒 ，不 義 嘅 銀 啊 。
佢 本來 呢 ，就 想 講 不義之財 嘅 ，講到 出口 嘅 時候 呢 句 成語 又 唔 記得 咗 ，所以 就 話 不義 嘅 銀 。
誒 ，請 大家 幫手 使 啲 啦 。
天地會 啊 規矩 嚴明 ，唔能夠 立亂 攞 人 嘅 財物 嘅 。
樊綱 、高彥超 等人 呢 已經 窮咗 好耐 嘞 ，突然間 見到 韋香主 攞出 咁多 銀票 ，又 講明 係 攞 清廷 嘅 不義之財 。
佢 既然 喺 清宮 當差 ，噉樣 講 當然 係 真 㗎 喇 。
各人 情不自禁 都 歡呼 起嚟 啊 。
玄貞話 ： 我 哋 要 分頭 去 請人 ， 今日 就 嚟 唔 切 喇 。
韋香主 ，聽日 大家 喺 呢處 恭候 大駕 ，唔知 你 咩 時候 能夠 到 呢 ？
韋小寶 話 ：上午 我 又 要 當差 ，誒 ，午後 一定 到 。
玄貞話 ：好 ，聽日 午後 ，我哋 先 喺 呢度 會齊 ，然後 一齊 去 同 嗰 兩個 姓 白 嘅 講數 。
當晚 韋小寶 呢 就 心痕痕 喇 ，喺 屋裏 便 跳上跳落 指手畫腳 。
第日 喺 上書房 出嚟 ，就 匆匆忙忙 去 珠寶店 買咗 一隻 大 翡翠 戒指 。
又 叫 店裏頭 嘅 師傅 ，喺 一 頂 短帽 上 便 ，釘翻 一 塊 大 白玉 ，四 粒 圓淨 嘅 明珠 。
噉 一嚟 呢 就 使咗 四千幾 兩 銀 嘞 。
珠寶店 見 呢位 貴客 係 宮中 太監 ，噉 一啲 都 唔 奇怪 噃 。
因為 既然 係 內宮 嚟 採購 珠寶 ，使 錢 再 多 十倍 亦 係 平常 啦 。
韋小寶 趕到 回春堂 藥店 ，噉啊 眾人 已經 喺 地牢 裏 便 等候 佢 。
話 已經 請咗 北京 四位 知名 嘅 武師 一齊 去 做 見證 ，每人 呢 ，已經 送咗 二百 兩 銀 謝禮 喇 噉 。
韋小寶 個 心 諗 ：得 人 錢財 啊 與 人 消 災 ，呢 四位 武師 啊 非 幫 我哋 不可 喇 。
不過 二百兩 銀 謝禮 太過 少 吖 ，最好 呢 就 送夠 五百兩 ，四位 武師 亦 少過頭 啫 ，最好 請 十六位 。
高彥超 攞出 衣服 鞋襪 嚟 畀 韋小寶 換咗 。
每件 衣物 都 十分 華貴 嘅 ，外便 嗰件 長袍 呢 ，係 火狐 皮 嘅 襯裏 ，喺 領口 同埋 衣袖 外便 ，翻出 油光滑亮 嘅 毛皮 。
高彥超 話 ：皮袍 呢 叫 佢哋 漏夜 改 細 嘅 ，畀 多 三兩六 錢銀 嘅 工錢 。
韋小寶 話 ：唔 貴 吖 ，唔 貴 啊 。
一件 天青 綢緞 嘅 馬褂 ，十粒 紐扣 呢 ，都 係 黃金 打 嘅 。
就算 係 噉 ，佢 畀 嘅 銀 仲 係 一半 都 使 唔 晒 。
韋小寶 喺 宮中 住 咗 將近 一年 ，所謂 居 移 氣 養 移 體 ，食用 又 好 ，見識 又 多 ；
呢 半年 嚟 做咗 尚膳監 嘅 首腦 ，百幾名 太監 啊 畀 佢 派 嚟 派 去 ，做 首領 呢 ，早就 做到 慣 嘞 。
