武松 啊 用 條 棍 去 打 老虎 ，點知 打得 急 過頭 ，冇 打到 隻 老虎 ，打中 咗 樖樹 喎 。
連棍 都 打斷 埋 ，得返 半橛 揸 喺 手 嚟 啫 。
嗰隻 老虎 嗷嗷聲 發 大 惡 喇 ，翻身 又 一 撲 。
武松 又 一 跳 ，退後 十步 遠 。
嗰隻 老虎 一撲過嚟 ，啱啱 兩隻 前爪 就 搭到 武松 面前 喎 。
武松 掉開 嗰 半橛棍 ，兩隻手 就 趁勢 將 老虎 頭頂 浸皮 一下 就 揦實 ，出力 一扤 ，扤咗 佢 落地 。
嗰只老虎 啊 梗係 猛 咁 掙扎啦 ，就 畀 武松 出盡 死力 扤實 ，真係 半點 都 冇 放鬆 。
武松 用 隻 腳 對住 老虎 個 面門 眼核 一味 亂咁 踢 。
老虎 痛 喇 ，嘩嗷嗷 ，咆哮 起 上嚟 ，就 喺 身底下 就 搲 起 兩 堆 黃泥 ，搲出 咗 個 氹 。
武松 就 將 老虎 個 嘴 ，扤咗 落去 個 黃泥 氹 裏 便 。
嗰隻 老虎 畀 武松 炮製 咗 咁 耐 ，氣力 呢 係 差 咗 啲 嘞 。
武松 就 將 隻 左手 緊緊噉 揦 緊 老虎 嘅 頂花皮 ，騰出 隻 右手 ，揸起 個 拳頭 ，嘩 ，個 拳頭 呀 ，鐵錘 咁 大 嘅 ，出盡 平生 之 力 就 一味 打 。
打到 六七十 錘 ，嗰隻 老虎 嘅 眼 、耳 、口 、鼻 都 飆出 鮮血 ，唔逳得 喇 ，不過 呢 ，個口 仲 會 喘氣 。
武松 放開 手 ，返去 樹腳 就 搵到 打斷咗 嗰 橛 棍 。
怕隻老虎唔死啊 ，用條棍尾又打咗一餐 ，卒之就打到隻老虎氣絕 。
武松 個 心 諗 ：好 ，等 我 拖 呢 隻 死 老虎 落 山 至 得 。
噉 就 喺 血泊 裏頭 用 兩隻手 嚟 掅 隻 老虎 咯 喎 ， 邊度 仲 掅 得 逳 吖 ！
原來 已經 使盡咗 氣力 啊 ，手腳 都 軟顂顂 咯 。
武松 行返 去 嗰 嚿 大 青石 度 ， 坐 喺 處 唞 咗 一輪 。
佢 又 諗 喇 ：咦 ？個 天 就 嚟 黑 喇 ，如果 又 跳出 隻 大老虎 嚟 添 呀 ，我 仲 點 鬥得過 佢 啊 。
唔係喇 ，硬攰 都 落咗 山 先 ，聽朝 先至 算 。
於是就 喺 嚿 大石 旁邊 ，搵返 頂 范陽 氈笠 ，行出 咗 個 樹林 ，一步一步 噉 扤 落 山岡 喇 。
行咗唔到半里路 ，只見 喺 草林 裏頭 鑽出 兩隻 老虎 ！
哎呀 ，我 呢趟 死喇 ！
武松 一嗌 ，只見 嗰 兩 隻 老虎 直筆 甩噉 企咗 起身 喎 。
武松 定眼 一 睇 ， 哦 ， 原來 係 兩個 人 嚟 ， 不過 係 將 老虎皮 聯 咗 做 衣服 ， 緊緊 噉 繃住 喺 身上 便 嚟 啫 。
嗰 兩個 人 呢 ，手上 都 揸住 一把 五股叉 ，見咗 武松 就 吃咗 一驚 喎 ：
喂喂 喂 ， 你 呢 個人 吖 ， 乜 你 食 咗 鱷魚 心 ， 豹子 肝 ， 獅子 腿 ， 周身 都 係 膽 包住 㗎 ？
