魯智深 正 喺 處 舞 嗰 支 禪杖 舞得 興起 。
畀 牆 外 便 有 個 官人 睇見 ，個 官人 就 喝彩 話 ：確係 使得 好 ！
智深 聽見 霎聲 收咗 手 。
一睇 ，只見 喺 埲 圍牆 嘅 缺口 外 便 ，有 個 官人 企 響 處 。
呢個 官人 ，頭戴 一 頂 青紗 揸 角頭巾 ，腦後 髧住 兩個 白玉 圈 連 珠 鬢環 。
身上 着 一件 綠 羅團花 戰袍 ，腰 束 一條 雙搭尾龜背 銀帶 。
腳 穿 一對 黑靴 ，手 上 揸住 一把 西川 折扇 。
呢個 官人 生得 豹頭 環眼 ，燕頷 虎鬚 ，八尺 咁上下 高矮 啦 ，年紀 大概 係 三十四五歲 。
佢 話 ：呢個 師傅 確係 非凡 啊 ，器械 使得 真 好 。
嗰班 地踎 就 話嘞 ：連 呢位 教師爺 都 喝彩 咯 ，師傅 啲 功夫 呀 ，係 使得 㗎 喇 。
智深 就 問 佢哋 話 ，呢個 軍官 係 邊個 啊 ？
呢個 官人 ，係 八十萬 禁軍 槍棒 教頭 林武師 林沖 啊 。
點解 唔 請 入嚟 指教 啊 ？
林教頭 聽 魯智深 噉樣 講 ，就 喺 埲 牆頭 嘅 缺口 跳咗 入嚟 。
兩個人 喺 槐樹 下 便 互相 行過禮 ，一齊 坐低 。
林教頭 就 問嘞 ：師兄 係 邊度 人士 啊 ？法諱 叫做 咩嘢 呢 ？
我就係 關西魯達 ，皆因 殺得人多 ，情願 削法 為 僧 。
我 年輕 嗰陣 曾經 到過 東京 ，認得 令尊 林提轄 啊 。
林沖 聽咗 好 歡喜 啦 ，當堂 就 同 智深 結拜 為 兄弟 。
智深 年紀 啊 大啲 ，做 阿哥 。
佢 問 ：教頭 你 今日 點解 會 嚟 呢處 呢 ？
哈哈哈哈 ，啱先 我 同 拙荊 ，誒咪住 ，林沖 佢 話 同 拙荊 ，即係 同 邊個 啊 ？嘿 拙荊 係 咩嘢 意思 ？
噉嘅 ，舊時 啲 男人 啊 ，為咗 表示 謙虛 ，喺 人哋 面前 稱呼 自己 嘅 妻子 呢 ，就 叫做 拙荊 。
笨拙 個 拙 ，荊棘 個 荊 。
意思呢即係話 ，我哋 屋企 好 清貧 嘅 ，我老婆 梳頭 插 喺 髻 上面 嗰支 釵 啊 ，都 係 用 條 簕枝 嚟 做 個 啫 。
噉就叫做 拙荊 ，有時 呢 ，又或者 叫做 荊妻 ，荊婦 ，山妻 等等 都 係 咁上下 意思 。
林沖 當時 就 話 ：啱先 我 同 拙荊 一齊 嚟 呢處 隔籬 嗰 間 嶽廟 燒香 還願 ，喺 呢處 經過 。
見到 有人 喺度 演武 ，睇得 好 入眼 ，就 叫 個 丫鬟 阿錦兒 陪 荊婦 去 嶽廟 拜神 ，我 就 喺 呢度 等 嘞 ，想唔到 咁啱 遇見 師兄 。
好啊 ，我 初初 嚟到 呢處 ，人地 生疏 ，好彩 得 呢幾個 大哥 日日 嚟 陪 我 。
今日 ，得到 教頭 你 唔 嫌棄 ，同 我 結為 兄弟 ，噉 啊 真係 好 到 極 喇 ！
智深 就 叫 個 道人 再 添 啲 酒 嚟 ，招待 林沖 。
啱啱 先至 話 飲得 三杯 ，就 見 嗰個 丫鬟 錦兒 慌慌張張 ，面 都 紅晒 趯到 嚟 埲牆 嘅 缺口 外 便 ，叫 林沖 話 ：
