前 文 再續 啊 書 接上 一回 啊 。
話說 黃宗羲 喺 船上 ，將 查伊璜 同 吳六奇 嘅 關係 講咗 畀 呂留良 聽 。
然後 話 ：一定 係 吳將軍 出面 幫 查伊璜 講情 ，所以 喺 明書輯略 呢件案 裏 便 得以 免難 啦 。
呂留良話 ：黃兄 噉 講 好啱 。
不過 唔知 陸圻 同 范骧 兩個 ，因 咩事 亦都 同 伊璜 先生 一樣 ，話 係 未見 其 書 就 免罪 不究 呢嚱 ？
唔通 佢 兩個 亦 得到 朝上 有勢力 嘅 人物 幫 佢哋 疏通 ？
黃宗羲 話 ：吳將軍 同 伊璜 先生 疏通 ，如果 只係 提 一個 人 ，就 怕 會 引起 疑心 ，噉 拉 多 兩個 人 嚟 陪襯 一下 亦 未可知 嘅 。
呂留良 笑住 話 ：哈哈 照噉講 ，陸范 兩個人 怕 直到 而家 ，都 仲 唔知 呢條命 係 點樣 執返嚟 㗎 。
顧炎武岌一岌頭話 ：江南 名士 能夠 多 保全 一位 ，就 保留 多 一份 元氣 。
佢哋 三個人 所 講 嘅 嘢 ，乃係 當世 最 隱秘 嘅 事情 嘞 。
當時 佢哋 ，係 坐船 喺 運河 行緊 。
後艙嗰度 只有 呂氏 母子 三個人 ，黃宗羲 又係 壓低 把聲 嚟 講嘅 ，噉 當然 唔會 怕 畀 人哋 偷聽 。
船 呢 亦 冇 墻 嘅 ，又 唔 使 怕 隔 墻 有 耳 嘞 。
點知 顧炎武 一句話 啱啱 講完 ，忽然間 聽見 頭殼 頂 一聲 怪笑 ，三個人 大吃一驚 ，一齊 喝話 ：邊個 啊 ？
咦 ？又 一啲 動靜 都 冇 嘞噃 。
三個人 互相 望下 都 諗 ：唔通 真係 有 鬼怪 嘅 ？
三個人之中 ，顧炎武 啊 最大膽 ，佢 亦 學過 一啲 粗淺 嘅 防身 武藝 。
佢 定 一定神 ，喺 身邊 攞出 一把 匕首 ，推開 艙門 行 上 船頭 定眼 睇 下 船篷 頂 。
突然間 喺 船篷 飆起 一條 黑影 直 撲落嚟 。
顧炎武 喝聲 ：邊個 ！
舉起 匕首 向 嗰條 黑影 刺過去 ，只覺得 手腕 一痛 ，已經 畀 人 捉住 嘞 ，跟住 後心 一陣 酸麻 ，已經 畀 人哋 點中 咗 穴道 。
匕首 跌咗 ，自己 又 畀 人哋 推咗 入去 船艙 裏 便 。
黃宗羲 同 呂留良 見到 顧炎武 畀 人哋 推 咗 入嚟 ，後 便 企住 一 個 黑衣 大漢 ，個 心 都 好 驚 。
見 嗰個 大漢 身材 魁梧 面目 猙獰 ，呂留良 話 ：
閣下 夜麻麻 擅自 闖入嚟 ，係 乜嘢 用意 啊 ？
嗰個人 冷笑話 ：嘿嘿 ，多謝 你哋 三個 關照 老子 升官 發財 喇 。
吳六奇 要 作反 ，查伊璜 要 作反 ，鰲少保 知道咗 呢個 秘密 ，仲 唔 重重 有 賞 咩 ？
嘿嘿 ，三位 就 跟 我 去 北京 做個 見證 啦 。
呂 、顧 、黃 三個人 驚 ，都 好 悔恨 ：
唉 ， 我 哋 深夜 喺 船 處 靜靜 講 嘢 ， 仲 係 畀 佢 聽見 咗 ， 我 ， 我 哋 做事 魯莽 死不足惜 啊 。
