秦明 同 黃信 正 話 商量 緊 ，要 去 投奔 清風山 入夥 。
忽然間 ，聽見 報告 話 有 兩路 兵馬 殺緊嚟 。
佢哋 兩個 喇喇聲 出去 寨門 外 便 睇下 ，只見 兩路 嚟 嘅 兵馬 啱啱 嚟到 喇 。
原來 一路 係 宋江 、花榮 ，另外 一路 呢 係 燕順 、王矮虎 ，都 各自 帶住 一百五 啊 幾 人 。
黃信 即刻 叫 啲 寨兵 ，放 落 條 吊橋 ，大開 寨門 迎接 兩路 人馬 ，進入 清風鎮 嘞 。
一入到鎮唧 ，宋江 就 發佈 命令 ：
唔准 傷害 一個 百姓 ；
唔准 傷害 一個 寨兵 ；
又 命令 啊 要 先 打入 去 南寨 ，將 劉高 一家 老小 冚𠾴 唥 殺 清光 。
王矮虎 啊 走去 搶咗 劉高 個 老婆 先 嘞 。
小嘍啰 呢 ，將 劉高 屋企 應有 嘅 家私 財物 、金銀珠寶 ，裝晒 上車 。
所有嘅 馬匹 牛羊 ，全部 拉走 。
花榮 就 返返 屋企 ， 將 自己 嘅 財物 等等 啊 ， 裝 咗 上車 ， 接 走 自己 嘅 妻子 、 兒女 同 阿妹 。
收拾好之後嘞 ，各位 好漢 就 帶領 一行人馬 離開咗 清風鎮 ，返去 山寨 。
上到山 ，鄭天壽 就 出嚟 迎接 大家 ，嚟到 聚義廳 裏頭 相會 。
黃信 同 各位 好漢 見過 禮 ，就坐 喺 花榮 嘅 右手便 。
宋江 呢 ，就 叫 將花榮 嘅 家屬 啊 ，安頓 好住 嘅 地方 ；
又 將 劉高 嘅 財物 ，分嚟 賞畀 啲 小嘍啰 。
王矮虎 啊 搶咗 嗰個 女人 呢 ，一早 就 愛 嚟 收 喺 自己 間 房 裏頭 。
燕順 就 問 喇 ：劉高 個 老婆 而家 喺 邊處 嚟 啊 ？
王矮虎 就 話 ：誒 呢次 要 畀 小弟 做 個 壓寨夫人 嘞 啩 ？
燕順 話 ： 畀 就 可以 畀 過你 ； 你 嗌 佢 出 嚟 ， 我 有 句 說話 同 佢 講 。
宋江 亦 話 ：係咯係咯 ，我 都 要 問 下 佢 。
王矮虎 就 嗌 佢 出嚟 大廳 啦 ，嗰個 女人 呀 喊 到 噦噦聲 喺度 求饒 。
宋江 就 喝 佢 話 喇 ：
你呢個潑婦吖 ，我 念 你 係 個 朝廷 命官 嘅 夫人 ，好意 救 你 落山 ，你 點解 恩將仇報 ？
吓 ，今日 捉到 你 返嚟 ，仲有 乜 說話 講 ？
燕順 跳起身 就 話 喇 ：呢啲 噉嘅 淫婦 ，問 咁多 做乜嘢 吖 ！
一掹出把腰刀 ，一刀就將佢斬為兩段 。
王矮虎 見 殺死 咗 呢個 女人 ，發起 火 喇 ，搶過 一把 朴刀 ，就 要 同 燕順 搏過 噃 。
宋江 佢 哋 即刻 起身 嚟 勸住 ， 宋江 就 話 喇 ： 燕順 殺 咗 呢 個 女人 係 啱 㗎 。
兄弟啊 ，你 睇下 ，我噉樣 一力 救咗 佢 落山 ，等 佢 夫妻 團圓 相聚 ，佢 竟然 都 反面 叫 佢 丈夫 嚟 害 我 嘅 。
賢弟 ，你 留佢 喺 身邊 呀 ，以後 都係 有損 無益 㗎 。
好啦好啦 ，我 日後 另外 同 你 娶 一個 好嘅 ，包賢弟 你 滿意 就係 喇 。
燕順亦話 ：
我 亦 係 噉樣 諗 ，唔 殺佢 呀 要 佢 嚟 有 乜 用 吖 ，以後 梗 畀 佢 害死 㗎 。
王矮虎 畀 大家 勸住 ，就 默默無言 嘞 。
