前 文 再續 啊 書 接上 一回 啊 ， 話 説 海老公 要 查明 害死 兩位 皇后 、 一位 皇妃 、 一位 皇子 嘅 兇手 。
佢 認為 只要 搵到 宮內 一位 武學 高手 ，就 唔難 追查 得到 㗎喇 。
太后 話 ：原來 噉樣 ，你 兜 咁 遠 個 圈 ，就係 要 同 我 講 呢番 説話 。
海老公話 ：太后 話 名師 必 出 高徒 ，呢句 説話 ，反過嚟 講 亦係 一樣嘅 ，高徒 必 有 名師 啊 。
皇上 會 使 八八六十四式 八卦 游龍掌 ，教 佢 呢路 掌法 嘅 人 ，九成 會 使 化骨綿掌 嘅 。
噉 你 搵到 呢位 武功 高手 未 吖 ？
已經 搵到 喇 。
哼哼哼哼 ，你 真係 老謀深算 啊 。
你 教 小桂子 同 皇上 練武 ， 呢 半年 幾以 嚟 ， 就 係 喺 度 搵 皇上 嘅 師父 啊 ？
唉 ，都係 冇法子 啦 。
小桂子 係 個 好 陰毒 嘅 小壞蛋 ，奴才 呢 雙眼 ，就係 畀 佢 用 毒藥 毒盲 嘅 。
如果 唔係 為咗 要 將 呢件 大事 查得 千真萬確 ，就 決 唔會 畀 呢個 小壞蛋 有命 留到 今日 咯 。
太后 哈哈 一笑 ，佢 話 ：
小桂子 呢個 細佬哥 真 乖 啊 ，毒盲 咗 你 雙眼 ，好極 ，妙極 喇 ，聽日 我要 重重 賞賜 佢 。
多謝 太后 。
太后 如果 下旨 將 佢 厚葬 ，小桂子 喺 陰間 亦 必定 感戴 太后 嘅 洪恩 㗎 。
乜 你 已經 殺咗 佢 嘞 咩 ？
奴才 已經 忍耐咗 好耐 好耐㗎喇 ，以後 ，已經 用 佢 唔着 喇 。
韋小寶 真係 又 驚 又 嬲 啊 佢 諗 ：
呢個 老烏龜 早就 知道 我 唔係 小桂子 ，亦 早就 知道 佢 一雙 眼 係 畀 我 毒盲 嘅 。
原來 佢 一直 喺度 利用 老子 ，噉 先至 遲遲 唔 落 毒手 唧 。
佢 教 我 功夫 ， 完全 係 為 咗 要查 皇上 嘅 武功 嘅 。
佢 阿爺 嘩 ，早知 係 噉樣 ，我 真係 唔 將 皇上 嘅 武功 ，詳詳細細 講畀 佢 聽 啊 。
你 隻 老烏龜 以為 老子 死咗 喇 ，不過 老子 偏偏 就 冇 死 ，等陣 我 扮 鬼 ，嚇到 你 屁滾尿流 至 得 。
只聽見 海老公 歎咗 口氣 又話 ：
主子 嘅 脾性 向來 好 急 嘅 ，要 做 乜嘢 事 ，非 做到 不可 。
只可惜 佢 雖然 貴為 天子 ，心愛 嘅 人 畀 人哋 害死 咗 ，點 都 救 佢 唔 生 喇 。
主子 出咗 家 ，對 董鄂妃 仲係 念念不忘 。
奴才 離開 清涼寺 回 宮 之前 ，主子 親筆 寫咗 個 上諭 交畀 奴才 。
命令 奴才 查明 係 邊個 害死 董鄂妃 嘅 ，誒 唔係 ，害死 端敬皇后 嘅 ，再 命令 奴才 將 呢個 兇手 就地 正法 啊 。
太后 哼咗 一 聲 佢 話 ：
佢 做咗 和尚 ，仲 能夠 寫 咩 嘢 上諭 啊 ？
出家人 念念不忘 殺人 害人 ，亦唔係 幾 似樣 啩 ？
因果報應 ，佛家 亦 係 好 講究 嘅 。
害咗 人 嘅 人 ，終歸 唔會 有 好 下場 嘅 。
