前 文 再續 啊 書 接上 一回 啊 。
説 韋小寶 中咗 海老公 一掌 ，當堂 氣 都 窒晒 ，心口 啊 痛到 極 。
成個人啊似乎 都 好似 一寸一寸 噉 裂開 ，一跌落地 唧 ，爭啲 暈咗 。
但係 佢 知道 此時此刻 真係 同 閻羅王 隔 張 紙 嘅 啫 。
既然 唔能夠 將 海老公 㓤死 啊 ，老烏龜 必定 出嚟 追擊 嘅 。
即刻 奮力 爬起身 ，只係 行得 兩步 啫 ，雙腳 一軟 又 試𢴈倒 ，𠽤哩𡃈嘞 ，喺 一道 斜坡 一直 趢落去 。
海老公 如果 手指 冇 割斷 啊 ，韋小寶 趢 落 斜坡 個 聲音 呢 ，當然 走唔過 佢 雙耳仔 。
只係 佢 受咗 重傷 ，心煩意亂 ，加之 發夢 呢 亦 想唔到 呢個 細路 中咗 自己 呢一掌 竟然 間 會 唔死 。
雖然 聽到 聲 啊 ，不過 就 完全 冇 想到 其中 嘅 緣故 啊 。
呢條 斜坡 好 長 嘅 ，韋小寶 一直 趢 咗 十幾 丈 遠 ，噉 先至 停住 。
佢 掙扎住 企起身 慢慢 再 行 遠啲 ，周身 筋骨 痛楚 不堪 。
好彩 ，把 匕首 仲 揸住 喺 手 ，個 心 都 好 慶幸 。
先頭 老烏龜 將 我 打到 飛出 窗外 ，我 居然 冇 將 匕首 插入 自己 嘅 身處 ，真係 好彩 到 極 嘞 。
將 把 匕首 插 翻 入 靴筒 ，個 心 諗 ：
西洋鏡 已經 拆穿 ，老烏龜 既然 知道 我 係 冒牌貨 ，皇宮 呢 ，係唔能夠 再 住 咯 。
只係 可惜 四十五萬 兩 銀 啊 變咗 一場 空 歡喜 ，
唉 ，佢 阿爺 嘩 ，一個人 邊度 有 咁 好運 㗎 ，橫財 一發 就 四十五萬 兩 ？
噉啊 總而言之 ，老子 有 過 四十五萬 兩 銀 嘅 身家 嚱 ，不過 係 老子 手段 闊綽 ，一夜之間 就 捹 清光 啫 嘛 你 話 犀利 唔 犀利 吖 ？
喺 個 肚裏 便 吹牛 啊 不禁 十分 得戚 嘞 ，佢 又 諗 ：
吖 ，嗰個 小宮女 仲 喺度 等緊 我 㗎噃 ，橫掂 三更半夜 亦 唔能夠 離開 皇宮 嘅 ，不如 而家 去 見下 佢 至得 。
哎呀 ，佢 摸 一摸 懷內 嗰個 紙盒 ，早就 已經 矺 到 一塌糊塗 嘞 ，個 心 諗 ：
我 仲係 搦 去 畀佢 睇下 ，免 佢 等到 心焦 ，我 就 話 我 跌咗 一 跤 ，將 蜜餞 糖果 矺到 爛晒 ，變咗 一 堆 牛屎 。
不過 呢啲 牛屎 呢 又 甜 又 香 都 唔知 幾 滋味 ，哈哈哈哈 ，又 甜 又 香 嘅 牛屎 你 食過 未 吖 ？老子 就 食過 喇 。
佢 諗下 覺得 好好玩 ，就 加快 腳步 ，行 去 太后 住 嗰 間 慈寧宮 。
噉啊只係行快幾步啫 ，心口 跟住 就 劇痛 ，噉唯有 又 放慢翻 腳步 啦 。
當佢嚟到慈寧宮外便嘅時候 ，見到 宮門 閂到 實一實 ，個心諗 ：