燕順 叫 啲 小嘍啰 拉開 個 屍首 ，抹 乾淨 啲 血跡 ，大排筵席 嚟 慶賀 啊 。
第二日 ，宋江 同 黃信 主婚 ，燕順 、王矮虎 、鄭天壽 做 媒人 ，要 花榮 將 個 妹 嚟 嫁 畀 秦明 ，噉 一切 嘅 禮物 呢 ，都 係 宋江 同 燕順 準備 嘅 。
一連 飲咗 幾日 喜酒 。
噉啊 秦明 結婚 之後 呢 ，又 過咗 六七日 ，出去 偵察 嘅 小嘍啰 啊 ，就 探聽到 啲 消息 返嚟 報告 話 ：
青州 慕容 知府 寫咗 報告 ，去 中書省 稟奏 話 ：花榮 、秦明 、黃信 作 反 ，要 起 大軍 嚟 征剿 掃蕩 清風山 啊噉 。
各位 好漢 聽咗 就 商量喇 ：
呢處 一個 小小嘅 山寨 ，唔踎得 幾耐 㗎 。
如果 大軍 一嚟 四面 圍住 點樣 迎敵 啊 ？
宋江 就 話 喇 ：我 有 一條 計 ，唔知 合 唔合 各位 心水 啫 ？
誒 ，願聞 良策 ，請講 ，請講 ！
嗱 ，呢處 南便 有 個 地方 ，叫做 梁山泊 ，方圓 八百 幾里 ，中間 係 宛子城 、蓼兒窪 ；
晁天王 聚集 住 幾千 人馬 ，佔據 住 水泊 ，啲 官兵 啊 唔 敢 正眼 睇 佢哋 。
我哋 不如 帶齊 人馬 去 嗰處 入夥 呢 。
秦明 就 話 喇 ：既然 有 呢個 地方 ，十分 好 啊 ！
不過 冇人 引進 ，唔知 佢哋 肯唔肯 接納 我哋 呢 ？
宋江 哈哈大笑 ，就 將 佢 同 晁蓋 呢 一班 人 嘅 關係 講 畀 大家 聽 。
秦明 聽咗 非常之 歡喜 ，佢 話 ：哦 ，乜 原來 係 噉㗎 ？兄長 你 係 佢 嗰處 大恩人 啊 。
事不宜遲 ，執拾 好咯 快啲 去啦 。
當日 商量 定 咗 ， 即刻 就 準備 咗 十幾架 車 ， 將 啲 家眷 同埋 啲 金銀 財物 、 衣服 、 行李 等等 ， 都 裝晒 上車 ；
仲有 三兩百 匹 好 馬 ，全部 帶走 。
小嘍啰 呢 ，有 唔願意 去 嘅 ，就 畀 啲 銀 過 佢哋 ，任由 佢哋 落山 去 投奔 第二個 主人 ；
願意 去 嘅 呢 ，就 編入 隊伍 ，同埋 秦明 帶嚟 嘅 兵士 ，夾埋 有 三五百 人 。
宋江 就 叫 大家 分成 三隊 落山 ，打扮成 去 捉拿 梁山泊 草寇 嘅 官軍 噉樣 。
收拾好喇 ，裝好車 ，放起火 ，將成個山寨就燒為平地 ，分為三隊 落山 。
宋江 同 花榮 就 帶住 四五十 人 ，三 五十 個 騎兵 ，簇擁住 六七 架 車 同埋 家眷 隊 就 行 先 ；
秦明 、黃信 呢 ，就 帶領 八九十 匹 馬 ，同埋 嗰啲 裝住 財物 嘅 車 啊 ，作為 第二 隊 ；
後便呢 ，就係 燕順 、王矮虎 、鄭天壽 三個 ，帶住 四五十匹馬 ，一二百人 就 離開咗 清風山 ，投奔 梁山泊 。
喺 一路上 ，嗰啲 人 見咗 咁 多人馬 ，旗號 上 便 呢 又 清清楚楚 伶伶俐俐 啊 寫住 捉拿 草蔻 嘅 官軍 ，所以 就 冇人 敢 嚟 攔阻 亦 冇 人 敢 嚟 問噃 。
喺 路上 行咗 六七日 ，離開 青州 就 越嚟就越 遠 喇 。
而家 講下 宋江 、花榮 佢 兩個 ，騎馬 行 喺 前便 ，後便 呢啲 車 ，就 裝住 家眷 。
佢哋 同 後便 嘅 人馬 相隔 大概 二十 零 里 啦 。
