上次 講到 捉咗 黃文炳 呢個 奸賊 返嚟 要 殺咗 佢 ，宋江 就 問 喇 ：邊位 兄弟 同 我 落手 殺 佢 啊 ？
只見 黑旋風 李逵 跳起身嚟 話 ：我 同 阿哥 你 逳手 割咗 呢個 傢伙 。
嗬 ，佢 咁 肥 呀 ，啱喇 ，燒嚟 食 就 最好喇 。
晁蓋 話 喇 ：講得啱 ，去 攞 把 尖刀 嚟 ，透起 爐 炭火 ，慢慢 噉 割 呢個 傢伙 燒嚟 送酒 。
同我 賢弟 出咗 呢一啖 怨氣 ！
李逵 攞起 尖刀 ，睇實 黃文炳 笑住 話 ：
哈哈哈哈哈哈哈 ，你 呢個 傢伙 ，喺 蔡九知府 後堂 ，一味 會 講 三講四 ，諗計 害人 ，無中生有 噉 嚟到 慫恿 佢 ，哼 ！
今日 ，你 要 快 死 呀 ，老爺 要 你 慢慢 死 。
李逵 揸住 尖刀 ，喺 佢 大髀 割起 ，揀啲 靚嘅 ，割出嚟 當堂 喺 啲 炭火 上面 燒 咗 嚟 送酒 。
割 一件 ， 燒 一件 ， 食 一件 。
冇幾耐 ，割咗 黃文炳 ，然後 李逵 一刀 劏咗 佢 ，攞咗 個心肝 出嚟 同 眾位 頭領 做 醒酒湯 啊 。
咁多 好漢 睇住 割咗 黃文炳 ，都 上嚟 同 宋江 賀喜 。
吖 ，只見 宋江 啪聲 跪喺 地下 嚟 。
各位 頭領 連忙 都 跪低 一齊 話 喇 ：
阿哥 你 有 咩事 即管 講 啦 唔緊要 ，我哋 冇 話 唔聽 嘅 。
宋江 就 話 ：
小弟 一向 都係 想 結交 天下 嘅 好漢 。
只因為 力薄 才 疏 ，難遂 平生 之 願啫 。
自從 充軍 去 江州 ，好 感謝 晁頭領 同 各位 豪傑 ，唔 嫌棄 小弟 ，要 留 我 喺 梁山 。
當時 ，因為 父親 嘅 教訓 ，就 唔敢 留 喺 處 。
呢 一次 ，小弟 酒後 狂言 ，爭啲 連累埋 戴院長 。
多得 各位 豪傑 不避 兇險 ，嚟到 虎穴 龍潭 搭救 小弟 ，協助 小弟 報咗 冤仇 。
小弟 犯咗 大罪 ，鬧咗 兩座 州城 ，必定 會 驚動 朝廷 㗎喇 。
而家 小弟 唔 上 梁山 去 投奔 晁蓋 大哥 亦 唔得 喇 ，唔 知道 各位 嘅 意思 係 點樣 ？
願意 跟埋 去嘅 就 一齊 去 ；
唔願意 去 嘅 ，就 聽從 尊便 。
因為 事情 一 發作 ，就 會 連累 人 ，各位 自己 考慮 。
話猶未了 ，李逵 就 跳起身嚟 大聲 嗌話 都去都去 ，邊個 唔去 我 就 一斧頭 斬開 佢 做 兩橛 ！
宋江 話 喇 ：哎 ，邊 有 你 噉樣 講說話 咁 粗魯 㗎 ，全在 各位 弟兄 ，心甘情願 ，先至 能夠 一齊 去 㗎 。
大家 都 話 喇 ：而家 殺死咗 咁多 官軍 人馬 ，鬧咗 兩處 州郡 ，佢哋 實係 會 申奏 朝廷 ，派 大軍 嚟 捉 我哋 嘅 。
而家 如果 唔 跟埋 阿哥 去 同生同死 ，噉 仲有 邊度 去吖 ？
宋江 好 歡喜 ，多謝咗 大家 。
當日 ，就 叫 朱貴 同 宋萬行 先 ，返去 山寨 裏 便 去 報告 。
然後 ，就 分 做 五 隊 人馬 出發 ：
頭一隊 ，晁蓋 、宋江 、花榮 、戴宗 、李逵 ；
第二隊 ，就係 劉唐 、杜遷 、石勇 、薛永 、侯健 ；
第三隊 ，係 李俊 、李立 、呂方 、郭盛 、童威 、童猛 ；
第四隊 ，係 黃信 、張順 、張橫 、阮家 三弟兄 ；