哎呀弊 ，冇估到 呢道門 會 閂埋 嘅 ，噉 點 入去 呢 ？
正在 唔知 點好 嘅 時候 ，宮門 忽然間 無聲無息 噉 推開咗 。
一個 小姑娘 哄 個 頭 出嚟 ，喺 月光 之下 睇得 清清楚楚 正係 蕊初 。
只見佢 微笑住 翕一翕手 ，韋小寶 好 歡喜 嘞 ，輕手輕腳 入咗去 。
蕊初 又 將 道門 掩 翻埋 ，喺 佢 耳邊 細細聲 話 ：
我 怕 你 入唔到嚟 啊 ，已經 喺 呢度 呀 等咗 好耐 喇 。
韋小寶 亦 低聲 話 ：我 嚟遲咗 喇 ，我 喺 路 上 𠽤到 一隻 又臭又硬 嘅 老烏龜 ，跌咗 我 一跤 啊 。
乜 花園 裏 便 有 隻 烏龜 嘅 咩 ？我 未 見過 嘅 ？
你 ， 你 跌 得 痛 唔 痛 啊 ？
先頭 韋小寶 一鼓作氣 噉 行嚟 ，身上 嘅 痛楚 都 仲 可以 忍得住 。
而家 畀 蕊初 噉 一 問 ，只 覺得 周身 筋骨 冇 處 唔 痛 ，忍唔住 嗯 咗 一 聲 。
蕊初 拉住 佢 隻手 低聲 問 ：跌痛 咗 邊度 啊 ？
韋小寶 正話 想 回答 ，忽然間 見到 地下 有 個 黑影 飛過 ，擔 高頭 一 睇 。
只見 一隻 巨大無比 嘅 大鷹 ，喺 牆頭 飛咗 入嚟 ，輕輕 噉 落 喺 地下 。
佢 大吃一驚 啊 ，嚇到 爭啲 嗌出聲 。
月光之下 只見 嗰隻 大鷹 好似 個人 噉 企起嚟 ，原來 唔係 大鷹 ，係 一個人 。
呢 個人 身材 瘦削 ， 彎腰駝背 ， 竟然 就 係 海老公 啊 ！
蕊初 本來 就 面向 韋小寶 嘅 ，所以 冇 見到 海老公 入嚟 。
但係 見到 韋小寶 睩 大 雙眼 ，面上 嘅 表情 好 驚噉 ，亦都 擰轉 頭 嘞 。
韋小寶 用 左手 揞實 佢 個 嘴 ，好 大力 ，使 佢 唔能夠 出聲 ，跟住 右手 呢 猛 咁 搖 ，示意 唔好 出聲 啊噉 。
蕊初岌一岌頭 ，韋小寶 噉 先 慢慢 放翻 開 隻 左手 ，目不轉睛 噉 睇住 海老公 。
只見 海老公 直 篤篤噉 企 響處 ，好似 喺度 傾聽 動靜 ，過咗 一陣 先 慢慢噉 向前行 。
韋小寶 見 佢 唔係 向住 自己 行過嚟 ，就 松翻啖氣 個 心 諗 ：
呢隻 老烏龜 好 犀利 啊 ，雙眼 雖然 盲咗 ，居然 能夠 追到 嚟 呢度 。
只要 我 同 呢個 小宮女 啲 多聲 都 唔出 ，老烏龜 就 搵 唔到 我 喇 。
只見 海老公 向前 行咗 幾步 ，突然 飆起 ，落 喺 韋小寶 面前 ，左手 一伸 就 叉住 蕊初 條 頸 。
蕊初 啊 噉 叫 一 聲 ，但 喉嚨 畀 人哋 揸住 啊 ，呢 一 聲 叫得 又 低 又 悶 。
韋小寶 諗 ：老烏龜 搵 嘅 係 我 ，又 唔係 搵 呢個 小宮女 唔會 殺死 佢 嘅 。