不過 奴才 練功 岔 亂咗 經脈 ，整得 個人 ，咳嗽 氣喘 ，周身 都係 病 ，再加埋 雙眼 盲 咗 咯 ，更加 冇 希望 喇 。
係 吖 ， 你 周身 都 係 病 ， 眼 又 盲 咗 ， 就算 奉 咗 佢 嘅 密旨 ， 件 事 亦 辦 唔 成 喇 。
唉 ， 唔 成咯 ， 唔 成咯 ， 奴才 告辭 太后 ， 返扯 喇 。
講完 ，擰轉身 慢慢 向外 便 行 。
韋小寶 個 心 當堂 好似 放低 嚿 大石 噉 ，個心 諗 ：
老烏龜 一 走 我 就 冇事 喇 ，佢 以為 我 已經 死咗 ，再 唔會 嚟 搵 我 。
老子 聽 朝 一早 就 鬆人 ，老烏龜 如果 你 再 搵到 我 呢 ，老子 就算 服咗 你 ，跟埋 你 姓 ，叫做 海小寶 。
點知 太后 話 ：咪住 ！海大富 你 去 邊處 啊 ？
海老公話 ：奴才 已經 將 一切 事情 都 稟明咗 太后 ，噉 就 返去 等死囉 。
佢 交畀 你 做 嘅 事 ，你 都 唔 做 嘞噃 ？
奴才 心有餘而力不足 ， 況且 亦 冇 咁 大膽 作亂 犯上 啊 。
哼哼哼哼 ，你 都 好 識時務 ，亦 不枉 侍候 咗 我哋 呢 幾 年 啊 。
係 ，多謝 太后 恩典 。
呢啲 冤 沉 海底 嘅 事 ，亦 只有 等到 皇上 年紀 大 喇 ，再 嚟 昭雪 喇 。
皇上 捉拿 鰲拜 ，手段 幾咁 英明 啊 。
皇上 親生 母親 畀 人 害死 ，呢件事 ，亦 唔使 再 等 幾耐 ，皇上 一定 會 辦理 嘅 。
只 係 可惜 ， 可惜 奴才 冇 命留 到 嗰 陣 時 ， 等 唔 到 喇 。
太后 行 上 幾 步 喝 佢 話 ：海大富 ，你 返嚟 ！
係 ，太后 有 咩嘢 吩咐 啊 ？
你 先頭 對 我 亂 噏 無為 ， 呢 啲 ， 呢 啲 荒謬 不堪 嘅 説 話 ， 係 咪 你 已經 ， 已經 同 皇上 講過 喇 ？
太后 聲 都 震晒 ，好 激動 。
海老公話 ：奴才 聽 朝 一早 就 去 稟告 皇上 。
但 係 ， 但 係 今晚 迫不及待 ， 先 嚟 稟告 太后 啊 。
好 ，好啊 。
突然間 一 聲 風 響 ，跟住 嘭嘭 兩 聲 。
韋小寶 吃咗 一驚 啊 忍唔住 哄 個 頭 出嚟 裝下 。
只見 太后 圍住 海老公 瀡瀡 咁 轉 ，身法 快到 極 ，一掌 又 一掌 向 海老公 身上 擊過去 。
海老公 呢 企 到 定定 ，運 掌 抵抗 。
韋小寶 更加 吃驚 嘞 ：
點解 太后 同 老烏龜 打起嚟 啊 ？
原來 太后 亦 會 武功 嘅 。
只見 太后 每一 掌 擊 出去 ，就係 拂 咁 一聲 ，足見 掌上 嘅 勁力 極之 厲害 。
海老公 雙腳 唔逳 ，一掌掌 迎擊 ，拍出 嘅 掌力 呢 無聲無響 嘅 。
鬥咗 好耐 ，太后 始終 奈佢唔何 。
突然之間 ，太后 成個人 飛起 ，喺 半空 中 雙掌 猛擊 落嚟 。
海老公 左掌 翻轉 向上 迎擊 ，右掌 呢 ，就 向 太后 個 肚 拍落去 。
啪噉 一聲 ，掌力 相交 ，太后 向後 直飛 出去 。
海老公 一個 踉蹌 ，個身 搖咗 幾下 ，終於 扎翻 實馬步 。
