朱仝 就 刺配 滄州 吖 ， 嗰 個 知府 相公 啊 見到 朱仝 一表非俗 ， 貌 如 重棗 ， 長 鬚 過 腹 ， 好 喜歡 佢 。
朱仝 個人 又 好 啊 ，噉 就 留佢 喺 身邊 差遣 。
有一日 ，知府 正 喺 大堂 坐 ，朱仝 呢 ，就 喺 台階 下 便 企 喺 處 伺候 。
知府 就 叫 朱仝 行 上嚟 ，佢 話 ：
朱仝 ，你 為咩事 放咗 雷橫 ，搞到 自己 刺配 嚟到 呢處 啊 ？吓 。
朱仝 就 話 喇 ： 小人 點敢 有意 放走 雷橫 吖 ， 不過 係 一時 唔 小心 ， 畀 佢 走 咗 啫 。
哦 ，噉 ，你 點解 得 咁 重罪 㗎 ？
因為 畀 原告人 咬實 ，話 小人 係 故意 放走 雷橫 嘅 ，所以 判得 咁 重 。
雷橫 為咩事 打死 嗰個 娼妓 呢 ？吓 。
於是 朱仝 就 將 雷橫 上面 嗰啲 事 啊 ，詳詳細細 噉 講咗 一次 。
知府 就 話 喇 ：噉 你 梗係 見 佢 孝心 ，為咗 義氣 就 放咗 佢 係咪 呢 ？
唔係啊 ，唔係 ，小人 點 敢 欺 公 罔上 呢 ？
正喺度講緊 ，只見 屏風 後 便 有 個 小 衙內 行咗出嚟 。
呢個 細路仔 年方 四歲 ，生得 呀 好好樣 嘅 。
佢 係 知府 個 親生 仔 ，知府 錫 到 佢 呀 如 金 似 玉 啊 。
嗰個 小衙內 出到嚟 ，見到 朱仝 就 行過 佢 身邊 要 佢 抱 喎 。
朱仝 就 唯有 抱起 小衙內 喺 手 嚟 啦 。
嗰個 小衙內 ，用 嗰 雙 手仔 掹住 朱仝 啲 長鬚 ，佢 話 ：我要 呢個 鬍鬚佬 抱抱 。
知府話喇 ：乖仔 ，快啲 放開手 ，唔好 咁曳 。
嗯 ，我 就 要 呢個 鬍鬚佬 抱 ，同 我 去 玩玩 。
朱仝 話 喇 ：等 小人 抱 衙內 去 府前 便 散 下 步 玩 一陣 就 返嚟 。
知府話 ：乖仔 既然 要 你 抱 ，噉 你就 抱佢 玩 一陣 返嚟 啦 。
朱仝 就 抱住 小衙內 ，行出咗 衙門 ，就 買 啲 靚 糖果 畀 個 細佬哥 食 ，行咗 一轉 就 再 抱返返入嚟 府裏 便 嘞 。
知府 見咗 ，就 問 衙內 話 喇 ：乖仔 ，先頭 去 邊度 嚟 啊 ？
個 鬍鬚佬 ，同 我 去 街 玩玩 啊 ，又 買 啲 糖糖 請 我 食啫 。
知府 就 話 ：朱仝 ，你 去 邊處 搵 錢 嚟 買 嘢 畀 我 乖仔 食 啊 ？
聊表 小人 孝順 之心 ，何足 掛齒 呢 ？
知府 就 叫 人 攞 酒 嚟 賞 畀 朱仝 飲 。
府裏 便 個 妹仔 捧住 銀瓶 果盒 ，嚟 斟酒 嘞 ，賞咗 畀 朱仝 呀 飲 三 大盅 。
知府話 ：幾時 我 乖仔 要 你 去 玩 ，噉 你 即管 抱佢 去 玩 啦 ，啊 。
係 ，小人 遵命 。
噉 從 呢次 開始 啊，每日 朱仝 都 嚟 同 小衙內 出去 街 玩 。
朱仝 荷包 大把 錢 ，只要 知府 大人 高興 咯 ，小衙內 食 糖仔 咋嘛 咪 食到 夠 係啦 。
過咗 半個月 之後 ，就係 七月十五 ，係 盂蘭節 啊 ，照例 到處 都 放 河燈 ，燒衣 拜神 嘅 。
當晚 ，內堂 裏 便 嘅 奶媽 就 話 喇 ：
朱都頭啊 ，小衙內 今晚 要 去 睇 河燈 喎 ，夫人 吩咐 叫 你 抱佢 去 睇 下 。
係 ，小人 抱佢 去 啦 。