佢 呢個 時候 同 海老公 距離 不過 兩 尺 遠 ，嚇到 啊 幾乎 要 瀨尿 咁滯 ，但係 逳 都 唔 逳 。
知道 只要 自己 逳 一下 隻 手指尾 唧 ，就會 畀 佢 聽出嚟 㗎喇 。
海老公 低聲 話 ：唔好 出聲 ，唔聽話 我就 捻死 你 。
細細聲 回答 我 嘅 説話 ，你 係 邊個 ？
蕊初 低聲 話 ：我 ，我 。
海老公 用 右手 摸 下 佢 頭頂 ，又 摸 下 佢 面珠 。
你 係 個 小宮女 ，係唔係 啊 ？
蕊初話 ：係 ，係 。
三更半夜 ，喺 呢處 做 乜嘢 ？
我 ， 我 ， 我 嚟 呢 處 玩 下 啫 嘛 。
海老公 塊面 露出 一絲 微笑 ，喺 慘淡 嘅 月光 之下 睇上嚟 啊 ，反而 顯得 更加 陰森 恐怖 ，佢 問 ：
仲有 邊個 喺 呢處 啊 ？
講完 鈒 低 個 頭 喺度 聽 。
先頭蕊 初 就 唔識得 忍住 道氣 ，驚慌 之下 呼吸 粗重 ，畀 海老公 聽出 佢 企 嘅 位置 。
韋小寶 同 佢 嘅 距離 雖然 係 近 啊 ，但係 呼吸 極 輕微 ，佢 一時 呢 察覺 唔到 。
韋小寶 想要 打手勢 叫佢 唔好 講 ，之 又 唔敢 逳 雙手 啊 。
好彩蕊初乖覺 ，發覺 佢 雙眼 已經 盲咗 就 話 ：冇 ，冇喇 。
皇太后 ，住 喺 邊度 嚟 啊 ？你 帶 我 去 見 佢 。
公公 啊 ， 你 ， 你 唔 好 同 皇太后 講啊 ， 下次 ， 下次 我 唔 敢 咯 。
蕊初 以為 呢個 老太監 捉住咗 自己 ，要 去 稟報 太后 。
海老公話 ：你𠼮 都 冇用 喇 ，唔 帶 我 去 我 即時 就 捻死 你 。
隻手 微微 一 使力 啫 ，蕊初 當堂 窒息 咁 滯 ，塊 面 啊唂 到 紅 一 紅 。
韋小寶 驚到 不得了 ，終於 瀨出 尿 ，喺 褲襠 裏 便 一 滴滴 咁 流 。
好彩 海 老公 冇 留意 ，就算 聽到 咯 ，亦 以為 係 蕊初 嚇到 瀨尿 唧 。
海老公 慢慢 鬆開 左手 低聲 話 ：快啲 帶 我 去 。
蕊初 冇 法子 嘞 ，唯有 話 ：好啦 。
擸 咗 韋小寶 一眼 ， 做個 表情 示意 佢 快 啲 走 ， 自己 呢 決 唔 會 供 佢 出 嚟 嘅 。
然後 低聲 話 ：太后 寢宮 喺 嗰便 啊 。慢慢 噉 移動 腳步 。
海老公 嘅 左手 仍然 揸住 佢 條 頸 ，同 佢 一拍 噉 行 。
韋小寶 諗 ：老烏龜 必定 去 同 皇太后 講 ，我 係 冒充嘅 小太監 。
小桂子 係 畀 我 殺死 嘅 ，佢 自己 雙眼 呢 係 畀 我 整盲 嘅 ，要 太后 即刻 下令 捉 我 。
咦 ，佢 點解 唔 去 稟報 皇上 呢 ？
啊係喇佢知道皇上對我好 ，告狀呢多數告唔入嘅 ，噉 ，噉又點算好呢 ？
我 即刻 逃出去 皇宮 至得 。
