話說 姜維 啊 ，佢 啊 畀 魏兵 偷襲 ，嗰 晚 佢 連忙 上馬 逃跑 因為 走得 匆忙 ，連 兵器 都 冇 帶 ，只係 得 一 張 弓 ，箭 都 冇 嘅 嘿 真係 狼狽 到 極 咯 。
姜維 就 一直 向住 山 裏頭 走啊 。
郭淮 帶住 兵 喺 佢 後便 猛咁 追 。
郭淮 隔遠 睇見 姜維 手無寸鐵 嘅 ，哼哼 你 仲 唔死 呢趟 。
就 驟馬 挺槍 飛快噉 追上去 。
近 喇 ， 近 喇 ， 追到 喇 追到 喇 ， 姜維 嘣 噉 空拉 一下 弓弦 ， 一 於 靠嚇 啊 。
郭淮 聽見 弓弦 響 以為 佢 射箭 過嚟 就 急急 閃開 ，誒 ？冇 箭 㗎 。
佢 又 追 ，嘣嘣嘣嘣 ，姜維 連氣 空 拉咗 十幾 下 弓弦 ，都係 冇 箭 出 嘅 。
郭淮 閃得 幾閃 ，哼哼 原來 你 冇 箭 ，你冇箭 呀 我 大把 喎 。
於是 郭淮 就 喺 馬鞍橋 處 掛起 鋼槍 ，拈 弓 搭 箭 ，𠻘噉 一箭 射過去 。
姜維 急忙 一閃 ，順手 就 接住 支 箭 ，就 扣 喺 弓弦 上 便 。
等到 郭淮 追近 嚟 喇 ：送返 畀 你 ！對準 郭淮 嘅 面門 出 衡力 射過去 。
郭淮 應 弦 落馬 ，姜維 一 勒 隻 馬 跑 返 轉頭 ，要嚟 殺 郭淮 。
呢個 時候 ，魏軍 已經 大隊 人馬 衝 到 嘞 。
姜維 嚟 唔切 逳手 啊 只係 掹咗 郭淮 支 槍 走人 。
噉 魏兵 呢 亦 唔 敢 去 追 佢 ，連忙 救起 郭淮 就 返去 營寨 ，掹咗 個 箭頭 出嚟 ，結果 呢 ，流血 不止 ，郭淮 噉 就 死咗 咯 。
司馬昭 就 指揮 人馬 衝 落山 ，亦 一齊 去 追殺 蜀兵 。
追到半路 ，見到 郭淮 負咗重傷 返嚟 ，噉 亦 唔去追 喇 就 收兵 回營 。
夏侯霸 隨後 呢 ，亦都 趯到 嚟 同 姜維 會合 ，噉 啊 一齊 返去 漢中 。
呢 一次 北伐 啊 ， 姜維 雖然 打 咗 敗仗 啊 ， 不過 射死 咗 郭淮 殺死 咗 徐質 ， 挫折 咗 魏國 嘅 軍威 ， 噉 啊 將功補過 啦 。
而家 講 下 司馬昭 ，佢 慰勞 完 羌兵 ，打發咗 佢哋 回國 之後 ，就 班師 返去 洛陽 。
繼續 同 佢 大佬 司馬師 啊 專制 朝政 ，噉 文武百官 冇 個 敢 話 唔 服 嘅 。
魏主曹芳啊 ，每次 見到 司馬昭 入朝 呢 ，都 慌到 周身 滴滴震 嘅 ，背脊 就 好似 畀 針 㓤 噉 。
有一日 ，曹芳 就 登殿 臨朝 ，見到 司馬師 帶住 劍 上殿 喎 。
佢 又 本來 喺 張 龍椅 處 坐緊 嘅 ，嘿 慌忙 起身 ，行 前 兩 步 嚟 迎接 司馬師 。
司馬師 就 笑喇 佢 話 ：哈哈哈哈哈哈 ，啊 ，邊度 有 君王 迎接 臣子 㗎 。
冇噉嘅禮嘅喎 ，吓 陛下 請坐 ，陛下 請坐 ！
過咗一陣 ，啲 大臣 稟奏 事情 啊 ，全部 都 係 由 司馬師 一個人 解決 處理 ，半句 都 冇 向 曹芳 啟奏 嘅 。
