前 文 再續 啊 書 接上 一回 啊 ， 話 說 索額圖 同 韋小寶 去 佛堂 結拜 。
索額圖 話 ： 弟子 索額圖 ， 今日 同 桂小寶 桂兄弟 義結金蘭 ， 此後 有福 共享 ， 有難同當 ， 不願 同年同月 同日生 ， 但願 同年 同月同日 死 。
弟子 若然 不顧 義氣 ，天誅地滅 ，永世 無 出頭 之 日 。
講完 ，又 叩咗 個 頭 。
拜完喇 ，就 話 ：兄弟 ，你 亦都 拜佛 發誓 啦 。
韋小寶 個 心 諗 ：你 大過 我 咁多 嘅 ，如果 我 真係 同 你 同年 同月 同日 死 ，噉 豈唔係 好 蝕底 ？
一轉念之間 ，已經 諗掂嘞 ，個心話 ：
我 橫掂 又 唔係 桂小寶 亂噏 一通 又 怕 咩 嘢 啫 ？
於是 喺 佛像 面前 叩咗 頭 ，大聲 話 ：
弟子 桂小寶 ，一向 都係 喺 皇帝 宮 裏 便 做 小太監 嘅 ，人人 都 叫 我 做 小桂子 。
同 索額圖 大人 索 老哥 結為 兄弟 ， 有福 共享 ， 有難同當 ， 不願 同年同月 同日生 ， 但願 同月 同月同日 死 。
如果 小桂子 唔 顧 義氣 ，小桂子 天誅 地滅 ，小桂子 死後 ，打入 十八層 地獄 ，畀 牛頭 馬面 捉住 一千年 、一萬年 亦 不得 超生 。
佢 將 一切 嘅 災禍 ，冚𠾴唥 都 要 小桂子 去 承當 。
又 連住講 咗 兩個 同月 ， 將 但願 同年 同月同日 死 ， 講成 係 但願 同月 ， 同月同日 死 ， 一路 噏 落 嚟 噏 到 快快 ， 索額圖 亦 冇 聽 出 其中 嘅 花樣 。
韋小寶 個 心 諗 ：同 你 同月同日 死 噉 都 唔 緊要 ，你如果 係 三月初三 死嘅 ，我 一百年 之後 ，三月初三 歸天 亦 不至於 蝕底 嘞 。
至於 佢 講 小桂子 死後 打入 十八層 地獄 啊 千萬年 不得 超生 ，呢點 啊 卻係 佢 真正 嘅 心願 。
小桂子 係 佢 殺 嘅 ，鬼魂 如果 嚟 報仇 就 唔係 好玩 㗎 喎 。
如果 喺 地獄 裏 便 ，畀 牛頭馬面 捉住 ，噉 佢 韋小寶 喺 陽世 ，自不然 就 太平無事 啦 。
索額圖 聽 佢 講完 ，噉 兩個人 對拜 咗 八拜 一齊 企 起身 哈哈大笑 。
索額圖 笑住 話 ：哈哈哈哈 兄弟 ，你我 已經 係 結拜 兄弟喇 ，噉 真係 比 親 兄弟 仲 要 親熱 十倍 。
以後 ，你 要 阿哥 幫 你 做 乜嘢 事 ，即管 開聲 唔使 客氣 㗎 。
韋小寶 亦 笑住 話 ：噉 仲 使 講 咩 ？我 出世 之後 啊 ，就 唔 知道 客氣 兩個 字 係 咩 意思 㗎 喇 ，大哥 ，咩嘢 叫做 客氣 啫 ？
兩個人 又 哈哈大笑 一番 。
索額圖話 ：兄弟 ，我哋 兩個人 結拜 呢件事 呢 ，就 唔好 同 第二個人 講 ，免得 啲人 忌 我哋 啊 。
按照 朝廷 規矩 ，我哋 做 外臣 嘅 人 呢 ，就 唔能夠 同 細佬 你 做 內官 嘅 人 太過 親熱 嘅 ，我哋 只要 自己 知 就係 喇 。
韋小寶 話 ：冇錯冇錯 ，雞 食 放 光蟲 心知肚明 。
