嗰晚 ，武松 就 搬咗 去 紫石街 佢 大佬 屋企 住 吖 。
第二朝 一早 ，潘金蓮 一起身 呀 就 喇喇聲 煲 定好 熱水 ，畀 武松 嚟 啷口 洗面 。
武松 戴好 頭巾 ，就 出門 去 衙門 畫 卯 簽到 咯噃 。
卯就係卯時 ，即係 而家 講 嘅 早晨 五點 到 七點 呢個 時間 啦 。
噉舊時啲官府呢 係 早上 卯時 開始 辦公 ，啲 辦事人員 啊 就 要 按時 上班 簽到 ，就叫做 畫卯 。
潘金蓮 就 話 喇 ：阿叔 你 去 畫 咗 卯 ，早啲 返嚟 食飯 喎 ，唔好 去 第處 食 啊 。
好啦 ，我 就 返嚟 㗎 喇 。
噉 武松 就 返去 衙門 ，畫咗 卯 ，伺候 咗 一個 上午 就 返 屋企 嘞 。
嗰個 潘金蓮 呀 ，洗乾淨 雙手 ，連 手指甲 都 撩 乾淨 ，煮好 餐飯 ，噉 三個人 就 坐埋 一枱 食 。
武松 食完 飯 ，潘金蓮 雙手 捧住 一杯 茶 遞畀 武松 飲 。
武松 就 話 喇 ： 噉 樣 麻煩 阿嫂 ， 武松 真 係 寢食不安 ， 等 我 叫 縣 裏頭 撥個 土兵 嚟 做 嘢 罷啦 。
潘金蓮 話 喇 ：阿叔 啊 ，乜 你 咁 見外 嘅 啫 ，自己 嘅 骨肉 咋嘛 ，又 唔係 服侍 外人 。
你 話 撥 個 土兵 嚟 使 喎 ，嗰啲 人 呀 ，叫 佢哋 煲 水 煮 飯 都 唔 得 乾淨 㗎 ，奴家 真係 睇唔慣 嗰啲 人 嘅 啫 。
噉誒 真係 麻煩晒 阿嫂 你 喇 。
好喇 ，呢啲 啰嗦嘢 就 唔 講 佢 咁多 。
武松 搬咗嚟 之後 呢 ，就 畀 咗 啲 銀 過 武大郎 ，叫 佢 買咗 啲 茶點 啊 請 啲 隔籬 鄰舍 飲茶 。
嗰啲 隔籬 鄰舍 呢 ，亦都 夾 份子 同 武松 做人情 。
跟住 武大郎 就 擺咗 圍酒 ，請 返 佢哋 。
噉呢啲 都 唔 講 喇 。
過咗 幾日 ，武松 就 攞咗 一匹 彩色 緞料 出嚟 送畀 阿嫂 做 衣服 噃 。
潘金蓮 笑嘻嘻 噉 話 ：阿叔 ，噉點 係 啊 。
既然 阿叔 你 送畀 奴家 咯 ，噉 奴家 就 唔敢 推辭 ，受起 佢 係 啦 。
從此之後 ，武松 一直 都 喺 大哥 屋企 住 。
武大郎 呢 ，依舊 日日 上街 賣 燒餅 。
武松 啊 每日 返去 縣衙門 辦公 當差 。
噉佢 無論 返遲 返早 啊 ，潘金蓮 啊 總係 好 茶 好 飯 ，歡天喜地 噉 服侍 佢 。
噉樣 一嚟 ，武松 真係 好過意 唔去 喇 。
潘金蓮 呢 ，時不時 都 用 啲 說話 嚟 挑逗 佢 。
不過 武松 係 個 鐵石心腸 耿直 嘅 人 ，唔知 佢 咁多 鬼馬嘢 㗎嘛 ，所以 亦都 冇 怪 佢 。
有話則長就無話則短啊 ，不經不覺啊 ，又過咗個幾月喇 。
當時 已經 係 十一月 ，連 氣 幾日 翻起 北風 ，個 天 呀 彤雲 密佈 。
呢一日 落起 大雪 上嚟 添 ，呢場 大雪 ，一直 落 到 晚上一更 。
