嗰一晚 ，楊雄 畀 班人 請咗 去 飲酒 一直 飲到 夜晚 黑 ，飲到 酩酊大醉 。
嗰啲人 就 扶 佢 返 屋企 啦 。
潘巧雲 見到 丈夫 醉得 咁 交關啲 人 扶 佢 返嚟 ，就 多謝咗 大家 ，同 阿迎兒 就 扶 佢 返 上 樓 瞓 。
點着啲燈燭 ，光光猛猛 。
楊雄 坐 喺 床 上 便 ，迎兒 幫 佢 除 鞋 ，潘巧雲 同 佢 除 頭巾 。
楊雄 一眼 見到 佢 老婆 ，嗰件事 一下 就 湧上 心頭 喇 。
自古話醉是醒時言啊 。
佢 就 指 住 佢 老婆 鬧 ： 你 呢 個 賤人 ， 衰婆 ， 我終 之 有 日 殺 咗 你 ！
潘巧雲 大吃一驚 ，唔敢 應佢 ，服侍 楊雄 瞓落 。
楊雄 一 頭 上床 瞓 一 頭 就 好 嬲 噉 仲 喺 處 鬧 ：
你 呢個 賤人 ，污糟邋遢 ，潑婦 ！
你 咁大膽 ，敢嚟 掹 老虎鬚 ？我 幾大 都唔放過你 ，唔放過你 ！
潘巧雲 呀 ， 誒 都 唔 敢 誒 ， 大氣 都 唔 敢 唞 個 啊 ， 一直 就 陪 到 楊 雄 瞓 着 。
到咗五更 ，楊雄 酒醒喇 ，攞 水 飲 ，潘巧雲 就 起身 𢳂 碗 水 畀 楊雄 飲 啦 。
楊雄 飲完水 就 問 ：咦 ，乜 你 尋晚 冇 除 衫 瞓 啊 ？
佢 老婆 就 話 ：你 飲到爛醉 ，我 怕 你 會 嘔 ，邊度 敢 除 衣服 瞓 啦 。
我 就 喺 床尾 挨咗 一晚 咋嘛 。
哦 ，我 尋晚 冇 講 咩嘢 說話 吖 嘛 ？
你 酒品 好 ，飲醉咗 就 瞓 㗎 喇 ，之 我 尋晚 有 啲 放心 唔 落 咋 嘛 。
呢一排 ，我 都 冇 同 石秀賢 弟 快快活活 噉 飲 幾杯 ，你 喺 屋企 嚟 ，就 整 啲 嘢 請 佢 飲酒 啦 。
潘巧雲 亦 唔 出聲 ，就 坐 喺 床前 嗰 張 凳仔 ，眼淚 汪汪 一味 咁 歎氣 。
哎 ， 大嫂 ， 我 尋晚 飲 醉酒 又 冇 得罪 你 吖 ， 因乜事 幹 咁 煩惱 啊 ？
潘巧雲 揞住 雙眼 一味 唔應 佢 。
楊雄 連氣 問咗 幾聲 ，潘巧雲 一味 揞住 塊面 詐假意 喊 。
楊雄 就 拉佢 老婆 起身 坐 喺 床處 ，務必要 問 佢 為乜事 幹 喊 。
嗰個 女人 一便 喊 一便 就 話 喇 ：
我 爹娘 ， 當初 將我 嫁 畀 王押司 ， 只望 一 竹篙 打 到底 ， 點知 半路 佢 又 拋 低 我 。
今日 嫁咗 畀 你 ，以為 你 係 個 英雄 好漢 ，點知 你 又 唔肯 同 我 做 主 。
哼 ，又 作怪 ，邊個 敢 欺負 你 我 唔同 你 作主 啊 ？
我 本來 唔想 講 嘅 ，之又 怕 你 畀 佢 呃咗 都 唔知 ，想 講出嚟 ，又 怕 你 激氣 。
你 講 ，究竟 係 乜嘢 事 啊 ？
嗱， 我講 畀 你 聽 ， 你 唔 好 激親 至 好 喎 。
唉 ， 自從 你 結拜 咗 呢 個 石秀 叫 佢 返 屋企 嚟 ， 初 初仲 冇 乜嘢 嘅 。
收尾 ，收尾慢慢慢慢就露出原形喇 。
佢 見 你 唔 返嚟 ，就 走嚟 同 我 話 ：
哦 ， 哦 ， 大哥 今日 都 唔 返 嚟 ， 阿嫂 你 自己 一個 人 瞓 唔 係 好 冷落 噉 。
我 就 冇 睬 佢 。
呢啲 都 唔止 一次 㗎 喇 ，呢啲 都 唔 講 佢 喇 。