太后 大聲 話 ： 你 ， 你 你 個 奴才 ， 裝神 扮鬼 ， 用 少林 ， 少 ， 少林 派 嘅 武功 教 小桂子 ， 原來 自己 係 崆峒 派 嘅 。
海老公 喘住 氣話 ： 不敢 啊 ， 大家 彼此彼此 啦 。
太后 以 武當派 嘅 武功 教畀 皇上 ，誒 ，想 ，想氹 奴才 上當 。
不過 ， 不過 化骨綿 掌 係 蛇島 嘅 功夫 ， 奴才 喺 幾年 之前 就 已經 知道 喇 。
韋小寶 稍為 想一想 就 明白 喇 ，佢 諗 ：
老 烏龜 真 係 狡猾 ， 佢 教 我 咩 嘢 大 擒拿 手 啊 咩 嘢 大慈大悲 千葉 手 啊 ， 都 係 少林 派 嘅 武功 。
使到 太后 以為 佢 係 少林派 嘅 ，其實 佢 係 乜鬼嘢 崆峒派 嘅 。
只可惜 太后 嘅 假 武當派 八卦 游龍掌 呃 唔到 老烏龜 啫 。
原來 皇上 嘅 武功 ，都 係 太后 教 嘅 。
哎呀 ， 死 咯 ， 太后 會 使 化骨綿 掌 ， 噉 唔 通 ， 唔 通 ， 唔 通 嗰 四個 人 都 係 太后 害死 嘅 ？
第二個 都 唔 緊要 啊 ， 皇帝 嘅 親生 老母 都 係 畀 佢 殺死 嘅 ， 噉 海老公 去 同 皇帝 一講 ， 豈不是 一場 滔天大禍 ？
皇上 如果 殺 唔 到 太后 ， 太后 就 非 殺 皇上 不可 噉 ， 噉 點算 啊 ？
韋小寶 背脊 都係 冷汗 啊 ，唯一 嘅 念頭 就係 走人 。
有 咁快 時 得 咁快 去 通知 皇帝 ，叫 佢 因住 至 好 。
不過 佢 嚇到 全身 酸軟 ，搏命 想 走 ，不過 雙腳 呢 好似 釘住 喺 地下 噉 ，半步 都 唔 逳得 。
只聽見太后話 ：事到如今 ，今晚 你 仲 想 有命 啊 ？
海老公話 ：太后 即管 你 叫 侍衛 嚟 啦 ，嚟嘅人 越多 就越好 。
奴才 ，就 可以 將 種種 情形 ，講畀 大家 聽下 ，總 有 一 個 人 ，會 將 真相 傳畀 皇帝 知 嘅 。
哼哼哼 ，你 又 真係 會 諗 啊 。
太后 講説話 講得 好 慢 ，喺度 調勻 呼吸 。
海老公話 ：太后 保重 聖體 ，唔好 岔亂 咗 經脈 啊 。
你 有心 喇 。
海老公 嘅 武功 呢 本來 高過 太后 嘅 ，不過 佢 雙眼 盲 咗 之後 呢 就 唔係 太后 對手 咯 。
但係 佢 喺 幾年 之前 啊 ，已經 由 仵作佬 嘅 口裏 便 查到 ，殺害 董鄂妃 同 貞妃 嘅 人 使 嘅 係 化骨綿掌 。
呢種 係 遼東 海外 蛇島 島主 ，獨門 秘傳 嘅 陰毒 功夫 。
當其時 ，佢 唔 知道 兇手 係 邊個 ，就 冒住 極大 危險 ，暗中 練 一 項 專門 對付 化骨綿掌 嘅 武功 。
雖然 係 大傷身體 啊 ，功夫 已經 練成 嘞 。
收尾 韋小寶 同 康熙皇帝 練武 ，海老公 推測 呢 ，教皇帝 武功 嘅 人 就係 殺害 董鄂妃 、孝康皇后 幾個 人 嘅 兇手 ，日後 ，必定 會 有 一場 大戰 嘅 。
佢 明知 韋小寶 殺死 小桂子 ，又 毒盲 咗 自己 雙眼 ，冒充 小桂子 嚟到 陪伴 自己 。
個心想 ：呢個 細路 小小年紀 同 自己 素不相識 ，必定 係 受人 指使 而 嚟 嘅 。
