軍師 吳用 啊 ，就 扮咗 個 占卦 先生 ，喺 盧俊義 屋企 設 下 咗 個 圈套 。
噉 大事 做完 喇 ，就 帶埋 李逵 返 上去 梁山 ，準備 迎接 盧俊義 咯 喎 。
噉而家 就 唔 講 阿吳 用 同 李逵 返去 山寨 ，就係 講下 盧俊義 啊 ，佢 自從 算命 之後 呢個 心 成日 囉囉攣 ，坐立不安 。
有一日 ，佢 忍唔住 喇 ，就 吩咐 人 啊 叫 所有 嘅 主管 嚟到 商量 事務 。
冇 幾耐 ，啲 主管 都 嚟齊 。
嗰個 做頭嘅 管家 財 嘅 主管 呢 ，就 姓 李 名 固 。
呢個 李固 啊 本來 係 東京人 ，嗰陣 因為 嚟 北京 投奔 朋友 唔到 啊 ，有 一次 又 冷 又 餓 ，就 碌低 喺 盧員外 嘅 門口 外便 。
盧俊義 啊 救咗 佢 條命 ，將 佢 養 喺 屋企 嚟 。
因為 見到 佢 做事 勤懇 謹慎 ，又 寫得 又 算得 ，噉啊 叫佢 管理 屋企 嘅 事務 。
哈 ，五年之內 ，一直 抬舉 佢 做咗 都管 。
噉啊 一切 裏裏外外 嘅 家財 都 喺 佢 嘅 身上 喇 。
佢 手下 ，管住 四五十個 辦事人員 ，噉 一家之內 呢 ，都 稱呼 佢 做 李都管 。
當日 ，噉 大小 管事 嘅 人 ，都 跟住 李固 嚟 堂前 行禮 。
盧員外 睇咗 一睇 ，就 問 ：點解 唔見 我 嗰個人 嚟 啊 ？
話猶未了啊 ，喺 台階下 便 有 個人 行過嚟 。
呢個人啊 ，六尺 以上 身材 ，二十四五歲 年紀 ，三柳 掩口 鬍鬚 ，腰 細 膀 闊 。
呢個人 係 北京人 氏 ，自小 呢 就 父母 雙亡 喇 ，喺 盧員外 屋企 啊 養大 嘅 。
就因為 見到 佢 周身 嘅 皮肉 ，好似 雪 咁白 ，盧俊義 就 叫咗 一個 高手匠人 ，同 佢 刺 咗 遍體 花繡 ，哎呀 ，真係 好似 玉柱 上 便 鋪住 翡翠 咁靚 啊 。
要比賽呀 ，任由 你 係邊個 ，都 要 輸畀佢 。
佢 唔但 一身 有 個 好靚 嘅 花繡 ，更兼 吹 嘅 、彈 嘅 、唱 嘅 、武 嘅 ，拆字 猜謎 吟詩 作對 ，冇 話 唔識 冇 話 唔通 嘅 。
同時 佢 又 會 講 各地 嘅 土話 方言 ，懂得 各行各業 嘅 行情 噃 。
佢 一身 本事 真係 冇人 比得上 。
佢 攞住 一張 弓 ，只 用 三支 短箭 啫 ，去 郊外 打獵 呀 永冇 落空 嘅 ，嘿 箭 到 就 物 落 ；
到咗 晚頭 黑 返 城 ，至少 都 百零 隻 雀仔 畀 佢 打到 。
你話 要 比賽 射箭 啊 ，哈嗰處 有 咩 獎品 ，擔保 冚𠾴唥 都 係 佢 撈晒 。
而且 呢個 人 啊 ，百伶百俐 ，話頭 醒尾 。
嘩噉咪好厲害哈真係好厲害㗎 。
佢 姓 燕 ，排行 第一 ，官名 一個 青字 。
北京城 裏 便啲 人 就 貪 口爽 ，都 叫 佢 做 浪子 燕青 。
佢 係 盧俊義 屋企 嘅 心腹 家人 。
而家 ，佢 行 上廳 ，行過 禮喇 就 企 喺 右便 。
李固 呢 ，就 企 喺 左便 。
盧俊義 同 大家 話 ：