望下 四周圍 呀 ，嗨 ，直情 係 銀鋪 世界 玉砌 乾坤 ，真係 靚 啊 。
第日 ，武松 一 清早 就 出去 縣衙門 畫 卯 ，一直到 中午 都 未 返歸 。
武大郎 呢 ，畀 潘金蓮 趕咗 出去 做 生意 。
潘金蓮 佢 自己 又 去 叫 隔籬 個 王婆 幫 佢 買 咗 啲 酒肉 之類 返嚟 。
佢 去 武松 間 房 處 ，透起 一 盆 炭火 。
佢 個 心 諗 ：等 我 今日 ，真 傢伙 引 下 佢 至 得 ，唔 信 佢 唔 動情 。
潘金蓮 一個人 ，冷冷清清 噉 企 喺 門簾 旁邊 等 咯 喎 。
一直 等到 武松 踏住 雪 返嚟 ，潘金蓮 擸起 道門簾 迎接 武松 話 ：
阿叔 返嚟 喇 ，好 冷 啊嚱 ？
多謝 阿嫂 掛心 。
武松 入咗 門 ，除低 件 氈笠 ，潘金蓮 雙手 就 要 去 接嘞 。
武松話 ：唔使 勞煩 阿嫂 喇 。就 自己 拍甩 啲 雪 ，掛 喺 埲牆 上 。
佢 又 解開 腰間 嗰個 錢袋 ，除咗 件 鸚哥 綠 紵絲 衲襖 ，返入 房 掛好 。
潘金蓮 就 話 喇 ：奴家 等 咗 成朝 喇 ，阿叔 點解 唔 返嚟 食 早飯 啫 ？
哦 ，縣 裏頭 有 個 朋友 請 食 早飯 ，先頭 又 有人 話 請 我 飲酒 ，我 唔想 去 就 返嚟 喇 。
哦 ，噉 係嘛 。
阿叔啊 ，嚟 焙下 火 啦 。
好 。噉 武松 就 除咗 對 油靴 ，換過 一雙 襪 ，着返 對 暖鞋 ，扚 咗 張 馬杌 坐 喺 火盆 旁邊 焙火 。
潘金蓮 戌實 道 前門 ，又 將 道 後門 都 閂埋 ，然後 捧住 啲 餸菜 入嚟 武松 間房 ，擺 喺 張 枱 處 。
武松 就 問 佢 話 喇 ：大哥 去咗 邊度 啊 ？乜 仲 未 返嚟 咩 ？
你 大哥 呀 日日 都 出去 做 生意 㗎 啦 ，我 同 阿叔 你 飲 幾 杯 先 啦 。
等埋 大哥 返嚟 一齊 食罷 啦 。
幾時 等得 佢 返嚟 吖 ，唔 等 佢 咯 。
話口未完 ，佢 早就 坐 熱 咗 一壺 酒 嚟 喇 。
武松話 ：阿嫂 坐啦 ，等 武二 自己 去 坐 熱啲 酒 就 得嘞 。
噉 阿叔 你 自便 啦 吓 。
潘金蓮 亦 扚咗 一張 馬杌 ，挨近 火盆 旁邊 坐低 。
嗰張 枱 就 擺 喺 火盆 旁邊 ，上面 就 擺住 啲 餸菜 ，酒壺 酒杯 。
潘金蓮 隻手 揸住 一杯酒 望住 武松 話 ：
阿叔 ，你 飲 勝 呢一杯 佢 呢 。
武松 接過嚟 ，一飲而盡 。
潘金蓮 又 斟過 一杯 酒 話 ：
個天 好 冷 啊 ，阿叔 你 飲埋 呢一杯 ，成雙成對 吖嘛 。
阿嫂 ，我 自己 嚟得嘞 。
武松 接咗 過嚟 ，又 一 飲而盡 。
武松 斟 返 一 杯 酒 遞 畀 潘金蓮 飲 。
潘金蓮 接過嚟 飲咗 ，跟住 又 斟咗 一杯酒 放 喺 武松 面前 ，佢 笑住 噉 話 ：
我 聽見 有人 講 ，話 阿叔 喺 縣前 東街 嗰度 ，收埋 一個 唱嘢 嘅 姑娘 喎 ，係唔係 真嘅 啫 ？
