顧大嫂 扮咗 個 乞兒婆 ，跟埋 啲 走難 嘅 人 啊 ，就 混咗 入 城 ，到處 咁 打聽 。
佢 嚟到 衙門 前 便 ，打聽到 史進 呀 果然 係 韞 喺 監牢 裏 便 嚟 ，噉 先至 知道 ，軍師 吳用 確實 係 料事如神 喇 。
第日 ，顧大嫂 挽住 個 飯𨭌 ，就 喺 監獄 前 便 行嚟行去 ，喺度 等 機會 喇 。
過咗 一陣 ，見到 有 個 年老 嘅 差人 喺 監牢 裏 便 行出嚟 。
顧大嫂 就 對住 佢 跪低 就 叩頭 ，淚 如 雨 下 流到 叭叭聲 。
嗰個 年老 差人 就 問 喇 ：你 呢個 乞兒婆 喊 咩嘢 啊 ？
哎呀 ，大哥 ，監牢 裏 便 ，韞住 嗰個 史大郎 啊 ，係 我 舊時 嘅 主人 。
自從 離開咗 佢 屋企 ，已經 有 成 十 年 㗎 喇 。
我 只係 知道 佢 ，話 喺 江湖 上 做 生意 啫 ，唔知 為咗 咩 嘢 事 要 坐監 呢 而家 。
唉 眼 睇 住 冇 人 送飯 ， 我伯爺婆 ， 乞 咗 呢 幾 啖 飯 嚟 送 畀 佢 頂 下肚 餓 啊 。
大哥 啊 ， 可憐 下 ， 好心 帶 我入 去 啦 ， 好過 做 七層 寶塔 啊 。
嗯 ，佢 係 梁山泊 嘅 大賊 嚟噃 ，犯咗 死罪 啊 ，邊個 敢 帶 你 入去 啊 ？
大哥 ，就算 係 一刀一剮 ，噉 佢 係 自作自受 啦 。
唉求下 你 可憐 ，做下 好心 ，帶 我 個 伯爺 婆 入去 ，送 呢 幾啖 飯 ，等 我 報答 下 佢 舊日 之 情 啦 。
顧大嫂 講完 又 喴喴聲 咁 喊 。
嗰個 老差人 就 諗喇 ：
哼哼 ， 如果 係 個 男人 就 話 難 帶 佢 入 去 啫 ， 嗯 一個 女人 之家 有 咩 嘢 緊要 吖 ？
噉好啦 ，你 跟 我 嚟 啦 。
於是就 帶咗 顧大嫂 入去 監牢 裏便 。
顧大嫂 見到 史進 ，條 頸 帶住 個 重枷 ，條 腰 就 纏住 條 鐵索 ，鎖到 實一實 。
史進 一眼 見到 顧大嫂 誒 ，哎呀 ，乜 都 嚟咗 啊 ？
吃咗 一驚 ，之 又 唔敢 出聲 。
顧大嫂 一便 就 詐喊 ，一便 就 餵飯 畀 史進 食 。
有個 節級 就嚟 喝佢 喇 ：喂 ，呢個 係 問咗 死罪 嘅 犯人 嚟 噃 。
獄 不 通風 吖嘛 ，邊個 放 你 入嚟 送 飯 㗎 ！
快啲 行返 出去 快啲 出去 ，慳返 兩 棍 唔 打 你 就係 啦 。
顧大嫂 見 監牢 裏 便 人 多 ，好 難 講得 清楚 嘅 ，就 只係 講得 一句 説話 ：
月尾 嗰 晚 攻城 啊 ，你 喺 監牢 自己 掙扎 啦 。
史進 再 想 問 ，顧大嫂 已經 畀 啲 小節級 趕咗 出 牢門 喇 。
噉史進啊 ，只係 記住 月尾 嗰 晚 呢句 説話 。
呢個 係 三月 ，係 大月 。
到咗廿九 ，史進 聽見 兩個 節級 喺度 傾偈 ，有 一個 就 問 喇 ，今日 係 幾時 啊噉 。
嗰個 小節 級 啊 記錯咗 喎 ，佢 就 回答 話 喇 ：
今晚 又 月尾 咯 ，等陣 晏啲 買 沓元寶 嚟 燒 下 ，拜 下 啲 冤鬼 至 得 。
