話 説 喺 清朝 嘅 康熙 初年 ，冬天 嘅 某 一日 ，北風 如 刀 ，滿地 冰霜 啊 。
喺 江南 靠近 海邊 一 條 大路 之上 ，有 一隊 清兵 ，手執 刀槍 ，押住 七 架 囚車 ，向 住 北方 行緊 。
前 便 嗰 三架 囚車 啊 ，每架 就 韞 住 一個 男子 ，都 係 書生 打扮 。
一個 係 白髮 老人 ，兩個 係 中年人 。
後 便 嗰 四架 裏 便 坐 嘅 呢 係 女子 。
最 收尾 嗰 架 囚車 裏 便 係 個 少婦 ，仲 抱住 個 蘇蝦 女 添 。
嗰 個 蘇蝦 女 ，啞啞 啞 噉 猛 咁 喊 。
無論 佢 母親 點樣 呵 佢 氹 佢 ， 佢 仲 係 唔 肯 收聲 。
囚車 旁邊 有名 清兵 煩 喇 ， 一腳 踢 落 架車 處 大聲 噉 話 ： 你仲喊 ， 仲喊 ， 老子 踢死 你 ！
個 蘇蝦 女 一 驚 就 喊 得 更 大聲 。
離開 條路 幾 啊 丈 嘅 地方 就 有 一座 大屋 ，有個 中年 嘅 讀書人 同 一個 十一二歲 嘅 細 佬 哥 企 喺 屋檐下 便 。
嗰 個 讀書人 見到 噉 嘅 情景 ，不禁 長 歎 一 聲 ，眼 都 紅 咗 佢 話 ：
唉 ，可憐 ，可憐 啊 ！
嗰 細 佬 哥 就 問 嘞 ：阿爹 ，佢 哋 犯 咗 咩 嘢 罪唧 ？
嗰 個 讀書人 話 ：唉 ，犯 咩 嘢 罪 吖 ？
尋日同 今朝 早 ， 已經 拉 咗 三十幾 人去 咯 ， 都 係 我 哋 浙江 有名 嘅 讀書人 ， 個個 啊 都 係 ， 都 係 無辜 株連 㗎 。
佢 講到 無辜 株連 四個 字 聲音 壓 得 好 低 ，慌怕 畀 押送 囚車 啲 官兵 聽見 。
個 細佬哥 話 ：嗰 個 蘇蝦 女 仲 喺 度 食緊 奶 嘅 ，唔通 佢 都 有 罪 咩 ？真 冇 道理 喇 。
你 懂得 官兵 冇 道理 真 係 乖仔 嘞 。
唉 ，人為 刀俎 我 為 魚肉 ，人 為 鼎鑊 ，我 為 麋鹿 啊 。
阿爹 ，你 前幾日 教過 我 ，人為 刀俎 我 為 魚肉 ，就 係 畀 人 哋 ，斬割 屠殺 嘅 意思 喇 。
人 哋 係 切菜刀 、 係 砧板 ， 我 哋 就 係 魚 同 肉 。
人為 鼎 鑊 ， 我 為 麋鹿 呢 兩句 説 話 意思 都 差 唔 多 嘅 係 唔 係 ？
冇 錯 ，冇 錯 。
讀書人 見到 官兵 同埋 囚車 已經 去 遠 咗 ，就 拖住 細佬 哥 隻 手 話 ：
外面 咁 大風 ，我 哋 返 入屋 啦 。
於是 兩 父子 行 返 入去 書房 。
個 讀書人 攞 起 筆 ，舔 咗 墨 ，喺 張 紙 上面 寫 咗 個 鹿字 ，佢 話 ：
鹿 呢種 野獸 呢 ，雖然 係 咁 大隻 ， 但 係 性情 就 極之 和平 ；
只 係 食 青草 、樹葉 就 從來 唔 傷害 第 啲 野獸 嘅 。
兇猛 嘅 野獸 要 打 佢 、 食 佢 ， 佢 就 只有 逃跑 嘅 啫 。
如果 逃跑 唔 了 ，就 只有 畀 人 哋 食 咗 咯 。
噉 佢 又 寫 咗 逐鹿 兩個 字 ， 逐就 係 追逐 嘅 逐 喇 。
佢 話 ：因此 古人 時時 都 搦 鹿 ，嚟 到 比喻 天下 嘅 。
世上 嘅 百姓 ，都 係 温順 善良 。