嗰個 小衙內 着 一件 綠 紗衫仔 ，頭上 用 兩條 珠鏈 ，扎住 兩隻 丫腳髻 ，喺 裏 便 行 出嚟 都 唔知 幾 骨指 。
朱仝 就 將 佢 放 上 膊頭 同 佢 騎 膊 馬 ，噉 出咗 府衙門 ，一直 去 地藏王廟 睇 放 河燈 喇喎 。
嗰 陣 係 初 更 時分 ， 朱仝 孭 住 個 小 衙內 ， 喺 間 廟 沊沊𡃈 睇 咗 一輪 ， 然後 就 去 水陸 堂 放生池 邊 ， 睇 人 哋 放 河燈 。
嗰個 小衙內 伏喺 欄杆 上便 ，睇 咗 都 唔知 幾 高興 。
忽然間 ，有人 喺 後便 掹 下 朱仝 嘅 衫袖 。
大哥 ，唔該 借過 幾步 有 說話 同 你 講 啊 。
朱仝 擰轉頭 一睇 ，嗬 ，原來 係 雷橫 ，佢 吃咗 一驚 。
小衙內 ，你 落嚟 先 ，嗱 你 坐 喺度 ，吓 ，我 去 買 糖 嚟 畀 你 食 ，你 千祈 唔好 行開 噃 。
你 快啲 嚟噃 ，我 要 去 橋 上面 睇 放 河燈 。
嗯 ，我 就嚟㗎喇 ，你 唔好 行開 ，乖 ，吓 。
噉 朱仝 就 擰轉身 問 雷橫 ：賢弟 ，你 點解 嚟到 呢處 啊 ？
雷橫 就 掹住 朱仝 去到 靜僻 嘅 地方 ，行咗 個 禮話 ：
自從 阿哥 你 救咗 我 條命 ，我同老母 ，冇 地方 好 去 ，只有 上 梁山泊 ，投奔 宋公明 入夥 啦 。
小弟 講起 阿哥 你 嘅 恩德 ， 宋公明 呀 ， 亦 都 記住 阿哥 你 往日 放 佢 嘅 恩情 啊 。
晁天王 同埋 眾位 頭領 ，都 感激不淺啊 ，所以 特登 叫 吳軍師 同埋 兄弟 嚟 探 你 。
朱仝 話 ：吳 先生 而家 喺 邊處 呢 ？
吳用 喺度 。吳學究 喺 後 便 行咗 出嚟 ，一 講完 就 行禮 。
朱仝 連忙 答禮 話 ：哎呀 好耐 冇見 ，先生 一向 都 好嘛 ？
山寨 裏 便 各位 頭領 問候 你 。
呢次 我 同 雷 都 頭 特意 嚟 請 足下 上山 ，同 聚 大義 。
嚟到 呢處 好多 日 喇 ，就係 唔敢 去 見 你 。
今晚 等到 你 喇 ，請 仁兄 即刻 起行 ，一齊 去 山寨 ，晁 、宋 二公 呀 ，等咗 足下 好耐 㗎 喇 。
朱仝 聽咗 ，哎呀 ，好耐 都 唔出得聲 。
收尾佢 先至 話 ：先生 ，呢啲 說話 唔好 提 啊 ，如果 畀 外人 聽見 就 唔好 喇 。
雷橫 賢弟 佢 犯 咗 死罪 ， 我 因為 義氣 放 咗 佢 ， 佢 又 冇 出頭之日 㗎 喇 ， 所以 就 上山 入夥 。
我 亦 為 佢 充軍 嚟到 呢處 ，哎 ，如果 蒼天 可憐 ，過得 一年半載 ，我 服刑期滿 能夠 回鄉 ，我 就 再 做 個 良民 就算 。
我 點 肯 做 呢啲 噉嘅 事 呢 ？
你 兩位 請 返去 ，唔好 喺 呢處 惹出 是非 嚟 啊 。
雷 橫話 喇 ： 阿哥 ， 你 喺 呢 處 無非 係 在 人 之下 ， 服侍 他人 ， 呢 啲 都 唔 係 大丈夫 男子漢 嘅 勾當 。
嗱 ，唔係 小弟 監 硬要 拉 你 上山 ，確實 係 晁 、宋 二公 渴望 阿哥 你好耐 ，你 唔好 遲遲疑疑 ，誤咗 自己 啊 。
賢弟 ，你 啲 咩嘢 說話 ？
你 都 唔 諗下 我 因為 你 母老家 寒 ，放咗 你 走 ，今日 乜 你 反轉嚟 要 我 做 啲 不義 嘅 事 啊 ？
吳學究 話 喇 ：既然 都 頭 唔 肯 去 ，噉 我哋 走 罷 啦 。
