毛太公 就 話 喇 ：吖 ，你哋 兩個 嘢 真係 毫無 道理 噃 吓 。
我 好心好意 請 你哋 飲酒 食飯 ，你 就 反過嚟 ，就 賴 我 收埋 你隻老虎 ？啊 。
解寶 話 喇 ： 有 咩 嘢 賴唔 賴啊 ？
你 屋企 而家 都 做緊 里正 ，喺 官府處 亦 立咗 甘限文書 ，你 又 冇 本事 去 捉 。
撈咗 我哋 嘅 便宜 你 就 攞去 請功 ，噉 我 兩 兄弟 就 要 捱打 㗎 噃 。
你 捱打 關 我 咩嘢事 啊 ？
哼 ！你 敢唔敢 畀 我 抄 一抄 吖嗱 ？
我 屋企 唔同 你哋 喎 ，各 有 內外 㗎 。
啊 你 兩個 乞兒頭 走嚟 無理取鬧 添 係嘛 ？
解寶 嬲 起 上 嚟 趯 去 廳 前 搵 唔 到 ， 一時間 心頭 火起 就 喺 廳 前 打 起 上 嚟 ；
解珍 亦 喺 廳前 ，拗斷 欄杆 打入去 咯 。
毛太公 就 嗌 喇 ：解珍 ，解寶 白晝 搶劫 啊 ！
佢 兩 兄弟 打爛 晒 廳前 啲 枱椅 。
見莊裏頭都有準備嘞 ，兩個人就 大步 行出門口 就 指住 間莊 鬧 咯 喎 ：
你 監 硬鑿咗 我 隻 老虎 ，我 同 你 去 官府 處 講道理 。
佢 兩個人 正 喺度 鬧緊 ，只見 幾個人 騎住 馬 ，仲 帶住 一班人 添 ，就 跑到 嚟 間 莊處 。
解珍 認得 呢個 係 毛太公 嘅 仔 毛仲義 ，佢 就 話 喇 ：你 屋企 啲 莊客 啊 ，搶咗 我哋 隻 老虎 。
你 阿爹 唔 還返 畀 我 不特已 ，仲要 打 我哋 兩 兄弟 噃 。
毛仲義 就 話 喇 ：哎 嗰班 鄉下佬 好 曳 嘅 ，我 父親 梗係 畀 佢哋 呃咗 定 喇 。
你哋 兩位 唔使 嬲 ，跟我 返去 屋企 ，我 攞返 隻 老虎 嚟 還畀 你 吓 。
解珍 、解寶 梗係 好多謝 定啦 。
毛仲義啊叫開莊門 ，叫佢哋兩個入去 。
等到 解珍 、解寶 一 入咗 大門 ，毛仲義 即刻 叫 閂埋 莊門 ，喝 一 聲 話 ：逳手 ！
兩便嘅走廊 ，有 二三十個 莊客 走出嚟 ，仲有 先頭 帶嚟 嗰 幾個 差人 添 。
佢 兩 兄弟 措手不及 ，嗰 班 人 一齊 湧上嚟 就 將 解珍 、解寶 綁 實 。
毛仲義 話 喇 ： 哼 ， 我 屋企 ， 尋晚 自己 射 到 一隻 老虎 ， 你 哋 為 乜 事 走 嚟 話 係 你 哋 㗎 ？
仲乘機搶劫 我哋 屋企 嘅 家財 ，打爛 屋企 嘅 雜物 你 該當 何罪 啊 ！
捉咗 你哋 去 官府 ，亦 為 本州 除咗 一 害 啊 。
原來 毛仲義 呢個 傢伙 喺 五更 嘅 時候 ，已經 將 隻 老虎 解咗 上州 領 咗 功 喇 ，然後 又 帶咗 幾個 差人 嚟 捉 解珍 、解寶 。
佢 呢 兩個 人 又 唔 識 睇 下 風頭火勢 中 正 人 哋 嘅 計策 ，點 都 講 唔 清 喇 。
毛太公 就 叫 人 將 佢 哋 兩個 用 嘅 鋼叉 ， 同埋 一包 贓物 ， 與 及 好多 打碎 咗 嘅 傢 私 雜物 都 擔住 ；
將 解珍 、解寶 剝 到 赤條條 ，捩轉 手 綁住 就 解 上去 州 嘞 。
本州 有 個 六案孔目 啊 姓 王 名 正 。
呢個 傢伙 係 毛太公 嘅 女婿 嚟 ，已經 預先 喺 知府 面前 就 落過 嘴頭 㗎 喇 ，所以 一 將 解珍 、解寶 押 到 廳 前 呢 就 不由分說 ，撳 低 就 打 。
一定要 佢哋 兩個 招認 係 詐騙 老虎 ，各執 鋼叉 ，搶擄 財物 噉 。