第二樣 啊 冇 份 ，畀 人 哋 蝦 、畀 人 哋 殘害 就 有 份 。
漢書 上面 話 ：秦 失 其 鹿 ，天下 共 逐 之 。
噉 即係 話 ，秦朝 失 咗 天下 ，群雄 並起 噉 啊 大家 搶奪 。
最 收尾 漢高祖 打敗 咗 楚霸王 ， 就 得到 呢 一隻 又 肥 又 大 嘅 鹿喇 。
個 細佬 哥 岌一 岌 頭 話 ： 我 明白 喇 我 明白 喇 。
小 説 書 上面 話 ：逐鹿中原 ，就 係 大家 爭住 要 做 皇帝 嘅 意思 。
個 讀書人 非常 之 歡喜 ，岌一岌頭 。
噉 又 喺 張 紙 上面 畫 咗 一隻 鼎 嘅 圖形 佢 話 ：
古人 煮 嘢 食 呢 就 唔 用 灶 窟 同埋 鑊 嘅 ，呢 就 係 用 一隻 噉 樣 嘅 三隻 腳 嘅 鼎 ，喺 下 便 燒柴 。
噉 捉 咗 鹿 嘞 ，就 喺 鼎 裏 便 煮 嚟 食 。
皇帝 同埋 大官 啊 都 好 殘忍 㗎 。
個 心裏 便 唔 鐘意 邊個 ，就 話 佢 犯 咗 罪 ，將 佢 放 喺 個 鼎 裏 便 夾 生 煮熟 。
史記 裏 便 記載 藺相如 對 秦王 話 ：臣 知 欺 大王 之 罪 當 誅 也 ，臣 請 就 鼎 鑊 。
噉 即 係 話 ，誒 我 該死 喇 ，將 我 放 喺 鼎 裏 便 熠 死 我 啦 噉 。
個 細佬哥 話 ：
小 説 書 上面 又 時時 話 ，問鼎 中原 ，噉 樣 同 逐鹿 中原 好似 意思 都 差唔多 嘅 係 咪 啊 ？
冇 錯 ，夏禹 王 ，收集 九州 嘅 金 ，就 鑄 咗 九 隻 大鼎 。
噉 當時 嘅 所謂 金 呢 ，其實 係 銅 嚟 嘅 啫 。
噉 每 一隻 鼎 上 便 呢 鑄 咗 九州 嘅 名 同埋 山村 圖形 。
噉 後世 做 天下 之 主 嘅 呢 ，就 佔有 呢 九 隻 鼎 。
左傳 上面 話 ： 楚子 觀兵 於 周疆 ， 定王 使 王孫 滿勞楚子 ， 楚子 問鼎 之 大小 輕重 焉 噉 。
因為 ，只有 天下 之 主 啊 ，先至 能夠 佔有 九鼎 。
楚子 呢 ，佢 不過 係 楚國 嘅 諸侯 。
噉 佢 問鼎 嘅 輕重 大小 ，就 係 心存 不軌 ，想 取 周王 之 位 而 代之 嘞 。
我 明喇 ，所以 問鼎 、逐鹿 ，就 係 想 做 皇帝 。
未知 鹿 死 誰 手 呢 ，即係話 ，唔知 邊個 做得成 皇帝 。
啱 。
到 咗 收尾 ，問鼎 同 逐鹿 呢 幾個 字 呢 ，亦 可以 借用 喺 第二處 嘅 ，但 係 原來 嘅 出典 係 專門 指 做 皇帝 而言 。
唉 ，我哋 做 老百姓 嘅 總 係 死路 一 條 。
未知 鹿 死 誰 手 ， 只不過 係 未知 邊個 嚟 到 殺死 呢 隻 鹿 。
至於 呢 隻 鹿 ，係 死 梗 㗎 咯 。
個 讀書人 一便 講 一便 行 到 窗邊 望 出去 ，只見 天色 陰陰沉沉 好似 要 落 雪 嘞 。
唉 ，天公 老爺 都 太過 忍心 嘞 。
幾百個 無辜 嘅 人 一路 噉 行 ，已經 冷得 夠 淒涼 㗎 啦 ，落起 雪 嚟 ，又 要 受 多 一番 折磨 咯 。
忽然間 見到 南便 大路 上 ，有 兩個 人 戴住 斗笠 一拍 噉 嚟 緊 。