等到退朝喇 ，司馬師 就 昂昂然 噉 行出 金殿 坐車 離開 皇宮 。
嘩前呼後擁 ，不下 幾千 人馬 ，氣焰 呀 真係 大喇 。
曹芳啊返到入去後殿 ，當時喺佢身邊 ，只係有 三個人 ：就係 太常 夏侯玄 ，中書令 李豐 ，光祿大夫 張緝 。
張緝 乃 係 張皇后 嘅 父親 ，就係 曹芳 嘅 岳父 咯 。
曹芳 叫 啲 太監 啊 侍從 人員 行開 ，就 同咗 佢哋 三個 人 啊 ，入去 間 密室 裏 便 商量 。
講得 兩句 ，曹芳 就 揸住 佢 岳父 張 緝 隻 手 喊起上嚟 ，佢 話 ：
司馬師 ， 司馬師 對 朕 就 好似 細佬哥 噉 ， 睇 啲 百官 ， 就 好似 條草 咁 賤 。
魏國 嘅 社稷 呀 ，好快 就 會 畀 佢 搶 咗 去 㗎 喇 ，唉 ，唉 ！
講完 ，哇哇聲 噉 喊起嚟 。
李豐 話 喇 ：陛下 唔使 擔心 嘅 ，臣 雖則 係 能力 淺薄 ，之 如果 陛下 寫 一 張 詔書 交畀 臣 ，臣 必定 去 聚集 天下 嘅 英傑 ，剷除 呢個 奸賊 ！
夏侯玄 就 話 喇 ：陛下 ，臣 嘅 叔父 夏侯霸 ，之所以 投降 蜀國 呢 ，皆因 係 怕 司馬 兄弟 謀害 佢 啫 。
而家 如果 剷除 咗 呢 兩個 奸賊 ，臣 嘅 叔父 必定 會 返嚟 㗎 。
臣乃係 國家 嘅 元老 親戚 ，點能夠 坐 喺 處 睇住 奸賊 亂國 都 唔理 㗎 。
臣 願意 共同 奉 皇上 之 命 ，去 討伐 逆賊 啊 ！
曹芳 就話喇 ：就係 怕 ，怕做唔成 咋 。
噉 三個人 都 喊住 噉話 ：臣等 發誓 ，要 同心協力 ，消滅 逆賊 嚟 報答 陛下 。
於是 曹芳 就 除咗 件 龍鳳 汗衫 落嚟 ，咬穿 隻 手指 ，擠 啲 血 出嚟 ，用 啲 血 嚟 寫 一 張 詔書 ，交咗 畀 張 緝 。
噉 曹芳 啊 叮囑 佢哋 話 喇 ：
朕 嘅 先祖 武皇帝 ， 當日 殺 董承 呀 ， 係 因為 董 承 佢 哋 做事 唔 得 嚴密 啊 。
三位 愛卿 ，務必要 謹慎小心 ，千祈千祈 唔好 洩露 出去 至好啊 ！
李豐 話 喇 ：陛下 ，點解 講 啲 咁 唔吉利 嘅 說話 呢 ？
臣等 唔係 董承 啲 噉嘅 人 ，而 司馬師 ，又 點 能夠 同 武皇帝 相比 呢 ？請 陛下 放心 。
噉 三個人 辭別 咗 曹芳 就 行 出 皇宮 。
當佢哋嚟到東華門左近 ，撞正 司馬師 帶住 劍 嚟緊 嘞 。
後便 幾百人 跟住 佢 ，個個 都係 帶住 兵器 嘅 。
三個人 恭恭敬敬 企 喺 路邊 讓 司馬師 行 。
嚟到 面前 ，司馬師 停住 腳步 ，問 佢哋 話 喇 ：
你哋 三個人 ，退朝 點解 咁 遲 啊 ？
李豐 就 回答 話 喇 ：因為 主上 喺 內庭 睇書 ，我哋 三個人 要 侍候 主上 讀書 啊 。
睇 乜嘢 書 啊 ？ 係 夏商周 三代 嘅 書 呀 ？ 主上 睇 呢 啲 書 ， 問過 你 哋 乜嘢 事 呢 ？
主上 問 嘅 ，乃 係 伊尹 輔助 商朝 ，同埋 周公 攝政 嘅 事 。
