而家 講 嗰個 九紋龍 史進 啊 ，佢 同埋 朱武 、陳達 、楊春 ，帶 齊 人馬 就 嚟到 芒碭山 下 ，擺開 陣勢 。
噉 四個 好漢 就 勒馬 企 喺 陣前 。
等咗冇幾耐啫 ，只見 芒碭山上 ，有 一彪人馬 飛奔而下 。
當先 就 兩個 好漢 ，行頭 嗰 一個 ，就係 項充 。
佢 左手 使 一面 團牌 ，背插 飛刀 二十四 把 ，右手 啊 揸住 一支 標槍 ；
喺佢後便 ，打住 一面 認軍旗 ，上面 寫住 八臂哪吒 四個 大字 。
跟住 嗰個 呢 ，就係 李兗 嘞 ，佢 左手 揸 一面 團牌 ，背 插 二十四 把 鏢槍 ，右手 啊 執住 一把 寶劍 ；
喺 佢 後便 ，打住 一面 認軍旗 ，上便 寫住 飛天大聖 噉 四個 大字 。
當時 佢哋 兩個 啊 ，係 步行 落山 。
見咗 對陣 嘅 史進 、朱武 、陳達 、楊春 四個人 ，騎住 馬 企 喺 陣前 ，嘿 ，佢 一句 説話 都 唔 講 。
小嘍啰 就 嗙嗙聲 打起 鑼 ，嗰 兩個 好漢 舞起 團牌 ，一齊 直衝 入 陣 。
一衝過嚟 ，史進 佢哋 擋 都 擋唔住 喎 ，噉 後軍 就 先 撤退 啦 。
史進 喺 前軍 嚟到 頂住 ，朱武 嗰啲 中軍 啊㗾㗾聲 吶喊 亂咁 撞起 上嚟 ，正所謂 人 停 就 馬 不停 ，殺到 一路 退走 三四十里 。
史進呀 ，爭啲 中咗 飛刀 。
楊春 就 唔 好彩 喇 ， 轉身 遲 咗 啲 ， 一 飛刀 過 嚟 就 插 正 佢 匹 馬 ， 佢 就 掉 低 匹 馬 自己 啊 逃命 走 咗 。
史進 點 一點 兵 ，嘩 ，損失咗 成 半 ，噉 就 同 朱武 佢哋 商量 ，想要 派 人 返 去 梁山泊 求救 啦 。
正喺度猶豫緊 ，只見 軍士 嚟 報告 喇 ，話 北便 大路 上 呀 ，煙塵 滾滾 ，大概 有 二千 軍馬 嚟緊 喇噉 。
史進佢哋 即刻 就 迎上去 睇下 ，哦 ，原來 係 梁山泊 旗號 。
當先馬上 兩 員 上將 ，一個 係 小李廣 花榮 ，一個呢 ，係 金槍手 徐寧 。
史進 就 接到 佢哋 ，就 講話 項充 、李袞 ，舞起 團牌 衝來 撞去 ，軍馬 都 遮攔 唔住 啊噉 。
花榮 就 話 喇 ：宋公明 大哥 見 兄長 几位 嚟咗 ，放心 唔落 ，好 後悔 啊 ，所以 就 特意 派 我哋 兩個 嚟到 幫手 。
史進 聽咗 就 非常之 歡喜 啦 ，就 聯合 埋 啲 兵馬 一齊 扎寨 。
第日 個 天 一 光 ，正 話 想起 兵 去 打過 啦噉 ，啲 軍士 又 嚟 報 喇 ，話 北便 大路 呀 又 有 軍馬 嚟 喇 。
花榮 、徐寧 、史進 就 一齊 上馬 去 接 ，原來 係 宋公明 啊 ，親自 同埋 軍師 吳學究 、公孫勝 、柴進 、朱仝 、呼延灼 、穆弘 、孫立 、黃信 、呂方 、郭盛 ，帶領住 三千 人馬 嚟到 。
史進 就 講話 打 輸咗 一 仗 ，損失咗 人馬 噉 。
吳用 話 喇 ：我哋 扎落 營寨 先 ，再 嚟 慢慢 商量 喇 。
宋江啊 性急 ，要 立即 起兵 去 剿捕 ，就 一直 嚟到 山下 。
呢個 時候 呢 ，個 天 啊 就嚟 夜 喇 ，望見 喺 芒碭山 上 啊 都 係 青色 嘅 燈籠 。
公孫勝 一睇就話 ：呢個 山寨 裏頭 青色 燈籠 咁多 ，梗係 有 個 會施行 妖法 嘅 人 喺 處 。