尋日 朝頭 早 ， 我 喺 廚房 洗面 ， 嗰 個 傢伙 喺 後 便 走過 嚟 ， 見到 冇 人 ， 就 嚟 摸 我 胸前 話 ： 阿嫂 啊 ， 你 有孕 冇 啊 噉 。 畀 我 打開 佢 隻 手 。
當時 我 就 想 嗌 㗎喇 ，又 怕 啲 鄰舍 知道 ，有 乜 好 睇 吖 ，盞 出 你 醜 嘅 啫 。
等到 你 尋晚 返嚟 ，又 醉 成 陀陀 擰 我 又 唔敢 講 咯 。
哎 ，我 真係 恨不得 食咗佢 啊 ！
你 仲係 兄弟長 ，兄弟短 ，要 我 請 佢 飲酒 喎 。
唉 ，正是 淫婦 從來 多 巧言 ，丈夫 耳軟 易 為 昏 。自今 石秀 前門 出 ，好 放 闍黎 進 後門 。
楊雄 聽咗 心頭火起 ：嘿 ！畫龍畫虎 難畫骨 ，知人知面 不知心 。
呢個 傢伙 仲 喺 我 面前 講 海闍黎 咁多 嘢 ，冇 釐搭煞 。
實係 佢 個 心慌 喇 ，就 惡人 先 告狀 。
豈有此理 ！佢 又唔係 我 嘅 親兄弟 ，趕扯 算數 喇 。
到咗天光 ，楊雄 落樓 嚟 同 潘公 話 喇 ：
劏咗 嗰啲 豬 攞 去 醃咗 佢 啦 ，從 今日 起 唔好 做 生意 喇 。
當堂 三兩下 手腳 ，將 豬肉 舖 嗰啲 櫃位 、豬肉枱 拆晒 。
石秀 今朝 早 一天光 就 攞 啲 豬肉 出嚟 開 舖 咯 喎 ，只見 舖面 都 拆 晒 喇 。
石秀 係 個 聰明人 ，仲有 話 唔醒水 嘅 咩 。
哈哈哈哈 ，係喇 。
實係 楊雄 醉後 失言 ，走漏咗 消息 ，畀 呢個 婆乸 呃咗 就 反咬 我 一口 ，話 我 對 佢 唔住 定 喇 。
佢 教 個 老公 執埋 唔好 做 間 豬肉店 ，我 如果 同 佢 分辯 就 搞到 楊雄 出醜 。
好 ，我 退一步 先 ，以後 先至 嚟算賬 。
石秀 就 返去 作坊 執拾 好 包袱 行李 ，楊雄 怕 佢 覺得 醜 啊 ，就 行開咗 。
石秀 挽起 個 包袱 ，擪起 把 尖刀 就嚟 同 潘公 辭別 ：
老伯 ，小人 喺 貴府 打攪 咁耐 ，今日 大哥 既然 係 收咗 鋪面 ，小人 就 告辭 返 扯嘞 ，賬目 已經 寫得 清清白白 ，分文 無 差 。
如果 有 呃 你哋 嘅 天誅地滅 。
潘公 係 因為 得到 女婿 囑咐 咯 ，所以 亦 唔敢 留佢 嘅 。
呢 ，有 詩 為 證 喎 ：
枕邊 言 易 聽 ，背後 眼 難 開 。直道 驅 將 去 ，奸邪 漏 進 來 。
石秀 就 離開咗 楊雄 屋企 ，就 喺 附近 條 巷 處 搵到 間 客店 租 咗 間 房 住落 。
石秀 就 諗 喇 ：
楊雄 同 我 結拜 做 兄弟 ，我 如果 唔同 佢 講明白 呢件事 就 枉 送咗 佢 條 性命 。
而家 佢 雖然 一時 聽信咗 呢個 婦人 ，佢 心裏 便 怪我 ，我 亦 分辯 唔清 。
但係 ，呢件事 無論如何 都 要 同佢 講清楚 至得 。
好 ，我 而家 先 去 探聽 下 ，睇下 佢 幾時 去 監牢 值夜班 ，我 就 四更 起身 ，查 佢 個 結果 出嚟 。
佢 喺 店 裏 便 住咗 兩 日 之後 ，就 去 楊雄 門 前 探聽 嘞 ，當晚 ，只 見 獄卒 嚟 攞 咗 鋪蓋 出去 。
石秀諗 ：楊雄 今晚 一定 係 值夜班 ，好 ，等 我 做啲 功夫 你 睇下 至得 。