朱仝 話 ：噉 請 同 我 問候 眾位 頭領 吓 。
佢哋 三個人 一齊 返到去 橋邊 。
朱仝 返到去 一 睇 ，弊喇 死喇 唔見咗 小衙內 ，哎呀 ，猛咁 叫苦 啦 ，仲 唔知 去邊度 搵 先得 噃 。
雷橫 就 掹住 朱仝 話 喇 ：阿哥 ，你 唔使 搵 。
九成 係 我 帶嚟 嗰 兩個 朋友 ，聽講 阿哥 你 唔肯 去 ，因此 就 抱 咗 小衙內 走 定 喇 ，我哋 一齊 去 搵 啦 。
朱仝 話 ：哎呀 兄弟 啊 ，你 講笑 搵 第樣 啊 。
呢 個 小 衙內 係 知府 相公 條 命根 ， 佢 託付 咗 畀 我 ， 一有 咩 咿 逳 就 唯 我 是 問 㗎 。
雷橫話 ：阿哥 ，你 跟 我 嚟 啦 。
朱仝 就 跟住 雷橫 、吳用 ，離開咗 地藏王廟 就 行咗 出 城外 。
朱仝 一味 心慌 喇 ，佢 就 問 嘞 ：
喂 ，你 嘅 朋友 抱 小衙內 去 咗 邊處 啊 ？
雷橫話 ：阿哥 ，你 行啦 ，去到 我住嘅地方 ，包 還返 個 小衙內 畀 你 就係 。
朱仝 話 喇 ：哎呀 ，如果 遲過咗 頭 ，知府 相公 會 見怪 㗎 。
吳用 就 話 喇 ：我 帶嚟 嗰 兩個 朋友 ，確係 冇乜 搭煞 㗎 ，梗係 抱咗 去 我哋 住 嘅 地方 定 喇 。
朱仝 就 問 啦 ：你 嗰個 朋友 ，叫做 咩嘢 名 啊 ？
雷橫話 ：我 都 唔識 㗎 ，就 聽聞 叫做 ，叫做咩 黑旋風 李逵 。
嘩 ，朱仝 一聽 ，驚喇 ：係唔係 江州 殺人 嗰個 李逵 啊 ？
吳用 話 ：誒 就係 呢個 人 。
朱仝 猛 咁 𨂽 腳咯 ， 撞 正個 殺星 喎 得 了 嘅 ， 佢 步步 尺七 就 猛 咁 行 。
離咗 城 約莫 行咗 二十 里 ，只見 李逵 喺 前 便 嗌 喇 ：我 喺 呢度 嚟 啊 ！
朱仝 追近 前去 就 問 佢 ：小衙內 喺 邊處 啊 ？
李逵 行咗 個 禮 ：節級 大哥 ，小 衙內 喺 呢處 。
朱仝 話 喇 ：你好好地 抱返 小衙內 出嚟 還畀 我 。
李逵 指住 頭上 話 ：呢 ，小衙內 嘅 珠鏈仔 啊 喺 我 頭上 呢 你 睇下 。
朱仝 睇咗 ，又 問 小衙內 喺 邊處 啊噉 。
李逵 話 ：佢 畀 我 攞 啲 麻藥 ，枳 喺 個 嘴 嚟 ，一直 孭 出 城 ，而家 喺 樹林 裏 便 瞓喇 ，你 自己 去 睇 下 啦 。
朱仝 趁住 月色 明朗 ，一直 趯入去 樹林 裏 便 搵 啦 。
只見 小衙內 碌 喺 地下 嚟 ，朱仝 行 上去 用 手 去 扶 ，只見 小衙內 個 頭 呀 劈開 咗 做 兩邊 ，已經 死 咗 喇 。
嘿呀 ，當時 朱仝 個 心 呀 ，嬲啊 ！
佢 趯出 樹林 ，哎呀 ，早就 唔見咗 嗰 三個 人 喇 。
四周圍望下 ，只見 黑旋風 李逵 遠遠噉 拍住 嗰 對 斧頭 大聲 嗌話 ：
嚟嚟嚟 ，同 你 鬥 二三十個 回合 。
朱仝 發起 火 嚟 奮不顧身 ，擪起 件 布衫 ，大踏步 就 追上去 。
李逵 回身 就 走 ，背後 係 朱仝 猛 咁 追 。
嗨 ，呢個 李逵 呀 ，係 穿山過嶺 行慣 嘅 人 ，朱仝 啊 點 追得 佢 上 呢 ？索氣 索到 佢 呀 隔夜 風爐 都 吹得着 。
李逵 喺 前 便 又 嗌 咯 喎 ： 嚟 嚟 嚟 ， 同 你 拼個 你死我活 啊 。