個天 都 咁 黑 喇 ，點解 敢 獨自 一個人 又 冇 架 生 吖 噉 就 過 岡 咯 ？你 你 ，嗯 誒 你 係 人 定係 鬼 啊 ？
武松 話 ：你 兩個 係 咩嘢 人 啊 ？
我哋 係 本地 嘅 獵戶 咯 。
你 哋 上山 係 做 咩 事 啊 ？
吓 ？乜 你 仲 唔知 咩 ？
而家 喺 呢個 景陽岡 上 便 呀 有 一 隻 好大 好大 嘅 老虎 ，晚晚 都 出嚟 傷人 。
淨係 我哋 啲 打獵 嘅 ，就 死咗 七八個 喇 ；
過路啲人 就 不計其數 添啦 ，都 畀 呢隻 畜生 食咗 。
噉 本 縣 嘅 知縣 相公 ，就 限令 呢度 啲 里正 同 我哋 啲 獵戶 去 捉 佢 啦 。
之呢隻畜生呀 ，勢兇夾大隻 ，挨近下佢都難啊 仲邊個敢上前吖 ？
唉 ，我哋 為咗 佢 呀 ，都 唔知 捱咗 官府 幾多 打 㗎 喇 ，就係 捉 佢 唔到 。
呢 今晚 就 輪到 我哋 兩個 出嚟 捉 ，我哋 就 帶埋 十幾個 鄉民 嚟 ，上上下下 安好咗 窩 弓 藥箭 。
我哋 正 喺度 埋伏住 等 佢 ，點知 見到 你 大剌剌 噉 喺 山岡 上 便 行落嚟 ，嚇咗 我哋 一跳 添 。
啊 係 喇 ， 你 係 咩 嘢 人 啊 ？ 先頭 有 冇 見到 老虎 啊 ？
我係 清河縣 人士 ，姓 武 ，排行 第二 。
啱先 喺 岡 上面 嘅 樹林 旁邊 ，撞正 嗰 隻 老虎 ，畀 我 一輪 拳腳 打死咗 咯 。
吓 ？咩 ？咩話 ？誒 。
唔係啩 ？
你唔信呀 ？你睇下 我身上 啲 血跡 ，嗱 。
噉 ， 噉 你 ， 你點 打 㗎 ？
於是 武松 就 將 打死 老虎 個 經過 啊 ，從頭到尾 講咗 一次 畀 佢 兩個人 聽 。
嗰 兩個 獵戶 聽咗 又 驚 又 喜 啊 ，即刻 嗌 嗰 十幾個 鄉民 行埋嚟 。
只見 嗰 十幾個 鄉民 都 揸住 鋼叉 、踏弩 、刀槍 等等 ，好快趣 就 圍晒埋嚟 。
武松 就 問喇 ： 佢 哋 呢 班 人 點解 唔 跟 你 哋 兩個 上山 呢 ？
唉 ，嗰隻 畜生 咁 犀利 ，佢哋 邊度 敢 上去 吖 ？
嗰 兩個 獵戶 見 啲 鄉民 嚟 齊 嘞 ，就 將 武松 打死 老虎 嘅 事 講 畀 佢 哋 聽 。
吖 ，嗰班人 就 唔肯 信 喎 。
武松 就 話 ：你哋 大家 唔信 呀 ？我 帶 你哋 去 睇 啦 。
嗰班人 都 帶住 火連火石 嘅 ，即刻 就 打着 火 ，點起 六七支 火把 ，大家 都 跟住 武松 啊 一齊 上山 。
果然 ，見到 嗰隻 老虎 都 死咗 喇 ，一嚿 噉 僂 喺 地下 嚟 。
嘩 ，大家 嗰種 高興法 就 唔在 講咯 。
即刻 就 叫 一個人 ，趕快 落山 去 報畀 里正 同 主管 嘅 上戶 知 先 。
其他嘅人呢 ，七手八腳 ，綁起 嗰隻 死老虎 ，嘿呀呵呀嘿呀呵噉 抬落 山 喇 。
落到 山腳 ，已經 有 成 七八十 個 人 湧 到嚟 睇 嘢 嘞 。
佢哋 將 嗰隻 死老虎 抬 喺 前便 ，又 用 一 頂 兜轎 抬起 武松 ，一直 去到 本地 嘅 一個 上戶 屋企 。