史進 聽咗 呢句 説話 ，嗨呀 ，恨不得 啊 馬上 天黑 。
到咗 夜晚 喇 ，有 個 小節級 飲 到 半醉 ，帶 史 進 去 廁所 ，史進 就 呃 佢 話 喇 ：誒 你 睇下 ，後便 係 邊個 ？
嗰個 小節級 就 唔係 擰轉頭 咯 ，史進 啪聲 拗爛 副 枷 ，對住 個 小節級 面門 一 枷㩧 過去 將 佢 打倒 喺 地下 嚟 。
順手啊執嚿磚頭 ，敲開咗手銬 ，佢 碌 大 雙眼 ，衝到 入去 辦公室 。
嗰幾個 差人 而家 都 飲醉咗酒 ，畀 史進 兜頭兜面 咁 打 ，死嘅死 啊 趯嘅趯 。
史進 拉開 道 牢門 ，就 一味 等 外便 嚟 救 佢 咯 。
同時 又 將牢 裏 便 所有 個 犯人 啊 冚𠾴唥 放 晒 ， 總共 有 五六十 人 ， 就 喺 監牢 裏 便 哦 嗬 噉 吶喊 起上 嚟 一齊 走 嘞 。
噉 有人 報畀 太守 知 呢 ，程萬里 呀 ，驚到 面如土色 ，連忙 搵 人 請 兵馬 都 監董 平 嚟 商量 。
董平 就 話 喇 ：城 裏 便 必定 有 奸細 ，要 派 多啲 人 ，包圍 咗 呢個 傢伙 至 得 。
我啊趁呢個機會 ，帶兵 出城 去 捉 宋江 。
請 相公 你 緊守 城池 ，派 幾十個 差人 圍定 個 牢門 ，唔好 畀 佢 走甩 。
跟住 董平 就 上馬 ，點起 啲 兵卒 就 去咗 咯 。
程太守 就 點齊 所有 嘅 節級 、虞候 、押番 ，人人 都 揸住 槍棒 就 去 大牢 前 便 圍實 大聲 咁 吶喊 。
史進 喺 監牢 裏 便 又 唔敢 輕舉妄動 啊 唔敢 出嚟 噃 ，之外 便 嘅 人 呢 又 唔敢 入去 。
顧大嫂 就 唯有 叫苦 咯 呢趟 。
而家 又 講 下 董平 啊 佢 點 起兵馬 ，喺 四更 嘅 時候 呢 ，就 殺 奔 宋江 嘅 營寨 。
偵察軍情嘅兵卒仔 ，就嚟 報告 宋江 聽 啦 。
宋江 就 話喇 ：唉 ，必定 係 顧 大嫂 喺 城 裏 便 又 吃虧 。
好 啦 ， 佢 既然 殺 嚟 ， 我 哋 準備 迎敵 。
號令 一下 ，就 各路 軍馬 都 出動 。
當時 個 天 啱啱 光 ，正好 遇 正董平 嘅 兵馬 ，噉 兩便 都 擺開 陣勢 。
原來 董平 個人 啊 ，心靈 機巧 ，三教九流 就 無所不通 ，吹簫 彈琴 就 無有 不會 嘅 ；
所以 山東 、河北 啊 ，都 稱 佢 做 風流 雙槍 將 。
宋江 喺 陣前 ，見咗 董平 啊 一表人才 十分鐘意 。
又見到佢 個 箭壺 裏 便 插住 一面 旗仔 ，上面 寫住 一副 對聯 ：英雄 雙槍 將 ，風流 萬戶侯 。
當時 宋江 就 派 韓滔 出馬 迎敵 。
韓滔 手執 鐵搠 ，直取 董平 啊 。
董平 嗰 對 鐵槍 啊 舞 到 神出鬼沒 ，韓滔 唔係 佢 手腳 。
於是 宋江 呢 就 再 叫 金槍手 徐寧 ，去 替 韓滔 返嚟 。
徐寧 飛馬 而出 啊 ，挺起 鉤鐮槍 接住 董平 廝殺 。
兩個人 喺 戰場 上面 鬥 到 五十個 回合 ，不分 勝敗 。
打咗咁耐喇 ，宋江 就 怕 徐寧 頂唔住 ，就 命令 鳴金 收兵 。