我 前幾日 算咗 一下 命 ，話 我 有 百日 血光之災 ，除非 去 東南方 一千里 之外 噉 先至 避得 。
我 諗 下 東南方 有 個 地方 ，係 泰安州 。
嗰處 有 間 東嶽 泰山 天齊 仁聖帝 金殿 ，係 管 天下 人民 生死 災難 嘅 。
我啊 想 去 嗰處 ，一來 ，去 燒 炷香 ，消災滅罪 ；
二來呢 就 避過 呢一場 災難 ；
三來順便做啲生意 ，睇下 外便 嘅 景致 。
誒李固啊 ，你 同 我 搵 定 十架 大車 ，裝滿 晒 山東 貨物 ，啊 ，你 誒執拾 行李 ，跟埋 我 去 行 一趟 啦 。
燕青 小乙 就 喺 屋企 看家 ，庫房 嘅 鎖匙 今日 同 李固 交割 清楚 佢 。
我 三日 之內 就 要 起程 。
李固 聽講 就 話 喇 ：誒 主人 啊 ，噉 唔 妥當 噃 。
常言話 ：算命 占卦 ，亂噏亂話 吖嘛 。
唔好 聽 嗰個 算命佬 個 胡言亂語 咯 ，喺 屋企 嚟 怕 乜嘢 吖 ？
盧俊義 話 ：我 係 命中註定 嘅 ，你 唔好 逆 我 喇 。
如果 等到 災難 嚟 嗰陣 就 後悔 都 遲 咯 。
燕青話喇 ：主人 在上 ，請 你 聽 我 小乙 一句 説話 。
呢一條 路 去 山東 泰安州 ，正係 喺 梁山泊 邊邊 經過 。
近年 嚟 ， 宋江 嗰 一班 惡 嘢 ， 喺 水泊 嗰 度 打家劫舍 ， 官兵 想 去 剿 佢 哋 都 唔 埋 得 去 啊 。
主人 如果 你 要 去 燒香 ，都係 等 太平 之後 先至 去 啦 。
唔好信嗰個 算命先生 亂講啊 ，慌唔係 梁山泊 啲 壞人 ，扮成 占卦 算命 嘅 ，嚟 呃騙 主人 你 咩 ？
嘿嘿 ，可惜 嗰日 我 唔 喺 屋企 ，如果 喺 屋企 呀 ，我 三言兩語 ，就 盤問到 嗰個 先生 口啞 喇 ，誒噉 就 有 場 好笑 咯 。
盧俊義 話 ：你哋 唔好 亂噏 ，邊個 敢 嚟 氹 我 吖 ？
梁山泊 嗰 班 賊 男女 有 咩 嘢 咁 緊要 啊 ？
我 睇 佢哋 呀 ，真係 好似 條 草 噉 咋 。
等我 去 捉咗 佢哋 ，將 以前 學到 個 武藝 ，顯揚 於 天下 ，亦 算係 個 男人 大丈夫 啊 。
話口未完 ，喺 屏風 背後 盧俊義 嘅 老婆 行出嚟 。
呢個 女人 ，今年 二十五歲 ，姓 賈 ，嫁咗 畀 盧俊義 呢 先至 五年 。
賈氏娘子 就 話 喇 ：官人 啊 ，我 聽 你 講咗 好耐 咯 。
自古 話 出門 一里 ，不如 屋裏 吖嘛 。
唔好 聽 嗰個 算命 先生 亂噏 啊 ，掉低咗 咁 大 一副 家業 ，走去 龍潭虎穴 做 生意 ，擔驚受怕 喎 。
你 喺 屋企 嚟 ，清心寡慾 ，高居 靜坐 ，自然 會 冇事 㗎 喇 。
盧俊義 話 ：唉 你 女人 之家 識得 乜嘢 ？寧可信其有 ，不可信其無 。
我揸定主意喇 ，你唔使講咁多喇 。
燕青 又 話 ：小人 靠 主人 嘅 福蔭 ，學咗 啲 武藝 在 身 。
唔係 小人 誇口 啊 ，我 跟住 主人 去 一趟 ，路上 就算 有啲 草寇 出嚟 ，小人 亦都 能夠 對付 佢 三五十個 嘅 。