第五隊 就係 燕順 、王矮虎 、穆弘 、穆春 、鄭天壽 、白勝 。
五隊 總共 二十八 個 頭領 ，帶住 一班 人馬 ，將 呢次 得嚟 嘅 黃文炳 家財 各各 分開 ，裝咗 上 車 。
穆弘 呢 就 帶埋 父親 穆太公 ，同埋 成班 家眷 ，將 啲 金銀 、珠寶 、家財 冚𠾴 唥 裝晒 上 車 。
啲 莊客 裏頭 ，有 唔願意 跟埋去 嘅 ，就 畀 啲 銀 過 佢哋 ，打發 佢哋 走 ；
願意 去 嘅 就 一齊 去 。
前面 四隊 陸續 出發 喇 。
穆弘 收拾好 之後 ，放起 一把火 燒咗 莊院 ，掉低咗 田地 ，跟住 大隊 人馬 上 梁山泊 。
佢 哋 五隊 人馬 出發 ， 每 一隊 相隔 啊 二十里 左右 啦 。
而家 先 講 第一隊 晁蓋 、宋江 、花榮 、戴宗 、李逵 五 騎馬 ，帶住 車輛 人員 ，喺 路 上 行咗 三 日 ，就 嚟到 一 笪 地方 ，呢處 呢 叫做 黃門山 。
宋江 就 同 晁蓋 話 ：
睇嚟 呢座 山 形勢 怪惡 ，會 有 大班 人馬 喺 處 個 噃 。
不如 催促 後便 人 馬上 嚟 ，一齊 過去 罷啦 。
哈 ，話猶未了 ，只見 前面 山嘴 上面 ，鑼 鳴 鼓 響 。
宋江 話 喇 ：我 都 話 㗎啦 ，我哋 唔好 行住 ，等 後面 人 馬上 嚟 喇 先至 同 佢哋 打過 。
花榮 就 拈 弓 搭 箭 喺 手 嚟 ，晁蓋 、戴宗 都 揸住 朴刀 ，李逵 攞住 嗰 對 板斧 ，護衛 住 宋江 ，一齊 拍馬 向前 。
只見 山坡 旁邊 ，閃出 四五百 個 小嘍啰 ，前便 簇擁住 四條 好漢 ，手上 都 揸住 武器 ，佢哋 高聲 大喝 話 ：
你哋 大鬧咗 江州 ，劫掠咗 無為軍 ，殺害咗 咁多 官軍 百姓 仲 想 返去 梁山泊 係嘛 ？
我哋 四個 喺度 等 你 好耐 喇 。
懂事嘅 就 留低 宋江 ，噉 就 饒咗 你哋 嘅 性命 啦 。
宋江 聽咗 ，即刻 落馬 ，挺身而出 跪喺 地下 嚟 佢 話 ：
小人 宋江 被 人 陷害 ，冤屈 冇地 申訴 。
今日 得到 四方 豪傑 救返 條命 ，小人 唔 知道 喺 邊處 觸犯 咗 四位 英雄 ，萬望 高抬貴手 饒恕 殘生 啦 。
嗰 四 名 好漢 見到 宋江 跪 喺 前面 ，連忙 滾 鞍 落馬 掉低 咗 兵器 ，飛奔 上嚟 拜倒 喺 地下 佢哋 話 ：
我哋 弟兄 四個 只係 聽聞 山東 及時雨 宋公明 嘅 大名 ，真係 想 死嚟 都 唔能夠 見面 。
我哋 聽講 ，阿哥 喺 江州 為 咗 事情 吃官司 ，我哋 弟兄 商量 定 喇 ，正話 想 嚟 劫牢 ，就係 唔得 個 確實 消息 。
前幾日 ， 搵 啲 小 嘍 啰 去 到 江州 打聽 ， 佢 哋 返 嚟 話 ， 已經 有 好多 好漢 鬧 咗 江州 ， 劫 咗 法場 ， 救 咗 去 揭陽 鎮喇 噉 ；
收尾 ，又 燒咗 無為軍 ，劫掠咗 黃通判 屋企 。
我哋 諗 ，阿哥 必定 會 由 呢處 經過 ，一直 都 派 人 沿途 探聽 住 。
但係 怕 唔知 真假 ，所以 先頭 仲要 盤問 一番 ，衝撞咗 阿哥 ，千祈 唔好 見怪 啊 。
今日 有幸 得見 仁兄 ，喺 小寨 裏 便 準備咗 幾 圍 薄酒 ，係 噉 意 當做 接風 。