徐寧勒 轉馬頭 ，就 返陣 嘞噃 ，哈 ，你 收兵 我 唔肯 收兵噃 ，董平 舉起 雙槍 啊 一直 追殺 過去 。
宋江 用 條 馬鞭 一揮 ，四面 嘅 兵卒 一齊 上嚟 圍住 。
宋江 就 拍馬 跑 上 高坡 嗰處 嚟到 督戰 ，只見 董平 啊 圍 喺 陣內 。
佢 如果 向 東 便 呢 ，宋江 就 將 號旗 向 東 指 ，啲 兵馬 就 向 東 便 嚟 圍 佢 ；
佢 如果 向 西 便 呢 ，號 旗 就 向 西 指 ，噉 啲 兵馬 就 向 西 便 嚟 圍 佢 。
董平 喺 陣 裏 便 橫衝直撞 ，舞住 兩支 槍 一直 殺到 申時 之後 ，就 衝開 條 血路 ，殺 返 出去 。
宋江 呢 亦 唔 去 追 佢 。
噉董平 見 打唔贏 唄 ，當晚 就 收兵 回城 。
宋江 就 漏夜 起兵 ，一直 逼到 城 腳底 沊沊𡃈噉 圍住 。
喺 呢個 時候 ，顧大嫂 仲 喺 城 裏 便 嚟 㗎 佢 就 唔 敢 放火 ，史進 又 唔 出得 嚟 ，兩 便 都 喺 度 頂住 。
呢 ，而家 有 件事 啊 要 講下 先 ，原來 程太守 有 個 女 ，生得 十分之 靚 。
董平 又 仲 未 有 老婆 ，曾經 好多 次 啊 都 派 人 去 求親 ，程 太守 都 冇 應承 。
因此 呢 ， 佢 哋 兩個 平時 都 係 有 啲 言 和 意 不 和 嘅 。
當晚 ，董平 帶兵 入城 之後 ，佢 又 派 個 心腹 家人 ，乘機 嚟 問 呢頭 親事 。
程太守 就 回答 佢 話 喇 ：誒 我 係 個 文官 ，佢 係 武官 ，噉 招 佢 做 女婿 呢 ，嘿嘿 本來 係 好啱 嘅 ；
只不過 而家 賊寇 臨 城 ，事在 危急 噃 ，如果 喺 呢個 時候 吓 ，哈哈 ，談婚論嫁 ，就 會 畀 人 恥笑 㗎 喇 。
誒 等到 將來 退咗 賊兵 ，城池 無事 咯 ，到 其時 再嚟 議親 都 亦 未為 晚 啦 吓 。
噉嗰個人 就 將 呢句 説話 回覆 畀 董平 。
董平 雖然 個口 啊 都 話 係 ，係 ，講得 啱 講得啱 。
但係 個 心 呢 就 唔係 點 歡喜 ，佢 就係 怕 程太守 日後 唔肯 啊 。
噉呢頭呢 ，宋江 就 漏夜 攻城 非常之 猛烈 ，程太守 啊 催 董平 出去 應戰 。
董平嬲 ，披掛上馬 ，帶領 三軍 啊 出城 交戰 。
宋江 喺 陣前 對 董平 話 ：諒 你 單槍匹馬 ，寡將 一名 ，點 敵得過 我 吖 ？
古人 都有 話 啦嘛 ：大廈 將 傾 非 一木 可 支 啊 。
你睇 ，我 手下 雄兵 十萬 ，猛將 千員 ，替天行道 ，濟困扶危 ，快啲 投降 免 你 一死 啦 。
董平 發火 咯 ，佢 大喝 一 聲 話 ：哼 ！紋面 小吏 ，該死 狂徒 ，大膽 亂講 ！
講完 ，佢 舉起 雙槍 直撲 宋江 。
宋江 呢 便 呢 ，左 有 林沖 ，右 有 花榮 ，兩個 一齊 出馬 嚟 戰 董平 嘞 。
大約 鬥咗 幾個 回合 ，兩個人 拍馬 就 走噃 。
宋江 嘅 兵馬 就 詐諦 打輸 ，趯到 散晒 。
董平 以為 得法 喇 呢趟 ，立功 機會 到喇 ，就 拍馬 去 追 。