噉樣 一嚟 就 累咗 吳將軍 ，就 搞壞咗 大事 啦 。
呂留良話 ：閣下 講 咩 啊 我哋 一啲 都 唔明 。
你 要 誣陷 好人 ，你 即管 自己 去 做 ，想 拉埋 人哋 噉 就 唔得 。
佢 已經 決心 同 呢 個 大漢 搏過 ， 如果 畀 大漢 殺 咗 ， 噉 就 死無對證 。
嗰個 大漢 冷笑 一 聲 ，突然間 上前 ，喺 呂留良 同 黃宗羲 心口 各 點 一 點 ，呂 黃 兩個 當堂 唔 逳得 嘞 。
嗰個 大漢 哈哈大笑話 ：哈哈哈哈 ，各位 兄弟 ，入嚟 船艙 啦 ，呢一次 我哋 前鋒營 立咗 大功 喇 。
只聽見 船尾 有 幾個 人 應咗 一聲 ，噉 跟住 有 四個 人 行入嚟 嘞 ，都係 船家 打扮 ，一齊 哈哈大笑 。
顧 、黃 、呂 三個人 互相 望咗 一眼 冇 出聲 ，知道 前鋒營 啊 ，係 皇帝 嘅 親兵 。
唔知點解 呢 幾個人 竟然 會 一早就 跟實 自己 ，扮成 船夫 ，一直 喺 船蓬 外 便 偷聽 。
黃宗羲 同 呂留良 就 唔好 講 啦 ，顧炎武 呢 十幾年 嚟 ，行勻 全 中國 ，到處 結識 英雄 豪傑 ，眼光 都 可謂 不弱 嘞 ，對 呢 幾 名 船夫 ，竟然 冇 留意 。
只聽見 一名 親兵 話 ：
船家 ，掉轉 船頭 ，返去 杭州 ，有 咩 嘢 古怪 因住 你 條 狗命 吓 。
船尾 嗰個 掌舵 個 艄公 就 應咗 一聲 話 ：哦 。
掌舵嘅艄公 係 個 六七十歲 嘅 老人家 ，顧炎武 請船 嘅 時候 曾經 同 佢 傾過 偈 。
呢個 艄公 滿面 皺紋 ，蝦公 噉 嘅 腰 ，確係 長年累月 搖櫓 拉縴 嘅 樣 ，噉 當時 見咗 一啲 都 冇 懷疑 。
冇想到 呢個 老艄公 雖然 係 貨真價實 啊 ，但係 佢 手下 嘅 船夫 冚𠾴 唥 換轉 晒 ，噉 梗係 喺 啲 親兵 威逼 之下 就 無可奈何 。
怪就怪 自己 一味 顧住 同 黃 、呂 兩個人 高談闊論 ，陷入 咗 危險 都 唔 知道 。
嗰個 黑衣 大漢 笑住 話 ：
顧先生 、 黃先生 、 呂先生 ， 你 哋 三位 名頭 真大 啊 ， 吓 ， 連 京城 啲 大人物 都 知道 咯 ， 否則 我 哋 亦 唔 會 𥄫 實你 哋 啦 ， 哈哈哈 哈哈哈 。
佢 轉頭 對 四名 下屬 話 ：
我哋 得到 廣東 吳 提督 謀反 嘅 真憑實據 ，而家 就 要 趕快 去 海寧 將 嗰個 姓 查 嘅 捉埋 。
呢 三個 反賊 好 硬頸 㗎 ，走 就 走唔甩 嘅 ，不過 要 因住 佢哋 服毒 跳河 。
你哋 一個 盯 一個 ，有 咩嘢 唔掂 就 不得了 啊吓 。
嗰 四個人 話 ：係 ，謹遵 瓜管帶 吩咐 。
瓜 管帶 話 ： 回京 之後 見到 鰲 少保 ， 人人 都 有 得 升官發財 啊 。
一名 親官 笑住 話 ：嘿 ，都係 瓜管 帶 提拔 栽培 ，淨係 指意 我哋 四個 ，邊度 有 噉 嘅 福份 吖 ？
船頭 忽然間 有 個人 笑咗 一聲 話 ：