我哋 都 稟奏 話 ，而家 司馬 大將軍 ，就係 伊尹 、周公 喇噉 。
哼哼 ，嘿嘿嘿嘿嘿嘿嘿嘿嘿 。
你哋 邊處 係 將 我 嚟 比作 伊尹 、周公 吖 ，你哋 個 心 呀 ，其實 話 我 係 王莽 、董卓 就 真 ！
我哋 都係 將軍 門下 嘅 人 ，點 敢 噉樣 吖 ？
呸 ！你哋 都係 當面 奉承 ，表裏不一 嘅 人 。
先頭 你 哋 同主 上 喺 間 密室 裏 便 ， 為 乜嘢 事喊 啊 ？ 為 乜嘢 事喊 ！ 啊 ！
冇啊 ，冇 喊到 啊 。
你哋 三個人 ，喊到 而家 雙眼 仲 紅嘅 ，仲 想 抵賴 ！
夏侯玄 知道 事情 已經 洩露 ，包唔住 㗎喇 ，就 大聲 鬧 司馬師 話 ：
我哋 喊 乜嘢 呀 ，就係 因為 你 ，你威震 其 主要 謀朝 篡位 咯 ！
司馬師 嬲 到 極 啊 ，叫 啲 武士 去 捉 夏侯玄 。
夏侯玄 捋起 衫袖 撲上去 要打 司馬師 ，啲 武士 人多 一下 就 捉實 佢 。
司馬師 就 叫 人 搜 佢哋 身 ，結果 就 喺 張 緝 嘅 身邊 啊 ，搜出 一件 龍鳳 汗衫 ，上面 有 啲 血字 嘅 。
啲人 就 呈上去 畀 司馬師 睇 ，一 睇 ，哦 ，原來 係 秘密 詔書 。
上便 係 噉 寫嘅 ：
司馬師 兩 兄弟 ，一齊 把持 大權 ，就 要 謀 朝 篡位 。
佢哋 所 頒佈 嘅 命令 ，全部 都 唔係 朕 嘅 本意 。
各部 官兵 將士 ，應該 心存 忠義 剷除 逆賊 ，匡扶 社稷 。
功成之日 ，重加賞賜 ！
司馬師 一 睇完 火滾 喇 ，嬲 到 佢 七竅 生煙 。
佢 話 ：原來 你哋 想 謀害 我 兩 兄弟 ？真係 情理 難容 啊 ！
即刻 就 下令 將 佢 三個人 拉去 街市 腰斬 ，滅 佢哋 三族 ！
夏侯玄 佢哋 三個人 ，一路 唔停口 噉 痛罵 司馬 師兄弟 。
及至 拉到 去 街市 嘅 時候 ，唉 ，佢哋 啲 牙 呀 ，都 畀 劊子手 打甩晒 啊 。
噉 各人 仲 係 哩哩𦧲𦧲 噉 鬧 ，一直到 死 。
司馬師 處置咗 佢哋 三個人 ，就 入 皇宮 咯 喎 。
當時 曹芳 呢 ，正 係 同 張皇后 細細聲 喺度 傾緊 呢件事 。
皇后 就 話 喇 ：宮廷 裏 便 ，耳目 眾多 ，如果 事情 洩露 咗 出去 ，必定 會 連累 埋 我 㗎 喇 。
正喺度傾緊 ，突然間 見到 司馬師 入嚟 ，張皇后 嚇到 大驚失色 。
司馬師 按住 把 劍 對 曹芳 話 ：
臣嘅 父親 ，立 陛下 做 君王 ，功德 ，係 不在 周公 之下 。
臣侍奉陛下 ，亦 同 伊尹 有 何 分別 呢 ？
今日 反而 以 恩 為 仇 ，以 功 為 過 ，想 同 三兩個 小臣 嚟 謀害 臣 嘅 兩 兄弟 ，點解 啊 ？
朕 ， 朕 冇 噉 嘅 心 噃。
冇 ？司馬師 喺 衫袖 籠 攞 出 件 龍鳳 汗衫 ，掉 咗 落地 。
佢 話 ： 係 邊個 寫 嘅 ？ 係 邊個 寫 嘅 ！
當堂 嚇到 曹芳 魂 飛天外 ，魄 散 九霄 。