不如 留低 李都管 看家 ，等 小人 服侍 主人 你 去 行 一趟 罷 啦 。
盧俊義 話 ：因為 我 喺 生意 上 頭 唔 懂得 ，要 帶 李固 去 。
佢 熟行 啊 ，幫得 我 成 大半 力 ，因此 就 留 你 喺 屋企 嚟 看家 。
有 第二個 人 管賬 嘅 ，就係 要 你 喺 屋企 ，當家 揸下 主意 啫 。
李固 又 話 喇 ：誒 主人 啊 ，小人 近來 有 啲 腳氣病 ，唔係 點 行得 路 噃 。
盧俊義 聽咗 就 發惡 ：哼 ，養兵 千日 用在 一朝 。
我要 你 跟我去 行一趟 ，你就 左推右推 咁多事 係嘛 ？
如果 邊個 再 攔阻 我 ，我就 叫佢 知道 我 拳頭 嘅 滋味 。
李固 嚇到 面如土色 。
大家 都 唔敢 再 講説話 喇 ，就 散咗 喇 。
李固唯有忍氣吞聲 ，即刻去安排行李 ，叫咗十架大車 ，嗌咗十個腳夫 ，四五十隻拉車嘅騾馬 ，將啲行李呢裝上車喇 ，另外就裝好晒啲貨物 。
到咗 第三日 ，拜咗神 ，對 屋企 裏頭 嘅 大男 小女 啊 盧俊義 個個 都 吩咐過 喇 。
當晚 ， 就 叫 李固 帶 住 兩個 辦事 人員 ， 執拾 好 就 出城先 。
李固 去 ，個 賈氏 娘子 就 流住 眼淚 ，睇住 車隊 去咗 。
第日五更 ，盧俊義 起身 ，洗完身 ，換過 一身新衣服 ，食咗早飯 ，攞出 兵器 ，去到 後堂 拜別咗 祖先 。
臨出門嘅時候 ，又 吩咐 佢 娘子 好好哋 看 門口 ，佢 話 ：
多則 三個月 ，少則 四五十日 就 返嚟 喇噉 。
賈氏 娘子 就 話 ： 官人 一路 要 小心 至 好 啊 ， 要密 啲 寄信 返 嚟 啊 。
燕青 就 跪 喺 佢 面前 叩頭 送別 ，盧俊義 啊 吩咐 佢 話 ：
小乙 你 喺 屋企 凡事 都 要 向前 至 好 啊 ， 吓 ， 唔 好 出去 啲 唔 三 唔 四 嘅 地方 玩 啊 。
燕青話 ：主人 你 噉樣 出門 ，小乙 點 敢 怠慢 呢 ？
盧俊義 揸起 棍棒 ，咪 出到 城外 ，李固 呢 就 喺度 等住 。
盧俊義 話 ：你 帶 兩個 夥記 行 先 。
見到 有 乾淨 嘅 客店 喇 ，就 煮定 飯 等住 。
啲 車隊 腳夫 一嚟到 ，就 有得食 ，噉 就 免得 耽擱 時間 啦 。
於是 李固 呢 亦都 揸住 條 桿棒 ，同 兩個 夥記 行先 。
盧俊義 同埋 幾個 辦事人員 ，押住 車隊 行 。
佢 一路 啊 見到 山明水秀 ，路 闊 坡平 ，個 心 啊 非常之 歡喜 佢 話 ：
你睇 ，我 如果 喺 屋企 邊度 見到 咁 好 景致 吖 ？
行咗 四 啊 幾里 ，李固 就 喺度 等住 ，食完咗 午飯 喇 ，李固 又 行 先 。
再行咗 四五十里 ，嚟到 間 客店 ，李固 呢 又 已經 喺度 安排好 車隊 人馬 食宿 嘞 。
盧俊義 入到 間房 ，憑 好 條棍 ，掛起 氈笠 ，解 低腰刀 ，換咗 鞋襪 ，就 食飯 休息 呢啲 都 唔 在 講 。
第日 朝頭早 起身 ，透火 煮飯 ，大家 食咗 ，執拾 車輛 牲口 ，就 起程 又 行 。
就噉樣 ，一路 曉行 夜宿 ，就 已經 幾日 。
