前 文 再續 啊 書 接上 一回 啊 ， 話 說眾 香主 散 咗 之後 ， 陳近南 啊 拉 住 韋小寶 隻 手 返到 廂房 裏 便 話 ：
北京 天橋 有 一個 賣 膏藥 嘅 伯虎 ， 姓 徐 嘅 。
人 哋 賣 膏藥 嘅 旗 上 便 呢 ， 膏藥 都 係 黑色 㗎 ， 呢 個 徐 老伯 嘅 膏藥 係 一半 紅 一半 青 嘅 。
你 有事 要 同 我 聯絡 ， 就 去 天橋 搵 徐 老伯 就 係 喇 。
你 問 佢 ，有冇 去 清惡毒 ，使 盲眼 復明 嘅 清毒復明膏藥 啊 噉 。
佢 話 有啊有 ，不過 價錢 太 貴 ，要 三兩 黃金 、三兩 白銀 。
噉 你 就 話 ，五兩 黃金 、五兩 白銀 賣 唔 賣 啊 噉 。
佢 就 知道 你 係 邊個 喇 。
韋小寶 覺得 好 有趣 笑住 話 ：人哋 開價 三兩 ，你 又 還價 五兩 喎 ，天下 間 邊 有 噉 嘅 事 㗎 ？
陳近南 微微 笑話 ：
呢啲 係 怕 誤打誤撞 ，真係 有人 搵 佢 買 清毒復明 膏藥 。
佢 一聽 你 還價 黃金 五 兩 、白銀 五 兩 就 問 ，點解 價錢 咁 貴 啊 噉 。
你 話 ： 唔 貴 唔 貴 ， 只要 真 係 能夠 復明 ， 就算 同 你 做牛做馬 亦 係 唔 貴 。
噉 佢 就 話 ： 地振 高岡 ， 一派 溪山 千古 秀 。
你 又 話 ：門 朝 大海 ，三河合水萬年流 。
噉 佢 又 再 問 ：紅花亭畔邊 一堂 ？
你話 ：青木堂 。
佢 又 問 ：堂上 燒 幾 炷 香 啊 ？
你話 ：五炷香 。燒 五炷香 嘅 就係 香主 。
佢 係 本會 青木堂 嘅 兄弟 ，屬 你 管 佢 。
你 有 咩嘢 事 呢 可以 交畀 佢 辦 。
韋小寶 逐一逐二 記住 喺 心 。
噉 陳近南 呢 又 將 嗰 副 對聯 啊 講咗 兩 次 ，同 韋小寶 演習 咗 一次 ，一字 都 冇 錯 喇 。
陳近南 又 話 ：呢 個 徐 老伯 雖然 係 歸 你 管 ，武功 啊 十分 使得 嘅 ，你 對 佢 唔 好 無禮 啊 。
韋小寶 話 ：哦 ，哦 我 知 嘞 。
小寶 ，我哋 大鬧 康親王府 清廷 一定 派 好多 偵探 四圍 抄 ，我哋 喺 呢度 呢 唔能夠 停留 得 咁 耐 嘅 。
今日 你 就 返去 皇宮 ，同 人 話 你 係 畀 一班 賊佬 擄 咗 去 ，你 夜晚 用計 殺咗 看守 嘅 人 ，逃走 返嚟 。
如果 有人 要 你 帶 兵 嚟 捉 呢 ，你 可以 帶 兵 嚟到 呢處 。
我哋 將 鰲拜 嘅 屍體 同埋 首級 ，埋 喺 後便 嘅 菜園 嗰度 ，你 帶 人 嚟 掘 咗 返 去 就 冇 人 懷疑 喇 。
噉 嗰 陣時 ，大家 當然 唔 喺 呢處 啦 係唔係 啊 ？
你 走咗 之後 ，大家 就 散 ，唔使 擔心 。
三日之後 ，我 嚟 北京城 傳 你 武功 。
你 去 東城 甜水井 胡同 啦 ，喺 胡同口 有 兄弟們 等住 ，會 帶 你 嚟 見 我 㗎 喇 。
哦 。
陳近南 輕輕 摸 下 佢 個 頭 ，好言好語 噉 話 ：你 走 啦 。
噉 韋小寶 入去 同 茅十八 話別 。