當晚 佢 返到去 店 ，瞓到 四更 起身 ，擪住 嗰把 防身 尖刀 ，靜靜噉 開咗 店門 ，一直 嚟到 楊雄 後門 嗰 條 掘頭 巷 裏便 ，伏 喺 黑影 處 睺實 。
到五更喇 ，只見 嗰個 頭陀 挾住 個 木魚 ，嚟到 巷口 探頭探腦 。
石秀 一閃 就 閃去 頭陀 後便 ，突然間 ，一手 拉住 頭陀 ，一手 就 揸住 把 刀 喺 佢 條 頸 處 一擺 。
咪逳 ，大聲啲 我 就 殺咗 你 ！
你好 好地 老實 講 ，海和尚 叫 你 嚟 做 乜嘢 ！
哎呀 ， 哎呀 ， 哎呀 好漢 ， 哎呀 哦哦哦 哦 哦 ， 你 你 你 你 放生 我 ， 我 嗯 嗯 我 就講 。
你 快啲 講 ，我 唔 殺 你 。
誒 ，誒係 ，誒誒係噉嘅 ，誒誒海闍黎 同 阿潘公 個 女 有 路 ；
佢 哋 喺 ， 喺 ， 喺 夜晚 來往 嘅 ， 誒 叫 我 喺 後 門口 ， 誒 ， 見見 見到 如 ， 如果 有 擺住 神台 喺 度 呢 ， 就 就 就 就 ， 就 就 嗌 佢 入 嚟 ， 噉 噉 冇 神台 呢 就 叫 佢 唔 好 嚟 噉 ；
噉啊五更呢就叫佢起身 ，就我嚟呢處敲木魚叫佛 ，噉就叫佢起身返扯喇 。
佢 而家 喺 邊處 ？
誒 ， 誒 ， 佢 而 家 仲 喺 楊 楊 楊 雄 屋企 裏 便 瞓 瞓 啊 ，嗱， 我 我 一 敲響 個 木魚 ， 佢 呀 ， 佢 就 出 嚟 㗎 喇 。
借 你 嘅 衣服 同 木魚 畀 我 。
噉 個 頭陀 喺 身上面 剝咗 衣服 ，同埋 個 木魚 就 交畀 石秀 啦 。
石秀一 接過嚟 順手 一刀 ，就 喺 佢 條 頸處 一割 ，當堂 殺死咗 個 頭陀 。
好喇 ，石秀 着咗 頭陀 個 衣服 ，擪返 好 把 尖刀 ，㩧㩧㩧 敲響 個 木魚 入 條 巷 喇 。
海闍黎 喺 床 上面 聽到 木魚 咯咯 聲響 ，即刻 就 起身 着 衫 落 樓 啦 。
迎兒 先 嚟 開門 咯 喎 ，和尚 隨後 喺 後門 就 閃出嚟 。
咿咚轟 ，噉 迎兒 閂 返 道門 啦 。
石秀 一味 仲 喺度 敲 木魚 ，咯咯咯 ，個 和尚 就 細細聲 喝 佢 話 ：仲 敲 乜嘢 吖 ，唔好 敲 喇 。
石秀 唔理 佢 ，等 佢 行 到 巷口 ，噼啪 噉 一下 打低 佢 ，撳住 佢 喝佢 話 ：
你 唔好 出聲 ，出親聲 殺咗 你 ！
海闍黎 知道 係 石秀 咯 仲 邊度 敢 掙扎 出聲 吖 。
畀 石秀 剝咗 佢 嘅 衣服 ，剝到 佢 赤條條 一絲不掛 。
石秀靜靜掹出把刀嚟 ，三四刀就㓤死咗佢 。
然後 石秀 將 把 刀 放喺 頭陀 身邊 ，將 呢 兩 個 人 嘅 衣服 ，捲 成 一 捆 帶住 ；
返返去客店 ，輕輕 開咗 門 返返入去 ，又 靜靜地 閂返 門 返去 瞓 ，不在 話下 喇 。
而家 講 下 本地 有 個 賣粥 嘅 王公 ，嗰 朝早 ，擔住 擔粥 ，點住 個 燈籠仔 ，有 個 細路 跟住 佢 出嚟 趕早市 噃 。
佢 行到嚟 死屍 旁邊 ，𠽤咗 佢 一跤 就 將 個 伯爺公 成 擔 粥 都 潑 咗 喺 地下 嚟 。
嘿 ，嗰個 細路仔 就 嗌喇 ：哎呀 弊喇 ，有 個 和尚 醉咗 喺 處 啊 。
個 伯爺公 摸 下 ，咦 ，摸咗 兩手 血跡 ，哎呀 苦咯 ，大聲 嗌 救命 啦 。
