魯智深 喺 赤松林 ，遇到 一個人 要 打 佢 腳骨 。
噉 兩個人 就 打起上嚟 啦 。
打咗一陣 ，嗰個人 見 魯智深 把聲 好 熟 ，就 問 佢 嘅 姓名 咯喎 。
魯智深 噏出 咗 自己 個 名 。
嗰個人 掉咗 把刀 ，跪低 就 拜 ，佢 話 ：仲 認唔認得 史進 啊 ？
哎呀 ！原來 係 史大郎 啊 ！
兩個人 互相 行咗 禮 ，就 一齊 入去 松林 裏 便 坐落 傾偈 。
史大郎 ，自從 喺 渭州 分別 之後 ，你 喺 邊度 嚟 啊 ？
自從 嗰日 ，喺 酒樓 出便 同 阿哥 你 分別咗 ，第二日 ，聽見 話 阿哥 你 打死咗 鄭屠 ，逃走咗 喇噉 。
又 有 啲 緝捕人員 ，查出 係 我 同 阿哥 你 一齊 畀 銀 過 金老 回鄉 嘅 。
因此 ，小弟 亦都 離開 渭州 去 搵 師父 王進 。
點知 我 一直 去到 延州 ，又 搵 師父 唔到 ，我 就 返去 北京 啦 。
誒各位 ，呢處 要 說明 一下 。
史進 講 嘅 北京 呀 ，乃 係 宋朝 嘅 北京 唔係 今日 嘅 北京 嚟 噃 。
宋朝 嘅 北京 誒 即係 今日 河北省 嘅 大名縣 。
史進話 ：我 返去 北京 住咗 一排 ，使晒咗 啲 錢 ，所以 就 走嚟 呢度 搵 啲 旅費 啦 ，哈冇 想到 遇見 阿哥 你 。
係咯阿哥 ，為咩 你 做咗 和尚 啊 ？
魯智深 就 將 自己 嘅 經過 從頭到尾 講咗 一次 ，一路 講到 因為 肚餓 ，唔夠 嗰 兩個 人 打 。
史進 就 話 喇 ：阿哥 你 既然 肚餓 ，小弟 呢處 有 乾肉燒餅 喎 ，食啲 頂住 下肚 先 呢喇 。
講完 ，史進 就 攞 啲 燒餅 出嚟 畀 魯智深 食 。
佢 又 話 ：阿哥 ，你 嘅 包裹 仲 賴 低 喺 間 寺 裏 便 吖 嘛 ，我 幫 你 去 攞 。
佢哋 如果 唔 畀 索性 殺咗 佢哋 兩個 ！
冇錯喇 ！
兩個人 食飽咗 燒餅 ，各自 攞起 架 生 一齊 返去 瓦罐寺 。
去到 瓦罐寺 前面 ，見到 崔道成 同 丘小乙 兩個 嘢 ，仲 喺 橋 嗰度 坐 喎 。
魯智深 大喝 一聲 話 ：你 兩個 嘢 ，嚟啦嚟啦嚟啦 ，呢次 同 你 鬥 個 你死我活 ！
嗰個 和尚 笑住 話 ：嘿嘿嘿 ，你 係 我 嘅 手下 敗將 ，乜 仲 敢 走嚟 同 我 打 咩 ？
魯智深 嬲 ，舞起 支 禪杖 就 走上 道橋 咯噃 。
嗰個 生鐵佛崔道成 亦都 火滾喇 ，揸住 把 朴刀 ，喺 橋 上面 殺落嚟 。
魯智深 一 來 有 史進 喺度 ，個 膽 就 壯得多 啦 ；
二來 係 食飽咗 咯 ，精神 同 氣力 都 係 越 打 越 好 嘅 。
兩個人 鬥到 八九個 回合 ，崔道成 就 漸漸 頂唔順 嘞 ，想 走人 咯 喎 。
嗰個 飛天夜叉 丘道人 ，睇見 和尚 打輸 唄 ，就 揸住 把 朴刀 過嚟 幫手 啦 。
呢便史進見到 ，就喺樹林裏便跳出嚟 大喝一聲話 ：都唔好走 ！舞住把朴刀 就嚟戰 丘小乙嘞 。
四個人 分 做 兩對 廝殺 。