佢 牙齒 打掛 噉 話 ： 誒 ， 呢 啲 ， 呢 呢 啲 都 係 人 ， 誒 ， 人 哋 ， 逼 朕 噉 做 個 啫 ， 朕 ， 誒 朕 自己 ， 點會 起 噉 嘅 心 吖 ？
誣陷 大臣 作反 ，該當 何罪 啊 ？
曹芳 啪聲 下跪 喺 地 嚟 ：朕 係 有罪 ，請 大將軍 恕罪 。
陛下 請 起身 ，國法 唔能夠 廢除 嘅 。
司馬師 指住 張皇后 話 ：佢 係 張緝 個 女 ，要 殺咗 佢 ！
曹芳 諤諤聲 噉 喊 ，哀求 司馬師 唔好 殺 張皇后 。
司馬師唔肯 ，喝啲 武士 拉咗 張皇后 去到 東華門內 ，用 白布 嚟 勒死 佢 。
唉 ！歷史 啊 ，往往 係 有 驚人 相似 嘅 地方 。
嗱 ，喺 四十 年前 ，曹芳 嘅 先祖 曹操 啊 ，因為 漢獻帝 嘅 妻子 伏皇后 啊 ，同 佢 父親 伏完 ，合謀 要 剷除 佢 。
故此 就 帶人 入去 皇宮 捉咗 伏皇后 ，將 佢 亂棍 打死 。
同時又 殺咗 伏皇后 生 嘅 兩個 仔 ，殺咗 伏家 嘅 宗族 百多 二百 人 。
而家 呢件事 呢 又 重演 嘞 ，不過 殺人者 與 被殺者 呢 ，調咗 轉頭 就 係 咯 。
好喇閒話休提 ，言歸正傳啊 。
第日 司馬師 喺 朝廷 上 大會 群臣 ，佢 話 ：
而家 主上 荒淫無道 ，聽信 讒言 ，閉塞 賢路 ，罪過 甚大 ，再 唔能夠 做 天下 之 主 。
我而家 要 學 古代 大臣 嘅 辦法 ，另立 一位 新 皇帝 ，以 保全 社稷 ，安定 天下 。
各位 以為 如何 啊 ？
嗰 班 大臣 一齊 應 佢 話 ： 大將軍 所 做 嘅 事 ， 正 所謂 應天順人 ， 邊個 膽敢 違反 啊 ？ 應該 噉 做 ， 應該 噉 做 ！
司馬師 就 帶住 一班 大臣 入去 永寧宮 ，去 稟奏 太后 。
太后 問嘞 ：大將軍 噉 想 立 邊個 做 君王 呢 ？
臣 認為 彭城 王 曹 據 ，聰明 仁孝 ，可以 做 天下 之 主 。
大將軍 ， 彭城王 乃 係 我 阿叔 嚟 ， 如果 立 佢 做 君王 ， 噉 我 呢 個 太后 就點 當得起 呢 ？
而家 高貴 鄉公 曹髦 ，乃係 文皇帝 嘅 孫 ，佢 為人 溫和 恭儉 啊 ，可以 立 佢嘅 。
請 大將軍 同 各位 大臣 從長計議 啦 。
有個人 出嚟 稟奏 話 喇 ：太后 所講 嘅 好啱 ，而家 就 可以 決定 立佢 㗎 喇 。
呢個 係 邊個 啊 ？原來 係 司馬師 嘅 同宗 叔父 司馬孚 啊 。
於是 司馬師 一便 就 派遣 使者 ，去 元城 召 曹髦 入 朝 ；
一便呢 ，就 請 太后 去 太極殿 登殿 ，召 曹芳 嚟 斥責 佢 。
太后 話 喇 ：你 荒淫 無道 ，唔能夠 繼承 天下 喇 。
你 留低 璽綬 ，仍舊 恢復 你 齊王 嘅 爵位 ，立即 起程 ，以後 冇 宣召 就 唔准 入朝 喇 。
曹芳 流住 眼淚 ，拜別 咗 太后 ，將 個 皇帝 印 交出嚟 ，就 坐 車 離開 京城 ，喊到 呀 ，諤諤聲 噉 走咗喇 。