解珍 ，解寶 捱唔住 打 ，只有 話 乜 認 乜 係 啦 。
知府 又 叫 人 攞 兩面 二十五 斤 重 嘅 重枷 嚟 枷 咗 佢 ，韞 咗 佢哋 入去 大牢 。
毛太公 、毛仲義 就 返去 屋企 商量 喇 ：
呢 兩個 衰公 唔 放得 佢 㗎 ，不如 索性 結果咗 佢 ，免致 後患 仲 好啦 。
於是 父子 兩人 呢 又 返去 州府 ，就 吩咐 孔目 王正 話 喇 ：同 我 索性 斬草除根 ，吓 。
知府 嗰度 我 去 打 關節 ，買通 佢 啦 。
而家 講 下 解珍 、解寶 啊 ，畀 人 押 到 去 死囚 牢 裏 便 ，啲 人 嚟 將 佢 帶 到 去 間 亭 處 嚟 見 嗰 個 節級 。
嗰個 頭頭 呢 姓 包 名 吉 ；
佢 係 已經 得咗 毛太公 嘅 黑錢 㗎 喇 ，又 聽 咗 王孔目 嘅 說話 ，要 攞 佢哋 兩個 條命 嘅 ；
而家 包吉 坐 喺 個 亭 裏 便 。
個獄卒 呢 就 喝 佢哋 兩個 人 話 喇 ：快啲 過嚟 ，跪 喺 度 。
包節級 就 喝喇 ：你 呢 兩個 就係 咩嘢 兩頭蛇 、雙尾蠍 係嘛 ？
解珍話 ：雖然 人哋 同 小人 改咗 呢啲噉嘅 花名 ，實在 係 未曾 陷害過 好人 㗎 。
你呢兩個畜生 ，今日 落喺 我個手裏 啊 要 你個 兩頭蛇 做 一頭蛇 ，雙尾蠍 做 單尾蠍 。
人嚟 ，將 佢哋 押入 大牢 。
嗰個 獄卒 將 佢哋 兩個 帶 到 去 監牢 ，見到 冇人 就 話 喇 ：
你 兩個 認唔認得 我 啊 ？我係 你 阿哥 嘅 舅仔 啊 。
解珍 話 喇 ：我哋 只係 兩 兄弟 啫 ，冇 邊個 阿哥 㗎 。
你 兩個 係 孫提轄 嘅 兄弟 吖 嘛 。
哦 ，孫提轄 係 我 嘅 姑舅 阿哥 ，之 我 未見過 你 噃 。
啊 ，莫非 你 就係 樂和 舅 ？
冇錯喇 ，我 姓 樂 ，名 和 ，茅州 人氏 。
先父 帶住 全家 嚟到 呢度 ，將 我家姐 嫁畀 孫提轄 。
我 就 喺 呢個 州 處 做 獄卒 。
啲 人 見 我 唱嘢 唱得 好 ，都 嗌 我 做 鐵叫子樂和 。
姐夫 見 我 鐘意 學 武藝 ，仲 教 我 學咗 幾 路 槍法 添 。
呢 ，有 詩 為 證 喎 ：
玲瓏 心地 衣冠 整 ，俊俏 肝腸 語話 清 。能 唱 人 稱 鐵 叫 子 ，樂 和 聰慧 自 天生 。
原來 呢個 樂和 啊 ，係 一個 聰明伶俐 嘅 人 ，各樣 樂器 樣樣 都 識 嘅 ，唔識 嘅 呢 一 學 親 就 會 㗎 喇 ；
做事 就 見 頭 知 尾 。
論起 槍棒 武藝 呀 係 鍾意 到 如 糖似蜜 咁 交關 。
佢 為 因 見到 解珍 、解寶 係 個 好漢 ，有心 要 救 佢 ，但係 單絲 不成 線 ，孤掌 豈 能 鳴 吖 ？
所以 而家 只能夠 同 佢哋 通 個 信 ，報 個 消息 。
樂和 就 話 喇 ：
講畀 你哋 兩個 知吖 ，嗰個 包節級 ，就 得咗 毛太公 嘅 黑錢 ，係 要害 你 兩個 條命 㗎 ，你 兩個 點算 好 啊 ？
解珍 就 話 喇 ：你 既然 提起 孫提轄 ，我 想 求 你 帶 個 信 啫 。
你 要 我 帶 信 去 畀 邊個 呢 ？
我 有 個 表姐 ， 係 嫁 畀 孫 提轄 嘅 細 佬 ， 而 家 喺 東門外 十里 牌住 。
佢 係 我 姑姐 嘅 女 ，叫做 母大蟲 顧 大嫂 。
佢 係 開 酒店 嘅 ，屋企 又 殺 牛 開 賭 。
