而家 講 下 花榮 、秦明 啊 ，佢 帶住 人馬 ，跟住 嗰 兩個 打魚 佬 就 嚟到 朱貴 間 酒店 。
朱貴 聽講咗 ，就 迎接 眾人 入去 酒店 見咗面 。
吩咐 劏 兩 隻 大黃牛 ，按照 規矩 就 派咗 酒菜 。
佢 攞 書信 睇咗 ，噉 就 喺 水亭 上面 放起 一 支 響箭 射過 對面 嘅 蘆葦林 裏 便 ，嗰 便 呢 就 扒咗 隻 快船 過嚟 。
朱貴 又 嗌 小嘍啰 就 吩咐 佢 ，叫 佢 將 封信 送 上去 山 就 報告 先 。
呢頭呢 ，就 殺豬 劏羊 ，款待 九個 好漢 ，同時 將 啲 人馬 就 安排 住 喺 四周圍 休息 。
第 日 上午 ，只見 軍師 吳 學究 親自 嚟到 朱貴 間 酒店 迎接 大家 。
一個個 都 見過 面 ，互相 問候 行禮 ，十分 親熱 。
噉 梁山泊 呢 ，用 二三十 隻 大船 ，嚟 接 佢哋 上去 。
吳用 、 朱貴 就 請 九位 好漢 落船 啦 ， 家眷 車輛 、 人馬 行李 亦 都 搬 晒 落船 。
駛到去 金沙灘 上岸 ，喺 岸邊 嘅 松樹 路口 ，梁山 咁多 位 好漢 跟住 晁 頭領 ，帶埋 全副 鼓樂 嚟到 迎接 ，非常之 隆重 。
晁蓋 為 首 ，同 九位 好漢 見咗面 ，接咗 佢哋 上關 ，然後 各自 坐 馬 坐轎 一直 嚟到 聚義廳 。
大家 一對對 再行過禮 ，就 分開 兩行 坐落 。
左便 一迾 交椅 呢 ，係 晁蓋 、吳用 、公孫勝 、林沖 、劉唐 、阮小二 、阮小五 、阮小七 、杜遷 、宋萬 、朱貴 、白勝 。
係 喇 ， 嗰 陣 白日 鼠白勝 啊 ， 喺 幾個 月 之前 呢 ， 已經 由 濟州 嘅 監牢 裏 便 越獄 逃走 ， 就 上 咗 梁山 入夥 嘞 。
呢啲 都係 吳學究 派 人 去 使 錢 買通 晒 ，救 白勝 甩身 嘅 。
噉 右 便 呢 一 迾 交椅 呢 ， 就 係 花榮 、 秦明 、 黃信 、 燕順 、 王英 、 鄭天壽 、 呂方 、 郭盛 、 石勇 。
跟住 喺 當中 ，焚起 一爐香 ，大家 都 宣咗 誓 。
當日 就 大吹大擂 奏起 音樂 ，殺牛 劏馬 就 舉行 宴會 。
同時呢 ，叫 新到嚟嘅 小嘍啰 ，嚟 參拜 各位 頭領 。
參拜完喇 ，就 由 小頭目 嚟 款待 佢哋 飲酒 。
又 收拾好 後山 啲 房屋 ，安排 新嚟 嘅 家眷 喺 嗰度 住 。
秦明 同 花榮 喺 酒席 上 ，稱讚 宋公明 好多 好處 。
講到 清風山 報仇 殺 劉高 夫婦 呢件事 ，各位 頭領 聽咗 就 非常之 高興 。
再後呢 ，又 講到 呂方 、郭盛 兩個 比賽 戟法 ，花榮 一箭 射斷 絨帶 分開 畫戟 噉 。
晁蓋 聽咗 有啲 唔係 點 信 嘞 ，就 含含糊糊 噉 話 ：哦 ，乜 真係 射得 咁 準 咩 ？哈哈哈 ，第日 嚟 睇下 比 箭 都 好吖 。
當日 ，飲到 一半 ，各位 頭領 都 話 喇 不如 去 山前 行下 先 ，返嚟 再 飲過 誒噉 。
大家 都 話 好啊好啊噉 ，就 互相 謙讓 ，行咗 出去 散下步 傾下偈 ，觀賞 山景 。
行到 寨前 第三關 ，聽見 天空 上 便 有 一行雁 ，喺度 飛過 叫緊 。