宋江 佢 哋 一路 就 退到 壽春 縣界 ， 宋江 喺 前 便 走 ， 董平後便 追 。
離城 大概 有 十零里 啦 ，就嚟到 一個 村鎮 ，兩便 都 係 草屋 ，中間 係 一條 馬路 。
董平 就 唔 知道 佢 係 計 啊 ，就 一味 拍 衡馬 搏命 咁 追 。
宋江 使 咩嘢 計 呢 ？係 噉 嘅 ：
宋江 因為 見到 董平 咁 厲害 ，隔晚 呢 ，就 已經 命令 王矮虎 、一丈青 、張青 、孫二娘 佢哋 四個人 ，帶住 百幾 兵 ，先不先 就 喺 草屋 兩便 埋伏 好 ；
擺咗 幾條 絆馬索 喺 路上 ，又 用 薄薄 一層 泥 冚 返住 ，就 等到 董平 嚟 嘅 時候 呢 ，以 打鑼 為 號 ，就 將 啲 絆馬索 一齊 拉起 ，準備 捉 董平 嘅 。
好喇 ，董平 正 係 追追下 ，就嚟到 嗰處 咯 喎 ，聽見 背後 孔明 、孔亮 大聲 嗌話 ：勿 傷 吾主 ！
係呢個時候 ，佢啱啱就 追到 草屋 前便 ，嗙咁一聲 鑼響 ，兩便 嘅 門扇 一齊 打開 就 拉起 啲 繩索 。
嗰只馬啱啱 想 返轉頭 ，哈 ，背後 嘅 絆馬索 又 一齊 拉起 ，就 將 隻馬 𠽤倒 ，董平 就 成個 𢴈咗 喺 地 嚟 。
左便 撞出 一丈青 、王矮虎 ，右便 就 撞出 張青 、孫二娘 一齊 湧上嚟 ，將 董平 捉住 。
將佢嘅頭盔 、衣甲 、雙槍 、馬匹 冚𠾴 唥繳晒 ，就 用 條 麻繩 啊 捩轉手 綁實 佢 。
兩個 女將 啊 手執 鋼刀 ，押住 董平 嚟 見 宋江 喇 。
宋江 先前 就 跑過咗 嗰迾 草屋 ，就 勒住 馬 ，企定 喺 樖楊樹 下 便 ，就 等到 呢 兩個 女頭領 解 董平 過嚟 。
宋江 一見到 就 喝 嗰 兩個 女將 話 喇 ：唉 ，我 叫 你哋 去 請 董將軍 ，邊個 叫 你哋 綁 佢 嚟 㗎 ！
兩個 女將 即刻 耷 低頭 ： 係 ， 係 。 噉 就 退下 。
宋江 慌忙 落馬 ， 親自 嚟 同 董平 解開 繩索 ， 除 咗 自己 嘅 護 甲 錦袍 ， 畀 董平 着 返 ， 然後 就 跪 低 就 拜 。
董平 慌忙 答禮 。
宋江話 ：如果 得到 將軍 不棄 微賤 ，就 請 將軍 你 做 山寨 之 主 。
唉 ， 小將 乃 係 被 擒 之 人 ， 萬死猶輕 啊 。
如果 得到 收容 做個 小卒 ，實為 萬幸 啊 。
敝寨地 連 水泊 ，素來 都 冇 出嚟 擾害 地方 。
而家 因為 缺少 糧食 ，所以 先至 嚟 東平府 借 糧 ，並 冇 其他 意思 嘅 。
董平 又 話 ：程萬里 嗰個 傢伙 ，本來 係 童貫 門下 嘅 教書 先生 ，得到 呢個 肥缺 點 會話 唔 害 百姓 㗎 ？
如果 兄長 肯 畀 我 返去 ， 噉 小將 一定 騙開 城門 ， 殺入 去 城裏 便 ， 奪取 錢糧 作為 報效 。
宋江 非常 之 歡喜 ， 就 叫 啲 小 嘍 啰 ， 將 啲 盔甲 、 槍馬 還返 畀 董平 。
董平 就 披掛上馬 ，佢 在前 就 宋江 兵馬 在 後 ，捲起 晒啲 旗幟 一齊 嚟到 東平城 下 。