幾家 鄰舍 聽見 就 開門 出嚟 睇下 ，將 啲 火 一 照 ，咦 ，見到 成地 都係 血粥 ，兩個 屍首 攤 直 喺 地下 嚟 。
嗰班 鄰舍 七手八腳 拉住 王公 ，要 佢 去 官府 報告 。
嘿 ，真係 禍 從 天 降 災 向 地 生 。
噉啲 鄰舍 拉住 王公 去到 薊州 府衙門 。
知府 就 啱啱 升堂 辦公 ，呢一班人 就 跪低 稟告 話 ：
呢個 伯爺公 啊 ，擔住 擔粥 ，倒瀉咗 ，一睇下 ，有 兩條 死屍 喺 地下 嚟 。
一個 係 和尚 ，一個 係 頭陀 ，身上面 都 係 除光晒 衣服 一絲不掛 嘅 ，誒 頭陀 身邊 就 有 一把 刀 啊 。
王公 又 稟告 話 喇 ：誒 ，誒老漢 每日 都 係 賣 粥 謀生 ，就係 五更 出嚟 趕 早市 。
誒 ， 今朝 起身 誒 ， 誒 起 起 得 早 一 啲 ， 誒 同埋 呢 個 馬 騮 仔 誒 誒 一味 顧住 行 就 冇 睇 路 啦 ， 一跤 就 𠽤 倒 咗 ， 連 碗碟 都 打碎 晒 。
誒誒 ，見到 兩個 死屍 ，血淋淋 噉 地下 嚟 ，誒 我 我驚起 上嚟 嗌 救命 啦 ，嗯 畀 啲 鄰舍 拉 返 嚟 衙門 喎 。
誒望 相公 你 明察 啊 。
知府 即刻 落咗 口供 ，馬上 派 人 嚟 檢驗 屍首 。
檢驗完喇就返嚟稟覆知府話 ：
被殺死嘅和尚呢 ，係 報恩寺 嘅 裴如海 ，旁邊 嘅 頭陀 ，係 報恩寺 後便 嘅 胡道 。
個 和尚 一絲不掛 ，身上 面 有 三四道 致命 嘅 傷痕 。
胡道 嘅 身邊 有 兇刀 一把 ，頸 上面 有 刀割 嘅 傷痕 一道 ，估計 係 胡道 用 刀 㓤 死咗 和尚 之後 畏罪 自殺 嘅 。
知府 就 叫 人 去 傳 報恩寺 啲 和尚 嚟 查問 根由 。
嗰班 和尚 話 都 唔知 啊噉 。
知府 亦 搞到 冇晒 辦法 。
當時 ，有 個 當案孔目 就 嚟 稟告 話 喇 ：
相公 呀 ， 眼見得 呢 個 和尚 ， 赤身裸體 ， 梗 係 同 嗰 個頭 陀 做 埋 啲 唔 乾 唔 淨 嘅 事 互相 殺死 ， 呢 啲 又 唔 關 王公 嘅 事 嘅 。
啲 鄰舍 都 擔保 釋放 啦 ，尸首 啊 叫 報恩寺 住持 ，搵 棺材 嚟 殮咗 ，擠 喺 第二 處 。
我哋 立 一個 互相 殺死 嘅 案 就 得 喇 。
知府話 ：誒 ，噉 亦 講得啱 。
跟住 ，就 將 一班人 發落 咗 不在 話下 喇 。
噉呢件事啊 ，滿城 都 轟動晒 ，街頭巷尾 到處 都 講到 含含聲 。
潘巧雲 聽咗 嚇到 傻晒 梗係 唔敢 出聲 定啦 ，一味 喺 肚裏 便 暗暗 叫苦 就係 喇 。
楊雄 喺 薊州府 裏頭 嚟 ，有人 話畀佢聽 話 殺死 咗 和尚 、頭陀 啊 噉 ，佢 個 心 都 諗到 七八成 㗎 喇 。
哼 ，呢件事 ，梗係 石秀 做出嚟 嘅 。
前幾日 我 一時間 錯怪咗 佢 ，我 今日 得閒啲 ，不如 走去 搵下 佢 ，問清楚 都好啊 。
噉 楊雄 就 走去 搵 石秀 啦 ，佢 行到 州橋 前 便 聽見 有人 喺 後 便 嗌 佢 話 ：阿哥 啊 ，去 邊處 啊 ？
楊雄 回過頭嚟 一 睇 原來 係 石秀 。
哎呀賢弟啊 ，我 正係 愁 唔知 去邊處 搵 你好 。
阿哥 ，你 嚟 我 住 嗰處 坐下 ，我 有 說話 同 你 講 。