而家 講 下 曹髦 啊 ，嗰日 佢 奉命 嚟到 ，噉 文武 官員 都 喺 西翼 門 外 便 跪拜 迎接 。
曹髦 就 慌忙 答禮 。
太尉 王肅 就 話 喇 ：主上 唔使 答禮 嘅 。
曹髦話 ，我 亦 係 個 臣子 唧 ，點能夠 唔 答禮 啊 ？
噉 文武百官 請 曹髦 坐 御輦 即係 皇帝 嘅 車 ，入 宮 。
曹髦 推辭 話 喇 ：太后 有 詔 宣召 我 入朝 ，唔 知道 係 為咗 咩嘢 事 啊 ，我 點 敢 坐 御輦 入 宮 呢 ？
於是就 步行 ，一直 行到 太極東堂 。
司馬師 出嚟 迎接 嘞 ，曹髦 一 見到 就 下拜 行禮 。
司馬師 連忙 扶起 佢 啦 。
問候完喇 ，就 帶佢 去 見 太后 。
太后 話 ：我 見 你 細個 嘅 時候 ，就 有 帝王 之 相 。
你而家 做咗 天下之主 喇 ，務必要 恭儉節省 ，布德施仁 ，唔好 對唔住 先帝 啊 。
曹髦 又 好 謙虛 再三 推辭 。
當然喇呢啲都係官樣文章唧 ，噉有皇帝做都唔做咩 ？
噉司馬師 叫 文武百官 嚟 請 曹髦 登上 太極殿 ，當日 就 立佢 為 新 嘅 君主 。
將 原來 嘅 嘉平 六 年 啊 ，就 改為 正元 元 年 ，即係 公元 二 五 四 年 啊 。
跟住 就 發佈 命令 ，大赦 天下 。
對 大將軍 司馬師 呢 ， 當然 係 要 給予 佢 最大 嘅 特權 咯 ， 噉 無非 又 係 入 朝 不 趨 ， 奏事 不名 ， 帶劍 上 殿 等等 啦 。
噉啊 至於 文武百官 亦 各 有 封贈 ，呢啲 就 唔 講 佢 喇 。
噉啊 而家 講下 喺 曹髦 登位 嘅 第二 年 啊 ，就係 ，正元 二 年 正月 ，揚州 都督 、鎮東 將軍 、領 淮南 軍 馬 毋丘 儉 ，佢 聽聞 司馬 師 竟然 擅自 廢立 皇帝 ，個 心 就 好 憤怒 。
佢 有 個 大仔 叫做 毋丘甸 ，就 對 佢 話 喇 ：
父親 ，你 係 一位 總攬 整個 地區 軍政 大權 嘅 官員 。
而家 司馬師 專權 廢主 ，國家 非常之 危險 。
父親 你 又 點 能夠 置之不理 ，好似 冇事 噉 嘅 呢 ？
係 ，阿仔 你 講得 啱 。
毋丘儉 於是 就 請 刺史 文欽 嚟到 商量 。
文欽 乃 係 當日 曹爽 門下 嘅 賓客 。
呢一日 ，佢 得到 毋丘儉 嘅 邀請 就 立即 就去啦 。
毋丘儉 請 佢 入去 後堂 行過 禮 ，坐落 傾偈 。
傾傾下 毋丘儉 就 流起 眼淚 嚟 。
文欽 好奇怪嘞 ，就 問佢 為咩嘢事 喊啦 。
毋丘儉 話 喇 ：唉 ！司馬師 專權 廢主 ，顛倒 天地 ，吖 ，點 能夠 唔 傷心 呢 ？
都督 獨當一面 ，若果 能夠 發揚 正氣 討伐 逆賊 ，我 文欽 願意 捨死 相助 。
我 個 第二仔 叫做 文淑 ，小名 叫做 阿鴦 ，佢 有 萬夫不當之勇 ，時常 都 想 殺咗 司馬師 兩 兄弟 ，為 曹爽 報仇 。
起兵嘅時候 ，佢 可以 做 先鋒 。
毋丘儉 好 歡喜 啊 ，兩個人 立即 就 當天 奠酒 發誓 。