花榮 諗嘞 ：晁蓋 先頭 睇嚟 ，都唔係 點 信 我 射斷 絨帶 。
好 ，等 我 今日 施展 返 兩道 本事 畀 佢哋 睇下 ，等 佢哋 日後 敬服 我 都 好 啊 。
佢 擸咗 一眼 ，見到 有人 帶住 弓箭 嘅 。
花榮 就 問 佢 攞咗 一張 弓 嚟 ，揸 喺 手 睇 一睇 ，係 一張 泥金鵲 畫 細 弓 ，合晒 花榮 心水 。
佢 即刻 攞 一支 好 箭 就 對 晁蓋 話 喇 ：
先頭 兄長 聽 我 講 射斷 絨帶 ，各位 頭領 亦 好似 唔係 點 信噉 。
嗱 ，兄長 你 睇 ，而家 有 一行 雁 飛 緊 嚟 ，花榮 唔 敢 誇口 ，我 呢 一支 箭 要 射 雁行 裏 便 第三 隻 雁 嘅 頭殼 。
如果 射唔中 ，各位 頭領 唔好 笑話 。
花榮 搭上 箭 拉 滿弓 ，瞄得準 一準 ，向住 空中 𠻘噉 一箭 射過去 。
呢一箭 ，果然 正中 雁行 當中 第三 隻 ，一直 跌落 去 山坡 下 便 。
晁蓋 急急 叫 人 執返 上嚟 睇下 ，呢 一 支 箭 啊 ，正正 穿中 喺 雁頭 上 便 。
晁蓋 同埋 各 頭領 睇咗 ，嘩嗨 ，佩服 到 都 唔會 講 。
大家 都 稱讚 花榮 做 神臂將軍 。
吳學究 就 稱讚 話喇 ：
咪 話 將軍 比做 小李廣 啊 ， 就算 係 養由基 再生 亦 唔 及 你 嘅 神 手 ， 真 係 山寨 有幸 ， 山寨 有幸 啊 ！
從此之後 ，梁山泊 冇 一個 話 唔 欽敬 花榮 嘅 。
各位 頭領 再 返去 聚義 聽 宴會 ，到到 晚 頭 黑 先至 散席 休息 。
第二日 ，山寨 裏 便 再 準備 宴席 ，擬定 座位 次序 嘞 。
本來 係 秦明 先至 到 花榮 嘅 ，但係 呢 ，花榮 係 秦明 嘅 大舅 喎 ，所以 大家 就 推舉 花榮 喺 林沖 之下 ，坐咗 第五 位 。
秦明 呢 就 坐 第六 位 ，劉唐 坐 第七 位 ，黃信 坐 第八 位 ；
三阮之下呢 ，又係 ：燕順 、王矮虎 、呂方 、郭盛 、鄭天壽 、石勇 、杜遷 、宋萬 、朱貴 、白勝 ，總共 係 二十一 個 頭領 。
山寨 就 越嚟越 興旺 喇 ，就 決定 添造 大船 、屋宇 、車輛 、什物 ；
打造 刀槍 、軍器 、鐵甲 、頭盔 ；
整頓旌旗 、袍襖 、弓箭 ，準備 抵敵 官軍 ，呢啲 不在話下 喇 。
而家呢 ，就 講下 宋江 啊 ，佢 自從 喺 酒店 離開咗 石勇 、燕順 ，就 日夜 咁 趕路 。
呢一日 ，申牌 嘅 時候 ，即係 下午 三四點鐘 啦 ，就 返到 鄉下 。
佢 喺 村口 張 社長 間 酒店 處 歇 一歇 腳 。
呢個 張 社長 呢 ，就 平時 同 宋江 屋企 來往 得 好 密切 嘅 。
張 社長 見到 宋江 返 嚟 ， 個 面口 好 唔 高興 眼濕 濕 噉 ， 張 社長 就 問 佢 喇 ：
啊押司 有 成年半 冇 返 屋企 呢 嚱 ，今日 返嚟 就 好啦 啊 。
點解 尊容 有 啲 煩惱 噉 ，係唔係 個 心 有 啲 心事 唔 高興 啊 ？
啊係咯 ，而家 遇啱 大赦 ，你 個 官司 實 減罪 㗎 啦 。
阿叔 你 講得 啱 。
唉 官司 嘅 事 都 唔 緊要 咯 ，就係 父親 ，過咗世 ，你 叫 我 有 乜 辦法 唔 煩惱 吖 ？