指意 你哋 四個人 ，確實 係 冇 噉 嘅 福份 。
說話 一 完 ，船艙 門 呼 一 聲 ，向 兩便 飛開 。
只見 一個 三十零歲 嘅 書生 ，出現 喺 艙口 ，佢 背住 雙手 微微 噉 笑 。
瓜管帶 喝佢 話 ：官老爺 喺 處 辦案 ，你 係 邊個 ？
嗰個 書生 微微笑 唔 回答 ，就 行 入嚟 船艙 。
兩個 親兵 舉起 單刀 對住 佢 劈過去 。
嗰個 書生 閃身 避開 ，跟住 逼近 瓜管帶 ，就 揮掌 向 佢 頭頂 拍落去 。
瓜管帶 連忙 伸出 左臂 嚟到 擋格 ，右手 一拳 就 猛力 擊出 。
嗰個 書生 ，左腳 反踢 ，就 踢中 一名 親兵 嘅 心口 。
嗰個 親兵 大叫 一 聲 ，當堂 狂噴 鮮血 。
另外 三名 親兵 ，舉刀 又 斬 又 劈 。
船艙 裏 便 地方 就 好 狹窄 嘅 ，嗰個 書生 施展 擒拿 功夫 ，劈擊 勾打 ，啪 一聲 響 ，一名 親兵 啊 畀 佢 用 掌 劈 斷 咗 頸骨 。
瓜管 帶 右掌 拍出 ，打 嗰個 書生 後腦 。
嗰個 書生 反過 左 掌 ，啪 一 聲 ，兩 掌 相交 ，瓜管 帶 成個 向後 𢴈 。
背脊 撞落 船艙 ， 啪 一聲 ， 船艙 當堂 塌 咗 一片 。
嗰個 書生 連 出 兩 掌 ，拍落 剩返 嗰 兩 個 親兵 嘅 心口 ，兩 個 人 肋骨 都 斷晒 。
瓜管 帶 飛身 喺 船艙 缺口 裏 便 跳 出去 ，嗰個 書生 喝 一 聲 ：你 仲 想 走 ！
左掌 急拍 瓜管 帶 背 枚 。
點知 瓜管 帶 正喺 呢個 時候 左腳 反踢 ，噉 呢一掌 呢 就 啱啱 打正 佢 腳板底 ，一股 掌力 ，反而 將 佢 推住 向前 飛出去 。
瓜管 帶 個人 喺 半空中 ，見到 岸邊 有 一樖 柳枝 ，啲 柳枝 係 垂到 落 河 嘅 ，就 即刻 揦住 柳枝 ，一個 倒翻 關斗 ，就 喺 柳樹 頂 飛咗 過去 。
嗰個 書生 走到 去 船頭 攞起 枝 竹篙 ，拂聲 擲 出去 。
只 聽見 瓜 管帶 ， 吖 一聲 慘叫 ， 竹篙 已經 插入 佢 後 心 ， 將 佢 釘住 喺 地下 ， 枝 竹篙 啊 ， 仲 不停 噉 擺擺 下 啊 。
嗰個 書生 行返 入 船艙 ，解開 顧 、黃 、呂 三個 人 嘅 穴道 ，將 四 名 親兵 嘅 死屍 ，拋咗 落 運河 ，然後 點返 着 蠟燭 。
顧 、黃 、呂 三個人 多謝 嗰個 書生 一番 ，就 請問 佢 嘅 姓名 。
嗰個 書生 笑笑口 話 ：
在下個 名 ，啱先 承蒙 黃 先生 提及 ，在下 姓 陳 ，草字 近 南 。
嘩 ！原來 佢 就係 天地會 總舵主 。
嗱 各位 ，顧亭林 、黃宗羲 、呂留良 三個人 ，已經 脫險 ，噉 我 就 放落 唔講 。
鹿鼎記 呢一篇 故事 嘅 主角 ，係 喺 揚州 出世 嘅 ，呢 佢 就 快 出場 㗎 喇 ，而家 我 就 講 下 揚州 。
話說揚州城啊 自古以來 都係 繁華嘅 地方 ，唐朝 大詩人 杜牧 有過 兩句 詩 ：