請 各位 好漢 一同 到 敝寨 坐下 啦 。
宋江 非常之 歡喜 ，扶起 四位 好漢 就 逐一 請問 尊姓大名 。
原來 為首 嗰個 人 ，姓 歐 名 鵬 ，係 黃州 人氏 ；
本來 係 個 軍官 ，因為 得罪咗 上司 啊 就 趯咗出嚟 ，喺 江湖 綠林 之中 呢 就 熬出咗 呢個 綽號 叫做 摩雲金翅 。
第二個 好漢 ，姓 蔣 名 敬 ，係 湖南 潭州 人士 ；
原來 係 一個 落第 舉子 出身 ，科舉 考試 冇 行 喇 ，就 棄 文 就 武 ，頗 有 謀略 ，精通 書算 ，成千上萬 佢 纖毫 不差 嘅 ；
亦都會刺槍使棒 ，佈陣排兵 ，因此 呢 人人 都 嗌 佢 做 神算子 。
第三個 好漢 姓 馬 名 麟 ，係 南京 建康 人氏 ；
本來 係 小番子 閒漢 出身 ，會 吹 鐵笛 ，大滾刀 使得 極好 嘅 ，百零人 唔 埋到 佢 身 ，因此 人人 都 嗌 佢 做 鐵笛仙 。
第四個 好漢 呢 ，姓 陶 ，名 宗旺 ，係 光州 人氏 ；
耕田人 出身 ，慣使 一把 鐵鍬 ，有嘅 係 氣力 ，亦 能夠 使 槍 舞 刀 ，因此 ，人人 都 叫 佢 做 九尾龜 。
呢 四位 好漢 迎接 到 宋江 喇 ， 小 嘍 啰 就 即刻 捧 咗 托盤 過 嚟 ， 上面 放住 一 大壺 酒 ， 兩 大碟 肉 ， 托過 嚟 敬酒 啊 。
先敬畀 晁蓋 、宋江 ，接住 就 敬畀 花榮 、戴宗 、李逵 ，同 各人 都 見過 面喇 。
唔使 兩個 時辰 咁 耐 ，第二 隊 頭領 又 到 咯 喎 ，一個個 都 見過 面 ，敬完 酒 ，就 邀請 眾位 頭領 上山 。
噉 兩隊 十位 頭領 就 上咗 黃門山寨 裏 頭 先 。
嗰 四位 好漢 呢 ，又 吩咐 殺 牛 劏 馬 嚟 款待 ，又 派 啲 小 嘍啰 陸續 落 山 ，去 迎接 後面 嗰 三隊 十八 位 頭領 上山 嚟 參加 宴會 。
唔使 半日 ，三隊 好漢 都 已經 到齊 ，都 喺 聚義廳 喺 筵席 上面 相會 。
宋江 喺 飲酒 嘅 中間 就 對 歐鵬 佢哋 話 喇 ：
呢次 我 宋江 投奔 咗 晁天王 阿哥 ，上去 梁山泊 一同 聚義 。
唔知道 四位 好漢 ，肯唔肯 放棄咗 呢處 ，一齊 去 梁山泊 大寨 相聚 呢 ？
四個 好漢 一齊 回答 話 ：
如果 得到 兩位 義士 ，唔 嫌棄 我哋 貧賤 ，情願 跟隨 阿哥 同 阿哥 牽 馬 。
宋江 、晁蓋 都 好 歡喜 就 話 ：
既然 四位 肯 一齊 聚義 喇 ， 就 請 你 哋 執拾 好 起程 啦 。
咁多 頭領 聽見 都 十分 高興 ，因為 多咗 人馬 啦嘛 。
喺 山寨 住咗 一 晚 ，第日 ，宋江 、晁蓋 仍然 係 做 頭 一隊 ，落山 出發 先 。
接住 係 按照 原來 個 次序 行 ，每 隊 只 隔 二十 里 咁 上下 。
嗰 四名 好漢 就 執拾 好啲 財帛 金銀 等等 ，帶住 四五百 個 小嘍啰 ，放火 燒 咗 山寨 ，作為 第六 隊 登程 嘞 。
宋江 因為 又 得到 呢 四位 好漢 個 心 啊 非常 歡喜 ，喺 路上 佢 對 晁蓋 話 ：
唉 ，小弟 喺 江湖 上 走咗 呢 幾 勻 ，雖然 係 受到 啲 驚恐 ，不過 亦 結識 咗 咁多 好漢 。