行行下 ，前面 嚟到 一笪 地方 ，地名 叫做 對影山 。
兩邊 兩座 高山 ，一樣 噉樣 ，一樣 噉形勢 嘅 ，中間 呢 係 一條 好闊 嘅 大路 。
佢哋 兩個 騎住 馬 行行下 ，忽然間 聽見 前頭 山 裏 便 敲鑼打鼓 。
花榮 就 話 喇 ：哼 ，前便 必定 有 強盜 。
佢 將 支槍 放好 ，攞 弓箭 出嚟 準備 妥當 ，再 插返 落去 飛魚袋 裏 便 。
一面 叫 個 騎馬 嘅 兵士 ，去 催促 後便 嗰 兩隊 人馬 就 快啲 上嚟 。
同時 呢 ，又 叫 啲 車輛 人馬 閘住 。
宋江 同 花榮 兩個 帶住 二十幾個 騎兵 ，去 前 便 探路 嘞 。
行上前面 大概 半里幾路 ，就見到 有 一隊 人馬 ，大概 百零人 啦 ，擁住 一個 少年 壯士 出嚟 。
呢個 少年壯士 ，着住 紅袍金甲 ，騎 一匹 胭脂馬 ，使 一支 朱紅 畫桿 方天戟 。
呢個 壯士 呀 ，橫戟 立馬 ，喺 山坡 前面 大聲 噉 嗌話 ：
我 今日 同 你 比武 ， 分個 勝敗 見個 輸贏 啊 ！
只見 對面 山岡 背後 呢 ，又 湧出 一隊 人馬 嚟 ，亦係 有 百零 人 嘅 ，前便 呢 ，亦都 擁住 一個 年少 嘅 壯士 噃 。
呢個 壯士 ，着住 白袍 銀甲 ，騎 一匹 雪花馬 ，使 一支 銀白 畫桿 方天戟 。
呢便係 素白旗號 ，嗰便 呢 係 絳紅旗號 。
只見 兩便 紅旗 白旗 喺度 揮舞 ，啲 戰鼓 擂 到 驚天動地 。
呢 兩個 壯士 都 唔 講 說話 喇 ，各人 挺起 方天畫戟 ，策馬 上前 。
兩個 就 喺 大路 中間 交鋒 ，分 個 勝敗 。
花榮 同 宋江 見咗 ，勒住 馬 喺度 睇咯 喎 。
只見 兩個 壯士 呀 ，鬥 到 三十幾個 回合 仲 係 不分 勝敗 。
花榮 同 宋江 兩個 就 睇到 喝彩 。
花榮 一步步 騎住 馬 向前 睇 ，只見 嗰 兩個 壯士 呀 鬥 到 㷫晒 。
嗰 兩 支 戟 上面 ，有 一 支 呢 係 金錢 豹子 尾 ，另外 一 支 係 金錢 五色 幡 ，都 墊埋 一嚿 ，上面 嗰啲 絨帶 就 繑 到 實實 ，冇 辦法 分得開 。
花榮 騎 喺 馬 上面 睇見 咗 ，勒定 馬 ，左手 喺 飛魚袋 裏 便 攞 弓 ，右手 喺 走獸壺 裏 便 拔 箭 ；
搭上 箭 ，拉滿 弓 ，瞄準住 豹尾 絨帶 啊 ，瀡噉 一箭 ，正正 將 絨帶 射 斷咗 。
當堂 只見 兩支 畫戟 即刻 分開 ，嗰 兩百 幾 人 呀 一齊 喝 大 彩 。
嗰 兩個 壯士 唔 打 喇 ，都 縱馬 跑過嚟 一直 跑到 宋江 、花榮 嘅 前 便 ，就 喺 馬 上面 行 個 禮 ，佢哋 話 ：請問 神箭 將軍 大名 啊 ？
花榮 就 回答 佢 話 ： 我 呢 個 義兄 ， 乃 係 鄆城縣 押司 ， 山東 及時雨 宋公明 。
我係 清風鎮 知寨 ，小李 廣花榮 。
嗰 兩個 壯士 聽 咗 ， 插住 支戟 ， 即刻 落馬 ， 跪 喺 處 行禮 話 ： 聞名 好耐咯 ， 聞名 好 耐 喇 ！
宋江 、花榮 亦都 慌忙 下馬 ，扶起 嗰 兩位 壯士 話 ：請問 兩位 壯士 高姓 大名 ？