十年 一覺 揚州 夢 ，贏得 青樓 薄幸 名 。
古人 又 話 人生 樂事 ，就 莫過於 腰纏 十萬貫 啊 騎 鶴 下 揚州 。
自從 隋煬帝 開鑿 運河 ，揚州 嘅 地點 喺 正 運河 嘅 中間 ，乃係 ，江蘇 、浙江 漕運 必經 之 地 。
明朝 清朝 嘅 時候 ，鹽商 富戶 好多 都 住 喺 揚州 嚟 嘅 ，所以 揚州 就 殷富 甲 於 天下 。
清朝 康熙 初年 ，揚州 瘦西湖 畔 嘅 鳴玉坊 ，乃係 青樓 名妓 匯聚 嘅 場所 。
呢一日 ，正係 暮春 天氣 。
華燈初上 ，鳴玉坊 各家 妓院 裏 便 呀 ，傳出嚟 一片 音樂 同 歡笑 嘅 聲音 。
中間 ，又 夾住 啲 猜枚 行令 、唱曲 鬧酒 嘅 聲音 ，真係 笙歌 處處 ，一片 升平 景象 。
突然之間 ，坊南坊北 同時 有 五六個人 齊聲 大喝 ：
各家 院子 做生意 嘅 朋友 、 各位 姑娘 、 各位 嚟 玩 嘅 朋友 ， 大家 聽住 ：
我哋 嚟 搵 一個 人 ，同 旁人 冇 關係 ，邊個 都 唔准 亂叫 亂逳 。
唔聽話嘅 就 唔好怪 我哋 唔客氣 喇 ！
喝完 之後 ，鳴玉坊 當堂 靜咗 一陣間 。
跟住 各家 院子 就 喴嘩 鬼震 ，啲 女子 驚叫聲 啦 ，男子 叫喊聲 啦 亂晒 大龍 啊 。
當其時 麗春院 裏 便 正在 大排筵席 。
十幾名 大鹽商 就 開咗 三圍枱 ，每個人 身邊 呢 都有 一名 妓女 坐響處 陪飲 嘅 。
一聽到 呢個 叫喊聲 ，人人 都 變晒 面色 。
你 又 問 ：誒 咩嘢事 啊 ？
佢 又 問 ：吓 ，邊個 啊 吓 ？
嗰個 又 問 ：係咪 官府 查案 啊 ？
突然間 ，外便 有人 好似 擂鼓 噉 猛 咁 拍門 。
龜奴 嚇到 驚晒 ，都 唔知 應唔應該 去 開門 。
過咗一陣間 ，嘭一聲 ，大門 撞開 ，湧咗 十七八名 大漢 入嚟 。
呢啲 大漢 都係 一身 短打 ，白布 包頭 青帶 纏腰 ；
手上 揸住 擸擸亮 嘅 鋼刀 ，一係 就 鐵尺 鐵棍 。
班鹽商 一見 呢 ，就 認出 呢班人 係 賣 私鹽 嘅 鹽梟 。
當時 鹽稅 就 極重 ，如果 偷漏 鹽稅 販賣 私鹽 ，利錢 都 幾 可觀 嘅 。
揚州 一帶 呢 係 江北 淮鹽 嘅 集散地 ，一般 亡命之徒 就 成群結隊 ，去 販賣 私鹽 。
呢啲 鹽梟 極之 兇悍 ，遇到 大隊 官兵 嘅 時候 就 一哄而散 ；
你 話 撞到 小隊 官兵 呢 ，一言不合 ，攞出 兵刃 就 同 官兵 打過 。
所以 官府 往往 隻眼 開 隻眼 閉 就 唔 敢 幹涉 嘅 。
班鹽商 知道 啲 鹽梟 向來 只係 販賣 私鹽 ，就 並冇 搶劫 行商 或 做 其他 壞事 ；
平時 同 啲 老百姓 買 鹽 賣 鹽 亦 公平 誠實 ，並 冇 恃勢 蝦 人 。
今日 啲 鹽梟 忽然間 咁 兇狼 霸道 撞入嚟 鳴玉坊 ，都 覺得 又 驚 又 奇怪 。
班鹽梟 當中 有 一個 五十零歲 嘅 老人 話 ：