而家 周身 一打扮 ，雖然 係 有啲 暴發戶 嘅 俗氣 ，不過 呢 亦 顯得 款式 非凡 啊 派頭 十足 ，同埋 樊綱 、高彥超 呢班 草莽 豪傑 啊 大 不 相同 。
噉啊 大家 已經 安排好 一頂 轎 喺 門口 等住 ，請 韋小寶 上 轎 ，就 防備 佢 改裝 之後 ，喺 城 裏 便 行 呢 ，就 撞見 宮中 太監 或者 朝廷 官員 就 唔好 嘞 。
一行人 先 去 東城 武勝 鏢局 ，同 四位 武師 會 齊 。
嗰 四位 武師 ，第一位 ，係 北京 潭腿 門 掌門人 老武師 馬博仁 ，佢 係 清真教 門 嘅 ；
第二位 ，跌打名醫 姚春 ，徐老伯 受咗傷 ，就 係 由 佢 醫治 嘅 ，呢個人 又 係 名醫 ，擒拿 短打 亦 係 一絕 ；
第三位 係 外號 虎面霸王 嘅 雷一嘯 ，鐵布衫 功夫 啊 非常 有名 ；
第四位 就係 武勝鏢局 嘅 總鏢頭 ，金槍王 武通 嘞 。
馬博仁 等 四個人 啊 ，早就 知道 天地會 領頭 嘅 韋香主 年紀 好 輕 ，一見 ，竟然 係 噉樣 一個 豪富 少年 都 十分 奇怪 。
但係 各人 久仰 陳近南 嘅 大名 ，個 心 諗住 天地會 總 舵主 嘅 弟子 ，年紀 雖然 係 細唧 ，亦 必定 有 驚人 嘅 藝業 㗎 ，所以 呢 都 唔 敢 睇小 佢 。
眾人 喺 鏢局 裏 便 飲咗茶 ，就 一齊 去 楊柳胡同 嗰個 姓 白 嗰 兩個 人 住 嘅 地方 。
韋小寶 同 馬博仁 、姚春 三個人 就 坐 轎 ，雷一嘯 同 王武通 啊 騎 馬 ，其餘 個人 呢 就 步行 。
玄貞道人 同埋 樊綱 等等 都 係 成名 嘅 人物 ，王武通 呢 ，本來 話 要 借 馬 佢 哋 騎 嘅 ，但 係 玄貞 怕 惹人注目 啊 就 堅決 唔 肯 。
一行人 嚟到 楊柳胡同 嘅 一座 朱漆 大門 嘅 宅第 之外 ，高彥超 正 話 想 上前 拍門 ，忽然間 聽見 裏 便 傳嚟 隱隱約約 嘅 哭聲 。
大家 一窒 ，只見 大門外 便 掛住 兩盞 白色 燈籠 ，哦 原來 屋企 有 喪事 。
高彥超 就 輕輕 呱呱呱噉 叩 幾下 門環 ，過咗 一陣 ，大門 打開 ，一名 老管家 出嚟 嘞 。
高彥超 呈上 準備好嘅 五張 名帖 ，佢 話 ：
武勝鏢局 、潭腿門 、天地會 嘅 幾位 朋友 ，前嚟 拜會 白大俠 、白二俠 。
嗰個 老管家 聽見 天地會 三個 字 唧 ，眼眉 一 豎 ，嬲爆爆 噉 向 眾人 睩 咗 一 眼 ，接過 拜帖 ，一 言 不 發 就 行翻 入去 。
馬博仁 年紀 雖然 係 老 咋噃 ，火氣 係 極之 大 嘅 ，當堂 忍唔住 發火 咯 ：呢個 奴才 咁 無禮 嘅 ！
韋小寶 話 ：馬大爺 嘅 説話 一啲 都 冇 錯 啊 。
佢 對 沐王府 個人 啊 到底 好 怕 ，只係 望 馬博仁 、王武通 等 人 呢 企 定 喺 自己 呢一邊 。
等陣 如果 逳手 啊 ，就 可以 有 多 幾個 得力 嘅 幫手 嘞 。
隔咗 一陣 ，一名 二十六七歲 嘅 漢子 行出嚟 ，身材 好 高 ，披麻戴孝 滿身 喪服 ，兩眼 紅腫 ，仲係 淚痕 未 乾 啊 。