哈哈 ， 今日 同 阿哥 上山 ， 小弟 就要 死心塌地 ， 同 阿哥 你 同死 同生 啊 。
一路上 傾下 閒偈 ，不經不覺 就 嚟到 朱貴 嘅 酒店 。
而家 講下 四個 守 山寨 嘅 頭領 ， 吳用 ， 公孫勝 、 林沖 、 秦明 ， 同埋 兩個 新 嚟 嘅 蕭 讓 、 金大堅 ， 已經 得到 先行 返 嚟 嘅 朱 貴 、 宋 萬 嘅 報告 ， 就 每日 都 派 小 頭目 ， 棹 船出 嚟 酒店 裏 便 迎接 嘅 。
所以 晁蓋 、宋江 佢哋 一到啫 ，就 一隊隊噉 ，喺 嗰便 坐船 到 金沙灘 上岸 ，呢便 呢 就 擂鼓 吹笛 歡迎 。
眾位 好漢 一啲 就 騎馬 ，一啲 就 坐 轎 上 到 山寨 。
到咗 關下 ，軍師 吳學究 佢哋 六個人 ，敬咗 接風酒 就 一齊 嚟到 聚義廳 ，焚起 一爐 靚香 。
晁蓋 就 請 宋江 做 山寨 之 主 坐 第一 把 交椅 嘞 。
宋江 就 唔肯 啦 佢 話 ：阿哥 你 噉 就 唔啱 喇 。
小弟 賀蒙眾位 不避 刀斧 ，救返 條命 。
阿哥 你 本來 係 山寨 之主 ，點能夠 話 讓畀 小弟 呢 ？
如果 真係 要 噉樣 讓 法 ，小弟 情願 死咗 佢 喇 。
晁蓋 話 ：賢弟 你 點解 噉樣 講 啊 ？
當初 如果 唔係 賢弟 擔當起 血海一樣 嘅 關係 ，救返 我哋 七個人 條命 上山 ，點會 有 今日 咁 多人 咁 興旺 吖 ？
你 正係 山寨 之 恩主 啊 ；
你唔坐 ，邊個 坐啊 ？
宋江 話 喇 ：仁兄 ，論 年紀 ，兄長 亦 大 十歲 ，小弟 如果 坐咗 自己 都 醜 啊 。
再三 推讓 晁蓋 坐咗 第一位 ，宋江 自己 坐咗 第二位 ，吳學究 坐咗 第三位 ，公孫勝 就 坐 第四位 。
宋江 就 話 喇 ：唔好 分 功勞 大小 嘞 ，梁山泊 一 行 舊 頭領 ，喺 左邊 主位 上面 坐 ；
新到嘅頭領 ，喺 右邊 客位 上面 坐 。
等到 日後 睇下 出力 多少 ，到 嗰陣 先至 再行 定奪 啦 。
大家 一齊 話喇 ：阿哥 你 噉 講 就 啱到 極 喇 。
左邊 一 迾， 係 林沖 、 劉唐 、 阮小二 、 阮小五 、 阮小七 、 杜遷 、 宋萬 、 朱貴 、 白勝 。
右邊 呢 一 迾 呢 ， 按照 年歲 次序 就 互相 推讓 。
結果係 花榮 、秦明 、黃信 、戴宗 、李逵 、李俊 、穆弘 、張橫 、張順 、燕順 、呂方 、郭盛 、蕭讓 、王矮虎 、薛永 、金大堅 、穆春 、李立 、歐鵬 、蔣敬 、童威 、童猛 、馬麟 、石勇 、侯健 、鄭天壽 、陶宗旺 ，總共係 四十位 頭領 坐定 。
跟住 就 大吹大擂 ，舉行 盛大 嘅 宴會 嚟 慶祝 嘞 。
喺 酒席 上 ， 宋江 又 同 大家 講起 江州蔡 九 知府 ， 捏造 謠言 呢 件 事 ， 佢 話 ：
黃文炳 嗰個 傢伙 真係 豈有此理 ，又 唔關佢事 ，一味 喺 知府 面前 胡言亂語 ，喺嗰度 解 嗰首 童謠 話 ：
耗國 因 家 木 ，耗散 國家 錢 糧 個人 就 必定 係 家字頭 着 個 木字 ，就係 個 宋字 喇噉 。
刀兵 點 水工 ， 話 興動 刀兵 嘅 人 呢 ， 必定 係 三點水 做個 工字 ， 噉 就 係 個 江字 啦 。