就 多方 用 説話 氹 韋小寶 ，想 知道 主使 嘅 人 係 邊個 ，噉 嗰個 主使 嘅 人 ，九成 就 係 兇手 喇 噉 。
但係 韋小寶 根本 就 冇 人 指使 ，因此 呢 氹極 都 問唔出 咩 嘢 。
海老公 查問 雖然 係 冇 結果 ，就 將 計 就計 教 佢 武功 。
所教嘅 武功 呢 ，又係 錯漏百出 ，等 對方 啊 認定 自己 係 少林派 嘅 ，武功 不過 係 麻麻哋 。
而家 一逳手 ，太后 果然 吃咗 大虧 。
太后 喺 半年 之前 ，就 諗到 海老公 係 少林派 。
海老公 呢卻 係 知道 佢 嘅 武當派 武功 係 假扮 嘅 。
兩個人 雙眼 一明一盲 ，不過 對對方 武學 派別 嘅 判斷 就 啱啱 相反 。
海 老公 估計 敵人 好 精明 。
太后 呢 ，卻 係 一開始 就 估計 錯咗 。
不過噉呢亦唔係太后見識比較差 ，只係 海老公 喺 仵作佬 嘅 口裏 便 ，查明咗 真相 。
太后 就 自始至終 都 仲 以為 自己 嘅 事 冇人 知 。
仲有 ，海大富 心目中 啊 ，早就 以 教皇帝 武功 嘅 人 做 死敵 嘞 。
而太后 直到 而家 ，先至 知道 海大富 要 攞 自己 條命 。
否則 ，早就 下旨 命令 侍衞 將 海大富 處死 ，噉 就 唔使 自己 逳手 嘞 。
海老公 諗住 自己 雙眼 盲咗 ，務必 呢 激到 對方 出手 攻擊 ，先至 能夠 以逸待勞 㗎 ，幾招 就 贏佢 。
先頭 講咗 咁耐 ，太后 一直 都 唔 露口風 ，就 唔知道 害死 董鄂妃 、孝康皇后 幾個 人 到底 係 邊個 。
化骨綿掌 係 陰邪 狠毒 嘅 旁門 功夫 ，如果 冇 二十年 左右 嘅 苦功 就 唔能夠 練成 。
太后 博爾濟吉特氏 ，係 科爾沁 貝勒 ，綽爾濟 嘅 女 。
家世 尊貴 無比 就 幾世 做 皇后 ，代代 做 大官 。
佢 做 女 嗰陣 時候 ，就係 行 出 府門 一步 啊 亦係 千難萬難 。
自細 唔知 有 幾多 奶媽 丫鬟 伺候 嘅 ，點 能夠 去 偏僻 兇險 嘅 蛇島 學 呢啲 旁門 功夫 吖 ？
佢 就算 要 學 武功 ，亦 必定 係 學 啲 八段錦 啊 、五禽戲 之類 增強 體魄 嘅 粗淺 功夫 ，點 講 都 唔會 學 呢種 化骨綿掌 嘅 。
實係 佢 身邊 親信 嘅 太監 宮女 之中 ，有 一 個 噉 嘅 武功 好手 ，因此 只係 望 太后 吩咐 呢個 人 出手 。
誰 知道 自己 一 提到 要 去 稟報 皇帝 ，太后 個 心 一 急 起嚟 ，都 冇 考慮 清楚 啊 ，即刻 出手 攻擊 嘞 。
噉樣 一嚟 ，太后 不但 招認 殺害 四個人 乃係 自己 逳手 ，而且 對咗 三掌 之後 ，就 已經 受咗 極重 嘅 內傷 。
海老公 苦心 孤詣 計劃咗 幾年 ，一旦 成功 ，個心 好 歡喜 。
太后 受傷 唔 輕 啊 ，幾次 調勻 呼吸 都 冇 用 ，所以 佢 講説 話 講得 好 慢 。
海大富 ，你 鐘意 生安白造 ，即管 亂咁 講 啦 。