茅十八 啊 唔 知道 佢 已經 入咗 天地會 做咗 香主 ，問 長 問 短 啊 極之 關心 ，韋小寶 呢 亦 唔 講 穿 。
呢陣時 ，佢 畀 人 搶 咗 嘅 匕首 等等 嘅 嘢 都 已經 攞翻 。
陳近南 啊 叫 人 幫佢 準備咗 馬匹 ，親自 送 佢 去 門口 。
李力世 、關安基 、玄貞道人 等 青木堂 裏頭 嘅 兄弟 呢 一直 送到 三里 之外 。
噉 韋小寶 問 明 條 路 喇 ，催 馬 跑 返 去 北京城 ，入 宮 嘅 時候 已經 係 挨 晚 嘞 ，佢 即刻 去 叩見 皇帝 。
康熙 早就 知道 鰲拜 喺 康親王 府 嘅 囚室 裏 便 ，畀 韋小寶 殺死 嘅 消息 。
個 心 諗 ：佢 畀 鰲拜 嘅 黨徒 擄去 ，必定 係 凶 多 吉 少 嘞 。
事情 一 發作 ，清廷 啊 即刻 四圍 緝捕 鰲拜 嘅 餘黨 嚟到 拷問 ，人 呢 就 捉咗 唔少 ，就 查 唔出 咩 手尾 。
康熙 正係 好煩啦 ，忽然間 聽見 韋小寶 返嚟 唄 又驚又喜 連忙 傳見 。
一 見 佢 行 入 書房 就 問 佢 ：小桂子 你 ，你 點樣 趯 返 嚟 㗎 ？
韋小寶 一路 呢 已經 諗好咗 點樣 講 大話 㗎 喇 。
點樣 畀 賊佬 捉 咗 去 ，點樣 裝 喺 紅棗 桶 啊 運出去 等等 嘅 情節 就 唔 使 車 大 炮 㗎 。
跟住 佢 就 講 嘞噃 ，嗰班 奸黨 點樣 設 咗 靈位 祭奠 ，為咗 等 一個 首腦 人物 就 暫時 唔 殺 佢 ，將 佢 綁 咗 喺 間 黑房 裏 便 。
佢 又 點樣 喺 半夜 呢 磨斷咗 綁住 手腳 嘅 繩索 ，殺咗 看守 嘅 人 ，逃跑 出嚟 。
又點樣 喺 草叢 裏 便 躲避 騎馬 追佢 嘅 人 ， 噉 啊 點樣 偷到 馬匹 屈路 返嚟 ，啊 講到 繪影繪聲 生動 到 極 。
康熙 啊 聽到 津津有味 ，猛咁 拍 佢 膊頭 贊 佢 話 ：
小桂子 ，你 真係 使得 ，呢一次 啊 真係 辛苦 晒 你 嘞 。
韋小寶 話 ：皇上 ，鰲拜 呢啲 奸黨 呢 ，勢力 真係 好大 㗎 。
啊 奴才 逃走 出嚟 嘅 時候 呢 ，就 記 清楚 條 路 噃 ，我哋 即刻 帶 兵 去 捉 佢哋 好唔好 啊 ？
康熙 歡喜 喇 ：妙極 喇 ，你 快啲 去 叫 索額圖 帶領 三千 兵馬 ，跟住 你 去 捉 啦 。
係 。
韋小寶 退出 嚟 ，叫 人 去 通知 索額圖 。
索額圖 聽 講 小桂子 畀 鰲拜 手下 捉 咗 去 ，個 心 諗 ，宮中 啊 少 咗 個 大 幫手 嘞 正 喺 度 發 緊 愁 。
雖然 能夠 吞沒 四十五萬 兩 銀 ，噉 到底 係 所失者 大 就 所得者 小 吖 。
突然間 知道 小桂子 趯翻返嚟 當堂 精神大振 ，噉啊 連忙 帶領 人馬 ，同 韋小寶 去 捉拿 餘黨 嘞 。
行到 半路 ，康親王 啊 派 人 將 韋小寶 嘅 玉花驄 趕住 送嚟 。
韋小寶 騎住 名駒 ，左顧右盼 啊 得意非凡 啊 。
到咗 天地會 聚會 嘅 地方 ，當然 係 早就 唔見 人影 啦 。
索額圖 下令 搜殺 ， 冇 幾耐 ， 就 喺 菜園 裏 便 將 鰲拜 嘅 首級 同埋 屍體 掘 咗 出 嚟 。