哎呀 ，弊 ，呢個 時候 宮門 早就 閂埋 嘞 又 點 逃走 得 出去 呢 ？
只要 再過 一陣間 ，太后 傳下 命令 ，到 其時 更加 係 插翼 難 飛 喇 。
韋小寶 正在 唔知點好 嘅 時候 ，忽然間 聽見 前面 間 房 裏 便 一 個 女子 聲音 問 ：
外便 係 邊個 啊 ？
呢把聲 陰陰森森 ，韋小寶 聽得 好 清楚 ，係 皇太后 把聲 嚟 。
佢 嚇咗 一驚 啊 ，想 即刻 起腳 就 逃走 嘞 。
只聽見 海老公 話 ：奴才 海大富 ，嚟 同 你 老人家 請安 啊 。
呢把聲 亦係 陰陰森森 ，一啲 都 冇 恭謹 嘅 意思 。
韋小寶 好 驚奇 嘞 ：老烏龜 係 個 咩嘢 東東 啊 ？竟然 膽敢 對 太后 咁 無禮 嘅 ？
念頭 一轉 佢 諗 ：老烏龜 講 說話 乞人 憎 ，九成九 ，太后 向來 都 好 討厭 佢 嘅 。
不如 我 乘機 同 佢 亂駁 一番 ，橫掂 要 逃走 啊 逃走唔出去 㗎 嘞 。
呢一着啊 雖然 係 冒險 ，但係 諗住 自己 新近 立咗 大功 ，皇上 同 太后 都 好 鐘意 自己 。
殺咗 個 把 小桂子 ，整盲 咗 海老烏龜 嗰 只 狗眼 核 ，亦 算唔得 咩 嘢 大罪 啊 。
真係 唔掂 咯 ，嗰陣時 仲 可以 請 結拜 大佬 索額圖 出嚟 講情 吖 。
自己 如果 拍下 𦣇柚 一 走 ，咩嘢 説話 都 畀 老烏龜 講晒 。
噉 自己 既然 係 逃跑咗 ，自不然 係 作賊心虛 ，本來 冇罪 都 反而 變為 有罪 咯 。
又 諗 ： 太后 如果 問我 點解 要 殺 小桂子 啊 噉 ， 我話 ， 誒 我 話 ， 嗯 ， 嗯 ， 我 聽見 小桂子 同海 老 烏龜 講 太后 同 皇上 嘅 壞話 ， 講 咗 好多好多 好 難聽 到 極 嘅 説 話 。
我 嬲 起上嚟 ，忍無可忍 ，因此 就 將 小桂子 一刀 殺咗 ，又 乘機 整 盲 咗 海老烏龜 隻 眼 啫 。
至於 講 咩 壞話 ，噉 大 可以 生 安白 造 一番 吖 。
鬥打交 我 係 打唔過 老烏龜 嘅 ，鬥 講 大話 鬥 吹牛 ，你 老烏龜 邊度 係 老子 對手 啊 ？
想想 下 得意 起嚟 嘞 ，當堂 膽壯 翻 ，就 唔 想 逃走 嘞 。
佢 最怕 嘅 係 海老公 駁唔過 自己 ，跳上嚟 一掌 將 自己 打死 ，噉 真係 死得 冤枉 咯 。
因此 呢 等陣間 喺 太后 面前 辯白 嘅 時候 ，務必要 企 喺 一笪 安全 嘅 地方 ，等 老烏龜 捉唔到 打唔到 至 得 。
只 聽見 太后 話 ： 你 要 請安 ， 點解 日頭 唔 嚟 ， 半夜三更 噉 走 嚟 成 咩 嘢 體統 啊 ？
奴才 有 件 機密 大事 要 啟奏 太后 ，日頭 人 多 耳雜 ，畀 人哋 聽到 咗 ，唔係 點 妥當 啊 。
韋小寶 個 心 諗 ：嚟喇嚟喇 ，老烏龜 告狀 喇 。