我哋 命令 軍馬 退後 先 ，等 聽日 ，貧道 擺 一個 陣 ，捉 呢 兩個 人 啦 。
宋江 聽咗 非常之 歡喜 ，即刻 傳令 啊 叫 軍馬 退後 二十里 扎住 營盤 。
第日一早 ，噉 公孫勝 啊 對 宋江 、吳用 講 嗰 個 陣圖 喇 ，佢 話 ：
呢個 呢 ，就係 漢末 三國 時候 ，諸葛孔明 擺 石 為 陣 嘅 陣法 啊 。
嗱 ，四面八方 ，分為 八八六十四 隊 ，中間 ，由 大將 守住 。
佢嘅 形象 呢 ，就係 四頭八尾 ，左旋 右轉 ，按照 天地 風雲 之 機 ，龍 虎 鳥 蛇 之 狀 啊 。
呢 ，等 佢 落山 衝 入到 陣 喇 ，我哋 兩軍 啊 一齊 分開 ；
等佢哋 一 入陣 ，一睇見 七星號 旗 升起 ，我哋 就 將 個陣 變為 長蛇陣 。
到嗰陣時 ，貧道 就 作起 道法 ，等 呢 三個 人 喺 陣 裏頭 啊 ，前後 無路 左右 無門 。
同時呢 ，我哋 喺 坎地 掘 一個 陷坑 ，一路 逼 呢 三個 人 去到 嗰度 。
噉 我哋 喺 兩便 埋伏 定 撓鉤手 ，準備 捉人 都 得 喇 。
宋江 聽咗 非常之 高興 ，即刻 發佈 命令 ，要 大小 將校 按照 命令 行動 。
噉啊再用八員猛將守陣 ，邊八員猛將呢 ？
就係 呼延灼 、朱仝 、花榮 、徐寧 、穆弘 、孫立 、史進 同 黃信 。
噉啊叫柴進 、呂方 、郭盛 呢 ，暫時 就 統率 中軍 ；
宋江 自己 ，同 吳用 、公孫勝 帶領 陳達 掌住 面 七星旗 ，嚟 指揮 呢 一場 大戰 。
叫 朱武 啊 帶 住 五個 軍士 ， 喺 附近 嘅 高坡 上 便 啊 ， 就 睇 住 對陣 嘅 情形 ， 隨時 嚟 報告 噉 。
當日 ，巳牌 嘅 時候 ，梁山人馬 靠近 芒碭山 擺開 陣勢 ，搖旗 擂鼓 啊 嘍 打咯 喎 。
只見 芒碭山上 ，三二十 面 鑼 打到 嗙嗙聲 震天響 。
佢 哋 三個 頭領 一齊 嚟 到 山下 ， 將 三千 幾人 擺開 。
左右 兩邊 呢 ，就係 項充 、李袞 。
中間 騎住 馬 嘅 ，就係 嗰個 為 頭 嘅 好漢 ，混世魔王 樊瑞 喇 。
佢 係 濮州 人氏 ，少年 嘅 時候 ，做過 道士 先生 ，喺 江湖 上 呢 ，學得 一身 好 武藝 。
噉嗰個 混世魔王 樊瑞 啊 騎住 一匹 黑馬 ，企喺 陣前 。
嘿嘿 ，佢 雖然 會 使 神術妖法 ，但係 唔識 陣勢 㗎 噃 。
佢 見到 宋江 嘅 軍馬 ，喺 四面八方 擺成 陣勢 ，佢 個 心 仲 暗暗 歡喜 添 ，佢 話 ：嘿 ，你 如果 擺陣 就 中 我 嘅 計 咯 。
佢 就 吩咐 項充 、李袞 話 喇 ：
等陣 見到 風 起 ，你 兩個 啊 帶住 五百 滾刀手 殺入去 陣 裏頭 啦 。
項充 、李袞 得咗 令 ，就 各人 都 執住 團牌 ，挺起 標槍 飛劍 ，就係 等 樊瑞 作法 嘞喎 。
呢個 時候 ，只見 樊瑞 企 喺 馬上 ，左手 挽定 流星 銅錘 ，右手 啊 揸住 混世魔王 寶劍 ，個口裏 便 啊 念念有詞 喝 一聲 ：疾 ！
嘿呀 只見 呼呼聲 狂風四起 ，飛沙走石 ，天昏地暗 日月無光 啊 。
項充 ，李袞 ，哦嗬噉 大聲 吶喊 ，帶住 五百 滾刀手 咪 殺入去 咯 。