行近 喇 ，認出 佢 哋 嘅 樣 。
嗰 讀書人 好 歡喜 話 ：係 你 黃 伯伯 、顧 伯伯 嚟 喇 。
佢 快步 出去 迎接 話 ：梨洲 兄 、亭林 兄 ，乜嘢 風吹 得 你 哋 兩位 光臨 啊 ？
右手 便 嗰 個人 係 肥肥 地 ，一把 黑 鬚 ，姓 黃 名 宗羲 ，字 梨洲 ，係 浙江 餘姚 人氏 。
行 左手 便 嗰 個人 呢 又 高 又 瘦 ，面色 好 黑 嘅 ，姓 顧 名 炎武 ，字 亭林 ，係 江蘇 昆山 人氏 。
黃宗羲 、顧亭林 兩個 都 係 當世 嘅 大儒 。
所謂 大儒 用 而家 嘅 説 話 嚟 講 呢 即係 ，高級 知識分子 嘞 。
明朝 亡 咗 之後 ，佢 喺 家鄉 隱居 ，唔 肯 出 嚟 做官 。
呢 一日 就 約 埋 一齊 嚟 到 崇德 縣 。
顧炎武 行 前 幾 步 ，佢 話 ：
晚村 兄 ，有 件 緊要 事 特登 嚟 同 你 商量 啊 。
呢 個 讀書人 ，姓 呂 ，名 留良 ，號 晚川 。
噉 啊 世居 浙江 杭州 府 崇德 縣 ，亦 都 係 明末 清初 一位 極之 有名 嘅 隱逸 。
佢 見到 黃 顧 兩個 人 面色 嚴肅 ，又 知道 顧炎武 向來 都 係 隨機應變 能力 極強 ，臨事 鎮定 嘅 。
既然 話 係 有 緊要 事 嘞 ，自 不然 係 非同小可 ，佢 就 話 ：
兩位 請 入去 飲返 三杯 解 下 寒氣 先 講 啦 。
噉 啊 請 兩個 人 入屋 ，吩咐 嗰 個 細佬哥 話 ：
葆 中 ，去 同 阿媽 講 ，話 黃 伯伯 、顧 伯伯 到 喇 ，先 切 兩 碟 羊膏 嚟 送 酒 啦 。
過 咗 冇 幾耐 ，嗰 個 細佬哥 呂葆中 同埋 佢 細佬 毅中 ，攞 咗 酒杯 、筷子 嚟 ，噉 就 喺 書房 擺好 枱 。
一名 老 僕人 就 奉上 酒菜 嘞 。
呂留良 等 佢 哋 三個 人 出返 去 之後 ，閂 咗 書房 門 佢 話 ：
黃 兄 、 顧兄 ， 先 飲 三杯 。
黃宗羲 就 神情 淒慘 佢 擰 擰頭 。
顧炎武 呢 就 自斟自飲 ，一口氣 飲 咗 六杯 。
呂留良 話 ：兩位 今日 嚟 係 咪 同 明史 呢 一 案 有關 啊 ？
黃宗羲 話 ：係 啊 。
顧炎武 攞 起 酒杯 ，高聲 吟誦 ：
清風 雖 細 難 吹 我 ，明月 何嘗 都 不 照 人 。
晚村 兄 ，你 呢 兩句 詩 真 係 絕唱 啊 。
我 每逢 飲酒 ， 必定 吟誦 佢 嘅 ， 必定 飲勝 嘅 。
呂留良 懷念 明朝 ，唔 肯 喺 清朝 做官 。
當地 啲 大官 仰慕 佢 嘅 聲名 ，就 保薦 佢 做 山林隱逸 ，就 應征 上去 朝廷 做 官 。
呂留良 就 誓死 拒絕 ，啲 大官 就 唔 敢 再 逼 佢 嘞 。
收尾 又 有 一名 大官 保薦 佢 做 博學 鴻儒 。
呂留良 見到 如果 再 拒絕 呢 ，顯然 係 藐視 朝廷 就 不免 有 殺身之禍 嘅 ，於是 就 削髮 為 僧 ，做 咗 個 假 和尚 。
地方 官員 見到 佢 咁 堅決 唄 ，從此 呢 就 冇 再 勸 佢 出山 嘞 。
清風明月 呢 兩句 詩 ，意思 係 諷刺 清廷 ，就 懷念 明朝 。