好 ，由得 佢 講 先 ，等 佢 講咗 一大半 嘞 我 先 插嘴 都 唔 遲 。
係呢 ，我 匿喺 邊處 好 呢 ？
睇咗 一睇 四周圍 嘅 形勢 ，就 選中咗 一笪 地方 ，就 一步步 壓到去 金魚池 嘅 假山 後便 。
心諗 ：老烏龜 如果 衝過嚟 打 我 ，兵砰一聲 呢 ，必定 跌落 金魚池 先 嘅 。
我 即刻 衝入去 太后 間 房 裏 便 ，老烏龜 就算 有 沙煲 咁大 嘅 膽 ，亦 唔 敢 追到 入 太后 房間 嚟 打人 嘅 。
只聽見 太后 哼咗 一聲 話 ：哼 ！有 咩嘢 機密 大事 ，你 就 講 啦 。
太后 身邊 冇 第啲 人 吖 嘛 ？老奴才 嘅 説話 ，好 機密 㗎 噃 。
你 要 唔 要 入嚟 查下 吖 ？你 武功 咁 使得 ，我 身邊 有 冇 人 ，唔通 你 都 聽唔出 咩 ？
奴才 唔 敢 入 太后 間房 ， 可 唔 可以 勞煩 太后 嘅 聖駕 ， 行出 嚟 ， 奴才 有事 啓奏 啊 。
哼 ！ 你 真 係 越 嚟 越 大膽 嘞 ， 而家 又 恃 住 邊個 啊 ？ 膽敢 咁 放肆 啊 。
韋小寶 聽到 呢處 ，個心 歡喜 到 不得了 ，個心 跟住 鬧 ：
老 烏龜 ， 你 真 係 越 嚟 越 大膽 喇 ， 而家 啊 恃 住 邊個 啊 ， 膽敢 咁 放肆 啊 。
海老公 話 ：奴才 不敢 。
太后 又 哼咗 一 聲 話 ：
哼 ，你 早就 冇 將 我 睇在眼內 喇 。
今晚 黑忽然間 摸到嚟 ，都唔知 你 搞咩嘢鬼 。
韋小寶 更加 開心 喇 ，忍唔住 想 大聲 幫 太后 鬧 海老公 幾句 。
個心諗 ：老烏龜 啊 老烏龜 ，你 告狀 都 冇 告成 ，就 撞 咗 個 大板 嘞 。
睇嚟 ，唔使 老子 親自 出馬 喇 ，淨係 太后 啊 ，就 會 將 你 一餐 臭罵 抨 你 走 。
只聽見 海老公 話 ：太后 既然 唔想 知道 嗰個人 消息 ，噉 亦冇乜嘢喇 ，奴才 走喇 。
韋小寶 好 歡喜 個 心 諗 ：去得 好 ，去得 妙 ，去得 呱呱叫 ，你 快啲 躝屍 趷路 罷 啦 ，太后 點 會 想 知道 我 個 消息 呢 ？
點知道 太后 問 ：你 有 咩嘢 消息 啊 ？
海老公話 ：五台山上 嘅 消息 。
五台山 ，你 ，你 ，你 講 咩嘢話 ？
太后 把 聲 都有 啲 震 喇 。
月光 之下 只見 海老 公 用 手指 一督 ，蕊 初 應 手 而 倒 。
韋小寶 大吃一驚 啊 ，個 心 有 啲 難過 。
佢 又 諗 ：老烏龜 害死 呢個 小姑娘 ，等陣 我 講翻出嚟 ，太后 一定 更加 嬲 嘞 。
老烏龜 再 想 告 我 個 狀噉 啊 真係 千難萬難 啊 。
只聽見 太后 又 問 ：你 ，你 殺咗 咩 人 啊 ？
海老公話 ：係 太后 身邊 一個 小宮女 。