我 個 表姐 啊 真係 三二十 個 人 都 唔 埋得 佢 身 㗎 ，我 姐夫 孫 新 咁 本事 喇 都 輸 畀 佢 嘅 。
呢個 表姐 佢 同 我 兩 兄弟 最好 嘅 。
孫新 、孫立 嘅 姑姐 係 我 老母 ，所以 佢 兩個 又 係 我 嘅 表哥 嚟 。
而家 想 勞煩 你 暗中 寄個 信 畀 佢 ， 將我個 事講 畀 佢 哋 聽 ， 表姐 梗會 嚟 救 我 嘅 。
好 ，你 兩個 寬心 啦 。
樂和 走出去 攞 一啲 燒餅 肉食 ，收埋 喺 身邊 ，開咗 牢門 就 送畀 解珍 、解寶 食 。
然後 就 藉口 有 啲 事 就鎖 咗 牢門 ， 叫 另外 一個 獄卒 看 住 ， 自己 就 急急 奔 去 東門外 去 到 十里 牌 。
果然 就 見到 間 酒店 ，門前 就 掛住 好多 牛羊肉 等等 ；
後便間屋呢 ，有 一班 人 喺 嗰處 賭錢
樂和 見到 酒店 裏 便 有 個 婦人 坐 喺 櫃檯 嚟 ，佢 生得 眉 粗 眼 大 ，胖 面 肥 腰 。
樂和入 到 酒店 對住 顧大嫂 行 咗 個 禮話 ：
呢處 係唔係 姓 孫 㗎 ？
顧大嫂 連忙 回答 話喇 ：係啊係啊 ，你 想 買 酒 定 想 買 肉 吖 ？
如果 要 賭錢 ，直入 後 便 請坐 啦 。
小人 就係 孫提轄 嘅 舅仔 樂和 啊 。
啊 ， 原來 係 樂和舅 啊 ， 唔 怪 得 啦 ， 你 個樣 同伯娘 一樣樣 啊 。
請 入去 裏 便 飲茶 啦 。
樂和 跟 佢 入到 裏 便 ，喺 客位 坐落 。
顧大嫂 就 問 喇 ：
聞得 阿舅 少 你 喺 州 裏 便 做事 ， 我 又 一味 唔 得閒 ， 都 未曾 見過面 添 。
今日 咩嘢 風吹 到嚟 呢處 啊 ？
我 冇事 亦 唔敢 嚟 麻煩 你哋 。
今日 上便 發咗 兩個 犯人 嚟 ，雖然 以前 未曾 見過 ，但係 都 聽過 佢哋 嘅 名 㗎 喇 。
一個 係 兩頭蛇 解 珍 ，一個 係 雙尾蠍 解 寶 。
哦 ，呢 兩個 係 我 兄弟 嚟 噃 ，唔知 犯 咗 咩 嘢 罪韞 喺 監 嚟 呢 ？
佢 兩個 因為 射咗 隻 大老虎 ，畀 本鄉 一個 財主 毛太公 監 硬鑿 咗 去 。
又冤枉佢 兩個 做賊 ，話 佢哋 搶擄 家財 ，捉咗嚟 州裏 便 。
佢 又 上上下下 都 使咗 黑錢 ，呢 幾日 呀 ，就 會 要 包 節級 喺 監裏 便 做低 佢 兩個 攞 佢 條命 㗎 喇 。
我 雖然 路見不平 ，之 獨力 難 救 吖 。
我諗 一來 係 親戚 ，二來 義氣 為重 ，所以 我 就 同佢 通咗 個 消息 。
佢 話 ：除非 係 表姐 嚟 啦 就 救得 佢 喇噉 。
如果 唔早早 用心用力 呀 ，就 好難 救佢哋 出嚟 㗎 。
顧大嫂 聽 咗 就 猛 咁 叫 話 弊 喇弊 喇 噉 ， 即刻 就 嗌 夥 記快 啲 搵 二哥 返 嚟 ， 有 說話 講 噉
幾個 夥記 去咗 冇 幾 耐 ，就 搵到 孫新 返嚟 。
原來 呢個 孫新 啊 ，祖先 係 瓊州 人氏 ，軍官 子孫 ，因為 調嚟 登州 駐扎 ，噉 兩 兄弟 呢 亦 喺 呢處 安家 。
孫新生 得 身長 力壯 ，冚𠾴唥 學晒 佢 大佬 嘅 本事 ，使得 幾路 好 鞭槍 。
因此呢 人人 都 將 佢哋 兩 兄弟 啊 ，比 做 尉遲恭 ，叫 佢 做 小 尉遲 嘅 。
而家 佢 返到嚟 ，顧 大嫂 將 先頭 嗰件事 同 孫新 講咗 。
孫新 就 話 喇 ：
既然 係噉 ，叫 阿舅 返去 先 ，佢 兩個 已經 韞 喺 監牢 裏 便 喇 ，就 全 靠 阿舅 你 關照 佢哋 。