雖然 就 唔 敢 公開 印出嚟 啊 ，但係 喺 志同道合 嘅 朋友 之間 呢 已經 傳開 晒 ，而家 顧炎武 又 讀 咗 出嚟 。
黃宗羲 話 ： 真 係 好 詩 ！舉起 酒杯 亦 飲 咗 一 杯 。
呂留良 話 ：唉 兩位 謬讚 咯 。
顧炎武 抬起 頭 ，見到 牆壁 上面 掛住 一幅 大約 係 五尺 高 、丈幾 闊 嘅 大畫 ，畫 嘅 係 一 大片 山水 。
筆勢 縱橫 ，氣象 雄偉 ，就 不禁 喝 咗 聲 彩 。
喺 幅畫 上 便 呢 只 係 題 咗 四個 大字 ：如此 江山 。
顧炎武 話 ：睇 呢 啲 筆路 實 係 二瞻 先生 嘅 丹青 咯 。
呂留良 話 ：冇 錯 冇 錯 。
二瞻 啊 ，係 姓 查 名士 標 ，係 明末 清初 嘅 一位 大 畫家 。
佢 同 顧 、黃 、呂 三個 人 呢 都 係 好 朋友 。
黃宗羲 話 ：咁 好 嘅 畫 點解 冇 題跋 呢 ？
呂留良 歎 一口氣 話 ：唉 ，二瞻 先生 呢 幅 畫 頗 有 深意 。
只係 佢 為人 穩重 謹慎 ，就 既 冇 落款 亦 冇 題跋 。
佢 上個月 嚟 到 舍下 ，一時 興到 就 畫 咗 嚟 送 畀 我 ，不如 兩位 就 題返 幾句 呢 。
顧 、黃 兩個 人 企 起身 嚟 行到 畫 前面 仔細 噉 觀賞 。
只見 大江 浩浩 東流 ，兩岸 峰巒 無數 ，點綴 住 奇樹 怪石 。
只不過 喺 畫上 便 呢 雲氣 瀰漫 ，山川 雖然 係 美麗 啊 ，卻 係 令人 一見 呢 就 有 一種 抑鬱 嘅 感覺 。
顧炎武 話 ：如此 江山 ，淪 於 夷狄 。
我輩 忍氣吞聲 ，偷生 其間 ，實在 令人 悲憤 填膺 。
晚村 兄 點解 唔 題詩 一首 ，將 二瞻 先生 嘅 意思 表而出 之 呢 ？
呂留良 話 ：好 ！
即刻 就 攞 咗 幅 畫 落 嚟 ，鋪 喺 枱 上面 。
黃宗羲 就 磨好 墨 。
呂留良 揸 起 支筆 沉吟 咗 一陣 ，就 喺 畫 上面 喳喳 聲 寫落 去 ，好快 就 寫成 喇 。
首詩 係 噉 嘅 ：
其 為 宋 之 南渡 耶 ？如此 江山 真 可 恥 。
其 為 崖山 以 後 耶 ？如此 江山 不 忍 視 。
吾 今 始 悟 作畫 意 ，痛哭流涕 有 若 是 。
以 今 視 昔 昔 猶 今 ，吞聲 不用 枚 銜 嘴 。
畫 將 皋 羽 西 台 淚 ，研 入 丹青 提 筆 泚 。
所以 有 畫 無 詩文 ，詩文 盡 在 四字 裏 。
嘗謂 生逢 洪武 初 ，如 瞽 忽 瞳 跛 可 履 。
山川 開霽 故 璧 完 ，何處 登臨 不 狂喜 ？
佢 寫 完 掉 咗 支筆 喺 地 ，不禁 流 起 眼淚 。
顧炎武 話 ：痛快淋漓 ， 真 係 絕妙好辭 啊 ！
呂留良 話 ：呢 首詩 殊 不 含蓄 ，唔 算得 係 好 喇 ，亦 只 係 將 二瞻 先生 嘅 原意 寫咗 出 嚟 ，等 睇 畫 嘅 人 知 就 係 喇 。
黃宗羲 話 ：幾時 故國 重光 ，嗰 陣 時 山川 開霽 故 璧 完 ，縱然 係 窮山惡水 啊 ，亦都 令人 觀之 大暢 胸懷 ，真 所謂 何處 登臨 不 狂喜 咯 。
顧炎武 話 ：呢 首詩 ，結得 甚妙 啊 ！