呢噉 就 應正 我 宋江 身上 噉 。
收尾嗰 兩句話 縱橫 三十六 ，播亂 在 山東 ，即係話 ，我 宋江 喺 山東 造反 。
因此就 捉咗 小弟 去 。
點知 戴院長 又 帶咗 封 假信 嚟 ，因此 黃文炳 個 傢伙 ，就 極力 慫恿 個 知府 ，要 佢 先 斬 後奏 。
如果唔係得到各位好漢搭救呀 ，點能夠嚟到呢處吖 ？
李逵 跳上嚟 就 話 喇 ：
我嘅 好大哥 啊 ，你 係 應 正天上 嘅 說話 喇 ，雖然 係 捱咗 啲 鹹苦 ，不過 黃文炳 嗰個 奸賊 ，亦 畀 我 割得 夠 痛快 喇 。
哈哈哈 哈哈 ， 你 睇 下 ， 我 哋 有 咁 多 軍馬 ， 就算 係 做 反 又 怕 乜嘢 啊 ？
嗱 ，晁蓋 阿哥 ，就 做 個 大 皇帝 ，宋江 阿哥 你 做 個 小 皇帝 ，吳 先生 做 個 丞相 ，公孫 道士 做 個 國師 ，嘿 ，哈哈 ，我哋 個個 都 做 個 將軍 ，殺 去 東京 ，搶 咗 佢 個 皇帝 位 ，喺 嗰處 快活 噉 唔係 仲 好 ？
好過 喺 呢個 水泊 裏頭 啦嘛 。
戴宗啊 連忙 喝住 佢 話喇 ：鐵牛 ，你 呢個 傢伙 亂噏 廿四 。
你 今日 嚟到 呢處 就 唔好 學 似 你 喺 江州 噉樣 牛頸 喇吓 ，樣樣 都 要 聽從 兩位 頭領 阿哥 個 說話 號令 ，唔准 你 胡言亂語 ，多嘴多舌 。
你 如果 仲係 咁多口 插嘴 呢 ，就 割 咗 你 個 頭 嚟 做樣子 ，嚟 警戒 其他 嘅 人 。
李逵 話 哎呀 ， 割 咗 我 呢 個頭 殼 呀 ， 嘿 ， 噉 幾時 再長 返 一個 出 嚟 啊 ， 咪 拘 喇 。
我 飲酒 就 係 啦 ， 哈哈 ， 哈哈 ， 哈哈哈哈 哈哈哈 哈哈哈 。
咁多 好漢 聽咗 都 大笑 起上嚟 啊 。
宋江 就 提起 佢 拒敵 官軍 嗰件事 ，佢話 ：
嗰陣 小弟 初初 聽聞 話 要 抗拒 官軍 ，唉 ，都 唔知 幾 慌 ，估唔到 今日 輪到 我 宋江 身上 。
吳用 就 話 啦 ：
兄長 當初 如果 聽咗 我哋 弟兄 嘅 說話 ，就 留 喺 山上面 快活 唔去 江州 ，你話 慳返 幾多 事 呢 ？
不過 ，呢啲 都係 天數 注定 係 如此 啊 。
宋江 問 喇 ：黃安 嗰個 傢伙 而家 喺 邊處 啊 ？
晁蓋話 ：嗰個 傢伙 住咗 唔夠 兩三 個月 就 病死咗 咯 。
宋江 聽咗 都 十分 感慨 。
當日 嘅 宴會 ，盡 歡 而 散 。
晁蓋 首先 係 叫人 安頓 好 穆太公 一家 老小 。
又叫人 將 黃文炳 嘅 家財 攞出嚟 ，賞畀 所有 出力 嘅 小嘍啰 。
同時 ，又 攞出 蔡九 知府 送畀 佢 老豆 嘅 嗰 兩 盒 珠寶 ，交還 畀 戴 院長 使用 。
戴宗 就 唔 肯 要 ，一定 要 擠 喺 庫房 裏 便 ，由 公家 開支 使用 噉 。
晁蓋 又 叫 所有 嘅 小嘍啰 ，嚟 參拜 咗 新 頭領 李俊 等等 。
噉樣 ，連氣 幾日 ，山寨 裏頭 殺牛 劏馬 ，舉行 慶賀 筵席 呢啲 不在話下 喇 。
到咗 第三日 ，喺 酒席 上 宋江 就 起身 對 各位 頭領 話 ：
小弟 仲有 一件 大事 ，要 講畀 各位 弟兄 聽 。