阿嫂 千祈 唔好 聽 啲 外人 亂噏 廿四 ，武二 從來 都 唔係 噉樣 嘅 人 。
我唔信 ，至怕 你 口不對心 啫 。
阿嫂 唔信 ，你 問 大哥 吖 。
唓 ，佢 曉 乜嘢 吖 ！
佢 識得 呢啲 嘢 呀 ，就 唔使 賣 燒餅 咯 。
阿叔 ，你 飲 啦 ，勝嘅 。
連氣 又 斟咗 三四杯 酒 過 武松 飲 。
佢 自己 呢 ，亦 有 三 杯 落肚 嘞 ，一味 噏 東 噏西 搵 啲 閑話 嚟 講 。
呢個 時候 ，武松 亦 睇出 八九分 嘞 ，就 耷低 個 頭 咯 喎 。
潘金蓮 起身 去 坐 熱啲 酒 。
武松 就 坐 喺度 攞起 火鉗 嚟 撥 火 。
潘金蓮 坐 熱咗 一壺 酒 返入嚟 房 ，一隻手 揸住 個 酒壺 ，一隻手呢 就 喺 武松 個 膊頭 處 捻咗 一下 ，佢 話 ：
阿叔 ，你 淨係 着 呢啲 衫 唔 冷 咩 ？吓 ？
武松 已經 有 五分 唔 高興 喇 ，冇 應到 佢 。
潘金蓮 見 武松 唔出聲 唄 ，一手 就 搶咗 個 火鉗 話 喇 ：
阿叔 ，你 都 唔會 撥火 嘅 ，我 嚟 同 你 撥 啦 。
好似 一 盆 火 噉 ，時時 都 咁 熱 就 好咯 。
武松 有 八成 唔 高興 喇 ，亦 冇 出聲 。
潘金蓮 仲 唔 知道 武松 嬲 喎 ，就 放低 把 火鉗 斟 過 一杯 酒 嚟 ，自己 呷咗 一啖 就 剩咗 一大半 杯 。
佢 望住 武松 話 ：
你 如果 有心嘅 ，就 飲咗 我 呢半杯 殘酒 啦 。
嘿！ 武松 一手 搶過 杯酒 ，潑咗 落 地 。
阿嫂 ，你 唔好 咁 唔識羞恥 喎 。
將隻手一推 ，爭啲 將潘金蓮 成個 推跌 。
武二 係 個 頂天立地 嘅 男子漢 ，唔係 嗰啲 敗壞 風俗 冇 人倫 嘅 豬狗 ！
阿嫂 唔好 咁 唔識羞恥 做 啲 噉嘅 事 。
如果 有 咩嘢 風吹草動 ，武二 雙眼 認得 你 係 阿嫂 ，之 拳頭 就 唔 認得 你 係 阿嫂 喇 。
以後 唔好 噉 喇 。
潘金蓮 滿面 通紅 ，即刻 執拾 咗 嗰啲 杯盤碗碟 ，佢 話 喇 ：
哼 ，我 同 你 講 下 笑 咋嘛 ，使乜 咁 認真 唧 ，真係 唔識 好 醜 嘅 ！
捧起啲嘢 就 落樓 返入 廚房 嘞 。
潘金蓮 噉 啊 勾引 武松 唔 成 啦 。
武松 呢 ，一個人 就 坐 係 房間 嚟 ，仲 氣咕咕 。
到咗未 牌 嘅 時分 ，即係 中午 點 零鐘 啦 ，武大郎 就 擔住 擔嘢 返嚟 㧬門 喇 。
潘金蓮 喇喇聲 出嚟 開門 啦 ，武大郎 入到 屋 ，放低 擔嘢 行到 去 廚房 。
咦乜 見到 老婆 雙眼 喊到 紅紅 噉嘅 ？
武大郎 就 問 喇 ：你 同 邊個 嗌交 嚟 啊 ？
哼 ！都係 你 唔爭氣 咯 ，等 啲 外人 嚟 欺負 我 。
邊 ，邊個人 敢 欺負 你 啫 ？
仲有邊個吖 ，武二 嗰隻 衰嘢 咯 。
我 見 佢 咁 大雪 行返嚟 ，就 快啲 攞 啲 酒菜 嚟 請 佢 食 啦 。