索額圖 見到 佢 精乖伶俐 ，話頭知尾 就 更加 歡喜 。
佢 話 ：兄弟 ，喺 啲 人 面前 呢 ，我 仲係 叫 你 做 桂公公 ，你 就 叫 我 做 索大人 。
嗱 ，過 幾日 ，你 嚟 我 屋企 ，阿哥 我 陪 你 飲酒 睇戲 ，我哋 兩 兄弟 認真 快活 一番 。
韋小寶 真係 高興 ，酒 呢 ，佢 係 唔係 幾 會 飲 ，之 睇戲 兩個字 一 入耳 ，佢 真係 歡喜 過 乜 啊 。
拍 住手 噉 笑 住 話 ： 好 嘢 ， 好 嘢 ， 我 最 鐘意 睇 戲 嘞 ， 誒 你 話 ， 你 話邊 一日 啊 ？
揚州 鹽商 嘅 生活 奢華 ，每逢 娶 新抱 、嫁 女 、生 仔 、賀壽 ，往往 連氣 做 幾日 戲 嘅 。
韋小寶 遇到 呢啲 日子 ，唔使 問 阿貴 喇 當然 係 喺 戲台 嗰度 啊 轉入轉出 噉 趁 熱鬧 ，睇 霸王戲 。
人哋 係 喜慶 好日子 ，亦 唔會 認真 對付 佢 呢 挺 小無賴 嘅 。
周時 呢 仲 請 佢 食 一 碗 飯 ，飯面 上 便 ，高高 噉 冧 翻 幾 嚿 大 肥 豬肉 。
至於 迎神賽會 ，仲 更加 有 好多 唔同 戲班 做 戲 。
所以 一 提到 睇戲 兩個 字 呢 ，確實 係 心花怒放 啊 。
索額圖話 ：兄弟 既然 鐘意 咯 ，我 時時 請 你 都 得 ，只要 邊一日 兄弟 你 得閒 ，就 即管 吩咐 啦 。
韋小寶 話 ： 就 係 聽 日 呢 好 唔 好 啊 ？
好極喇 ，聽日 酉時 ，我 喺 宮門外 便 等 你 。
酉時 ，而家 講 係 即係 下午 五點 至 七點 。
韋小寶 話 ：我 離開 皇宮 出嚟 唔緊要 㗎 ？
當然唔緊要啦 ，日頭 你侍候 皇上 ，一到 挨晚 邊個 都 管唔到 你 㗎咯 。
你 已經 升咗 做 首領太監 ，喺 皇上 面前 大紅大紫 ，仲有 邊個 敢 嚟 管 你 唧 ？
韋小寶 笑逐顏開 ，本來 佢 諗住 聽日 就 趯更 ，再 唔 返去 皇宮 嘞 。
但係 聽見 索額圖 噉樣 講 ，自己 身份 唔同 可以 自由 出入 皇宮 ，誒 噉 就 唔使 咁 急住 鬆人 噃 ，就 笑住 話 ：
好 ， 一言 為定 ， 我 哋 兩 兄弟 有福 共享 ， 有戲 同睇 啊 。
索額圖 拉住 佢 隻手 話 ：好啦 ，我哋 而家 返入去 鰲拜 間房 揀 寶貝 啦 。
噉 兩個人 返到 鰲拜 間 房 ，索額圖 仔細 睇 下 由 地洞 裏 便 攞出嚟 嘅 各樣 物件 ，就 問 韋小寶 話 ：
兄弟 ，你 鐘意 邊 一啲 啊 ？
乜嘢 最貴重 我 都 唔識 嘅 ，你 幫 我 揀 啦 。
好 ，我 幫 你 揀 。
索額圖 攞起 兩串 明珠 ，一隻 翡翠 雕成 嘅 玉馬 佢 話 ：
呢 兩件 珠寶 好 值錢 ，兄弟 要咗 佢 啦 。
好啊 。
韋小寶 將 明珠 同 玉馬 袋 咗 落 衫袋 ，噉 啊 順手 攞起 一把 匕首 ，覺得 極之 重 。
嗰 把 匕首 連埋 柄 呢 不過 係 一尺二寸 長 ，套住 喺 鯊魚皮 嘅 套 裏 便 。