小弟 而家 想 落山 行 一趟 ，請 幾日 假 ，唔知 各位 畀唔畀 我 去 呢 ？
晁蓋 就 問喇 ： 賢弟 想 去 邊處 啊 有 咩 嘢 大事 要 做 啊 ？
小弟 自從 得 各位 救咗 上山 ，連氣 幾日 喺 呢處 飲宴 ，非常之 快樂 ，就係 唔知道 父親 喺 屋企 而家 點唧 。
目前 ， 江州 申奏 朝廷 ， 必定會 有 公事 嚟 到 濟州 ， 命令 鄆城縣 追捉 家屬 緝捕 正犯 ， 我 好 怕 父親 存亡 不保 啊 。
因此 小弟 想話 返去 屋企 接 我 父親 上山 ， 噉 就 唔 使 以後 日夜 噉 掛念 啦 。
唔知 各位 弟兄 肯 唔肯 畀 我 去 呢 ？
賢弟 ，呢件 係 人倫中 嘅 大事 ，總 唔能夠 話 我 同 你 喺 呢處 快樂 ，由得 屋企 嘅 父親 受苦 㗎 ，我哋 冇 話 唔畀 賢弟 你 去 嘅 。
只係 各位 弟兄 連日 辛苦 ，山寨 裏頭 又 人馬 未 定 ，不如 再 過 兩日 ，點起 山寨 人馬 ，幫 賢弟 去 接 佢 嚟 誒 。
仁兄 ，再過幾日 都 唔緊要 ，就係 怕 江州 嘅 公事 一到咗 濟州 要 追捉 家屬 ，噉 就 唔好 喇 ，所以 事 不宜 遲 啊 。
而家 亦 唔使 咁多人 去 嘅 ，就 小弟 一個人 秘秘密密 噉 返去 ，同 細佬 宋清 接 我 父親 上山 。
噉嗰陣 鄉裏 頭 神不知鬼不覺 噉 仲 好啦 。
如果 帶多咗 人 去 必定 會 驚動 鄉里 ，反為 不便 啊 。
不過噉噃賢弟 ，萬一路途上面 有 咩嘢 疏失 ，就 冇 人 救 你 嘅 咯噃 。
唉 ，為咗 父親 死 而 無怨 ，仁兄 你 唔使 擔心 。
當日 大家 苦苦 留 宋江 都 留佢 唔住 ，佢 堅決 要 返去 鄉下 。
宋江啊 戴住 頂氈笠 ，揸住 條短棍 ，仲 帶住 把 利刀 ，就 落山 。
各位 頭領 一直 送到 去 金沙灘 就 分別 嘞 。
噉而家 講下 宋江 佢 過咗 渡 ，去到 朱貴 酒店 嗰處 上咗 岸 ，就 混 條 大路 行 一直 去 鄆城 縣 。
路上 啊 少不免 饑 餐 渴 飲 ，夜 住 曉 行 啦 。
有一日 ，上下 嚟到 宋家村 嘞 ，不過 已經 好 夜 喇 趕唔到 ，就 搵 間 客店 住 一 晚 先 。
第日 就 趕到 宋家村 ，嚱 ，呢次 又 早過 頭噃 。
日光 日白 入 村 唔 妥當 㗎 ，就 喺 樹林 裏 便 伏低 ，一路 等到 夜晚 ，返去 屋企 ，敲 後門 喇 。
過咗一陣 ，宋清 出嚟 開門 喇 ，開咗 門 見到 係 大哥 嚇咗 一驚 就 問喇 ：
吓 ，阿哥 ，你 返 屋企 咩嘢事 啊 ？
我 特登 返嚟 接 父親 同 你 啊 。
阿哥啊 ，你 喺 江州 做 嗰啲 事 ，而家 呢處 都 知道 晒 喇 。
縣 裏 便 派咗 呢 兩 個 趙 都 頭 日日 都 嚟 要 人 ，管 死 咗 我哋 ，唔 行得 開 啊 。
等 江州 文書 一 到 ，就 要 捉 我哋 父子 兩個 人 韞 喺 監 裏 便 嚟 ，等住 捉 你 。
而家 無論 日日夜夜 ，都 有 一兩百 個 土兵 巡邏 。
你 快啲 走啦 ，快啲 去 梁山泊 ，請 各位 頭領 嚟 救 父親 同 我 啦 。
宋江 聽咗 嚇到 成身 冷汗 ，唔敢 入去 喇 ，轉身 就 走 就 想 趯 返 梁山泊 咯噃 。