點知佢 見得 我 一個人 喺 屋企 ，就 噏三噏四 嚟 調戲 我 。
乜話 ？ 唔 會 嘅 ， 我細 佬 唔 係 噉 嘅 人 ， 從來 都 好 老實 嘅 佢 ， 嗯 。
你咪咁大聲嘈啦 ，畀隔籬聽到 ，盞畀人笑啦 。
武大郎 唔理 個 老婆 ，就 行去 武松 間房 話 ：
老二啊 ，你 未食 點心 呢 ，嚟 ，我 同埋 你 一齊 食啲 啦 吓 。
武松 唔 出聲 ，諗咗 一陣 ，除低 對 暖鞋 ，着返 對 油靴 ，又 着返 件 面衫 ，戴起 件 氈笠 ；
一頭攬返 個 錢袋 一頭就 行出 門口 嘞 。
武大郎 嗌住 佢 話 ：老二 你 去 邊度 啊 ？吓 ？
亦唔應噃 ，佢 有 佢 行走咗 喇 。
武大郎 返到 入 廚房 問 佢 老婆 話 ：
哈 ，我 叫佢 又 唔 應 ，一味噉 就 行咗 去 縣衙門 嗰 便 咯 ，唔知 佢 做 乜嘢 呢 嚱 ？
潘金蓮 就 鬧 佢 話 ： 你 正 一 嚿 飯 噉 ， 有 乜嘢 唔 知 嘅 啫 ？
嗰個 衰神 醜 咯 ，冇 面 見 你 就 走咗 咯 。
我 估 佢 實 會 叫 人 嚟 搬 行李 ，唔 敢 喺度 住 㗎 喇 。
噉 ，噉佢 搬扯咗 呀 ，噉啊 實 畀 人哋 笑話 啦 。
糊塗鬼啊你 ，佢 嚟 調戲 我 ，就 唔會 畀 人哋 笑 ？
你 咁鍾意 就 你自己 去 同佢 講 啦 ，我 係 唔 做 啲 噉 嘅 人 喇 。
你 寫 張 休書 畀 我 ，我哋 離婚 算 喇 。
噉 你啊 留到 佢 夠 係啦 。
潘金蓮 噉樣 講法 ，武大郎 就 唔敢 再 開口 嘞 。
佢哋 兩 公婆 喺 屋企 正 喺度 吟沉緊 ，武松 返嚟 嘞 。
佢 帶住 個 土兵 ，攞住 條 擔挑 ，一直 行返 入 房 ，收拾咗 行李 就 扯咯喎 。
武大郎 趕出去 嗌 住 佢 話 ： 老二 啊 ， 老二 ， 做 乜嘢 你 要 搬 扯唧 ？
大哥 ，你 唔好 問 ，講出嚟 ，盞出 你 醜 嘅 啫 ，你 由得 我 扯 罷啦 。
武大郎 唔敢 再 問 落去 ，由得 武松 搬 走咗 。
嗰個 潘金蓮 喺 裏 便 吟吟沉沉 噉 鬧 ：噉咪 真係 好啊 ！
人人 都 估 話 有 個 親兄弟 做 都頭 ，實係 好好 噉 孝敬 哥嫂 啦 。
誰不知 反轉頭 嚟 咬人 ，正一係 繡花枕頭 得個樣 啊 。
你 搬 扯 咗 呀 ， 謝天謝地 啊 ， 唔 使 日日 見 住 咁 眼冤添 啊 ！
武大郎 見 佢 老婆 噉樣 鬧法 都 唔知 點好 。
之個 心 呢 ，總係 悶悶不樂 ，呢件事 總係 𠽤住 喺 個 心 嚟 。
噉自從 武松 搬咗 返去 縣衙門 住 ，武大郎 呢 ，亦 係 依舊 日日 噉 擔擔 上街 賣 燒餅 。
佢 又 本來 想 去 縣衙門 搵 佢 細佬 傾下 ，之 畀 潘金蓮 呀 撳住 個 頭 千叮萬囑 ，唔准 佢 去 搵 武松 。
故此呢 ，武大郎 就 唔敢 去 搵 佢 細佬 嘞 。