呢度 嘅 里正 呀 ，都 喺 莊 前 迎接 啊 。
將 隻 老虎 抬 到 去 草廳 放低 。
呢個 時候 本鄉 嘅 上戶 同 本鄉 啲 獵戶 ，有 成 三 二十 人 都 嚟 探望 武松 。
佢 哋 問 嘞 ： 壯士 高姓大名 啊 ？ 盛鄉 係 邊處 啊 ？
小人 就係 呢處 隔籬 郡 ，清河 縣 人士 ，姓 武 名 松 ，排行 第二 。
呢趟 正話 喺 滄州 回鄉 ，尋晚 喺 山 嗰便 嘅 酒店 飲到 大醉 ，上得 山嚟 ，啱啱 撞正 呢隻 畜生 。
跟住 ，就 將 當時 打老虎 嘅 情形 詳詳細細 噉 又 講咗 一次 。
嘩 ！大家 都 稱讚 話 ：真係 英雄 好漢 啊 ！
嗰班 獵戶 攞咗 啲 野味 嚟 先 ，畀 武松 送 酒 。
飲咗 幾杯 ，武松 為 因 打咗 一輪 老虎 ，實在 太攰 喇 ，要 瞓喇 。
大戶 就 吩咐 莊客 收拾好 間 客房 ，請 武松 去 休息 。
第日天光 ，上戶 使 個人 先 去 縣 裏頭 報告 ；
一便 呢 ， 就 叫 人 扎 一張 虎床 ， 就 愛 嚟 抬 老虎 嘅 。
安排得妥妥當當 ，準備 送去 縣城 嘞 。
武松 起咗身 ，正喺度 啷口 洗面 。
已經 有 好多 上戶 啊 ，拉咗 隻 羊 ，擔咗 擔 酒 ，喺 大廳 嗰度 等緊 見 佢 嘞 。
武松 着好 衣服 ，戴好 頭巾 ，出到嚟 大廳 同 大家 見面 。
嗰班 大戶 同 武松 敬酒 話 ：
我哋 呢度 呀 ，畀 呢隻 畜生 都 唔知 害咗 幾多 條 人命 ，連累埋 啲 獵戶 捱咗 好多 打 㗎 喇 。
今日 好彩 得 壯士 嚟到 ，除咗 呢一個 大 害 ：
第一 ，鄉里 啲 人 有福 ；
第二 ，客侶 通行 無阻 。
呢啲呀 都係 出於 壯士 之 賜 啊 ！
武松 答謝 佢哋 話 喇 ：
並非 小人 有 咩嘢 本事 ，都係 託賴 各位 長上 嘅 福蔭 啫 。
眾人 都 嚟 祝賀 武松 啊 。
呢朝早 ，大家 興高采烈 飲咗 一餐酒 。
將 嗰隻 老虎 抬出嚟 ，放 喺 張 虎床 上 便 。
各個 鄉村 嘅 上戶 ，都 將 啲 綢緞 花紅 ，掛 喺 武松 身上 。
武松 自己 帶嚟 嗰啲 行李 包袱 呢 ，就 暫時 放 喺 上戶 屋企 先 ，噉 就 一齊 出 莊 門 外 便 。
陽穀縣 嘅 知縣 相公 呢 ，早就 派咗 人 嚟 接 武松 嘞 。
見咗面之後 ，就 叫 四個 莊客 ，用 頂 涼轎 嚟 抬 武松 。
嗰隻 老虎 呢 ，就 抬起 喺 前面 嚟 ，掛滿 晒 花 紅 綢緞 ，㷫㷫 含含 一路 送去 陽穀 縣城 嘞 。
陽穀縣 城 嗰啲 老百姓 呀 ，聽講 話 有 個 壯士 打死咗 景陽岡 上面 隻 大老虎 啊 噉 話 ，個個 都 出晒嚟 大街 睇嘢 。
成個 縣城 呀 轟動 晒 ，仲 熱鬧 過 元宵 。
武松 坐 喺 橋 上面 望下 ，嘩嗨 ，見到 人山人海 ，膊頭 接 膊頭 就 背脊 頂 背脊 啊 。