有一日 ，嚟到 有間 客店 過夜 ，天光 準備 要 起程 。
只見 店小二 哥 呢 ，就 對 盧俊義 話 喇 ：
有件事 要 講畀 官人 知 啊 ，離開 小人間 店 唔到 二十里 ，就係 正正經過 梁山泊 邊 嘅 路口 㗎 喇 。
山上 宋公明 大王 呢 ，雖然 就 唔傷害 來往 客商 嘅 ，之 官人 你 亦 要 靜靜地 過去 先至 好啊 ，千祈 唔好 張張揚揚 噃 。
盧俊義 聽咗 就 話 喇 ：哦 ，乜 原來 噉 係 嘛 ？
佢 即刻 叫人 ，開咗 衣箱 ，開咗鎖 ，喺 裏面 攞咗 個 包袱 出嚟 解開 ，攞出 四面 白絹 旗 ，就 問 小二哥 攞咗 四條 竹 ；
每一條 竹 呢 就 綁起 一面 旗 ，每一面 旗 上 便 ，都 有 籮斗 咁 大 幾個 字 寫住 ：
慷慨 北京 盧俊義 ，金裝 玉匣 來 深地 。太平 車子 不 空 回 ，收取 此 山 奇貨 去 。
李固佢哋 一見咗 ，嘩 ，噉 仲得了嘅咩 ，就 一齊 嗌起 苦 咯喎 。
店小二 哥 就 問 喇 ：嘿嘿 ，官人 啊 ，你 莫非 同 山上 宋大王 係 親戚 係嘛 ？
盧俊義 話 ：我 係 個 北京 財主 ，同 呢班 賊佬 有 咩 嘢 親戚 啊 ？
我 特登 要 嚟 捉 宋江 呢班 傢伙 嘅 。
誒 ， 誒 ， 誒 誒 誒 ， 誒 官人 啊 ， 官人 啊 ， 誒 唔 該 你 細聲 啲 啊 ， 唔 好 連累 小人 啊 ， 你 唔 好 ， 唔 好 講玩 啊 。
你 就算 有 一萬 人馬 ，都 唔 近得 佢哋 㗎 。
放屁 ，我 睇 你哋 啲 人 呀 ，都 係 同 嗰 班 賊佬 合埋 一路 嘅 。
店小二 就 猛咁 叫苦 啦 ，嗰班 跟車 嘅 腳夫 啊 都 嚇到 傻晒 。
李固 跪 喺 地下 𠼮 佢 話 喇 ：
唉請 主人 你 可憐 下 大家 ，留返 呢條命 返鄉 ，噉 就 好過 打一場 羅天大醮 做 功德 咯 。
盧俊義 喝 佢 話 喇 ：你 識得 咩嘢 ！
你哋 噉嘅 麻雀仔 ，點能夠 同 牙鷹 嚟 相比 吖 ？
我諗 自己 平生 學埋 一身 本事 ，都 未曾 遇着 買主 。
今日 ， 咁 好彩 碰到 呢 個 機會 ， 唔 喺 呢 處 賣出去 就 更待何時 啊 ？
嗱 ，我 車上面 有 個 大麻包袋 ，已經 準備 落成 袋麻繩 㗎喇 。
如果 呢班 賊佬 該死 撞正 喺 我 手裏頭 ，一刀 一個 斬低咗 ，你哋 大家 同 我 將 佢哋 綁 喺 車 上 便 。
掉咗啲貨物唔緊要啊 ，騰空架車嚟捉人緊要 。
將 呢班 賊頭 解 上去 京師 ，請 功 受賞 ，噉 先至 遂 我 平生 之 願 啊 。
點啊 ？如果 你哋 邊個 唔肯 去 ，我 喺 呢處 就 將 你哋 殺咗 先 。
於是呢 ，盧俊義 喺 前 便 擺開 四架 車 ，上面 就 插住 四支 絹旗 ，後 便 六架 車 呢 就 跟住 行 。
李固 同埋 嗰 啲 辦事 人員 啊 腳夫 啊 就 哭哭啼啼 ， 唯有 跟 住 盧俊義 要點 就點 係 啦 。
盧俊義 攞出 把 朴刀 ，押住 架 車 ，順住 去 梁山泊 嗰 條 大路 直奔 過去 。