宋江嘅 軍馬 見到 殺過嚟唄 ，一分分開 做 兩邊 。
項充 、李袞 一 衝入去 陣 ，兩便 嘅 強弓 硬弩 啊 猛 咁 射住 人 。
所以 項充 、李袞 呢 ，只能夠 帶住 四五十個人 入咗去 啫 ，其他 嗰啲 冚𠾴 唥 退返 去 本陣 。
宋江 喺 高坡 上 便 ，望見 項充 、李兗 已經 入 咗 陣 喇 ，就 嗌 陳達 將 嗰面 七星號 旗 升起 。
一升起號旗 ，嗰座陣勢 呀 紛紛 滾滾 嘶嘶 沙沙 變做 長蛇陣 喇 。
項充 、李袞 喺 陣 裏 便 東 趕西 走 ，左 盤 右 轉 ，搵 路 又 搵唔到 噃 。
高坡 之上 ，朱武 用 面旗仔 喺 嗰處 指住 。
佢 兩個 人去 東便 咩 ， 朱武 就 向東 指 ， 如果 行去 西便 就 向 西指 。
公孫勝 喺 高坡 處 睇到 ，掹出 佢 嗰把 松文古定劍 出嚟 ，口中 啊 念起 咒語 ，喝 一聲 話 ：疾 ！
即刻 將 嗰 浸 風 轉 咗 ， 一味 就 跟 住 項充 、 李 袞 嘅 腳 邊 亂 咁 捲 。
佢 兩個人 喺 陣 裏頭 呀 ，只見 天 昏 地 暗 啊 日月 無光 ，一個 軍馬 都 唔 見到 ，望埋 去 都 係 黑氣 。
後便 嗰啲 冚𠾴 唥 唔見晒 喇 。
嘿項 充 、 李袞 就 心慌 咯 喎 ， 一味 想 奪路 返返 去 啦 ， 但 係 搵 極都 搵 唔 到 返 去 嗰 條 路 ， 死 喇 呢 趟 。
正話行行下 ，忽然間 個地雷 轟噉 大震一聲 ，兩個人 啱啱 嗌咗一聲 話 死咯 ，已經 轟沙噉 啊 打個關斗 ，碌咗 落去 陷坑 。
陷坑 兩便 都係 撓鉤手 等住 㗎喇 ，就 將 嗰 兩個 勾起 身嚟 ，用 麻繩 綁住 ，解上去 山坡 請功 。
呢個 時候 ，宋江 將 鞭梢 一 指 ，三軍 一齊 掩殺 過去 。
樊瑞 帶住 人馬 趯 返 上山 ，呢次 呢 好多人 都 走唔甩 ，就 損失咗 成 大半 人馬 。
宋江 收兵 ，眾位 頭領 都 喺 帳前 坐落 ，軍士 呢 就 押住 項充 、李袞 嚟到 。
宋江 見到 ，連忙 叫 解咗 繩索 ，親自 同 佢哋 敬酒 ，佢 話 ：
兩位壯士 ，唔好見怪啊 ，事關 兩軍 對敵 ，唔能夠 唔係噉嘅 。
小人 宋江 ，久聞 三位 壯士 嘅 大名 ，好想 請 你哋 嚟 上山 同 聚 大義 。
皆因 不得其便 所以 錯過啫 。
如果 唔 嫌棄 咯 ，能夠 同 歸 山寨 真係 不勝萬幸 啊 。
佢哋 兩個 聽咗 就 伏 喺 地下 叩頭 話 ：
早就 聽聞 及時雨 嘅 大名 ，只係 小弟 我哋 冇 緣分 ，未曾 見面 。
原來 兄長 ，果然 係 咁 有義氣 嘅 。
以前 我哋 兩個 不識 好人 ，實在 係 同天地 相拗 。
今日既然被擒咯 ，萬死都係嫌輕 ，兄長反而 仲以重禮相待 。
如果 唔 殺 我哋 ，今後 我哋 誓死 效力 嚟 報答 大恩 。
樊瑞 嗰個人 ，冇 我哋 兩個 仲 點 逳得 㗎 ？
頭領 如果 肯 放 我哋 一個人 咁多 返去 ，就 去 說 阿樊瑞 嚟 投降 ，唔知 頭領 你 尊意 如何 呢 ？
宋江 呢 就 話 喇 ：壯士 ，使 乜 押住 一個 人 喺度 呢 ，兩位 一齊 返去 貴寨 就係 喇 。
宋江 我 聽日 專候 佳音 。