魯智深 同 崔道成 打打下 ，睇到 一個 破綻 ，就 大喝 一聲 ：着 ！
一禪杖湴過去 ，將生鐵佛呀成個打咗落道橋下便 。
嗰個 道人 見到 和尚 畀 人 打低 咗 ，無心 戀戰 喇 ，賣 個 破綻 就 想 走 咯 喎 。
史進 喝 一聲 ：想 去 邊 啊 你 ！趕上去 對準 佢 背 枚 一刀 ，噼啪 一聲 ，道人 即刻 僂低 咗 。
史進 上前一步 ，用 把刀 對 實佢 一味 咁 插 。
魯智深 就 趕 落去 橋底 ，喺 崔道成 嘅 背脊 一 禪杖 毆 落去 ，兩個 賊佬 噉 就 呼呼 哀哉 喇 。
魯智深 同 史進 ，將 丘小乙 、崔道成 兩個 屍首 綁埋 一齊 就 掉咗 落 山坑 。
然後呢 ，佢哋 走入 間 寺 裏 便 。
廚房 嗰 幾個 老和尚 呢 ，為因 睇見 魯智深 先頭 打 輸咗 趯更 喇 ，又 怕 崔道成 、丘小乙 返嚟 殺 佢哋 ，就 已經 吊頸 死咗 。
魯智深 同 史進 就 一直 入到 方丈 後 便 嗰度 睇下 ，哈 ，嗰個 擄 返嚟 嘅 女人 ，亦都 已經 投井 自盡 嘞 。
佢哋 一直 搵到 裏便 八九 間 屋仔 ，打開 道房 入去 睇下 ，一個 人 都 冇 。
魯智深 嗰個 包裹 呢 就 已經 攞咗嚟 呢度 咯 喎 ，之 未曾 打開 。
魯智深 就 攞返 個 包裹 ，又 照 原樣 孭返 好 。
再入去裏便搵下 ，見到床上便有三四包嘢 。
史進 打開 嚟 一 睇 ， 原來 都 係 啲 衣服 ， 仲 包住 啲 金銀 添 嘅 ， 就 揀 啲 好 嘅 嚟 包 咗 一 包袱 ， 孭 喺 個 身上 。
搵到 去 廚房 ，見到 有 酒 有 肉 ，啱晒 喇 ，兩個 又 食 一 餐 ，食到 飽 一 飽 。
然後 呢 ，攞 啲 草 扎 咗 兩個 火把 ， 喺 火爐 上面 點燃 咗 ，攞 嚟 燒着 後 便 嘅 屋 仔 先 就 一路 燒到 去 門前 。
跟住 ，再 扎 幾個 火把 ，走去 佛殿 後 便 嘅 屋簷 ，點火 燒着 佢 。
咁啱 呢個 時候 風 猛 啊 ，風助火威 ，烚烚聲 ，一下 就 燒到 通晒 頂 。
魯智深 同 史進 睇住 ，等 咗 一陣 ，見 四面 都 燒到 含含聲 喇 就 話 ：呢處 唔係 久留 之地 啊 ，走罷 啦 。
兩個人 急急 腳噉 行咗 一晚 ，到 第日 個天 蒙蒙光 嘅 時候 ，遠遠 就 望見 一寨 房屋 ，睇嚟 係 個 村鎮 。
佢哋 兩個 就 行過去 搵 地方 歇腳 啦 。
行到 一條 獨木橋 嘅 旁邊 ，見到 有 一間 酒店 。
佢哋 行 入去 ，一便 飲酒 一便 叫 酒保 買 啲 肉 ，借 啲 米 啊 透火 煮飯 。
兩個人 你 一杯 我 一盞 噉 飲酒 ，互相 講下 自己 經過 個 事情 。
飲完酒 食完飯 喇 ，魯智深 就 問 史進 話 ：你 而家 想 去 邊度 啊 ？
我 而家 只有 再 返去 少華山 先 ，去 投奔 朱武 佢哋 三個人 ，入埋 佢哋 夥 ，過 一段 時候 先至 再 算 啦 。
你噉樣 亦 好嘅 。