李固 見到 行行 下啲 崎嶇 山路 就 行 一步 怕 一步 。
盧俊義 一味 催住 佢哋 行 。
從 朝頭早 起 ，一路 行到 巳牌 時分 ，遠遠 就 望見 一座 大樹林 ，有 一千 幾百 樖 合抱 唔過 嘅 大樹 。
佢哋 啱啱 行到 樹林邊 ，就 聽見 咈噉 一 聲 哨子 響 。
當堂 嚇到 李固 同 嗰 兩個 夥記 呀 腳 都 軟晒 ，想 鑽入 地底 就 搵唔到 窿 。
盧俊義 即刻 叫 啲 人 ，將 大車 停埋 一便 。
嗰班 車夫 呀 ，匿晒 喺 大 車 底 揗揗 震 。
盧俊義 大聲話 ：我 如果 斬低 啲 賊佬 ，你 就 同 我 將 佢哋 綁起嚟 。
話猶未了啊 ，只見 樹林裏 便 ，走出 四五百個 小嘍啰 。
又聽見 後便 嗙嗙聲 打響 個 鑼 ，誒 又 有 四五百 個 小嘍啰 截住 後路 喇 。
跟住 喺 樹林 裏 便 ，轟噉 一 聲 炮 響 ，啪噉 跳出 一名 好漢 ，手上 舞住 一雙 斧頭 ，高聲 大叫 話 ：
盧員外 ，認唔認得 啞道童 啊 ？
盧俊義 一下 醒起嘞 ，就 喝佢 話 ：
我 早就 有心 要 嚟 捉 你哋 呢班 強盜 ，今日 特登 嚟到 呢處 ，快啲 叫 宋江 嗰個 傢伙 落山 投降 。
如果 仲 執迷不悟 ，我 片刻之間 ，就 叫 你哋 人人皆死 ，個個 不留 啊 ！
李逵 哈哈大笑話 ：哈哈哈哈哈哈哈哈 ，員外 ，你 今日 中咗 我哋 軍師 妙計 ，快啲 嚟 坐返 把 交椅 罷 啦 。
盧俊義 嬲 喇 ，舞住 朴刀 就嚟 鬥 李逵 。
李逵 舉起 張 斧頭 ，同 佢 打咗 一陣 。
打咗唔到 三個 回合 ，李逵 啪噉 跳出 圈外 ，轉過身 就 向住 樹林 裏 便 就 走 。
盧俊義啊 挺住 朴刀 跟住 尾 猛咁 追 。
李逵 喺 樹林 裏頭 ，東閃西躲 ，激到 盧俊義 𨅝𨅝 跳 ，搏命 噉 衝入去 樹林 裏 便 。
但係 李逵 就 飛 咁快 啊 ，喺 嗰啲 亂樹叢 中 ，閃幾閃 就 唔見 人影 嘞 。
盧俊義啊 追到去 樹林 嘅 呢邊 ，一個人 都 唔見 。
啱啱 想 返轉頭 ，就 聽見 叢林 旁邊 有 班人 轉出嚟 。
有 一個 人 高聲 大叫 話 ：員外 唔 好 走 ，認唔認得 我 啊 ？
盧俊義 一 睇 ，原來 係 個 肥大 和尚 啊 ，佢 身 穿 黑色 長袍 ，倒提 鐵 禪杖 。
盧俊義 就 喝 佢 話 ： 你 係 邊處 嚟 嘅 和尚 啊 ？
哈哈哈哈哈哈 ，我 就係 花和尚 魯智深 。
今日 奉 咗 軍師 將令 ， 要 我 嚟 迎接 員外 上山 啊 。
盧俊義 發 大火 喇 ：你 呢個 禿驢 咁 豈有此理 ！
挺起朴刀 就 直取 花和尚 。
魯智深 舞起 鐵禪杖 嚟 迎上去 。
兩個 鬥咗 唔到 三個 回合 ，魯智深 嗙噉 撥開 朴刀 ，回身 就 走 ，盧俊義 又 追過去 。
追追下 ，喺 嗰班 嘍啰 裏頭 就 行者 武松 行 出嚟 ，佢 舞起 兩口 戒刀 就 撲過嚟 打 。
盧俊義 就 唔 追 個 和尚 又 嚟 鬥 武松 嘞噃 。