終 有 一日 ，驅除 胡虜 ，還 我 大漢 山河 。
呢啲 正 係 抒發 悲憤 就 更加 令 人 氣壯 。
黃宗羲 慢慢 將 幅 畫 卷起 嚟 佢 話 ：
呢 幅畫 係 唔 掛得 㗎 喇 ，晚村 兄 要 妥為 收藏 先至 得 。
你 話 如果 畀 吳之榮 之類 嘅 奸人 見到 ，官府 查究 起 嚟 ，晚村 兄 固之然 係 麻煩 啦 ，仲 連累 埋 二瞻 先生 啊 。
顧炎武 啪 聲 拍 枱 話 ：
吳之榮 呢 個 狗賊 ，我 真 係 恨不得 生食 其 肉 啊 。
呂留良 話 ：兩位 今日 嚟 話 係 有 件 緊要 事 嘅 。
我 哋 書生 積習 ，掛住 作詩 題畫 ，都 放低 咗 正經事 添 ，唔知 究竟 係 咩 嘢 事 呢 ？
黃宗羲 話 ：我 兩個 人 今日 嚟 ，乃 係 為 咗 二瞻 先生 嗰 位 本家 伊璜 先生 。
小弟 同埋 顧兄 前日 得到 消息 ，原來 呢場 明史 大案 ，竟然 將 伊璜 先生 都 牽連 在內 啊 。
呂留良 吃 咗 一驚 話 ：吓 ？乜 伊璜 兄 都 受 咗 牽連 啊 ？
黃宗羲 話 ：係 ，係啊 。
我 兩個 人 前 晚 喇喇聲 趕到 去 海寧 袁花鎮 。
伊璜 先生 就 唔 喺 屋企 ，話 係 出 咗 外 ，探訪 朋友 喇 噉 。
炎武兄 見到 事情 緊急 ，就 囑咐 伊璜 先生 啲 家人 漏夜 躲避 。
想起 伊璜 先生 同 晚 村兄 係 好友 ，所以 就 即刻 嚟 睇 下 啦 。
呂留良 話 ：佢 ，佢 冇 嚟 噃 ，唔 知 去 咗 邊處 呢 ？
顧炎武 話 ：佢 如果 喺 府上 ，而家 佢 自己 就 會 出 嚟 見面 啦 。
我 已經 喺 佢 書房 嘅 牆壁 上面 題 詩 一首 ，噉 佢 如果 返到 屋企 自不然 會 明白 ，就 識得 躲避 㗎 喇 。
怕 嘅 就 係 佢 不知 信息 ，喺 外 便 露面 就 畀 差人 捉住 噉 就 弊 喇 。
黃宗羲 話 ：明史 呢 一 案 ，令到 我 哋 浙西 名士 幾乎 盡遭 毒手 ，清廷 嘅 意思 係 極之 惡毒 嘅 。
晚村 兄 名聲 太 大 ，亭林 兄 同 小弟 嘅 意思 ，就 想 勸 晚村 兄 暫時 離家 遠遊 ，避 一避 風頭 啊 。
呂留良 好 氣憤 噉 話 ：
清廷 皇帝 如果 將 我 捉 到 去 北京 ，拼住 千刀萬剮 ，點都 要 痛罵 佢 一場 ，出 咗 呢 一口氣 先至 痛痛快快 死 啊 。
顧炎武 話 ：晚村 兄 豪氣 幹 雲 ，令人 非常 欽佩 。
就係 怕 都 未 見到 清廷 皇帝 ，就 死於 一般 下賤 嘅 奴才 手上 啫 。
仲有 ，清廷 皇帝 只 係 個 細佬哥 ，乜嘢 都 唔 懂 。
朝政 大權 冚𠾴 唥 操 於 權臣 鰲拜 之 手 。
兄弟 同 梨洲 兄 推想 ， 呢 次 明史 呢 一案 所以 如此 大張旗鼓 、 雷厲風行 ， 實 係 鰲拜 ， 想 挫折 我 哋 江南 讀書人 嘅 志氣 啊 。
呂留良 話 ：兩位 嘅 見解 好 啱 。
清兵 入關 以 嚟 ，喺 江北 橫行 無阻 ，一到 江南 唧 ，就 處處 遇到 反抗 。
尤其 是 讀書人 知道 華夷 之 別 ，不斷 噉 同 佢 哋 搗蛋 。