皇上 年紀 雖然 細 ，頭腦 係 好 清楚 嘅 ，睇下 佢 係 聽 你 㗎 ，定係 聽 我 嘅 説話 啦 。
海老公話 ：皇上 初時 當然 唔信 奴才 ，多數 仲 會 下旨 即時 殺咗 奴才 。
但係 過咗 幾年 ，佢 會 仔細 噉 想 嘅 ，佢 會 越 想 越 明白 。
太后 ， 你 呢 一族 世代 尊榮 ， 太宗同 主子 嘅 皇后 ， 都 係 出自 你 嘅 府上 。
就係 可惜 呢場 榮華富貴 ，喺 康熙 呢一朝 裏 便 就 完結 喇 。
哼哼 ，好極嘞 ，好極嘞 。
主子 吩咐 奴才 ，一查到 兇手 ，唔理 佢 係 乜嘢 人 ，即時 就 殺咗 佢 。
可惜 奴才 武功 低微 ，唔係 太后 對手 ，只好 出此下策 去 啟奏 皇上 啦 。
講完 ，慢慢 噉 行 出去 。
太后 暗中 運氣 ，正話 想 飛身 進擊 。
突然間 ，微風 一閃 ，海老公 突然間 逼近 ，雙掌 猛拍過嚟 。
海老公 奉咗 順治 嘅 命令 ，要 將 害死 董鄂妃 嘅 兇手 處死 ，佢 決心 要 辦成 呢 一件 大事 。
咩嘢 啟奏 皇上 啊 等等 ，只不過 係 志在 擾亂 太后 嘅 神智 ，等 佢 心煩意躁 冇法子 屏息凝氣 ，於是 呢 就 可以 施展 雷霆萬鈞 嘅 一擊 。
呢一掌 雖然 係 無聲無息 啊 ，卻係 用盡 佢 畢生 功力 。
先頭 佢 聽住 太后 講説話 ，已經 將 佢 企 嘅 方位 掌握 得 差唔多 嘞 ，一掌 拍出 ，直取 太后 胸膛 要穴 。
太后 冇 提防到 佢 嚟 得 咁快 ，噉 啊 閃身 想 避 ，只要 快速 移動 個 身體 幾次 ，噉 呢個 太監 係 個 盲人 ，就 冇法子 知道 自己 喺 邊度 㗎 嘞 。
到其時 ，只有 自己 可以 出手 攻佢 ，佢 除咗 抵抗 之外 就 更 冇 還手 嘅 能力 。
點知道 太后 啱啱 逳動 唧 ，海老公 嘅 掌力 中宮 直逼 ，逼到 太后 幾乎 氣 都 喘唔過 ，只有 右掌 運力 拍出去 。
佢 本來 想交 咗 呢 掌 之後 呢 ， 即時 移步 嘅 ， 但 係 海老公 掌力之 上 有 一股 極大 嘅 黏力 ， 竟然 移 唔 逳。
只有 右掌 加 催掌力 同 佢 鬥 拼 內勁 㗎 啦 。
海老公 發覺 對方 內力 源源 送過嚟 ，個心 歡喜 喇 。
事關 自己 盲 咗 雙眼 ， 如果 同 對方 游鬥 呢 ， 噉 係 處於 極 不利 嘅 地步 㗎 。
但係 鬥 內勁 ，同埋 雙眼 盲 唔 盲 無關 。
太后 一上嚟 就 受咗 傷 ，氣息 已經 亂咗 ，並非 一時三刻 之間 能夠 復原 嘅 。
噉樣 鬥 內勁法 ，實 耗 乾晒 佢 精力 成個 坦晒 噉 死 。
即刻 左掌 用 陰力 ，右掌 用 陽力 。
鬥咗 一陣間 ，陰陽 嘅 力 漸漸 調轉 喇 ，變成 左 掌 陽力 ，右 掌 陰力 。
但係 喺 韋小寶 睇上嚟 ，不過 係 太后 一隻 手掌 同 海老公 兩隻 手掌 頂住 ，啲 多 兇險 都 冇 嘅 。
點知道 海老公 嘅 掌力 ，就 好似 一座 石磨 噉 ，慢慢 轉動 好似 磨粉 一樣 啊 ，正在 將 太后 嘅 內力 一點一滴 噉 磨咗去 。