滿街滿巷 熱鬧 非常 ，都 出嚟 睇 老虎 同埋 睇 打 老虎 嘅 壯士 。
行到 縣衙門 嘅 門口 ，知縣 相公 早就 喺 大堂 上面 等候 。
武松 落咗 轎 ，啲 人 就 抬住 老虎 一齊 嚟到 大堂 前 便 。
老虎 呢 ，就 放 喺 條 甬道 處 。
個 知縣 見到 武松 咁 夠 威勢 ，又 睇見 咁 大 一隻 錦毛 老虎 個 心 就 諗嘞 ：
誒 ，唔係 呢個 大漢 ，又 點 打得 呢隻 猛虎 吖 ？
佢 就 嗌 武松 上嚟 大堂 喇 。
武松 行前 去 行咗 禮 ，知縣 問 佢 話 ：
你 呢位 打虎 嘅 壯士 ，你 講 下 啦 ，點樣 打 呢隻 老虎 㗎 ？
武松 就 喺 大堂 之上 ，將 打老虎 嘅 經過 講咗 一次 。
大堂 上下 所有 啲 人 呀 ，個個 都 聽到 呆晒 ，真 犀利 啊 ！
知縣 當堂 賜咗 幾杯 酒 ，又 將 上戶 夾 嘅 賞賜 錢 一千 貫 就 送畀 武松 。
武松 稟告 話 ：
小人 託賴 相公 嘅 福蔭 ，偶然 僥倖 打死 呢隻 老虎 。
呢啲 並非 係 小人 嘅 本事 ，點 敢 接受 賞賜 呢 ？
小人 聽講 呢處 好多 獵戶 ，都 係 為咗 呢一隻 老虎 受過 相公 嘅 責罰 ，不如 就 將 呢一千貫錢 分發 畀佢哋 大家 仲好啦 。
哦 ， 既然 係 噉 ， 就任 從 壯士 啦 。
於是 武松 就 將 呢一啲 賞錢 ，就 喺 大堂 之上 即刻 分晒 畀 所有 嘅 獵戶 。
知縣 見到 武松 做人 咁 忠厚仁德 ，有心 要 抬舉 佢 就 話 喇 ：
雖然 ，你 係 清河縣 人士 ，不過 同 我 呢度 陽穀縣 ，近在咫尺 啫 。
我 今日 就 報請 上司 委派 你 喺 本縣 做 個 都頭 呢 ，好唔好 啊 ？
武松 跪 喺度 感謝 話 ：
若果 得到 恩相 抬舉 ，小人 就 終身 受賞賜 咯 。
知縣 即刻 就 叫 個 押司 嚟 ，立咗 個案 ，當日 就 報請 上司 委派 武松 做 步兵 都頭 。
嗰班 上戶 都 嚟 恭喜 武松 啦 ，一連 四五日 ，日日 請 武松 飲 。
武松 個 心 諗 ：
哈 ，我 啊 本來 想 返去 清河縣 探 阿哥 ，點知道 竟然 做咗 陽穀縣 嘅 都頭 添 。
從此之後呢 ，真係 上官 見愛 ，就 鄉里 聞名 喇 。
又過 咗 好幾日 ， 嗰 日 武松 得閒 就 出去 行下 街玩下 ， 忽然 聽見 背後 有人 嗌 佢 話 ：
武都頭 ，你 今日 發咗 達喇 ，點解 唔 嚟 探下 我 啊 ？
武松 擰轉身 一睇 ，哎呀 ，跪低 就 拜 。
嗌佢嗰個人 係 邊個 呢 ？
唔係 第個 喎 ，原來 係 武松 嘅 親 大佬 武大郎 。
武松 拜見 完 大哥 就 話 喇 ：
年 幾 冇 見 大哥 喇 ，點解 嚟咗 呢度 啊 ？
武大郎 就 話 喇 ：
老二啊 ，你 去咗 咁耐 ，為咩嘢事 唔寄 封信 嚟 畀 我 吖 ？
我呀 ，真係 又 怨 你 時 又 想 你 啊 。