董平 行 喺 前 便 勒住 馬 ，大聲 叫話 ：上面 快啲 打開 城門 ！
守門嘅 軍士 用 火把 一 照下 ，認得 係 董都監 ，即刻 就 大開 城門 放 落 吊橋 咯噃 。
董平 一拍 隻 馬 搶先 衝入去 ，斬斷 咗 鐵鎖 ；
背後 宋江 嘅 兵馬 就 長驅直進 喇 ，殺入 城裏 便 。
一入咗城 ，宋江 即刻 傳令 ，唔准 殺害 百姓 ，唔准 放火 燒 人房屋 。
董平 一直 去到 程太守 嘅 住宅 ，殺咗 程太守 一家 嘅 人口 就 搶咗 佢 個 女 。
宋江 首先 呢 ，就 叫人 打開 監牢 ，救咗 史進 出嚟 ；
跟住呢就 打開 府庫 ，攞晒 啲 金銀財帛 ，又 打開 糧倉 ，將 啲 糧食 啊 裝晒 上 車 ，派 人 護送 返去 梁山泊 先 。
噉史進 自己 呢 ，就 帶 人 去 李瑞蘭 屋企 啊 ，將 嗰個 老虔婆 一門 大小 ，碎尸萬段 。
宋江 呢 又 將 太守 屋企 嘅 家財 啊 ，分晒 畀 啲 居民 。
同時 沿街 宣佈 ，講畀 啲 百姓 聽 ，話 嗰個 害民 州官 已經 殺咗 喇 ，你哋 啲 良民 百姓 就 各 安生理 啦噉 。
宣佈完之後 就 全部人馬 撤出 東平府 ，一齊 返去 安山鎮 。
宋江正 話 想 凱旋 返去 梁山泊 ， 點知 白日 鼠白勝 啊 ， 飛奔 嚟 到 報告 畀 宋江聽 ， 佢 話 ：
係大哥 ，盧俊義 去 打 東昌府 ，連氣 輸咗 兩陣 啊 。
城裏 便 有 個 猛將 ，姓 張 名 清 ，係 彰德府 人 ，虎騎 出身 ；
最叻就係 飛石 打人 啊 真係 百發百中 ，人人 都 叫佢 做 沒羽箭 嘅 。
佢 手下 有 兩 員 副將 ：
一個 就 叫做 花項虎龔旺 ，佢 周身 都 刺住 虎斑 ，條 頸 處 呀 仲 套住 個 老虎 頭 添 嘅 ，喺 馬 上 會 使 飛槍 ；
另外一個呢就叫做 中箭虎丁得孫 ，塊面 同埋 條頸處 呢 都有啲 𤶸嘅 ，喺 馬上 會 使 飛叉 。
噉盧員外 就 帶兵 去到 啦 ，一連 十日 佢哋 都 唔出嚟 打 。
到咗前日 ，張清 就 出城 嚟 交鋒 喇 。
我 哋 呢 便 呢 ， 就 派 郝思文 出馬 迎敵 啦 。
打咗冇幾個回合 ，張清啊 走嘞噃 。
郝思文 咪 追上去 咯 ，就 畀 佢 喺 額角 上面 打咗 粒 石仔 ，跌咗 落 馬 ；
好彩 燕青 啊 ，一箭 射中 張清 隻 戰馬 。
因此啊救返郝思文條命咋 ，之噉就輸咗一陣啦 。
第日 ，混世魔王 樊瑞 ，就 帶埋 項充 、李袞 ，舞起 團牌 去 迎戰 喇 。
點知 畀 丁得孫 呀 ，喺 胳肋 底下 便 ，瀡聲 摽出 個 標叉 ，打正 項 充 ，因此 又 輸 咗 一陣 。
而家 ，佢哋 兩個人 喺 船裏 便 養病 啊 ，軍師 特意 叫 小弟 嚟 請 大哥 ，快啲 去 幫手 啊 。
宋江 聽見 噉 講 就 歎咗 一啖氣 話 ：唉 ，盧俊義 真係 冇 緣分 喇 。
我 特登 分派 吳學究 同 公孫勝 去 幫 佢 㗎喇 ，就係 想 佢 馬到成功 ，等 佢 做 山寨 之主 ，點知 又 遇到 敵手 。
唉 ，既然 係 噉樣 ，我哋 各位 兄弟 一齊 帶兵 去 幫手 啦 。