嗰個 着 紅袍 嘅 就 話 喇 ：小人 姓 呂 名 方 ，係 潭州 人士 ；
平時 好鍾意 學 呂布 個 為人 ，因此 就 學習 呢一 支 方天畫戟 ，個個 都 叫 小人 做 小溫侯 呂方 。
因為 嚟到 山東 賣 藥材 蝕咗 本 ，唔能夠 還鄉 ，暫時 佔住 呢個 對影 山 嚟 打家劫舍 。
近日嚟咗呢個壯士 ，要搶我呂方嘅山寨喎 ，我話同佢各分一山啦 ，佢又唔肯 ，因此呢每日都嚟山下打過 。
估唔到 今日 ，能夠 遇見 兩位 真係 緣分 注定 喇 ！
宋江 又 問 呢個 着 白袍 嘅 壯士 高 姓 大名 。
嗰個人 就 回答 話 ：小人 姓 郭 名 盛 ，係 西川 嘉陵 人氏 。
因為 販運 水銀 ，過 黃河 嘅 時候 畀 風 打沉 咗 隻 船 ，唔能夠 回鄉 ，留落 喺 江湖 之上 。
小人 喺 嘉陵 嘅 時候 ，跟 當地 嘅 兵馬 張 提轄 學過 方天戟 ，以後 使得 好 熟練 ，大家 都 叫 小人 做 賽仁貴 郭盛 。
小人 喺 江湖 上 ，聽見 話 對影山 有 個 使戟 嘅 人 ，佔住 咗 山頭 ，打家劫舍 ，所以 就 走嚟 同 佢 比賽 下 戟法 。
連氣 打咗 十幾日 都 不分 勝敗 。
估唔到 今日 能夠 遇見 兩位 ，真係 天賜之幸 啊 ！
宋江 聽咗 就 話 喇 ：
今日 既然 有幸 相遇 ，就 同 兩位 講和 呢 好唔好 啊 ？
兩個 壯士 聽咗 都 好 歡喜 ，都 應承 喇 ，嘿 ，有 詩 為 證 啊 ：
銅鏈勸刀猶易事 ，箭鋒勸戟更希奇 。須知 豪傑 同心處 ，利斷 堅金 不用疑 。
呢個 時候 ，後隊 人馬 已經 到 喇 ，一個個 都 介紹 認識 啦 。
呂方啊 請 大家 上山 先 ，殺牛 劏馬 舉行 宴會 。
第日 ，就 輪到 郭盛 擺酒 請 飲 咯噃 。
宋江 就 說 佢哋 兩個 入夥 ，跟埋 大隊 去 梁山泊 ，投奔 晁蓋 聚義 。
嗰 兩個 歡天喜地 一口 應承 。
就 將 兩山 嘅 人馬 點 齊 ，執拾 好 財物 ，準備 起程 。
宋江 就 話 喇 ：誒咪 住 ，噉樣 去 唔得 。
如果 我哋 呢處 有 三五百人 ，投奔 梁山泊 ，噉 佢 嗰處 亦 有人 出嚟 偵探 㗎 嘛 。
如果 真係 以為 我哋 係 去 捉拿 佢哋 嘅 ，噉 就 唔係 講 玩笑 個 咯 。
噉啦 ，等 我 同 燕順 兩個 行 先 一步 ，去 通知 佢哋 ，你哋 隨後 嚟 ，仲係 分 三 隊 嚟 啦 。
花榮 、秦明 就 話 喇 ：兄長 高見 ，係 要 噉 至 得 嘅 。
兄長 噉 你 先行 半日 ，我哋 帶領 人馬 ，隨後 就 嚟喇 。
而家 講下 宋江 同 燕順 啊 騎住 馬 ，帶領住 十幾個 人 行 先 一步 去 梁山泊 打 前 站 。
喺 路上 行咗 兩 日 ，當日 行到 晏晝 個 時候 呢 ，只見 大路 旁邊 有 一 間 酒店 。
宋江 就 話 喇 ：大家 行得 咁 攰 喇 ，不如 買 幾 碗 酒 飲咗 先 行 啦 。
宋江 同 燕順 落咗 馬 ，入到 酒店 裏 便 ，叫 隨從 嗰啲 小嘍囉 就 鬆 咗 馬肚帶 ，都 入 酒店 裏 便 坐 。
宋江 同 燕順 行到 入 去 店裏 便 一 睇 ， 只見 有 三 張大 枱， 另外 有 幾張 枱 仔添 。