但係 重量 呢 ，竟然 同 平常 嘅 長刀 長劍 冇 乜 兩樣 嘅 。
韋小寶 左手 揸住 劍柄 ，拔佢 出嚟 ，只 覺得 一陣 寒氣 撲面而來 ，個 鼻哥 一酸 ，當堂 打咗 個 乞嗤 。
再睇 下個 匕首 ，劍身 好似 墨 咁 黑 ，一啲 光澤 都 冇 嘅 。
佢 本來 以為 鰲拜 既然 將 呢 把 匕首 珍而重之 噉 放 喺 藏寶庫 裏 便 ，實 係 把 寶刀 啦 。
誰知 個樣 咁 難睇 ，好似 木頭刀 一樣 ，有啲 失望 喇 ，隨手 向 旁邊 一拋 。
聽見 細細 嗤 一 聲 響 ，匕首 插 落 地板 一直 插 到 落 柄 噃 。
韋小寶 同 索額圖 都 咦噉 一聲 ，好 驚奇 。
韋小寶 隨手 噉 樣 一 拋 ， 啲 多 都 冇 使 到 力 嘅 ， 估 唔 到 把 匕首 呢 竟然 會 自己 插入 地板 。
而刃鋒 嗰種 利法 真係 想都想唔到 嘅 ，竟然 好似 插入 爛泥 一樣 。
韋小寶 彎腰 拔翻 起 匕首 話 ：呢 把 短劍 ，確係 有啲 奇怪 噃 。
索額圖 見多識廣 佢 話 ： 睇 嚟 呢 把 係 寶劍 啊 ， 我 哋 嚟 試一試 吖 。
噉喺墻壁上面 除低 一把 馬刀 拔出嚟 ，打橫 揸住 喺 手 ，佢 對 韋小寶 話 ：
兄弟 ，你 用 把 短劍 喺 呢 把 馬刀 上面 斬 一下 。
韋小寶 舉起 匕首 向住 馬刀 斬 落去 ，嚓 一聲 ，把 馬刀 應手 斷為 兩 橛 。
兩個人 不約而同 叫 一聲 ：好 ！
呢把匕首啊 ，係 世所罕見 嘅 寶劍 就 毫無疑義 㗎喇 ，奇怪嘅 係 斬斷 馬刀 啊 ，竟然 好似 斬斷 條 木 噉 ，完全 冇 金屬 碰撞 嘅 鏗鏘聲 嘅 。
索額圖 笑住 話 ：恭喜 兄弟 ，得咗 咁 靚 嘅 一把 寶劍 ，鰲拜 屋企 嘅 寶物 ，以 呢 把 劍 為 首 啊 。
韋小寶 亦 非常之 歡喜 ，佢 話 ：大哥 ，你 如果 鐘意 ，讓畀 你 啦 。
索額圖 一味 耍 手擰頭 話 ：你 阿哥 出身 係 個 武官 ，以後 做 文官 喇 ，唔 做 武官 㗎 喇 ，呢 把 寶劍 ，仲 係 兄弟 攞 去 玩 下 罷 啦 。
韋小寶 將 匕首 插 翻 落 劍鞘 ，綁 喺 衣帶 上 便 。
索額圖話 ：兄弟 ，呢 把 劍 咁 短 ，仲係 放 喺 靴筒 裏 便 好 ，免得 入 宮 嘅 時候 畀 人 睇見 啊 。
清宮 嘅 規矩 ，如果 唔係 當值 嘅 帶刀 侍衛 ，入宮 嘅 時候 就 唔准 攜帶 武器 。
韋小寶話 ：係 。噉啊 將 匕首 塞入 靴筒 。
其實 以 佢 噉 樣 嘅 大紅人 啊 ， 出入 宮門 ， 侍 衞 當然 唔 會 搜 佢 身 有 冇 攜帶 違禁品 嘅 事 嘅 。
韋小寶 得咗 呢把 匕首 ，對 其他 嘅 寶物 ，亦 再 唔 放在眼內 嘞 。
過咗一陣 ，忍唔住 又 拔出 匕首 ，喺 牆壁 上面 攞咗 一支 鐵矛 落嚟 ，嚓 一聲 ，將 鐵矛 斬為 兩橛 。
佢 順手 揮割 ，房間 裏 便 各種 堅硬 嘅 物品 啊 ，冇 樣 唔係 應手 而 斷 嘅 。