於是 即刻 傳令 出發 。
一直 去到 東昌府 ，就 同 盧俊義 嘅 大軍 啊 會合 喇 。
呢一日 ，宋江 正 話 同 盧俊義 商量緊 ，啲 小嘍啰 就 嚟 報告 話 沒羽箭 張清 嚟 挑戰 啊噉 。
宋江啊 率領住 大家 ，喺 平川曠野 ，擺開 陣勢 。
大小頭領 一齊 上馬 ，跟隨 宋江 啊 嚟到 門旗 之下 。
咚咚咚咚咚咚咚咚咚咚咚咚咚 ，咚咚咚咚咚咚咚咚咚 ，咚咚咚咚咚咚咚咚咚 ，三通鼓 打完 。
張清 啊 騎住 戰馬 ，來回 咁 跑 啊 沙塵 滾滾 。
喺 門 旗下 便 啊 ，左便 閃出 嗰個 花項虎 龔旺 ，右便 就 閃出 呢個 中箭虎 丁得孫 。
三 騎馬 嚟 到 陣前 ， 張清用 手指 住 宋江 大 罵 佢 話 ：
哼 ，水窪草賊 ，願 決 一戰 啊 ！
宋江 就 問 喇 ：邊個 敢 去 戰 張清 啊 ？
只見 陣內 有 一位 英雄 ，憤怒 躍馬 就 舞起 鉤鐮槍 出到 陣前 。
宋江 一 睇 ，原來 係 金槍手 徐寧 。
宋江 個心 暗暗 歡喜 ： 嗯 ， 佢 正 係 對手 啊 。
呢陣時 徐寧 飛馬 直取 張清 。
兩馬 雙交 雙槍 並舉 。
鬥咗唔到 五個 回合 ，張清 就 走 ，徐寧 去 追 。
張清 用 左手 揸住 長槍 ，右手 喺 錦袋 裏 便 摸出 粒 石仔 ，一 扭轉身 ，對準 徐寧 面門 啪噉 就 一塊 石仔 打過去 。
打正 徐寧 嘅 眉心 ，哎呀 ，徐寧 當堂 翻身 落馬 。
龔旺 、丁得孫 就 想 嚟 捉 人 嘞 喎 。
好在 宋江 陣上 人多 ，呂方 、郭盛 ，兩 騎馬 兩 支 戟 ，飛跑 出嚟 救咗 佢 返去 。
宋江 佢哋 都 大驚失色 啊 ，佢 再 問 喇 ：邊個 頭領 接住 去 廝殺 啊 ？
宋江 話口 未完 ，喺 佢 馬 後 ，有 一 員 大將 飛奔 而 出 ，睇下 ，原來 係 錦毛虎 燕順 。
宋江 本來 想 攔佢 嘅 ，但係 佢 騎住 馬 ，𡃈𡃈聲 已經 飛跑 出去 。
燕順 接住 張清 ，鬥 咗 幾個 回合 ，招架 唔住 就 撥轉 馬頭 就 走 。
張清啊 跟住 尾 ，搏命咁 追 ，攞住 塊 石仔 ，對住 燕順 嘅 背 枚 一掟 ，打正 鐵甲 後便 嘅 護心鏡 上 便 ，咣 一聲 ，打到 燕順 呀 ，伏住 喺 馬鞍 急急 走人 。
喺 宋江 陣上 有 個人 大聲 嗌話 ：我 唔怕 佢 ！
拍馬 提 搠 啊 飛 出陣 去 。
宋江 一 睇 下 ，原來 係 百勝 將 韓滔 。
佢 一 出到 陣 ，半句話 都 唔 講 啊 就 打 張 清 。
兩馬 互相 一 衝埋去 ，喎嗬 ，噉 兩便 人馬 齊聲 吶喊 助威 。
韓滔 要 喺 宋江 面前 ，顯 下 自己 嘅 本事 ，就 抖擻 精神 啊 大戰 張清 。
打咗唔到十個回合 ，張清 又 走 。
韓滔 估計 佢 會 飛石 打嚟 嘅 就 冇 去 追 佢 。
張清擰轉頭 ，唔見佢追嚟 ，就即刻勒馬 返返轉頭 。
韓滔 正話 挺起 支 搠 去 迎敵 啦 ， 點知 張清 暗暗 藏住 塊石 仔 ， 一起 手 ， 打正 韓滔個 鼻哥 ， 哎呀呀 呀呀 呀呀 呀呀 呀 ， 只見 鮮血 惦流 ， 逃返 去 本陣 。