又 搵 到 一塊 大清 少保 、 一等 超武 公 鰲拜 大人 之 靈位 嘅 靈牌 ， 噉 啊 幾副 吊唁 鰲拜 嘅 輓聯 ， 噉 呢 啲 呢 都 係 陳近南 故意 留低 㗎 咯 。
韋小寶 同 索額圖 返到 去 北京 ，將 靈牌 啊 輓聯 等等 嘅 嘢 ，呈上 康熙 。
韋小寶 個 神情 呀 ，好似 立咗 件 大功 噉 。
康熙 獎勵 咗 幾句 ，吩咐 葬 咗 鰲拜 嘅 屍體 ，就 叫 兩個人 啊 繼續 小心 查察 。
韋小寶 個 嘴 呢 一味 話 係 啊 係啊 噉 ，表面上 忠誠 勤奮 ， 之 個 肚 呢 就 喺度 偷笑 。
過咗 三日 ，韋小寶 稟明 康熙 ，要 出去 訪查 鰲拜 嘅 餘黨 ，其實 呢 ，佢 係 去 東城 甜水井 胡同 啊 。
去到 喇 ，離開 胡同口 十零丈 嘅 地方 有 一 副 雲吞 擔 停 響 處 。
賣 雲吞 嗰 個人 見到 韋小寶 ，搦起 落 雲吞 嘅 長 竹筷 ，喺 裝錢 個 竹筒 上面 托托托 噉 敲咗 三下 ，停一停 ，敲咗 兩下 ，又 試 敲 三下 。
隔幾丈 遠 有人 擔咗 擔嘢 喺度 賣 青蘿蔔 ，嗰 個人 用 削 蘿蔔 嘅 刀 ，喺 擔 挑 上面 亦都 係 噉樣 敲 。
韋小寶 估計 係 天地會 傳遞 消息 嘅 法子 嘞 。
佢 跟住 一個 賣 冰糖葫蘆 嘅 小販 入咗 胡同 ，嚟到 黑漆 大門 嘅 一座 屋 前 便 。
噉 門口 呢 有 三個 人 踎 喺 處 ，正在 用 石灰 粉刷 牆壁 。
見到 韋小寶 之後 呢 岌 一 岌 頭 ，用 石灰刀 喺 牆 上面 敲擊 幾下 ，大門 呢 就 開嘞 。
韋小寶 行 入 院子 ，入咗 大廳 ，見到 陳近南 已經 坐 喺 廳裏 便 ，咪 即刻 上去 叩頭 。
陳近南 好 歡喜 ，佢 話 ：你 嚟得 咁 早 真係 啱嘞 。
我 本來 想 停留 多 幾日 ，傳 你 功夫 嘅 ，但係 尋日 接到 消息 ，話 福建 有 一件 大事 要 我 趕住 去 處理 。
呢次 ，我 只能夠 停留 一日 唧 。
韋小寶 聽 咗 個 心 高興 喇 ， 佢 諗 ：
嗱 ， 你 唔 得閒 教 多 啲 功夫 畀 我 咋 ， 將 嚟 我 練 得 唔 好 ， 係 你 嘅 事 你 唔 能夠 怪 我 。
之面上 呢 ，冚𠾴唥 都係 失望 嘅 神色 。
陳近南 喺 身邊 攞咗 一本 薄薄 嘅 冊子 出嚟 佢 話 ：
呢本 係 本門 修習 內功 嘅 基本 法門 ，你 每日 自己 用功 啦 。
噉啊 打開 冊子 ，見到 每一頁 上 便 呢 都 畫 有人像 ，於是 呢 將 修習 內功 嘅 法門 同埋 口訣 傳授 咗 。
韋小寶 一時之間 亦 唔能夠 全盤 領悟 啊 ，只係 用心 記憶 唧 。
陳近南 用咗 兩個 幾時辰 ，就 將 呢一套 內功 傳授 完喇 ，佢 話 ：
本門 功夫 呢 ，以 正心誠意 為 先 。
你 呢個 人 心猿意馬 ，同 本門 功夫 啊 格格不入 ，練起上嚟 呢 就 加倍 艱難 ，要 特別 用功 先至 係 。
有 一件事 你 要 緊緊 記住 啊 ：