佢 用 匕首 尖 喺 檀木 枱面 上面 畫 隻 烏龜 ， 啱 啱 畫完唧 ， 啪 一聲 ， 一隻 檀木 烏龜 喺 枱面 嗰 度 跌 咗 落地 。
枱面 正中間 ，就 空出 一個 烏龜形 嘅 空洞 。
韋小寶 大叫 話 ：鰲拜 老兄 ，你 老人家 好 吖 嘛 ？啊 ？哈 ，哈哈哈哈哈 。
索額圖 呢卻 係 畀 心機 去 查 點 藏寶庫 裏 便 嘅 其他 物件 。
只見 大堆 珍寶 之中 有 一件 黑卒卒 嘅 背心 ，搦起嚟 ，入手 極 輕 ，質地 好 柔軟 ，唔係 絲 亦 唔係 毛 ，都 唔知 係 咩 質地 做 嘅 。
佢 一心 要 巴結 韋小寶 就 話 ，佢 話 ：兄弟 ，呢件 背心 着 上身 一定 好 暖 嘅 ，你 除咗 件 外衣 ，着咗 佢 罷啦 。
韋小寶 話 ： 呢 件 又 係 咩 嘢 寶貝 啊 ？
我 亦 唔知 噃 ，你 着咗 佢 啦 。
嗯 ，我 着起嚟 大過 頭 啊 。
件 背心 好 軟熟 嘅 ，稍為 大啲 打個褶 咪 就 可以 囉 。
韋小寶 接咗 件 背心 ，覺得 又 輕 又 軟熟 。
諗起 舊年 𠼮 母親 做 一件 絲棉衲 ，母親 張羅 咗 幾日 籌唔到 錢 終於 冇 做成 。
呢件 背心 似乎 亦 唔差過 絲棉 衲 啊 ，不過 就 顏色 唔夠 光鮮 啫 ，個 心 諗 ：
好 ，將來 我 着 翻 去 揚州 ，畀 阿媽 睇 下 。
於是就 除咗 件 外衣 ，將 背心 着好 ，再 將 外衣 罩 喺 上 便 。
嗰件 背心 尺寸 係 大 就 大咗啲 ，好在 又 軟 又 薄 ，都 唔覺得 有 咩嘢 唔方便 。
索額圖 清理 咗 鰲拜 嘅 寶藏 ，叫 手下人 入嚟 ，睇咗 鰲拜 家財 嘅 初步 清單 ，不由得 伸一伸 條 脷 佢 話 ：
鰲拜 呢個 嘢 真係 會 刮 銀 喇 ，佢 嘅 家財 比 我 所 估計 嘅 仲要 多 一倍 都 仲 唔止 。
佢 揮 一揮手 叫 下屬 出去 然後 對 韋小寶 話 ：
兄弟 ，佢哋 漢人 有 説話 ：千里 為 官 只 為 財 啊 。
呢次 皇恩浩蕩 ，皇上 派 我哋 兩 兄弟 呢個 差事 ，本來 就係 要 我哋 發 一 筆 橫財 嘅 。
呢張 清單 呢 ，等陣 我要 去 修改 一下 ，二百 幾 萬 兩 銀 ，你 話 報 幾多 先至 係 呢 ？
哦 ，嗰啲 我 就 唔識 喇 ，一切 由 大哥 作主 就係 啦 。
嘿嘿嘿嘿嘿嘿 ，張 單 上面 開列 嘅 ，總共 係 二百三十五萬 ，三千四百一十八 兩 。
嗰 個 零頭 仲 係 照舊 ， 我 哋 同 佢 減 咗 個 一 字 ， 戲法 一變 ， 變成 一百三十五萬三千四百一十八兩 。
嗰個 一字 呢 ，我哋 兩 兄弟 就 二 一 添 作 五 呢 好唔好 啊 ？
吓 ？你 ，你 ，嗯嗯嗯 ，你 ，你話 。
兄弟 你 嫌 唔夠 係 嘛 ？
哦 哦 ， 唔 ， 唔 係 唔 係 ， 我 我 ， 我 唔 係 點明 白 啫 。
我話 將 嗰 一百萬 兩 銀 ，我哋 兩 兄弟 搦嚟 平分 ，每人 五十萬 兩 ，兄弟 你 如果 嫌少 喇 ，我哋 再 商量 下 吖 。