兩個人 拜謝 宋江 話 ：
真係大丈夫 ！如果 樊瑞 佢 唔肯 投降 ，我哋 就 捉佢嚟 ，奉獻 於 頭領 之 麾下 。
宋江 聽咗 非常之 高興 ，請 佢 入去 中軍 ，擺酒 請 佢哋 飲 ，換返 兩套 新衣服 ，攞咗 兩匹 好馬 ，嗌 小嘍啰 攞返 啲 槍牌 武器 送返 畀 佢哋 兩個人 ，返去 山寨 。
兩個人 一路 呀 ，嘿 感恩不盡 啊 。
噉佢哋 返到嚟 芒碭山腳 ，小嘍啰 一 見到 ，哎呀 奇怪 喇 乜 返得嚟 嘅 喂 ，咪 即刻 接 佢哋 上 山寨 咯 。
樊瑞 問 兩個 返嚟 做咩嘢事 啊噉 ，項充 、李袞 就 話 喇 ：
我哋呀 ，真係 逆天之人 啊 大哥 ，應該 萬死 啊 。
樊瑞話喇 ：兄弟 ，乜噉 講 呢 ？
於是 兩個人 就 將 宋江 點樣 點樣 義氣法 ，講咗 一大遍 。
樊瑞 就 話 喇 ：既然 宋公明 係 咁 大賢大德 ，義氣 為重 ，噉 我哋 就 不可 逆天 嘞 噃 。
聽 朝早 ，我哋 一齊 落山 投降 佢 啦 。
噉 兩個 就 話 喇 ：係咯 ，我哋 都 係 為 呢件事 嚟 㗎 。
於是 漏夜 將 山寨 收拾 好 。
第日一天光 ，三個人 就 一齊 落山 ，一直 嚟到 宋江 個 寨 前 ，叩完頭 就 伏喺地 嚟 。
宋江 扶 返 起 三個人 ，請 入去 帳篷 裏 便 坐落 。
三個 人 見到 宋江 ， 一 啲 相 疑 嘅 意思 都 冇 ， 於是 就 彼此 傾心吐膽 ， 將 自己 嘅 生平 嘅 事 講出 嚟 。
跟住 ，佢哋 三個 請 眾頭領 ，上去 芒碭山寨 ，殺牛 劏馬 款待 佢哋 。
同時呢 ，一面呢 賞賜 慰勞 三軍 。
飲宴 完喇 ，樊瑞 就 拜 公孫勝 做 師父 喎 。
宋江啊做主 ，叫 公孫勝啊 ，將 五雷天心正法 就 傳畀 樊瑞 ，樊瑞梗係 歡喜 到 不得了 定啦 。
過咗幾日 ，就 牽牛拉馬 ，裝起晒 山寨 嘅 錢糧 ，孭起 行李 ，聚集 人馬 ，放火 燒咗 山 ，跟住 宋江 啊 班 師 返去 梁山泊 。
當 宋江 同埋 眾位 好漢 軍馬 ，嚟到 梁山泊 邊 ，正話 要 過渡 嘅 時候 啊 ，只見 喺 蘆葦 岸邊 嘅 路 上 ，有 一 個 大漢 對住 宋江 跪低 就 拜 。
宋江 連忙 落馬 扶起 佢 ：
足下 姓甚名誰 ？ 係 邊處 人士 啊 ？
嗰 個 大漢 就 回答 話 喇 ： 小人 姓段 ， 叫做 景住 啊 ， 啲 人 見 小人 赤 髮 黃鬚 ， 都 嗌 小人 做 金毛犬 嘅 ， 係 涿州 人氏 。
平時 呢 ，就係 靠 去 金國 嗰 便 嚟 偷 馬 為 生 。
今年 春天 我 去 到 ， 槍竿 嶺北 便 ， 偷 到 一匹 好馬 ， 好似 雪 咁 白 嘅 ， 周身 都 冇 一條 雜色 嘅 毛 ；
從頭到尾 ，一丈長 ，馬蹄 到 背脊 呢 就 八尺 高 。
嗰 匹 馬 ，又 高 又 大 ，一 日 能夠 行 千里 咁 遠 ，喺 北方 出 晒 名 㗎 喇 ，叫做 照夜玉獅子馬 ；
係 大金 國王子 騎 㗎 ，放 喺 槍竿嶺 下 ，畀 小人 偷 咗 嚟 。
小人 喺 江湖 上 ，只係 聽聞 及時雨 嘅 大名 ，又 冇 路數 嚟 見 你 ，因此 係 想 帶 呢匹馬 ，嚟 獻畀 頭領 ，表示 下 我 進身 嘅 心意 啦 。