石秀 就 將 楊雄 帶 返 去 客店 嗰 間 房間 佢 就 話 喇 ：阿哥 ，小弟 冇 講 大話 啩 ？
賢弟呀 ，你 唔好 怪 我 。
係我一時愚蠢 ，做錯咗咯 。
我 酒後 失言 ，反而 畀 嗰個 衰婆 呃 過咗 ，錯怪咗 賢弟 你 啊 。
我 今日 特登 嚟 搵 賢弟 負荊請罪 。
阿哥 ，小弟 雖然 係 冇用 啫 ，之 係 個 頂天立地 嘅 好漢 ，點 會 做 呢啲 噉嘅 事 㗎 ？
我 又 怕 阿哥 你 日後 會 中奸計 ，因此 我 嚟 搵 阿哥 ，嗱 ，我 呢度 有 啲 物證 畀 你 睇 。
石秀 就 將 和尚 、頭陀 嘅 衣服 攤開嚟 。
阿哥 ，你 睇 ，我 冚𠾴唥 剝晒 喺 呢處 嚟 喇 。
楊雄 一見 就 心頭火起 ：
賢弟 ，我 真係 對 你 唔住 。
我 今晚 返去將 呢 個 賤人 斬 開 佢 一 碌碌 ， 出 呢 一 啖 氣 。
哈哈哈哈 ，阿哥 ，你 又 嚟 喇 。
你 既然 喺 衙門 當差 ， 乜 你 唔 知道 法度 嘅 咩 ？
你 又 未曾 捉到 佢 真姦實據 ，點能夠 殺得 人 啊 ？
如果係 小弟 亂噏一通 嘅 ，噉咪 又 錯殺咗 人 。
噉 你 話 點 做 至 啱 呢 ？
嗱 阿哥 ，你 聽 小弟 嘅 說話 ，我 教 你 做 個 真正 嘅 男人 大丈夫 。
哦 ？ 賢弟 ， 你 點樣 教 我 做 個 真正 嘅 男人 大丈夫 呢 ？
阿哥 ，呢處 東門 外 有 一座 翠屏山 ，係 好 靜僻 嘅 。
阿哥 你 聽日 ，你就 同 嗰個 女人 話 ，你 話 你好耐冇 去 拜神 喇 ，今日 要 同 佢 一齊 去 噉 。
就 將 嗰個 女人 氹 出嚟 ，帶埋 迎兒 一齊 去到 山上 。
小弟 喺 嗰處 等候 住 你 ，三口六面 ，將 呢件 是非 對質 到 佢 明明白白 。
到時 阿哥 你 寫落 一張 休書 ，掉咗 呢個 女人 。
你 話 噉樣 係唔係 上策 吖 ？
賢弟 ， 噉 仲使 乜講 啊 ， 你 一身清白 我 已經 知道 喇 ， 都 係 嗰 個 女人 亂 噏 嘅 啫 。
唔係啊 ，我 亦 要 阿哥 你 知道 佢 同 嗰個 和尚 來往 嘅 真實 情形 啊 。
好 啦 ， 既然 賢弟 你 噉 講咯 ， 就 一 於 噉 話 啦 。
我 聽日 一定 同 嗰個 賤人 嚟 ，你 唔好 唔嚟 噃 。
小弟 如果 唔嚟 ，就係話 我 所講 嘅 都係 假嘅 。
楊雄 當時 同 石秀 分別 之後 ，離開咗 客店 ，就 返去 衙門 辦事 。
到到 夜晚 返 屋企 佢 亦 冇 提起 呢件事 ，乜 都 冇 講到 ，就係 同 平時 一樣 啫 。
第日天光起身 ，佢 對 佢老婆 話喇 ：
吖 我 尋晚 發 個 夢 ，見到 個 神仙 ，佢 話 我 往日 許 落 東門 外 嶽廟 嗰 炷 香 願 都 未曾 還 。
我 今日 得閒 ，我同埋你 一齊 去 還咗 個 願 啦 。
你 自己 去 還咪 得咯 ，使乜 我 去 呢 ？
唔係啊 ，呢個 願 係 當初 我 向 你 提親 嗰陣 時候 許落 嘅 ，所以 ，一定 要 同 你 去 。
既然 係 噉 ，噉 我哋 就 早啲 食齋飯 ，煲水 洗咗 身 去 啦 。
好啦 ，我 而家 去 買 元寶蠟燭 ，請 一 頂 轎 返嚟 ，你 洗好 身 ，梳好 頭 ，戴好 首飾 喺度 等 我 。