日子 過得 好快 ，正所謂 歲月 如流 ，好天 喇 唔落 雪 喇 ，又 過咗 十幾日 。
呢一日 ，陽穀縣 嘅 知縣 啊 諗起 一件事 。
咩嘢事呢 ？
原來 呢個 知縣 到任 以嚟 ，已經 兩年半 有多 ，就 撈到 好多 金銀財寶 。
佢 又 好 想 派 個 人 同 佢 送 去 東京 ，交畀 佢 嘅 親眷 收起嚟 ，幫 佢 攞 去 進行 活動 想 升 返 幾 級 。
之又怕 喺 半路 畀人 打劫 咗 啊 ，噉 啊 一定要 有 一個 有本事 嘅 心腹人 送去 至得 㗎 。
誒 ，佢 突然間 諗起 武松 嘞 。
冇錯喇 ，叫佢去 就啱嘞 ，係 要 咁 英雄 至 得嘅 。
所以 呢一日 呢 ，佢 就 叫咗 武松 嚟 同 佢 話 ：
我 有 一個 親戚 ，喺 東京城 裏頭 住 嘅 ，而家 我 想 送 一擔 禮物 去 ，順便 帶 封 信 去 問候 下 佢 。
就 係 怕 條路 唔 係 點好行 ， 一定 誒 要 好似 你 噉 樣 嘅 英雄好漢 先至 去 得 嘅 。
你 就 唔好 怕 辛苦 喇 ，同 我 去 行 一 趟 ，啊 。
返嚟嘅時候 ，我 自然 會 重重噉 打賞 你嘅 。
武松 就 話 ：小人 得到 恩 上 抬舉 ，正係 想 搵 機會 嚟 報答 。
而家 恩上 要 用到 小人 ，點 敢 話 推託 呢 ？
小人 從來 都 未曾 去過 東京 ，仲 可以 順便 去 嗰度 觀光 下 添 。
相公 聽日 打點 好喇 就 起程 啦 。
知縣 好 歡喜 ，賞咗 三杯 酒 畀 武松 飲 。
呢啲啊不在話下喇 。
而家 講 下 武松 ，佢 接受咗 知縣 嘅 命令 之後 ，就 返到去 住宿 嘅 地方 。
攞 咗 啲 銀兩 ， 叫個 土兵 出街 就 買 咗 一樽酒 同埋 魚肉 果品 之類 嘅 嘢 ， 就 一齊 行去 紫石 街 佢 大佬 屋企 。
武大郎 啱啱 賣完 燒餅 返嚟 ，見到 武松 坐 喺 門口 嚟 ，個 土兵 入 咗 去 廚房 整 餸 。
潘金蓮 對 武松 係 餘情 未斷 啊 ， 佢 見到 武松 買 咗 酒菜 返 嚟 ， 個心 就 諗 嘞 ：
唔通 嗰個 嘢 想 我 咯返嚟 咯 ？
嗰個嘢 實鬥 我 唔過 嘅 ，等 我 慢慢 嚟 氹返 佢 至 得 。
潘金蓮 就 喇喇聲 行返 上樓 ，搽 返 啲 胭脂水粉 ，梳過 個 頭 ，換返 件 鮮豔 顏色 嘅 衣服 ，然後 行到 門口 迎接 武松 咯 喎 。
佢 行過 禮話 ：阿叔 ，唔知 咩嘢 事 得罪 咗 你 呢 ？咁耐 都 唔 上門 嚟 ，使到 奴家 個 心 呀 都 唔知 點 好 。
每日 都 叫 你 大哥 去 衙門 搵 阿叔 你 賠 個 禮 ，點知 佢 返親 嚟 都 話 ，搵唔到 啊噉 。
今日 真係 高興 喇 ，得 阿叔 你 返嚟 屋企 ，哎呀 你 睇 ，要 阿叔 你 破費 咁多 錢 做 乜嘢 唧 。
武二 有 句 說話 ，特登 嚟 講畀 大哥 同 大嫂 聽 。
噉呀 ，阿叔 請 上樓 坐 啦 。