唉 ，點 知道 小人 喺 凌州 西南面 ，曾頭市 經過 嘅 時候 ，畀 個 曾家 五虎 搶咗去 。
小人 當時 就 話 ：係 梁山泊 宋公明 嘅 馬 嚟 噃 。
嘿 ，唔提 仲好啊 ，嗰班傢伙 用 嗰啲 説話 污糟邋遢 ，嚟到 侮辱 你 ，嘿真係 難聽啊 小人 都 唔敢 講出嚟啊 。
好彩 畀 我 走得甩身 ，噉啊 走嚟 呢處 講畀 頭領 你 知 。
宋江 睇下 呢個 人 ，雖然 生得 骨瘦形粗 ，但係 一表非俗噃 ，個心 都 好 歡喜 。
宋江 就 話 喇 ：既然 係 噉 ，就 一齊 去 山寨 再 嚟 商量 啦 。
於是啊 帶住 段 景 住 一齊 落船 ，到咗 金沙灘 上岸 。
晁天王 同埋 眾位 頭領 啊 ，迎接 大家 上去 聚義廳 。
宋江 就 叫 樊瑞 、項充 、李袞 同埋 眾位 頭領 見過 面 。
段景住 呢 亦都 一同 參拜咗 。
然後 就 敲鑼打鼓 ，擺酒 慶賀 喇 。
宋江 見到 山寨 啊 連氣 增添咗 咁 多人馬 ，四方 豪傑 就 望風 而 來 ；
因此呢 ，就 叫 李雲 、陶宗旺 監工 ，再 起 多啲 房屋 同埋 四面 嘅 寨柵 。
段景住 又 提起 嗰匹馬 嘅 好處 ，宋江 就 吩咐 神行太保 戴宗 啊 ，去 曾頭市 探聽 下 嗰匹馬 嘅 下落 。
噉 戴宗 去咗 四五日 呢 ，返嚟 就 講畀 大家 聽 ，佢 話 ：
大哥 ， 各位 ， 呢 個 曾 頭市 啊 ， 總共 有 三千 幾家 人 ， 其中 有 一家 叫做 曾家府 。
個老豆呢 ，本來 係 大金國人 嚟嘅 ，叫做 曾長者 。
生咗 五個 仔 ，號為 曾家 五虎 喎 ：
大仔 叫 曾塗 ，二仔 叫做 曾密 ，三仔 叫做 曾索 ，四仔 叫做 曾魁 ，五仔 叫做 曾星 。
噉又 有 個 教頭 史文恭 ，一 個 副教頭 蘇定 。
噉佢哋 喺 曾頭市 上 呢 ，聚集住 六七千 人馬 ，扎好晒 營寨 ，做咗 足足 五十幾 架 囚車 。
佢哋 發誓 話 啊 ，要 同 我哋 勢不兩立 喎 ，一定 要 捉盡 我哋 山寨 嘅 頭領 喎 。
嗰匹 千里 玉獅子馬 ，而家 畀咗 教頭 史文恭 嚟 坐 。
豈有此理 真係 激死你啊 ，嗰班 衰公 ，仲 亂噏 幾句 咩嘢 說話 ，叫 街市 上邊 啲 細路 啊 冚𠾴唥 都 唱 ，唱咩 呢 你 估 ？
搖動 鐵鐶鈴 ，神鬼 盡皆 驚 。鐵車 並 鐵鎖 ，上下 有 尖釘 。
掃蕩 梁山 清水泊 ，剿除 晁蓋 上 東京 ！
生擒 及時雨 ， 活捉 智多星 ！ 曾家生 五虎 ， 天下 盡 聞名 噉 啊 ， 哎 ！
晁蓋 聽完 呀 ，嘩 嬲 啊 ，佢 話 喇 ：
呢班畜生 ，真係 豈有此理 ！
我要 親自 去 行 一趟 ，唔捉晒 呢班 嘢 就 誓不回 山 ！
宋江 話喇 ：大哥 係 一山之主 ，不可 輕動 啊 ，等 小弟 去 啦 。
晁蓋話 ：唔係 我要 搶 你嘅 功勞 啊 。
你 落山 好多次 喇 ，廝殺 勞困 ，我 而家 替 你 行 一趟 。
下次 有事 先至 賢弟 你 去 啦 。
宋江 苦苦噉 勸諫 佢 都 唔聽 。
晁蓋 點起 五千 人馬 ，請咗 二十 個 頭領 啊 ，同 佢 一齊 落山 。
其他嘅 呢 ，都 同 宋公明 嚟 守衞 山寨 。