如果 練到 心 煩 意 燥 ，頭 暈 眼 花 就 唔好 再 練 ，要 等 靜 翻 落 嚟 ，收拾 雜念 再 從頭 練起 ，如果 唔 係 ，會 有 重大 危險 嘅 。
韋小寶 應咗 ，噉 啊 雙手 接咗 冊子 ，收入 自己 嘅 袋 。
陳近南 又 詳細 詢問 海大富 所 教 武功 嘅 情形 。
等 韋小寶 連 講 帶 演 噉 逐樣 講完 喇 ，陳近南 沉吟 噉 話 ：
呢啲 功夫 你 亦 早就 知道 係 假嘅 ，真係 遇到 敵人 一啲 都 唔 頂用 。
我 只係 奇怪 ，點解 清廷 皇太后 傳授 畀 嗰個 小皇帝 嘅 武功 亦 係 假 嘅 呢 ？
韋小寶 話 ：個 老舉 乸 唔 係 小 皇帝 嘅 親生 老母 ，而且 ，而且 個 老舉 乸 唔 係 好人 ，係 個 好壞 嘅 壞人 啊 。
佢 嘅 心 諗 ：老舉乸 害死 小皇帝 母親 等等 嘅 情由 呢 牽連 太過 重大 ，對 師父 亦 唔 能夠 講 ，何況 呢 件 事 同 師父 毫 不 相干 。
陳近南 岌一岌頭 ，跟住 又 查問 海大富 嘅 為人 同埋 所作所為 ，佢 只 係 覺得 呢 個 老太監 充滿咗 詭秘 。
韋小寶 講咗 一啲 ，突然間 哇 一聲 喊起上嚟 。
陳近南 又 問 佢 嘞 ：小寶 ，你 做咩 啊 ？
韋小寶 抽抽噎噎 噉 ，將 海大富 喺 湯 裏 便 暗中 放咗 毒藥 嘅 事 講咗 。
最收尾 佢 話 ：師父 ，呢啲 毒藥 ，係 唔能夠 解 㗎喇 。
我 死咗 之後 呢 ，青木堂 嘅 兄弟 唔 能夠 再 用 老法子 喇 。
噉 陳近南 問 佢 ：咩 老法子 啊 ？
鰲拜 害死咗 尹香主 ，噉 我 殺咗 鰲拜 ，大家 就 叫 我 做 青木堂 香主 咯 。
海老烏龜 害死咗 韋香主 ，噉 老舉乸 呢 ，就 殺咗 海老烏龜 。
大家 ，唔好 請 老舉乸 嚟 做 ，青木堂 香主 啊 。
陳近南 哈哈大笑 ，噉 啊 細心 同 佢 診脈 ，又 詳細 問 佢 小腹 疼痛 嘅 情形 ；
又 用 手指 喺 佢 小腹 四周圍 嘅 穴道 上 便 ，或 輕 或 重 噉 撳下 ，沉吟 咗 一陣 就 話 ：你 唔使 怕 。
海大富 嘅 毒藥 ，或者 世間 上 真 係 冇 藥可解 ，但 係 我 可以 用 耐力 將 毒 逼 翻出 嚟 。
韋小寶 聽咗 歡喜 到 極 ，一味 話 ：吖 多謝 師父 ，多謝 師父 。
噉 陳近南 啊 帶 佢 去 卧室 ，叫 佢 瞓 喺 張 床 處 ，左手 撳住 佢 胸口 嘅 膻中穴 ，右手 就 撳住 佢 背脊 大椎穴 。
過咗 一陣間 ，韋小寶 就 覺得 兩股 熱氣 啊 慢慢 向下 便行 ，全身 都 講 唔 出 咁 舒服 ，噉 迷迷懵懵 呢 就 瞓着 嘞 。
瞓瞓下 ，突然間 覺得 個 肚 好 痛 ，哎呀 一聲 ，即刻 醒翻 。
佢 叫話 ：師父 我 ，誒 ，我 要 屙屎 啊 。
陳近南 啊 帶 佢 去 廁所 門口 。
韋小寶 啱啱 解開 條 褲 唧 ，啲 爛屎 就 已經 直 噴 而出 ，只係 覺得 非常 腥臭 ，個 口 啊 跟住 噁噁聲 猛 咁 嘔 。