各位 朋友 ，打攪 晒嘞 ，唔好 怪 ，在下 賠禮 。
講完 ，抱拳 由 左 到 右 ，又 由 右 至 左 噉 拱 一拱手 ，跟住 大聲 話 ：
天地會 姓 賈 嘅 朋友 ，賈老六 賈老兄 喺 唔 喺 呢處 啊 ？
一便 講 ，一便 雙眼 就 對住 班 鹽商 逐個 噉 望過去 。
班 鹽商 聽 佢 噉 講 個 心 亦 定 返 啲 ：
哦 ，佢哋 江湖 上 幫會 之間 尋仇 啫 ，同 旁人 唔 相幹 。
嗰個 鹽梟 老人 就 提高 把聲 噉 叫 ：
賈老六 ，今日 下午 ，你 喺 瘦西湖 間 酒館 裏 便 亂噏 無為 。
講咩嘢 鹽州 賣 私鹽 啲 人 冇 種 ，唔敢 殺官 作反 ，就 識得 走私 漏稅 ，做 啲 冇 膽 嘅 小生意 。
你 飲飽咗 貓尿 ，大嘈大叫 ，話 揚州 賣 私鹽 嘅 如果 唔服 ，即管 嚟 鳴玉坊 搵 你 。
嗱 ，我 而家 嚟咗 喇 。
賈老六 ，你 係 天地會 嘅 好漢 ，點解 做咗 縮頭烏龜 啊 你 ？
其餘 嗰 十幾 名 鹽梟 跟住 大聲 叫 ：
天地會 嘅 好漢 啊 ， 乜 你 做 咗 縮頭烏龜 啊 ？
喂 ，你哋 到底 係 天地會 定係 縮頭會 啊 喂 ？
嗰個 老人 話 ：係 賈老六 一個人 亂噏 無為 啫 ，唔好 牽扯 埋 天地會 其他 啲 好朋友 。
我哋 賣 私鹽 嘅 ，本來 只係 搵 一啖 飯仔 食下 ，點及得上 天地會 啲 英雄好漢 吖 ？但係 縮頭烏龜 我哋 係 唔 做 嘅 。
等咗 好耐 下 喇 ，始終 聽唔見 嗰個 天地會 嘅 賈老六 應聲 。
嗰個 老人 話 ：去 各間 房 睇下 ，見到 嗰個 姓 賈 嘅 縮頭 老兄 ，就 將 佢 請 出嚟 。
呢個人 塊面 上面 有 個 大刀𤶸 嘅 ，好 容易 認 嘅啫 。
班 鹽梟 冚噉 大聲 應咗 ，就 逐間 逐間 房 咁 去 搜查 。
忽然間 ，東便廂房 裏 便 有 個人 話 ：
喂 ！ 老子 喺 處 快活 緊 啊 ， 邊個 大呼小叫 喺 處 嘈 生 晒 啊 ？
班鹽梟 就 紛紛 大叫 ：賈老六 喺 呢處 啊 ！
賈老六 你 快啲 躝出嚟 ！
豈有此理 呢個 狗賊 真 大膽 ！
東廂房 嗰個 人 哈哈大笑 話 ：
老子 唔係 姓 賈 ，不過 你哋 呢班 嘢 亂 咁 鬧 天地會 ，老子 聽起上嚟 唔 順耳 。
老子 唔係 天地會 嘅 ，不過 知道 天地會 嘅 朋友 ，個個 都 係 英雄 好漢 。
你哋 呢班 私鹽佬 ，幫 佢哋 挽鞋 抹 屁股 都 唔 配 ！
班 鹽梟 激到 嘩嘩 大叫 。
三個 大漢 手執 鋼刀 ，向住 東廂房 撲入去 咯噃 。
跟住 聽見 哎喲哎喲 噉 幾聲 大叫 ，三個人 一個 跟住 一個 ，噼噼啪啪 打到 飛咗 出嚟 ，𢴈 咗 喺 地下 。
一名 大漢 自己 揸住 嗰把 鋼刀 反撞 自己 額頭 ，鮮血 惦流 啊 當堂 暈咗 。
跟住 又 有 六名 鹽梟 先先後後 ，衝入去 房間 ，只 聽見 喴喴嘩嘩 幾聲 呼叫 ，嗰 六個 人 呀 一個個 都 畀 人 𢴈咗 出嚟 。