韋小寶 匿埋 喺 假山 後 便 ，因為 怕 畀 太后 發覺 啊 ，噉 偶然 哄 個 頭 出去 偷偷 睇 一眼 ，即刻 就 縮翻 個 頭 返去 㗎 喇 。
突然間 眼前 白光 一閃 ，噉 連忙 又 哄 個頭 出去 睇下 。
只見 兩個人 仍然 係 三隻 手掌 頂住 ，太后 隻 左手 呢 ，就 已經 多咗 一把 短兵器 ，正在 向 海老公 嘅 肚 刺過去 。
韋小寶 高興 喇個 心 諗 ： 妙 咯妙 咯 ， 老 烏龜 呢 一下 ， 非 歸天 不可 。
原來 太后 察覺到 對方 嘅 掌力 古怪 ，於是 用 左手 靜靜 喺 身邊 摸出 一把 白金 點 鋼 蛾眉刺 ，然後 極慢極慢 噉 向前 送 。
刺尖 呢 ，漸漸 向 海老公 嘅 小腹 㓤 過去 。
但係 蛾眉刺 送到 距離 對方 小腹 尺 幾 遠 嘅 地方 ，就 再 送 唔 出去 嘞 。
點解呢 ？原來 海老公 雙掌 所發 嘅 陰陽磨 嘅 勁力 越催越快 ，太后 嘅 單掌 已經 抵敵 唔住 。
只覺得 右掌 漸漸 酸軟 無力 ，忍唔住 要 伸出 左掌 一齊 頂 。
佢啊 本來 想 將 蛾眉刺 慢慢 刺 出去 ，半啲 風聲 都 唔 帶起 ，敵人 就 冇 法子 察覺 啦噉 。
但 呢個 時候 右掌 一隻 手掌 嘅 力 啊 已經 冇法子 支持 。
就唔顧得 海老公 係唔係 察覺 喇 ，左手 運力 ，想 將 蛾眉 刺一下 噉 刺過去 。
點知 就係 延遲咗 啲啲 咁耐 啫 ，左手 竟然 冇法子 前送 半寸 。
呢個 時候 ，到處 都 靜嚶嚶 ，只 聽見 嗒，嗒，嗒 ，好 輕微 嘅 響聲 。
原來 係 海老公 左手 四隻 手指 斷咗 嗰處 ，啲 血 不斷 噉 流出嚟 滴 喺 地下 。
海老公 越係 催逼 內力 ，啲 血 呢 湧出嚟 越多 嘞 。
韋小寶 見 蛾眉 刺 喺 月光 之 下 不停 咁 閃閃下 ，可見 太后 隻 左手 呢 正在 猛 咁 震 。
白光 越 閃 越快 嘞 ，不過 蛾眉刺 呢 始終 㓤唔到 海老公 嘅 小腹 。
過咗 一陣間 ，只見 太后 手上 嘅 蛾眉刺 竟然 慢慢 縮翻 轉頭 。
韋小寶 好 驚 啊 ， 哎呀 死 喇 ， 太后 打 唔 過老 烏龜 啊 ， 而家 唔 走仲等 幾時 啊 。
佢 慢慢 轉身 ，一步一步 向外 便 行 。
每行一步 ，就 知道 離開 危險 遠 一步 ，放心 多一分 ，腳步 呢 ，亦都 快 一啲 嘞 。
等佢 行到 門邊 ，伸手 摸到 門環 喇 ，突然間 ，喺 佢 後便 傳嚟 太后 吖 一 聲 大叫 。
韋小寶 心諗 ：弊傢伙 喇 ，太后 畀 老烏龜 害死 咗 喇 。
誰知 又 聽見 海 老公 話 ：
太后 ，你 漸漸 油盡 燈枯 ，再 過 一炷香 咁 耐 ，你 就 耗盡 精力 而 死喇 。
除非 呢個 時候 ，突然間 有人 嚟 ，向 我 背脊 下手 ，我 難以 抵擋 ，先至 會 畀 佢 害死 啫 。
韋小寶 正 話 想 開門 飛奔 逃跑 ，突然間 聽見 海老公 嘅 説話 ，啊啱晒喇 ，我 去 㓤佢 。
嗱 各位 ，欲知 後事 如何 ，且 聽 下回 分解 。