魯智深 就 解開 個 包裹 ，攞出 一啲 金銀 嚟 送畀 史進 。
兩個人 綁返 好 包裹 ，攞起 架 生 ，畀咗 酒飯 錢 就 行出 間 酒店 。
離開 咗 村鎮 大約 行 咗 六七里 路 啦 ， 就 嚟 到 三叉路口 ， 魯智深 話 ：
我要 去 東京 ，你 唔好 送 。
你 去 華州 就 由 呢條 路 去 ，第日 我哋 有 機會 再 相見 。
如果 有 便人 ，就 帶 個 信 嚟 啦 。
史進 拜辭咗 魯智深 ，就 各行各路 起程 。
而家 只係 講下 魯智深 去 東京 。
魯智深 又行 咗 八九日 ， 就 嚟 到 東京 嘞 。
東京 呢個 地方 呀 ，哎呀 千門萬戶 啊 三市 六街 ，非常 繁華 熱鬧 。
智 深入到 城 ，唔敢 魯莽 喇 呢趟 ，好 有禮 噉 ，問 人哋 大相國寺 喺 邊度 。
啲人 就 話 佢 聽 ：呢 ，前面 橋腳 就係 喇噉 。
行咗冇耐 ，就嚟到 大相國寺 ，呢間寺啊 好大 ，好威 。
智 深入到去 ，喺 東西廊 下 睇咗 一下 ，就 直接 去 知客寮 嘞 。
個道人 見到 有 個 噉嘅 和尚 嚟 唄 ，就 去 報畀 知客 聽 啦 。
冇幾耐 ，知客僧 出嚟 ，睇見 智深 個樣 生得 咁 兇猛 ，揸住 支 鐵 禪杖 掛住 把 戒刀 ，孭住 個 大包裹 就 已經 有 五分 怕咗 佢 先 啦 。
誒 師兄 喺 邊度 嚟 啊 ？
智深 放落 包裹 、禪杖 就 同 知客僧 互相 打個 問訊 ，佢 回答 話 ：
小徒 ，喺 五台山 嚟 ，本師 真 長老 有 封 信 ，叫 小僧 嚟 投奔 呢處 清 大師 長老 ，搵 個 職事 僧 做 喎 。
哦 ，既然 係 真 大師 長老 有 信 嚟 ，請 一齊 去 方丈 啦 。
噉知客 帶 智深 一直 去到 方丈 。
去到嘞 ，智深 解開 個 包裹 ，攞 封 信 出嚟 揸住 喺 手 。
知客僧 見到 噉樣 就 提醒 佢 話 ：師兄 呀 ，乜 你 都 唔識 規矩 嘅 。
等陣 長老 出嚟 ，你 要 解低 把 戒刀 ，仲要 攞 嗰 七條 坐具 同埋 信香 出嚟 ，禮拜 長老 噉 至 啱 㗎 。
哦哦哦 ，誒 ，你 又 唔早啲 講 呢 ？
智深 即刻 解低 把 戒刀 ，打開 包裹 ，攞咗 一炷香 ，七條 坐具 出嚟 。
之佢揦手唔成勢又唔知點做至啱喎 。
知客僧 見 佢 噉樣 ，知道 佢 都係 唔在行 㗎喇 ，就 幫 佢 褸 好 件 袈裟 ，然後 又 教 佢 鋪 好 啲 坐具 先 。
過咗一陣 ，智清禪師 出嚟 嘞 。
知客 上前 稟告 佢 聽話 ：長老 ，呢個 僧人 係 喺 五台山 嚟 嘅 ，帶咗 真禪師 一封 信 嚟 啊 。
啊 ，師兄 好耐 都 未曾 有 信 嚟 喇 。
知客就叫智深話 ：師兄呀 ，快啲過嚟 禮拜 長老喇 。
智深 即刻 將 嗰 炷香 插 喺 香爐 上 便 ，拜咗 三拜 ，然後 將 封信 呈畀 長老 。
清長老 拆開 封信 嚟 睇 ，信裏 便 ，詳詳細細 噉 講清楚 ，魯智深 出家 個 原因 ，並且 亦 講明 為乜嘢 叫佢 下山 嚟 投奔 大相國寺 。