係喇 ，叫 阿迎兒 都 跟埋 一齊 去 啦 。
楊雄 喇喇聲 嚟到 客店 就 約埋 石秀 佢 話 ：
食完飯 就 嚟喇 ，賢弟 你 唔好 失約 啊 。
阿哥 ，你哋 嚟嘅 時候 ，就 喺 半山 落轎 ，你哋 三個 行路 上嚟 啦 。
我 會 喺 上面 搵 個 靜僻 嘅 地方 等 你 㗎 喇 ，唔好 帶 閒人 上嚟 啊 。
好啦 。
楊雄 約咗 石秀 ，買咗 元寶蠟燭 ，就 返去 屋企 食 個 早飯 。
潘巧雲 仲 唔 知道 呢件 醜事 已經 穿煲 個 喎 ，佢 真係 打扮 得 齊齊整整 ，迎兒 呢 亦 都 裝 好 身 。
轎夫 抬住 嗰 頂 轎 就 喺 門口 侍候 。
楊雄 就 對 佢 外父 話 ：泰山 你 看住 門口 ，我 同 大嫂 拜完 神 就 返嚟 。
潘公話 ：好 ，去 燒 多 炷 好香 ，早 去 早回 啊吓 。
潘巧雲 上 咗 轎 ， 迎兒 就 跟 住 轎 尾 ， 楊雄 亦 都 跟 喺 後 便 行 。
出咗 東門 喇 ，楊雄 就 細細聲 吩咐 轎夫 話 ：同 我 抬去 翠屏山 ，我 畀 多啲 轎錢 你哋 。
咿 誒 ， 咿 誒 ， 唔 到 兩個 時辰 就 嚟 到 翠屏山 。
原來 呢座 翠屏山 啊 ，係 喺 薊州 東門 外 二十里 ；
山上 到處 都係 人啲 墳墓 ，亂葬崗 嚟 ，喺 上 便 一望 ，都係 青草 白楊 ，並冇 庵舍 寺院 嘅 。
噉 當時 楊雄 佢哋 嚟到 半山 ，就 叫 轎夫 放低 頂轎 。
搭起轎簾 ，就 叫 潘巧雲 出嚟 咯噃 。
潘巧雲 就 問 喇 ：乜 嚟到 呢度 山 嘅 ？
你 唔使 理喇 ，上去 啦 。
轎夫 喺 呢處 等候 得喇 ，唔使 跟住 嚟 ，等 一陣 一齊 先至 畀 轎錢 你哋 啦 。
係係係係 ，唔緊要 ，唔緊要 ，誒 我哋 喺 呢處 等 就係 啦 。
楊雄 帶住 潘巧雲 同埋 迎兒 ，三個人 ，上咗 四五層 山坡 ，就 只見 石秀 坐住 喺 上便 。
潘巧雲 話 ：哎呀 ，點解 元寶 蠟燭 都 唔 帶嚟 嘅 ？
我 已經 叫 人 帶咗 上去 㗎 喇 。
就 將 個 女人 一帶 ，帶 到 嚟 一座 古墓 前 便 。
石秀 跟住 行過嚟 ，將 包袱 、腰刀 、齊眉棍 都 放喺 樹腳 。
佢 話 ：阿嫂 拜揖 。
哎呀 ，哎 ，阿叔 乜 你 都 嚟咗 呢處 呀 ？
佢 一字 講 ，一字 個 心 就 吃咗 一驚 。
石秀話 ：我 喺 呢處 等 你 等咗 好耐 喇 。
楊雄 開聲 ：
你 前日 對 我 講 ，話 阿叔 好多 次 用 說話 嚟 調戲 你 ，又 用 手 摸 你 個 胸前 問 你 有孕冇 。
今日 呢度 冇 其他 人 喇 ，你 兩個 對質 明白 佢 啦 。
哎呀 ，過咗去嘅事 喇 ，仲 講嚟 做乜嘢 吖 ？
阿嫂 ，乜 你 噉 講 啊 ，呢啲 唔係 閑事 啊 ，就係 要 喺 阿哥 面前 對質 個 明白 。
阿叔 ，你 好地地 又 將 自己啲 噉 嘅 事 講出嚟 做 乜嘢 吖 ？
嘿嘿 ，阿嫂 ，你 唔使 牙尖嘴利 ，我 畀 啲 證據 你 睇下 。
石秀 喺 包袱 攞出 海闍 黎 同埋 頭陀 個 衣服 ，攤 喺 地下 嚟 ：
你 認唔認得 ，你 認唔認得 ！
潘巧雲 一見 ，哎呀 ，面 都 紅晒 ，冇 說話 好 講 。