哈哈哈哈哈哈 ，哎押司 你 真 定 假 㗎 ，乜 開啲 噉 玩笑 啊 ？
令尊 啱啱 喺 我 呢處 飲咗 酒 先至 返去 咋 喎 ，半個 時辰 度 咋嘛 ，呵 乜 你 噉 講 啊 押司 ？
阿叔 你 唔好 取笑 我 咯 。
宋江 就 攞 封 家信 嚟 畀 張 社長 睇 ：
嗱 ，我 細佬 宋 清明明 寫住 話 ，父親 喺 今年 正月初 死咗 咯 ，專 等 我 返嚟 奔喪 。
張社長 睇完 又 話 ：唓 ，邊度 有 噉嘅 事 啊 ？呢 ，午時 前後 ，同 東村 嘅 王太公 喺 我 呢處 飲咗 酒 返去 嘅 。
嘿 ，唔通 我 會 呃 你 咩 ？
宋江 聽咗 個 心 就 真係 唔知 信 乜 好 咯噃 ，諗咗 好耐 好耐 。
等到 天黑 嘞 ， 就 離開 張 社長 間 酒店 行返 屋企 ， 返到 屋企 入到 門口 一睇 嘿 ， 冇 釐 動靜 嘅 ？
莊客 見到 宋江 返嚟 ，都 嚟 拜見 啦 好 歡喜 啦 。
宋江 就 問 喇 ：我 父親 同 四郎 喺度 嘛 ？
太公 啊 日日 都 望 押司 返 嚟 望 到 眼 都 穿 啊 ， 而家 押司 你 返 嚟 喇 佢 真 係 好 歡喜 啊 。
先頭 同 東村 王 社長 ，喺 村口 張 社長 間 酒店 飲 咗 酒 返嚟 ，而家 喺 裏 便 瞓緊 呢 。
宋江 聽咗 ，嘿呀 ，掉低 條 短棍 ，一直 行 入去 大廳 。
啱啱 宋清 喺 裏 便 行出嚟 ，見到 阿哥 喇 ，叩頭 行禮 啦 。
宋江 見到 個 細佬 ， 果然 冇 戴孝 個心 就 好 嬲 ， 鬧 佢 話 ：
嘿 ！ 你 呢 個 忤逆 畜生 吖 ， 你 為 乜 事 幹 啊 ？ 啊 ！
父親 而家 好地地 喺 處 ，你 點解 寫 信 嚟 戲弄 我 ？
搞到 我 幾次 三番 想 自殺 ，喊 一次 暈 一次 。
你 呀 ， 你 真 係 個 不孝之子 啊 ！
宋清 笑口噬噬 啱啱 想 分辯 一下 ，只見 宋太公 喺 屏風 後 便 轉出嚟 話 ：
阿仔 你 唔好 嬲 ，哈哈哈哈 ，呢件事 唔關 你 細佬 事 。
係我日日咁想念你 ，要見你一面 ，因此叫阿四郎寫信 ，嘿嘿話我死咗 ，噉你就返得快啲啦嘛 。
我 又 聽 人 講 ，白虎山 地面 好多 賊 嘅 ，我 又 怕 你 一時 畀 人哋 唆擺 去 咗 落草 ，做 咗 個 不忠不孝 嘅 人 ，噉 就 弊咯 。
所以 我 呀 急急 寄 封 信 去 ，嗌 你 返嚟 屋企 。
嘿嘿 ，又 多得 柴大官人 嗰處 嚟 嘅 石勇 ，帶 信 去 畀 你 。
嗱 ，呢件事 都係 我 主意 嚟 ，唔關 四郎 事 嘅 ，你 唔好 埋怨 佢 ，吓 。
我啱先 喺 張 社長 間 酒店 返嚟 ，聽講 話 你 返嚟 喇噉 ，哈哈哈 。
宋江 聽咗 ，跪低 喺度 叩頭 畀 太公 ，個心 呀 ，真係 又 憂 又 喜 啊 。
宋江 就 問 佢 父親 話 喇 ：唔知 近日 官司 點樣 呢 ？
而家 已經 大赦 ，梗係 減罪 㗎喇 。
啱先 張 社長 已 噉樣 講 嚟 。
宋太公 就 話 喇 ：你 細佬 未 返嚟 之前 呢 ，就 多得 阿朱 仝 、雷橫 出力 幫忙 ，官府 誒 只係 發咗 個 通緝命令 ，就 再 冇 嚟 啰嗦 過 喇 。