信裏便仲講 ：萬望 慈悲 收錄 ，做個 職事人員 ，切不可 推顧 。
此僧 ，久後 必當 證果 等等 。
清長老 睇完 信 ，就 叫 智深 去 僧堂 唞下 食齋飯 先 。
智深 多謝 過 長老 ，就 執拾 好 坐具 七 條 ，挽住 個 包裹 攞起 禪杖 戒刀 ，跟住 個 行童 去 僧堂 嘞 。
清長老 等 智深 去咗 ，就 叫 齊啲 職事 僧人 嚟 方丈 商量 咯 喎 。
佢 話 喇 ：你哋 都 喺 齊度 咯 ，你哋 睇下 ，我 師兄 智真 禪師 真係 冇 譜 㗎 咯 。
先頭 嚟 嘅 呢個 僧人 ，本來 係 經略府 軍官 嚟嘅 ，為因 打死咗 人 就 落發 為 僧 。
點知 喺 佢 嗰處 ，兩次 大鬧 僧堂 搞到 佢 唔知 幾 難做 。
唉 ，你 嗰處 收留 佢 唔落 ，就 㧬嚟 我 呢度 喎 。
如果 唔 收留 佢 師兄 又 噉樣 千囑咐萬囑咐 ，推 咗 佢 又 唔好 。
之 如果 留 佢 喺 度 ， 唉 一 啲 都 唔 似個 出家人 嘅 樣 嘅 ， 我 哋 呢 處點 用得着 佢 㗎 ？
都寺 有 計喇 ，佢 話 ：
有喇有喇 ，長老呀 ，酸棗 門外 間 舊 公署 後 便 嗰個 菜園 啊 ，周時 都 畀 軍營 嗰啲 兵 同埋 附近 嗰 廿 幾 個 地 踎 無賴 糟蹋 嘅 ，佢哋 喺 嗰度 放 羊 放 馬 ，好 囉嗦 嘅 。
我哋 只係 派咗 個 老和尚 喺 嗰度 住持 ，邊度 敢 管 佢哋 㗎 ？
不如 叫 智深 去 嗰度 住持 ，睇嚟 ，佢 係 敢 管 㗎 噃 。
嗯 ， 嗯 ， 都 寺 講得 啱 啊 。
清長老 就 叫 侍者 去 僧堂 ，等 智深 食完 齋飯 呢 就 叫 佢 嚟 。
過咗 一陣間 ，嚟喇 。
清長老 就 話 ：既然 我 師兄 真 大師 ，介紹 你 嚟 我 呢間 寺 處 掛單 暫時 住落 ，做 個 職事 人員 。
噉好 ，我哋 間 寺 有 一個 大 菜園 ，就 喺 酸棗 門 外 嶽廟 隔籬 嘅 ，你 又 去 嗰度 住持 管理 啦 。
誒 每日 叫 種菜啲 人 ，交 十擔 菜 ，有 多嘅 ，你 就 愛嚟 做 使用 啦 。
長老 呀 ， 我 師父 叫小僧 嚟 呢 處 搵 個 職事 僧 做 ， 噉 都 唔 叫 我 做 個 都 寺 啊 監寺 啊 噉 ， 噉 點解 要 我 去 管 菜園 嘅 ？
首座 就 同 佢 話 喇 ： 師兄 ， 你 都 唔 知道 ， 你 係 新 新 嚟 掛單 暫住 ， 又 未曾 有過 啲 乜嘢 功勞 ， 噉 一下 點做 得 都 寺 嘅 呢 ？
誒其實 ，管菜園 亦都 係 個 大 嘅 職事人員 嚟 㗎 喇 。
嗯 ，我 唔 去 管 菜園 ，我 淨係 要 做 都寺 、監寺 㗎啫 。
知客就講畀佢聽 ：你聽我同你講吖 ，喺 僧門 裏 便 嘅 職事人員 各有各嘅 等級 ，管嘅事 亦都 各有不同嘅 。
比如 小僧 我 啦 ，做個 知客 ，噉 我 掌管 嘅 就 只係 款待 啲 來往 嘅 客官 僧眾 咯 。