佢 抱拳 行禮 話 ：韋香主 、馬大爺 、王總鏢頭 ，各位 大駕光臨 ，有失遠迎 。
在下 白寒楓 有禮 。
噉 大家 就 抱拳 還禮 。
白寒楓 啊 請 眾人 入去 大廳 。
馬博仁 呢 最 性急 咯 佢 問 ：
白二俠 身上 有 服 ，唔知 府上 係 邊 一位 過世 呢 ？
白寒楓 話 ：係 家兄 寒松 不幸 亡故 啊 。
馬博仁 話 ：哎呀 可惜 ！白氏 雙木 乃 係 沐王府 嘅 英雄 虎將 ，武林 中 好 有名 。
白大俠 正當 英年 ，唔知 得咗 咩嘢 病 呢 ？
當其時 大家 啱啱 嚟到 大廳 ，仲未 坐落 ，白寒楓 聽到 噉 講 ，突然間 轉過身 ，雙眼 好似 噴火 噉 ，大聲 話 ：
馬大爺 ，在下 尊敬 你 係 武林 前輩 ，以 禮 相待 ，你 噉樣 明知故問 ，係 譏諷 我 啊 ？
佢 忽然間 發惡 ，韋小寶 出其不意 又 吃咗 一驚 ，退咗 一步 。
馬博仁 摸住 白鬍鬚 佢 話 ：哦 噉 就 奇咯 ，老夫 唔知 噉 先至 問 啫 ，咩嘢 叫做 明知故問 啊 ？
白二俠 死咗 兄長 ，就算 心裏頭 悲痛 亦 唔能夠 向 我 老頭子 發脾氣 㗎 。
白寒楓 哼 一聲 佢 話 ：請坐 。
馬博仁 自言自語 噉 話 ： 坐 唔 係 坐 ， 哼 ， 唔 通 仲 怕 咗 你 咩 ？
噉啊 對 韋小寶 話 ：韋香主 ，你 請 上座 。
韋小寶 話 ：唔係 唔係 ，仲係 請 馬大爺 上座 。
白寒楓 睇咗 拜帖 ，知道 來客 之中 有 天地會 嘅 青木堂 香主 韋小寶 ，但 佢 點都 估唔到 呢個 少年 就係 韋香主 。
個心 又 奇 又 嬲 一 伸手 就 揦住 韋小寶 隻 左腕 ，喝 佢 話 ：你 就係 天地會 嘅 韋香主 啊 ？
呢 一 揦 嘅 力量 大到 極 ，韋小寶 啊 奇痛 入骨 啊 ，吖 噉 大聲 叫喊 ，兩行 眼淚 叭叭 聲 咁 流 。
玄貞道人 話 ：上門 係 客 ，白二俠 太過 蝦人 喇 。用 手指 向 白寒楓 脇下 點 過去 。
白寒楓 左手 一 擋 ，放開 韋小寶 嘅 手腕 ，退開 一步 話 ：得罪 晒 喇 。
韋小寶 愁眉 苦面 用 衫袖 抹 乾 啲 眼淚 。
白寒楓 啊 固之然 係 大出 意料之外 啦 ，馬博仁 、王武通 ，同埋 天地會 嗰班人 呢 亦 都 好 驚奇 。
白寒楓 呢一 揦 啊 ，雖然 係 手法 凌厲 ，不過 亦 唔係 無可 擋避 嘅 。
呢個 韋香 主 身為 陳近南 嘅 弟子 ，不但 閃避 唔到 ，仲要 大聲 嗌 ，仲 流 眼淚 添 ，哎 ，實在 係 武林 中 一件 大 奇事 。
玄貞 、樊綱 、高彥超 等人 都 面紅耳赤 ，好 醜 啊 。
白寒楓 話 ：對唔住 嘞 。
家兄 不幸 為 天地會 落毒手 害死 ，在下 心裏頭 悲痛 。
佢 説話 都 冇 講完 ，大家 都 話 ：咩嘢 話 ？
點解 白大俠 會 畀 天地會 害死 啊 ？
邊度 有 噉嘅 事 啊 ？決 無 此 事 。