噉呢啲人呢仲喺度猛咁鬧 ，但係 已經 冇人 敢 再 衝入去 房 嘞 。
嗰個 老人 行 前 幾 步 ，裝 下 裏 便 。
朦朦朦朦 見到 有 一名 虬髯大漢 坐 喺 床 上 ，頭上 啊 包住 白布 ，塊面 冇 刀疤 ，果然 唔係 賈老六 。
嗰個 老人 大聲 問 ：閣下 真係 好 身手 ，請問 尊姓 大名 啊 ？
房裏 便 嗰 個人 鬧 佢 嘞 ： 你老 豆姓 乜嘢 叫 乜嘢 ， 老子 當然 係 姓 乜嘢 叫 乜嘢 啦 。
死僆仔吖 ，連 你 阿爺 嘅 姓名 都 唔 記得 咗 喇 ？
當其時 有 一班 妓女 企 喺 旁邊 睇 ，突然間 有 個 三十零歲 嘅 中年 妓女 ，桀 一聲 笑起嚟 。
有個 鹽梟 衝 上 一步 ，啪啪 兩 巴 刮 佢 ，刮到 嗰個 妓女 眼淚 鼻涕 一齊 流啊 。
嗰個 鹽梟 鬧 佢 話 ：死得 你 吖 臭老舉 有 咩 好笑 啊 ？
嗰個 妓女 嚇到 唔敢 出聲 。
忽然之間 喺 大堂 旁邊 ，有 個 十二三歲 嘅 男仔 鑽 出嚟 大聲 噉 鬧 ：哎呀 你 敢 打 我 阿媽 ？
你呢個死龜公 ，爛龜公 ，你一出門就着雷劈 ，你手板啊即刻生個大毒瘡 ，爛到你手板穿窿 ，爛到你條脷流膿 ，吞晒啲膿落肚 ，揦到你腸穿肚爛啊 。
嗰個 鹽梟 發起 火嚟 ，伸手 去 捉 嗰個 細路 。
嗰個 細路 一閃 ，就 匿 喺 個 鹽商 後便 。
嗰個 鹽梟 左手 將 個 鹽商 一 推 ，就 將 佢 推到 𢴈咗 一 交 。
右手 一拳 ，就 對住 嗰個 細路 背脊 出力 噉 𢱕落去 。
嘩 ，嗰個 中年 妓女 驚啊 ，大聲 叫 ：大爺 饒命 啊 ！
點知 個 細路 非常之 靈活 嘅 ，個 身 一縮 ，就 喺 嗰個 鹽梟褲 浪 下 便 鑽過去 。
伸手 一揸 ，就 揸正 佢 個 要害 仲 出力 咁 捻 ，痛到 嗰個 大漢 啊 呱呱聲 怪叫 。
而 嗰個 細路 呢 ，就 已經 走咗 咯 。
嗰個 鹽梟 又 冇 埞 出氣 啦 ，啪噉 一拳 ，打正 嗰個 中年 妓女 塊 面 ，打到 嗰個 妓女 當堂 暈咗 。
嗰個 細路 就 撲埋去 妓女 身上 ，大聲 叫 ：媽 ，阿媽 ！
嗰個 鹽梟 揦住 個 細路 後領 ，將 佢 成個 扚起 身嚟 ，正話 想 一拳 打過去 。
嗰個 老人 喝住 佢 話 ：咪 亂嚟 啊 ，放低 個 細路哥 ！
嗰個 鹽梟 又 放低 個 細路 ，喺 佢 囉柚 上面 踢咗 一 腳 ，將 佢 踢到 碌 幾 個 關斗 ，啪 一 聲 撞埋 埲墻 處 。
嗰個 老人 碌 咗 個 鹽梟 一眼 ，又 對 住房 門 話 ：
我哋 係 青幫 兄弟 ，因為 天地會 一位 姓 賈 嘅 朋友 ，公然 辱罵 青幫 ，又 話 喺 鳴玉坊 等 我哋 嚟 講道理 ，因此 嚟到 搵人 啫 。
閣下 既然 唔係 天地會 嘅 ，又 同 敝 幫 河水 不犯 井水 ，點解 要 出口 傷人 啊 ？