大哥 點解 又 怨 我 又 想 我 呢 ？
點解 我 怨 你 呢 ？
當初 ， 你 喺 清河縣 嘅 時候 ， 一飲 醉酒 就 同人 打交 ， 周時 都 要 吃官司 嘅 ；
搞到 我 呀 成日 都 要 去 衙門 同 你 奔跑 ，冇 一個 月 話 清靜 過 嘅 ，哎 ，都 累得 我 夠 苦 㗎 咯 。
呢 ，呢啲 就係 我 怨 你 嘅 地方 喇 。
想你呢 ，係噉嘅 ：
我 近來 啊 ，娶咗 個 老婆 ，係 清河縣 人 ，有啲 人 啊 眼紅 唔服氣 噃 ，成日 都 嚟 欺負 我 ，又 冇 人 幫得 我 吖 。
之 你 喺 屋企 嘅 時候 呀 ，邊個 敢 嚟 放 個 屁 啊 ，嘿嘿 。
我 而家 喺 清河縣 嗰度 都 住唔落 咯 ，就 只有 搬嚟 呢處 ，租 間 屋 住 啦 。
呢啲呢 ，就係 想 你嘅 地方 喇 。
各位 聽眾 ，你哋 話 奇怪 唔 奇怪 呢吓 。
武大郎 同 武松 兩 兄弟 係 一個 老母 生 嘅 ，正所謂 一奶同胞 。
武松 呢 ，生得 身長 八尺 ，一貌堂堂 ，周身上下 有 千百斤 氣力 。
梗係啦 ，如果 唔係 又 點 打得死 嗰隻 猛虎 呢 係咪 啊 ？
噉嗰個武大郎呢 ，生得 唔夠 五尺 高 ，相貌 醜陋 就 滑稽 可笑 。
清河縣 啲 人 見 佢 生 得 咁 矮 ， 就 同 佢 改 咗 個 花名 叫做 三寸丁 谷 樹皮 。
係嘞 ，乜 咁 醜樣 一個 人 又 娶到 老婆 個 呢 ？你哋 咪 心急住 ，聽 我 講埋落去 先 。
原來 清河縣 呢 ，有 一個 大戶人家 就 有 個 妹仔 ，叫做 潘金蓮 ，二十零歲 ，都 幾 靚下 。
因為 嗰個 大戶 啊 成日 咁 纏住 佢 ，潘金蓮 呢 ，就 趯去 告畀 主人婆 聽 ，意思 梗係 話 唔肯 䎺 啦 。
噉嗰個大戶呢 就 懷恨在心 嘞 ，情願 貼埋 嫁妝 ，一文錢 都唔要 ，白白 將佢 嫁咗 畀 武大郎 。
所以 武大郎 個 老婆 就係 噉嚟 㗎 喇 。
自從 武大郎 娶咗 呢個 女人 之後 ，清河縣 裏頭 ，有 一班 奸奸狡狡 專好 索油 嘅 白鼻哥 ，終之 無 日 都 趯嚟 佢 屋企 門前 ，黐車 咁 轉 。
而 呢個 女人 呢 ，見 武大郎 身材 矮小 ，相貌 又 醜怪 論論盡盡 ，梗係 討厭 嫁咗 呢個 噉嘅 丈夫 啦 。
哈哈 ，呢個 女人 啊 ，樣樣 都 好嘅 ，之有 一樣 ，就係 最鍾意 勾引 男人 喎 。
武大郎 個 為人 懦弱 怕事 ，有 個 噉 嘅 老婆 喺 屋企 ，又 有 班 噉 嘅 人 周時 喺 門口 笑 佢 ，話 咁 好 一 塊 羊肉 落 咗 去 狗 嘴 裏頭 喎 噉 。
唔得喇唔得喇 ，喺 清河縣 住 唔落 喇 ，因此 武大郎 就 搬咗嚟 陽穀縣 紫石街 租 間 屋 住 。
噉 每日 呢 ，仍舊 擔擔 上街 賣 燒餅 。
呢一日 ，佢 喺 縣衙門 前面 做緊 生意 ，咁啱 就 撞見 武松 。
武大郎 話 喇 ：