鰲拜 就 趁 呢 個 機會 ，要 對 我 哋 江南 士子 大加 鎮壓 。
哼哼 ，野火 燒 不盡 ，春風 吹 又 生 ，除非 佢 將 我哋 江南 讀書人 殺到 乾乾淨淨 啦 。
黃宗羲 話 ：冇 錯 喇 ，因此 我 哋 要 留 得 有用 之 身 ，同 清廷 周旋 到底 啊 。
如果 逞 咗 一時 血氣之勇 ，反而 係 中 咗 佢 哋 嘅 計 嘞 。
呂留良 當堂 醒悟 ，黃 、顧 兩個 人 大 冷天 時 嚟 到 探 自己 ，一來 ，固然 係 搵 查 伊璜 啦 ；
二來 係 勸 自己 出外 避難 ，就 慌怕 自己 一時 忍唔住 ，枉 送 咗 條命 。
好 朋友 嘅 苦心 確實 係 感激 ， 佢 話 ：
兩位 金石良言 ，兄弟 點 敢 話 唔 聽 呢 ？
聽朝 一早 ，兄弟 全家 就 出去 避一避 。
黃 、 顧 兩個 人 好 高興 都 話 ： 應該 噉 做 應該 噉 做 。
呂留良 就 沉吟 話 ：不過 唔 知 去 邊處 避 好 呢 ？
唉 ， 桃源 何處 都 可 避暴 秦 ， 桃源 何處 都 可 避暴 秦 呢 ？
顧炎武 話 ：當今 之 世 ，就算 真 係 有 桃源 樂土 ，我 哋 亦 唔 能夠 獨善其身 ，去 匿埋 嘅 。
呂留良 唔 等 佢 講完 ，就 大聲 話 ：亭林 兄 責備 得 啱 。
國家 興亡 匹夫 有 責 ，暫時 避禍 就 可以 ；
但 係 如果 去 匿 埋 喺 桃花源 裏 便 逍遙自在 ，由得 億萬 百姓 喺 清兵 鐵蹄 之下 受苦 就 於 心 何安 ？
兄弟 失言 喇 。
顧炎武 微微 笑話 ：兄弟 近年 浪跡 江湖 ，結交 咗 唔 少 朋友 。
大江南北 所見所聞 ，誒 不但 讀書人 反對 清廷 啊 ，而 販夫 走卒 、屠沽 市井 之中 亦 到處 有 熱血 滿腔 嘅 豪傑 。
晚村 兄 如果 係 有意 嘞 ，我 哋 三個 人 一齊 去 揚州 ，兄弟 幫 你 引見 幾位 同道中人 呢 好 嘛 ？
呂留良 好 高興 佢 話 ：妙極 妙極 ！我 哋 聽日 就 去 揚州 。
兩位 坐 一陣 ，兄弟 去 講 畀 拙荊 知 ，等 佢 執拾 一下 啦 。
講完 就 喇喇聲 入去 裏 便 ，冇 幾 耐 呂留良 返到 嚟 書房 ，佢 話 ：
明史 呢 件 案 ，外間 雖然 係 傳 説 紛紛 ， 但 係 一來 傳聞 係 未必 確實 ；
二來 講 説 話 嘅 人 呢 又 好多 顧忌 ，講 啲 又 唔 講 啲 。
兄弟 獨處 蝸居 ，唔 知 佢 嘅 詳細 情形 到底 係 點 嘅 呢 吓 。
顧炎武 歎 咗 口氣 佢 話 ：唉 ，呢 部 明史 ，我 哋 大家 都 有 睇 過 㗎 咯 ，噉 其中 對 清廷 不大 恭敬 噉 係 有 嘅 。
呢 本書 本來 係 出於 我 大明 朱國楨 相國 之手 ，就 講到 關外 建立 州衛 嘅 事 ，又 點 會 對 佢 哋 客氣 吖 ？
呂留良 岌一岌頭 話 ：
聽講 湖州 莊家 使 咗 幾千兩 銀 ，同 朱 相國 嘅 後人 買 咗 明史 嘅 原稿 ，用 自己 嘅 名 嚟 到 出書 刊行 。
啊 ，估唔到 竟然 搞成 呢場 大禍 。
各位 ，欲知 後事 如何 ，且 聽 下回 分解 。