等我哋 兩 夫妻 商量 個 辦法 ，就 去 搵 你 啦 。
樂和 就 話 ：如果 有用得着 我 嘅 地方 我 一定 盡力 嘅 。
顧大嫂 擺酒 款待 咗 樂和 ，攞出 一包 碎銀 交畀 佢 話 ：
勞煩 阿舅 你 帶返 去 監處 ，分畀 啲 人 同埋 啲 獄卒 啦 ，請 佢哋 好好噉 照顧 佢哋 兩 兄弟 啊 。
樂和 收咗 銀兩 就 返返去 監牢 ，同 佢哋 買通 嗰啲 人 呢啲 不在 話下 喇 。
噉而家 講 顧大嫂 同 孫新 就 商量 咯噃 ：你 有 咩嘢 辦法 救 我 嗰 兩個 兄弟 唧 ？
毛太公 嗰個 傢伙 有錢 有勢 ，佢 怕 你 嗰 兩個 兄弟 出嚟 ，就 實唔肯 罷休 。
所以 一定 要 做低 佢哋 兩個 攞 佢 條命 ，噉 啊 實死 喺 佢 手上 。
如果 唔去 劫牢 ，就 冇 第個 辦法 救得 佢哋 兩個 出嚟 㗎喇 。
噉 我 今晚 就 同 你 去 啦 。
哈哈哈哈哈哈 ，你 真係 粗魯 。
我 同 你 亦 要 度掂佢 先 得㗎 ，劫咗 牢 亦 要 搵 地方 去 㗎 。
如果 冇 我 嗰個 大哥 同 呢 兩個 人 ，就 做唔成 呢件事 。
邊 兩個 啊 ？
呢就係 嗰 兩個 最好 賭錢 嘅 鄒淵 、鄒潤 兩 叔侄 呢 ，而家 喺 登雲山 裏 便 ，聚眾 打劫 。
佢哋 同 我 最 啱 橋 嘅 ，如果 得 佢哋 兩個 幫手 呢件事 就 成功 喇 。
噉就好吖 ，登雲山 離 呢處 冇 幾 遠 咋嘛 ，你 馬上 去 請 佢哋 兩 叔侄 嚟 商量 啦 。
好 ，我 而家 就 去 。
你 喺 屋企 準備 好 酒席 ，我 去 實 請 到 佢哋 嚟 嘅 。
孫新 講完 就 即刻 去 登雲山 。
顧大嫂 就 吩咐 啲 夥記 ，劏咗 一隻 豬 ，仲 整咗 幾味 好餸菜 添 ，等 佢哋 嚟 咯 喎 。
到咗 黃昏 嘅 時候 ，孫新 就 帶咗 兩名 好漢 返嚟 。
嗰個 為 頭 嘅 姓 鄒 名 淵 ，係 萊州 人 氏 ，自 細 最好 賭錢 ，係 閒漢 出身 。
為人 係 忠良 慷慨 ，更兼 一身 好 武藝 ，脾性 高強 ，從來 唔肯 認輸 。
江湖上 ，同佢 起咗 個 綽號 叫做 出林龍 。
第二個 好漢 ，叫做 鄒潤 ，係 佢 個 侄 ，年紀 同 阿叔 咁上下 啦 ；
生得身材高大 ，天生一個異相 ，腦後 仲有 個 肉瘤 嘅 ，因此 人人 都 嗌 佢 做 獨角龍 。
呢個 鄒潤 啊 ，平時 但凡 同人哋 爭吵 ，一嬲起上嚟 就 用 個 頭 撞過去 。
有 一次 ， 佢 一頭 就 撞 斷 咗 河邊 一 樖 松樹 噃， 哈 睇 嘅 人 呀 ， 嚇到 呆 晒 ， 你 話 厲害 唔 厲害 呢 嚱。
噉 當時 顧大嫂 見到 佢哋 入到嚟 喇 ，請 佢哋 入去 後 便 屋裏 便 坐 。
就 將 嗰件事 講晒 畀 佢哋 聽 ，就 商量 點樣 劫牢 嘞 。
鄒淵 話 ：我 嗰度 雖然 有 八九十個 人 ，心腹 嘅 呢 ，就 有 二十零個 啦 。
聽日 做咗 呢件事 ，就 喺 呢處 踎唔落 㗎喇 。
有笪地方 ，我係 有心 想去 好耐 㗎喇 ，唔知 你 兩夫妻 肯唔肯 去 呢 ？
顧大嫂 就 話 喇 ：
唔理 咩嘢 地方 都 好 我 都 跟 你 去 ，只要 能夠 救返 我 兩個 兄弟 就 得喇 。
鄒淵話 ：而家 梁山泊 十分 興旺 ，宋公明 大量 噉 招賢納士 。
佢 手下 有 三個 人 ，係 我 個 好朋友 。