其中 有 一張 大 枱 呢 ，已經 畀 一個 人 喺度 佔住 喇 。
宋江 睇下 嗰個人 ，見 佢 戴住 一頂 豬嘴 頭巾 ，後枕 就 髧住 兩個 紐絲 銅鐶 。
着 一件 黑袖衫 ，攬 一條 白腰帶 。
打住腳繃護膝 ，着 一對 八搭 麻鞋 。
枱 旁邊 就 憑住 一條 短棍 ，打橫頭 放住 個 包袱 。
呢個人 ，生得 八尺幾高 ，面色 淡黃 ，骨多肉少 ，冇 留到 鬍鬚 。
宋江 就 叫 個 酒保 過嚟 話 ：
我嘅夥記 好多人 ，我哋 兩個 入去 你裏 便 坐 ，唔該 你 叫 嗰個 客人 換 張 大枱 畀 我啲 夥記 坐 呢 。
誒得得得得 ，小人 去 同 佢 講 啦 。
宋江 同 燕順 就 行 入 裏 便 坐 ，就 叫 個 酒保 嚟 話 喇 ：
你 打酒嚟 ，去 招呼 我 嗰啲 夥記 先 ，吓 ，每人 三大碗 ，有肉 就 買啲 畀佢哋 食 啦 ，然後 就 嚟 我 呢處 斟酒 。
個酒保 見到 宋江 帶嚟 嗰啲 夥記 企 滿晒 喺 處 ，就 行埋去 同 嗰個 好似 差人 噉 樣 嘅 人 話 喇 ：
誒 唔 該 你 啊 差官 ， 將呢 張大 枱 讓 畀 裏 便 嗰 兩位 官人 嘅 夥 記 坐 一 坐 呢 ？
嗰個 大漢 就 嬲 酒保 嗌 佢 做 差官 ，就 發火 喇 ：
咩話 ？有個 先嚟後到 㗎嘛 ，咩嘢 官人 嘅 夥記 要 換 枱 啊 ，老爺 唔 換 ！
燕順 聽咗 就 同 宋江 話 喇 ：你 睇 佢 真係 惡死 。
宋江話 ：由得佢啦 由得佢啦 ，你唔好學佢噉 。就撳住 燕順 。
哈 ，點知 嗰個 大漢 ，擰轉頭 睇下 宋江 同 燕順 喺度 冷笑 喎 。
個酒保 又 嚟 𠼮佢 喇 ：
差官呀 ，你 照顧 下 小人 嘅 生意 ，換 一 換 又 何妨 呢 ？
個大漢 發起 惡喇 ，佢 拍住 張 枱 話 ：
你呢個死嘢 ，都唔帶眼識人 ，欺負 老爺 一個人 ，要 我 換 枱 係嘛 ？
就算係趙官家嚟 ，老爺 都唔換畀佢啊 。
你 仲 嘈 呀 老爺 拳頭 唔 認得 你 ！
酒保 就 話 啦 ：唉 小人 又 冇 講過 咩嘢 噃 。
睇 你 呢傢伙 亦唔 敢 講 乜嘢 ！
燕順 聽咗 就 忍唔住 喇 ：
喂 ，你 呢個 傢伙 ，你咪 懶叻 噃 ，你 唔 換 就 算 喇 ，你 點解 要 嚇 佢 啊 ？
個大漢 跳起身 ，揦住 條短棍 喺 手 。
我 有 我鬧佢 ，使乜 你 管 咁多事 啊 ？
天下 間 老爺 只 讓 得 兩個 人 ， 其他 㗎 ， 哼 ！ 我 當 佢 係 腳底 泥 啊 。
燕順 發火 咯 ，扚起 條 板凳 想 打過去 咯 喎 。
宋江 見到 嗰個人 講 嘅 說話 不俗 吖 ，就 插 喺 兩個人 中間 勸解 話 ：
唔好嘈喇 ，唔好嘈喇 。
係咯 ，哦 請問 ，你 先頭 話 天下間 只係 讓 兩個 人 ，係 讓 邊 兩個 人 呢 ？
我 講出嚟 呀 ，嚇親 你 啊 。
宋江 就 話 ：我 好想知道 嗰 兩位 好漢 嘅 大名 。
我 講 你 聽 啦 ，一個 係 滄州 橫海郡 柴世宗 嘅 孫 ，叫做 小旋風 柴進 ，柴 大官人 。
哦 ，噉 仲有 嗰 一個 呢 ？
呢一個呀嘿威喇 ，係 鄆城縣 押司 ，山東 及時雨 呼保義 宋公明 。