三個人 上到 樓 ，武松 請 哥嫂 喺 上首 坐落 ，自己 就 擔咗 張 馬杌 坐 喺 橫頭 。
土兵 將 啲 酒肉 ，捧咗 上嚟 就 喺 張 枱 處 擺好 。
武松 就 請 大哥 大嫂 飲酒 嘞 。
潘金蓮 一味 攞 對 眼 嚟 睄 住 武松 ， 武松 唔 理 佢 ， 淨 係 顧住 飲酒 。
酒 過 五 巡 ，武松 斟咗 一杯 ，揸住 喺 手 嚟 望住 武大郎 話 ：
大哥 ，今日 武二 受咗 知縣 相公 嘅 差遣 ，要 去 東京 辦 一啲 事 ，聽日 就 要 起程 咯 。
多則 兩個月 ，少則 四五十日 就 返嚟 。
有句 說話 專登 嚟 講畀 你 聽 。
你嘅為人 從來 都係 懦弱 ，我 唔 喺 屋企 ，怕 有啲 外人 嚟 欺負 你 。
噉 如果 你 平日 係 賣 十籠 燒餅 嘅 ，你 從 聽日 起 ，就 只係 做 五籠 攞去 賣 啦 。
你啊 每日 要 遲出 早歸 ，唔好 同人 去 飲酒 。
返到屋企 ，就 放落 道門簾 ，早早 閂埋 道大門 ，免得 咁多 口舌 是非 。
如果 有人 欺負 你 呢 ，你唔使 同佢 爭執 嘅 ，等 我 返嚟 我自然 會 搵 佢 算賬 。
大哥 ，如果 你 聽 我 呢啲 說話 ，就 請 大哥 飲 勝 呢杯 啦 。
老二 你 睇得到 ，講得啱 ，我 聽 你 話 。
武大郎 接過 杯酒 飲 勝咗 咯 。
武松 再 斟 第二 杯 酒 對住 潘金蓮 話 ：
阿嫂 係 個 精明 嘅 人 ，唔 在 武松 講 咁多 咯 。
我 大哥 為人 老實 ，全靠 阿嫂 你 做主 照顧 佢 。
開講有話 ：表壯不如裏壯 ，阿嫂 將 頭家 把得定 ，大哥 仲有 咩嘢 煩惱 吖 ？
古人 都有 話 喇 ：門扇 密實 狗 難 入 吖 嘛 。
嘿呀 武松 呢番 說話 一 講出嚟 ，潘金蓮 醜 到 呀 由 耳仔 腳 紅 起 一直 紅到 上 額頭 ，跟住 就 變成 紫漒噉色 ，佢 指住 武大郎 破口大罵 ：
你呢個懵鬼吖 ，蠢鈍得你吖 ！你同外人 講過 啲咩 說話 嚟 欺負 老娘 啊 ？
我 講 你 聽吓 ，我係 個 唔戴頭巾 嘅 男子漢 ，響當當 嘅 女人 。
拳頭 上面 企得 起人 ， 膊 頭 上面 走 得 馬 ， 唔 係 嗰 啲 未 見過世面 嘅 人 。
自從 我 嫁咗 畀 武大 ，真係 連 隻 蟻 都 唔 敢 躝 入 屋 㗎 。
有咩 門扇 唔 密實 ，鑽 咗 隻 狗 入嚟 啊 ？
你 胡言亂語 ，有憑有據 先至 好噏噃 ！
哈哈哈 ，阿嫂 噉樣 講 就 最好 嘞 ，但 望 你 心口如一 ，千祈 唔好 口不對心 。
阿嫂 既然 已經 講 咗 咯 ， 武二 記住 喺 心 嚟 ， 請 阿嫂 飲 咗 呢 一 杯酒 啦 。
潘金蓮 推開 隻 酒杯 ，噔噔聲 走落 樓 ，落咗 一半 ，企住 喺 樓梯 嗰度 話 ：
你 咁 聰明伶俐 ，乜 你 唔 知道 長嫂 為 母 咩 ？