一個 係 錦豹子 楊林 ，一個 係 火眼狻猊 鄧飛 ，一個 係 石將軍 石勇 ，都 喺 佢 嗰處 入咗 夥 好耐 㗎 喇 。
嗱 ，我哋 救咗 你哋 嗰 兩個 兄弟 ，就 一齊 去 投奔 梁山泊 入夥 好唔好 吖 ？
顧大嫂 話 ：梗係 好啦 。
如果 有 邊個 唔去 ，我 就 亂槍 督死 佢 。
鄒潤 話 喇 ：
仲有一件 ，我哋 就算 劫到 人 喇 ，又 怕 登州 有 啲 軍馬 要 追 嚟 噉 點 好 啊 ？
孫新話 ：我 嘅 親大佬 而家 做緊 本州 軍 馬提轄 ，登州 只有 佢 一個 人 最 厲害 嘅 。
嘿 ，有 幾次 草寇 臨城 ，都係 畀 佢 殺敗咗 ，到處 聞名 喇 。
我 聽日 去 請佢嚟 ，要 佢 岌頭 就 得 啦 嘛 。
鄒淵 話 ：就係 怕 佢 唔肯 落草 噃 。
孫新話 ：我 有 好計㗎喇 ，唔使 擔心 。
當晚 ，喝咗 半晚 酒 ，一覺 瞓到 天光 。
就 留住 兩個 好漢 喺 屋企 。
派 一個 夥記 帶 埋 兩個 人 ， 推 咗 一架 車 ；
要佢哋 快啲 入城 去 軍營 裏便 ，請 孫提轄 同埋 佢 老婆 樂 大 娘子 嚟 。
話 屋企 大嫂 得咗 重病 ，請 佢哋 嚟 睇下 噉 。
顧大嫂 就 吩咐 夥記 話 喇 ：
你就話我病到就嚟死喇噉吓 ，有幾句緊要嘅說話 ，要佢哋即刻嚟 囑咐佢哋噉 。
夥記 就 推 架 車 去咗 啦 。
到食完飯嘅時候 ，孫新 喺 門口 等 嘞 。
遠遠 就 望見 架 車 嚟 喇 ，載住 樂 大娘子 ；
喺 後便 呢 孫 提轄 騎住 馬 ，仲有 十幾個 軍佬 跟住 添 。
孫新 就 入去 報畀 顧大嫂 知 啦 ，話 阿哥 阿嫂 嚟喇 。
顧大嫂 就 吩咐 話 喇 ：嗱 ，噉噉噉噉 啊 吓 。
孫新 就 出返嚟 迎接 哥嫂 ，請 大嫂 落咗 車 ，行 入去 房 探 個 弟婦 病 咯噃 。
孫 提轄 落咗 馬 ，入咗 門 。
嘩 ，確係 好 一條 大漢 啊 ，淡黃 面口 ，絡腮鬍鬚 ，八尺 以上 嘅 身材 ，佢 姓 孫 名 立 ，綽號 病 尉遲 啊 。
射得硬弓 ，騎得劣馬 ，使一管長槍 ，手腕上面 掛住 一條 虎眼竹節鋼鞭 ；
海邊 啲 人 見到 呀 ，望風 而 降 啊 。
當時 病尉遲 孫立 落咗 馬 ，入咗 門 就 問 喇 ：
兄弟 ，阿嬸 得咗 咩嘢 病 啊 ？
孫新 就 回答 話 喇 ：
佢 得 呢個 病 呀 ，哎 病得 蹺蹊 ，請 大哥 你 入去 裏 便 先至 講 啦 。
孫立 就 入去 啦 。
孫新 就 吩咐 夥記 ，叫 嗰班 跟住嚟 嘅 軍佬 呢 ，去 對面 間 店 處 飲酒 。
又叫 個 夥記 牽過 馬 ，請 孫立 入去 裏 便 坐落 。
過咗一陣 ，孫新 就 話喇 ：請 阿哥 阿嫂 入去 房 探下 病 。
孫立 同埋 樂大 娘子 入到 間 房 裏 便 ，咦 ，見到 冇 病人 啊 。
孫立 就 問嘞 ：阿嬸 病咗 住 喺 邊間 房 裏頭 嚟 啊 ？
只見 顧大嫂 喺 外便 行 入嚟 ，鄒淵 、鄒潤 就 跟住 喺 背後 。
孫立話 ：誒 ，阿嬸 ，你 得咗 咩嘢 病 啊 ？
顧大嫂 行咗 個 禮話 ：
大伯 ，我 得咗 個 救兄弟 嘅 病 啊 。
呵呵 ，噉 又 奇怪 ，救 咩嘢 兄弟 啊 ？
大伯 ，你 唔好 裝聾扮啞 喇 ，你 喺 城 裏 便 ，唔 知道 佢 兩 個 係 我 兄弟 咩 ？
噉唔通佢哋又唔係你嘅兄弟呀 ？