宋江 睇 一 睇 燕順 個心 好笑 ， 燕順 聽 咗 ， 哈 即刻 放低 板凳 。
個大漢 又 話喇 ：除咗 呢 兩個 人 之外 ，就算 係 大宋 皇帝 ，老爺 都 唔怕 佢 。
宋江 話 喇 ： 你 咪 住 ， 我 問一問 你 ， 你 講起 呢 兩個 人 ， 我 都 識得 嘅 。
你 喺 邊處 同 佢哋 兩個 見過 面 啊 ？
哦 ，你既然識得 ，噉 我就唔講大話喇 ，三年前 ，我 喺 柴大官人 屋企 住過 四個月 有多 ，就係 未曾 見過 宋公明 啫 。
你 係咪 想見 黑三郎 呢 ？
係呀 ，我 而家 正 係 想 去 搵 佢 。
邊個 叫 你 搵 佢 㗎 ？
佢 個 親 細 佬 鐵 扇子 宋清 ， 託 我 帶 封 家書 去 搵 佢 。
宋江 聽咗 好 歡喜 ，即刻 上前 拖住 嗰個 大漢 話 ：
哎真係 有緣 千里 來 相會 ，無緣 對面 不 相逢 。
我就係 黑三郎 宋江 喇 。
嗰個 大漢 定神 睇真下 ，即刻 跪喺度 行個禮 話 ：
哎呀 ， 真 係 好 彩真 係 好彩 ， 個天 整定 小弟 能夠 遇見 阿哥 ， 如果 一下 錯過 咗 呀 ， 嘿 ， 小弟 就 會 白白 去 孔太公 嗰 處 行 一趟 咯 。
宋江 拖住 嗰個 大漢 入去 裏 便 問 佢 ：我 屋企 近日 冇 咩 嘢 事 吖 嘛 ？
嗰個 大漢 話 ：
阿哥 你 聽 我 講 ，小人 姓 石 名 勇 ，係 大名府 人士 ，平時 就係 靠 開 賭 為 生 。
本鄉 就 同 小人 起咗 個 花名 叫做 石將軍 。
有一次 因為 賭錢 嘅事 ，一拳 打死咗 個人 ，就 趯咗去 柴大官人 嗰度 ，喺 嗰處 經常 都 聽見 來往 江湖 個人 講起 阿哥 你 嘅 大名 。
因此 就 特意 去 鄆城縣 ， 要 投奔 阿哥 你 啦 ， 點知 去 到 喇 ， 又 聽講 你 為 咗 啲 事 出外 ；
收尾 見到 四郎 ，佢 聽 小人 講起 柴大官人 ，就 話 我 聽話 阿哥 你 喺 白虎山 孔太公 屋企 嚟 。
因為 小弟 要 拜見 阿哥 你 ，四郎 就 特意 寫咗 呢封 家書 ，交畀 小人 ，帶去 孔太公 屋企 。
如果 見到 阿哥 你 喇 ，就 叫 阿哥 你 快啲 返去 。
宋江 聽講 個 心 就 好 思疑 ，就 問 佢 話 ：
你 喺 我 屋企 住 咗 幾日 啊 ？ 有 冇 見 我 父親 啊 ？
小人 喺 嗰處 只係 住咗 一晚 就 嚟喇 ，冇 見到 太公 噃 。
於是 宋江 就 將 上梁山泊 呢件事 都 對 石勇 講咗 。
石勇 就 話 喇 ：
小人 自從 離開咗 柴大官人 ，喺 江湖 上 都 聽講 阿哥 你 嘅 大名 ，疏財仗義 ，濟困扶危 。
而家 阿哥 既然 去 嗰處 入夥 ，事 必要 帶埋 我 去 啊 ！
宋江 就 話 喇 ：得得得 ，爭 乜 在 你 一個人 呢 ？
係喇 ，介紹 你 識下 ，呢位 係 燕順 兄弟 。
宋江 叫 酒保 嚟 ，斟酒 畀 石勇 。
飲過 三 杯 嘞 ，石勇 就 喺 包袱 攞出 封 家書 交畀 宋江 。
宋江 接過 信 嚟 一睇 ，信皮 係 掉轉頭 黏 嘅 ，又 冇 平安 兩個 字 。