韋小寶 個 面色 都 變咗 。
佢 喺 揚州 妓院 裏 便 嘅 時候 ，手頭 只要 有 一二兩 銀 啊 ，就 好似 發 咗 橫財 一樣 㗎 嘞 。
喺 皇宮 裏 便 同人哋 賭 錢 ，出入 大咗 咯 ，噉 亦 只係 幾十 兩 ，以至 一二 百 兩 銀 嘅 事 啫 。
突然間 ，聽見 一分 就 分到 五十萬 兩 ，幾乎 唔相信 自己 嘅 耳仔 啊 。
索額圖 啱先 不停噉 將 珍寶 塞畀 佢 ，就係 要 塞住 佢 個 嘴 ，等 佢 喺 皇帝 面前 唔 提 鰲拜 財產 嘅 真相 。
否則 ，只要 佢 喺 皇上 面前 稍為 露 一啲 口風 ，不但 自己 侵吞 嘅 贓款 要 全部 嘔翻 出嚟 ，斷送 一生 嘅 前程 ，而且 仲 勢必 得 一個 大大 嘅 罪名 添 。
而家 ，佢 見 韋小寶 面色 有啲 異樣 就 連忙 話 ：兄弟 想 點樣 辦 吖 ？我 都 聽晒 你 就係 喇 。
韋小寶 松 翻 啖氣 佢 話 ：
我 ， 我 講過 一切 由 大哥 作主 嘅 。
只不過 係 分 畀 我 五十萬 ， 五五 ， 五十萬兩 銀 ， 未免 ， 未免 誒 誒 ， 太 ， 太 多 過頭 喇 。
索額圖 如釋重負 哈哈大笑 話 ： 哈哈哈 哈哈哈 ， 唔 多 ， 唔 多 ， 一 啲 都 唔 多 。
噉樣啦 ，呢度 所有 辦事 嘅 人 ，大家 都 要 得 一啲 好處 。
喺 我 嗰 五十萬 兩 銀 裏 便 ，攞 五萬 兩 出嚟 ，等 底下 啲 人 大家 攞嚟 分 。
細佬 你 呢 亦 攞 五萬 銀 出嚟 ，宮 裏 便 嘅 妃子 、管事 太監 等等 ，每個人 都有 啲 甜頭 。
噉樣 一嚟 ，邊個 都 冇 閒話 講 咯 。
好係好啊 ，之 我 唔知 點樣 分法 啫 。
呢啲事 ，我 一手包辦 就係 喇 ，包 你 面面俱到 邊個 都 唔會 得罪 。
人人 都 會 話 桂公公 年紀 輕輕 ，辦事 真 夠 朋友 嘅 。
錢 係 攞嚟 使 㗎 嘛 ，你 我 今後 一帆風順 ，依靠 其他 嘅 人 嘅 地方 好多 㗎 嘛 。
係啊 ，係啊 。
呢 一百萬 兩 銀 呢 ，鰲拜 屋企 亦 冇 咁多 現錢 ，我哋 要 盡快 變賣 佢 嘅 產業 ，一切 都 要 做得 乾手淨腳 ，唔好 畀 人哋 揸住 咗 把柄 至好 。
兄弟 你 喺 宮 裏 便 ，咁多 金元寶 銀元寶 亦 冇 地方 擠 嘅 係咪 ？
韋小寶 突然間 發咗 四十五萬 兩 銀 嘅 橫財 ，一時之間 頭暈腦脹 都 唔知 如何 是好 嘞 。
所以 無論 索額圖 講 乜嘢 呢 ，都 只係 回答 話 ：係啊 ，係啊噉 。
索額圖 又 話 ：過得 幾日 ，我 叫 幾間 金鋪 打 咗 金票 銀票 ，都 係 一百 兩 一張 、五十 兩 一張 嘅 。
細佬 你 放喺 身邊 ，咩時候 要 使咯 ，去 金鋪 兑換 成金銀 就係喇 ，又 方便 又 妥當 。
除非 有人 嚟 摸 你 嘅 衫袋 啦 ，否則 邊個 都 唔 知道 細佬 你 小小 年紀 ，已經 係 我哋 北京城 內 一位 大財主 喇 ，哈哈哈哈哈哈哈 。