朱仝 就 恨不得 一啖 就 吞咗 佢 落 肚 ，只係 追 佢 唔到 啊 。
追嚟追去 ，好喇 個 天上下光 ，李逵 喺 前 便 ，哈 ，真係 抵死 喇 。
追得急 ，佢 就 行得急 ，追得慢 佢 就 行得慢 ，唔追 佢 就 唔行 。
追追下 ，李逵 入咗 一間 大莊院 裏 便 。
朱仝 見到 就 話 喇 ：哼 ，呢個 傢伙 有着落 嘅 ，我 點 都 唔同 佢 罷休 㗎 喇 。
於是 朱仝 就 一直 追 到 入去 莊院 裏 便 。
佢 行到 大廳 之前 ，見到 兩邊 兩便 都 插住 好多 軍器 。
朱仝 就 諗嘞 ：呢住 梗係 個 官宦 之家 定 喇 。
佢 企定 腳 ，高聲 噉 嗌 ：莊裏 便 有冇 人 啊 ？
只見 屏風 後 便 有 個人 行 出嚟 ，呢個 人 係 邊個 呢 ？
正是 累代 金枝玉葉 ，先朝 鳳子 龍孫 。
丹書鐵券 護 家門 ，萬里 招賢 名 振 。
待客 一團 和氣 ，揮金 滿面 陽春 。
能文會武 孟嘗君 ，小旋風 聰明 柴進 。
出嚟 呢個 ，就係 小旋風 柴進 。
佢 問 ：係 邊個 啊 ？
朱仝 見 嗰個人 ，人物 軒昂 ，資質 秀麗 ，佢 連忙 行禮 話 ：
小人 係 鄆城縣 當 牢節級 朱仝 ，因為 犯罪 刺配 嚟到 滄州 。
尋晚 因為 同 知府 嘅 小衙內 出嚟 睇 放 河燈 ，畀 黑旋風 ，殺 咗 小衙內 。
佢 而家 趯咗嚟 貴莊 ，勞煩 幫忙 捉住 佢 去 送官
哦 ，原來 係 美髯公 ，請坐 。
請問 官人 高 姓 ？
小可 姓 柴 名 進 ，小旋風 就係 我 。
久聞大名 ，想唔到 今日 得識 尊顏 。
美髯公 ，我 亦 久已 聞名 ，請 到 後堂 傾 。
朱仝 就 跟住 柴 進入 到 去 裏 便 。
朱仝 話 喇 ：黑旋風 嗰個 傢伙 ，點解 咁 大膽 入到嚟 貴莊 躲避 啊 ？
柴進話 ：噉嘅 ，小可 平生 最愛 結識 江湖上 嘅 好漢 。
為因 我 祖先 有 陳橋 讓位 之 功 ，先朝 御賜 丹書 鐵券 ，凡係 犯咗 罪 嘅 人 ，匿埋 喺 我 屋企 嚟 就 冇 人 敢 嚟 搜查 。
近日 有 個 好朋友 ，同 足下 亦 係 舊時 相識 ，而家 喺 梁山泊 裏 便 做 頭領 ，佢 叫做 及時雨 宋公明 。
佢 寫 一 封 密信 ，叫 吳學究 、雷橫 、黑旋風 喺 敝 莊 暫住 ，請 足下 上山 ，同 聚 大義 。
因為 見到 足下 推辭 唔肯 去 ，就 特登 叫 李逵 殺害 咗 小衙內 ，先 絕咗 足下 嘅 歸路 ，只有 上山 坐 把 交椅 啦 噉 。
吳 先生 ，雷 兄 ，點解 仲 唔 出嚟 賠禮 啊 ？
只見 吳 用 、雷 橫 喺 側 跟 間 房 行 咗 出嚟 ，對住 朱 仝 跪低 就 拜 佢哋 話 ：
兄長 ，望乞恕罪啊 ，呢啲 都係 宋公明 大哥 嘅 將令 ，吩咐 係 噉樣 做嘅 。
到咗 山寨 就 清楚 㗎喇 。
朱仝 話 ：唉 ，係就係 你哋 弟兄 對 我 嘅 好 情分 ，不過 就 毒得啲 咯 。
柴進 一味 咁 勸佢 啦 。
朱仝 就 話 ：我 去 就 去 啦 ，你 等 我 見 一 見 黑旋風 先 。
柴進 話 喇 ：李大哥 ，你 快啲 出嚟 賠禮 。
李逵 亦都 喺 側跟 間 房 行 出嚟 ，行咗 個 禮 。
朱仝 一見 ，哼 ！心頭 火起 三千丈 啊 ，點都 撳唔住 咯 ，幾步 衝上前 ，就要 同 李逵 搏命 。