宋江 個 心 就 打 個 突 ，連忙 搣開 封皮 攞 封 信 出嚟 一 睇 ，睇到 後 便 封信 話 ：
父親 於 今年 正月初 ，因病 身故 ，現今 停喪 在 家 ，專 等 哥哥 來 家 遷葬 。
千萬千萬 ，切不可 誤 ，宋清 泣血 奉書 。
宋江 睇完 信 就 大叫 一聲 ，一味 用 拳頭 抌 自己 心口 ，佢 喺度 鬧 自己 話 ：
唉 ，我 呢個 不孝 嘅 忤逆仔 啊 ，胡作非為 ，父親 死咗 都 不能 盡 人子之道 ，同 畜生 有 乜 兩樣 呢 ！
又 將 個 頭 去 牆 上面 猛咁 撞 ，嘩嘩聲 喊起 上嚟 。
燕順 、石勇 就 即刻 掹住 佢 。
宋江啊 喊到 暈咗 ，好耐 先至 醒返 。
燕順 、石勇 兩個 就 勸 佢 話 喇 ：
阿哥 ， 阿哥 啊 ， 你 唔 好 咁 悲傷 。
宋江 就 吩咐 燕順 話 ：
唉 ，唔係 我 寡情薄意 啊 ，我 成日 都 係 掛住 父親 嘅 啫 。
而家 佢 已經 死咗咯 ，我 只有 即刻 趕返去 ，叫 各位 兄弟 自己 上山 啦 吓 。
燕順就話 ：阿哥 ，阿哥啊 ，太公 既然 已經 過咗身 ，就算 返去 屋企 亦 見唔到 咯 。
世上 冇 話 不死 嘅 父母 啊 ，仲 係 請 你 放寬心 ，帶領 我哋 兄弟 去咗 嗰處 ，入咗 夥 喇 。
到其時 小弟 再嚟 陪 阿哥 你 返去 奔喪 噉 都 未 為 遲 吖 。
自古話 ：蛇 無 頭 而 不 行 。
如果 仁兄 你 唔去 ，佢哋 嗰處 點 會 肯 收留 我哋 㗎 ？
宋江 又 話 ：
唉 如果 等 我 送咗 你哋 上山 ，噉 你 話 誤咗 我 幾多 時間 啦 ，噉 唔得嘅 唔得嘅 。
噉啦 ，我 寫 一 封 信 ，詳詳細細 噉 將 啲 情形 講清楚 ，你哋 帶住 呢 封 信 去 就 得㗎喇 。
你 就 帶埋 石勇 一齊 去 入夥 ，等 埋佢哋 一齊 上山 。
唉 ，我 父親 過咗世 ，我 唔 知道 就 難講 喇 ；
既然 個天 叫 我 知道 咗 咯 ， 就 真 係 度日如年 ， 燃眉之急 。
我 馬 亦 唔 要 ，人 我 都 唔 帶 一 個 咯 ，我 自己 即刻 趕返 屋企 ，我 要 走 喇 。
燕順 、石勇 點 都 留佢 唔住 。
宋江 叫 酒保 攞 啲 筆墨 嚟 ，仲 攞 一張 紙 添 ，一面 喊 一面 寫 ，喺 信 裏 便 就 再三 叮囑 ，要 收 大家 上山 入夥 。
寫完 ，信封 亦 唔 黏 就 交畀 燕順 收起 。
問 石勇 攞 一對 八搭 麻鞋 着咗 ，攞啲 銀兩 ，收 喺 身邊 ，掛起 一把 腰刀 ，就 攞起 石勇 嗰 條 短棍 ，連 酒菜 一啲 都 唔 掂 下 ，就 話 要 走 喇 。
燕順 就 話 ：阿哥 ，噉 你 都 等 秦總管 、花知寨 都 嚟 喇 ，見 一面 先至 走 都 未 遲 吖 。
宋江 就 話 喇 ：我 唔 等 喇 ，你哋 帶住 我 嘅 信 去 就 冇 阻滯 㗎 喇 。
石勇賢弟 ，你 將 我 個 事 講畀 佢哋 聽 啦吓 。
代我 向 各位 兄弟 講 ，請 佢哋 可憐 下 宋江 奔喪 之 急 ，多多 原諒 啊 。
講完 ，宋江 啊 恨不得 一步 就 返到 屋企 啊 ，飛噉 一個人 就 走咗 咯 。