石秀霎聲揦出把腰刀 ，對 楊雄 話 ：呢件事 問 迎兒 就 知喇 。
楊雄 一手 揪住 個 妹仔 要 佢 跪 喺 面前 喝 佢 話 ：
你 呢個 小賤人 ，快啲 老老實實 講 ！
佢 哋 係 點樣 喺 和尚 間 房處 通姦 ， 又 點樣 約定 擺 神台 做 信號 嘅 ， 點樣 叫 嗰 個頭 陀 嚟 敲 木魚 。
你 老實 對 我 講 我 就 放生 你 條 命 。
如果 你 瞞住 一句 ，我 就 將 你 剁成 肉泥 先 ！
哎呀哎呀哎呀 ，哎官人啊 ，官人啊 ，唔關我事啊 唔關我事啊 ，你唔好殺我 ，我都講 我都講 ，我講晒畀你聽啦 。
於是 迎兒 就 將 佢哋 喺 僧房 裏 便 飲酒 ，上樓 睇 佛牙 ，又 趕 佢 落樓 嚟 睇 下 潘公 酒醒 未 講起 ；
一直 講到 佢 點樣 開 後門 放 嗰個 和尚 入嚟 ，天光 五更 喇 ，聽見 木魚 響 又 開 門 放 佢 出去 等等 。
佢 話 喇 ：因為 呢件事 ，唔瞞得過 我 嘅 ，噉 佢 只好 對 我 講 啦 。
噉 娘子 應承 話 畀 一對 金 鈪、 一套 衣服 過我 ， 噉 我 咪 順從 佢 哋 咯 。
噉佢哋 ，誒 ，噉樣 來往咗 已經 有 好多 次 㗎 喇 。
娘子啊 ，收尾 又 畀 幾件 首飾 我 ，叫 我 對 官人 講 ，話 阿石叔叔 ，用 說話 嚟 調戲 佢 喎 噉 。
呢啲 我 都 冇 親眼 見 又 冇 親耳 聽過 ，所以 我 都 唔 敢 講 啊 。
官人啊 ，呢啲 都係 實情啊 ，我 冇 虛假 冇 呃 你 㗎 。
迎兒 講完 石秀 就 話 喇 ：阿哥 你 聽見 啦 嘛 ？呢啲 說話 ，唔係 小弟 教 佢 講 嘅 。
而家 請 阿哥 你 問 下 阿嫂 嘅 詳細 情形 啦 。
楊雄 揪 潘巧雲 過嚟 喝 佢 話 ：
你呢個賊賤人 ，迎兒 已經 認晒 ，你 半點 都 唔好 抵賴 ，再 將 實情 對我 講咗 我 就 饒 你 賤人 一條 性命 。
哎呀 係 我 唔啱 咯 ，你 念在 我哋 舊日 夫妻 嘅 情份 ，饒恕 咗 我 呢一趟 啦 。
石秀話 ：阿哥 ，你 唔好 含糊 啊 ，你 要 問到 佢 清清楚楚 至好 啊 。
楊雄 就 喝 佢 話 ：賤人 ，你 快啲 講 ！
潘巧雲 就 只有 將 佢 同 和尚 通姦 嘅 事 ，從 嗰晚 打齋 講起 ，後來 點樣 來往 一五一十 都 講咗 喇 。
石秀 就 話 ：你 點解 對 阿哥 講話 我 調戲 你 ？
潘巧雲 話 ：
噉 嘅 ， 前幾日 ， 佢 飲 醉 咗 酒 鬧 我 ， 我 見 佢 鬧 得 咁 奇怪 ， 我 諗 住 係 阿叔 你 睇 出 破綻 ， 講 咗 畀 佢 聽 嘞 。
到咗五更 ，再 提起嚟 問 阿叔 你 點啊噉 。
我係 將 嗰段 說話 嚟 應付 佢 啫 ，其實 阿叔 你 係 冇 做過 啲 噉嘢 嘅 。
石秀 話 喇 ：嗱 阿哥 ，今日 三口六面 講得 明明白白 喇 ，噉 就 任從 阿哥 你 點 處理 都 好啦 。
楊雄話 ：賢弟 ，你 同 我 掹起 晒 呢個 賤人 嘅 首飾 ，剝咗 佢 衣服 ，等 我 親自 嚟 服侍 佢 。
石秀 就 將 潘巧雲 嘅 衣服 首飾 都 剝晒 。
楊雄 就 割 兩條 裙帶 嚟 親自 將 潘巧雲 綁 喺 樹 上 便 。