至於 維那 、侍者 、書記 、首座 ，呢啲 都 係 清職 ，唔 容易 得嚟 做 嘅 。
噉 都 寺 啊 、 監寺 啊 、 仲有 提點 啊 、 院主 啊 ， 呢 啲 都 係 掌管 寺裏 便 嘅 財物 嘅 。
你 而家 啱啱 先至 嚟到 ，點 會話 即刻 就 得到 呢啲 上等 職務 嘅 呢 ？
誒 ， 仲 有 嗰 啲 管 藏 嘅 ， 叫做 藏主 ； 管 殿 嘅 ， 叫做 殿主 ； 管 閣 嘅 ， 叫做 閣主 ； 管 化緣 嘅 ， 叫做 化主 ； 管 浴堂 叫做 浴主 。
嗱 ，呢啲 都係 主事人員 ，中等 職務 。
仲 有 嗰 啲 管 塔 嘅 塔 頭 ； 管 飯 嘅 飯 頭 ； 管茶 嘅 茶 頭 ； 管 廁所 嘅 淨 頭 ；
同埋 呢個 管菜園 嘅 菜頭 等等 ，呢啲 都係 頭事人員 ，屬於 末等 職務 。
如果 師兄 你 管 菜園 ，管咗 一年 管得 好 ，就 升 你 做 個 塔頭 ；
又 管咗 一年 管得 好 ，升 你 做 個 浴主 ；
又一年 管得好咯 ，噉先至 做得 監寺㗎 。
啊 ，係噉㗎 。
誒既然 亦有 出頭 日子 ，我 聽日 去 就係 啦 。
清長老 見 智深 肯 去嘞 ，就 留佢 喺 方丈處 休息 。
當日 就 議定咗 職務 ，跟手 寫咗 一 張 榜文 ，叫 人 攞 去 菜園 嗰 間 舊 官署 度 掛起 先 ，聽日 就 辦理 交割 手續 。
辦齊 呢啲 事 大家 就 散 。
第日 朝頭早 ，清長老 就 簽署 咗 張 法帖 即係 命令 啊 ，就 委派 智深 去 管理 菜園 。
智深 接咗 張 法帖 ，辭別咗 長老 就 孭 起 個 包裹 ，掛起 戒刀 揸住 禪杖 ，由 兩個 和尚 帶住 佢 ，一直 去 酸棗 門 外 個 菜園 咯 喎 。
先頭 已經 講咗 一下 㗎喇 ，呢個 菜園 附近 啊 ，有 二三十個 地踎 無賴 ，都 係 啲 賭鬼 嚟 。
佢哋 係 經常 走嚟 菜園 偷菜 ，就係 靠 噉樣 過日子 㗎 嘞 。
呢 一日 ， 有 幾個 地 踎 又 嚟 偷 菜 嘞 喎 ， 咦 ？ 見到 喺 舊 官署 道門 上面 新新掛 起 一張 榜文 喎 ， 上面 寫住 話 ：
大相國寺 ，仰 委 管 菜園 僧人 魯智深 ，前來 住持 ，自 明日 為 始 掌管 ，並 不許 閒雜人等 入 園 攪擾 噉 。
嗰幾個 地踎 睇咗 ，就 走返去 同 嗰班 友 商量 嘞 ：
喂 ，大相國寺 派 咗 個 和尚 叫做 咩嘢 ，誒 咩咩咩 魯智深 喎 ，嚟 管 菜園 噃 。
我哋 趁 佢 新嚟 報到 去 找 佢 晦氣 ，打 佢 個 下馬威 ，等 嗰班 嘢 服 咗 我哋 都 好啊 。
有個 話喇 ：嗱 ，聽 我 講罷啦 ，佢 新嚟 又 唔識得 我哋 嘅 ，噉 我哋 又 點 去 搵 佢 嚟 嘈 呢 又 ？
噉啦 ，等 佢 嚟到 喇 ，就 氹 佢 去 嗰個 大屎氹 旁邊 。
我 哋 整成 係 嚟 參拜 祝賀 佢 噉 嘅 樣 ， 捉住 佢 雙腳 ， 同 佢 打 個 關 斗 推 咗 佢 落 個 屎 氹 處 嚱， 小小 地 同 佢 開 個 玩笑 先 啫 ， 點吖 ？