奴才 唔敢 殺 佢 ，不過 係 點咗 佢 嘅 穴道 啫 ，等 佢 聽唔到 我哋 嘅 説話 。
韋小寶噉就放心喇 ：哦 ，原來 老烏龜 冇 殺 佢 。
不過 內心 呢 隱隱約約 又 有 啲 失望 。
海老公 唔 殺 呢個 小宮女 ，自己 嘅 處境 就 唔算 十分 有利 啊 。
太后 又問 ： 五台山 ， 你講 五台山 做 乜嘢 啊 ？
只因為 五台山 上 有 一個 人 ，係 太后 好 關心 嘅 。
你 ， 你 講 佢 係 去 咗 五台山 啊 ？
太后 如果 想 知道 詳情 ，只有 請 你 移 一移 聖駕 喇 ，三更半夜 ，奴才 唔能夠 入 太后 間 房 。
喺 呢處 咁 大聲 講嘢 ，呢啲 機密 大事 ，畀 宮女 太監 聽到 咗 唔係 好玩 㗎 。
太后 猶豫 咗 一陣 就 話 ：好啦 。
跟住 就 聽見 開門聲 ，太后 腳步 輕盈 噉 行出嚟 。
韋小寶 縮喺 假山 後 便 個 心 諗 ：
海老 烏龜 睇唔見 我 ，之 太后 就 唔係 盲 㗎 噃 。
佢 唔 敢 哄 個 頭 出嚟 裝 嘞 。
太后 出嚟 嘅 時候 ，一撇眼 就 見到 佢 身材 唔高 ，有啲 矮矮肥肥 。
韋小寶 見過 太后 兩次 ，但係 兩次 見到 佢 嘅 時候 佢 都係 坐 喺度 嘅 。
只聽見太后話 ：你 先頭 講 ，佢 去咗 五台山 ，噉 ，係唔係 真㗎 ？
海老公話 ：奴才 冇 話過 係 邊個 去咗 五台山 啊 。
奴才 只係 話 ，五台山 上 便 ，係 有 一 個 人 恐怕 係 太后 好 關心 嘅 啫 。
好 ， 就算 你 係 噉 樣講 ， 佢 ， 佢 ， 嗰 個人 ， 喺 五台山 上面 做 咩 嘢 啊 ？
係咪 喺 間 廟 裏頭 啊 ？
佢 本來 講説話 極之 鎮靜 嘅 ，但係 自從 聽 海老公 講到 五台山 上 有 一個 人 之後 ，就 氣急敗壞 似乎 心神 大亂 噉 。
海老公話 ：嗰個人 ，係 喺 五台山 嘅 清涼寺 裏 便 。
太后 松咗 啖氣 喇 佢 話 ：
謝天謝地 ， 我 終於 ， 終於 知道 咗 佢 ， 佢 嘅 下落 。
佢 ，佢 ，佢 。
一連氣 講咗 三個 佢字 ，再 講唔落去 嘞 ，把 聲 啊 震得 十分 厲害 。
韋小寶 好奇怪喇 ：哈嗰個人 係 邊個 呢 ？點解 太后 對 佢 咁 關心 嘅 ？
唔通 係 太后 嘅 父親 兄弟 ，或者 係 佢 嘅 契家佬 ？
係喇 一定 係 契家佬 定 喇 。
如果係 父親 兄弟 ，噉 亦 唔係 咩 機密 大事 吖 ，又 何必 怕 第二個人 聽見 啫 ？
老烏龜 捉住 佢 嘅 把柄 ，如果 一定 要 佢 殺 我 ，太后 怕咗 老烏龜 ，講唔定 只好 聽 老烏龜 嘅 説話 。
哎呀 噉 我 有 啲 不妙 嘞 噃 。