晁蓋 點邊 二十個 頭領 呢 ？就係 林沖 、呼延灼 、徐寧 、穆弘 、劉唐 、張橫 、阮小二 、阮小五 、阮小七 、楊雄 、石秀 、孫立 、黃信 、杜遷 、宋萬 、燕順 、鄧飛 、歐鵬 、楊林 、白勝 ，總共 係 二十 個 頭領 ，率領住 三軍人馬 落山 ，出發 去 曾頭市 。
噉 宋江 同 吳用 、公孫勝 同埋 眾位 頭領 啊 ，就 去 金沙灘 同 佢哋 餞行 。
飲飲下酒 ，忽然之間 ，呼噉 一浸 狂風 ，將 晁蓋 新做 嘅 認軍旗 啪聲 吹斷 兩橛 。
大家 見到 呀 哎呀 面色 都 變晒 。
吳學究 就 勸 佢 話 喇 ：呢啲 係 不祥之兆 噃 ，兄長 換 個 日子 出兵 好 噃 。
宋江 亦 都 勸 佢 話 喇 ：大哥 你 正 話 要 出兵 ，啲 風吹 斷 咗 認 軍旗 於 軍 不利 啊 。
不如 過下 先 ，以後 先至 去 同 嗰班 傢伙 算賬 罷啦 。
晁蓋 話 喇 ：天地 風雲 何 足 為怪 ？
如果 唔趁住 春暖 嘅 時候 去 捉佢 ，噉 等到 嗰班 傢伙 養成 氣勢 ，嗰陣 先至 去 進兵 呀 就 遲咯 。
你哋 唔好 攔阻 我 喇 ，我 點 都 要 行 一趟 㗎 喇 。
宋江 拗 佢 唔住 。
晁蓋 就 帶住 人馬 渡過 金沙灘 出發 。
宋江 啊 好 憂心 啊 ，佢 返到去 山寨 ，就 再 叫 戴宗 下山 去 探聽 消息 。
而家 講 下 晁蓋 佢 帶住 五千 人馬 ，二十 個 頭領 就 嚟到 曾頭市 附近 ，扎落 營寨 。
第日 ，首先 佢 帶住 各位 頭領 ，上馬 去 睇 曾頭市 。
佢哋 睇睇下 ，只見 喺 柳林 當中 啊 飛出 一彪 人馬 嚟 ，約莫 有 七八百 人 啦 。
當先 一個 好漢 ，戴住 熟銅盔 ，披住 連環甲 ，使 一條 點鋼槍 。
呢個人 乃係 曾家 第四仔 曾魁 ，佢 高聲 噉 喝話 ：
呸 ！你哋 呢班 梁山泊 反國 草寇 ，我 正係 要嚟 捉 你哋 去 解 官 請 賞 ，今日 真係 天賜 其便 啊 ！
你 仲唔 下馬 受綁 更 待 何時 啊 ？
晁蓋 就 嬲 到 極 喇 ，佢 回頭 一 睇 ，已經 有 一位 大將 出馬 去 迎戰 曾魁 嘞 ，係 邊個 呢 ？
就係 梁山 初 結義 嘅 好漢 ，豹子頭 林沖 。
佢 兩個 交鋒 鬥咗 二十幾個 回合 ，曾魁 諗 啊 鬥 林沖 唔過 喇 就 收槍 回馬 ，跑返 入去 柳林 裏 便 咯 喎 。
林沖 呢 ，亦都 勒住 馬 唔 去 追 佢 。
晁蓋 就 帶住 啲 軍馬 返去 營寨 就 商量 攻打 曾頭市 嘅 計策 。
林沖話 ：聽日 ，我哋 一直 去到 市口 挑戰 ，睇 清楚 佢 個 虛實 點樣 再嚟 商量 啦 。
於是 第日 啱啱 天光 ，就 帶領 五千 人馬 去到 曾頭市口 平川 曠野 嘅 地方 ，排好 陣勢 ，擂鼓 吶喊 咯噃 。
只聽見 曾頭市上 啊 ，轟轟轟 ，炮聲響處 ，大隊 人馬 出嚟 喇 ，一字噉 擺住 七個 好漢 ：
中間 ，就係 總教頭 史文恭 ，上首便 ，副教頭 蘇定 ，下首便 就係 曾家 嘅 長子 曾塗 ；
左便 係 曾密 、 曾魁 ， 右邊 係 曾 升 、 曾索 ， 都 係 全身 披掛 。
個 教頭 史文恭 啊 ， 彎弓 插箭 ， 坐 住 嗰 匹 馬 呢 就 係 千里 玉獅子 馬 喇 ， 手裏 便 ， 使 一支 方天畫 戟 。