柴進 、雷橫 、吳用 三個 就 苦苦 勸住 。
朱仝 話 ：你 叫 我 上山 都 得 ，你 聽 我 一件事 我 就 去 啦 。
吳用 就 話 喇 ：咪 講話 一件事 啦 ，幾十件 都 得 ，你 講 啦 ，係 咩嘢事 吖 ？
朱仝 就 話 ：如果 要 我 上山 ，你 殺咗 黑旋風 同 我 出咗 呢啖氣 啦 ，噉 我 就 去 喇 。
李逵 聽咗 發火 咯 ：你 咬 我 食 呀 ？
呢個 係 晁 、宋 兩位 大哥 嘅 將令 ，關 我 屁事 呀 ！
朱仝 嬲 到 不得了 ，又 要 同 李逵 搏 過 咯 ，三個人 又 勸 開 佢 。
朱仝 就 話 ：有 黑旋風 喺度 ，我 死 都 唔 上山 。
柴進話 ：噉都好容易啫 ，我 有 個 辦法 ，嗱 ，留低 李大哥 喺 我 呢處 就 得 啦 。
你哋 三個 上山 先 ，要 滿足 晁 、宋 二公 嘅 心願 啊 。
朱仝 話 喇 ： 而家 做 落 呢 件 事 ， 知府 一定 會 發出 公文 ， 去 鄆城縣 追捕 ， 捉 我 個 家人 嘅 噉 點算 呢 ？
吳學究 話 ：足下 放心 。
呢陣時呀 ，大概 宋公明 都 已經 接咗 寶眷 上山 咯 。
朱仝 聽咗 噉 先至 有啲 放心 。
柴進 就 擺酒 款待 ，當日 就 送行 。
柴進 叫 莊客 ，備咗 三匹馬 ，送 佢哋 出關 。
臨分別嘅時候 ，吳 用 又 吩咐 李逵 話 喇 ：
你樣樣都要小心啊 ，吓 ，就喺 大官人 間莊 處住下 先 ，千祈唔好 惹是生非 連累人 啊 。
過得 三 幾個 月 咯 ，等 佢 啖氣 過咗 ，噉 先至 嚟 接 你 返去 山寨 啦 ，到時 大概 亦 一齊 嚟 請 柴 大官人 入夥 㗎 喇 。
講完 ，三個 就 上馬 去咗 咯 。
噉 一路 行咗 幾日 ，佢哋 就 嚟到 朱貴酒店 ，即刻 就 使人 上 山寨 報告 啦 。
晁蓋 、宋江 就 帶 齊 大小 頭目 ，打鼓 吹笛 ，嚟到 金沙灘 迎接 ，一行人 見到面 都 非常 高興 。
然後 就 各人 騎馬 就 返到 山上 大寨 ，嚟到 聚義廳 就 坐落 ，互相 傾談 。
朱仝 話 喇 ：小弟 而家 上咗 山 喇 ，滄州 知府 必定 會 有 公事 去 鄆城 縣 捉 我 家人 嘅 ，噉 點 辦 呢 ？
宋江 大笑 起嚟 話 ：哈哈哈哈哈哈 ，兄長 你 放心 ，阿嫂 同 令郎 已經 接 咗 嚟 呢處 好多 日 喇 。
吓 ， 係 咩 ？ 而 家 喺 邊 處 啊 ？
就喺家父宋太公處住住先 ，兄長 請 你 自己 去 睇下 啦 。
朱仝 噉 就 歡喜 喇 。
宋江 派 人 帶 朱仝 嚟 到 宋太公 間 屋 ，見到 自己 一家 老小 平平安安 ，一齊 細軟 行李 都 喺 處 。
佢 妻子 就 話 喇 ：
早 幾日 就 有人 帶 封信 嚟 ， 話 你 已經 喺 山寨 入夥 喇 ， 因此 就 執拾 好 啲 行李 ， 即刻 趕 嚟 啦 。
朱仝 出到嚟 ，拜謝咗 大家 。
宋江 就 請 朱仝 、雷橫 喺 山頂 扎寨 ，一便 呢 就 大排筵席 ，連 氣 幾日 慶賀 新 頭領 ，呢啲 就 唔 講 佢 。
而家 講返轉頭 ，講下 滄州 知府 啊 ，佢 等到 咁 夜 都 唔見 朱仝 抱 小衙內 返嚟 嘅 ，就 派 人 四散 去 搵 啦 ，搵咗 成晚 都 搵唔到 。