誒 ，好啊 ，好啊 ！
嗰班友 商量 定嘞 ，就係 等 魯智深 嚟嘞 。
好喇 ，嗰日 魯智深 嚟到 咯喎 。
入到去 間 舊 官署 ，喺 房間 裏 便 就 放好咗 包裹 行李 ，憑 好咗 支 禪杖 掛好 把 戒刀 。
噉嗰幾個 種菜 嘅 道人 呢 ，都 嚟 參拜過 喇 ；所有 嘅 鎖匙 都 交割 清楚 咯 。
帶佢嚟嗰 兩個 和尚 ，同埋 往日 喺度 住持 嘅 老和尚 啊 同 佢 告別咗 之後 ，亦都 一齊 返去 大相國寺 嘞 。
噉啊 剩返 魯智深 一個人 ，無聊 無賴 呢 就 行出去 菜園 四圍 睇下 。
嚟喇 ，嗰 二三十 個 地踎 ，就 攞住 啲 酒 禮 糖果 ，笑 騎騎噉 入嚟 咯 喎 。
佢哋 話 ：誒 聽講 和尚 你 啊 新嚟 住持 ，我哋 街坊 鄰舍 都 好 高興 嚱要 嚟 賀喜 下 你 啊 。
呢班地踎啊 有 兩個 頭頭 ，一個 叫做 過街老鼠 張三 ，一個 叫做 青草蛇 李四 喎 。
佢哋 兩個 嘢 帶住 班友仔 ，企住 喺 個 屎氹 旁邊 ，笑口噬噬 一味 騎騎騎騎噉 ，吖之 就係 唔逳 。
魯智深 初初 唔知 佢哋 想 搞鬼 㗎 ，就 行過去 屎氹 邊 對 佢哋 話 喇 ：
你哋 既然 都係 街坊 ，請 入去 裏 便 坐 啦 。
張三 、李四 見 智深 行過嚟 ，啱喇 ，就 趴 喺 地下 拜 幾 拜 ，猛咁 話 ：恭喜 啊 恭喜 啊 噉 ，唔肯 起身 。
喺度 等 智深 行前 嚟 扶 佢哋 就 趁 機會 逳手 啦 。
智深 呢下 醒覺 喇 ，佢 諗 ：
呢班人 不三不四 ，又唔肯 行過嚟 ，唔通 想整鬼我 ？
哈哈 ，你班傢伙 ，想嚟 掹 老虎鬚 係嘛 ？
好 ，我 就 行過去 ，等 班友仔 見識下 我啲 拳腳 至得 。
噉智深 就 大踏步 向住 嗰班人 行過去 。
張三 同 李四 就 以為 智深 真係 上當 喇 呢趟 。
個口 一便 就 噏住 ：小人 成班 兄弟 專登 嚟 參拜 師父 啊 。
一便 就 圪起身 ，一個 嚟 掹 左腳 ，一個 就 嚟 掹 右腳 咯 喎 。
智深 都 唔 等 佢哋 黐身 ，一起 右腳 ，將 李四 成個 踢起 叮沊 一聲 就 跌咗 落 個 屎氹 處 。
張三 正話 想 縮手 走人 啦 ，智深 嘅 左腳 早就 已經 飛起 喇 ，拂 ！兩個 地踎 都 踢晒 落 個 屎氹 處 瘟 咁 掙扎 。
後頭 嗰 二三十 個 地 踎 無賴 嚇到 面 都 青埋 ，想 鬆 人 。
智深 喝住 佢哋 話 ：一個 走 一個 落去 ，兩個 走 就 兩個 落去 ！
誒誒誒 ，誒唔敢 ，誒唔唔 ，唔敢唔敢 ，嗰班友 冇 個 敢逳 。
好喇 ，嗰個 張三 同 李四 喺 個 屎氹 處 圪 返 個 頭 出嚟 ，嘿呀 ，頭髮 上 便 呀 黐 滿 晒 啲 屎蟲 。
個屎氹 又 深 咯 喎 ，辛苦 咯 ，嗰 兩 個 嘢 猛 咁 叫 啊 ，誒 師父 啊 師父 啊 ，誒 饒恕 我哋 一趟 啦 ，誒 我哋 唔 敢 喇 誒 唔 敢 喇 。