打咗唔到 三個 回合 ，武松 開步 就 走 。
盧俊義 哈哈大笑 話 ： 我 唔 追 你 ， 你 哋 呢 一班 傢伙 算 得 乜嘢 吖 ， 哈哈哈哈 哈哈哈哈 。
話口 未 完 ，只見 山坡 下 便 有 個人 喺度 大聲 嗌 ：
盧員外 ，你 唔知 㗎喇 ，開講 有話 人 怕 落蕩 就 鐵 怕 落 爐 噃 。
大哥 定落 個 計策 ，你 仲 想 走 去 邊 吖 ？
盧俊義 喝 佢 話 你 係 邊個 ！
嘿嘿 ，小人 就係 赤髮鬼 劉唐 啊 。
你個草賊咪走 ！
盧俊義 挺起 朴刀 啊 直取 劉唐 。
啱啱 鬥咗 三個 回合 ，側跟 有 個人 大聲 嗌話 ：
好漢 沒 遮攔 穆弘 喺 呢度 嚟 啊 ！
當時 劉唐 、穆弘 兩個人 就 兩條 朴刀 ，雙鬥 盧俊義 。
鬥咗 又 唔到 三個 回合 ，聽見 背後 腳步 響 。
盧俊義 喝 一 聲 ：着 ！
劉唐 、穆弘 即刻 啪聲 跳 後 幾步 。
盧俊義 擰轉身 ，就 鬥 背後 嘅 好漢 喇 。
呢個 邊個 呢 ？原來 係 撲天雕 李應 。
噉 三個 頭領 ，丁字 噉 圍 實 盧俊義 嚟 打 。
盧俊義 啊 一啲 都 唔 驚 啊 ，越 鬥 越 勁 。
兵兵乓乓 打打下 ，就 聽見 山頂 上面 一聲 鑼 響 ，三個 頭領 都 各自 賣 個 破綻 ，一齊 趯走 咗 咯 。
盧俊義 已經 打到 成身 臭汗 ，佢 亦 唔 去 追 佢哋 。
佢 又 返到 樹林 邊 想 搵 啲 車 ，弊喇 ，十架 大 車 連 人 帶 馬匹 牲口 冚𠾴 唥唔見晒 。
盧俊義 就 走 上 個 高坡 四周 圍望 下 啦 ，只見 遠遠 山坡 下 便 啊 ，有 班 小嘍啰 ，將 啲 大車 啊 馬匹 啊 趕 晒 喺 前 便 ；
就 將 李固 佢哋 一班人 呢 ，一串 噉 ，綁住 喺 後便 嚟 ，打鑼擂鼓 ，押 佢哋 去 松林 嗰 便 噃 。
盧俊義 睇見 啊 心 就 好似 火燒 噉 嬲 到 口鼻 都 出 煙 啊 ，提住 朴刀 一直 追過去 。
追到 離開 山坡 冇 幾 遠 ，只見 兩名 好漢 跳出嚟 喝 一聲 話 ：去邊處 ！
原來 一個 係 美髯公 朱仝 ，一個 係 插翅虎 雷橫 。
盧俊義 見咗 就 高聲 鬧 佢哋 話 ：你哋 呢班 草賊 ，乖乖地 ，將 大車 同 人馬 還畀 我 ！
朱仝 捋一捋 啲 長鬚 大笑話 ：盧員外 ，乜 你 仲 咁 唔醒水 呀 ？
中咗 我哋 軍師 妙計 ，就算 係 生 一對 翼 出嚟 都 飛唔走 喇 。
快啲 嚟 山寨 坐 把 交椅 罷 啦 。
盧俊義 聽咗 發大火 ，挺起 朴刀 ，對住 佢 兩個人 就 衝上去 。
朱仝 、雷橫 ，同 盧俊義 鬥 咗 唔到 三個 回合 ，回身 就 走 。
盧俊義 諗 ：哼 ！一定要 追上去 斬低 佢 一個 噉 先至 攞得返 啲 車 嘅 呢 。
於是就唔要命咁追 ，追啊追啊 ，追咗過去山坡 ，誒 ，嗰兩個好漢 都唔見咗 嘞噃 。
呢個 時候 ，只 聽見 山頂 上面 奏起 音樂 上嚟 添 。
佢 昂起 頭 一 睇 ，只見 一浸 風吹起 嗰面 杏黃 旗 ，上面 繡住 替天行道 四個 大字 。