哎呀 ，官人 啊 ，唔好 坐 喇 ！
娘子 喺 間 廟 處 同 人哋 嘈 起上嚟 啊 ！
喺邊度啊 ？
我哋 啱啱 喺 五嶽樓 落嚟 ，就 撞見 一個 壞蛋 ，將 娘子 攔住 唔 畀 走 啊 。
吓 ？師兄 ，我 走喇 ，唔好 見怪 ，等陣 先至 再嚟 探 你 。
林沖 同 智深 告別咗 ，一步 就 跳過 埲牆 嘅 缺口 同 錦兒 匆匆忙忙 ，一直 走去 嶽廟 咯噃 。
去到 五嶽樓下 便 ，就 見到 有 幾個 人 攞住 彈弓 、吹筒 、粘竿 ，都 企 晒 喺 欄杆 旁邊 。
樓梯 上 便 呢 有 個 後生仔 ，背脊 係 向住 林沖 呢 便 嘅 ，企 喺度 攔住 林沖 個 老婆 。
嗰 後生仔 話 ：嚟啦嚟啦嚟啦 ，你 返 上樓 啦 ，我 有 說話 同 你 講 呢 。
林沖 娘子 啊 又 嬲 又 慌 ，面 都 紅晒 噉 話 ：
清平 世界 ，你 點解 要 調戲 婦女 啊 ？
正 喺 呢 個 時候 ， 林沖 一步 上前 ， 一手 摱 住 嗰 個 後 生仔 嘅 膊 頭 一 擰 ， 將 佢 擰 返 轉 嚟 ， 喝 佢 話 ：
你 調戲 良民 妻子 該當 何罪 啊 ！
說話 一 完 ，拳頭 跟住 就 要 打落去 嘞 。
誒 ，唔打得 ，個 拳頭 打到 半路 即刻 收返住 。
點解啊 ？
林沖 認得 呢個 傢伙 ，原來 係 佢 頂頭上司 高太尉 嘅 養子 高衙內 。
原來啊 ，高俅 就 發咗達 啦嘛 。
佢 又 樣樣 都有 嘞 ，唯獨 係 冇 仔 。
所以呢 ，就 攞咗 佢 阿叔 高三郎 個 仔 嚟 做 養子 喎 。
咦 ，噉 佢 阿叔 個 仔 唔係 佢 嘅 兄弟 嚟 咩 ？點解 過繼 畀 佢 做 仔 都有 嘅 ？嘿嘿 ，就係 有 ，吓 ，噉 先至 夠 混賬 。
高太尉 又 非常 愛惜 呢個 養子 添 喎 。
呢個 傢伙 ，喺 東京城 呀 ，恃住 豪強勢大 ，專門 鐘意 奸淫 別人 嘅 妻女 。
京師啲 人 冇 個 話 唔怕 佢 嘅 ，都 叫 佢 做 花花太歲 。
林沖 將 佢 擰轉過嚟 一 睇 ，見到 原來 係 呢個 高衙內 就 冇 辦法 唔 手軟 啦 。
高衙內 就 口哇哇 喎 佢 話 ：
林沖 ，嘿 關 你 乜嘢 事 啊 ？吖 你 理得 咁多 啊 ？
哈 原來 高衙內 就 唔 認得 呢個 係 林沖 嘅 老婆 。
佢 見到 林沖 唔敢 逳手 唄 ，所以 仲 懶叻 噉 講句 噉嘢 喎 。
高衙內 唔 認得 ，之 跟 高衙內 出嚟 玩 嗰班 幫閒 就 認得 嘞 。
佢哋 怕 激嬲 林沖 真係 打起上嚟 就 唔得掂 嘞 ，所以 一齊 圍埋嚟 勸 林沖 話 ：
誒 教頭 ， 教頭 唔 好 見怪 啊 ， 唔 好 見怪 。
因為 衙內 唔 認得 啊 ， 多多 衝撞 ， 多多 衝撞 咯 。
林沖 真 係 怒氣 難消 啊 ， 但 係 亦 冇 佢 修 啊 ， 只有 瞪 大 雙眼 碌實 高衙內 係 啦 。
嗰班 幫閒 呢頭 勸住 咗 林沖 ，嗰頭 又 氹住 高衙內 行 出 咗 嶽廟 上馬 ，扯 人 喇 快啲 。