彭 玘 見 咗 發 大火 咯 ， 都 唔 等 宋公明 嘅 將令 啊 ， 舞起 三尖 兩刃 刀 飛馬 直取 張清 。
兩個 都 未曾 交 馬 ，畀 張 清 暗暗 藏住 粒 石仔 喺 手嚟 ，啡噉 一聲 打中 彭玘 塊 面 ，啊嗬 ，掉低 三尖兩刃刀 啊 飛馬 回陣 。
宋江 見 輸咗 幾個 將領 ，個 心 好 驚 ，就 想 收兵 嘞噃 。
只見盧俊義 後 便 有 個人 大聲 嗌話 ：
如果 今日 丟晒架 ，聽日 仲 點樣 廝殺 啊 ？
即管 睇下 石仔 打唔打到 我 吖嗱 ？
宋江 一 睇 ，乃係 醜 郡 馬 宣贊 ，佢 拍馬 舞刀 啊 直奔 張清 。
張清 話 喇 ：一個 嚟 一個 走 ，兩個 嚟 兩個 逃 ，你 知唔知 我 飛石 嘅 厲害 啊 ！
宣贊 就 話 喇 ：你 打得 人哋 ，打唔到 我 啊 。
話猶未了 ，張清 隻手 一起 ，一石仔 打正 宣贊 嘅 嘴邊 哎呀呀呀 ，厲害啊 ，翻身 落馬 。
龔旺 、丁得孫 正話 要嚟 捉人 ，好在 宋江 陣上 人多 ，就 大家 將 宣贊 救咗 返去 。
宋江 見咗 ，怒氣沖天 。
佢 掹出 把 劍 嚟 ，割 件 戰袍 發誓 佢 話 ：我 如果 唔 捉到 呢個 人 就 誓不 回 軍 ！
呼延灼 見 宋江 發誓 佢 就 話 喇 ：兄長 噉樣 講 ，仲要 我哋 弟兄 有 乜嘢 用 啊 ！
一拍隻踢雪烏騅馬 ，直到陣前就大鬧張清話 ：
無知小輩 ，唔好 咁 狂妄 ，識唔識得 大將 呼延灼 啊 ？
嘿嘿 ，辱國 敗將 ，你 亦 要 遭 我 毒手 。
説話 未完 一石仔 就 飛過嚟 。
呼延灼 見到 石仔 飛嚟 ，急急 用 條 鞭 去 隔 啦 ，點知 一下 打正 喺 手腕 ，手 都 軟晒 ，就 使唔逳 條 鋼鞭 就 唯有 返去 本陣 喇 。
宋江 話 喇 ：哎呀 ，馬 軍 頭領 ，都 畀 佢 打傷 ，步 軍 頭領 ，邊個 敢 去 捉 呢個 張清 啊 ？
只見 赤髮 鬼 劉唐 ，手執 朴刀 挺身 出戰 。
張 清 見咗 就 哈哈大笑 咯 ，佢 鬧 佢 話 ：哈哈哈哈哈 ，你 嗰班 敗將 ，馬 軍 尚且 輸 咗 ，何況 步卒 呢 ？
劉唐 好嬲啊 ，就 直奔 張清 。
張 清 唔同 佢 打 ，跑馬 歸陣 噃 ，劉唐 啊 噔噔聲 追上去 。
追到喇 ，劉唐 手快 腳快 ，一朴刀 斬過去 ，就 斬正 張清 匹 戰馬 。
嗰匹馬 嘅 後蹄 踢起 上嚟 ，條 馬尾 一 拂 ，就 掃正 劉唐 嘅 面門 ，搞到 佢 呀 眼 都 花晒 ，就 畀 張 清 一 石仔 就 打到 佢 跌 喺 地 嚟 。
佢 正 喺度 掙扎 ，就 畀 張 清 手下 啲 兵卒 湧 上嚟 就 橫 拖 掂 掹 就 拉咗 佢 走 。
宋江啊大嗌喇 ：邊個 去 救 劉唐 ？邊個去救劉唐啊 ？
只見 青面獸 楊志 就 拍馬 舞刀 直取 張清 。
張清 啊 詐 假意 舞起 支槍 嚟 迎戰 ， 楊志一 刀 斬 過去 ， 張清 嚟 個 鐙 裏 藏身 ， 噉 楊志 呢 一刀 就 斬空 咗 咯 。