我唔知道咩嘢事噃 ，係邊兩個兄弟啊 ？
大伯啊 ，而家 事情 緊急啊 ，我 只好 照直 講 喇吓 。
呢個 解珍 、解寶 啊 ，畀 登雲山 下 毛太公 就 夾埋 嗰個 王孔目 設計 陷害 佢哋 ，呢 幾日 就 要 謀 佢哋 兩個 條命 喇 。
我而家 同 呢 兩位 好漢 已經 商量好喇 ，要 去 城 裏 便 劫牢 ，救 佢哋 兩 兄弟 出嚟 ，然後 就 投奔 梁山泊 去 入夥 。
怕 第日 事情 一發作 ，連累 咗 大伯 。
因此呢 我 就 詐諦話 有病 ，請 大伯 同埋 伯娘 嚟 呢處 ，講畀 你哋 聽 。
如果 阿大伯 你 唔肯 去 ，噉 我哋 自己 去 梁山泊 㗎 喇 。
哎 大伯 啊 ， 而家 朝廷 有 咩 嘢 公道 講 㗎 ， 走 咗 嘅 又 冇 事 啊 ， 喺 處 嘅 要 吃官司 咯 。
開講 有話 啦 嘛 ： 近火 先 燶 啊 。
大伯 你 就算 替 我哋 吃咗 官司 坐監 ，之嗰陣時 又 冇人 送飯 嚟 救 你 噃 。
大伯 ，你嘅 尊意 如何 吖 ？
我 係 登州 嘅 軍官 ，點 能夠 做 噉 嘅 事 呢 ？
如果 大伯 你 唔肯 ，今日 我哋 就 先 同 大伯 你 拼 個 你 死我活 ！
顧大嫂 一 講完 ，喺 身邊 𠻘 一聲 掹出 兩把 刀 嚟 。
鄒淵 、鄒潤 亦都 各 拔出 短刀 喺 手裏 便 。
孫立就嗌喇 ：阿嬸 你 唔好 逳手 ，唔好 急 。
我哋 從 長 計較 ，慢慢 商量 。
樂大娘子 嚇到 幾耐 都 唔 出得聲 啊 。
顧大嫂 就 話 喇 ：
如果 大伯 你 唔肯 去 呢 ，就 送 伯娘 行 先 啦 ，我哋 自己 去 逳手 。
孫立 話 喇 ：就算 要 噉樣 做 ，亦 要 等 我 返去 屋企 執拾 好 包裹 行李 ，探聽 下 虛實 ，噉 先至 好 逳手 㗎 。
顧大嫂 話 ：大伯 ，你 個 舅仔 樂和 啊 ，已經 通水 畀 我哋 喇 。
一便 去 劫牢 ，一便 去 攞 行李 就 得啦 嘛 。
孫立 歎咗 一口氣 話 ：
哎 ，你哋 大家 既然 要 噉樣 做 喇 ，我 點 能夠 推得甩 呢 ？唔通 日後 要 替 你哋 吃 官司 咩 ？
好 啦 好 啦 好 啦 好 啦 ， 我 哋 即刻 商量 妥 就 逳 手 啦 。
於是 首先 就 叫 鄒淵 返去 登雲山寨 裏 便 ，收拾 好 財物 人馬 ，帶埋 嗰 二十 個 心腹 ，嚟 酒店 集合 。
噉啊 鄒淵 去咗 喇 。
又 派 孫 新 入 城 ，同 樂和 接 個 頭 ，約定 時間 ，叫 樂和 通知 解珍 、解寶 。
第日 ，鄒淵 喺 登雲山寨 裏 便 ，已經 收拾好 金銀財物 喇 ，就 同 嗰班人 嚟到 幫手 。
孫 新屋企 呢 ，亦 有 七八 個 心腹 嘅 夥記 ，加埋 孫立 帶嚟 嗰 十幾 個 軍佬 啊 總共 四十幾 人 。
孫新 就 劏咗 兩 隻 豬 ，一 隻 羊 ，大家 飽飽噉 食咗 一 餐 。
顧大嫂 就 貼肉 藏住 尖刀 喺 身邊 ，扮咗 個 送飯 嘅 婦人 就 去 先 。
孫新 就 跟住 孫立 ，鄒淵 就 帶住 鄒潤 ，各自 帶 一班 夥記 分做 兩路 入去 。
正是 捉虎 翻成 縱虎災 ，虎官 虎吏 枉 安排 。全憑 鐵叫 通關節 ，始得 牢城 鐵甕 開 。
而家 講下 登州府 監牢 裏 便 個 包 節級 ，佢 又 得咗 毛太公 嘅 黑錢 啦 ，就係 要 攞 解珍 、解寶 條 命 。
呢一日 ，樂 和 揸住 條 水火棍 ，就 企 喺 監牢 門口 個 獅子 口 邊 ，聽見 唥唥聲 掹 唥鐘 響 。