林沖 見 高衙內 走咗 ，唉 亦 算嘞 ，帶住 娘子 同 丫鬟 錦兒 ，亦都 要 扯嘞 。
啱啱 轉出咗 走廊 ，只見 魯智深 揸住 支 鐵 禪杖 ，帶住 嗰 二三十 個 破落戶 ，噔噔聲 趕到嚟 廟裏 便 。
林沖 見到 就 嗌佢 話 ：師兄 ，去 邊度 啊 ？
我 嚟 幫 你 手打 吖 嘛 。
嗨 ，原來 嗰個人 係 頂頭上司 高太尉 嘅 衙內 。
佢 唔 識得 荊婦 所以 就 一時 無禮 。
我 本來 係 想 將 嗰個 傢伙 痛打 一餐 㗎 喇 ，又 怕 太尉 嘅 面子 過唔去 。
唉 自古 話 不怕 官 ，只怕 管 。
邊個 叫 我 食 佢 呢份 糧 呢 ？姑且 讓 佢 一趟 係 啦 。
你 就 怕 佢 係 頂頭上司 ，管 到 正啫 ，我 怕 佢 乜嘢 啊 ？
我 如果 撞見 嗰條 衰仔 啊 ，我 實 叫 佢 捱 我 三百 禪杖 至 走 ！
林沖 見 智深 飲醉咗 喇 佢 就 話 ：
師兄 講得啱 ，我 亦 係 一時 畀 人哋 勸住 ，姑且 饒恕 佢 一趟 個啫 。
嗰班 地踎 見到 智深 醉咗 咯 ，就 扶住 佢 話 ：
師父啊 ，我哋 返去 先罷啦 ，明日 再嚟 聚會 過 啦 。
好啦 ！智深 揸住 支 禪杖 ，對 林沖 兩 夫妻 話 ：
阿嫂 ， 唔 好 見怪 啊 。 阿哥 ， 聽日 再會 。
智深 同 嗰 班 地 踎 走 咗 ， 林沖 就 帶 住 娘子 同錦兒 一路 返 屋企 嘞 。
佢 個 心 ，一直 都 鬱鬱不樂 ，翳死嚟 啊 。
而家 再嚟 講下 嗰個 高衙內 。
呢 個 嘢 喺 嶽 廟 遇見 咗 林沖娘子 ， 又 畀 林沖 趕到 嚟 沖 散 咗 之後 ， 個心 啊 入 晒 迷 ， 成個 喪晒 噉 。
返到屋企 ，一味 發吽豆 。
如是者 過咗 兩三日 。
嗰 班 幫閒 就 日日 走 嚟 侍候 ， 見到 衙內 總 係 心情 唔 好 無聊 無賴 嘅 ， 噉 啊 大家 亦 都 散 咯 。
喺 呢班 幫閒 裏頭 ，有 一 個 叫做 乾鳥頭 富安 ，佢 又 摸中咗 高衙內 嘅 心事 喎 。
嗰日 ，佢 一個人 嚟到 太尉府 侍候 ，見到 高衙內 喺 書房 坐 ，就 行埋去 話 ：
嘿嘿衙內啊 ，近日 你 清減咗 喎 ，個心 唔係 點 歡喜 噉 ，梗係 有 件 唔高興 嘅 事 定 喇 。
你 點 知道 㗎 ？
小人 一 估 就 中 。
噉 你 估下 我 個 心 有 咩 嘢 事 唔 高興 吖 ？
我 估呀 ，衙內 你 係 諗住 嗰個 雙木 呢 ，係咪 呢 ？有冇 估中 啊 ？
嘿嘿 ， 嘿嘿嘿 ， 唉 ， 你估 啊 估中 咗 咯 ， 之 冇 辦法 將 佢 得到 手 呢 。
噉啊 有 何 難哉 吖 ？
衙內 ，你 係唔係 怕 林沖 係 條 好漢 ，唔敢 惹 佢 吖 ？
唓 ，衙內 ，唔怕嘅 ，嗱 ，佢 而家 喺 太尉 帳下 當差 ，要 佢 點 就 點㗎嘞 。
佢 敢 得罪 太尉 咩 ？
哼 ，輕嘅 ，刺配咗佢 ，重嘅就攞佢條命 ，係唔係吖 ？
小人 已經 諗好 條 計仔 㗎喇 ，包衙內 你 能夠 將 佢 得到手 。
係咪 真㗎 ？