韋小寶 返到 臥室 ，屙 到 佢 雙腳 酸軟 好 難 企得翻直 。
陳近南 微微 笑話 ：好喇 ，你 中 嘅 毒 呢 已經 去咗 十之八九 ，剩落嚟嘅 已經 唔 緊要 。
我 呢處 有 十二粒 解毒靈丹 ，你 分 十二日 食 啦 ，啲 毒 就 清 㗎 喇 。
講完 ，喺 個 袋 處 攞 一個 瓷樽仔 出嚟 就 交畀 韋小寶 。
韋小寶 接住 好 感激 佢 ：
師父 ，呢啲 藥丸 你 自己 仲有冇 啊 ？噉 你 都 畀咗 我 ，如果 你 自己 中毒 噉 唔係 ，誒 。
陳近南 微微 一 笑話 ： 人 哋 想 放 我 個 毒 啊 ， 亦 冇 咁 容易 。
睇住 天色 已經 夜 喇 ，陳近南 叫 人 開飯 ，噉 啊 同 韋小寶 一齊 食 。
韋小寶 見 只有 四碗 尋常 嘅 餸菜 佢 心諗 ：師父 係 大 英雄 ，食得 咁 馬虎 嘅 ？
佢 既然 身上 嘅 劇毒 已經 解咗 咯 ，噉 啊 滿心 歡暢 ，食飯 嘅 時候 ，一味 笑眯眯 好 歡喜 。
食完飯 喇 ，韋小寶 又 幫 師父 斟 咗 茶 。
陳近南 飲咗 幾啖 佢 話 ：
小寶 ，望 你 做個 乖仔 ，
我 一 得閒 ，就 嚟 京城 傳 你 武藝 。
哦 。
好 ，你 而家 就 返 皇宮 啦 。
佢哋 好 狡猾 㗎 ，你 雖然 亦都 好 聰明 ，到底 係 年紀 細 ，要 事事 小心 啊 。
師父 ，我 喺 宮 裏 便 好 悶 啊 ，幾時 先 可以 跟住 你 出嚟 行走 江湖 啊 ？
你 忍住 幾年 為 本會 立 幾件 大功 先 啦 。
等到 ，等到 再 過 幾年 喇 ，你 又 變 咗 聲 ，鬍鬚 都 生出 嚟 喇 ，唔 能夠 再 冒充 太監 嗰 陣 時 再 出 嚟 啦 。
韋小寶 個 心 諗 ：我 喺 宮 裏 便 做好事 定係 做壞事 你哋 邊個 都 唔知 嘅 ，想 廢咗 我 個 香主 ，噉 就 冇 咁 容易 嘞 噃 。
將來 我 年紀 大咗 ，武功 啊 練好咗 或者 你 就 唔 廢 我 喇 。
想到 呢處 就 開心 起嚟 ，佢 話 ：啊 ，師父 ，我 返去 喇 。
陳近南 企 起身 拉住 佢 隻手 話 ：
小寶 ，清廷 嘅 氣候 已經 成功 ，呢個 反清復明 嘅 大事 係 好 艱難 。
你 喺 皇宮 裏 便 ，時時刻刻 會 遇到 兇險 ，你 年紀 咁 細 ，又 冇 學到 咩 嘢 真實 本領 ，我 真 係 好 放心 唔 落 。
不過 我哋 既然 入咗 天地會 咯 ，呢個 身體 就 唔係 自己 㗎 。
只要 對於 反清復明 大業 有利 ，就算 明知 係 火坑 亦 唯有 跳落去 。
只係 可惜 ，可惜 你 唔能夠 時時 喺 我 身邊 ，我 可以 好好 噉 教 你 。
但 望 將來 你 能夠 多啲 同 我 一齊 啦 。
而家 會 中 兄弟 敬重 你 ，不過 係 睇在 我 嘅 份 上 啫 ，但係 我 總 唔能夠 照應 你 一世人 㗎 。
噉 將來 人哋 敬重 你 定係 睇 你 唔起 ，一切 全 在 你 自己 嘞 。
係 ，我 丟 自己 嘅 架 唔緊要 啊 ，師父 嘅 架 唔丟得 㗎 嘛 。
你 自己 丟架 都 唔得 啊 。