智深 就 喝啲 人 話 ：喂 ！你哋 呢班 友仔 ，快啲 去 拉返起 嗰 兩個 衰公 ，我 就 饒恕 你哋 係 啦 。
嗰班友 ，七手八腳 拉返 起 張三李四 ，去到 葫蘆架 下 便 ，嗯 ，冤崩爛臭 啊 ！
哈哈哈哈 ，你 兩個 蠢材 ！快啲 去 菜園 嗰個 水池 洗乾淨 先 ，等陣 我 有 說話 同 你哋 講 。
嗰 兩個 地 踎喇喇聲 走去 洗身 。
啲 人 就 你 除 一件 我 除 一件 除咗 幾件 衣服 畀 佢 兩個 着住 。
然後呢 ，智深 將 佢哋 都 帶 入去 官署 裏 便 坐 。
智深 坐 喺 當中 ，指住 嗰班人 話 ：
你哋 呢 幫 衰公 ，唔准 呃 我 ，吓 。
究竟 係 啲 咩嘢 人 ，居然 走嚟 呢處 戲弄 我 ？
張三 、李四 同埋 成班 友仔 一齊 跪低 話 ：
誒 ，誒誒 稟告 師父 ，誒 ，誒小人 都係 祖居 喺 呢處 嘅 ，一向 都係 ，嘿嘿 誒 靠 賭錢 搵食 。
誒唔怕 同 師父 講吖 ，誒誒 呢片 菜園 係 我哋 嘅 衣食 飯碗 嚟 。
大相國寺 ，好幾次 使咗 錢 ，想 搵人 嚟 趕 我哋 扯 都 冇 我哋 修 㗎 嚱 。
誒 ， 誒 不過 師父 啊 ， 你 係 邊度 嚟 嘅 長老 啊 ？ 嘩 ， 咁 犀利 嘅 ， 誒 喺 相國寺 裏頭 從來 都 未 見過 師父 你 ， 誒 ， 嗯 嗯 嗯 ， 嗯 ， 我 哋 而家 確係 心甘情願 服侍 你 喇 師父 。
你哋 梗係 未見過 我 定 啦 ，我 係 關西 延安府 ，老種 經略 相公 帳前 提轄 官 。
為因 殺得 人 多 ，所以 情願 出家 。
我 係 喺 五台山 嚟 呢度 ，我 俗家 姓 魯 ，法名 智深 。
咪 講話 你哋 三二十 個 人 唔 算得 乜嘢 啊 ，就係 喺 千軍萬馬 嘅 戰陣 裏頭 ，我 都 敢 殺出 殺入 啊 。
嗰班 地踎 個個 都 聽到 岌頭岌腦 ，再三 拜謝 噉 就 扯咗 咯 。
智深 亦都 返返 入 房 ，打開 啲 鋪蓋 行李 ，安頓 好 住宿 個 地方 。
第二日 ，嗰班 地踎 夾咗 啲 錢 ，買咗 十樽 酒 ，捉咗 一隻 豬 ，嚟 請 魯智深 嘞噃 。
就喺 官署 裏頭 就 整好晒 ，請 魯智深 坐正 喺 中間 。
嗰 二三十 個 地踎 呢 ，就 坐 喺 兩邊 兩便 嚟 。
智深 話 喇 ：誒噉 點 係 啊 ，要 你哋 大家 使 錢 吓 。
我哋 有福喇 呢趟 ，今勻 呀 ，有 師傅 你 喺 呢度 同 我哋 做 主 啦 嘛 。
哈 ， 哈哈哈 哈哈 ， 好 ， 飲 ！ 智深 非常 歡喜 。
佢 同埋 大家 開懷 痛飲 ，飲到 咁上下 ，都 有 多少 醉意 嘞 。
有人就唱嘢 ，有人就講東講西 ，有人就拍手 有啲 啊嘰嘰喀喀噉 大聲咁笑 ，高興到不得了 。
正喺度 熱鬧緊 嘅 時候 ，忽然 聽到 門口 外 便 有 啲 烏鴉 嘩嘩嘩 咁 猛 咁 叫 。
嗰班人 裏頭 呢 ，有啲 係 又 迷信 又 勢利 嘅 ，就 一齊 話 喇 ：