嗯 ，好在 老子 喺 呢處 聽到 啫 ，你 個 死老舉 如果 膽敢 殺 我 ，老子 就 一五一十 ，扽晒出嚟 。
我 去 同 皇上 講 ，至多 係 烏蠅 褸 馬尾 一拍兩散 唧 ，我 怕 你 嘅 唔算 英雄 好漢 ！
自從 盤古 開天闢地 以來 啊 ，膽敢 鬧 皇太后 做死 老舉 嘅 ，估計 必定 寥寥無幾 。
就算 淨係 喺 個 肚裏 便 暗中 鬧啊 亦 唔會 好多 。
韋小寶 無所忌憚 ，就算 係 佢 自己 母親 啊 ，打得 佢 厲害 過頭 ，佢 亦 會 死 老舉 爛老舉 噉 亂叫 亂鬧 。
好在 佢 母親 本來 就係 老舉 ，妓院 裏 便 人人 污言穢語 就 習以為常 ，聽 ，聽咗 亦 唔會 點 嬲 嘅 。
只不過 打 喺 佢 個 𦣇柚仔 處 嘅 掌力 加重 咗 三分 ，同時 把 口 呢 ，亦 係 死 雜種 死龜蛋 噉 對 鬧 一場 而已 啫 。
只聽見 皇太后 喘氣 喘得 好 厲害 ，隔咗 好耐 佢 先至 話 ：
佢 ，佢 ，佢 ，佢 喺 清涼寺 做 咩嘢 啊 ？
海老公話 ：太后 真係 想知道 咩 ？
噉 仲 使 問 咩 ？我 梗係 想 知道 啦 。
主子 係 出家 做咗 和尚 。
吓 ？
佢 ， 佢 真 係 出 咗 家 ？ 你 ， 你 冇 呃 我 吖 嘛 ？
奴才 唔敢 呃 太后 ，亦 唔使 呃 太后 吖 。
哼 ， 佢 就 咁 忍心 ， 一心一意 ， 只 係 ， 只 係 想念 嗰 個 ， 嗰 個 狐狸精 ， 將 國家 社稷 ， 祖宗 百戰 而 創立 嘅 基業 ，冚𠾴唥 都 拋 到 腦 後 。
我 哋 兩 母子 ， 佢 ， 佢 ， 佢 更加 唔 放 喺 心上 喇 。
韋小寶 越 聽 越 奇 ，個 心 諗 ：咩 國家 社稷 ，祖宗 嘅 基業 啊 ？
老烏龜 又 叫 嗰個 人 做 主子 嘅 ？噉 嗰個人 ，嗰個人 唔通 唔係 太后 嘅 契家佬 ？
海老公 冷冰冰 噉 話 ：主子 睇破咗 世情 ，已經 大徹大悟 嘞 。
萬里江山 ，兒女 親情 ，主子 話 都 已經 好似 過眼浮雲 ，冚𠾴唥 都 唔 再 牽掛 㗎 喇 。
太后 嬲 嘞 ： 佢 點解 早 唔 出家 遲 唔 出家 ， 等到 嗰 個 ， 嗰 個 狐狸精 死 咗 嘞 先至 出家 吖 ？
國家 朝廷 、祖宗 妻兒 冚𠾴 唥加加埋埋 ，喺 佢 心目中 都 唔 及 嗰個 狐狸精 嘅 一條 汗毛 。
我 ， 我 ， 我 早就 知道 佢 ， 佢 係 為 咗 嗰 個 狐狸精 噉 先至 突然 出走 嘅 。
哼 ，佢 既然 走咗 ，何必 又 叫 你 嚟 通知 我 呢 ？
佢 越 講 越 嬲 ，漸漸 大聲 嘞 。
韋小寶 個 心 好 驚 啊 ，隱隱約約 覺得 ，佢 兩個人 所 講 嘅 嗰個人 同埋 嗰件事 ，實在 係 非同小可 啊 。
各位 ，欲知 後事 如何 ，且 聽 下回 分解 。