當晚 黑 ，月色 朦朧 ，啲 路 啊 睇得 唔係 點 清楚 ，宋江 一味 揀 啲 靜僻 小路 行 。
約莫 行咗 一個 更 咁上下 ，聽見 後 便 有人 嗌起 上嚟 。
宋江 擰 轉頭 睇 下 ， 只見 隔 嗰 一兩 里路 ， 睇 見 一 劄 火把 照到 光 晒 ， 聽見 嗰 啲 人 喺 度 嗌： 宋江 你 咪 走 啊 ， 宋江 你 咪 走 啊 噉 。
宋江 一便 行 一便 諗喇 ：哎呀 ，就 唔 聽 晁蓋 嘅 說話 ，果然 有 今日 之 禍 啊 。
皇天 可憐 ，搭救 下 宋江 啦 。
佢 遠遠 望見 前面 有 條 村 ，佢 一味 噉 顧住 行過去 。
冇 幾耐 ，啲 風吹 開咗 啲 烏雲 ，現出 嗰 輪 明月 。
宋江 噉就 睇清楚 喇 ，哎呀 ，弊咯 ，原來 佢 行咗 嚟 呢 笪 地方 啊 有 名 叫做 還道村 。
原來 沊沊𡃈 都係 高山峻嶺 ，山下 一條 溪水 ，中間 就係 得 一條 路 。
入咗嚟 呢 笪 地方 呀 ，左來右去 ，就係 得 呢條 路 個 啫 ，再 冇 第二 條 路 行 㗎 喇 。
宋江 認得 呢 個 村口 ， 想話 回身 扯 人 啦 ， 但 係 後 便 追緊 嚟 嘅 人 呢 就 已經 封住 咗 路口 唔 返得 去 喇 。
嗰啲 火把 ，照到 好似 日頭 咁 光猛 。
宋江啊 只有 一直 趯入 去 村裏頭 想 搵 地方 匿 咯噃 。
行過咗 一座 樹林 ，見到 有 間 古廟 。
呢間廟呢 ，已經 係 牆垣 頹損 啊 殿宇 傾斜 ，好 爛 㗎 喇 。
宋江 唔 理得 咁 多咯 ， 推開 廟門 ， 趁住 月光 入 咗 間 廟裏 便 ， 想 搵 個 地方 匿 埋 。
前殿 後殿 相咗 一輪 ，都 搵唔到 合適 嘅 地方 匿 ，個心啊 越發 慌 。
呢個 時候 聽見 外便 有人 話 喇 ：哼 ，實係 入咗 呢間 廟 裏頭 㗎 喇 。
宋江 聽 下 ，係 趙能 把 聲 。
急起嚟 都 冇 埞匿 喇 ，咦 ，見到 殿上 有 個 神廚 。
宋江 唔理 咯 ，掀起 帳幔 ，一下 就 鑽入 去 神廚 裏 便 。
放低條棍 ，縮埋一嚿噉伏喺處 ，大氣都唔敢唞 。
啱啱 伏好啫 ，就 聽到 外便 有人 攞住 火把 照住 入嚟 。
宋江 喺 神廚 裏 便 裝 出去 ，見到 係 趙能 、趙得 帶住 四五十 個 人 ，攞住 火把 到處 咁 照 。
眼睇住就嚟照到上嚟殿喇 ，宋江就話喇 ：
哎呀 我 呢次 行咗 死路 啊 ，望 陰靈 庇護 ，神明 庇佑 啊 。
嗰啲 土兵 一個個 都 行過 ，吖 冇 人 嚟 照 神廚 喎 。
宋江 就 諗 喇 ： 哎呀 ， 好彩數 啊 ， 好彩數 啊 。
只見 趙得 攞起 火把 ，嚟 神廚 裏 便 照 喇 。
宋江 諗 ：哎呀 ，我 呢趟 實死 喇 。
趙得 一隻 手 ，將 朴刀桿 挑起 堂神帳 ，上下 將 火 嚟 一 照 ，啲 火煙 一 衝 ，衝起 一片 灰塵 落嚟 就 落 正 趙得 嗰 雙眼 。
趙得啊即刻瞇起雙眼 ，將火把掉喺地下 嚟一腳踩熄佢 。
行出殿門外便 ，就 對 啲 土兵 話 喇 ：哎 嗰個 傢伙 唔 喺 廟 裏頭 啊 。
之又冇路啊 ，走咗去邊處呢嚱 ？