轉過嚟 再 一睇 ，就 望見 紅羅 銷金 傘 下 便 呢 ，遮住 宋江 ，左 有 吳用 啊 右 有 公孫勝 。
一行 隨從 二百 幾人 ， 一齊 行個 嚟 大聲 噉 話 ：
員外 ，分別 之後 幾 好 吖嘛 ？
盧俊義 見到 就 發嬲 咯 ，佢 指名道姓 噉 對住 山頂 鬧 啊 。
吳用 就 勸 佢 話 喇 ：員外 ，你 唔好 嬲 喇 。
宋公明 仰慕 威名 好 耐 喇 ， 特登 叫 吳某 登門 拜候 ， 迎接 員外 上山 ， 一齊 替天行道 ， 請 員外 唔 好 責怪 啊 。
盧俊義 大聲 噉 鬧 佢 話 ：你個 萬惡 草賊 ，你 點 敢 氹 我 咁 可惡 啊 ！
喺 宋江 背後 小李廣 花榮 行出嚟 ，佢 拈 弓 搭 箭 ，睇住 盧俊義 大喝 一 聲 話 ：
哼 ！盧員外 你 唔好 認叻 ，請 你 睇下 花榮 嘅 神箭 先 。
話猶未了 ，瀡噉 一箭 ，正正 射中 盧俊義 頭上 氈笠 個 紅纓 ，嘩嗨 ，厲害 。
盧俊義 吃咗 一驚 ，回身 就 走啊 。
呢陣時 ，山上面 鼓聲隆隆 ，只見 霹靂火 秦明 、豹子頭 林沖 ，帶住 一彪 軍馬 ，搖旗吶喊 啊 喺 山 嘅 東便 殺出嚟 。
又見雙鞭將 呼延灼 、金槍手 徐寧 ，亦係 帶住 一彪 軍馬 ，搖旗吶喊 ，喺 山 嘅 西面 殺出嚟 ，哎呀 ，嚇到 盧俊義 啊 走投無路 啊 。
呢個 時候 ，天色 就 嚟 夜 喇 。
盧俊義 腳 又 痛 肚 又 餓 真係 慌不擇路 ，向住 偏僻 嘅 小路 就 一味 走 。
約莫 走到 黃昏 時候 ，霧靄 沉沉 都 分唔出 東西南北 。
行行下 ，就 行到 去 鴨嘴灘頭 ，四圍 一望 ，咦 只見 滿目 蘆花 茫茫 煙水 。
盧俊義 睇見 就 仰天 長歎 ：
唉 ，係 我 唔 聽 好人 説話 ，今日 果然 撞板 咯 。
正係 心煩意亂 嘅 時候 啊 ，只見 蘆葦林 裏頭 有 個 打魚佬 ，棹住 隻 船仔 出嚟 噃 。
嗰個 打魚佬 見到 盧俊義 喇 ，就 灣 定 隻 船仔 對 盧俊義 話 ：
呵呵 ，客官 你 真係 大膽 噃 吓 。
呢度 係 梁山泊 啲 惡嘢 出沒 嘅 地方 嚟 㗎 ，乜 咁 夜 喇 ，你 仲 嚟 呢處 做 咩 啊 ？
盧俊義 就 話 喇 ：就係啦 我 蕩失咗 路 ，搵唔到 地方 過夜 啊 ，唔該 你 救下 我 。
打魚佬 就 話 ：
呢呢處 轉過 嗰頭 有 個 圩市 ，約莫 係 三十 零 里 路度 啦 ，不過 啲 路 雜 好 難 認 嘅 。
如果 混水路 去 呢 ，不過 係 三 幾 里 路 遠 嘅 啫 。
嗱， 如果 你 捨得 出十貫 錢 畀 我 ， 我用 隻 船 仔 棹 你 去 吖 。
盧俊義 話 ：噉 好啊 。
你 如果 棹得 我 過去 ，搵到 個 圩市 客店 ，我 畀 多啲 銀兩 畀 你 。
嗰個 打魚佬 就 棹 隻 艇 埋 岸 ，扶 盧俊義 落 船 ，用 竹篙 一 撐 ，噉 就 撐開 去 。
約莫 行咗 三 幾 里 水路 ，忽然間 ，聽見 前面 蘆葦林 裏頭 有 槳聲 響 ，有 隻 船仔 啊 飛 咁 快 噉 嚟到 。