唉 ，我 都 見過 好多 靚 女人 㗎 ，哈 ，唔知 點解 ，誒 我 就係 鍾意 佢 。
個心 都 迷晒 ，搞到 我 呀 鬱鬱不樂 。
如果 你 有 計仔 能夠 幫 我 得到 佢 ，我 重重 打賞 你 ，點啊 點啊 ，你 講啦 。
衙內 ， 小人 知道 衙內 有個 心腹 ， 陸虞候 陸謙 ， 佢 係 同 林沖 最好 㗎 喇 。
聽日 呢 ，衙內 你 就 去 陸虞候 屋企 嘅 樓上 ，搵 個 地方 匿埋 。
喺 樓上 呢 ，就 擺定 啲 酒菜 喺 度 ，噉 陸謙 就 去 請 林沖 出嚟 飲酒 。
去邊度 飲 啊 ？就 去 樊樓 樓上 搵 個 閣仔 ，就 喺 嗰度 飲得 喇 。
然後 呢 ， 我 就 趯 去 林沖 屋企 ， 報 畀 林沖娘子 聽 ， 話 ：
你 嘅 丈夫 林教頭 ， 同陸謙 飲酒 啊 ， 一時 條氣 頂住 ， 喺 樓上 暈 咗 喇 噉 ， 叫 娘子 你 快 啲 去 喎 ， 噉 啊 將 佢 氹 到 樓上 啦 。
哎啲 女人 呀 ，都 係 水性楊花 咋嘛 ，見到 衙內 你 噉樣 一個 風流 人物 ，一表人才 。
你 再 同佢 講 啲 好說話 ，有 咁 甜 得 咁 甜嘅 ，嘿呀 ，嗰陣 仲 怕 佢 唔肯 咩 ？
嗱， 小人 呢 條計 仔得 唔 得 啊 ？
嘻 ， 嘻 ， 嘻 ， 好計 ， 好計 ！ 誒 喂喂 喂 ， 即刻 叫 人 去 搵 陸虞候 嚟 吩咐 佢 ， 吓 ！
原來 陸虞候 就 住 喺 太尉府 嘅 隔籬 巷 唧 ，所以 一 叫 就 嚟 嘞 。
陸虞候 嚟到 ，聽 高衙內 如此這般噉樣 一 講 ，商量 好 計策 ，又 唔到 佢 唔聽 。
梗係啦 ，只要 小衙內 歡喜咯 ，乜嘢 朋友 交情 都 唔顧得 咁多咯 。
正所謂 落座 須 防 三腳凳 相交 最怕 兩頭蛇 。
交朋友 交着陸 虞候 呢啲 噉嘅 人 呀 真係 攞命 。
噉林沖呢 ，連氣幾日 ，都 喺度 翳翳悶悶 懶得 出街 。
呢一日 ，巳牌時候 ，即係 而家 講 嘅 十點零鐘 啦 ，林沖 就 聽見 門口 有人 嗌話 ：教頭 喺 屋企 嘛 噉 。
林沖 行 出去 睇下 ，原來 係 陸虞侯 。
陸兄 有 咩事 啊 ？
特意嚟 探望 下 兄長 ，點解 咁多日 都 唔見 你 出街 啊 ？
哦 ，個 心 好 悶 ，所以 冇 出去 啫 。
噉呀 ，我 同 兄長 出去 飲 返 幾 杯 解 下 悶 呢 。
噉 坐 一陣 飲 杯 茶 先 啦 。
兩個人 飲咗 茶 就 出門 嘞 。
陸虞候 話 ：阿嫂啊 ，我 同 兄長 返去 我 屋企 飲 幾杯 啊 。
林沖 娘子 聽見 就 行到 門簾 後 便 話 ：大哥 ，唔好 飲 咁多 ，早啲 返嚟 至好 啊 。
林沖 同 陸謙 出咗嚟 ，行咗 一 輪 街 ，陸虞候 就 話 喇 ：
兄長 呀 ，唔好 去 我 屋企 咯 ，不如 就 喺 樊樓 飲 兩 杯 罷 啦 。
噉隨便啦 。
呢 間 樊樓 係 當時 東京 城內 一間 好 出名 嘅 酒樓 ， 好 架勢 嘅 。