第日 ，有人 見到 殺死咗 喺 樹林 裏 便 就 報畀 知府 聽 。
知府 聽到 嬲到 呀 不得了 ，親自 去 樹林 睇下 。
哎呀 ，喊到 噦噦聲 ，就唯有 買 副 棺材 執好 佢 ，然後 就 火化 咗 佢 係啦 。
第日 ，知府 升堂 咯 ，即刻 發出 公文 ，通知 各地 緝捕捉 拿 朱仝 正身 。
鄆城縣 呢 已經 報告 上嚟 喇 ，話 朱仝 妻子 啊 帶埋 全家 在逃 ，不知 去向 。
已經 通知 各州縣 ，通緝 朱仝 一家 就 捉到 有賞 噉 ，啊 不 在 話下 。
而家 ，只係 講下 李逵 嘞 ，佢 喺 柴進 間 莊 處 住 咗 個 零 月 。
有一日 ，見到 有個人 帶住 一封信 ，火急 嚟到 莊上 。
柴大官人 就 啱啱 遇着 嗰個人 ，接信 嚟 一睇 ，大吃一驚 。
哎呀 ，既然 係噉樣 ，我 只有 去 行 一趟 。
李逵 就 問 喇 ：大官人 有 咩嘢 急事 啊 ？
我 有 個 阿叔 柴皇城 ，住 喺 高唐州 嚟 。
而家 畀 高唐州 知府 高廉 個 舅仔 殷天錫 蝦 佢 ，話 嚟 要 佔 佢 個 花園 ，唂住 一啖 氣 ，臥病在床 ，就快 性命 不保 。
就 必定 有 啲 遺囑 要 吩咐 落 嘅 ，就 特登 嚟 嗌 我 去 。
我 阿叔 啊 無兒無女 ， 我 一定 要 親身 去行 一趟 。
既然 大官人 去咯 ，我 都 跟埋 大官人 去 行 一趟 呢 好唔好 啊 ？
李大哥 肯 去 ，就 同 我 一齊 行 啦 。
柴進 就 即刻 執拾好 行李 ，選咗 十幾匹 好馬 ，帶住 幾個 莊客 。
第二 朝早 五更 起身 ，噉 柴進 、李逵 同埋 啲 隨從 就 上咗 馬 ，離開 莊院 就 直奔 高唐州 嘞 。
幾日之後 ，嚟到 高唐州 。
入咗 城 ，直筆 去到 柴皇城 嘅 住宅 前面 落馬 ，噉 就 留低 李逵 同埋 隨從 啲 人 呢 ，喺 外 便間 廳 休息 先 。
柴進 自己 呢 ，就 一直 行 入 臥房 ，嚟 探 下 佢 阿叔 柴皇城 嘅 病 。
只見佢阿叔呀 ，哎呀 ，面如金紙 ，體似枯柴 ，已經 病到 佢呀 呼吸 好似 絲 咁 細 喇 。
柴進 見到 柴皇城 病 成噉樣 ，都 就嚟 死 喇 ，就 坐 喺 阿叔 將 床 前面 放 聲 痛哭 啦 。
噉 皇城 嘅 後妻 就 出嚟 勸 柴進 話 喇 ：
大官人 ，你 一路 鞍馬勞頓 啊 ，啱啱 嚟到 ，唔好 咁 悲傷 喇 。
柴進 對 佢 行過 禮 ，就 問起 事情 嘅 經過 。
噉柴皇城嘅後妻 就 話 喇 ：
呢呢處 新任 知府 高廉 啊 ，佢 又 兼管 本州 兵馬 ，係 東京 高太尉 嘅 叔伯 兄弟 ，恃住 佢 大佬 嘅 勢力 ，喺 呢處 呀 ，真係 無所不為 。
佢 仲 帶咗 一個 舅仔 殷天錫 嚟 添 ，人人 都 叫 佢 做 殷直閣 嘅 。
嗰個傢伙 ，年紀 雖然 係 細 咋 ，之 佢 又 係 倚住 佢 阿姐夫 高廉 嘅 權位 ，喺 呢度 橫行霸道 ，害人 害物 。
早嗰排啊 ，有啲人 去 托佢大腳 ，對佢 講 ，話 我哋 後花園 有 個 水亭 ，起得 好靚嘅 噉 。
嗰 個 傢伙 ， 帶住 成班 壞蛋 ， 足足有 成 三二十 人 ， 撞入 嚟 我 哋 屋企 ， 去 到 後花園 睇 噃， 要 趕 我 哋 出去 ， 話 佢 要 嚟 住 喎 。
噉 皇城 就 對 佢哋 講 啦 ：