石秀 亦都 將 迎兒 嘅 首飾 掹咗 ，遞 把 刀 過 楊雄 話 ：阿哥 ，呢個 小賤人 留 佢 做 乜嘢 吖 ，斬草除根 罷啦 。
冇錯 ，你 攞 把 刀 嚟 ，我 自己 逳手 。
迎兒 見到 勢頭 唔對 就 啱啱 想 嗌 救命 ，楊雄 手起刀落 ，將 佢 斬成 兩 橛 。
潘巧雲 就 嗌 喇 ： 阿叔 啊 ， 阿叔 啊 ， 你 勸 下 啦 ， 你 勸 下 啦 。
石秀話 ：阿嫂 ，大哥 要 親自 嚟 服侍 你 啊 。
楊雄 行前 一步 ， 用 把 刀割 咗 潘巧雲 條 脷 等 佢 唔 講 得 說話 。
然後 佢 指住 佢 嚟 鬧 ：
你呢個賊賤人 ，我 一時間 誤聽 不明 ，爭啲 畀 你 呃咗 。
一來 ，破壞咗 我 兄弟 情分 ，二來 日後 必定 會 畀 你 害死 嘅 。
不如 我 今日 先 下手為強 。
你呢個賤人 嘅 心肝五臟 都 唔知 點 生 ，等 我 嚟 睇下 至 得 。
一刀 由 心口 割落去 ，攞出 佢 嘅 心肝 五臟 掛 喺 松樹 上 便 。
又 將 佢 斬開 幾 碌 ，然後 將 所有 個 首飾 衣服 ，都 包晒 喺 包袱 裏頭 。
楊雄 就 話 ：賢弟 ，你 嚟 ，我 同 你 商量 下 。
而家 一個 姦夫 ，一個 淫婦 都 已經 殺咗 喇 ，不過 我 同 你 投奔 去 邊處 安身 好 呢 ？
阿哥啊 ，小弟 已經 諗好 一笪 地方 ，請 大哥 你 即刻 就 起行 ，唔好 耽誤 。
邊處啊 ？
大哥 你 殺咗 人 ，小弟 亦 殺咗 人 ，唔 去 投奔 梁山泊 入夥 仲 有 邊處 去 啊 ？
哎呀 ，咪住 ，佢 嗰處 我 一個人 都 唔識 嘅 ，點 肯 收留 我哋 啊 ？
嘿 ，大哥 你 錯 喇 ，而家 天下 江湖 上 都 知道 山東 及時雨 宋公明 ，招賢納士 ，結識 天下 好漢 。
我 同 你 一身 好 武藝 ，明擺 喺度 嘅 憂 佢 唔 收留 咩 ？
不過噉噃賢弟 ，凡事 先 難 後 易 免得 後患 啊 。
最弊 我 係 個 差人 呢 ，我 怕 佢 疑心 唔肯 收留 我哋 啊 。
哈哈哈哈哈 ，佢 又 唔係 押司 出身 。
好啦 ，我 講出嚟 等 阿哥 你 放心 啦 。
嗱， 以前 大哥 你 同 小弟 結拜 嗰 日 ， 你仲記 唔 記得 啊 ， 喺 酒店 裏 便 我 唔 係 同 兩個 人 飲酒 嘅 ？
嗰 兩個 人 ，一個 係 梁山泊 神行太保 戴宗 ，另外 一個 係 錦豹子 楊林 。
戴宗佢 仲 畀咗 十兩 銀 過 小弟 ，而家 仲 喺 包袱 裏 便 嚟 呢 ，因此 係 可以 去 投奔 佢 㗎 。
楊雄話 ：既然 有 呢一條 門路 噉 就 好喇 。
噉誒 ，等 我 返去 屋企 ，收拾 啲 金銀 細軟 先至 行 啦 。
阿哥 ，乜 你 咁 立懦 㗎 ，如果 入到 城 ，聽下 啲 事情 發作 出嚟 畀 人哋 捉住 點 甩身 啊 ？
而家 喺 包袱 裏 便 ，有 咁多 金鈪首飾 ，小弟 仲 有 啲 銀兩 添 ，仲 多 三五 個 人 都 夠用 啊 ，何必 又 返去 呢 ？
惹起 是非 點算 啊 ？
呢件事 等陣 就 會 暴露 㗎喇 ，唔好 遲滯 ，我哋 即刻 混山後 行 啦 。
兩個 正話 想 行 ，點知 有 個 人 出嚟 話 ：哈 ，清平 世界 ，蕩蕩 乾坤 ，殺咗 人 你 想 走佬 呀 ？
我 聽咗 好耐 喇 。