張 清隻手 揸住 粒 石仔 ，喝 一聲 話 ：着 ！
嗰粒 石仔 喺 小掩 旁邊 就 飛咗 過去 。
跟住 張 清 又 一 石仔 ，噹聲 打中 咗 頭盔 上 便 ，嚇到 楊志 啊 膽 喪心寒 ，伏 喺 馬鞍 歸 陣 。
宋江 睇咗 就 非常之 苦惱 ，佢 吟沉 話 ：
如果 今日 輸咗 鋭氣 ，點 返得去 梁山泊 ？
邊個 同 我 出 呢一啖氣 呢 ？
朱仝 聽到 ，就 睇一睇 雷橫 話 喇 ：喂 ，一個 頂唔住 我哋 兩個 一齊 去 夾攻 咯 。
於是 朱仝 在 左 ，雷橫 在 右 ，兩 條 朴刀 殺出 陣 前 咯 喎 。
張清笑喇 ：哈哈 ，一個 冇用 又 添 一個 ，我 任你 十個 嚟 又 點 話 呢 ？
張清 全無懼色 ，真係 連 眼泣毛 都 唔眨下 ，佢 靜靜地 ，扲 定 兩粒 石仔 喺 手 嚟 。
雷橫啊 先到 ，張清 手 一起 ，哎呀 ，雷橫 額頭上 已經 捱咗 一下 ，僕 喺 地下 嚟嘞 。
朱仝啊 急急 上前 搶救 咯 ，嘩 條 頸 又 畀 石仔 打中 。
關勝 喺 陣上 ，睇見 兩個 都 受傷 唄 ，就 大挺 神威 ，舞起 青龍刀 ，縱開 赤兔馬 就嚟 救 朱仝 、雷橫 喇 。
剛剛 搶救 返 兩個 返去 ，張清 又 一石仔 打過嚟 ，關勝 連忙 用 把 刀 一隔 ，砰聲 打中 刀口 ，迸出 火花 。
關勝 都 無心 戀戰 啊 勒 轉馬 返 轉頭 。
雙槍 將 董平 見咗 個 心 就 諗喇 ：
我而家 ，新新 歸降 宋江 ，如果 唔顯下 我啲 武藝 ，上山 之後 亦都 冇乜 光彩 啊 。
於是 佢 就 手提 雙槍 ，飛馬 出陣 。
張清 一見 就 鬧佢 喇 ：嘿 ，我 同 你 鄰近 州府 ，唇齒之邦 ，共同 滅賊 噉 先至 啱㗎嘛 。
你 因乜事 幹背叛 朝廷 ，真係 自取其辱 啊 ！
董平 發起 火 啊 直取 張清 ，兩 馬 雙 交 ，軍器 並 舉 。
兩條槍呀 ，好似 銀蛇 狂舞 ，四隻手 上下翻飛 。
大概 鬥咗 六七個 回合 ，張清 撥 馬 就 走 ，董平 話 喇 ：
第二個 捱 你 石仔 ，你 點 打到 我 㗎 ？
張清 帶住 支槍 ，喺 錦囊 裏 便 摸出 一粒 石仔 。
手 一起 ，石仔 就 好似 流星 閃電 噉 啡聲 飛過嚟 。
董平 眼明 手快 一下 就 撥過 粒石仔 。
張清見 打唔到唄 ，就 再 攞 第二粒 石仔 又 打過去 ，點知 又 畀 董平 閃過 咗 。
兩粒 石仔 都 打唔着 ，張清 個 心慌 。
當時 ，嗰 兩 匹 馬 都 頭尾 相接 ，張清 已經 走到 陣門 左側 ，董平 啊 對住 佢 背 枚 一 槍 刺過去 。
張清 一閃 ，嚟 個 鐙 裏 藏身 ，董平 就 刺 空 咗 咯 。
嗰條槍 㨃 過咗 前頭 ，噉 董平 嗰匹馬 同 張清 嘅 馬 就 啱啱 一拍 喇 。
張清 即刻 掉低 支槍 ，用 雙手 將 董平 連 槍 連手 攬 實 一拖 就 拖唔逳 ，兩個人 攬埋 一嚿 僂 。
哈哈 ，董平 同 張清 打得 咁 燦爛 ，你哋 估下 邊個 打贏 吖嗱 ？