打 完 三通 鼓喇 ， 只見 曾家陣 裏 便 啊 ， 推出 幾架 囚車 ， 就 放 喺 陣前 。
曾塗 指住 梁山人馬 大聲 噉 鬧 ：反國 草賊 ，見唔見到 我哋 嘅 囚車 啊 ？
我 哋 曾家虎個 英雄 啊 ， 如果 殺死 你 嘅 唔 算 好漢 。
我要 一個 個 都 捉 你哋 生公 ，裝 喺 架 囚車 裏 便 ，解 上去 東京 碎尸 萬段 。
你哋 如果 想 生 嘅 就 趁早 投降 啦 。
晁蓋 聽到 發火 啊 ，挺槍 出馬 就 直奔 曾塗 。
大家 怕 晁蓋 有 咩咿逳 ，就 一齊 掩殺 過去 ，於是 兩軍 就 混戰 起嚟 喇 。
曾家 嘅 兵馬 呢 一步步 退 返 入去 村 裏頭 。
林沖 同 呼延灼 就 緊緊噉 保護住 晁蓋 ，東 趕西 殺 。
林沖 見 下啲 路 都 唔係 好行 嘅 又 唔熟 ，就 退返 出嚟 收兵 。
呢次呢 ，兩便 就 各自 損傷咗 啲 人馬 。
晁蓋 返到去 寨 裏頭 個 心 啊 好 憂慮 。
大家 就 勸佢 話 喇 ：大哥 ，你 寬心 啦 ，唔使 愁悶 嘅 ，影響 貴體 就 唔好 喇 。
嗱往時 宋公明 阿哥 出兵 亦都 失過 利 㗎 ，之 好快 又 得勝 回寨 㗎喇 。
今日 混戰 ，各人 都 損失 咗 啲 軍馬 ，我哋 又 冇 輸 畀 佢 ，使 乜 憂悶 呢 ？
晁蓋 只有 鬱鬱不樂 。
連氣三日 ，每日 都 去 挑戰 ，哈 ，曾頭市 上 呀 ，一個人 都 唔 出嚟 應戰 噃 又 。
到咗 第四日 ，有 兩個 和尚 嚟到 晁蓋寨 裏頭 求見 。
啲人 就 帶到 佢 中軍帳 啦 ，噉 兩個 和尚 就 跪喺度 話 喇 ：
小僧 ，係 曾頭市 東便 法華寺 嘅 監寺 僧人 啊 。
唉 ，嗰 曾家 五虎 ，時時 都 嚟 本寺 作 踐啰嗦 ，勒索 金銀財帛 就 無所不為 。
小僧 已經 知道晒 佢哋 嘅 出沒 地方 ，呢次 特意 嚟 懇請 頭領 去 劫寨 ，剿除 咗 佢哋 呀 ，真係 造福 當地 嘅 百姓 咯 。
晁蓋 聽 佢 噉 講 就 好 歡喜 ，就 請 兩個 和尚 坐落 ，擺 酒 嚟 款待 。
林沖 就 勸 佢 喇 ：大哥 ，唔好 聽 佢哋 講 ，其中 ，必定 有 詭計 。
和尚 就 話 喇 ：唉 小僧 係 個 出家人 ，點 敢 講 大話 吖 ？
素來 聽講 梁山泊 行 仁義 之 道 ，所過 之處 ，都係 唔 騷擾 民眾 嘅 ，因此 就 特意 嚟 拜見 啫 。
何況 曾家 未必 贏得 頭領 嘅 大軍 ，噉 使 乜 疑心 啊 ？
晁蓋 話 喇 ：兄弟 你 唔好 疑心 ，誤咗 大事 ，今晚 我 自己 去 走一趟 。
林沖 就 話 ：大哥 你 唔好 去 ，我哋 分 一半 人馬 去 劫寨 ，大哥 你 喺 外 便 接應 啦 。
我 自己 唔 去 邊個 肯 向前 呢 ？你 留 一半 軍馬 喺 外 便 接應 。
林沖 就 問 喇 ：噉 大哥 你 帶 邊個 入去 啊 ？
晁蓋話 ：我 點 十個 頭領 ，分 二千五百 人馬 入去 。
於是 晁蓋 就 點咗 ：劉唐 、阮小二 、呼延灼 、阮小五 、歐鵬 、阮小七 、燕順 、杜遷 、宋萬 、白勝 啊 十個 頭領 。