我 當初 嫁 武大 嘅 時候 ，幾時 聽講過 有 個 咩嘢 阿叔 㗎 ？都 唔知 喺 邊度 走返嚟 嘅 ，點知 你 係 真 定係 假 㗎 ？
一味 係 老娘 晦氣 ，撞親 都 係 呢啲 衰嘢 ！喊到 搲搲聲 就 落咗 樓 咯 喎 。
嗰 個 潘金蓮 呀 ， 嘿 ， 真 係 會 整色 整水 㗎 。
噉 武大郎 同 武松 兩 兄弟 飲 咗 幾杯 ， 武松 就要 告辭 喇 。
武大郎 話 ：你 呢趟 去咗 就 早啲 返嚟 啊 ，返嚟 我哋 再 相會 啦 。
講講下 ，流起 眼淚 上嚟 。
武松 見到 噉 就 話 喇 ：大哥 啊 ，你 不如 唔做 呢啲 生意 就 罷 喇 ，喺 屋企 唞 下 仲 好 。
日常嘅 使用 我 會 送嚟 㗎 喇 。
武大 就 送 武松 落咗 樓 ，臨 出門口 武松 又 話 ：
大哥 ，我 嘅 說話 你 要 記 實至好 啊 。
噉 武松 帶住 個 土兵 ，就 返去 宿舍 收拾 行裝 。
第日 一 早起身 ，打好咗 包裹 之後 就 去 見 知縣 啦 。
個知縣 呢 ，早就 搵咗 架 車 ，將 啲 箱籠 都 裝咗 上 車 㗎喇 。
佢 點咗 兩個 精壯 土兵 ，又 喺 衙門 裏頭 叫咗 兩個 心腹 差人 ，吩咐得 清清楚楚 。
噉嗰 四個 人 就 跟住 武松 ，拜別咗 知縣 ，裝束 妥當 ，提住 朴刀 ，押住 架 車 起程 上路 ，離開 陽穀縣 就 一路 去 東京 咯 喎 。
話 分 兩頭 ，而家 講下 武大郎 。
佢 自從 武松 喺 屋企 講咗 嗰 番 說話 走咗 之後 ，足足 呀 畀 個 老婆 鬧 咗 三四 日 。
嘿嘿 ，武大郎 呢個人 又 好脾氣 ，忍氣吞聲 ，你 鬧 就 由得 你 鬧 。
佢 個 心 淨係 記實 佢 細佬 個 說話 嘅 啫 ，真係 日日 只係 做 一半 燒餅 搦 出去 賣 ，早早 就 返 屋企 。
一 放低 擔嘢 ，就 去除咗 道門簾 ，閂埋 道 大門 ，定定噉 喺 屋企 坐 。
潘金蓮 見到 佢 噉 嘅 樣 個 心 就 嬲 喇 ， 指住 武大郎 塊面 鬧 佢 話 ：
蠢材 ！我 都 未曾 見過 個 日頭 仲 喺 半天 嚟 就 將 道 衰鬼 大門 閂埋 嘅 。
人哋 見到 噉 呀 ，都 唔 知道 我哋 屋企 整 乜鬼 啊 。
聽 你 細佬 嗰 把 臭嘴 發噏風 啦 ，真係 唔怕 人 笑話 嘅 。
唔係 由得 佢哋 笑 係咯 。
我 細佬 講 嘅 都係 啲 好話 嚟 ，免咗 好多 是非 嚱 。
我啋 ！你個 死懵鬼 吖 ，你 仲係唔係 個 男子漢 啦 ，自己 唔作主 ，要 聽 人哋 擺佈 你 。
嗯就係要聽佢話 ，佢講嗰啲說話 ，珍珠都冇咁真 ，金都冇咁值錢啊 。
真係㗎喎 ，武松 去咗 十幾日 ，武大郎 啊 日日 如是 ，晏出 早歸 ，返到 屋企 就 閂埋 大門 。
潘金蓮 同 佢 嘈過 幾場 交 ，哈哈 ，收尾 嘈慣 咗 喇 ，亦 當 冇 件事 喇 。