我 而家 點解 會 嗌 你 返嚟 呢 ？
係噉嘅 ，近來 啊 聽聞 朝廷 冊立 咗 皇太子 ，就 已經 發 咗 道 赦書 。
所有 民間 啲 人 犯 咗 大罪 嘅 ，都 係 減 一等 嚟 判決 嘅 ，而家 已經 喺度 實行 緊 咯 。
你就算 喺 官府 裏 便 判罪 ，亦 不過 係 充軍 之 罪 啫 ，唔使 死 㗎 喇 。
唉 ，呢次 返咗嚟 就 好喇 ，有乜嘢事 ，以後 先至 算係 啦 ，吓 。
宋江 就 問 喇 ：阿爹 ，朱 、雷 兩位 都 頭 有 冇 嚟過 屋企 啊 ？
宋清 就 話 ：我 前 嗰排 聽講 ，佢哋 兩個 都 出咗 差 。
朱仝 啊 派咗 去 東京 ，雷橫 啊 唔知 派咗 去 邊處 喇 。
而家 縣 裏邊 便 ，係 新嚟 兩個 姓 趙 嘅 做咗 都頭 。
宋太公 就 話 ：阿仔 啊 ，你 咁 遠 返嚟 好 辛苦 喇 ，入 房 休息 下 先 啦 。
噉 宋江 返咗嚟 喇 ，全家 都 歡喜 呢啲 不在話下 喇 。
當日 到咗 初更 時分 ，宋家莊 啲 人 都 瞓晒 。
忽然間 聽見 前後門 嘈起 上嚟 ，一睇 ，嘩 ，四周圍 都係 火把 ；
沊沊𡃈 圍住 宋家莊 ，嘻嘻㗾㗾 噉 喺度 嗌 ：唔好 走甩 宋江 啊 ！
宋太公 聽咗 ，哎呀 ，連聲 叫苦 啦 。
宋太公 啊 扚 把 梯 ， 擒 上 牆頭 嚟 睇 下 ， 只見 啲 火把 一林 一林 ， 大概 有百零人 啦 。
當頭 兩個 就係 鄆城 縣 新任 嘅 都頭 ，係 兩 兄弟 嚟 ：一個 就 叫做 趙能 ，一個 叫做 趙得 。
個 趙能 同 趙得 喺 處 大聲 嗌 喇 ：
宋太公 ，你 如果 係 懂事 嘅 ，就 將 個仔 宋江 獻出嚟 ，我哋 就 會 關照 佢 嘅 ；
如果 你 唔 叫 佢 出嚟 見 官 歸案 呀 ，嘿 ，我哋 就 連 你 呢個 老豆 都 捉埋 㗎 。
宋太公 就 話 喇 ：哎呀 ，宋江 幾時 返過嚟 啊 佢 冇 返嚟 噃 。
趙 能 就 話 ： 哈 你 仲詐 諦 係 嘛 ？
有人 喺 村口 見 佢 喺 張 社長 間 酒店 飲完 酒 返嚟 ，有人 跟到嚟 呢處 㗎 喇 ，你 想 賴過去 都 得嘅 ？
宋江 企 喺 梯邊 話 喇 ：
阿爹啊 ，阿爹 ，你 同佢 講 有 咩嘢 用吖 ？
我 出去 見 官 歸案 亦 唔 緊要 嘅 。
縣 裏頭 、 府 裏頭 ， 我 都 有 朋友 ， 況且 已經 大赦 喇 ， 必定 減 罪 嘅 。
𠼮 呢 班 傢伙 冇 用 嘅 ！
姓趙 呢 兩個 嘢 係 個 爛仔 嚟 ，而家 水鬼 升 城王 一下 做咗 個 都頭 ，識 咩 嘢 義理 㗎 ！
佢 又 同 我 冇 乜 交情 嘅 ，盞 講 嘅 啫 。
宋太公 聽咗 就 喊起上嚟 話 ：唉 ，呢趟 係 我 害咗 你 咯仔 。
阿爹 ，你 唔使 煩腦 㗎 ，去咗 吃官司 倒是 係 好彩 啊 ；
你話喇 ，我 第日 流落 喺 江湖 上 ，撞到 一班 殺人放火 嘅 弟兄 ，畀 佢哋 拉埋入 夥 ，噉 嗰陣 點 能夠 見 阿爹 你 面 吖 ？
呢次 就算 充軍 充咗 去 外地 咯 ，亦都 有 個 期限 㗎 嘛 ，噉 日後 返嚟 ，亦都 得以 終身 服侍 阿爹 你 吖 。