啲土兵 就 話 喇 ：嗰個 傢伙 梗係 趯咗 入 村 匿 喺 樹林 裏便 啦 。
呢處 佢 係 走唔甩 嘅 。
呢條村 就 叫做 還道村 ，就係 得 呢條路 出入 㗎啫 ，裏便 雖然 有 高山 大樹 林 之 冇 路 上 得去 嘅 。
都頭 啊 ， 我 哋 守住 村口 ， 佢 就算 會 插翼 飛得 上天 佢 都 走 唔 甩 嘅 。
等到天光 我哋 入村 去 呀 認真噉 搜查 下 啦 。
趙得話喇 ：好啦 。
噉就 帶埋 啲 土兵 行 出 間 殿 。
宋江 話 喇 ：哎呀 真係 神明 護佑 啊 。
如果 得返 條命 ，必定 重修 廟宇 再 建 祠堂 ，陰靈 保佑 啊 。
哈哈話猶未了 ，只聽見 有幾個 土兵 喺 廟門 外 便 嗌喇 ：都頭啊 ，喺 呢處 嚟 啊 。
趙能 、趙得 同埋 嗰班人 ，一齊 趕返 轉頭 。
宋江 話 ： 哎呀 ， 晦氣 喇 晦氣 喇 ， 呢 趟實 畀 佢 哋 捉 到 喇 。
趙能 嚟到 廟 前面 問 喇 ：喺 邊處 啊 ？
土兵 就 話 喇 ：都頭 ，你哋 睇下 ，廟門 上面 有 兩個 手印 ，一定 係 啱 先 佢 推開 道 廟門 ，匿埋 喺 裏 便 啊 。
趙能話 ：係噃 ，冇錯噃 ，再仔細啲 入去 搜查 一下 。
呢班人 ，就 再 入嚟 間 廟 裏 便 搜查 喇 。
宋江 諗 ：唉 ，我 條命 係 真係 唔好 個 咯 ，今次 實弊 喇 。
嗰班人 ，喺 殿前 殿後 度度 都 搜查過 ，就係 爭 冇 將 啲 磚頭 翻過嚟 啫 。
大家 搜查咗 一遍 ，啲 人 揸住 火把 又 上嚟 間 殿 咯 喎 。
趙能就話喇 ：
多數 係 匿 喺 神 廚 裏 便 㗎 喇 ， 先頭 細佬 你 睇 得 唔 仔細 啫 ， 嚟 ， 等 我 嚟 照 一照 。
一個 土兵 就 攞住 火把 ，趙能 一手 擸起 帳幔 ，六七個人 就 哄 個 頭 裝入去 睇下 。
哈 ，唔睇 就 萬事 都 冇 ，一睇啫 ，只見 神廚 裏 便 卷起 一浸 惡風 ，呼噉 將 火把 冚𠾴 唥 吹熄晒 。
成間 廟 裏面 黑蚊蚊 ，黑到 呀 對面 都 唔見 人 。
趙能 就 話 喇 ：咦 ？作怪 喇 。
無情 白事 返起 呢浸 惡風 ，啊 ，實係 神明 喺 裏 便 唔鍾意 啊見 我哋 一味 嚟 照 嬲 啊 ，因此 翻起 呢浸 惡風 嚟 顯靈 啊 。
哎 我哋 走罷啦 走罷啦 。
我哋 就 守住 村口 ，等到 天光 再 嚟 搵 啦 。
趙得就話喇 ：不過 神廚 裏 便 冇 睇清楚 噃 ，用 支槍 去 督下佢 。
佢 兩個 啱啱 想 行前 ，只 聽見 殿後 便 又 卷起 一陣 怪風 ，吹到 飛沙走石 掃過嚟 ，搖到 嗰 間 殿宇 呀 𤜯𤜯 聲 咁 逳 。
一浸 黑雲 罩落嚟 ，哎呀 冷啊 ，連 頭髮 毛管 眼 都 戙起晒 。
趙能 知道 弊喇 呢趟 ，嗌聲 趙得 話 兄弟 啊 快啲 走啊 ，神明 唔 高興 啊 。
大家 㗾聲下 都 趯 出 間 殿 ，向住 廟 門 外 便 就 飛咁 跑 。
有幾個 躀低咗 ，有啲 就 扭親 隻 腳 ，爬返起身 就 搏命 咁 走出 廟門 。
嘿 ，聽見 廟 裏頭 有人 喺度 嗌 喎 ：唔關 我 事 啊 ，唔關 我 事 啊 ！
誒究竟 咩嘢事 呢裏頭 ，噉 就 下次 再 講 喇 。