白寒楓 啪聲 企起身 大聲 話 ：
你哋 話 絕無 此事 ，唔通 我 阿哥 冇 死 咩 ？
你 哋 嚟 ，你 哋 嚟 ，大家 親眼 睇 下 。
一 伸 手 ，又 向 韋小寶 左臂 揦 過去 。
呢 一 次 玄貞道人 同埋 樊綱 都 有 咗 準備 喇 ，白寒楓 右臂 啱啱 逳唧 ，兩 個人 一 攻 前胸 就 一 攻 後背 ，同時 出手 。
白寒楓 即刻 斜身 拗步 ，雙掌 左右 打出去 。
玄貞 左掌 一抬 ，右掌 又 打出去 咯 。
樊綱 就 已經 同 白寒楓 交咗 一掌 。
白寒楓 變招 反點 玄 貞 嘅 咽喉 ，玄貞 就 側身 避開 。
白寒楓 大聲 話 ：我 大哥 已經 死 喺 你哋 手上 ，我 亦 唔想 生 嘞 。
天地會 嘅 狗畜牲 一齊 上嚟 就係 喇 。
跌打名醫 姚春雙 手 一攔 佢 話 ：唔好 逳手 ，呢 中間 恐怕 有 誤會 。
白二俠 口口聲聲 話 白大俠 係 畀 天地會 害死 嘅 ，到底 真實 情形 係 點 吖 ，唔該 講明白 先 。
白寒楓 話 ：你哋 嚟 ！噉 啊 大踏步 行 入去 內堂 。
噉 眾人 諗住 自己 呢便 人多 啊 ，亦 唔 怕 佢 有 咩 陰謀 詭計 就 跟埋 入去 。
啱啱 嚟到 天井 ，大家 就 企定 嘞 。
只見 後 廳 係 個 靈堂 ，靈幔 後 便 係 一 埲 棺材 ，死人 啊 瞓 到 棺材 上 便 ，就 露出 半個 頭 一對 腳 。
白寒楓 掀起 靈幔 ，大聲 噉 叫 ：
阿哥 你 死 得 唔 眼閉 ，細佬 點 都 要 殺 幾個 天地 嗰 嘅 狗 畜牲 ，同 你 保仇 啊 。
佢 聲音 嘶啞 顯然 係 喊咗 好耐 嘞 。
韋小寶 一見到 死人 個樣 ，大吃一驚 ，因為 嗰個 正係 喺 蘇北 小飯店 裏 便 見過 嘅 。
嗰個人 用 筷子 嚟 打 吳三桂 嘅 部屬 ，武功 高強 ，想唔到 竟然 會 死 喺 呢處 。
噉 跟住 佢 又 諗 ：對方 少咗 個 厲害 腳色 噃 。噉 又 寬心 翻 嘞 。
馬博仁 、姚春 、雷一嘯 、王武通 四個人 行埋去 。
王武通 同 白寒松 有過 一面之緣 嘅 ，佢 歎口氣 話 ：
唉 ，白大俠 果然 真係 逝世 ，可惜啊 。
姚春 啊 特別 仔細 ，仲 伸手 去 摸 一摸 死人 嘅 脈 。
白寒楓 冷笑 話 ：呵呵 ，你 如果 醫得 我 大哥 還陽 ，我 ，我 叩 一萬二千 個頭 畀 你 。
姚春 歎一口氣 佢 話 ：白二俠 ，人 死 就 不能 復生 ，仲 係 請節哀 。
傷害 白大俠 嘅 ，真係 天地會 嘅 人 咩 ？白二俠 冇 搞錯 吖嘛 ？
白寒楓 話 ：我 ，我 搞錯 ，我 會 搞錯 嘅 ？
大家 見到 佢 哀痛 成噉 嘅 樣 ，足見 手足之情 就 極 深 ，都 不禁 為 佢 難過 。
樊綱 嘅 憤怒 亦 平息 翻 嘞 ，佢 諗 ：
佢 死咗 兄長 亦 難怪 出手 不知 輕重 嘅 。
白寒楓 雙手 叉腰 大聲 話 ：