哦 ， 噉 既然 你 係 噉 講咯 ， 誒 噉 就 好 啦 ， 我 自然 會同 你 使 錢 㗎 喇 ， 噉 就 買 個 好 地頭 嚟 充軍 係 啦 。
宋江 就 擒 上梯 ，大聲 噉 話 ：你哋 唔好 嘈 喇 。
我 犯 嘅 罪 而家 已經 大赦 實係 唔使 死 嘅 。
請 兩位 都 頭 入嚟 敝莊 ，飲返 幾杯 先 ，聽日 一齊 去 見官 啦 。
趙能 就 話 喇 ：喂 ，你 咪 使 啲 咩 嘢 詭計 氹 我哋 入嚟 喎 ！
我 點 會 連累 父親 同 弟兄 呢 ？
你哋 即管 請 入嚟 啦 。
宋江 就 落咗 梯 ，開咗 莊門 ，請 兩個 都頭 入嚟 大廳 坐落 ，漏夜 劏 雞 劏 鵝 ，擺 酒 款待 。
嗰 百幾 個 兵卒 呢 ，亦都 畀 酒菜 招呼 佢哋 ，仲 送 咗 啲 錢 畀 佢哋 添 。
又 攞 咗 二十兩 花銀 ， 送 畀 兩位 都頭 做好 看錢 。
嘿嘿 ，好看錢 ，好看即係好睇啊 。
有錢 到手 個 面口 就 好睇 咯 ，嘿嘿 笑口 噬噬 噉 喇 ；
冇錢 就 惡睇喇 ，瞪眉突目啊 。
所以 呢啲 錢 就 叫做 好看 錢 。
當晚 ，兩位 都 頭 喺 宋江 間 莊 處 過夜 。
第朝早 五更 起身 ，就 帶咗 宋江 返去 縣 喇 ，個 知 縣 時 文彬 就 升堂 辦公 。
見都頭趙能 、趙得 就 押解 宋江 嚟到 歸案 ，大為 歡喜 啦 ，就 責令 宋江 招供 。
當時 宋江 就 寫咗 一張 口供 ，佢 噉 寫嘅 ：
不合於 前年 秋間 ，典贍 到 閻婆 惜 為 妾 ，為因 不良 ，一時 恃酒 爭論 鬥毆 ，致 被 誤殺 身死 ，一向 避罪 在逃 。
今 蒙 緝捕到 官 ，取勘 前情 ，所供 甘服 罪 無詞 。
知縣 睇完 ，就 叫人 將佢 收監 。
啲 人 聽講 話 捉到 宋江 啊 ，就 冇 邊個 話 唔 愛惜 佢 嘅 ，都 為 佢 去 搵 知縣 講情 ，就 講咗 好多 宋江 平日 嘅 好處 。
知縣 佢 自己 嘅 心 呢 亦 都有 八成 想開脫 佢 嘅 ，所以 即時 就 同意咗 佢 嘅 口供 ，就 免 佢 擔枷 ，就 唔使 戴 手銬 ，只係 隨便 噉 韞 喺 監 嚟 啫 。
宋太公 梗係 走嚟 用 錢 啊 買通 晒 上上下下 定 啦 。
噉嗰陣時呢 ，閻婆 就 已經 死咗 成 半年 長 喇 ，冇 咗 苦主 啦 ；
嗰個 張三 呢 ，見 個 姘頭 亦 都 已經 死咗 喇 ，亦 無謂 做 冤家 喇 ，所以 就 冇 咩 嘢 啰嗦 。
噉啊 縣 裏頭 呢 就 立咗 個案 ，等到 六十 日期限 滿咗 ，就 將 宋江 解送 去 濟州府 聽候 判決 。
本州 嘅 府尹 睇咗 案情 ，就 根據 大赦 嘅 規定 啊 ，減咗 佢 罪 ，只係 判 宋江 打 二十 棍 ，刺配 江州 牢城 。
噉 本州 嘅 官吏 呢 ，亦 有 唔少 人 識得 宋江 嘅 ，更兼 佢 又 使咗 錢 㗎 啦 嘛 ；
話 就 話 打 廿棍 啫 ， 又 冇 苦主 喺 度 睺 實 ， 噉 大家 關照 下 就 係 㗎 喇 ， 所以 打得 好 輕 。
打完 ，當堂 戴咗 行枷 ，簽署咗 一封 公文 ，派 兩個 押解 差人 啦 無非 係 張 千 、李 萬 啦 ，就 押 宋江 起程 喇 。