韋小寶 跟住 亦 笑起上嚟 ，個心 諗 ：
真係 我 有 四十五萬 兩 銀 ？真係 四十五萬 兩 ？
嗯 ，我 有咗 呢 四十五萬 兩 銀 ，點樣 捹法 好 呢 ？
豈有此理 ，日日 食 燉圓蹄 、炸子雞 ，一生一世 都 食唔完 呢 四十五萬 兩 銀 吖 。
你 阿爺 嘩 ，老子 返去 揚州 開 十間 妓院 ，間間 都 大過 麗春院 靚過 麗春院 十倍 嘅 。
佢 自細 就 心懷 大志 ，將來 發達 之後 啊 ，要 開 一間 比 麗春院 更 大 更 豪華 嘅 妓院 ，揚眉吐氣 就 莫此為甚 。
佢 同 麗春院 嘅 龜婆 鬧交 ，時時 都 話 喇 ：
你 阿爺 吖 ，你 開 一 間 麗春院 有 咩 咁 叻 啊 ？
老子 過 幾年 發 咗 財 ， 喺 你 對面 開間 麗夏院 ， 左便 呢 開間 麗秋院 ， 右 便 開間 麗冬院 ， 搶 清光 你 嘅 生意 ， 啲 嫖客 一個 都 唔 上 你門 ， 等 你 食 西北風 。
一想到 妓院 一開 就係 十間 ，手頭 嗰種 闊綽法 ，揚州 人士 啊 冇 個 唔 刮目相看 嘅 ，不由得 心花怒放 咯 。
索額圖 邊度 估到 佢 個 心裏 便 有 咁 大 嘅 諗頭 㗎 就 話 ：
細佬 ，皇上 吩咐過 ，蘇克薩哈 嘅 家產 呢 ，畀 鰲拜 霸佔 去咗 嘅 要 清查 出嚟 ，還翻 畀 蘇克薩哈 嘅 子孫 啊 。
我哋 就 求其 攞 六七萬 兩 銀 出嚟 ，去 賞 畀 蘇家 ，呢啲 係 皇上 嘅 恩典 ，蘇家 只有 感激 涕零 仲 邊 敢 爭 多 嫌 少 吖 係咪 ？
再講 ，如果 畀 蘇家 嘅 銀 多過 頭 ，反而 顯得 蘇克薩哈 生前 係 個 贓官 ，噉 佢 個 子孫 都 唔 光彩 係咪 吖 ？
韋小寶 話 ： 係 ， 係 。 個心 諗 ：
你 同 我 都 唔係 清官 啩 ，亦 唔見得 有 咩 嘢 唔光彩 啊 。
索額圖 又 話 ：皇太后 同 皇上 指明 要 呢 兩 部 佛經 ，係 頭等 大事 ，我哋 而家 就 送去 先 ，鰲拜 嘅 財產 慢慢 清點 都 唔遲 嘅 。
韋小寶 岌頭 話 冇 錯 冇 錯 。
索額圖 於是 攞咗 兩塊 錦緞 ，將 兩個 玉盒 包好咗 ，兩個人 一人 捧 一個 ，就 返去 皇宮 見 康熙 。
康熙 見 佢哋 辦妥咗 太后 交帶 嘅 事情 ，好 歡喜 ，就 叫 韋小寶 捧住 跟 喺 後 便 ，親自 送去 太后 宮中 。
索額圖 唔能夠 入宮 啊 ，告退 之後 ，又 去 清理 鰲拜 嘅 家產 嘞 。
康熙 一路 行 一路 問 ：鰲拜 呢個 傢伙 ，屋企 有 幾多 財產 啊 ？
韋小寶 話 ：索大人 初步 查點 ，佢 話 ，總共有 一百三十五萬三千四百一十八 兩 銀 喎 。
佢 將 呢個 數字 啊 ，講成 係 索額 圖 點出嚟 嘅 。
將來 萬一 畀 皇帝 查明 真相 ，佢 又 有 個 推諉 抵賴 嘅 餘地 吖 嘛 。
呢種噉樣嘅營私舞弊 、偷雞摸狗嘅勾當 ，韋小寶 算得係 天賦奇才 咯 。
喺 佢 五歲 嗰 一年 啊 ，有 個 妓女 畀 五文 過 佢 ，叫 佢 出街 買 幾個 桃 。