老二 呀 ，前日 ，我 喺 街上 就 聽見 啲 人 ，㗾㗾聲 噉 嘈話 ，喺 景陽岡 上 打 老虎 嗰個 壯士 啊 ，係 姓 武 嘅 。
誒而家 知 縣 相公 ，保舉 佢 做咗 個 都頭 啊噉 ，我 啊 八成 估到 係 你 㗎 喇 。
嘿嘿嘿 ，誒誒 估唔到 今日 至 撞到 你 。
誒唔唔唔 ，嗯 我 唔 做 生意 住 咯 ，嗯 我 同 你 一齊 返 屋企 啦 吓 。
大哥 ，你 屋企 喺 邊度 啊 ？
呢 ，啊 喺 前 便 紫石街 咋嘛 。
武松 就 幫 佢 大佬 擔起 個 燒餅 擔 ，武大郎 帶路 ，轉彎抹角 一路 行去 紫石街 。
轉過 兩個 彎 ，嚟到 一間 茶坊 隔籬 ，武大郎 叫咗 一 聲 ：大嫂 開門 喇 。
咿聲 開咗 道門 ，門簾 一逳 ，只見 一個 女人 出嚟 企 喺 門簾 旁邊 話 ：
大哥 ，乜 咁早 就 返嚟 啊 今日 ？
嘿嘿嘿 ， 嘿嘿嘿 ， 誒 你 阿叔 嚟 咗 啊 ， 嚟 見 下 啦 。
武大郎 啊 接過 燒餅 擔 自己 擔入去 ，然後 出嚟 話 ：
老二啊 ，你 入嚟 ，見下 你 阿嫂 啦 。
武松 掀起 門簾 行 咗 入 去 裏 便 ， 同 嗰 個 女人 見面 。
武大郎 話 ：
大嫂啊 ，原來 ，喺 景陽岡 上 便 打死 隻 老虎 ，新新 做咗 都頭 嘅 唔係 邊個 ，係 我 呢個 細佬 啊 。
潘金蓮 上前 行禮 話 ：叔叔 萬福 。
武松 跪低 答禮 話 ：阿嫂 請坐 。
潘金蓮 向前 扶住 武松 話 ：阿叔 咁多 禮 ，奴家 受唔起 啊 。
阿嫂 受 禮 。
奴家 亦 都 聽 人講 ， 話 有 個 打 老虎 嘅 好漢 ， 接 咗 嚟 縣衙門 喇 噉 。
奴家 正話 要 去 睇下 啦 ，點知 去 遲咗 趕唔上 ，冇 見到 ，原來 係 阿叔 你 。
啊 ，阿叔 ，請 上去 樓上 坐 啦 。
噉啊 三個人 一齊 上到去 樓上 ，分 主客席 坐落 。
潘金蓮 望住 武大郎 話 ：
我 陪 阿叔 坐住 先 ，你 去 買啲 酒 買啲 餸 返嚟 款待 阿叔 啦 。
係 咯 ， 係 咯 ， 老二 啊 ， 你 坐下 先吓 ， 我 就 返 嚟 㗎 喇 。
武大郎 歡歡喜喜 落咗 樓 去 。
嗰 個 潘金蓮 望實 武松 ， 見到 武松 一表人才 ， 佢 個 心 就 諗 嘞 ： 武大 同 佢 ， 係 一母 同生 嫡親 兄弟 。
你 睇 佢 生得 幾 咁 高大 ，如果 我 嫁到 個 噉 嘅 老公 呀 ，亦 不枉 我 呢一世人 啊 。
你 睇下 我 嗰個 三寸丁 谷樹皮 吖 ，三分 似 人 七分 似 鬼 ，唉 ，真係 前世 咯 ，點解 我 咁 晦氣 吖 ？
呢個 武松 呀 ，連 大老虎 都 畀 佢 打死 嘅 ，佢 梗係 好好 氣力 定 㗎 喇 。
啊 ，聽講 佢 又 未曾 娶 老婆 嘅 ，點解 唔 叫 佢 搬嚟 我 屋企 住 呢 ？
嗯 ，想唔到 呢段 姻緣 ，喺 呢度 嚟 。
於是 潘金蓮 就 滿面 笑容 噉 問 武松 話 喇 ：