樂和 話咩 人 啊 ？
顧大嫂 喺 出 便 應 喇 ： 送飯 嘅 女人 喇 。
樂和 知道 嚟喇 ，就 去 開門 就 放 顧大嫂 入嚟 ，再 閂 返埋 道門 。
樂和 帶住 顧大嫂 行走 廊 嗰 便 過去 。
包節級 就 啱啱 坐 喺 亭 裏 便 睇見 咗 就 喝 喇 ：
喂 ，呢個 女人 係 咩嘢 人 啊 ？膽敢 入嚟 牢裏 便 送飯 ？
自古 有話 ：獄 不通風 㗎嘛 。
樂和 就 話 喇 ：
佢 係 解珍 、解寶 個 家姐 ，自己 嚟 送飯 喇 。
唔好畀佢入去 ，你哋 自己 同佢 送入去 咪得咯 。
樂和攞咗飯 ，開咗牢門 ，就 畀 佢哋 兩個 食 。
解珍 、解寶 就 問 喇 ：阿舅 啊 ，尋晚 講 嘅 事 點 啊 ？
你 表姐 入咗嚟 喇 ，就係 等 前後 接應 喇 。
樂和 跟手 就 將 匣床 同 佢哋 兩個 開咗 。
匣床 係 一 種 刑具 嚟 ，鎖住 個人 就 唔 逳得 㗎 喇 。
呢個 時候 ，聽見 有 個 獄卒 入嚟 報告 話 ：孫 提轄 敲門 啊 要 入嚟 喎 。
包節級 就 話 喇 ：
佢 係 個 營官 ，嚟 我 監牢 有 咩 嘢 事 幹 啊 ？唔好 開 門 。
顧大嫂 一閃 就 閃到 去 個 亭仔 旁邊 。
外便 又 嗌 咯噃 ：孫 提轄 發火 打 門 喇 。
包節級 好嬲 嘞 ，就 行出 間 亭仔 啦 。
顧大嫂 大叫 一聲 話 ：我嘅 兄弟 喺 邊處 嚟 啊 ？
喺 身邊 就 掹出 兩把 擸擸亮 嘅 尖刀 。
咦 ，包節級 一見到 ，弊喇唔係路 ，就 想住 外便 就 趯咯喎 。
解珍 、解寶 提起 個 枷 ，喺 牢眼 裏 便 鑽出嚟 ，啱啱 撞正 包 節級 。
包節級 措手不及 ，畀 解珍 一枷㩧 落去 將 頭殼 都 打到 爆咗 。
顧大嫂 手起刀落 ，就㓤低咗 四五個 獄卒 嘞 ，嗬噉 一齊 吶喊 就 喺 牢裏 便 打出去 咯 喎 。
孫立 、孫新 呢 喺 外便 接應 住 ，一齊 就 向住 州衙門 前面 走 。
鄒淵 、鄒潤 呢 ，早就 喺 州衙門 裏 便 就 提住 王孔目 個 頭 出嚟 喇 。
街市 上 啲 人 嘩不得了 咯 喇喇聲 走開 匿埋 。
孫提轄 就 騎住 馬 ，彎住 弓 搭住 箭 ，喺 後 便 壓住 陣腳 。
街上 嘅 人家 冚𠾴 唥 閂埋 門 ，唔 敢 出嚟 。
州裏 便啲 差人 呢 認得 係 孫提轄 喇 ，邊個 敢 上前 攔阻 吖 ？
成班人 簇擁 住 孫立 ， 出 咗 城門 ， 一直 跑 去 十里 牌 ， 啲 人 呢 就 扶住 樂大娘子 上 咗 車 。
顧大嫂 上咗 馬 ，就 跟住 一路 行喇 。
解珍 、解寶 同 大家 話 喇 ：
咪 住 ， 毛太公 呢 個 老賊 冤家 ， 仲 未曾 搵 佢 報仇 呢 ， 去 殺 咗 佢 先 。
孫立話 ：冇錯 ，走 ！
就叫 孫新 同埋 樂和 ，保護住 架 車 行先 。
我哋 隨後 就 嚟 㗎 喇 吓 。
孫新 、樂和 就 簇擁住 架 車 行 先 喇 。
孫立就 帶住 解珍 、解寶 、鄒淵 、鄒潤 ，同埋 一班 夥記 就 直奔 毛太公 莊 。
去到 個 時候 ，毛仲義 同 太公 正 喺 屋企 裏 便 慶壽 飲酒 噃 一啲 都 冇 提防 。
一班 好漢 ，吶喊 一聲 就 殺入去 ，將 毛太公 、毛仲義 一門 老少 冚𠾴唥 殺清光 一個 不留 啊 。
喺 房間 裏 便 ，抄到 十幾 包 金銀財寶 。