請閣下留低姓名 ，日後 幫主 佢哋 查問 起嚟 ，在下 都有個交待 啊 。
房裏 便 嗰個人 笑住 話 ：你哋 要 搵 天地會 嘅 朋友 算賬 ，噉 關 我 咩嘢 事 啊 ？
我 有 我喺 呢處 風流快活 ，大家 既然 河水不犯井水 ，噉 就 唔好 嚟 掃 老子 嘅 興 。
不過 我 就 勸 老兄 一句 ，天地會 啲 人 老兄 係 惹唔起 嘅 。
畀 人哋 鬧 咗 咪 就 鬧 咗 咯 ，仲 啞 咩 嘢 吖 你 ？
不如 挾起 條 尾 ，乖乖 返去 賣 私鹽 賺錢 罷 啦 。
嗰個 老人 發火 喇 ：江湖 上 都 未 見過 好似 你 噉樣 咁 唔 講道理 嘅 人 嘅 。
房裏 便 嗰個人 冷冰冰 話 ：我 講唔講道理 ，關 你 乜嘢事 啊 ？
莫非 你 想 招郎 入 舍 ，想 叫 我 做 姐夫 啊 ？
就喺呢個時候 ，喺 門口 外 便 有 三個 人 靜雞雞 縮咗 入嚟 ，都係 私鹽 販子 嘅 打扮 。
一個 手執 鏈子槍 嘅 瘦佬 低聲 問 ：
點子 係 咩嘢 來頭 吖 ？
所謂 點子 係 江湖 黑話 ，即係 對象 噉解 。
嗰 老人 擰擰頭 話 ：
佢 唔肯 講 ，但係 口口聲聲 猛咁 捧 天地會 ，講唔定 嗰個 姓 賈 嘅 就 匿埋 喺 佢 房 啊 。
嗰個 瘦佬 一擺 鏈子槍 ，個頭 向 房間 一擺 ，個 老人 喺 腰間 攞出 兩把 尺 零 長 嘅 短劍 。
突然之間 ，四個人 一齊 衝咗 入去 房 。
只聽見 房裏 便 ，兵刃 接觸 嘅 聲音 乒乒乓乓 。
麗春院 啊 乃 係 鳴玉坊 四大 妓院 之一 ， 每個 房間 嘅 陳設 都 極之 講究 嘅 ， 梨木 枱 椅 ， 紅木 大床 。
嘩 ，裏 便 哩哩嘞嘞 啲 聲 啊 ，瘟 咁 響 ，顯然 係 房 裏 便 嘅 傢私 ，一 件件 都 打爛 喇 。
嗰啲 龜婆 面上 嗰啲 肥肉 猛咁 震 ，個 口 一味 唸 阿彌陀佛 ，心痛到 不得了 。
嗰 四 名 衝入 房 嘅 鹽梟 不斷 咁 大聲 呼喝 ，房裏 便 嗰 個 客人 呢 ，卻 係 一 聲 唔出 。
廳堂 嗰啲 人 都 企 到 遠遠 啊 ，怕 畀 打交 嗰啲 人 一下 失手 打過嚟 唔得掂 。
只聽見 兵刃 碰撞 嘅 聲音 越嚟越快 ，忽然間 ，有人 啊噉 大聲 慘叫 ，諗住 實係 有 一名 鹽梟 頭目 受咗 傷 。
嗰個 踢咗 個 細路 一 腳 嘅 大漢 ，而家 佢 個 要害 地方 仲 痛得 好 犀利 。
見 嗰 個 細路 喺 牆邊 躝 返 起身 ， 嬲 起 上 嚟 衝上去 揮拳 又 打 。
嗰個 細路 打 側 個 身 閃 佢 ，嗰個 大漢 反手 一 巴 ，刮到 嗰個 細路 轉咗 兩個 圈 。
嗰班 龜奴 、鹽商 見到 嗰個 鹽梟 咁 兇狼 ，再 打落去 呀 勢必要 將 嗰個 細路 夾生 打死 ，但係 邊個 都 唔 敢 出 句 聲 嚟 勸下 。
只見 嗰個 大漢 舉起 右拳 ，對住 細路 頭頂 𢱕落去 ，哎呀 ！
嗱 各位 ，欲知 後事 如何 ，且 聽 下回 分解 。