阿叔 ，嚟咗 呢度 幾多 日 啊 ？
嚟咗 十幾日 喇 。
阿叔 喺 邊處 住 啊 ？
求其 喺 縣衙門 裏 便 住 啫 。
阿叔 ，噉唔係 好唔方便 ？
我 一個人 好易 打理 嘅 啫 ，而且 又 有 土兵 服侍 添 。
哎呀 ，嗰啲 人 嚟 服侍 阿叔 喎 ，點 照顧 得 周到 㗎 ？不如 搬 嚟 呢度 ，一齊 住 仲 好 啦 。
嗱 ，咩嘢 時候 要 啖 湯水 飲下 咯 ，奴家 就 親自 煲 畀 阿叔 你 飲 ，唔係 好過 嗰班 粗人 多多聲 。
阿叔 你 就算 喺度 飲啖 清湯 ，都 放心 啲 吖嘛 ，係唔係 吖 ？
多謝 阿嫂 嘞 。
係唔係 阿嬸 喺 第處 住 啊 ？噉 就 請嚟 見下 都 好吖 。
唔係 ，武二 都 未曾 結婚 。
係咩 ？阿叔 青春 多少 啊 ？
虛度 二十五歲 。
啊 ，噉 啊 大過 奴家 三歲 。
阿叔 呢次 喺 邊處 嚟 啊 ？
喺 滄州 住咗 年 幾 。
一直以為 大哥 喺 清河縣 住 ，估唔到 佢 搬咗 嚟 呢處 喎 。
唉 ，阿叔 呀 ，真係 一言難盡 啊 。
自從 嫁咗 畀 你 阿大哥 ，佢 個人 又 係 腍善 過頭 嘅 ，成日 都 畀 人 欺負 。
喺 清河縣 都 住 唔落 ，噉 先至 搬咗嚟 呢度 咋嘛 。
如果 佢 有 阿叔 你 咁 雄壯 呀 ，邊個 敢 嚟 蝦 佢 吖 ？
大哥 素來 都係 好 本分 ，唔似 武二 咁 牛王 。
潘金蓮 笑起上嚟 話 ：阿叔 乜 你 掉轉頭 講 嘅啫 。
開講 都有話 ：人 無 剛骨 ，安身 不牢 吖嘛 。
奴家 鍾 意 爽爽快快 ， 睇 唔 慣 嗰 啲 修修 悠悠 、 立立 懦 懦 嘅 人 嘅 。
不過 大哥 啊 唔會 惹事生非 ，要 阿嫂 你 憂心 。
武松 同 潘金蓮 正 喺度 傾緊 偈 ，武大郎 買 咗 啲 燒酒 、餸菜 返嚟 嘞 。
佢 將 啲 嘢 擠 喺 廚房 就 行 上 樓 嚟 話 ：大嫂 啊 ，你 落去 整 餸 啦 。
潘金蓮 話 喇 ：睇下 你 吖 ，真係 冇 搭煞 嘅 。
阿叔 喺度 坐 吖嘛 ，唔通 叫 我 掉開 佢 落去 咯噃 ？
武松 就 話 ：阿嫂 請 自便 啦 。
潘金蓮 同 武大郎 話 ：
你 去 叫 隔籬 王 契娘 幫 下手 唔係 得 嘞 咩 ，都 唔 會 諗 嘅 。
武大郎 噉 就 真係 去 隔籬 請 阿王婆 幫手 嘞 ，
好快趣 就 整妥晒 喇 ，無非 係 雞 、鵝 、魚肉 、蔬菜 之類 啦 。
捧咗上樓 ，開好枱 ，跟住 就 坐 熱咗啲酒 ，埋位 嘞喎 。
武大郎 叫 個 老婆 坐喺 主位 ，武松 對 席 ，佢 自己 就 坐喺 橫頭 。
三個人 坐定喇 ，大郎 喺 各人 嘅 面前 都 斟 滿 一杯 酒 。
潘金蓮 攞起 杯酒 嚟 話 ：
阿叔 唔好 見怪 噃 ，冇 咩嘢 好嘢 款待 咯 ，求其 請 阿叔 你 飲 杯 酒 啦 。
多謝 阿嫂 ，唔好 噉 講 啊 。