跟 住 佢 兩個 詐家 意話 太后 有 秘密 嘅 詔書 ， 下令 淮南 所有 嘅 官兵 將士 啊 ， 都 集中 嚟 壽春城 。
呢一日 ，喺 城西 築起 一個 壇 ，殺咗 一匹 白馬 ，歃血盟誓 ，當眾 宣佈 司馬師 ，大逆不道 。
而家 奉咗 太后 嘅 秘密 命令 ，要 出動 淮南 全部 軍馬 ，發揚 正氣 啊 討伐 逆賊 。
呢個 號召 呀 全軍 上下 ，個個 都 心悅誠服 ，個個 都 擁護 。
噉毋丘儉 呢 就 率領 六萬 兵 ，去 項城 駐扎 。
項城 係 喺 今日 河南省 嘅 東部 ，沈丘 縣 嘅 南方 。
文欽 就 率領 二萬 兵 喺 外圍 作為 游兵 ，往來 接應 。
同時 毋丘儉 就 發出 檄文 ，知會 各個 州郡 ，號召 大家 起兵 嚟 相助 。
而家 講返 下司馬師 ，司馬師 嘅 左眼 下 便 有 個 肉瘤 嘅 ，近來 呢 時時 都 覺得 又 痛 又 癢 ，就 叫 個 醫官 嚟 同 佢 割咗 個 肉瘤 ，敷咗 藥 。
呢一排 一直 都 喺 屋企 休養 。
呢一日 佢 聽聞 話 淮南 告急 ，就 請 太尉 王肅 嚟到 商量 。
王肅 話 喇 ：往日 ，關雲長 威震 華夏 ，冇人 能夠 抵敵 佢 。
收尾 ，孫權 派 咗 呂蒙 奪取 荊州 。
噉 對待 將士 嘅 家屬 呢 ，係 非常之 優待 ，因此 關公 嘅 軍隊 就 瓦解 嘞 。
目前 淮南 將士 嘅 家屬 都 喺 我哋 中原 嚟 ，請 大將軍 你 下令 ，優待 佢哋 。
同時 用 一支 軍隊 ，切斷 佢哋 嘅 歸路 ，噉 敵軍 就 必定 土崩瓦解 㗎 喇 。
係嘅 ，太尉 你 講得 好啱 。
不過 ，我 啱啱 先至 割咗 嗰個 肉瘤 ，自己 就 唔能夠 去 喇 。
唉 ！若果 派 第二個人 去 ，之 我 又 放心 唔落 啊 。
當時 中書侍郎 鍾會 亦 在場 ，佢 就 建議 話 喇 ：
淮南 嘅 兵力 強大 ，氣勢 極盛 ，若果 派 第個人 帶兵 去 打 八成 係 不利 ，稍為 有 一啲 唔妥 大局 就 危險 嘞 。
司馬師 聽咗 啪聲 下 企起身 ，斬釘切鐵 噉 話 ：唔係 我 親自 去 ，就 打佢 唔贏 喇 ！
於是呢 就 留低 司馬昭 守衛 洛陽 ，總管 朝政 。
自己 就 坐 一架 設備 舒服 嘅 車 ，帶 病 出征 。
佢 命令 鎮東 將軍 諸葛 誕 就 總督 豫州 各路 軍馬 ，由 安風津 去 奪取 壽春 ；
又 命令 征東 將軍 胡遵 ，率領 青州 各路 兵馬 ，去 譙 、宋 呢啲 地方 ，即係 今日 安徽 亳縣 ，同 河南省 商丘縣 一帶 嘅 地方 ，嚟 切斷 毋丘儉 佢哋 嘅 歸路 ；
又 委派 荊州 刺史 、監軍 王基 率領 前鋒部隊 ，首先 去 奪取 鎮南 個 地方 。
司馬師 親自 統率 大軍 ，嚟到 襄陽 駐扎 。
呢一日 ，佢 召集 部下 嘅 文武 官員 啊 嚟到 中軍 帳 商量 。
有個 官員 叫做 鄭袤 啊 ，佢 話 ：