自此之後呢 ，潘金蓮 約莫 到咗 武大郎 返嚟 嘅 時候 ，就 走去 收起 道 門簾 閂定 道 大門 先 。
武大郎 見到 個 心 亦 好 歡喜 ，佢 諗 ：啊 ，吖 係 噉 又 幾 好 喎 。
又過咗 好幾日 ，冬天 就快 過盡 喇 ，天色 亦 開始 回暖 。
有一日 ，武大郎 就 嚟 要返歸 嘅 時候 ，潘金蓮 就 習慣 咗 喇 ，就 行去 門口 用 個 丫叉 嚟 叉 嗰道 門簾 ，想 收返 落嚟 先 啦 。
吖 亦 都 係 整定 有事 嘅 ， 咁 啱 得 咁 巧 ， 有 個人 喺 門簾 旁邊 行過 正 所謂 無巧不成書 啊 。
潘金蓮 叉 嗰道 門簾 ，一下 失手 ，嗰個 丫叉 就 𨃩歪 咗 ，撲噉 打正 落 嗰個人 嘅 頭巾 處 。
嗰個人 企定 腳 正話 想 發作 喇 ，擰過 頭 嚟 一 睇 ：
嘩 ！見 係 個 如花似玉 咁 靚 嘅 女人 唄 ，咦呀 ，已經 軟咗 半邊 。
先頭 嗰啲 怒氣 呀 ，都 飛咗 去 冇 雷公 咁 遠 喇 ，一下 就 變成 笑口吟吟 噉 嘅 樣 喎 。
潘金蓮 知道 唔啱 ，就 深深噉 行咗 個 禮話 ：
奴家 一時 失手 ，官人 唔好 怪 啊 。
嗰個人 一面 用手 戴返 正 頂頭巾 ，一面 彎低 條腰 還禮 話 ：誒 唔緊要 唔緊要 ，娘子 請便 啦 。
呢件事 畀 隔籬 嘅 王婆 見到 嘞 ，當時 王婆 正 喺 茶坊 嘅 門口 嚟 ，佢 笑住 話 ：邊個 叫 大官人 你 喺 呢棟 屋簷 下 便 過 吖 ，打得 好 啊 。
嗰個人 亦 笑住 話 ：啊 ，誒嚱 ，係 小人 唔啱 ，衝撞咗 娘子 咯 ，對唔住 ，對唔住 。
潘金蓮 話 ：官人 唔好 嬲吓 。
嗰個人 笑住 又 深深噉 行咗 個 禮話 ：誒 小人 不敢 。
嗰一雙眼呀 ，一味 喺 潘金蓮 個 身上 轉嚟轉去 。
臨行喇 ，仲要 回咗 七八次 頭 ，然後 搖搖擺擺 ，度住 八字腳 噉 行去 。
潘金蓮 亦都 收起 門簾 、丫叉 返入 屋 ，掩返 道 大門 等 武大郎 返嚟 。
喂 ，噉 先頭 嗰個 人 係 邊個 啊 ？喺 邊度 住 㗎 佢 ？
呢個人呀 ，佢 原來 不過 係 陽穀縣 一個 破落戶 財主 ，就 喺 縣衙門 前 便 開 間 藥材舖 嘅 。
自細 就係 一個 奸詐 嘅 人 ，打得 幾路 好 拳腳 。
近來呢 ，暴發起 上嚟 咯喎 ，專喺 縣 裏頭 幫 人哋 講數 口 收 黑錢 ，包 打 官司 就 陷害 忠良 。
因此呢 ，成個 縣 啲 人 都 驚 佢 三分 。
呢個人 ，複姓 西門 ，單名 一個 慶字 ，西門慶 啊 ，排行 第一 ，人人 都 叫 佢 做 西門大郎 嘅 。
近來 因為 發咗達 有錢 嘞 ，所以 人人 又 稱呼 佢 做 西門大官人 。
哈哈 ，過咗 冇 幾耐 ，嗰個 西門慶 打咗 個 轉 又 返嚟 咯 喎 ，佢 行 入去 王婆 間 茶坊 裏 便 搵 個 位 坐落 。
西門慶 又 返嚟 做 乜鬼 呢吓 ？正所謂 狗 上 瓦坑 有 條 路 。