嗰個 武大郎 一味 顧住 坐 熱啲 酒 斟 完 呢個 斟 嗰個 ，第啲 事 佢 就 乜 都 理唔到 嘞 。
潘金蓮 滿面 笑容 ：
阿叔 ，乜啲 魚 同 肉 一件 都 唔食 啊 ？
呢頭 一筷子 就 揀 件 靚 嘅 夾 過去 。
潘金蓮 係 個 妹仔 出身 ， 好識 呢 啲 噉 招呼 人 客 嘅 小意思 嘅 。
大郎 個人 啊 立立懦懦 ，唔會 款待 人 嘅 。
武松 呢 係 個 忠忠直直 嘅 人 ，只係 將 佢 當作 親 阿嫂 噉 嚟 看待 啫 ，就 冇 諗到 佢 咁多 嘢 嘅 。
嗰個 潘金蓮 飲咗 幾杯 酒 ，嗰 雙眼 呀 好似 打雀 噉 一味 望住 武松 。
武松 畀 佢 睇到 唔好意思 嘞 就 耷低 個 頭 ，唔理 佢 。
當時 飲咗 十幾杯 酒 ，武松 就 起身 告辭 。
武大郎 話 ：老二 ，再 飲 幾杯 先至 扯 啦 。
唔飲喇 ，第日 再嚟 探過 你 啦 大哥 。
噉 武大郎 兩 公婆 就 送咗 武松 落 樓 。
潘金蓮 話 喇 ：阿叔 啊 ，你 事 必要 搬嚟 大哥 屋企 住 噃 。
如果 阿叔 你 唔 搬嚟 ，噉 我哋 兩個 都 會 畀 人哋 笑 喇 。
親兄弟噃又唔係第個 。
大哥 ，你 就 執 開 間 房 請 阿叔 嚟 屋企 一齊 住 啦 ，咪 畀 啲 隔籬 鄰舍 講 我哋 閒話 啊 。
啊 ， 你 大嫂 誒 講得 啱 啊 。
誒老二呀 ，你 就 搬嚟住 啦吓 ，等 我 爭返啖氣 都 好吖 。
既然 大哥 同 阿嫂 都 係 噉 講 咯 ，今晚 我 就 攞 啲 行李 搬 嚟 啦 。
係咯係咯 ，阿叔 你 記住 咯喎 ，奴家 喺度 等住 你 㗎 。
嗰個 潘金蓮 呀 真係 情意 殷勤 咯 。
噉啊武松 就 離開咗 紫石街 ，就 一直 返去 縣衙門 喇 。
當時 知縣 正 喺 大堂 辦公 ，武松 就 上前 去 稟告 話 ：
武松 有 個 親 兄 ，喺 家鄉 搬咗 嚟 紫石街 住 。
武松 想 搬 去 佢 屋企 住 ，每 日 就 返嚟 衙門 聽候 差遣 。
唔敢 擅自 搬去 請 恩相鈞旨 啊 。
知縣 就 話 喇 ：
好 ，呢件 係 孝悌 嘅 行為 ，我 點 會 阻止 你 呢 ？
你 搬去 啦 ，啊 ，每日 返嚟 衙門 侍候 就係 喇 。
武松 多謝咗 知縣 ，就 返去 自己 房間 收拾 好 鋪蓋 行李 。
將 嗰啲 新做 嘅 衣服 ，同埋 前 嗰排 賞賜 畀 佢 嘅 物件 包好 ，叫 個 土兵 幫 佢 擔住 ，噉 武松 就 搬 去 佢 大哥 處 。
潘金蓮 見到 武松 真係 搬嚟 喇 ，哎呀 真係 仲 歡喜 過 呀 半夜 執到 金元寶 啊 ，笑到 佢 吖 ，有眉冇眼 。
武大郎 呢 ，就 去 請咗 個 剫木 師傅 返嚟 ，喺 樓上 間 開 間 房 畀 武松 住 ，鎮咗 鋪床 。
裏便 仲 擺咗 一張 枱 、兩張 馬杌 、一個 火爐 。
武松 放好啲 行李 ，打開 鋪蓋 就 吩咐 個 土兵 返去 。
當晚 ，武松 就 喺 紫石街 ，佢 大哥 屋企 住 落喇 。