噉呢 兩個 差人 就 領咗 公文 ，押住 宋江 嚟到 州衙門 前 便 。
宋太公 同 宋清 呢 ，已經 喺 嗰度 等候 住 㗎 喇 ，擺 定 酒 嚟 款待 兩個 差人 ，又 送 咗 啲 錢 畀 佢哋 。
宋太公 攞 啲 衣服 ，畀 宋江 換咗 ，打好 包袱 ，着返 對 麻鞋 。
宋太公 就 嗌 咗 宋江行 埋一便 叮囑 佢 話 ：
我誒知道 江州 係 個 好 地頭 ，魚米之鄉 ，特登 使 錢 買返嚟 ，將 你 充軍 充去 嗰處 嘅 。
你啊 寬心 等待 啦吓 ，我啊 會 叫 四郎 嚟 探望 你 ，有 便人 去 開 ，我 就 會 帶 啲 使用 畀 你 㗎喇 。
你而家 去 江州 啊 ，正正 係 由 梁山泊 經過 嘅 ，如果 佢哋 落山 嚟 要 劫 你 去 入夥 ，千祈 唔好 聽 佢哋 話 啊 ，噉 就 畀 人 鬧 做 不忠不孝 㗎 喇 。
呢一件呀 ，你 要 記實 喺 個 心 嚟至得 ，啊 。
阿仔啊 ，你 一路 ，慢慢行啦 ，吓 ，天可憐 ，早日 返嚟 ，我哋 父子 團圓 ，兄弟 完聚 啊仔 。
宋江 流住 眼淚 就 拜別咗 父親 ，宋清 就 送 佢 一 站 路 。
臨別嘅時候 ，宋江 就 囑咐 細佬 話 喇 ：我 呢次 去 你哋 唔使 憂心 嘅 。
父親 年紀 咁 老 咯 ，我 係 因為 畀 官司 纏住 要 背井離鄉 。
你 係 一定要 喺 屋企 侍奉 阿爹 ，千祈 唔好 為咗 我 嚟 江州 啊 ，掉開咗 父親 ，冇人 照顧 就 唔好 喇 。
我 喺 江湖 上 咁多 朋友 ，見到 邊個 都 會 嚟 幫助 我 嘅 ，日常 嘅 使用 我 自己 有 辦法 㗎 喇 。
唉 ，個 天 如果 可憐 ，我 總 有 一 日 會 返嚟 嘅 。
宋清流 住 眼淚 拜別 咗 阿哥 ，就 返去 屋企 侍奉 父親 宋太公 。
呢啲 不在 話下 。
而家 只係 講 宋江 同 兩個 差人 啊 ，就 起程 上路 。
嗰 個 張 千 、 李萬 啊 已經 得 咗 宋江 嘅 錢 ， 又 見 佢 係 個 好漢 ， 所以 一路 呢 對 宋江 服侍 得 非常 之好 。
三個人 行咗 一日 ，夜晚 黑 ，就 搵 間 客店 過夜 ，食飯 嘅 時候 ，宋江 就 買 啲 酒肉 請 兩個 差人 。
宋江 就 對 佢哋 兩個 話 ：我 老實 同 你哋 講 啦 ，我哋 而家 去 江州 正正 由 梁山泊 經過 。
山寨 上面 有 幾位 好漢 係 識得 我 ， 我 怕 佢 落山 嚟 搶 我 ， 噉 就 嚇驚 你 哋 。
要噉至得 ，我 同 你哋 兩個 聽朝 早啲 起身 ，行 啲 小路 過去 ，就 寧可 行 多 幾里 路 好過 喇 。
嗰 兩個 差人 就 話 啦 ：咦 ，押司 啊 ，你 唔 講 我哋 點 知道 啊 ？
係咯係咯 ，我哋 混 小路 過去 啦 ，噉 就 唔會 撞 啱 佢哋 喇 。
當晚 就 商量 定 。
第二 朝早 五更 起身 ，食咗 飯 就 起行 。
兩個 差人 同埋 宋江 離開咗 客店 ，一味 由 小路 行 。
約莫 行咗 三十里 路 ，只見 前面 山坡 背後 轉出 一班 人 嚟 。
宋江 一 睇 ，嘿呀 ，叫苦喇 。