我 屋企 係 金枝玉葉 ，有 先朝 嘅 丹書鐵券 在 門 ，諸式 人等 都 唔 准 欺侮 嘅 。
你 為乜 咁 大膽 嚟 搶佔 我 個 住宅 啊 ？你 想 趕 我哋 一家 去 邊處 啊 噉 ？
點知 嗰個 嘢 都 唔聽 你 講 啊 ，一定 要 我哋 搬扯 。
皇城 又 拉住 佢 啦 ，點知 畀 個 嘢 呀 又 推 又 打 。
因此 就 唂咗 呢啖 氣 ，就 一病不起 喇 ，乜嘢 都 食唔落 ，食藥 又 冇效 ，眼見得 係 上天 遠入 地 近 咯 。
今日 得 大官人 嚟到 做主 ，唉 ，就算 有啲 山高水低 ，噉 都 唔使 憂咯 。
阿嬸 你 放心 ，即管 請 好 醫生 返嚟 睇 阿叔 。
小侄 即刻 使人 返去 滄州 ，去 攞 丹書 鐵券 嚟 ，再 去 同 佢哋 講道理 。
就算 告到 官府 ，告到 當今 皇上 御前 亦 唔怕 佢 。
唉 ，皇城 做事 呀 一啲 都 唔 中用 㗎 ，仲係 大官人 你 講得 啱 。
柴進 探完 阿叔 ，就 出嚟 同 李逵 同埋 啲 隨從 講 咯噃 。
李逵 聽咗 跳起身嚟 話 ：嗯 ！嗰個 傢伙 真 冇 道理 ！
我 有 斧頭 喺 處 ，等 佢 捱 我 幾 斧 先至 再 講 啦 ！
柴進話 ：李大哥 ，你唔好嬲住 ，何必 同佢 打咁粗魯唧 。
佢 雖然 係 恃勢欺人 ，之 我 屋企 放住 有 護持 聖旨 。
呢處 同 佢 講 唔掂 ，就 去 京師 講 。
明明白白嘅 條例 放喺度 ，同佢 打官司 ！
條例 ， 條例 ， 如果 條例 有用 呀 ， 天下 就 唔 使 亂 喇 ！
我 就 話 前 打 後 商量 。
嗰 個 傢伙 仲懶 叻 ， 我 就 將 佢 同 嗰 個 賊 官一齊 斬 咗 佢 。
哈哈哈哈哈哈 ，唔怪得 朱仝 要 同 你 搏過 喇 ，連 面 都 唔 見得 嘅 。
呢處 係 禁城 之內 ，你 估 好似 你 喺 小寨 可以 橫行無阻 咩 ？
禁城 又 點 啊 ？江州 無為 軍 ，我 冇 殺過 人 呀 ？
等我 睇下 勢頭 先 ，啊 ，用得着 大哥 個 時候 ，到時 先至 請 你 逳手 。
而家 ，就 請 你 喺 房裏 便 坐下 。
正話傾緊 ，裏便 嘅 侍妾 慌忙 出嚟 請 大官人 ，要 入去 睇下 皇城 。
柴 進入 到 去 裏 便 ，企 喺 床 前 便 。
只見 皇城 含住 兩泡 眼淚 ，佢 對 柴進 話 ：
唉 ，賢侄啊 ，你 ，志氣軒昂 ，不辱祖宗 。
我 今日 ，畀 殷天錫 激死 。
你 又 要 看 在 骨肉情份 ，親自 去 京師 告 御狀 ，同 我 報仇 雪恨 啊 ，我 九泉之下 ，都 感激 賢侄 你 嘅 親意 。
你 要 保重 ，保重啊 。
我 ， 我 ， 我 冇 乜嘢 囑咐 你 喇 。
講完 就 斷咗 氣 。
柴進 就 痛哭咗 一場 。
佢 阿嬸 就 怕 佢 喊到 暈 就 勸住 柴進 話 ：大官人 ，你 唔好 咁 悲傷 咯 ，商量 後事 啦 。
柴進 話 喇 ：誓書 喺 我 屋企 未曾 帶嚟 ，即刻 派 人 星夜 去 攞 啦 ，要 帶埋 去 東京 告狀 。
阿叔 嘅 遺體 就 安排 棺槨 盛殮 。
柴進 吩咐 依照 官制 ，安設 靈位 ，就 全家 着咗 重孝 ，大小 舉哀 。
李逵 喺 外便 聽見 裏便 呀 喊得 咁 淒涼 ，自己 就 嬲到 摩拳擦掌 。