哦 ，誒噉樣 丟 小桂子 嘅 架 啦 。
小桂子 係 宮裏 便 嘅 太監 ，我哋 丟 小桂子 嘅 架 ，即係 丟 清廷 嘅 架 ，噉 就 係 反清復明 喇 。
陳近南 長歎 一聲 ，實在 唔知 點樣 教導 先至 係 。
話 説 韋小寶 入宮 返到 去 自己 間 屋 ，將 索額圖 交 嚟 嗰 幾十張 總共 四十六 萬 六千五百 兩 嘅 銀票 反覆 仔細 睇 下 ，嗨 個 心 啊 ，高興 啊 。
原來 索額圖 為咗 討好 佢 啊 ，本來 應承 畀 四十五萬 兩 銀 嘅 啫 ，收尾 呢 變賣 咗 鰲拜 嘅 家產 ，賣得 嘅 價錢 就 比較 預計 嘅 為 多 ，噉 於是 呢 又 加 咗 萬幾 兩 。
佢 睇咗 好耐 喇 ，收 翻 起 啲 銀票 ，就 攞出 陳近南 嗰 本 武功 冊子 啊 照 住所 傳 嘅 秘訣 ，盤膝 打坐 練 嘞 噃 。
佢 點 收 銀票 ，見到 銀票 上 便 嘅 銀號 票號 嘅 朱印 嘅 時候 呢 神采奕奕 ，一 掀到 武功 圖譜 ，當堂 就 興味 索然 。
何況 書 裏 便 嘅 註解 一百 個 字 當中 亦 識 唔到 一個 ，都 練 唔到 半個 時辰 啫 ，就 覺得 神昏 眼倦 ，趢 喺 床 上面 瞓着 。
第日 瞓醒 ，喺 書房 裏 便 侍候 完 皇帝 嘞 返到 嚟 屋 ，又 再 練功 ，過 咗 冇 幾 耐 又 試 瞓着 。
原來 陳近南 呢 一門 功夫 啊 ，入門 極之 唔 容易 嘅 ，非 有 極大 嘅 毅力 難以 打通 第一關 。
韋小寶 聰明 機警 ，就係 少咗 呢 一份 毅力 。
第一個 坐式 一練 ，就 覺得 艱難 無比 啊 昏昏欲睡 ，瞓咗 一覺 已經 係 半夜 嘞 。
佢 諗 ：師父 叫 我 練功 ，但 佢 嘅 功夫 呢 乏味 到 極 嘅 。
如果 偷懶 唔 練 ，噉 下次 見到 師父 佢 一查 ，我 個 功夫 一啲 都 冇 長進 ，一定 好 唔 高興 啦 。
噉 講 唔定 就 將 我 嘅 青木堂 香主 廢 咗 。
唔係啦 ，噉 起身 再 攞 個 冊子 嚟 睇 ，噉 根據 佢 嘅 法子 打坐 修習 啦 。
過咗 冇 幾耐 雙眼皮 又 試 沉重 到 極 忍唔住 要 瞓 。
個 心 諗 ：佢哋 打定 咗 主意 ，要 過河 拆橋 㗎嘞 。
噉 無論 我 呢座 橋 呢 ，係 青石板 大橋 亦好 ，係 爛木頭 獨木橋 又好 ，佢哋 總係 要 拆 嘅 ，噉 我 練 唔練 功夫 都 唔 緊要 啦 。
哈 ，既然 搵到 咗 唔 練 功夫 嘅 藉口 ，一身安樂嗨疊埋心水 噘噘聲 瞓覺 啊 。
佢 既然 唔 需要 再 練 武功 ，噉 以後 嘅 日子 呢 就 過得 十分 逍遙 自在 嘞 。
十二 粒 藥丸 食完 ，小腹 上面 嘅 疼痛 已經 無 影 無 蹤 。
日頭 淨係 喺 上 書房 侍候 康熙 幾個 時辰 ，噉 其餘 嘅 時間 ，就 同 温氏兄弟 嗰 班 人 啊 擲 骰仔 賭錢 。
佢 而家 係 身 有 幾十萬 兩 銀家財 嘅 大富豪 嘞 ，擲 骰仔 本來 呢 就 唔使 再 出 千 呃 人 嘅 ，但係 羊牯 當前 ，唔呃 翻 幾下 個 心 啊 講 唔 出 咁 唔痛快 。