船上面 有 兩個 人 ，前面 一個 ，赤條條噉 攞住 條 竹篙 ，後便 嗰個 就 搖住 櫓 。
前面 嗰個 人 啊 仲 唱住 山歌 噃 ：
英雄 不會 讀 詩書 ， 且 就 梁山泊 裏 居 。 準備 窩 弓射 猛虎 ， 安排 香餌 釣鰲魚 。
盧俊義 一 聽 呀 ，吃咗 一驚 ，唔敢 出聲 。
又聽見 右便 嘅 蘆葦林 裏頭 ，亦係 兩個人 ，棹住 隻 船仔 出嚟 。
後便 嗰個 就 咿啞咿啞 噉 搖住 櫓 。
前面 嗰個 打橫 揸住 竹篙 ，亦 係 唱住 山歌 嘅 ：
雖然 我 是 潑皮 身 ，殺賊 原來 不 殺人 。萬兩 黃金 渾 不愛 ，一心 要 捉 玉麒麟 。
盧俊義 聽咗 個 心 就 話 弊喇 弊喇呢趟 。
跟住 只見 當中 有 隻 船仔 ，飛咁快 噉 棹過嚟 。
船頭 上 企住 一個 人 ，倒提 一支 鐵嘴 竹篙 ，亦 係 唱住 山歌 嘅 ，點唱 呢 ？
蘆花灘上 有 扁舟 ，俊傑 黃昏 獨自 游 。義 到 盡頭 原 是 命 ，反躬 逃難 必 無 憂 。
就係 吳 用 喺 盧俊義 屋企 寫 嗰 首 詩 。
唱完喇 ，三隻船 ，一齊 嗌咗 聲 行個禮 。
中間 係 阮小二 ，左邊 係 阮小五 ，右邊 係 阮小七 。
嗰 三 隻 船仔 一齊 撞過嚟 。
盧俊義 聽到 個 心 好 慌 ，佢 諗下 自己 又 唔識 水性 ，就 猛咁 叫 個 打魚佬 話 ：
快啲 同 我 棹埋 岸 ，快啲 棹埋 岸 ！
嗰個 打魚佬 哈哈大笑 對 盧俊義 話 喇 ：哈哈哈哈 ，上 有 青天 ，下 有 綠水 。
我 生 在 潯陽江 ，上咗 梁山泊 ，三更 不 改 名 四更 不 改 姓 ，綽號 混江龍 李俊 就係 我 ！
員外 如果 你 唔肯 投降 呀 ，盞 送咗 你 條命 㗎 咋 。
盧俊義 大驚嘞 ，喝一聲話 ：唔係 你 就係 我 ！
攞住 朴刀 就 對住 李俊 心口 插過去 。
李俊 見到 朴刀 插過嚟 嘞 ，一個 後關斗 ，兵 嘣噉 就 跳咗 落水 。
噉嗰隻船 喺 水面 上 咪 沊沊 轉 咯 。
盧俊義 又 用力 猛過頭 ，把 朴刀 就 插咗 落水 。
只見 船尾 有 個人 喺 水底 鑽出嚟 ，嗌咗 聲 話 ：我 係 浪裏 白跳 張順 啊 。
說話 一 完 ，將 隻 手 挾住 船尾 ，雙腳 踩住 水 ，將 隻 船 一側 ，沊 ！船底 朝天 ，就 英雄 落水 。
盧俊義 呢 ，雖然 係 好使得 啊 ，哈之 唔會 游水 喎 。
佢 跌咗 落水 喇 ，就 畀 張 順 喺 水底 攔腰 抱住 ，帶住 佢 游過咗 對岸 。
喺 岸上 呢 早就 已經 點起咗 火把 ，有 五六十 人 喺 處 等住 就 接咗 上岸 氹氹𡃈噉 圍住 ；
解低佢把腰刀 ，同佢除晒啲濕衣服 就想用繩綁喇 。
只見 神行太保 戴宗 ，跑住嚟 大聲 傳令 話 ：唔准 傷犯 盧員外 ！
跟住 ，就 有 個 小嘍啰 捧住 一包 錦繡 衣服 ，畀 盧俊義 着返 好 。
又 有 八個 小嘍啰 啊 ，抬咗 一 頂 轎 嚟 ，扶 盧 員外 上 轎 就 行喇 。