問啲隨從呢 ，冇個人 肯 講 佢 聽 。
梗係唔敢講啦 ，事關 怕 李逵 發起惡上嚟 唔得掂㗎嘛 。
到咗 第三日 ，只見 呢個 殷天錫 嚟喇 。
佢 騎住 一匹 惡馬 ，帶住 三幾十個 幫閒 、清客 ，手執 彈弓 、川弩 、吹筒 、氣球 、拈竿 、樂器 ，喺 城外 玩咗 一輪 。
帶住 幾分 酒意 ，詐醉 扮傻 一直 嚟到 柴皇城 嘅 住宅 前面 就 勒住 馬 。
叫裏便管家嘅人出嚟講說話噉 。
柴進 聽見 嗌喇 ，就着住 一身 孝服 ，連忙 出嚟 啦 。
嗰個 殷天錫 騎 喺 馬 上面 問 ：
你 係 佢 屋企 咩 嘢 人 啊 ？
小可 係 柴皇城 親侄 柴進 。
前幾日 我 吩咐過 喇 ，叫佢 屋企 搬扯 ，點解 唔聽 我 講 啊 ？
因為 阿叔 有 病 ，唔敢 移動 ，尋晚 已經 過身 ，等 斷咗 七 先至 搬扯 啦 。
放屁 ！
而家 我 限 你 三日 就 要 搬走 ，三日之後 唔 搬 ，我 就 將 你 呢個 傢伙 鎖起嚟 ，打 你 一百 大棍 先 。
直閣 ，你 唔好 咁 欺負 人 噃 。
我 屋企 亦 係 龍子龍孫 ，放住 先朝 丹書鐵券 喺 處 ，邊個 敢 唔 尊敬 啊 ？
你 攞出嚟 畀 我 睇下 。
喺 我 滄州 屋企 裏 便 ，而家 已經 派咗 人 去 攞 喇 。
呢個 傢伙 真係 亂噏一通 嘅 。
你就算有誓書鐵券 ，你估我又怕㗎喇 ？
哼 ，人 嚟 ，同 我 打 佢 ！
嗰班人 正話 想逳手 ，原來 黑旋風李逵 呀 ，喺 門嚹 裏 便 早就 睺實 㗎 喇 。
聽見 話 喝 打柴 進 唄 ，又 拉開 房門 ；
嘩 ，大吼一聲 ，直衝到 隻 馬 旁邊 ，將 殷天錫 一手 揪落嚟 ，一拳 打低 佢 。
嗰 三幾十個人 ，正話 想嚟 搶救 殷天錫 啦 ，點知 畀 李逵 拳打腳踢 ，打低咗 五六個 ，㗾㗾聲 走散晒 。
李逵 將 殷天錫 摵 返 起身 ，拳腳 交加 好似 打鐵 咁 打 ，柴進 點 都 勸 佢 唔住 嘞 。
睇下 殷天錫 ，嘿嘿 ，嗚呼哀哉 都 伏惟尚饗 ，瓜得 喇 已經 。
柴 進見 打死 咗 殷天錫 ， 唉 ， 猛 咁 嗌 弊 啦 ， 就 唯有 叫 李逵 返去 後堂 商量 。
柴進話 ：眼見得 有人 嚟㗎喇 ，呢處 你 就 唔住得落去 㗎喇 。
官府 嗰度 有 我 頂住 ，你 快啲 返去 梁山泊 先 啦 。
李逵 話 喇 ：我 走咗 噉 豈唔係 連累 你 ？
唔緊要 ，我 有 誓書 鐵券 護身 ，唔怕 嘅 ，你 去 啦 吓 ，事不宜遲 啊 。
於是 李逵 就 攞咗 對 斧頭 ，帶住 啲 錢 ，出咗 後門 ，急急 趯 返去 梁山泊 。
過咗冇幾耐 ，真係 有人 嚟喇 ，嚟咗 二百幾人 ，揸住 晒 刀杖槍棒 就 圍住 柴皇城 屋企 。
柴進 見嚟 捉人 就 出嚟 話 喇 ：我 同 你哋 去 官府 講 道理 。
嗰班人 就 邊度 有 道理 講 㗎 ，綁住 咗 柴 進 先 ，就 入去 屋企 裏 便 去 捉 個 行兇 黑 大漢 咯 喎 ，點知 抄嚟抄去 都 抄唔到 。
就 將 柴 進 綁咗 去 州衙門 ，要 佢 喺 大堂 前面 跪低 。
知府 高廉 ， 聽見 話 打死 咗 佢 個 舅 仔 殷天錫 喎 ， 就 喺 大堂 嬲 到 咬牙切齒 ， 正 係 等 住 捉 人 嚟 。
一拉到柴進嚟啫 ，高廉就發大火喇 。