兩個人 就 去到 樊樓 ，搵到 個 房間 坐落 ，嗌 個 酒保 嚟 ，叫 佢 攞 兩 樽 上等 好酒 ，攞啲 靚 點心 嚟 送 酒 。
兩個人 一便 飲 一便 喺度 傾閒偈 ，傾傾下 ，林沖 忽然 歎咗 一口氣 。
陸虞候 就 問 佢 喇 ：咦 ？兄長 為 咩嘢 歎氣 啊 ？
唉 ，賢弟 你 有所不知 。
男人 大丈夫 ，空有 一身 本事 ，遇唔到 個 名主 ，畀 啲 小人 騎住 喺 個 頭 嚟 ，受埋 啲 污糟邋遢 氣 ！
哎吖 而家 喺 禁軍 裏 便 ，雖然 係 有 幾個 教頭 啫 ，之 有 邊個 及得 兄長 你 嘅 本事 啊 ？
太尉 待 你 又 好 ，受 邊 嘅 氣 啊 又 ？
於是 林沖 就 一五一十 ，將 前幾日 高衙內 嘅 事 講咗 畀 陸虞候 聽 。
陸虞候 就 話 ：衙內 梗係 唔識得 阿嫂 啫 ，兄長 唔好 嬲 ，吓 ，唔使 嬲 ，飲酒啦 。
林沖 飲咗 八九 杯 酒 ，就 想 去 小便 ，就 落咗 樓 ，出咗 酒館 行 去 條 巷仔 。
小完便行返出條巷仔 ，一出巷口唧 ，就撞見 錦兒 。
錦兒話 ：官人 啊 ，真係 搵死 我 嚟 啊 ，原來 你 喺 呢處 。
咩事啊錦兒 ？
官人 你 同 陸虞候 出咗 街 ，唔到 半個時辰 ，就 有 個 男人 ，急急忙忙 趯嚟 屋企 講畀 娘子 聽 ，話 佢 係 陸虞候 隔籬 屋 嘅 噉 。
話 教頭 同 陸謙 飲酒 ，飲飲下 ，教頭 條氣 一下 頂住 暈咗 ，叫 娘子 快啲 去 睇下 喎 。
娘子 聽咗 ，即刻 去 請 隔籬 阿王婆 ，看住 屋 ，就 同埋 我 跟 嗰個 男人 去 啦 。
一路 去到 太尉府 前面 條 巷 裏 便 一家 人家 。
上到 樓上 ，見到 喺 張 枱 處 擺住 啲 酒菜 ，之 又 唔 見 官人 你 噃 。
啱啱 想 返 落 樓 啦 ，點 知道 有 個 人 行 出嚟 ，你 估 係 邊個 啊 ？
原來 就係 前幾日 ，喺 嶽廟 調戲 娘子 嗰個 後生仔 啊 。
佢 話 ：娘子 坐下 先 啦 ，你 丈夫 就嚟 㗎 喇噉 。
慌到 我 死咁滯 ，我 落得 樓 嚟 ，就 聽見 娘子 樓上 嗌話 ，殺人 喇 殺人 喇 噉 。
我 一路 咁 搵 官人 都 搵唔到 。
收尾 撞到 賣藥 嗰個 張 先生 ，話 佢 行過 樊樓 ，見 教頭 同 一個 人 入咗去 飲酒 噃噉 ，所以 我 即刻 趯嚟 呢度 搵 你 啫 。
官人啊 ，你 快啲 去啦 。
林沖 聽咗 ，嚇咗一驚 ，佢 唔理 錦兒 咯 ，三步 夾埋 兩步 就 走到 陸虞候 屋企 ，叮叮噔噔 上咗 樓 。
之上面 道 樓門 戌 實 咗 ，聽見 娘子 喺 裏 便 嗌話 ：清平 世界 ，為咩 將 我 一個 良家 妻子 韞 喺 呢處 啊 ？
又聽見 高衙內 話 喇 ：娘子 ，唔該 你 可憐 下 我 ，救 下 我 啦 。
你就算係鐵石心腸 ，都應該 回心轉意 嘞啩吓 ？
林沖 企 喺 樓梯度 大聲 咁 叫 ：大嫂 開門 ！大嫂 開門 ！
林沖 娘子 聽出 係 自己 丈夫 把 聲 ，即刻 就 走嚟 開門 。