毋丘儉 多謀 而 冇 決斷 ，文欽 啊 雖然 勇猛 之 缺乏 才智 。
不過 江淮 嘅 兵馬 銳氣 正盛 不可 輕敵 。
我軍 應該 做好 防禦工事 ，唔好 同 佢哋 打住 ，噉 相持 一個 時候 嚟 挫折 敵人 嘅 銳氣 就 啱喇 。
呢個 乃係 當年 周亞夫 嘅 上策 啊 。
監軍 王基 就 唔 同意 鄭袤 呢個 意見 佢 話 ：
噉唔好 ，淮南 嘅 叛亂 並非 軍民 想 作反 。
一切 都係 畀 毋丘儉 逼住 ，所以 不得已 跟住 做 嘅 啫 。
我哋 大軍 一 到 啊 ，佢哋 就 會 瓦解 㗎 嘞 。
講得妙 ，講得妙啊 ！
司馬師 認為 王基 講得啱 ，就 進兵 去到 濦水 一帶 ，中軍 就 駐扎 喺 濦橋 。
王基話 喇 ： 南頓 呢 笪 地方 ， 好 適宜 於 駐兵 ， 請 大將軍 下令 盡快 去 奪取 佢 啦 ， 如果 一遲 ， 毋丘儉 就 會 去 咗 先 㗎 喇 。
司馬師 同意 喇 ，就 命令 王基 嘅 前鋒 部隊 去 南頓城 安營 扎寨 。
南頓城 就 喺 而家 河南省 項城 嘅 西南 。
當時 毋丘儉 喺 項城 ，佢 聽聞 司馬師 親自 帶兵 嚟到 唄 ，就 聚集 大家 嚟 商量 嘞 。
先鋒葛雍 就 話 ：
南頓 呢 笪 地方 依 山 傍 水 ，駐兵 啊 最好 。
如果 畀 魏兵 佔咗 先 呢 ，就 難以 驅趕 㗎 喇 ，將軍 應該 盡快 去 佔領 南頓 先 啊 。
毋丘儉 覺得 佢 講得 好 有道理 ，就 起兵 去 南頓 咯 喎 。
行行下 ，前便 流星馬 嚟 報告 話 ，已經 有人 喺 南頓 安營 喇 噉 。
毋丘儉 都 仲 唔 信 啊 ，就 親自 去到 前 便 睇下 。
嘩 ，果然 見到 旌旗 遍野 ，營寨 齊整 。
毋丘儉心 都 實晒咯 ，返到去 真係 無計可施 。
忽然間 探子 飛馬 嚟 報告 話 ，東吳 孫峻 帶 兵 渡江 ，襲擊 壽春 噉 。
嚇到 毋丘儉 大驚 啊 ，佢 諗 ：
如果 壽春 失守 ，就 無家可歸 㗎喇 ，於是 喺 當晚 就 退兵 返去 項城 。
司馬師 發覺 毋丘儉 退兵 啊 ，就 同 啲 文武官員 研究 啦 。
尚書傅嘏 就 話 ：
而家 毋丘儉 之所以 退兵 ，乃係 怕 東吳 襲擊 壽春 啊 。
噉佢 必定 返去 項城 分兵 去 抵抗 嘅 。
請 大將軍 下令 ， 派 一支 軍隊 去 奪取 樂嘉城 ， 另 一支 軍隊 去 奪取 項城 ， 再 一支 軍隊 去 奪取 壽春 。
噉 樣 呢 ， 淮南 嘅 兵 就 必定 要 撤退 㗎 喇 。
嗯 ，派邊個 去 打 樂嘉城 好 呢 ？
大將軍 ，兗州 刺史 鄧艾 足智多謀 ，若果 派佢 帶兵 去 奪取 樂嘉 ，同時 大將軍 再 派 一支 大軍 去 援助 ，要 擊敗 敵人 就 唔 難 嘅 。
司馬師 聽 佢 嘅 ，連忙 就 派 使者 帶住 檄文 去 命令 鄧艾 出動 兗州 嘅 兵馬 ，去 攻破 樂嘉城 。
隨後呢 ，司馬師 親自 帶 大軍 去 嗰處 同 鄧艾 會合 喇 。