原來 嚟嘅 唔係 邊個 ，為首 嘅 好漢 ，係 赤髮鬼 劉唐 。
佢 帶住 三五十 人 ，就 想 嚟 殺 嗰 兩個 差人 咯 喎 。
呢個 張 千 、李 萬 就 嚇到 縮埋 一嚿 跪 喺 地下 嚟 。
宋江 就 話喇 ：兄弟 ，你 要 殺 邊個 ？
劉唐 就 話 喇 ：阿哥 ，唔 殺咗 呢 兩個 衰公 仲 等 乜嘢 啊 ？
噉就唔使整污糟你嘅手喇 ，嚟 ，攞把刀嚟畀我 ，等我殺啦 。
嗰 兩個 差人 聽咗 哈哈 死咯 ，呢趟 實死 無疑 咯 。
劉唐 將 把 刀 遞 畀 宋江 。
宋江 接過 刀 嚟 就 問 劉唐 話 ：你 殺 呢個 差人 係 咩嘢 意思 呢 ？
劉唐話 ：奉咗 山上 大哥 將令 ，特登 使人 探聽到 阿哥 你 吃 官司 ，要 充軍 去 江州 ；
就 怕 喺 路上 錯過 咗 ， 所以 叫 大小 頭領 ， 分別 去 所有 嘅 路口 等候 ， 接到 阿哥 咯 ， 就 請 你 上山 。
噉 你 話 喇 ，呢 兩個 差人 唔 殺咗 佢 仲 有 乜 用 吖 ？
你哋 噉樣 做 ，唔係 你哋 兄弟們 抬舉 我 宋江 ，反而 係 要 陷 我 於 不忠不孝 之地 啊 。
如果 你哋 係 噉樣 嚟 要脅 我 ，即係 要攞 宋江 條命 啫 ，我 不如 死咗 好過 咯 。
宋江 講完 ，將 把 刀 向住 喉嚨 想 割落去 自刎 。
嘿 ， 慌到 劉唐 一下 摱 住 佢 隻 手 話 ： 哎 阿哥 阿哥 阿哥 ， 哎 ， 唔 好 唔 好 唔 好 ， 哎 ， 有事 慢慢 商量 。
一手 就 搶返 把 刀 。
宋江話 ：你哋 各位 兄弟 如果 可憐 宋江 嘅 ，就 畀 我 去 江州 牢城 ，等到 期限 滿咗 返嚟 ，到時 再 同 你哋 相會 。
阿哥 你 呢句 說話 小弟 唔 敢 作主 。
軍師 吳學究 同 花知寨 喺 前面 大路 等住 迎接 阿哥 嘅 。
等 小弟 叫 個 嘍啰 去 請 佢哋 嚟 商量 下 啦 。
我 都係 呢句 說話 嘅 啫 ，由 你哋 點 商量 都 好啦 。
小嘍啰 去咗 冇幾耐 ，只見 吳用 、花榮 騎住 馬 在 前 ，後面 幾十個 騎兵 跟住 就 飛跑 嚟到 面前 。
落咗 馬 見過 禮 之後 花榮 就 話 喇 ：咦 ？點解 唔同 兄長 開咗 個 枷 啊 ？
宋江 就 話 喇 ： 賢弟 ， 咩 嘢 說話 啊 ！
呢啲 係 國家 法度 ，點 敢 擅自 逳動 呢 ？
吳學究 就 笑住 話 喇 ：我 知道 兄長 嘅 意思 喇 。
呢個 容易 ，總之 我哋 唔 留 兄長 喺 山寨 就係 喇 。
晁頭領 好耐 都 冇 同 仁兄 相會 喇 ，今次 正係 要 同 兄長 講返 幾句 心腹 嘅 說話 ，就 請 兄長 到 山寨 聚會 一陣 咁 耐 ，然後 送 你 起程 。
宋江 聽咗 就 話 ：就係 得 先生 你 知道 我 嘅 意思 。
宋江 扶 返 起 兩個 差人 話 ：你哋 兩個 放心 吓 ，寧可 我 死 ，都 唔 能夠 害 你哋 嘅 。
嗰 兩個 差人 都 話 ：誒 全靠 押司 救命 啊 ，全靠 押司 救命 啊 。
吳用 帶住 一行人 離開咗 大路 ，嚟到 蘆葦 岸邊 ，已經 有 船 喺 嗰處 等住 㗎喇 。