宋江 走咗 之後 ，燕順 同 石勇 只有 喺 店 裏 便 食咗 啲 酒菜 、點心 ；
找咗數 ，就 石勇 騎咗 宋江 隻 馬 ，帶住 隨從 個人 去 離開 酒店 三五里 路 個 地方 ，搵到 間 客棧 就 住落嚟 喺度 等候 。
第日辰牌時分 ，全隊人馬 都 到齊 。
燕順 、石勇 接咗 佢哋 ，就 話畀 佢哋 聽 ，話 宋江 阿哥 就 已經 奔喪 返咗 屋企 喇噉 。
大家 聽咗 都 埋怨 燕順 話 啦 ：哎 ，你 點解 唔 留 留佢 㗎 ？
石勇 就 解釋 話 喇 ：
佢 聽見 父親 冇咗 呀 ，恨不得 自己 都 死埋 啊 ，邊度 肯 停留 吖 ，佢 巴不得 一下 就 飛到 返 屋企 咯 。
嗱 ，佢 仲 寫咗 封 詳詳細細 嘅 信 喺 處 ，叫 我哋 即管 去 就 得 喇 ，佢 話 嗰 處 睇咗 信 呢 就 包 冇 阻滯 㗎 喇 噉 話 。
花榮 同 秦明 睇咗 信 ，就 同 大家 商量 話 喇 ：
而家 半路 中途 ，進退兩難 ，返去 又 唔得 ，散咗 又 唔妥 。
我哋 仲係 去 啦 ，將 封信 封咗 口 佢 ，去到 山上 就 畀 佢哋 睇 ，如果 嗰處 唔 收留 ，噉 就 另作 打算 係啦 。
於是 九個 好漢 合返埋 一隊 ，帶住 三五百 人馬 ，漸漸 就 行近 梁山泊 ，噉 就 搵 大路 上山 。
佢哋 呢一行人馬 正 喺 蘆葦林 裏 便 經過 ，只見 水面 上 響起 鑼鼓 。
大家 一 睇 ，嘩嗨 ，漫山遍野 都 係 各種 彩色 嘅 旗幟 ，喺 水泊 裏頭 ，棹咗 兩 隻 快船 出嚟 。
當頭 一隻 船上 便 ，擺住 三五十個 小嘍啰 ，船頭 中間 ，坐住 一個 頭領 ，係 豹子頭 林沖 。
後便嗰隻哨船呢 ，亦係 三五十個 小嘍啰 ，船頭上 亦 坐住 一個 頭領 ，係 赤髮鬼 劉唐 。
林沖 喺 船上 喝 佢哋 話 ：誒 ，你哋 係 咩嘢 人 ？邊處 嚟 嘅 官軍 ？咁 大膽 嚟 捉 我哋 係 嘛 ？
我要 你哋 人人 皆 死 啊 個個 不留 ，你須知 我哋 梁山泊 嘅 威名 啊 ！
花榮 、秦明 佢哋 即刻 落咗 馬 ，企 喺 岸邊 回答 話 喇 ：
我哋 唔係 官軍 啊 ，呢處 有 一封 山東 及時雨 ，宋公明 阿哥 寫 嘅 信 喺 處 ，介紹 我哋 嚟 投奔 大寨 入夥 嘅 。
林沖 聽咗 就 話 喇 ：
既然 有 宋公明 兄長 嘅 書信 ，你 請 過嚟 前 便 去 朱貴 間 酒店 處 ，攞 封 信 畀 我哋 睇過 ，再 嚟 請 你哋 去 會面 啦 。
船上 將 青旗 一揮 ，蘆葦林 裏頭 就 棹出 隻 船仔 ，坐住 三個 打魚佬 嘅 。
有個 看船 ，兩個 行 上岸 嚟 話 ：你哋 各位 將軍 跟 我 嚟 啦 。
水面上 嗰 兩隻 哨船 啊 ，有 一隻 ，將 一面 白旗 擪下擪下 ，砰砰砰 鑼聲 一 響 ，兩隻 哨船 就 一齊 棹咗 返去 。
花榮 、秦明 呢 一 大班 人 見咗 ，嘩 ，都 睇到 傻晒 ，大家 都 話 喇 ：呢一 處 呀 ，官軍 邊度 敢 嚟 打 吖 ？
我哋 山寨 唔 及得 人哋 嘅 ，唔 及得 人哋 啊 。
大家 跟住 兩個 打魚佬 ，兜返出嚟 ，一直 去到 旱地 忽律朱貴 間 酒店 裏 便 。