高衙內 就 吃咗 一驚咯 ，弊 ，林沖 嚟喇 ，手揗腳震 就 推開 道窗門 跳 牆 鬆 人 喇 。
林沖 上到 樓 ，搵唔到 高衙內 就 問 娘子 話 ：冇 畀 個 傢伙 玷污 吖 嘛 ？
冇 。
林沖 嬲 到 不得了 ，乒乒乓乓 ，將 陸虞候 間 屋 裏 便 啲 嘢 打到 粉碎 。
林沖 扶住 娘子 落 咗 樓 ， 出 到 門外 睇 下 ， 嘿 呀 ， 啲 隔籬 鄰舍 呀 ， 家家 都 閂 埋門 ， 唔 敢 出 嚟 。
呢個 時候 ，錦兒 趕到嚟喇 ，三個人 一齊 返 屋企 。
送咗 娘子 返 屋企 ，林沖 就 攞住 一把 匕首 ，趕返去 樊樓 去 搵 陸虞候 ，吖 亦 唔見 人 。
豈有此理 ，好 ！走佢 屋企 門口 等 。
足足 等咗 一晚 ，吖 仲 唔見 返嚟 ，噉 林沖 就 只有 返 屋企 係 啦 。
娘子 就 勸 佢 話 ：我 又 冇 畀 佢哋 呃咗 去 ，你 唔好 亂嚟 啊 。
我 真係 唔 抵得 陸謙 呢個 畜生 ！
我 同 你 好似 兄弟 一樣 ，你 都 嚟 呃 我 ？
哼 ！至怕 唔撞見 你 個 高衙內 ，你 因住嚟 啦 ！
娘子 就 苦苦噉 勸佢 ，唔肯 畀佢 出家門口 。
陸虞候 呢 ，一味 匿 喺 太尉府 裏頭 亦 唔 敢 返 屋企 。
林沖 連氣 等咗 佢 三日 ，都 見 佢 唔到 。
太尉府 附近 嗰啲 人 見 林沖 嘅 面色 嘩嗨 乜噉 嘅 喂 ，之 冇 人 敢 問 佢 。
第四日 ，食飯 嘅 時候 ，魯智深 就 直情 嚟到 林沖 屋企 探 佢 。
教頭 ，點解 咁多日 唔見 你面 啊 ？
呢幾日 ，小弟 有 啲 事 唔得閒 ，冇 去 探望 師兄 。
今日 得 師兄 嚟 到 寒舍 ， 本應同 師兄 飲返 幾杯 ， 無奈 一時之間 準備 唔 切 。
噉啦 ，不如 同 師兄 一齊 出街 玩下 ，喺 外 便 飲 兩杯 啊 。
最好啦 。
噉 兩個人 就 出街 飲咗 一日 酒 ，又 約定 聽日 相會 。
從此呢 ，日日 都 同 智深 出街 飲酒 ，漸漸 就 將 呢件事 放低咗 。
而家 返轉頭 講下 嗰個 高衙內 。
自從 嗰日 喺 陸虞候 屋企 樓上 嚇咗 佢 一驚 ，跳牆 走人 ，佢 唔敢 講 畀 太尉 知 ，就 日日 瞓 喺 鋪床處 病咗 喎 。
陸虞候 同 富安 兩個 嘢 走嚟 探 佢 ，見到 佢 面色 唔好 ，精神 憔悴 。
陸謙 就 話 喇 ：衙內 為 咩 事 精神 咁 差 啊 ？
唉 ，我 老實 同 你哋 講 啦 ，我 就係 為咗 林沖 老婆 ，兩次 都 唔能夠 得手 ，又 畀 林沖 嚇 咗 一 驚 ，我 啲 病 就 越嚟越 重 喇 。
眼睇住 三頭 兩個月 ，我 條命 都 難保 咯 。
衙內 你 寬心 啦 ，呢件事 ，包 喺 小人 兩個 身上 。
無論如何 ，包衙內 你 得到 嗰個 女人 係啦 ，除非 佢 吊頸死咗 就 難講唧 。
正 喺 度 傾 緊 ， 太尉府 裏頭 嗰 個 老 都 管 嚟 探病 。
陸虞候 同 富安 就 商量 ， 一 於 係 噉 噉 噉 噉 噉 噉 啦 噉 。