佢 扣起 一 文錢 買 糖 食咗 ，用 四 文錢 買咗 幾個 桃 ，交畀 嗰個 妓女 。
哈 ，嗰個 妓女 居然 冇 發覺 ，仲 打賞 咗 個 桃 畀 佢 添 。
喺 韋小寶 睇嚟 啊 ，銀錢 過手 而 撈 啲 油水 ，本來 係 天經地義 嘅 事 。
只不過 如果 畀 人哋 查到 嘞 ，一定 要 有 啲 理由 嚟到 賴下 嘅 。
呢啲 乃係 佢 個 頭殼 畀 人哋 鑿過 唔少 次 ，屁股 畀 人 踢過 無數 腳 ，因此 得嚟 嘅 寶貴 經驗 啊 。
康熙 哼咗 一 聲 話 ：真係 混賬 ！刮咗 咁多 民脂民膏 ，一百 三十 幾 萬 兩 ，嘿嘿 ，真係 厲害 啊 。
韋小寶 個 心 偷笑 嘞 ：仲有 個 一字 啊 ，已經 二 一 添作 五 喇 。
講講下 ，已經 嚟到 太后 嘅 慈寧宮 嘞 。
太后 聽講 兩部 經書 都 已經 攞到 嘞 ，非常之 歡喜 。
康熙 將 兩個 玉盒 交畀 佢 。
佢 打開嚟 一睇 ，見到 書套 之後 笑容滿面 噉 話 ：
小桂子 ，你 辦事 真係 能幹 到 極咯 。
韋小寶 跪低 請安 佢 話 ：都係 托賴 太后 同 皇上 嘅 洪福 。
太后 對 身邊 一個 小宮女 話 ：蕊初 ，你 帶 小桂子 去 後便房 ，攞 啲 蜜餞 糖果 賞 畀 佢 食 啦 。
嗰個 叫做 蕊初 嘅 小宮女 約莫 十三四歲 ，容貌 秀麗 ，微微 笑 應咗 聲 ：係 。
韋小寶 又 請安 話 ：謝太后 賞 ，謝皇上 賞 。
康熙話 ：小桂子 ，你 食完 糖果 就 自己 返去 啦 ，我 喺 呢處 陪 太后 食飯 ，唔使 你 伺候 喇 。
韋小寶 應咗 ，就 跟 蕊初 行 入去 內堂 ，嚟到 一個 小小 嘅 廂房 。
蕊初 打開 一個 紗櫥 ，紗櫥 裏 便 ，有 幾十 種 糕餅 糖果 嘅 。
蕊初 笑住 話 ：你 叫做 小桂子 ，噉 就 食 啲 桂花松子糖 先 啦 。
講完 ，就 攞咗 盒 松子糖 出嚟 ，松子 香 同埋 桂花 香 撈埋 一齊 聞起嚟 極之 舒服 。
韋小寶 笑住 話 ：姐姐 你 亦 食啲 啦 。
太后 賞畀 你 食 嘅 ，又 冇 賞畀 我 食 ，我哋 做 奴才 嘅 點 能夠 偷食 呢 ？
靜靜 食啲 又 冇 人 睇見 ，有 咩 緊要 喎 。
蕊初 塊面 紅 一紅 ，擰擰頭 微微 笑話 ：我 唔食 。
噉 我 一個人 食 ，你 企 喺 旁邊 睇 都 唔 似樣 嘅 。
呢啲 係 你 嘅 福氣 吖 嘛 ，我 係 服侍 太后 嘅 ，連 皇上 都 唔 服侍 ，今日 走嚟 服侍 你 食 糖果 糕餅 喎 。
韋小寶 見 佢 笑得 好好樣 ，亦 笑住 話 ：
我係 服侍 皇上 嘅 ，亦 嚟 服侍 你 食 啲 糖果糕餅 ，噉 啊 兩家 都 唔 蝕底 喇 。
蕊 初 咭 噉 笑 起 上 嚟 ， 跟 住 伸手 揞 住 自己 嘅 嘴 ， 微微 笑話 ：
快啲食啦 ，太后 如果 知道 我 同 你 喺 處 講笑 啊 ，就 會 嬲 㗎 喇 。
嗱 各位 ，欲知 後事 如何 ，且 聽 下回 。