當時 ，坐船 過咗 對岸 ，又 用 頂山轎 抬 宋江 上山 ，一直 去到 斷金亭 落轎 休息 。
又叫啲小嘍啰 ，四周圍 去 請 眾位 頭領 返嚟 聚會 ，然後 ，迎接 宋江 上山 ，嚟到 聚義廳 相見 。
晁蓋話 ：自從 仁兄 喺 鄆城 救咗 我哋 嘅 性命 ，兄弟們 嚟到 呢處 ，冇 一日 話 唔 想念 仁兄 嘅 大恩 。
前嗰排 ，又 多得 你 引薦 諸位 豪傑 上山 ，光輝 草寨 ，真係 唔知 點 報答 仁兄 你好喇 。
宋江 就 回答 話 喇 ： 自從 同 兄長 分別 之後 ， 殺死 咗 個 淫婦 ， 逃跑 出 嚟 喺 江湖 上 流落 咗 年 半 。
本來 好想 上山 探望 下 兄長 嘅 ，好 偶然 就 喺 一間 酒店 ，遇見到 石勇 ，佢 帶 一封 家信 嚟 畀 我 ，話 家父 過咗 身 喇 噉 。
點知 係 我 家父 怕 我 跟埋 各位 好漢 ，去咗 入夥 ，因此 詐 假意 寫 封 噉 嘅 信 嚟 嗌 我 返 屋企 。
呢次 雖然 係 明吃官司 ，只係 多得 上上下下啲人 嘅 關照 ，未曾 受到 咩嘢 重傷 。
而家 充軍 去 江州 亦 係 好 地方 嚟 。
先頭 兄長 叫 我 嚟 ，不敢 不到 ，而家 已經 見過 面 喇 。
我啊 期限 相逼 ，唔敢 停留 太耐 ，而家 要 告辭 。
晁蓋話 ：乜 真係 咁快 要走 啊 ，請 坐下 添啦 。
兩個 喺 中間 坐落 ，宋江 就 叫 嗰 兩個 差人 ，就 喺 交椅 後 便 坐 ，寸步不離 。
晁蓋 叫 所有 個 頭領 都 嚟 拜見 過 宋江 ，分開 兩 行 坐落 ，小 頭目 就 過嚟 斟酒 。
首先 係 晁蓋 敬酒 ，跟住 係 軍師 吳學究 、公孫勝 ，然後 一個個 輪 就 輪到 白勝 為止 ，就 輪流 敬酒 。
酒 過 數 巡 ，宋江 就 起身 話 ：好多謝 弟兄們 相愛 之 情 啊 。
宋江 係 個 有罪 嘅 犯人 ，唔敢 停留 太 耐 ，要 告辭 喇 。
晁蓋 就 話 ：唉 仁兄 真係 咁 唔賞面 。
嗱 ，既然 仁兄 話 唔好 殺 呢 兩個 差人 ，噉 可以 畀 多啲 金銀 過 佢哋 ，打發 佢哋 返 去 。
就 話 係 我 梁山泊 搶 咗 兄長 嚟 嘅 ， 噉 佢 哋 就 冇 事 啦 ， 官府 亦 唔 會 將 佢 哋 嚟 治罪 㗎 喇 。
宋江話 ：兄長 唔好 提 呢件事 喇 。
噉樣 做 唔係 抬舉 宋江 ，明明 係 害咗 我 啊 。
我 屋企 上 有 老父 在堂 ，宋江 未曾 孝敬過 一日 ，我 點 敢 違背 佢 嘅 教訓 ，連累埋 佢 呢 ？
前嗰排 ，一時興起 ，同 各位 想 嚟 投奔 呢處 。
咁好彩 ，個天 叫 石勇 喺 酒店 遇到 小弟 ，叫 我 返 屋企 。
家父 同 我 講過 ，情願 叫 小弟 明 吃 官司 ，快啲 判咗 充軍 出嚟 。
臨行嘅時候 ，又千叮萬囑啊 ，叫我唔好為咗快樂 ，害咗屋企 ，唔好連累到 父親 倉皇驚恐 。
家父 明明白白 教訓咗 小弟 ，如果 小弟 唔聽話 ，就係 上逆天理 ，下違父教 ，做咗 不忠不孝之人 ，喺 世上 雖 生 何益 ？
兄長 ，如果 唔肯 放 小弟 落山 ，就 請 各位 殺咗 我 啦 。
宋江 講完 ，淚 如 雨 下 ，拜到 喺 地下 嚟 。