害 死 我 大哥 嘅 ，係 嗰個 平日 喺 天橋 賣 膏藥 嘅 徐 老賊 ！
呢個 老賊 叫做 徐天川 ，有 個 匪號 叫做 八 臂 猿猴 ，係 天地會 青木堂 有 職司 嘅 人 係 唔 係 吖 ？
你 仲 能 唔 能夠 賴 啊 ？
樊綱 同埋 玄貞 幾個 人 你 睇 我 我 睇 你 ，佢 哋 呢 班 人 ，嚟 到 楊柳 胡同 呢 本來 係 要 向 白氏 兄弟 問罪 ，質問 佢 哋 點解 要 打傷 人 。
誰知 白氏 兄弟 當中 ，大哥 白寒松 ，竟然 已經 死在 徐天川 嘅 手下 。
樊綱 歎咗 口氣 佢 話 ：
白 老二 ，徐天川 徐大哥 係 我 哋 天地會 嘅 兄弟 ，不過 佢 。佢 。
白寒楓 大聲 話 ：佢 點 啊 ？
樊綱話 ：佢 已經 畀 你哋 打到 重傷 ，奄奄 一息 ，亦 唔知 呢陣時 係 生 定 係 死 。
唔怕 同 你 講 吖 ，我哋 今日 嚟 ，原本 係 要 請問 你哋 兄弟 ，點解 要 將 我哋 徐大哥 打成 噉樣 嘅 。
誰 知道 ，唉 想 唔到 ，唉 。
白寒楓 發惡嘞 ：咪 話 呢個 姓 徐 嘅 老賊 未 死 啊 ，就算 佢 死咗 ，呢個 豬 狗 不如 嘅 老賊 ，亦 唔 配 同 我 大哥 填命 。
樊綱 亦 發惡嘞 ：你 講 說話 不 乾 不 淨 ，似 咩 武林 中 嘅 好漢 啊 ？
要 你 講 你 想 點 吖 ？
白寒楓 大叫 話 ，我 ，我 唔 知道 啊 ！我 要 將 你哋 天地會 呢批 狗賊 ，一個個 都 剁成 肉醬 。
我 陪 埋 你 一齊 死 ，大家 死 晒 仲 乾淨 啊 ！
一 轉身 ，喺 死人 身邊 呢 抽出 一把 鋼刀 ，跟住 成個人 跳起 ，直情 好似 癲老虎 一樣 ，揮刀 虛劈 ，呼呼 咁 響 啊 。
天地會 樊綱 、玄貞 等 人 紛紛 抽出 所帶 嘅 兵器 ，準備 迎敵 。
韋小寶 連忙 縮埋 喺 高彥超 後 便 嘞 。
猛然間 ，聽見 一聲 大吼 ：唔好 逳手 ！
聲音啊 震到 各人 嘅 耳仔 嗡嗡響 ，只見 虎面霸王 雷 一嘯 啊 舉起 雙手 ，擋住 喺 天地會 眾人 前 便 ，大聲話 ：
白二俠 ，你 要 殺人 ，殺 我 啦 ！
呢個人 個 姓啊 姓得 好 ，個名 亦 改得 好 ，一聲 大喝 啊 確 有 雷震 之 威 啊 。
其實 白寒楓 啊 心傷 大哥 死咗 ，已經 有啲 神智失常 ，而家 畀 佢 噉樣 一喝 ，噉 啊 頭腦 稍為 清醒翻 ，佢 話 ：
我 殺 你 做咩 啊 ？我 大哥 又 唔係 你 殺 嘅 。
雷一嘯 話 ：係吖 ，呢啲 天地會 嘅 朋友 ，亦唔係 殺 你 大哥 嘅 人 啊 。
再講吖 ，普天下 天地會 嘅 會眾 ，話到 最少 啊 都有 二三十萬 ，你 殺得完 咩 ？
白寒楓 一窒 ，然後 又 大叫 話 ：
殺得 一個 係 一個 ，殺得 一雙 係 一雙 ！
突然之間 ，外便 隱約 傳嚟 一陣 急促 嘅 馬蹄聲 ，好似 有 十幾 騎馬 向 呢便 跑過嚟 。
姚春話 ：怕係 官兵 噃 ，大家 收起 兵器 。