温氏兄弟 、平威 、老吳 等等 嘅 人 欠 佢 嘅 賭債 梗係 越 積 越多 啦 。
好在 韋小寶 呢 唔 追 賭債 ，海大富 又 死咗 咯 ，温氏 兄弟 等 人 呢 雖然 債台高築 啊 ，亦都 唔係 點樣 擔心 。
至於 尚膳監 嘅 事務 呢 ，自不然 有 手下 嘅 太監 料理 ，每逢 初二 、十六 ，管事 嘅 太監 就 送 四百 兩 銀 去 韋小寶 間 屋 。
呢 個 時候 ，索額圖 早就 幫 佢 將 幾萬兩 銀 啊 分送 畀 宮中 妃嬪 同埋 有 權勢 嘅 太監 、侍 衞 ；
韋小寶 把 嘴 呢 又 使得 ，康熙 對 佢 啊 十分 寵幸 ；
呢幾個月 裏頭 啊 ，喺 宮中 眾口 交譽 人人 見到 佢 都 蓮子 蓉 噉 口面 嗨 不得 了 啊 。
秋盡冬來 就 天氣 一日 冷過 一日 ，噉 呢 一日 韋小寶 喺 上書房 裏 便 出嚟 ，忽然間 諗起 ：
師父 吩咐 如果 有事 呢 ，就 去 天橋 搵 賣 膏藥 嗰個 徐老伯 聯絡 。
雖然 冇乜 事 啫 ，不妨 去 同 佢 對答 一下 咩嘢 地 振高岡 ，一派 溪山 千古 秀 。門 朝 大海 ，三河 合 水 萬年 流 ，哈 噉 都有 癮 噃 。
喂 ，你 呢件 膏藥 要 三兩 黃金 、三兩 白銀 啊 ？太過 貴 咯 ，太過 貴 咯 。
五兩 黃金 、五兩 白銀 賣 唔 賣 啊 ？
哈 ，哈哈哈哈哈 ，誒 ，過癮 ，過癮 ！
佢 行出咗 宮門 ，喺 大街 上面 轉咗 幾 轉 ，見到 有 間 茶館 裏便 呢 有個 講古 先生 喺度 講古 ，就 行 入去 沖咗 壺 茶 坐低 。
嗰 個 講古 先生 講 嘅 呢 正 係 英烈傳 啊 ，噉 正 係 講到 朱元璋 同 陳友諒 ，喺 鄱陽湖 大戰 。
噉 啊 點樣 周顛 抱 咗 朱元璋 換 船 ， 點樣 陳友諒 嘅 戰船 呢 一炮 轟過 嚟 ， 將 朱元璋 原來 坐 嗰 隻 船 都 轟 到 粉碎 。
呢 啲 情節 啊 ，韋小寶 早 啊 聽到 爛熟 嘞 ，嗰 個 講古 先生 穿插 亦 唔 係 點 叻 嘅 啫 ，但 係 佢 一 坐 低 就 聽 咗 大半個 時辰 。
東逛 西逛 直到 天黑 ， 噉 呢 一日 呢 ， 竟然 冇 去 天橋 。
噉 第二日 、第三日 ，始終 冇 去成 。
每晚 臨瞓 心裏 便 總係 話 ：聽日 應該 去 睇下 嗰個 徐老伯 喇 噉 。
但係 第二日 唔係 去 擲骰仔 賭錢 呢 ，就 去 聽 講古 ，乜 都 唔係 就 去 街市 裏 便 亂 咁 使 銀 。
呢啲 日子 喺 皇宮 裏 便 逍遙 快樂 ，做 太監 啊 比起 做 天地會 嘅 咩 香主 臭主 要 妥當 得多 嘞 。
自己 都 知 ，呢個 想法 係 十分 冇 出息 ，亦 唔 敢 多 想 。
偶然 想起 呢 自己 安慰 自己 ：橫掂 我 又 冇事 ，去 搵 嗰個 徐老伯 做 咩 唧 ？
洩漏 咗 機密 呀 ，送 咗 我條 小命 唔 緊要 啊 ，反而 連累 咗 天地會 嘅 大事 啊 。
哈 ，噉樣 諗 就 掂晒 嘞 。
嗱 各位 ，欲知 後事 如何 ，且 聽 下回 分解 。