就 等 老 都 管探 完病 出 嚟 ， 兩個 嘢 就 掹 咗 老 都 管 行 埋 一 便 就 對 佢 話 ：
如果 想 衙內 病好 ，除非 就 講畀 太尉 知 ，害咗 林沖 條命 ，噉 先至 搞得到 佢 個 老婆 同 衙內 住埋 一齊 。
做得到呢 ，衙內 就 冇 病 㗎喇 ，如果 唔係噉呀 ，衙內 就 實 冇 命 㗎 。
老都管話 ：呢層就容易啦 ，等今晚 ，老漢就稟畀太尉知啦 。
好 ，我哋 已經 諗好 條 計仔 㗎喇 ，就 等 你 消息 喇 。
得啦 ，得啦 。
到 晚頭 黑 ，老 都 管 就 走嚟 見 太尉 嘞 喎 ，佢 話 ：
太尉呀 ，你 估 衙內 係 咩嘢 病 呢 ，係 為 林沖 個 老婆 病 啊 。
佢 幾時 見過 林沖 個 老婆 啊 ？
呢 ，就係 上個月 廿八 吖嘛 ，喺 嶽廟 見過 佢 ，到 而家 都 個 幾 月 咯 。
跟住 ，老都管 又 將 陸虞候 諗 嗰 條 計仔 詳詳細細 呀 稟畀 太尉 聽 。
高俅 聽咗 就 話 ：嗯 ，為咗 佢 嘅 老婆 ，就 噉樣 害 佢 法 ？
嗯？ 唉 ，不過 講 又 講 嘞 ，如果 為咗 可惜 林沖 一個人 就 會 送 咗 我 個 仔 條 命 㗎 嘞 噃 ，哎呀 ，噉 點 好 呢 ？
老都管 又 話 ：唔使 擔心 ，陸虞候 同 富安 ，已經 諗到 個 好 辦法 㗎 。
係咩 ？快啲 叫 佢哋 兩個人 嚟 商量 下 。
老 都 管 就 即刻 叫 陸謙 、富安 入嚟 ，行過 禮 之後 ，高俅 就 問 佢哋 ：我 小 衙內 嘅 事 ，你哋 有 咩 嘢 好 辦法 啊 ？
如果 救得返 我 個仔 我 自然 會 抬舉 你哋 兩個 嘅 。
陸虞候 就 上前 稟告 話 ：
恩相 ，嗱， 噉 噉 噉 噉 噉 噉 噉 ， 就 得 啦 嘛 。
高俅 一聽 就 喝彩 話 ：好計 ！你 兩個 聽日 就 同 我 進行 啦 。
好喇 ，呢處 就 唔 講 佢 住 。
而家 再 講 下 林沖 啊 ，佢 日日 都 同 魯智深 去 飲酒 ，嗰件事 呢 ，就 慢慢 冇 記 喺 心上 咯噃 。
有一日 ，佢哋 兩個 一齊 行到去 閱武坊 巷口 。
見到 有 一條 大漢 ，頭戴 一頂 揸角頭巾 ，身穿 一件 舊 戰袍 ，隻手 就 揸住 一把 寶刀 插住 個 草標 。
呢個 大漢 企 喺 街處 ，個口 啊 自言自語 噉 話 ：
遇唔到 個 識貨 㗎 ，埋沒咗 我 呢把 寶刀 咯 。
林沖 顧住 同 魯智深 一便 行 一便 傾偈 就 冇 理 嗰個 人 。
嗰個人 跟住 喺 後便 嚟 話 喇 ：把 寶刀 真係 靚 ，可惜 遇唔到 識貨 個 啫 ，唉 。
林沖 同 智深 一路 行 傾 得 好啱 橋 。
嗰個人 又 喺 後便 講 ：咁 大 一個 東京城 ，冇 一個 識得 軍器 。
呢次 林沖 聽到 嘞 ，佢 擰轉 頭 望下 。
嗰條大漢 ，瀡聲 將 把 刀 拔咗出嚟 ，閃閃亮 噉 極之 搶眼 。
林沖 啊 真係 該當 有事 ，佢 突然間 問 ：畀 我 睇下 。
嗰個人 遞 咗 把 刀 畀 佢 ，林沖 接過 喺 手 嚟 同 智深 睇下 。