喺 後院 嗰度 ，又 牽咗 七八匹 好馬 ，用 四匹 嚟到 孭 嘢 。
解珍 、解寶 就 揀 幾件 好 衫 着返 ，將 間 莊院 一把火 燒 咗 佢 。
上咗馬 ，帶住 一行人 ，趕咗唔到 三十里路 ，就 已經 趕上 孫新 佢哋 嘅 車仗 人馬 喇 。
喺路上 ，又 搶咗 四五匹 好馬 添 。
噉 一行人 就 日夜 不停 噉 趕上去 梁山泊 喇 。
過咗幾日 ，嚟到 石勇 間 酒店 ，鄒淵 同 佢 見咗面 就 問起 楊林 、鄧飛 兩個人 去邊 啊噉 。
石勇 就 講畀佢聽 ，話 宋公明 去 打 祝家莊 ，兩個人 都 跟埋去 就 兩次 失利 。
聽講 有 消息 話 楊林 、鄧飛 都 失陷 喺 嗰處 ，都 不知 生死 。
據說 祝家莊 啊 三個 仔 好 厲害 ，又 有 教師 鐵棒 欒廷玉 相助 ，因此 呢 兩次 都 打唔破 嗰 間 莊 噉 。
孫立 聽咗 就 大笑 起上嚟 話 ：哈哈哈哈哈 ，我哋 咁多 個人 嚟 投奔 大寨 入夥 ，正係 冇 半分 功勞 。
我獻 一條 計策 ， 嚟 打破 祝家莊 ， 作為 進身 之報 呢 好 唔 好 啊 ？
石勇 就 當然 高興 啦 ：哎 請 你 講 ，有 咩 嘢 好 計 啊 ？
欒廷玉 嗰 個 傢伙 ， 同 我 係 一個 師父 教出 嚟 嘅 武藝 。
我 學 嘅 槍刀 ，佢 亦 知道 ；佢 學 嘅 武藝 ，我 亦 盡知 。
我 哋 今日 ， 就 扮成 係 由 登州 對調 嚟 鄆州 把守 嘅 ， 經過 呢 處 嚟 探望 佢 ， 噉 佢 必定 出 嚟 迎接 㗎 。
我哋 入咗 去 喇 ，就 裏 應 外 合 ，大事 必成 啊 ，呢條 計 點 吖 ？
正喺度 同 石勇 講緊 ，只見 小嘍啰 嚟 報告 話 ：
吳學究 落山 喇 ，要 去 祝家莊 救應 啊 。
石勇 聽講 就 叫 小嘍啰 快啲 去 報告 軍師 ，請 佢 嚟 呢處 相見 。
話猶未了 ，已經 有 軍馬 嚟到 店前 喇 ，佢哋 就係 呂方 、郭盛 同埋 阮氏 三雄 。
隨後呢 ，軍師 吳 用 帶領 五百 人馬 嚟到 。
石勇 接咗 入去 店裏 便 ，介紹 孫立 呢 一行人 同 吳 用 佢哋 見面 喇 ；
就話佢哋 要 嚟 投托 入夥 ，就 獻計 攻打 祝家莊 噉 。
吳用 聽咗 好 歡喜 ，佢 話 ：
既然 眾位 好漢 肯 幫助 山寨 ，噉 就 唔好 上山 住 。
勞煩 一齊 去 祝家莊 做 呢件事 ，成全 呢段 功勞 誒 好嘛 ？
孫立 同埋 大家 都 好 高興 ，一齊 都 應承 。
吳用 又 話 ：小生 呢次 去 亦都係 要 噉樣 打 ，我 人馬 行 先 ，各位 好漢 隨後 一齊 嚟 啦 。
吳學究 商量 定喇 ，就 趕住 去到 宋江 個 營寨 。
佢 一 去到 見到 宋公明 眉頭 不展 ，面帶 愁容 ，吳用 就 擺 酒 同 宋江 解悶 啦 。
佢 詳詳細細噉 同 佢 講 ，話 石勇 、楊林 、鄧飛 三個人 有 個 朋友 ，就係 登州 兵馬提 轄 病 尉遲 孫立 。
佢 係 同 呢個 祝家莊 嘅 教頭 欒廷玉 啊 ，係 一個 師父 教出嚟 嘅 。
而家 佢哋 總共有 八個 人 嚟 投托 大寨 入夥 ，特意 獻 呢一條 計策 以為 進身 之 報 。
而家 已經 商量 妥當 喇 ，裏 應 外 合 ，噉噉噉 做法 ，隨後 呢 就 嚟 參見 兄長 喇 噉 。
宋江 聽講 呀 ，嘩 ，歡喜 到 不得了 ，將 啲 愁悶 都 掉 到 九霄雲外 啊 。