樊綱 、 玄貞 等 人 見到 雷一嘯 喺 前 便 擋住 ， 白寒楓 呢 唔 係 咁 容易 撲過 嚟 揮刀 傷人 喇 ， 就 收起 兵器 。
白寒楓 大聲 話 ：就係 天王老子 嚟到 我 都 唔怕 佢 ！
馬蹄聲 越 嚟 越近 嘞 ， 走 咗 入 胡同 ， 嚟 到 門口 停住 。
跟住 又 響起 敲門聲 ，門外 便 有人 叫 ：白二弟 ，係 我 啊 ！
人影 一晃 ，一個 人 跳牆 而 入 ，衝咗 入嚟 。
呢個人 四十幾歲 ，神態 威武 ，面色 已經 變晒 嘞 ，佢 聲 都 震晒 話 ：
果然 ，果然 係 白大弟 ，白大弟 。
白寒楓 拋 咗 手上 嘅 鋼刀 ，迎上去 佢 話 ：蘇四哥 ，我 大哥 ，我 大哥 啊啊啊 啊 。
一口氣 講唔落 喇 ，放聲 大哭 。
馬博仁 、樊綱 、玄貞 佢哋 都 諗 ：
呢個人 莫非 係 沐王府 裏 便 嘅 聖手 居士 蘇岡 ？
呢陣時 大門 已經 開咗 ，湧咗 十幾個 人 入嚟 ，男女 都有 ，衝 到 棺材 前 便 ，有 幾個 女子 啊 呼天搶地 大聲 咁 喊 。
有個 青年 婦人 呢 ，係 白寒松 嘅 老婆 ，另外 一個 係 白寒楓 嘅 老婆 。
樊綱 、玄貞 等人 都 覺得 好 尷尬 ，睇住 呢啲 人 喊到 死去活來 。
如果 仲 唔 走 ，等 佢哋 喊完 呀 ，就算 唔 逳手 啊 ，亦 難免 畀 佢哋 臭埋 一 餐 啊 。
韋小寶 先頭 畀 白寒楓 一下 揦住 手腕 ，而家 仲 喺度 痛緊 。
本來 係 恃住 人多 ，諗住 叫 玄貞 啊 、樊綱 等 人 呢 捉住 佢 ，點 都 要 喺 佢 𦣇 柚 踢翻 佢 七 八 腳 。
誰知 對方 人手 越 嚟 越 多 ，打 起 交 上 嚟 已經 佔唔到 便宜 喇 ，個心 啊 嘣 蹦 亂 咁 跳 。
見到 玄貞 道人 猛打 眼色 ，嗯 ，顯然 係 腳底 抹 油 鬆 人 喇 。
呢個 舉動 ，正合 心意 啊 ，即刻 轉身 就 走 佢 話 ：
大家 買 啲 元寶 蠟燭 ，再 嚟 向 死人 叩頭 啦 。
白寒楓 大叫 話 ：想 趯啊 ？冇 咁 容易 ！
即刻 衝上前 ，猛揮 右掌 ，向 樊綱 後心 拍過去 。
樊綱 發火 嘞 ：邊個 趯啊 ？一擰轉身 ，舉 左臂 擋開 ，但係 呢 冇 還擊 。
噉 玄貞 等 人 呢 都 企 定 嘞 。
韋小寶 呢 已經 趯 到 去 門口 嘞 ，一隻 腳 𨂾咗 出 門檻 再 講 。
嗰個 姓 蘇 嘅 男人 問 ：白 二弟 ，呢 幾位 係 邊個 啊 ？恕 在下 眼生 。
白寒楓 話 ：佢 哋 係 天地會 嘅 狗賊 ，我 大哥 ，我 大哥 係 畀 佢 哋 害死 嘅 。
呢 句 説 話 一 出口 ， 本來 趴 喺 處 喊緊 嘅 人 都 跳 起身 ， 哐 唥 哐 唥 ， 兵器 耀眼 ， 當堂 將 來客 都 圍 實 。
連 馬博仁 、姚春 、雷一嘯 、王武通 等 四 個 人 ，都 圍住 喺 中間 。
嗱 各位 ，欲知 後事 如何 ，且 聽 下回 分解 。