呢把刀呀 ，清光閃閃 非常 搶眼 ，好似 有 一浸 冷氣 撲過嚟 噉嘅 。
林沖 見到 讚咗聲 ：好刀啊 ！
你 要 賣 幾多 錢 ？
開口 三千 貫 ，實價 二千 貫 啦 。
值就值二千貫嘅 ，只係 難搵 個 買主 啊 。
如果 你 一千貫 肯 賣 ，我 就 買咗 佢 啦 。
我 急 住 聽 錢 使 ， 你 如果 真 係 買 ， 噉 啊 一千五百 貫啦 。
一千貫 我 就 買 。
唉 ，黃金 當做 生鐵 賣 係啦 ，好啦好啦 ，你 一文錢 都 唔好 少 我 㗎 吓 。
你 跟 我 返 屋企 攞 錢 畀 你 。
林沖 又 對 智深 話 ：
師兄 ，你 喺 茶館 坐 一陣 等 我 呢 ，小弟 就 嚟 㗎 喇 。
唔喇 ，我 返去 先 ，聽日 再見 啦 。
於是 林沖 就 同 智深 分別 咗 ，帶 賣刀 嗰個 漢子 返 屋企 攞 咗 錢 畀 佢 。
林沖 問 佢 話 ：你 呢把刀 ，係 喺 邊處 嚟 㗎 ？
係 祖先 傳落 嘅 ，因為 家 窮 ，冇 辦法 啦 ，噉 先至 攞出嚟 賣 㗎 啫 。
你 祖先 係 邊個 ？
如果 講出嚟 ，就 醜 死人 咯 。
林沖 見 佢 噉 講 ，亦 唔 再 問 佢 嘞 。
嗰條 大漢 攞咗 錢 就 扯嘞 。
林沖 將 呢 把 刀 ，翻來覆去 噉 睇咗 一 輪 。
佢 喝彩 話 ：真係 把 好刀 啊 ！
高太尉 有 一把 寶刀 ，唔肯 隨便 畀人 睇 嘅 ，我 幾次 想 借嚟 睇下 都 唔肯 攞出嚟 。
好 ，今日 我 亦 買到 呢一把 好刀 ，第日 同佢 比下 至 得 。
當晚 ，林沖 唔離手 噉 足足 睇咗 把刀 成晚 ，瞓覺 嘅 時候 就 掛 喺 牆 上 便 。
第二日 個 天 都 未 光唧 ，又 去 攞 把 刀 嚟 睇 嘞 。
到咗 巳牌 即係 十點 零鐘 嘅 時候 ，聽見 有 個人 喺 門口 嗌 ：
林教頭啊 ，太尉 有令 ，話 你 買到 一把 好刀 ，叫 你 攞去 比較一下 ，太尉 喺 府裏 便 等 你 啊 。
林沖 就 話 喇 ：哈 ，又 有 邊個 咁多嘴 去 報畀 太尉 知 呢 ？
嚟嗌 林沖 嗰 兩個 承局 ，催住 林沖 着 好 衣服 ，攞咗 嗰 把 刀 ，就 帶 林沖 去 嘞 喎 。
林沖 對 嗰 兩個 人 話 ：我 喺 府 裏 便 都 未 見過 你哋 嘅 。
係啊 ，小人 係 新嚟 嘅 。
冇幾耐 ，就嚟到 太尉府 入咗去 。
行到 間 大廳 前 便 ，林沖 就 企定 唔 行 。
嗰 兩個 人 話 ：太尉 喺 裏 便 後堂 坐 啊 ，入去 啦 。
又 帶住 林沖 轉過 屏風 行入去 後堂 ，又 唔見 太尉 喺度 。
林沖 又 停住 腳 。
兩個人 又 話 ：太尉 喺 裏 便 等 你 ，叫 我哋 帶 教頭 你 入嚟 㗎 。
於是 又 過咗 兩三 重門 ，嚟到 一處 地方 ，一迾 都 圍住 綠色 欄杆 。
呢 兩個 人 將 林沖 帶到 堂前 話 ：
教頭 ，你 喺度 等 一陣 ，等 我哋 入去 稟告 畀 太尉 知吓 。
講完 ，就 入咗 去 裏面 嘞 。