當晚 煮飯 食咗 ，啲 馬 呢 ，除低 晒 啲 唥唥 ，軍士 就 個個 都 銜住 個 銅錢 。
喺 黑夜 之中 啊 ，靜悄悄 噉 跟住 嗰 兩個 和尚 ，飛 咁 快 直奔 法華寺 喇 。
去到喇 ，晁蓋 落馬 ，行入 間寺 裏 便 ，咦 ，見到 一個 和尚 都冇嘅 ，就 問 嗰 兩個 和尚 話 ：
點解 咁大 間 寺院 ，連 一個 和尚 都 唔見 嘅 ？
個 和尚 就 回答 話 ： 唔 係 就 係 曾家 啲 畜生 ， 成日 走 嚟 啰嗦 作踐 ， 冇 法子 ， 只有 各自 還俗 走 晒 咯 。
呢而家 剩返 長老 同埋 幾個 侍者 ，喺 後便塔院 嗰處 住 咋嘛 。
哎頭領啊 ，你 暫時 叫 啲 人馬 休息下 先 ，等 夜啲 喇 ，小僧 就 帶 你哋 去 嗰個 傢伙 嘅 寨 裏頭 。
晁蓋 問 ：佢哋 嘅 寨 喺 邊處 啊 ？
佢 有 四個 營寨 ，北寨 呢 ，就係 曾家 兄弟 屯兵 嘅 地方 喇 。
如果 打到 嗰個 寨 呀 ，第二啲 都 唔緊要 咯 。
嗰 三個 寨 唔 使 理 佢哋 咁多 咯 。
晁蓋 就 話 ：噉 邊個 時候 去 好 呢 ？
而家 先至 係 二更天 啫 ，等 三更 時候 去 就 啱喇 ，佢 冇 準備 啊 。
噉 初時 啊 ，晁蓋 佢哋 聽見 曾頭市 裏 便 ，伶伶俐俐 更 鼓響 ；
再聽咗 半個 更 咁 耐 ，就 完全 聽唔到 打更 響 喇 。
個和尚 就 話 ：啲 軍佬 怕 瞓晒 喇 ，而家 去 就 啱喇 。
噉嗰 兩個 和尚 啊 行 先 帶路 。
晁蓋 就 同埋 各位 頭領 上馬 ，帶住 兵 離開咗 法華寺 ，跟住 和尚 走嘞噃 。
行咗唔到 五里幾路 ，嘿 ，喺 黑影處 唔見咗 兩個 和尚 。
前軍 就 唔敢 行 啦 ，睇下 四便 ，又 路 雜 難行 又 唔見 有人家 嘅 。
啲 軍士 就 慌起上嚟 ，就 報畀 晁蓋 知 。
呼延灼 即刻 叫 大家 ，急急 跟住 舊路 返 扯 。
行咗唔到百零步 ，只見 四面 金鼓 齊鳴 喊聲 震地 ，望過去 呀 都係 火把 。
晁蓋 佢哋 帶住 兵馬 ，奪路 而 走啊 。
啱 啱 轉 咗 兩個 彎 ， 撞 正 一彪 軍馬 當頭 亂箭 噉 射過 嚟 ， 哎呀 點知 一箭 ， 就 射正 晁蓋塊面 ， 啪 聲 倒 撞 咗 落馬 。
好在 呼延灼 、燕順 兩個 就 搏命 救返 起佢 。
背後 劉唐 、白勝 啊 掩護住 救返 晁蓋 上馬 ，殺出 村口 。
喺 村口 呢 ，林沖 佢哋 帶住 兵馬 嚟 接應 ，噉樣 先至 啱啱 頂得住 。
兩軍 啊 混戰 一番 就 一路 殺到 天光 ，就 各自 返返去 寨 。
林沖 返嚟 點 下 人馬 ，三阮 、宋萬 、杜遷 就 混水路 逃 返 條命 返嚟 。
帶入 去 嗰 二千五百 人馬 呢 ，只係 剩低 一千零啫 ，就 跟住 歐鵬 。
大家 返到去 帳篷 ，嚟 睇下 晁蓋 啦 ，嗰 支 箭 呀 ，射正 喺 塊 面 處 。
掹返 支 箭 出嚟 ，嘩 ，流 好多 血 ，暈咗 。
睇下 支 箭 上 便 ，有 史文恭 三 個 字 。
林沖 嗌 人 攞 金瘡藥 嚟 同 佢 敷 好 ，呢 支 箭 啊 原來 係 一 支 藥箭 嚟 。
晁蓋 中咗 箭毒 啊 ，已經 唔會 講説話 。
噉究竟 晁蓋 生死 如何 呢 ，噉下次 先至 講喇 。