赤口 上天 白口 入地 ， 赤口 上天 白口 入地 。
智深 就 問 佢哋 話 ：喂 ，你哋 喺度 亂噏 乜嘢 啊 ？
哦 ，烏鴉 叫 怕 有 口舌 ，唔利事 啊 。
邊度 有 啲 噉事 啦 ？
嗰個 種菜 嘅 道人 笑住 話 喇 ：呢 ，喺 墻角 嗰便 啊 嗰樖 楊樹 上 便 新新 搭 咗 個 烏鴉 竇 ，日日 都 呱呱 聲 從 朝 嘈 到 晚 。
嗰班人 就 話 喇 ：嘿 ，擔 把 梯 嚟 去 拆 咗 個 竇 咪 得 咯 。
有 幾個人 就 話 ：去咯 去咯 去咯 ，真係 想 去 擔 梯 嘞 喎 。
智深 趁住 酒興 ，亦都 同埋 大家 一齊 出去 睇下 。
冇錯喺嗰樖楊樹上便就有個烏鴉竇 。
啲人 就 話 喇 ：嚟嚟嚟 ，快啲 攞 把 梯 嚟 擒 上去 拆 鬼 咗 佢 ，咪 等 佢 喺度 嘈 之 巴閉 。
李四 就 話 喇 ：唔使 梯 嘞 ，我 就 噉 擒 上去 就 得 喇 。
智深 瞄咗 一瞄 ，行到 樖樹 嘅 前面 ，除低 件 和尚袍 ，護低 個 身 。
右手 向下 就 左手 向上 ，揦 實 嗰 樖 楊樹 ， 嘁 ！ 將條 腰 一直 ， 成 樖 楊樹 就 畀 佢 連根拔起 。
嘩 ！嗰班 地踎 見到 呀 ，一齊 拜到 喺 地下 嚟 ，一味 話 ：師父 啊 ，你 唔係 個 凡人 啊 ，直情 係 個 羅漢 喇 ！
如果 冇 萬零斤力 呀 點 拔得起 吖 ？
噉 有 乜嘢 啊 ，聽日 ，你哋 都 嚟 睇 我 演武 ，使 器械 。
當晚 飲完酒 ，大家 就 高高興興 散咗 咯 。
就係 從 第二日 開始 ，呢 二三十個 地踎 無賴 對 魯智深 呀 服服帖帖 。
每日 都 帶 啲 酒肉 嚟 請 魯智深 ，睇 佢 打拳 演武 。
過咗幾日 ，智深 諗 ：
日日 都 食得 佢哋 多 嘞 ，等 我 今日 都 請 返 佢哋 一 餐 嚟 還 席 至 得 。
於是就叫人入城去買咗幾樣點心生果 ，買咗兩三擔酒 ，劏咗隻肥豬 、一隻羊 。
當時 正 係 三月 尾 ，個 天 都 幾 熱 下 㗎 喇 。
智深 就 叫 人 喺 槐樹 下面 ，鋪 咗 幾 張 蘆席 ，請 嗰班 地 踎坐 落 。
大碗 大碗噉 斟酒 ，大嚿 大嚿噉 切肉 ，食到 嗰班 友仔 呀 飽晒 。
再攞啲點心水果出嚟又飲過一輪 ，都唔知幾高興 。
嗰班 地踎 就 話 喇 ：師父 ，呢 幾日 ，淨係 見到 師父 你 打拳 ，都 未曾 見過 師父 使 器械 嘅 。
哈點得師父 你 玩返 兩道 畀 我哋 睇下 噉 就 好咯 。
得啊！ 智深 返入 房 ，攞 嗰 支 渾鐵 禪杖 出嚟 。
嗰支禪杖 呀 頭尾 五尺 長 ，六十二斤 重 。
大家 見到 都 吃咗 一驚 ，嘩嗨 ！兩隻 手瓜 你 話 冇 水牛 噉 嘅 氣力 呀 點 舞得 逳佢 吖 ？
智深 攞起 支 禪杖 喺 手 嚟 ，拂拂 聲 噉 舞起 上嚟 ，真係 勻身 上下 冇 半點 破綻 。
嘩嗨 ！好嘢 ！好嘢 ！大家 一字 睇 就 一字 喝彩 。
